د لاسرسۍ وړ لېنکونه

تازه خبر
چهارشنبه ۳ زمری ۱۴۰۳ کابل ۰۸:۲۵

افغانستان

عبدالله عبدالله بېرته افغانستان ته ستون شو

عبدالله په خپل فیسبوک پاڼه کې افغانستان ته د بېرته ستنېدو خبر ورکړی او عکسونه یې خپاره کړي، چې په هوایي ډګر کې د مشرانو جرګې د پخواني مشر فضل هادي مسلمیار په ګډون يې يو شمېر کسان هرکلی کوي.
عبدالله په خپل فیسبوک پاڼه کې افغانستان ته د بېرته ستنېدو خبر ورکړی او عکسونه یې خپاره کړي، چې په هوایي ډګر کې د مشرانو جرګې د پخواني مشر فضل هادي مسلمیار په ګډون يې يو شمېر کسان هرکلی کوي.

د افغانستان د ملي مصالحې د عالي شورا پخوانی مشر عبدالله عبدالله افغانستان ته له درې څلویښت ورځني سفر وروسته، ستون شو.

عبدالله چې د طالبانو تر واکمنۍ وروسته څو میاشتې په کابل کې و د غویي په میاشت کې له افغانستانه ووت.

ده په خپل فیسبوک پاڼه کې افغانستان ته د بېرته ستنېدو خبر ورکړی او عکسونه یې خپاره کړي، چې په هوایي ډګر کې د مشرانو جرګې د پخواني مشر فضل هادي مسلمیار په ګډون يې يو شمېر کسان هرکلی کوي.

طالبان وايي، چې د دوی په غوښتنه د پوهنې د پخواني وزیر فاروق وردک په ګډون یو شمېر افغان سیاستوال په وروستیو کې افغانستان ته ستانه شوي دي.

د ورځې تازه خبرونه دلته ولولئ

اصف درانی: "يو‌ان‌ايچ‌سي‌ار" دې خپل هېواد ته د افغان کډوالو د ستنولو ستراتيژي جوړه کړي

د افغانستان لپاره د پاکستان ځانګړی استازی اصف درانی
د افغانستان لپاره د پاکستان ځانګړی استازی اصف درانی

د افغانستان لپاره د پاکستان ځانګړی استازی اصف درانی وايي، پاکستان په افغانستان کې له اقتصادي، سیاسي او ټولنیز پلوه مساعد شرایط غواړي، څو خپل هېواد ته د شاوخوا درې میلیون افغان کډوالو ستنېدو ته زمینه برابره شي.

د پاکستاني رسنیو د راپورونو له‌مخې ښاغلي دراني پرون، په اسلام‌اباد کې د افغانستان او پاکستان د اړیکو په اړه په یوه ګردي مېز کې د خبرو پرمهال له ملګروملتونو، په ځانګړي ډول د کډوالو لپاره د ملګروملتونو له لویې کمیشنرۍ "UNHCR" څخه وغوښتل چې خپل هېواد ته د افغان کډوالو د باعزته ستنېدو لپاره لازمه ستراتیژي جوړه کړي.

پاکستان د تېر ۲۰۲۳ کال په نوامبر میاشت کې افغانستان ته د هغو افغانانو جبري ستنول پیل کړل چې د پاکستاني چارواکو په وینا په دې هېواد کې د استوګنې قانوني اسناد نه‌لري.

طالبان: د روانۍ اوونۍ تر پای به د مس عينک کان د استخراج چارې پيل شي

د لوګر مس عینک کان
د لوګر مس عینک کان

د طالبانو د کانونو او پټرولیم وزارت وايي، له پنځلس کلن ځنډ وروسته به د عینک د مسو کان د استخراج چارې د روانې اوونۍ تر پایه پیل شي.

د دغه وزارت ویاند همایون افغان د سه‌شنبې په ورځ پر خپله ایکس‌پاڼه کې لیکلي چې، د عینک د مسو کان چینایي قراردادي "MJAM" به په افغانستان کې دننه د دغه کان د پروسس چارې ترسره کوي.

هغه لیکي: "قراردادي شرکت مکلف دی چې د ۲۰۰۸ کال د ژمنو پر بنسټ، د وروستي او سل فیصده پروسس سربېره، د دې اوونۍ په پای کې له کوم خنډ او ځنډ پرته د نړۍ د مسو په یوه تر ټولو لوی کان کار پیل کړي."

هغه زیاته کړه، د عینک د مسو کان د عملي کار په پیلېدو سره به ۳ زره هېوادوالو ته په مستقیم ډول او ۱۰ زره نورو ته به په غیر مستقیمه توګه د کار زمینه برابره شي.

د طالبانو د کانونو او پټرولیم وزارت د جولای په ۱۷مه په یوه خبرپاڼه کې ویلي و چې، د چینايي کمپنۍ مشر سونګ وینبینګ او د دغه وزارت سرپرست هدایت الله بدري د عینک د مسو د کان په اړه خبرې کړې دي.

ايراني چارواکو افغانستان سره پر پوله د دېوال جوړولو خبر ورکړی

د افغانستان پولې ته نږدې د ايران يوه پوسته
د افغانستان پولې ته نږدې د ايران يوه پوسته

ایراني چارواکو له افغانستان سره پر پوله د ۳۰۰ کیلومتره دېوال د جوړولو خبر ورکړی.

مهر دولتي اژانس راپور ورکړی چې، د ایران د پیاده ځواکونو عمومي قومندان جنرال مهدي شېردل سه‌شنبه له افغانستان سره پر پوله خراسان رضوي ولایت ته سفر کړی او د دېوال د جوړولو چارې یې کتلي.

جنرال مهدي ویلي، دا دېوال د افغانستان د پولې په اوږدو کې ۳۰۰ کیلومتره اوږد او څلور متره لوړ دی چې چارې یې ژر ختمیږي.

ایراني چارواکو ویلي، د دغه دېوال د جوړولو هدف د دوی په خبره د امنیت د لا ټینګښت، د مخدره موادو د قاچاق او د ناقانونه کډوالو د راتګ مخنیوی دی.

پروان کې د اورلګېدنې له امله لسګونه دکانونه سوځېدلي

د افغانستان په نقشه کې د پروان ولايت موقعيت
د افغانستان په نقشه کې د پروان ولايت موقعيت

د پروان ولايت په مرکز چاريکار ښار کې اورلګېدنې لس دوکانونه سوځولي دي.

‎د پروان د والي وياند حکمت شميم په خپله ایکس‌پاڼه لیکلي، اور سه‌شنبه شاوخوا درې بجې د ښار درېیمې ناحیې کې ولګېد.

‎د پروان د امنيې قوماندانۍ د اور وژنې مسوولينو ویلي، چې اور یې مړ کړی او د زیات خپرېدو مخه يې نيول شوې ده.

‎خو په‌دې پېښه کې د مرګ‌ژوبلې په اړه څه نه‌دي ویل شوي.

‎په اعلامیه کې راغلي چې، د پېښې زیانمنو د مرستې غوښتنه کړې ده.

‎ تر دې مخکې د جمعې په ورځ هم د کندهار د سپين بولدک ولسوالۍ وېش بازار د يوې لويې اورلګېدنې شاهد و، چې له امله يې تر دوه نیمو زرو زيات دوکانونه سوځېدلي دي.

د ترکمنستان او پاکستان د بهرنيو چارو وزيرانو د ټاپي پروژې پر تطبيق خبرې کړي

د ترکمنستان او پاکستان د بهرنیو چارو وزیرانو په دوه اړخیزو مسایلو سربېره د ټاپي پروژې د تطبیق په اړه خبرې کړي.

د ترکمنستان د بهرنیو چارو وزیر رشید مریدوف چې په یوه درې ورځني سفر اسلام‌اباد ته تللی پرون یې له خپل پاکستاني سیال اسحق ډار سره لیدلي.

د پاکستان د بهرنیو چارو وزارت په اعلامیه کې د اسحق ډار په حواله راغلي چې، د ټاپي په څېر پروژې د سیمې هېوادونو لپاره خورا زیات پراختیايي فرصتونه په لاس ورکوي.

د ترکمنستان د بهرنیو چارو د وزیر مریدوف په حواله راغلي چې، باید دواړه هېوادونه پاکستان او ترکمنستان د ټاپي پروژې د تطبیق او اقتصادي اړیکو لپاره ګډې هڅې وکړي.

ټاپي پروژه د ترکمنستان ګاز د افغانستان او پاکستان له لارې هندوستان ته انتقالوي.

په عین حال کې تاس خبري آژانس د ترکمنستان د اورینټ خبري آژانس په حواله خبر ورکړی چې د پاکستان صدراعظم شهباز شریف ویلي، دا هېواد د ټاپي پروژې د سمدستي بشپړولو چارې ته ژمن دی.

شریف دا څرګندونې د ترکمنستان د بهرنیوچارو له وزیر سره په کتنه کړې دي.

د دې پروژې تړون په ۲۰۱۰ کال کې لاسلیک شو خو تطبیق یې د پاکستان او هند ترمنځ د اقتصادي ناهمغږیو او په افغانستان کې د امنیتي تحولاتو په خاطر تراوسه ځنډېدلی دی.

د طالبانو حکومت د کار لومړی ملي کنفرانس جوړ کړی

يو شمېر طالب مشران، انځور - ارشيف
يو شمېر طالب مشران، انځور - ارشيف

داسې مهال چې په افغانستان کې ښځې په اکثر دولتي ادارو کې د کار له حق څخه بې‌برخې شوي، د طالبانو د حکومت د کار او ټولنیزو چارو وزارت د کار لومړی ملي کنفرانس جوړ کړی.

په‌دې کنفرانس کې چې نن په کابل کې پرانیستل شو د سرپرست حکومت یوشمېر چارواکو او د خصوصي سکتور او یوشمېر نړیوالو موسسو استازي ګډون لري.

د کار او ټولنیزو چارو وزارت وايي، په‌دې کنفرانس کې به د بې روزګارۍ او خلکو ته د کاري فرصتونو د جوړولو د تګ‌لارو په اړه بحث وشي.

پر افغانستان د طالبانو له واکنمېدو وروسته نه یوازې ښځو ته په ډېری دولتي او نړیوالو موسسو کې د کار اجازه نه‌شته، بلکې نارینه هم له بې روزګارۍ څخه شکایتونه کوي.

سي‌پي‌جی: د طالبانو حکومت دې افغان ژورنالېست رحیم سعیدي له بنده خوشې کړي

US-NOBEL-JOURNALISM
US-NOBEL-JOURNALISM

د خبریالانو د خوندیتوب کمېټې "CPJ" د طالبانو پر سرپرست حکومت غږ کړی چې افغان ژورنالېست رحیم سعیدي ژر تر ژره له بنده خوشې کړي.

"CPJ" په یوه بیان کې د سعیدي د یوه پخواني همکار له قوله لیکي، نوموړی ژورنالېست چې د انار میډیا په نوم د یوټیوب چینل چلوونکی دی، د جولای په ۱۴مه له خپل خبریال زوی سیدوارث سعیدي او د حسیب په نوم له فلم اخیستونکي سره یوځای د طالبانو د استخباراتو له‌خوا نیول شوی دی.

د بیان له‌مخې حسیب او د سعیدي زوی له دوو ورځو وروسته خوشې شول خو رحیم سعیدي لاهم په نامعلوم ځای کې ساتل کېږي.

"CPJ" وايي، د طالبانو استخبارات باید سعیدي سمدستي او بې له کوم شرطه خوشې او په افغانستان کې د خبریالانو ځپل بند کړي.

د طالبانو حکومت تراوسه د سعیدي د نیولو په اړه څه نه‌دي ویلي.

متیو مېلر: متحده‌ایالتونه له طالبانو سره مرسته نه‌کوي

د امریکا د بهرنیو چارو وزارت ویاند متیو مېلر
د امریکا د بهرنیو چارو وزارت ویاند متیو مېلر

د امریکا د بهرنیو چارو وزارت ویاند متیو مېلر وایي، متحده‌ایالتونه له طالبانو سره مرسته نه‌کوي.

مېلر دغه څرګندونې پرون دوشنبه په خپل خبري کنفرانس کې د یوه خبریال د هغې پوښتنې په ځواب کې وکړې چې، ګواکې له افغانستان سره د امریکا له بشري مرستو طالبان هم مستفید کېږي.

پخوا تر دې سیګار، یا په افغانستان کې د امریکا پر مرستو د څار ادارې اندېښنه ښودلې وه، چې د امریکا د بشري مرستو یوه برخه طالبانو ته هم رسیږي.

سیګار تېره اوونۍ په یوه راپور کې وویل، د امریکا د بهرنیو چارو وزارت دوو څانګو په افغانستان کې بشري ادارو ته ورکړل شوې مرستې د خپلې تګ‌لارې خلاف، نه‌دي ارزولي او د راپور له‌مخې داسې بریښي چې ممکن ۲۹۳ میلیونه ډالر سخت‌دریځو ته رسېدلي وي.

سیګار ویلي و، طالبانو د امریکا د مرستو د جلب لپاره د بشري ادارو د جوړېدو په ګډون ګڼ تاکتیکونه کارولي دي.

د طالبانو حکومت تر اوسه د سیګار پر راپور تبصره نه‌ده کړې.

له کله چې طالبان د ۲۰۲۱ کال په اوړي کې واک ته رسېدلي، امریکا له افغانستان سره په بشري برخه کې سترمرسته کوونکی پاتې شوی او د سیګار د راپور له‌مخې نژدې درې میلیارده ډالره یې افغانستان ته لېږلي دي.

کرکټ بورډ: ای‌سي‌سي د افغانستان ملي لوبډله وستایله

ای سي سي د افغانستان ملي لوبډله وستایله
ای سي سي د افغانستان ملي لوبډله وستایله

د افغانستان کرکټ بورډ ادارې ویلي، د کرکټ نړیوالې شورا "ای‌سي‌سي" په وروستي نړیوال جام کې د افغانستان ملي لوبډلې سیالۍ ستایلي دي.

د دوشنبې په ورځ د جولای په ۲۲مه نېټه د کرکټ بورډ په خپاره شوي خبر کې ویل شوي دي، د ای‌سي‌سي په کلنۍ غونډه کې چې په سریلانکا هېواد کې ترسره شوه د نورو کرکټ ادارو د مشرانو ترڅنګ په‌کې د دې ادارې مشرتابه هم ګډون کړی و.

خبر زیاتوي: "په یاده ناسته کې د کرکټ نړیوالې شورا مشرتابه او ټولو غړیو هېوادونو له لوري په نړیوال جام کې د افغان لوبډلې د وروستیو لاسته راړنو ستاینه وشوه."

دغه راز په خبر کې راغلي دي چې، افغان لوري د سویلي افریقا، نیوزیلینډ او ویسټ اینډیز د کرکټ له مسولینو سره تر چمپینز ټراپۍ وړاندې د لوبلړیو د ترسره کولو خبرې هم کړې دي.

په‌دې خبر کې د سریلانکا او بنګله‌دېش له الف او پاکستان او متحده‌عربي اماراتو سره د نوولس کلنو ځوانانو په لوبلړیو هم خبرې شوې دي.

د ویلو ده چې د یادې ناستې بشپړ جزیات لا د کرکټ نړیوالې شورا له رسنیو سره نه‌دي شریک کړي.

پاکستان د يو بل کال لپاره د راجستر شويو افغان کډوالو د اوسېدو موده رسماً تصويب کړه

د پاکستان حکومت د یوه بل کال لپاره د افغان راجستر شویو کډوالو د اوسېدو د مودې د غځولو پرېکړه رسماً تصویب کړه.

د پاکستان د حکومت په خبرتیا کې چې د ازادي راډیو خبریال ته هم رسېدلې ویل شوي، د فدرال کابینې د پرېکړې په دوام دوی د ۲۰۲۵ کال د جون تر ۳۰مې د راجستر افغان کډوالو د اوسېدو موده غځوي.

پاکستان کې یو میلیون او درې سوه زره افغانان راجستر کارټونه لري، اته لکه نور کډوال بیا د افغان تابعیت کارتونه لري.

د پاکستان د حکومت د ادعا پر اساس څه باندې یو میلیون نور افغان کډوال هلته ناقانونه اوسیږي چې دوی یې ایستلو ته ژمن دي.

پاکستان د تېر کال له نومبر راهیسې شاوخوا شپږ نیم لکه افغانان له خپلې خاورې ایستلي دي.

نور راوښيه

XS
SM
MD
LG