د لاسرسۍ وړ لېنکونه

تازه خبر
سه شنبه ۱۸ زمری ۱۴۰۱ کابل ۰۳:۲۶

افغانستان

توماس ويسټ: امريکا له افغان زلزله ځپلو سره مرسته کې د خپلو شريکانو د ملاتړ هرکلی کوي

د افغانستان لپاره د امریکا ځانګړی استازی توماس ويسټ

د افغانستان لپاره د امریکا ځانګړی استازی وایي، امریکا د افغانستان په جنوب ختیځ کې د تیرې اونۍ د مرګونې زلزلې له زیانمن شویو سره نژدې ۵۵ ميلیون ډالره مرسته کوي او په دې برخه کې د خپلو شریکانو د کلک ملاتړ هرکلی کوي.

ټوماس ویسټ په یوه ټویټ کې ویلي چې د امریکا دغه اضافي مرسته به د اړتیا وړ په ضروري موادو لکه پر سرپناه، د اوبو د تصفیې کېټونو، کمپلو، جامو او نورو شیانو ولګول شي.

د امریکا د بهرنیو چارو وزارت له خوا پرون په خپره شوې خبرپاڼه کې انتوني بلینکین ویل، دغه پیسې به د امریکا د نړیوالې پراختیایي ادارې له لوري ولګول شي اوپه دې سره د هغو مرستو اندازه چې امریکا په تېر یوه کال کې له افغانستان سره کړې، ۷۷۴ ملیون ډالرو ته رسیږي.

د ورځې تازه خبرونه دلته ولولئ

افغانستان نن د اسيا د ۱۹ کلنو کم عمره فوټبال سياليو کې له ایران سره لوبه کوي

د افغانستان ۱۹کلن کم عمره فوټبال لوبغاړي - ارشيف

د افغانستان فوټبال فدراسيون په يوې خبر پاڼه کې ليکلي، دا سيالۍ د افغانستان په وخت ۵:۳۰ بجې پيلېږي.

د دې خبرپاڼې په حواله، افغان لوبغاړو د یک‌شبنې په ورځ له تاجکستان ۱-۴ او له هغې وړاندې د جمعې په ورځ له قرغیزستان ۰-۱ ماتې خوړلې وې.

د افغانستان د فوټبال فدراسیون د معلوماتو له مخې، افغانستان له ایران وروسته ازبکستان سره لوبه لري.

دا سيالۍ د تاجکستان په کوربه‌توب کېږي‌.

د ایران په جنوبي ولایت کرمان کې لس تنه وژل شوي

د ايران په عمومي نقشه کې کرمان ولايت

لویدیځو اژانسونو د ایرنا دولتي اژانس په استناد ویلي چې برید کوونکی افغان و او زیاته شوې چې وژل شویو کې شپږ افغانان او څلور ایرانیان شامل دي.

پېښه په ظاهره د شخصي اختلافاتو له کبله پرون په رفسنجان ښار کې شوې ده.

د دغه ښار سرپرست والي حسین رضایي ویلي، بریدګر له تېښتې مخکې ماښام مهال د پولیسو له خوا نیول شوی دی.

راپورونو کې ویل شوي چې بریدګر دماغي ناروغي لرله.

دا بريدونه داسې مهال کېږي چې په دې وروستيو کې د ايرانيانو لخوا افغانانو سره د ناوړه چلند ويډیوګانې پر ټولنيزو شبکو خپرې شوي چې د افغانانو له تند غبرګون سره هم مخ شوې.

ټي ټي پي افغانستان کې د خپلو درې لوړ پوړيو غړيو وژنه تأييد کړه

ارشيف

تحریک طالبان پاکستان تأیید کړه چې درې لوړپوړي غړي یې په افغانستان کې وژل شوي دي.

د ټي ټي پي یوې معتبرې سرچینې د ازادي راډیو مشال څانګې ته د دغې خبرې پخلی کړی دی.

په وژل شویو پاکستاني طالبانو کې یو هم په خالد خراساني مشهور عبدالولي دی.

د دوو نورو نومونه حافظ دولت او مفتي حسن ښودل شوي دي.

دوی تېره ورځ د پکتیکا په برمل ولسوالۍ کې هغه مهال ووژل شول چې موټر یې پر خښ شوي ماین برابر شو.

يو شمېر افغان سوداګر د چين هېواد ويزو برخه کې له ستونزو شکايت کوي

د افغانستان سوداګرۍ خونه

په افغانستان کې د رخت او برېښنايي توکو یو شمېر سوداګر د چین هېواد د ویزو په برخه کې له ستونزو شکایت کوي.

دغو سوداګرو تېره ورځ ناوخته په کابل کې د سوداګرۍ خونې له چارواکو سره په لیدنه کې ددې ستونزې د هوارۍ غوښتنه کړې.

د افغانستان د سوداګرۍ او پانګونې خونې په یوې خبرپاڼه کې ویلي چې د رخت او الکترونکي توکو سوداګرو د چین هېواد د ویزو د صدور په برخه کې د زیات وخت نیول جدي ستونزه یاده کړې او د خونې له چارواکو یې غوښتي چې په دې برخه کې جدي هڅې وکړي.

د خبر پاڼې په حواله، د سوداګرۍ خونې چارواکو دغو سوداګرو ته د چین هېواد د ویزو د صدور په برخه کې د هر ډول همکارۍ ډاډ ورکړی.

دا په داسې حال کې ده چې له دې وړاندې هم په کابل کې د چین سفیر د طالبانو د بهرنیو چارو وزیر سره په کتنه کې افغان سوداګرو ته د ویزو د ورکړې په برخه کې د اسانتیاو خبره کړې وه.

افغانستان بانک نن ۱۲ ميليونه ډالره ليلاموي

د طالبانو تر ولکې لاندې د افغانستان بانک ودانۍ

د طالبانو د حکومت په مشرۍ د افغانستان بانک نن ۱۲ ميلونه ډالره ليلام ته وړاندې کوي.

دغه بانک تېره ورځ ناوخته په خپل ټويټر پاڼه له ټولو شخصي بانکونو، پولي شرکتونو او پانګوالو چې په شرايطو برابر دي په دې پروسه کې د‌ ګډون غوښتنه کړې.

د افغانستان بانک وړاندې ليکلي، چې د پروسې ګټونکی بايد خپل ټول حسابونه د ټاکلې نېټې پورې تصفيه کړي.

د افغانستان بانک د دې پروسې د پیل هدف د بهرنیو اسعارو په وړاندې د افغانیو ارزښت ساتل او د افغانستان په لویو بازارنو کې د ژوند لومړنیو توکو د بیو راټیټېدل ښودلي دي.

خو د ازادي راډيو د راپورنو پر بنسټ د افغانستان په لویو بازارنو کې لا هم د خوراکي او نفتي موادو بیو د پام وړ تغیر نه دی کړی او د ځینو اقتصاد پوهانو په باور د افغانستان بانک دغه چاره تر دا مهاله اغېزمنه نه ده.

موږ هڅه وکړه د افغانستان بانک نظر چې ولې دغه بهیر د نرخونو په کنټرول اغېز نه کوي واخلو خو ددې بانک ویاند صابر مومند د خبر تر خپرېدو پورې زموږ پوښتنه ځواب نه کړه.

سرچينې: کونړ کې ډيورنډ کرښې ته څېرمه د طالبانو او پاکستاني پوځيانو ترمنځ نښته شوې

ډيورنډ کرښه

طالبان او د کونړ د دانګام ولسوالۍ اوسېدونکي وايي چې تېر مازدیګر ډیورند کرښې ته څېرمه د پاکستاني پوځیانو او افغان طالبانو ترمنځ نښته شوې ده.

د طالبانو د ځايي چارواکو او د دانګام د بن شاهي د سیمې د اوسېدونکو په وینا نښته وروسته له هغه وشوه چې پاکستاني پوځیانو د دوی په وینا د کونړ ولایت په ساحه کې پوستې جوړولې او ازغن سیم یې تېراوه.

د دې پېښې نور جزییات وروسته په راپورونو کې وړاندې کېږي.

تر دې مخکې هم د پاکستاني پوځيانو له لوري د ډيورنډ پر کرښه د پوستو د جوړولو راپورونه ورکول شوي دي.

څو ورځې مخکې يوه ويډيو خپره شوه چې په‌کې د بدخشان واخان سيمه کې د پاکستاني پوځيانو له لوري سميټي نښې جوړې شوې وې، چې ويډيو کې ليدل کېدل ځايي طالبان يادې نښې له منځه وړلې.

د پکتيکا په برمل کې د ټي ټي پي درې مهم قوماندانان وژل شوي

د افغانستان په عمومي نقشه کې د پکتيکا ولايت موقعيت

د افغانستان په جنوب ختیځ کې په یوه چاودنه کې د پاکستاني طالبانو درې مهم قوماندانان وژل شوي دي.

د ازادي راډیو مشال څانګې ته له موضوع خبرو سرچینو ویلي چې په وژل شویو قوماندانانو کې یو هم خالد خراساني ته نږدې کس عبدالولي دی.

د دوو نورو نومونه حافظ دولت او مفتي حسن ښودل شوي دي.

د سرچینې پر اساس، د پاکستاني طالبانو د تحریک یا ټي ټي پي دغو قوماندانان پرون (یکشنبه) ماښام د پکتیکا ولایت په برمل ولسوالۍ کې په موټر کې سفر کاوه چې ماین یې په لاره کې وچاودېده.

د افغان کرېکټ ملي لوبډله سبا له ايرلنډ سره لومړۍ شل اوريزه لوبه کوي

د افغانستان او ايرلنډ کرېکټ سيالي - ارشيف

د افغانستان او ایرلنډ د کرېکټ ملي ټیمونه سبا سه شنبه لومړنۍ شل اوریزه لوبه پيلوي.

دا لوبه د ایرلنډ په کوربه‌توب په بلفاست ښار کې ترسره کېږي.

افغان لوبډله یکشنبه بلفاست ته رسېدلې، لومړۍ لوبه د کابل په وخت په دوه نیمو بجو پیلیږي.

د افغانستان او ایرلند تر منځ د کرېکټ په شل اوریزو لوبو کې له پنځو مخکینیو لوبو څلور افغانستان ګټلي او یوه مساوي شوې ده.

د ملي ټيم ځینې مشهوره څېرې لکه راشد خان او محمد نبي هم د لوبو لپاره له ټیم سره یو ځای کېږي.

د اردن يوه مؤسسه له افغان زيانمنو شويو سره مرستې کوي

افغانستان کې د وروستيو زلزلو له امله يو شمېر بې ځايه شوي

د کډوالو په چارو کې د ملګرو ملتونو عالي کمېشنرۍ د اردن له یوې موسسې سره په افغانستان کې له زیانمنو شویو سره د یو میلیون ډالرو مرستې تړون لاسلیک کړ.

د دغه رياست د معلوماتو له مخې، په پکتيکا او خوست کې يوه نيمه مياشت وړاندې د زلزلې له امله زيانمن شويو کسانو ته به مرستې ورسول شي.

د اردن د بشري مرستو شاهي بنسټ (RHF) ویلي چې په افغانستان کې د اړو کسانو د لاسنیوي لپاره به له ملګرو ملتونو سره خپلو همکاریو ته دوام ورکړي.

په پکتیکا او خوست کې د جون په ۲۲مې زلزلې تر زرو زیات کسان مړه او په زرګونو نور یې ټپیان کړل.

حامد کرزي يو ځل بيا د نجونو د ښوونځيو پرانيستلو غوښتنه کړې

پخوانی ولسمشر حامدکرزی

د افغانستان پخواني ولسمشر حامدکرزي یو وار بیا د افغان نجونو پر مخ د ښوونځیو په پرانیستل کېدو ټینګار کړی دی.

ښاغلي کرزي پرون په کابل کې له یوه ډله افغان مېرمنو او نجونو سره کتلي او د ښوونځيو د بیا پرانیستلو په تړاو یې ورسره خبرې کړي دي.

له ښاغلي کرزي سره په خبرو کې افغان ښځینه فعالانو د نجونو د ښوونځیو د ژر تر ژره پرانیستل کېدو او دندو ته د ښځو په ستنېدو ټينګار کړی دی.

د ښاغلي کرزي په حواله په یوه بیان کې چې د هغه په ټوېټر پاڼې خپور شوی راغلي چې د هېواد ښېګڼه په دې کې ده چې د نجونو لپاره د تعلیم زمینه برابره او ښځې په ټولو برخو کې پراخه ونډه ولري.

په افغانستان کې تر شپږم ټولګي پورته د نجونو د ښوونځیو له تړل کېدو ۳۲۵ ورځې ووتلې.

د طالبانو واکمني په یوه اوونۍ کې یو کلنه کېږي خو لا یې د نجونو د ښوونځیو د پرانیستلو په تړاو پرېکړه نه ده کړې.

تخار کې د واليبال جام سيالۍ پاى ته ورسېدې

په دغه سیالیو کې تالقان لوبدلې دوهم مقام ترلاسه کړ.

تخار ولایت کې د واليبال حذفي جام سيالۍ پاى ته ورسېدې.

د افغانستان د والیبال فدارسیون په یوې خبرپاڼې کې ویلي، د واليبال حذفي جام سیالۍ چې دوه اونۍ وړاندې د ١٨ لوبډلو ترمنځ پيل شوې وې تېره ورځ د دشت قلعه ولسوالۍ په بريا سره پاى ته ورسېدې.

په دغه سیالیو کې تالقان لوبدلې دوهم مقام ترلاسه کړ.

دغه سيالۍ د واليبال فدراسيون له لوري د بدني روزنې او ورزش امريت په مرسته د تالقان ښاروالۍ په چمن کې پيل شوې وې، چې موخه يي د غوره ورزشکارانو پېژندل او د مرکز او ولسواليو په کچه د واليبال ورزش وده بلل شوې ده.

د رګبي سیالۍ؛ افغانستان ایران ته په ماتې ورکولو پای لوبې ته لار ومونده

د افغانستان او ایران لوبډلو ترمنځ د رګبي لوبې انځور

د افغانستان رګبي لوبډلې ایران ته په ماتې ورکولو سره د اسيا سياليو پای لوبې ته لار ومونده.

د افغانستان د بدني روزنې او ورزش ریاست په یوې خبرپاڼې کې لیکلي، چې د افغانستان رګبي لوبډلې د اسیا سیالیو په نیمه پای لوبه کې د ۰ـ۲۲ په توپیر ایران لوبډلې ته ماتې ورکړه او په دې سره یې پای لوبې ته لاره ومونده.

د دې ریاست د معلوماتو له مخې، دغه سیالۍ چې د اندونیزیا په پلازمېنه جارکاتا کې تېره اونۍ پیل شوې وې، افغانستان، اردن، هندوستان، اندونیزیا او ایران لوبډلو ته په ماتولو ورکولو سره ددې سیالیو فاینل یا پایلوبې ته لاره پیدا کړه.

د معلوماتو له مخې، په پایلوبه کې به نن افغان لوبډله د سنګاپور لوبډلې سره سیالي وکړي.

د شطرنج نړیوالې سیالۍ؛ د افغانستان ملي لوبډلې قبرس ته ماتې ورکړه

ارشیف

د افغانستان شطرنج ملي لوبډلې قبرس ته ماتې ورکړه.

د ورزشي اژانسونو د راپورنو له مخې، د افغانستان شطرنج ملي لوبډلې د شطرنج نړيوالو لوبو اتم پړاو سیالیو کې تېره ورځ د قبرس ملي لوبډلې ته ماتې ورکړه.

د شطرنج دغه نړېوالې لوبې دوه اونۍ وړاندې د هندوستان هېواد په چېناى ښار کې پیل شوي، چې افغانستان تر دا مهاله په خپل ګروپ کې درېیم مقام لري.

د راپورنو له مخې، افغانستان به نن يکشنبه يوګانډا سره مخ شي.

په دغه سیالیو کې د ۱۸۸ هېوادونو څخه لوبغاړي ګډون لري، چې د روانې میلادي میاشتې تر لسمې نېټې پورې به دوام وکړي.

طالبان: د اوسپڼۍ پټلۍله لارې تر ۶۷ زره ټنه ډېر انتقالات شوي

دغه انتقالات د اقینې، حیرتان او تور غونډۍ بندرونو له لارې شوي.

د طالبانو حکومت تر کنټرول لاندې د اوسپڼۍ پټلۍ اداره وايي، په تېره یوه اونۍ کې ۶۷ زره او ۶۷۷ ټنه انتقالات شوي.

دغې ادارې په یوې خبرپانې لیکلي، چې یاد انتقالات د اقینې، حیرتان او تور غونډۍ بندرونو له لارې شوي.

د خبرپاڼې په حواله، د دغو انتقالاتو ډېره برخه د حیرتان بندر له لارې ده چې ۴۳ زره ۸۲۵ مټریکه ټنه کېږي.

د اوسپنۍ پټلۍ ادارې د معلوماتو له مخې، په یادو انتقالاتو کې نفتي، غیرنفتي او نور مواد افغانستان ته وارد شوي دي.

د یادې ادارې په وینا، په دغه اونۍ کې له دې لارې له افغانستان نه ۹۸۴۰ مټریکه ټنه صادارت هم شوي چې لویه برخه یې ممیز دي.

دغه صادارات او واردات ازبکستان، تاجکستان او ترکمنستان ته شوي.

پاکستان او هندوستان ته د افغانستان د تازه میوو صادرات زیات شوي

ارشیف

د افغانستان د سوداګرۍ او پانګونې خونه وايي، د تېر کال په پرتله پاکستان او هندوستان ته د تازه میوو صادرات زیات شوي.

د دغې خونې مرستیال یونس مومند نن ازادي راډیو ته وویل، د تېر میلادي کال په ورستیو شپږو میاشتو کې د صادراتو کچه ۴۸۰ میلیونه ډالره وو، خو د سږکال په لومړیو شپږو میاشتو کې دغه کچه ۷۵۰ میلیونو ډالرو ته پورته شوې.

د ښاغلي مومند په خبره، که د تازه میوو صادرات په همدې ډول روان وي ښايي د صادراتو کچه تر راتلونکو څو میاشتو پورې څو چند لوړه شي.

دا په داسې حال کې ده، چې له دې وړاندې د افغانستان د تازه میوې صادرونکو ویلي وو، چې د تېر کال په پرتله یې د خټکیو او انګورو په حاصلاتو کې ۵۰ سلنه کموالی راغلی.

دوی ویلي، چې د بزګرانو مصارفو ته په کتو د خټکیو او انګورو قیمتونه ټیټ دي او د مناسب مارکېټ نشتون د دوي لپاره ستونزې جوړې کړي.

نور راوښيه

XS
SM
MD
LG