د لاسرسۍ وړ لېنکونه

تازه خبر
دوشنبه ۲۴ زمری ۱۴۰۱ کابل ۰۵:۳۴

افغانستان

پکتيا کې سېلاب ځپلو د بېړنيو مرستو غوښتنه کړې

پکتيا کې تازه سېلابونه چې ويجاړۍ يې رامنځته کړي

وروستیو ورښتونو د پکتیا ولایت د مرکز په ګډون په زرمت، ځاځي اریوب، جاني خېل، سید کرم، احمد ابا، ډنډ پټان او څمکنیو ولسوالیو کې سېلونه جاري کړل چې له کبله یې د سر و مال تاوانونه پېښ شول.

ځايي چارواکي په سېلونو کې د ۶ تنو مړینه تاییدوي او وايي چې ډېر کورونه، لارې، پلونه، ویالې، کاریزونه، باغونه او فصلونه ویجاړ شوي دي.

هغه خلک چې سېلابونو ځپلي د بېړنيو مرستو غوښتنه کوي.

په وروستیو ورځو کې د افغانستان په یو شمېر نورو جنوبي او ختیځو ولایتونو کې سېلونو د سر و مال ډېر تاوانونه واړول.

د ورځې تازه خبرونه دلته ولولئ

په خوست کې د ازادۍ راډ‌یو پخوانی خبریال امیر بهیر د ناڅاپي ناروغی له کبله ومړ

امير بهير

امیر بهیر شاوخوا ۶۳ کاله عمر درلود او ۱۲ کاله یې له ازادي راډیو سره کار وکړ.

نوموړي اوس مهال د خوست د لوړو زده کړو په یو شمیر موسسو کې د حقوقو او سیاسي علومو پوهنځي استاد وو.

امیر بهیر د څو کلونو لپاره په خوست کې د خبریالانو د یوې خپلواکې ټولنې مشر وو او د رسنیزو بنسټونو او خبریالانو د حقوقو په دفاع کې يې مهمه ونډه درلوده.

د امیر بهیر مړی نن د دوشنبې په ورځ په خپله پلرنۍ هدیره کې خاورو ته وسپارل شو.

د نوموړي د جنازې په مراسمو کې د ځايي خلکو سربېره د دې سیمې یو شمېر روڼ اندو، د رسنیو استازو او د مدني ټولنو فعالانو برخه اخیستې وه.

د خوړو نړيوال پروګرام: روان کال مو ۲۱ ميليون زيان‌ګالو افغانانو سره مرستې کړي

مرستې - ارشيف

د خوړو نړیوال پروګرام ډبیلو، اف، پي وایي، روان کال یې په افغانستان کې له ۲۱ ميلیون زیاتو زیانګالو خلکو سره مرستې کړي دي.

خو ډبیلو اف پي نن په یوه ټویټ کې ویلي چې له دغو مرستو سره سره لوږه نه‌ده کمه شوې او اوس هم په ميلیونونو کسان هره شپه وږي بیدیږي.

د خوړو نړیوال پروګرام ویلي چې د خوراکي مرستو د دوام لپاره ۹۶۰ ميلیون امریکایي ډالرو ته اړتیا لري چې په ژمي کې د اتلس ميلیونه کسانو لاس‌نیوی وکړي.

بل پلو د افغانستان لپاره د ملګرو ملتونو د خوړو او کرڼې اداره یا فاو وایي، په تېرو دولسو میاشتو کې یې په افغانستان کې له زیانګالو بزګرو سره د غنمو د اصلاح شویو تخمونو، کیمياوې سرې او تخنیکي روزنې مرستې کړي ترڅو د خوړو د نه خوندیتوب د بحران مخه ونیول شي.

فاو په یوه ټویټ کې ویلي چې غنم د افغانستان اصلي محصولات دي او د دې هېواد د وګړو د ټول مصرف شاوخوا اویاسلنه جوړوي.

ملګري ملتونه: د افغان نجونو او ښځو له وړتيا ګټه نه‌ده اخيستل شوې

يو شمېر افغان نجونې چې انځورګري کوي

د ملګرو ملتونو د جنسیتي مساواتو او د ښځو د پیاوړتیا د چارو ادرې ویلي، په افغانستان کې د ښځو او نجونو له وړتیاووهیڅ استفاده نه‌ده شوی.

دغې اداري نن په یوه ټویټ کې ویلي، تر هغو به افغانستان تلپاتې سولې او ثبات ته ونه رسیږي ترڅو د دې هېواد په ورځني ژوند کې د ښځو پر مساوي ګډون بندیز لیرې شوی نه وي.

له کله چې طالبان بیا پر افغانستان واکمن شوي، پر ښځو او نجونو د زده کړې او کار په برخو کې محدویتونه لګول شوي دي.

ډېرو ښځو خپلې دندې له لاسه ورکړي او له شپږم ټولګي پورته نجونې هم له زده کړو محرومې شوي دي.

اروپايي ټولنه: طالبانو د خپلې واکمنۍ په يو کال کې د ښځو له حقونو سرغړونه کړې

طالبانو څو ځل د مېرمنو د اعتراضونو مخه ونيوله

اروپایي ټولنه وایي، طالبانو د خپلې واکمنۍ په یوه کلنه دوره کې په افغانستان کې د ښځو او نجونو له حقونو څخه په کلکه سرغړونې کړي دي.

نن دوشنبې د زمري ۲۴مه، د اګست ۱۵ په افغانستان کې د طالبانو د واکمنۍ یو کال پوره شوه خو تر اوسه یې حکومت د نړۍ هیڅ یوه هېواد په رسمیت نه‌دی پېژندلی.

د اروپایي ټولنې یوې ویاندې نبیلا مسرالي پر افغانستان د طالبانو د واکمنۍ د کلیزې په ترڅ کې پرون یکشنبې په یوه بیان کې وویل، طالبان د یوه ټول شموله سیاسي نظام په رامنځته کولو کې پاتې راغلي او په دې توګه یې د افغانانو هیلې له خاورو سره یو کړي دي.

پر ښځو د نورو محدودیتونو ترڅنګ له شږم ټولګي پورته نجونې له منځنیو او ثانوي زده کړو محرومې شوې دي.

نړیوالو، بشري حقونو په تېره بیا د نجونو او ښځو زده کړې او کار ته درناوی، د یوه ټولشموله حکومت جوړېدا او ځینې نورشرطونه د طالبانو مخ ته ایښي دي.

ارزګان کې سېلابونو د سر او مال زيانونه اړولي

افغانستان کې راوتلي سېلابونه

په ارزګان کې د طالبانو چارواکي وايي، په دې ولایت کې سېلابونو د سر او مال زیانونه اړولي دي.

د ارزګان ولایت د والي ویاند مولوي علي جان پوهنیار نن ازادۍ راډيو ته وویل چې دغه سېلابونه پر خاص ارزګان او چنارتو ولسوالیو راغلي او په خاص ارزګان ولسوالۍ کې یې یو ماشوم مړ کړی دی.

نوموړی وايي، په چنارتو ولسوالۍ کې سېلابونو د مسافرو درې موټر وړي او سلګونه جریبه زراعتي ځمکه او لسګونه کورونه یې تخریب کړي، خو ځاني زیان چا ته نه دی رسېدلی.

له څو ورځو د افغانستان په نورو ولایتونو کې هم سېلابونو خلکو ته زیانونه اړولي دي.

د ايران د پارلماني چارو مرستيال وزير له متقي سره د ترانزيت پر زياتېدو خبرې کړي

د طالبانو د بهرنيو چارو سرپرست وزير اميرخان متقي

د ایران د بهرنیو چارو د کونسلي او پارلماني چارو مرستیال وزیر پرون په کابل کې د طالبانو د حکومت د بهرنیو چارو له سرپرست وزیر سره د دوو هېوادونو ترمنځ د ترانزیت پر زیاتېدو خبرې کړي.

دا په یوه اوونۍ کې درېیم ایراني چارواکی دی چې کابل ته سفر دی.

تېره اوونۍ د ایران د انرژۍ وزیر علي اکبر محرابیان او د افغانستان لپاره د ایران د ولسمشر ځانګړي استازي حسن کاظمي قمي کابل ته تللي وو او له طالب چارواکو سره یې د اوبو په اړه خبرې کړې وې.

د طالبانو د حکومت د بهرنیو چارو وزارت یوه وياند حافظ احمد تکل په دې اړه وويل: "ښاغلي بیګدلي څرګنده کړه چې وروسته له دې به په افغانستان کې د ایران ټولې کونسلګرۍ اړمنو افغانانو ته ویزې په عاجل ډول اجرا کوي، نوموړې زیاته کړه چې د ویزو په عاجل ډول اجرا به وکولای شي چې ایران ته د افغانانو د غیر قانوني تګ په مخنیوي کې مرسته وکړي او په تګ راتګ کي به سهولت رامنځته شي."

ښاغلی تکل وايي چې د ایران دا اقدام به په دغه هېواد کې له مېشتو کارګرو افغانانو سره د قانوني هستوګنې په برخه کې مرسته وکړي.

د ده په وینا امیرخان متقي له ښاغلي بیګدلي څخه وغوښتل چې په ایران کې افغانانو ته د کار موندنې په برخه کې هم همکاري وکړي.

زابل کې د سېلابونو له امله ۳ کسان مړه شوي

سېلابونه - ارشيف

په زابل ولایت کې لږ تر لږه درې تنه په سېلونو او ۳ ماشومان د نس ناستې په ناروغۍ مړه شوي دي.

له وړمې شپې څخه د زابل په بېلابېلو برخو کې په تېره بیا میزانې ولسوالۍ کې سېلونه راوتلي او خلکو ته یې ډېر مالي زیانونه هم اړولي دي.

په زابل کې د طالبانو د حکومت د عامې روغتیا رئيس ډاکتر عبدالحکیم حکیمي په نس ناستي د درو ماشومانو د مړینې په اړه تېره شپه ازادي راډیو ته وویل: "په خواشینۍ سره درې ماشومانو د شینکۍ ولسوالۍ په اکازو کلي کې خپل خوږ ژوند له لاسه ورکړی دی. همدا راز په میزانې ولسوالي کې د شدیدو سېلونو له کبله درې تنه مړه شوي دي."

که څه هم ښاغلی حکیمي وايي چې د عامې روغتیا ریاست ټیمونه سېل ځپلیو او وبا ځپلیو سیمو ته استول شوي خو په ځانګړي ډول سېل ځپلي وايي چې مرستې ورسره نه دي شوي.

اتريش کې يو شمېر افغانانو د طالبانو د واک د يو کلنۍ په اړه مظاهره وکړه

په کاناډا کې هم پرون يو شمېر مېرمنو واک ته د طالبانو د رسېدو د يو کال پوره کېدو په غبرګون کې مظاهره وکړه

یو شمېر افغانانو پرون (یکشنبه) د اتریش په پلازمېنه ویانا کې د طالبانو د واک ته رسېدو په اعتراض کې مظاهره وکړه.

مظاهره چیانو، چې شمېر یې لسګونو کسانو ته رسېده، د پاکستان پر ضد شعارونه ورکول او له امریکا، اروپايي هیوادونو، د ملګروملتو امنیت شورا او ناټو څخه یې غوښتل چې د افغانستان لپاره نوې ستراتیژي جوړه کړي.

نن د پخواني جمهوري نظام د پرځېدو او واک ته د طالبانو د بيا ځلي رسېدو کال پوره شو.

په کابل او د نړۍ په يو شمېر نورو هېوادونو کې هم افغانانو د طالبانو د حکومت په ضد مظاهرې کړې دي.

کندهار: د طالبانو او داعش وسله‌والو ترمنځ نښته کې ۵ تنه وژل شوي

د افغانستان په عمومي نقشه کې د کندهار ولايت موقعيت

په کندهار ښار کې پرون (یکشنبې) ناوخته د طالبانو او داعش وسله والو ترمنځ په نښته کې لږ تر لږه ۵ تنه ووژل شول.

د راپورونو له مخې، په دې نښته کې، چې یو ساعت یې دوام وکړ، د کندهار ښار په دوهمه امنیتي حوزه کې وشوه او په لړ کې یې دوه طالبان او ۳ داعشیان وژل شوي دي.

طالبانو د دې نښتې په اړه د دې خبر د چمتو کېدو تر شېبې څه نه دي ویلي.

که څه هم طالبانو څو څو ځل افغانستان کې د داعش وسله والو د شتون راپورونه رد کړي دي او ويلي يې دي چې دا ډله يې ځپلې ده، خو نړيوالو افغانستان کې د داعش ډلې د ګواښونو په اړه اندېښنې ښودلي دي.

د یوه کال راهیسې له ۴ میلیونو ډېرو افغانانو سره بشري مرستې شوي

ارشیف

د ملګرو ملتونو د وګړو صندوق وايي، د ملګرو ملتونو د نورو ادارو په همکارۍ یې په افغانستان کې له تېر کال راهیسې څه باندې ۴ میلیونو او درې لکه کسانو ته بشري مرستې رسولي دي.

د دې اداري د نن ورځې د ټویټ له مخې دغه بشري مرستې په لیرې پرتو سیمو هم اړو کسانو ته رسول شوي دي.

ملګرو ملتونو خبرداری ورکړی چې په افغانستان کې څه باندې نیمايي وګړي عاجلو بشري مرستو ته اړتیا لري.

دا په داسې حال کې ده چې د اګسټ پر ۱۱ نېټه د ملګرو ملتونو د بېلابېلو ادارو په ګډون د بشري مرستو همغږي کوونکې ادارې اوچا پر افغانستان د طالبانو د واکمنۍ یو کال پوره کېدو سره د یو بیان په خپرولو په افغانستان کې د روان اقتصادي کړکېچ په اړه اندېښنه څرګنده کړې وه.

په دې بیان کې په افغانستان کې د بشري مرستو همغږي کوونکي په حواله راغلي چې: "تاریخ موږ ته وخت په وخت ښودلې چې موږ د سبا په خطر کې د نن ورځې سره بیرغونه له پامه غورځوو او په افغانستان کې نن ورځ، سره بیرغونه ډیر او متنوع دي - د اقلیمي بدلونونو له امله اقتصادي توازن مخ په ځوړ دی، پر نجونو او ښځو باندې زیاتېدونکو محدودیتونه هم ورو -ورو دوی له ټولنې لرې کوي."

ښاغلي الکبروف په اوسنیو شرایطو کې په ټولنه کې د افغان ښځو او نجونو فعاله ونډه د اقتصاد د بیا رغولو لپاره خورا مهمه بللې ده.

طالبانو سبا دوشنبه عمومي رخصتي اعلان کړه

د طالبانو بیرغ

د طالبانو د کار او ټولنیزو چارو وزارت وايي، سبا دوشنبه پر افغانستان د طالبانو د بیا واکمنېدو د کلیزې په مناسبت عمومي رخصتي ده.

طالبانو د ۲۰۲۱م کال د اګست میاشتې پر ۱۵مه پر کابل هم ولکه ټینګه کړه او تېر حکومت یې ړنګ کړ.

پر افغانستان د طالبانو د ولکې له ټینګولو وروسته بېلابېلو ادارو په افغانستان کې د اقتصادي بحران د زیاتېدو خبرداری ورکړی دی.

پر طالبانو انتقادونه کېږي چې په دې موده کې یې د نجونو د منځنیو ښوونځیو او لېسو دروازې تړلي، ګڼې ښځې له کارونو شړل شوي او د وزګارتیا اندازه زیاته شوې ده.

کرزی: تېر یوه کال کې د مرګ ژوبلې کمښت پرته نور هر څه منفي و

د افغانستان پخوانی ولسمشر حامد کرزی

د افغانستان پخوانی ولسمشر حامد کرزی وايي، تېر یوه کال کې پرته له دې چې یوازې مرګ‌ژوبله کمه شوې، نور هر څه منفي و.

ښاغلي کرزي د انډیا ټوډی سره خپله مرکه چې پرون خپره شوې ویلي، اوسمهال افغانان له لویو ستونزو سره مخ دي.

د افغانستان پخواني واکمن ویلي، باسواده افغانان هره ورځ له وطن وځي او تر خوا یې اقتصادي وضعیت به یوه ډېر بد حالت کې دی.

حامد کرزي د افغانستان د دولت سقوط هم لویه ضایعه بللې ده.

د افغانستان پخواني ولسمشر د نجونو او ښځو د زده‌کړو او کار ته په اشارې ویلي، افغانستان هغه مهال پرمختګ کولای شي چې هلکان او نجونې یې زده‌کړې وکړي او سړي او ښځې یې اوږه په اوږه د خپل هېواد لپاره کار وکړي.

حامد کرزی داسې مهال تېر یو کال د افغانانو لپاره له ستونزو ډک بولي چې سبا د طالبانو په لاس د افغانستان د جمهوري نظام د سقوط لومړۍ کلیزه ده.

د افغانستان د مقاومت ملي جبهې د خپلې مبارزې کړنلاره اعلان کړه

د مقاومت جبهې جنګیالي

د افغانستان د مقاومت ملي جبهې چې د طالبانو پر ضد وسله‌وال مقاومت کوي، د خپلې مبارزې کړنلاره اعلان کړه.

دا کړنلاره چې ۳۴ مادې لري، پرون د مقاومت ملي جبهې په خپله رسمي وېبپاڼه خپره کړې.

په دې کړنلاره کې طالبانو ته د "یاغیانو او د واک د غاصبینو" خطاب شوی، هغه کلمې چې طالبانو تل خپلو مخالفانو ته کارولې دي.

د ملي مقاومت جبهې په کړنلاره کې راغلي، سیاسي، ټولنیزو، قومي او نظریاتي توپیرونو ته له پام کولو پرته، د طالبانو پر ضد د ټولو مخالفینو يو ځای کول یې داعیه ده.

د ملي مقاومت جبهه داسې‌مهال د خپل وسله‌وال مقاومت کړنلاره اعلانوي چې سبا په افغانستان کې د طالبانو د بیا ځلي واکمنېدو یو کال پوره کېږي.

طالبانو لا تر اوسه د مقاومت ملي جبهې د کړنلارې د اعلان په اړه څه نه‌دی ویلي، خو وړاندې یې ویاند ذبیح‌الله مجاهد په افغانستان کې د دوی پر ضد د هر ډول وسله‌‌وال مقاومت خبره رد کړې ده.

د امریکا ځانګړی استازی: واشنګټن افغانانو سره مرستې ته ژمن دی

د افغانستان لپاره د امریکا ځانګړی استازی توماس ویسټ

د افغانستان لپاره د امریکا ځانګړی استازی توماس ویسټ وايي، متحدایالات د افغانستان له خلکو سره مرستې ته ژمن دی او د افغانستان د بشري بحران د حل په برخه کې ټینګ هوډ لري.

ویسټ بېګا پر خپل رسمي ټویټر ولیکل چې د افغانستان له خلکو سره د امریکا له خوا د ۱۵۰ میلیون ډالره مرستې اعلان به د غذایي موادو د ناامنۍ د له منځه وړلو، د افغان ماشومانو د زده کړو د دوام او د ښځو او نجونو د ځواکمنولو په چارو کې د افغانستان له خلکو سره مرسته وکړي.

متحدوایالتونو له افغانستان سره د دې مرستې خبر په داسې حال کې ورکوي چې د تېرکال په اګست کې د طالبانو له واکمنېدو وروسته په افغانستان کې د غذايي موادو د مصوونیت نه شتون او اقتصادي بحران د پراخېدو په حال کې دی او میلیونونه افغان ماشومان له تعلیم څخه بې برخې شوي دي.

طالبانو یوې وژل شوې پولیسې ته اعزازي رتبه ورکړه

د طالبانو بیرغ

د طالبانو حکومت، هغې مېرمنې ته چې څو ورځې مخکې په کابل کې پر یوه کور د عملیاتو پرمهال وژل شوې وه، اعزازي رتبه ورکړه.

باختر خبري آژانس پرون راپور ورکړ چې د طالبانو حکومت د کورنیوچارو سرپرست وزیر سراج الدین حقاني د رووفې په نوم دې ښځې ته اعزازي رتبه ورکړې ده.

د راپور له مخې رووفه د کابل ښار د پولیسو په پنځمه حوزه کې سرتېرې وه او څو ورځې مخکې د کابل په جمال مېنې سیمه کې پر یوه کور د عملیاتو پرمهال ووژل شوه.

د باختر آژانس په راپور کې هغه کور چې عملیات پرې ترسره شوي، د خوارجو مهمه ځاله بلل شوې ده.

طالبان د خوارجو اصطلاح ډېر وخت د اسلامي دولت ډلې یا داعش د وسله والو لپاره کاروي.

نور راوښيه

XS
SM
MD
LG