د لاسرسۍ وړ لېنکونه

تازه خبر
جمعه ۱۰ چنګاښ ۱۴۰۱ کابل ۱۱:۴۴

نړۍ

د ملګرو ملتونو د سرمنشي مرستيال: پر اوکراين د روسيې بريد خلکو ته د منلو نه‌دی

ارشيف، د اوکراين د جګړې يو انځور

ملګري ملتونه وایي چې پر اوکراین د روسیې غیرموجه برید د ملګرو ملتو له اصولو سره په ټکر کې دی او دا جګړه چې نن یې سل ورځې پوره شوې د خلکو د منلو نه ده.

د ملګرو ملتو د سرمنشي مرستیال او د اوکراین د کړکېچ همغږه کوونکي امین عواد نن په یوه بیان کې وویل، دا جګړه نه ګټونکی لري او نه به یې ولري او په تېرو سلو ورځو کې ګورو چې خلک وژل شوي، کورونه ویجاړ شوي، کارونه ګډوډ شوي او هیلې مړاوې شوې دي.

د اوکراین ولسمشر ولودومیر زلنسکي پرون ویلي و چې مسکو د اوکراین د خاورې شل په سلو کې تر اوسه لاندې کړې ده.

د ورځې تازه خبرونه دلته ولولئ

د اټومي موافقې په خاطر ايران امريکا سره خبرو ته چمتووالی ښودلی

بیرق ملی ایران

ایران وايي، د نړۍ له سترو قدرتونو سره د ۲۰۱۵ کال د اټمي موافقې د بیا احیا کولو په برخه کې د وروستیو خنډونو د لرې کولو په خاطر له امریکا سره نورو غیر مستقیمو خبرو ته چمتو دی.

په ملګرو ملتونو کې د ایران سفیر مجید تخت روانچي پرون (د جون ۳۰) د ملګرو ملتونو امنیت شورا ته وویل چې د ایران مذاکره کوونکی ټیم یوې هوکړې او نتیجې ته د رسېدو لپاره رغنده تعامل ته چمتو دی.

تخت روانچي دا څرګندونې داسې وخت وکړې چې په قطر کې د ایران او امریکا تر منځ خبرې ناکامه شوې. ایران او امریکا یو بل د دغو خبرو اترو په نه پرمختګ کې پړ بولي.

واشنګټن ویلي چې ایران غیر مرتبطې مسلې راپورته کوي خو تهران وايي د ایران د اقتصادي ګټو په نه تضمین سره امریکا د خبرو لپاره لوی خنډ جوړوي.

پر اووه زره ټنه غَله بار يوه کښتۍ د اوکراين د بردیانسک ښار له ساحلونو ووتله

ارشيف

یوه سوداګریزه کښتۍ چې ۷۰۰۰ ټنه غله پکې بار وه د اوکراین د بردیانسک ښار له ساحلونو ووتله.

دا ښار روسیې اشغال کړی دی.

دا د فبرورۍ له ۲۴ مې د مسکو له خوا پر اوکراین د برید له پیل راهیسې له دې بندري ښاره لومړی باري کښتۍ ده چې د مزل اجازه ترلاسه کوي.

د زاپوریزیا په سیمه کې د مسکو لخوا ټاکل شوي مشر یوګیني بالیتسکي پرون (د جون په 30) د ټیلیګرام شبکې له لارې وویل چې کښتۍ د "دوستو هیوادونو" په لور روانه ده.

خو هغه په ډاګه نه کړه چې د ده هدف کوم دوست هېوادونه دي.

اوکراین پر روسیې تور پورې کړی چې د خپل یرغل پر مهال یې د اوکراین غَله غلا کړې او د اوکرایین د غَلو د وتلو د مخنیوي لپاره یې بندرونه بند کړي دي.

مسکو دغه تورونه رد کړي دي.

مصر ايران ته: د اسراييلي سېلانيانو د وژلو هڅه مه‌کوئ

د مصر بيرغ

د ایران له لوري په ترکیه کې د اسراییلي سېلانیانو د ترور او تښتولو د هڅې په اړه د راپورونو له خپرېدو وروسته مصر هم ایران ته خبرداری ورکړ چې د دغه هېواد په خاوره کې د اسراییلي سېلانیانو د وژلو هڅه ونه کړي.

راپورونه وايي چې د مصر استخباراتي چارواکو له خپلو ایراني سارو سره په کتنه کې هغوی ته خبرداری ورکړی چې که د مصر په خاوره کې د اسراییلي سېلانیانو د ترور هر ډول هڅه وشوه، د تهران او قاهرې اړیکې به اغېزمنې کړي.

اوکراين له سوريې سره ډيپلوماټيکې اړيکې پرې کړې

د اوکراين بيرغ

اوکراین وروسته له هغې له سوریې سره ډیپلوماتیکي اړیکي پرې کړې چې دمشق د اوکراین ختیځې سیمې لوهانسک او دونیڅک د خپلواکو سیمو په توګه وپېژندلې.

دغه اعلان پرون د اوکراین ولسمشر ولادیمر زلنسکي په یوه ویډیویي پېغام کې چې په تلګرام چینل کې ایښول شوې، وکړ.

دونیڅک او لوهانسک چې ورته دونباس سیمه ویل کېږي، پر اوکراین د روسیې د یرغل په ترڅ کې په وروستیو کې د سختې جګړې په ډګر بدلې شوي دي.

د روسیې د تاس خبري آژانس د راپور له مخې د سوریې ولسمشر بشارلاسد چې د روسیې نژدې متحد دی او په کورنۍ جګړه کې یې د روسیې له پوځي ملاتړه ګټه پورته کړې، له روسیې وروسته لومړنی دولت دی چې دغه دواړه بېلتون غوښتونکې سیمې په رسمیت پېژني.

د اوکراين دفاع وزارت: روسيې سره مو ۱۴۴ بنديان تبادله کړي

د اوکراين بيرغ

د اوکراین دفاع وزارت اعلان وکړ چې له روسیې سره یې ۱۴۴ اسیران تبادله کړي چې د هغو په منځ کې د ماریوپول د ازوف سټیل فابریکې دفاع کوونکي هم شامل دي.

دا پر اوکراین د روسیې د یرغل له پیله تر اوسه پورې د بندیانو تر ټولو لویه تبادله ده.

په ۱۴۴ خوشي شویو کې ۹۵ تنه هغه اوکرایني پوځیان دي چې په ازوف سټیل فابریکه کې له اوږدې محاصرې وروسته روسي ځواکونو ونیول.

اوکراین نه دي ویلي چې دا تبادله کله او چېرې وشوه او په مقابل کې یې څومره روسي پوځیان خوشې شوي دي.

ملګري ملتونه: د سوريې په الهول کمپ کې تر ۱۰۰ ډېر کسان وژل شوي

د سوريې بيرغ

ملګري ملتونه وايي، د سوریې په الهول کمپ کې د ښځو په شمول تر ۱۰۰ ډېر کسان وژل شوي دي.

د ملګرو ملتو نو په وینا دا کسان په تېرو ۱۸ میاشتو کې په دغه کمپ کې چې د داعش پخواني جنګي کسان او د هغو د کورنیو غړي ساتل کېږي، وژل شوي دي.

په دغه کمپ کې اکثره دېره کسان بهرنیان دي.

د انګلستان کيپټان له نړيوال کرکټ سره مخه ښه وکړه

ايون مورګن د نيوزيلنډ لوبډلې خلاف په يوه لوبه کې د توپوهنې پرمهال

د انګلستان د یو ورځنیو او شل اوریزو لوبو کيپټان ایون مورګن له نړيوال کرکټ سره مخه ښه وکړه.

۳۵ کلن ایون مورګن پرون اعلان وکړ، چې نور به نړيوال کرکټ پرېږدي.

مورګن که څه هم انګلستان ته د ۲۰۱۹ کال د یو ورځنیو لوبو نړيوال جام وګاټه خو په وروستیو لوبو کې ښه نه و ځلېدلی.

مورګن په ایرلنډ کې زېږېدلی و او په لومړي ځل د ایرلنډ په ملي لوبډله کې ولوبېد خو وروسته د انګلستان له لوبډلې سره یو ځای شو او تر دې چې د دې لوبډلې کيپټان وټاکل شو.

ایون مورګن په ۱۲۶ نړيوالو کې د انګلستان لوبډلې کيپټاني کړې وه، چې ۷۶ لوبې یې ګټلې وې.

مورګن د ټېست کرکټ په ۱۶ لوبو کې ۷۰۰، په ۲۴۸ یو ورځنیو لوبو کې ۷۷۰۱ او ۱۱۵ نړىوالو شل اوریزو لوبو کې ۲۴۵۸ منډې جوړې کړې وې.

د اوکراين په ليسچيانسک کې وضعيت خراب بلل شوی

د اوکراين د جګړې يو انځور

روسي ځواکونه د اوکراین په لیسچیانسک کې ړندو بمباریو ته دوام ورکوي او سیمه ییزو چارواکو په دې ښار کې چې د اوکراین په ختیځ کې د جګړې وروستۍ سنګر بلل کېږي، وضعیت ډېر خراب بللی دی.

د اوکراین ولسمشر ولادمیر زلنسکي روسیه تورنه کړې چې په کریمینچوک کې په قصدي توګه ملکیان په نښه کوي په هغه ښار کې چې د خرڅلاو پر یوه لوی مرکز د روسیې د تیرې ورځې د توغندویي برید په نتیجه کې لږ تر لږه اتلس کسان وژل شوي او په لسګونو نور تر اوسه تري تم دي.

زلنسکي وویل، روسیه غواړي هر څومره چې کولای شي خلک ووژني.

نوموړي دغه راز پرون له ملګرو ملتونو وغوښتل چې ځانګړی پلاوی دې د پېښې ځاته واستوي یا دې په خپله د ملګروملتونو سرمنشي ورشي ترڅو پر توغنديو لګېدلی دغه ځای له نژدې وګوري.

زلنسکي دغه څرګندونې د ملګرو ملتونو د امنیت شورا هغې بېړنۍ غونډې ته وکړې چې د روسیې له دغه توغندویي برید وروسته د کییف په غوښتنه رابلل شوې وه.

ناټو کې د فنلنډ او سويډن د غړيتوب منلو په اړه ترکيې موافقه کړې

د ترکيې ولسشر رجب طيب اردغان او د ناټو عمومي منشي ينسټولټنبرګ

ترکیې منلې ده چې په ناټو کې د فنلنډ او سویډن د غړیتوب د غوښتنې پر وړاندې له مخالفت څخه لاس اخلي.

پر اوکراین د روسیې له یرغل وروسته دې دوو هېوادونو په ناټو کې د غړیتوب غوښتنه وکړه خو د ناټو غړې ترکیې یې مخالفت کاوه.

د فنلنډ ولسمشر ساولي نینیستو پرون وویل دا موافقه وروسته له هغه ترلاسه شوه چې ده او د سویډن صدر اعظمې مګدالینا اندرسون پرون (د جون ۲۸مه) په مادرید کې د ناټو د سرمشریزې له جوړېدو مخکې د ترکیې له ولسمشر رجب طیب اردوغان سره وکتل.

نوموړي ويلي، له دې کتنې وروسته هغه ګډه موافقه لاسليک شوه چې له مخې یې دا درې هېوادونه له بهره د امنیتي ګواښ په صورت کې د یو بل پوره ملاتړ کوي.

شمالي وزيرستان: دوه پوليس او د پوليو ضد واکسين کمپاين يو غړی وژل شوي

د وژل شويو کسانو د تدفين مراسم

په شمالي وزیرستان کې د پولیو پرضد د واکسین د کمپاین پرمهال د وسله والو په برید کې دوه پولیس او د واکسین د کمپاین یو غړی وژل شوي دي.

په سیمه کې د پولیسو یوه چارواکي عزیزالله ویلي دي چې په دې برید کې یو لاروی هم ټپي شوی دی.

د نوموړي په وینا برید کوونکي چې پر موترسایکل سپاره وو، له سیمې په تېښته بریالي شوي دي.

افغانستان او پاکستان د نړۍ یوازیني هېوادونه دي چې تر اوسه هم د ماشومانو د ګوزڼ د ناروغۍ- پولیو پېښې پکې شته.

له اپرېل میاشتې راهیسې، په پاکستان کې د پولیو یوولس پېښې موندل شوي چې واړه په شمالي وزیرستان کې وې.

دا پېښه یوه ورځ وروسته له دې وشوه چې د پاکستان حکومت د ټول هېواد په کچه د پولیو پرضد د واکسین کمپاین پیل کړ. د دې برید پړه تراوسه کومې ډلې نه ده منلې.

کولمبيا: په يوه زندان کې د اور لګېدنې له امله ۵۱ کسان مړه شوي

ارشيف

د کولمبیا د جنوب لویدیځ په یوه زندان کې د بلوا پر مهال اور لګېدلی چې په نتیجه کې یې لږ تر لږه ۵۱ کسان مړه او تر شلو زیات نور ټپیان شول.

د زندانونو ملي ادارې ویلي، پېښه پر ځايي وخت د سې شنبې سهار شوې.

بلوا او اورلګېدنې هغه وخت پېښه شوه، چې بلواګرو زندانیانو دوی لوري ته د پولیسو د مخکې تګ د مخنیوي لپاره اورونه ولګول.

د کولمبیا چارواکي وايي، په پېښه کې ۵۱ بندیان مړه او ۲۴ نور ټپیان شوي دي.

ملګرو ملتونو په مراکش کې د ۲۳ کسانو د مړينې د څېړنو غوښتنه وکړه

د مراکشي پناه غوښتونکو انځور

ملګرو ملتونو پرون سې شنبه د لږ تر لږه ۲۳ کسانو د مړینې په اړه د بېطرفانه څېړنو غوښتنه وکړه.

دغه کسان وروسته له هغې مړه شول، چې تېره جمعه شا و خوا ۲۰۰۰ پناه غوښتونکو هڅه وکړه، چې له مراکش څخه هسپانیا ته واوړي.

د ملګرو ملتونو د بشري حقونو ادارې ویاندې راوینا شامداساني پرون په جنیوا کې خبریالانو ته وویل: ملګري ملتونه له دواړو هېوادونو غواړي چې اغېزناکې او بې پرې څېړنې یقیني کړي.

ملګري ملتونه وايي په تاوتریخوالي کې ۲۳ پناه غوښتونکي مړه شوي او ۷۶ نور ټپیان شوي دي.

د مراکش چارواکي وايي په تاوتریخوالي کې د دوی ۱۴۰ پولیس هم ټپیان شوي دي.

امريکا تازه پر ۷۰ شرکتونو او ۲۹ کسانو بنديزونه ولګول

د امريکا بيرغ

د امریکا متحدو ایالتونو پرون سې شنبه پر ۷۰ شرکتونو او ۲۹ نورو اشخاصو بندیزونه ولګول، چې په دوی کې د روستیک (Rostec) په نوم د روسیې یو دفاعي شرکت هم شامل دی.

د دغو بندیزونو هدف، د وسلو د جوړولو او ګمارلو لپاره د روسیې د قابلیتونو پر «زړه» حمله ښوول شوې ده.

د دغو بندیزونو له مخې چې د امریکا د خزانې وزارت اعلان کړي، د روسیې د سرو زرو پر وارداتو بندیز هم شامل دی.

د امریکا د خزانې وزیرې جنت یلین (Janet Yellen) په یوه اعلامیه کې وویل د اوکراین په وړاندې د روسیې د جګړې له کبله، امریکا یو وار بیا ټینګار کوي، چې له خپلو شریکانو او متحدانو سره پر مسکو نورو سختو بندیزونو ته ژمن ده.

په پاکستان کې د پوليو ضد کمپاين يو کارکوونکی او دوه پولیس وژل شوي

په پاکستان کې کور په کور د پولیو ضد واکسین کمپاین انځور

وسله والو نن د پاکستان په شمال لویدیځ کې د پولیو د واکسین د کمپاین پر یوه ټیم په برید کې یو روغتیاپال او دوه پولیس وژلي دي.

دغه وروستۍ پېښه په شمالي وزیرستان کې چیرې چې د پولیو ډېرې پیښې ثبت شوې، رامنځ ته شوې ده.

د افغانستان ترڅنګ پاکستان د نړۍ له هغو دوو هېوادونو دي چې تر اوسه پکې د پولیو ناروغۍ شته او ډېر ځلې د سخت دریځو له خوا پر واکسیناتورانو حملې کېږي.

لکه د افغانستان په څېر په پاکستان کې هم له پنځو کلونو کم عمره ماشومانو ته د پولیو د واکسین کمپاین له پرون دوشنبې راهیسې پیل شوی دی.

پاکستاني چارواکو ویلي چې د دغه کمپاین په ترڅ کې به له ۱۲ ميلیون او ۶ سوه زره زیاتو ماشومانو ته دغه واکسین ورکړل شي.

پاکستان له پنځلسو میاشتو وروسته په تېره اپریل میاشت کې د پولیو د لومړۍ پېښې د ثبتېدو خبر ورکړ.

له هغه راهیسې په دې هېواد کې یولس پېښې ثبت شوي دي.

ټولې دغه پېښې د شمالي وزیرستان په هغو کلیو کې ثبت شوي چې ډېری اوسېدونکي یې محافظه کار او د واکسینونو ضد دي.

په افغانستان کې چارواکو هیله څرګنده کړې چې د دغه کمپاین په ترڅ کې چې تر پنجشنبې پورې به دوام کوي، نژدې لس ميلیونه ماشومان د پولیو ضد واکسین شي.

د ناټو د غړو هېوادونو مشران په مادرید کې مهمه غونډه کوي

د ناټو سازمان نښان

د ناټو د غړو هېوادونو مشران نن ناوخته د اسپانیا په پلازمېنه مادرید کې په هغه درې ورځنۍ غونډه کې راټولېږي چې په وروستیو څو کلونو کې د دې ټلوالې تر ټولو مهمه غونډه ګڼل کېږي.

د ناټو عمومي منشي یینس ستولتېنبېرګ پرون وویل، چې په دې سرمشریزه کې به د اوکراین لپاره د ډاډمنو مخابراتو، د ډرون ضد سیسټمونو او تېلو په څېر په بېلابېلو برخو کې د مرستو پر یوې نوې بستې موافقه وشي.

په پام کې ده چې د اوکراین ولسمشر ولودیمیرزیلینسکي هم دې غونډې ته وینا وکړي.

نور راوښيه

XS
SM
MD
LG