د لاسرسۍ وړ لېنکونه

تازه خبر
یکشنبه ۱۶ زمری ۱۴۰۱ کابل ۰۷:۴۷

نړۍ

د ایران د بهرنیو چارو وزیر سوريې ته تللی

د ایران د بهرنیو چارو وزیر حسین امیرعبداللهیان

د ایران د بهرنیو چارو وزیر حسین امیرعبداللهیان په داسې حال کې سوريې ته تللی، چې ترکیې د سوریې په شمال کې پر کرد ملیشو د برید ګواښونه کړي.

تېرې یوې میاشت کې د ترکیې ولسمشر رجب طیب اردوغان څو ځلې ګواښ کړی، چې هېواد به یې د سوریې په شمال کې د دوو سیمو پر ضد نوي پوځي عملیات وکړي او په دغو سیمو کې به کرد ملیشې چې، هغه یې «ترهګر» بولي، په نښه کړي.

عبداللهیان پرون سوریې د سفر پر مهال وویل چې په سیمه کې د ترکیې او سوریې تر منځ د سولې او امنیت د راوستلو په هدف هڅې کوي او ایران د یوه نوي جنجال د رامنځته کېدو مخه نیسي.

هغه په سوریه کې د دغه هېواد له ولسمشر بشار اسد سره کتلي او د ایرنا د راپور په اساس لویدیځ هېوادونه یې تورن کړي، چې په سوریه کې د سولې او ثبات په تړاو ادعاوې یې د ده په خبره واقعیت نه لري.

د ورځې تازه خبرونه دلته ولولئ

د بایډن د کورونا ټېسټ منفي شو

د امریکا ولسمشر جو بایډن

سپینې ماڼۍ پرون وویل، چې د ولسمشر جو بایډن د کورونا ټېسټ منفي شو.

نهه اویا کلن بایډن د جولای په یو ویشتمه کورونا شوی و چې څو ورځې وروسته یې نتیجه منفي شوه، خو د جولای په دېرشمه یې بله نتیجه بېرته مثبت وخته.

د جو بایډن ډاکتر ویلي دي، چې د ولسمشر صحت بیخي ښه دی، خو اوس به بیا هم د هغه بلې نتیجې ته انتظار شي او تر هغه به له نورو خلکو بېل وي.

د اوکراین پر زاپروژیا اټومي بټۍ ډزو اندېښنې رامنځته کړي

زاپروژیا اټومي بټۍ

د اټومي انرژۍ د نړیوالې ادارې مشر د اوکراین په زاپروژیا اټومي بټۍ باندې ډزو ته ژوره اندېښنه ښکاره کړه او ویې ویل چې دا به د اټومي ناورین سبب شي.

رافایل ګروسي پرون په یوه بیان کې وویل، د جمعې په ورځ د اروپا پر دې سترې اټومي بټۍ ډزې شوې چې په اوکراین او له اوکراین څخه ورها خوا خلک او چاپېریال تهدیدوي.

ماسکو او کییف یو بل تورنوي، چې د زاپروژیا پر اټومي تاسیساتو یې ډزې کړې دي.

پر اوکراین د روسیې غیرموجه برید د فبروري په څلورویشتمه پيل شو او لاهم روان دی.

ایراني چارواکي: د اوبو یو څاڅکی ترکیې او افغانستان ته نه بخښوو

د ایران د بهرنیو چارو وزیر حسین امیرعبدالهیان

د ایران د بهرنیو چارو وزیر وايي، ایران به د خپلو اوبو د حق حتی یو څاڅکی ګاونډیو هېوادونو؛ ترکیې او افغانستان ته ونه بخښي.

حسین امیرعبدالهیان دا خبره د خپل هېواد پارلمان ته وکړه.

ده وویل، ایران او ترکیې د ارس سیند په اوبو کې د دوو خواوو د ونډې پر سر د اختلاف د حل کولو لپاره ګډه کمېټه جوړه کړې ده.

ایراني چارواکو په وروستیو کې د طالبانو له حکومت سره هم د هلمند سیند او د کمال خان بند د اوبو د پرېښودو په اړه خبرې کړي دي.

سعودي کې د یو ایراني وګړي خلاصون لپاره ایران له عراقه مرسته غوښتې

بیت الله شریف

ایران له عراقه غوښتي، چې د سعودي عربستان له زندانه د یوه ایراني تبعه په خلاصون کې مرسته وکړي.

د رویټرز خبري اژانس د راپور له مخې دغه ایراني تبعه د روان کال په جولای میاشت کې د حج د مراسمو پر مهال نیول شوی و.

نور جزییات نه دي ورکړل شوي.

د ایران د بهرنیو چارو وزیر حسین امیر عبدالحیان د جمعې په ورځ له خپل عراقي سیال سره په ټیلیفوني خبرو کې له عراق څخه وغوښتل چې په دې اړه جدي اقدام وکړي.

عراق د دوو سیمه ییزو سیالانو ایران او سعودي عربستان ترمنځ د خبرو اترو د څو پړاوونو کوربه دی.

تهران او ریاض په ۲۰۱۶ کال کې خپلې اړیکې پرې کړي.

امریکا او روسیې د بندیانو تبادلې ته لېوالتیا ښودلې

پر کانګریس د امریکا بیرغ

متحدوایالاتو او روسیې ظاهراً په خپلو کې د بندیانو تبادلې ته لېوالتیا ښودلې.

له دې مخکې روسیې د امریکا د باسکټبال ستورې بریتني ګرینر د مخدر موادو د قاچاق په تور په نهه کاله بند محکومه کړه.

د امریکا ولسمشر جوبایډن ویلي دي، چې دا حکم د منلو وړ نه دی.

د روسیې د بهرنیو چارو وزیر سیرګي لاوروف پرون د اګست په پنځمه وویل، روسیه چمتو ده چې له امریکا سره د بندیانو د تبادلې په اړه خبرې وکړي.

د دې څرګندونو په ځواب کې د امریکا د بهرنیو چارو وزیر انتوني بلېنکین ویلي دي، چې متحدایالتونه به د بندیانو د تبادلې په هدف د ولسمشرانو په کچه د خبرو وړاندیز تعقیب کړي.

په ایران کې سېلابونه تاریخي آثار ګواښي

ایران کې سېلابونه

په ایران کې د سېلابونو له پراخېدو وروسته د یزد ښار تاریخي میراثونو ته د احتمالي زیان په اړه اندېښنې زیاتې شوې دي.

د تاریخي آثارو یوه کارپوه کاوه منصوري پرون ایسنا خبري آژانس ته وویل، چې روانو سېلابونو د امیر چخماق په نوم د یزد د تاریخي آثارو ټولګې ته سخت ګواښ پېښ کړی.

د ایراني چارواکو په وینا په یزد کې سېلابونو ۲۴۰ تاریخي کورونو ته زیان اړولی دی.

له دې مخکې ایراني چارواکو ویلي وو، چې د دې هېواد په بېلابېلو سیمو کې د سېلابونو د راوتو له کبله ۹۰ کسان مړه شوي او اته نور تري تم دي.

د بښنې نړيوال سازمان: اوکرايني ځواکونه د عملياتو پر مهال ملکيان په خطر کې اچوي

اوکرایني سرتېري

د بښنې نړیوال سازمان اوکرایني ځواکونه تورن کړي چې د استوګنې په ودانیو، ښوونځیو او روغتونونو کې په مېشتېدو سره ملکي وګړي په خطر کې اچوي.

د بښنې نړیوال سازمان دغه تور د کییف له تُند غبرګون سره مخ شوی دی.

د بښنې د نړیوال سازمان عمومي منشي، اګنیس کالامارد، وویل چې "د دې ډلې څېړونکو" د اوکراین د ځواکونو یو لړ کړنې مستند کړي چې په ګڼ مېشته سیمو کې د عملیاتو پر مهال ملکي وګړي له خطر سره مخ کوي.

د اوکراین ولسمشر ولودیمیر زلنسکي بېګا په خپله ویډیويي وینا کې وویل، حتی په فرضي ډول هم داسې کوم شرط نه‌شته چې د روسیې د برید دې پرې توجیه شي.

خو اګنیس کالمارډ وویل: "هیڅ شرایط د اوکراین پوځ د نړیوالو بشردوستانه قوانینو د درناوي څخه مستثنی نه ګرځوي."

د بښنې نړیوال سازمان اعلان کړی، چې د دې هېواد په ۱۹ ښارونو او کلیو کې د اوکراین د ځواکونو له خوا د ګڼ مېشتو سیمو دننه او په شخصي ودانیو کې د بریدونو شواهد موندلي دي.

د اوکراين پوځ: پر 'پيسکي کلي' مو د روسيې بريدونه په شا تمبولي

اوکرايني سرتېري

د اوکراین پوځ پرون (پنجشنبې) وویل چې روسي ځواکونو لږ تر لږه دوه ځلې پر پیسکي کلي حمله کړې خو بریدونه یې تمبول شوي دي.

د اوکراین پوځ په دې سیمه کې، چې دونیڅک ښار ته نږدې ده، د خپلو مخالفو وسله والو پر ضد له اتو کلونو راهیسې کلکې مورچې جوړې کړي دي.

د روسیې دفاع وزارت هم پرون تأیید کړه چې ځواکونو یې پر پیسکي سیمې یریدونه پیل کړي دي.

د اوکراين په بېلابېلو سيمو کې د روسي او اوکرايني ځواکونو ترمنځ لا هم شديده جګړه روانه ده.

د اوکراين ولسمشر ولودمير زلنسکي تېره ورځ ويلي و، اوکراين کې د جګړې لومړۍ کرښې دوزخ ته ورته دي.

نوموړي ويلي وو، دوی به د روسي ځواکونو پر وړاندې د امريکا ورکول شوي توغندي وکاروي.

عربستان د ژمنيو لوبو د کوربه‌توب لپاره چمتووالى وښود

د اسيا ژمنۍ لوبې - ارشيف

د ورزشي اژانسو د راپورنو له مخې، د سعودي عربستان د المپیک اسیايي کمېټې نه غوښتنه کړې چې د ٢٠٢٩ کال د اسيا ژمنيو لوبو کوربه‌توب ورکړي.

ژمنۍ لوبې چې د اسيا لويې وچې تر ټولو سترې لوبې دي ټاکل شوې د اسيا ٣٢هېوادونه به په‌کې ګډون وکړي.

که چېرې د اسيا المپیک کمېټه د عربستان د کوربه‌توب غوښتنې سره هوکړه وکړي دا به د اسيا په غرب کې لومړنى هېواد وي چې د دغو سياليو کوربه‌توب کوي.

تر دې وړاندې د جاپان، چين، جنوبي کوريا او قزاقستان هېوادونو په کوربه‌توب يادې لوبې ترسره شوي دي.

نانسي پلوسي جنوبي کوريا ته رسېدلې

د امریکا د استازو جرګې مشره نانسي پلوسي

د امریکا د استازو جرګې مشره نانسي پلوسي تایوان ته له نانندریز سفر وروسته نن جنوبي کوریا ته ولاړه او د هغه هېواد له لوړ پوړو چارواکو سره یې کتلي دي.

اسوشیټد پریس خبري اژانس ویلي، تایوان ته د پلوسي له سفره وروسته د چین غصه پارېدلې او سیمه کې نانندرۍ زیاتې شوي دي.

اسوشیټد پریس دغه راز ویلي، چین چمتو کېږي چې تایوان ته نږدې خپلې پراخې پوځي مانورې پيل کړي.

پلوسي تایوان ته د سفر پر مهال له هغه هېواد سره خپل پیوستون اعلان کړ، خو چین دا هېواد د خپلې خاورې یوه برخه ګڼي او دغه ټاپو ته د بهرنیو چارواکو تګ غندي.

زلنسکي د اوکراين د جګړې په اړه د جرمني د پخواني صدراعظم خبرې ځپونکي بللي

د اوکراین ولسمشر ولودومیر زلنسکي

د اوکراین ولسمشر ولودومیر زلنسکي د جرمني د پخواني صدر اعظم ګرهارد شرودر (Gerhard Schroeder) هغه خبرې ځپونکي وبللې چې ویلې یې دي، روسیه غواړي د خبرو له لارې د اوکراین جګړه پای ته ورسوي.

زلنسکي ویلي، دا د شرم وړ خبره ده چې پخواني اروپایي مشران د روسیې په ګټه خبرې کوي.

زلنسکي په خپلو بېګانیو څرګندونو کې وویل، روسیه اوس غواړي چې خپل پټ استازي فعال کړي او د ده په خبره له دې لارې غواړي وښيي چې د خبرو غوښتونکې ده.

د جرمني پخواني صدراعظم ګرهار شرودر چې د پوتین یو پخوانی ملګری دی، ویلي چې تېره اونۍ یې په مسکو کې د روسیې له ولسمشر سره کتلي دي.

ويانا کې امريکا او ايران د اټومي تړون د بيا احيا په اړه مذاکره کوي

د ايران اټومي بټۍ

د امریکا او ایران لوړ پوړي مذاکره کوونکي ویانا ته ځي ترڅو د ایران او نړۍ د قدرتونو ترمنځ د ۲۰۱۵ کال د اټومي تړون د بیا احیا په اړه خبرې پیل کړي.

د ایران لپاره د امریکا ځانګړي استازي رابرټ میلي پرون وویل چې په همدې هدف ویانا ته روان دی او هېواد یې په ښه نیت یوې هوکړې ته د رسېدو لېوال دی.

هغه زیاته کړه دا به ډېر ژر روښانه شي چې ایا ایران هم دا ډول هدف لري که نه.

د ایراني پلاوي مشر مرکچي علي باقري کني، هم ویانا ته تللی دی.

ټاکل شوې چې خبرې نن بیا پیل شي.

د اوکراين د غَلو دانو د لومړۍ کښتۍ تفتيش بشپړ شوی او خپل حرکت ته به دوام ورکړي

هغه اوکرايني کښتۍ چې غلې دانې په‌کې بار دي.

د اوکراین د غَلو د لومړۍ بېړۍ تفتیش بشپړ شوی او تمه کېږي چې د باسفورس تنګي څخه تېره شي.

د کښتۍ وروستی مقصد لبنان دی.

د ملګرو ملتونو په منځګړتوب د اوکراین د غَلو د استولو بهیر پیل شوی دی.

د روان کال د فبرورۍ په ۲۴مه نېټه پر اوکراين د روسيې له يرغل وروسته د اوکراين د غلو صادرات بند شوي وو.

خو تېره اوونۍ ملګرو ملتونو او ترکيې منځګړیتوب وکړ او د اوکرایین او روسیې تر منځ یې د غلو د صادراتو لپاره یوه هوکړه جوړه کړه چې په اساس یې روسیه د اوکرایین له دریو بندرونو د غَلو د صادراتو اجازه ورکړې.

نانسي پلوسي: امريکا به هيڅکله د ټايوان له ملاتړ لاس وانه‌خلي

د امریکا د استازيو جرګې مشره نانسي پلوسي

د امریکا د استازيو جرګې مشرې نانسي پلوسي نن د ټایوان په پلازمېنه ټایپي کې د خبرو پر مهال وویل چې متحدایالات غواړي ټایوان تل ازاد وي او امنیت ولري.

هغې وویل چې امریکا به هيڅکله د ټایوان له ملاتړ څخه لاس وانه‌خلي.

پلوسې د ټایوان پلازمېنې ټایپي ته له رسېدو سره سم له ټایوان سره د امریکا پیوستون څرګند کړ او ویې ویل له ټایوان سره د امریکا پیوستون تر بل هر وخت نن ځکه ډېر مهم دی چې نړۍ د استبداد او ډیموکراسۍ ترمینځ باید یو انتخاب ولري.

چین چې ټایوان د خپلې خاورې یوه برخه بولي ټایپي ته د امریکا د استازیو د جرګې د مشرې سفر سمدستي وغانده او ویې ویل چې دا به د سیمې پر سوله او ثبات ناوړه اغېز وکړي.

زلنسکي: دونېڅک کې د جګړې لومړۍ کرښې وضعيت د 'دوزخ' په څېر دی

د اوکراین ولسمشر ولودیمیر زلنسکي

د اوکراین ولسمشر ولودیمیر زلنسکي وايي، په ختیځه دونېڅک سیمه کې چې د جګړې لومړۍ کرښه ده، وضعیت د دوزخ په څېر دی.

هغه بېګا په خپله وینا کې وویل، د امریکا د توغندیو له مرستې سره - سره د اوکراین پوځ نه دی توانېدلی چې د روسیې د وسلو او بشري قوت له امتیاز څخه مخکې شي.

زلنسکي زیاته کړه چې په دې جګړه کې نا انډولي ډېره احساسېږي.

د اوکراین ولسمشر ژمنه وکړه چې ځواکونه به یې د امریکا د هیمارس توغندیو په مرسته اشغالګرو ته هره اوونۍ دردوونکې ماتې ورکړي.

نور راوښيه

XS
SM
MD
LG