د لاسرسۍ وړ لېنکونه

تازه خبر
سه شنبه ۱۲ تله ۱۴۰۱ کابل ۱۲:۱۵

نړۍ

امریکا: د روسیې محدودیتونه ښايي د سریلانکا په ناکراریو کې ونډه لرلې وي

سریلانکا کې د خوړو او تېلو د سخت کموالي له کبله له څو اوونیو ناکرارۍ روانې دي.

د امریکا د بهرنیو چارو وزیر وايي، د اوکراین د غله جاتو پر صادراتو د روسیې محدودیتونه ښايي د سریلانکا په وروستیو ناکراریو کې ونډه لرلې وي.

انتوني بلېنکن اندېښنه وښوده، چې دغه محدودیتونه ښايي د نړۍ په نورو برخو کې هم د نورو بحرانونو سبب شي.

هغه یو وار بیا له روسیې غوښتنه وکړه هغه شا و خوا ۲۰ ملیونه ټنه غله جات چې په اوکراین کې دي پرېږدي.

مسکو پر اوکراین په فبروري میاشت کې یرغل وکړ.

پخوا به هرکال د اوکراین په ملیونونو ټنه غله جات افریقا، منځني ختیځ او د نړۍ نورو برخو ته صادرېدل.

کله چې روسیې د اوکراین د تور سمندرګي بندرونه بند کړل، دغه صادرات هم ودرېدل.

سریلانکا کې د خوړو او تېلو د سخت کموالي له کبله له څو اوونیو ناکرارۍ روانې دي.

د ورځې تازه خبرونه دلته ولولئ

د ایران مشر په دې هېواد د روانو نارامیو لامل بهرنۍ لاسوهنه وبلله

د ایران مذهبي مشر ایت الله علي خامنه یي د دې هېواد د چارواکو سره د قدم وهلو پرمهال

د ایران مذهبي مشر ایت الله علي خامنه یي په دغه هېواد کې د روانو نارامیو لامل بهرنۍ لاسوهنه وبلله.

پرون روانو مظاهرو ته د خامنه یي په لومړني علني غبرګون کې نوموړي مظاهره کوونکي له امریکا او اسراییلو او له ایرانه بهر د ده په ټکو" دسیسه ګرو" ایرانیانو سره تړلي وبلل.

په ایران کې مظاهرې وروسته له هغه پیل شوي چې د اخلافي امنیت پولیسو یوه نجلۍ مهسا امیني د حجاب دسم نه مراعاتولو په تور توقیف او بیا یې تر شکنجې لاندې سا ورکړه.

چارواکو ویلي، مهسا د زړه د حملې له کبله مړه شوې، خو کورنۍ او ملاتړي یې بیا دا ادعا نه مني.

د اوکرايين پوځ: دونيڅک سيمه کې پرمخ‌تګ ته دوام ورکوو

اوکراييني ځواکونه د ليمان ښار له ازادولو وروسته په دونيڅک کې

د اوکرایين پوځ وایي، ځواکونه یې په دونیڅک سیمه کې پرمخ‌تګ ته دوام ورکوي.

یوه ورځ مخکې اوکرايیني ځواکونو د دې سیمې پر ستراتېژیک ښار لیمان بشپړه ولکه وروسته له هغې ټینګه کړه چې د اوکرایيني چارواکو په وینا په ختیځو سیمو کې روسي ځواکونو ته په جګړو کې ډېر تلفات واوښتل.

د اوکرایين د ختیځې برخې لپاره د دې هېواد د وسله‌والو ځوکونو ویاند سیرهي چیریواټي وویل اوکرایيني ځواکونو لیمان ته نژدې د تورسکې ښارګوټی پرون آزاده کړ او د لوهانسک سیمې په کریمینا کې هم د روسیې له پوځي جزوتامونو سره جګړه مخته وړي.

د اوکرایين د وسله‌والو ځواکونو لوی درستیز نن دوشنبې وویل، یوه ورځ مخکې په جګړو کې روسیې ته د ۳۲۰ سرتېرو تلفات اوښتي دي.

د ايران امنيتي ځواکونو تهران کې د پوهنتون له محصلانو سره شخړه کړې

ايران کې د پوهنتون محصلان

د ایران امنیتي ځواکونو د پلازمېنې تهران په یوه پوهنتون کې له محصلانو سره شخړه وکړه.

دا شخړه د هغو اعتراضونو پر مهال وشوه، چې په توقیف کې د یوې ځوانې ښځې مهسا امیني تر مړینې وروسته پیل شوي دي.

دغه ښخه د سپټمبر پر ۱۶مه مړه شوه، هغه د ګشت ارشاد پولیسو له خوا د ادعا له مخې په بشپړ ډول د حجاب نه رعایت په تور نیول شوې وه.

د هغې تر مړینې وروسته د ایران په عوامو کې غوسه زیاته شوې او په بېلابېلو ښارونو کې اعتراضونه پیل شوي دي.

مظاهره چیان وايي مهسا امیني په توقیف کې د شکنجې په نتیجه کې وژل شوې ده.

نهه اروپايي هېوادونو د ناټو په سازمان کې د اوکرايين د غړيتوب د هڅو ملاتړ وکړ

ارشيف

د اروپا د ختیځ ۹ هېوادونو په ناټو سازمان کې د اوکرايین د بېړني غړیتوب د هڅو ملاتړ وکړ.

دوی د ناټو له لوېدیځو متحدانو وغوښتل چې اوکرايین ته د روسیې د غیر موجه یرغل په وړاندې جګړه کې وسلې او دفاعي تجهیزات ورکړي.

په دغه اړه پرون د چک جمهوریت، ایستونیا، لتویا، پولند، رومانیا، لیتوانیا، سلواکیا، شمالي مقدونیا او مونتی نګرو مشرانو یوه اعلامیه لاسلیک کړه.

ناټو ۳۰ غړي لري او د هر بل هېواد غړیتوب ته باید ټول دغه هېوادونه مثبته رایه ورکړي.

د اوکراین د لویې اټومۍ بټۍ د مشر خوشې کېدو غوښتنه وشوه

د زاپوریژیا اټومي بټۍ

د ملګرو ملتونو د اټومي انرژۍ د څار ادارې، له روسیې د اوکراین د تر ټولو لویې اټومۍ بټۍ د مشر د خوشې کېدو غوښتنه وکړه.

راپورونه وايي، ایهور موراشوف د روسیې د پوځ له خوا نیول شوی دی.

د ملګرو ملتونو د اټومي انرژۍ د څار ادارې مشر رافایل ګروسي پرون دا غوښتنه داسې مهال وکړه، چې موراشوف وړمه ورځ له زاپوریژیا اټومي بټۍ د اینرهودار ښارګوټي پر لوري د تګ په حال کې ونیول شو.

د اوکراین یوې دولتي ادارې چې پر اټومۍ بټۍ څار کوي، ویلي د اټومي بټۍ دغه مشر یوه نامعلوم لوري ته بېول شوی دی.

رافایل ګروسي هیله ښوولې چې ایهور موراشوف به ډېر ژر په خوندي ډول خپلې کورنۍ ته ستون او د زاپوریژیا اټومي بټۍ د فعالیت د دوام لپاره خپل مهم کار ته دوام ورکړي.

روسي چارواکو د دې پېښې په باب تبصره نه ده کړې.

روسي ځواکونه د اوکراین له ختیځ لیمان ښاره وتلي

لیمان کې اوکرایني ځواکونه

څو ساعته وروسته له دې چې کییف د اوکراین د ختیځ په لیمان ستراتیژیک ښار کې د روسي ځواکونو د کلابندۍ خبر ورکړ، د روسیې دفاع وزارت اعلان وکړ چې له دې ښار څخه یې خپل ځواکونه ایستلي دي.

د اوکراین دفاع وزارت پرون وویل چې ځواکونه یې لیمان ښار ته ننوتي دي.

لیمان په وروستیو ورځو کې د اوکرایني ځواکونو د دفاعي حملو مرکز و.

په همدې حال کې کییف ویلي دي چې تر هغه وخته به د سولې خبرې ونه کړي چې د روسیې ولسمشر ولادیمیر پوتین ژوندی وي.

له یونان څخه بلغاریا ته د ګاز یوې نوې نل لیکې فعالیت پیل کړ

ارشیف

له یونان څخه بلغاریا ته د ګاز یوې نوې نل لیکې پرون فعالیت پیل کړ.

تمه ده چې دا به د روسیې د ګاز پر سرچینو د بلغاریا او نورو هېوادونو اتکا کمه کړي.

د اروپايي کمېسیون مشرې اورزولا وان دیرلین د بلغاریا په پلازمېنه سوفیا کې د دې نل لیکې د پرانیستلو په مراسمو کې وویل: "موږ باید د خپل اقتصاد د بنسټ په تېره د واحد بازار ساتنه وکړو. د اروپايي ټولنې د ځواک نښه همدا ده او د ټولنې شتمني له واحد بازاره سرچینه اخلي. له ګډې اروپايي حل لارې پرته زموږ د ټوټې ټوټې کېدو خطر شته."

بلغاریا به د دې نل لیکې له لارې له آذربایجان څخه طبیعي ګاز ترلاسه کړي.

د اوکراین په یوه اشغال شوې سیمه کې نږدې ۵۰۰۰ روسي سرتېري محاصره شوي

لیمان کې اوکرایني ځواکونه

د اوکراین په ختیځ کې د ځواکونو ویاند سیرهي چیرواتي نن خبر ورکړ چې په دونیڅک کې د لیمان د ریلګاډي د مرکز له مهمې سیمې سره دوی روسیي پوځیان محاصره کړې دي.

د چیرواتي له اټکل سره سم د محاصره شویو روسیي پوځیانو شمېر نږدې پنځه زرو ته رسېږي.

دا یوه له هغو سیمو څخه ده چې روسیې په غیرقانوني توګه له خپلې خاورې سره د هغې د یوځای کېدو ادعا کړې ده.

روسانو د دونیڅک په شمال کې د عملیاتو لپاره د لیمان د ریلګاډي له مرکزه د لوژیستیک عملیاتو لپاره استفاده کوله.

مسکو تر اوسه په دې سیمه کې د محاصره شویو روسیي پوځیانو په اړه څه نه دي ویلي.

زرګونه عراقیانو د ایران پر ضد لاریون وکړ

ارشیف

زرګونه عراقیانو نن په بغداد کې د ایران پر ضد لاریون وکړ او د خپل هېواد په چارو کې یې د ایران د لاسوهنې د پای ته رسېدو شعارونه ورکول.

د عراق د دولتي خبري اژانس د راپور له مخې، لاریون کوونکو د فساد او د حکومتي سیستم د سهامي توب پر ضد هم شعارونه ورکول.

فرانس پریس خبري اژانس وايي، د لاریون کوونکو شمېر زرګونه تنه وو او اکثره ځوانان وو.

دوی له عراق څخه د ایران د وتلو او له ایران سره د برابرۍ غوښتنه کوله.

ترکیې هم د روسیې له خاورې سره د اوکراین د څلورو برخو یوځای کېدل وغندل

د روسیې ولسمشر ولادیمیر پوتین د سپټمبر په دېرشمه یو سند لاسلیک کړ چې د خپل هېواد له خاورې سره د اوکراین د دونیڅک، لوهانسک، خرسون او زاپروژیا د یوځای کېدو هڅې ته رسمیت ورکوي.

ترکیې هم د روسیې له خاورې سره د اوکراین د څلورو برخو د یوځای کېدو لپاره د مسکو هڅه وغندله.

د ترکیې د بهرنیو چارو وزارت نن په یوه اعلامیه کې ویلي، روسیې په جدي ډول د نړیوالو قوانینو سرغړونه کړې ده.

د روسیې ولسمشر ولادیمیر پوتین د سپټمبر په دېرشمه یو سند لاسلیک کړ چې د خپل هېواد له خاورې سره د اوکراین د دونیڅک، لوهانسک، خرسون او زاپروژیا د یوځای کېدو هڅې ته رسمیت ورکوي.

امریکا، بریتانیا، جرمني، سویډن او پولنډ دا اقدام غندلی دی.

روسیې د امریکا او البانیا له لوري وړاندیز شوی پرېکړه لیک ویټو کړ

د ملګرو ملتونو د امنیت شورا د غونډې انځور

روسیې د دغه هېواد له خاورې سره د اوکراین د خاورې د یو شمېر برخو د یوځای کېدو په محکومیت کې د ملګروملتونو امنیت شورا ته د امریکا او البانیا له لوري وړاندیز شوی پرېکړه لیک ویټو کړ، خو چین دغه پرېکړه لیک ته سپینه رایه ورکړه.

په امنیت شورا کې د پرېکړه لیک پر سر تر رای اخیستلو مخکې د روسیې ولسمشر ولادیمیر پوتین اعلان وکړ چې د اوکراین څلور غصب کړې سیمې یې د خپل هېواد له خاورې سره یوځای کړي دي.

د امریکا د متحد ایالتونو ولسمشر جوبایډن د روسیې ولسمشر پوتین ته خبرداری ورکړ چې د روسیې له خاورې سره د اوکراین د خاورې د څلورو سیمو یو ځای کېدل به کله هم په رسمیت ونه پېژني.

شمالي کوریا د جاپان په لور بالستیک توغندي توغولي

دا په تېره یوه اونۍ کې څلورم ځل دی چې پیونګ یانګ توغندي ازمایي.

شمال کوریا نن د جاپان لور ته په سمندر کې دوه بالستیک توغندي وتوغول.

دا په تېره یوه اونۍ کې څلورم ځل دی چې پیونګ یانګ توغندي ازمایي.

د جنوبي کوریا پوځ د نننیو توغندیو د ازموینې خبر ورکړ، خو په دې اړه یې نور تفصیل نه دی ورکړی.

جاپان وویل چې دې توغندیو د پنځه دېرشو او پنځوس کیلومترو په لوړوالي د درې سوه پنځوس او څلور سوه کیلومترو ترمنځ واټن وواهه.

د ملګرو ملتونو په یو شمېر پرېکړه لیکونو کې بیا بیا له پیونګ یانګ نه غوښتنه شوې ده چې د بالستیک توغندیو له ازموینو لاس واخلي.

یو شمېر کتونکي په دې باور دی چې د شمالي کوریا د توغندیو وروستۍ ازموینې د امریکا د متحدایالتونو، جنوبي کوریا او جاپان د وروستیو پوځي تمریناتو ځواب دی.

ایران کې د لاریونونو پر مهال ۹ بهرنیان نیول شوي

په ایران کې پراخې مظاهرې وروسته تر دې پیل شوې چې څه باندې دوې اونۍ مخکې دوه ویشت کلنې مهسا امیني د پولیسو د وهلو له امله ساه ورکړه.

د ایران د استخباراتو وزارت د تېرو څو ورځو په لړ کې د مظاهرو پر مهال د نهه تنو بهرنیانو د نیولو خبر ورکړ.

د دې وزارت خبرپاڼه پرون ایرنا رسمي اژانس خپره کړه، په دې کې راغلي دي چې په نیول شویو کې د جرمني، پولنډ، ایټالیا، فرانسې، هالنډ او سویډن اتباع شامل دي.

په ایران کې پراخې مظاهرې وروسته تر دې پیل شوې چې څه باندې دوې اونۍ مخکې دوه ویشت کلنې مهسا امیني د پولیسو د وهلو له امله ساه ورکړه.

د ایران پولیس وایي، پر مهسا د زړه حمله راغلې وه او په دې اړه تحقیقات کوي.

د مهسا تر مرګ وروسته د اعتراضونو په ترڅ کې نږدې اتیا کسان وژل شوې دي.

اوکراین له ناټو سره د یوځای کېدو وړاندیز لاسلیک کړی

د اوکراین ولسمشر ولودومیر زیلینسکي

اوکراین هغه وړاندیز لاسلیک کړی دی چې له ناټو سره د دغه هېواد د یوځای کېدو چارې ګړندۍ کوي.

د اوکراین ولسمشر ولودومیر زیلینسکي پرون وویل چې د اشغال کوونکو له لوري د دوی د خاورې د هرې برخې د بېلېدو د مخنیوي لاره همدا ده چې اوکراین پياوړی شي او سوله ټینګه شي.

زیلینسکي زیاته کړه چې روسیه له دوی غلا کوي.

د ده اشاره دونیڅک، لوهانسک، خرسون او زاپروژیا ته وه چې هلته ماسکو ټولپوښتنه وکړه او ولسمشر ولادیمیر پوتین پرون د روسیې له خاورې سره د دې سیمو د یوځای کېدو سند لاسلیک کړ.

فنلنډ سر له نن په سياحتي ويزو دغه هېواد ته د روسي اتباع ننوتل منع کوي

دا ټولې پرېکړې پر اوکرایین د مسکو د ناحقه تېري په ځواب کې د روسیې پر ضد د بندیزونو او نورو مخنیوونکو اقداماتو په ډله کې راځي.

فنلند سر له نن څخه د (سپتمبر له ۳۰) دغه هېواد ته په سیاحتی ویزو سره د روسي اتباعو ننوتل منع کوي.

په دې کار سره فنلنډ اروپایي ټولنې ته د هغو روسانو لاره بندوي چې د روسیې د ولسمشر ولادیمیر پوتین لخوا تېره اوونۍ د پوځي بسیج په خاطر جبري عسکري ته ورغوښتل شوي.

د فنلنډ د بهرنیو چارو وزیرې پِکا هاویستو د دې پرېکړې هدف فنلنډ ته د روسي ګرځندوی او د دغه هېواد له لارې د ټرانزیټ په بشپړ ډول مخنیوی بللی دی.

دا اقدام په دې مانا دی چې فنلنډ له پولنډ او بالتیک هېوادونو سره یو ځای له روسیې سره د ګډو ځمکنیو پولو د تېرېدو په برخه کې د سیلانیانو مخه نیولې.

دا ټولې پرېکړې پر اوکرایین د مسکو د ناحقه تېري په ځواب کې د روسیې پر ضد د بندیزونو او نورو مخنیوونکو اقداماتو په ډله کې راځي.

نور راوښيه

XS
SM
MD
LG