د لاسرسۍ وړ لېنکونه

تازه خبر
یکشنبه ۱۲ چنګاښ ۱۴۰۱ کابل ۰۰:۱۶

افغانستان

د افغان ښځو په اړه طالبانو د ملګرو ملتونو پرېکړه ليک رد کړ

د يوناما لوګو

طالبانو نن د ملګرو ملتو د امنیت شورا پریکړه لیک رد کړ چې پکې راغلې دي چې طالبانو پر ښځو سخت بندیزونه لګولي دي.

د امنیت شورا پنځلس غړیو د سې شنبې په ورځ پر طالبانو غږ وکړ چې سمدستي دې پر ښځو له لګولیو بندیزونو لاس واخلي.

امنیت شورا انتقاد کړی چې طالبانو د زده کړو، کار او د ښځو پر ازادانه سفر بندیزونه لګولي دي.

د طالبانو مشر دا امر هم کړی دی چې ښځې دې په عامه ځایونو کې حجاب اغوندي او مخ دې پټوي.

د طالبانو د بهرنیو چارو وزارت نن په یوه بیان کې د امنیت شورا اندېښنې بې بنسټه وبللې او ویې ویل، افغان حکومت اسلامي حجاب د ټولنې له دیني او کلتوري دودونو سره سم او مناسب ګڼي.

د ورځې تازه خبرونه دلته ولولئ

نن په کابل کې د علماوو د غونډې وروستۍ ورځ ده

په دې درې ورځنۍ غونډه کې تر ۳۰۰۰ زیاتو کسانو برخه اخیستې.

په کابل کې د طالبانو له خوا د رابلل شوې د علماوو لویې غونډې نن درېیمه او وروستۍ ورځ ده او تمه کېږي، چې نن یې د ګډو بحثونو نتیجه څرګنده شي.

په دې درې ورځنۍ غونډه کې چې د طالبانو په خبره تر ۳۰۰۰ زیاتو کسانو په کې برخه اخیستې، د ښځو ځای ځکه دی، چې طالبانو د ګډون بلنه نه ده ورکړې.

د طالبانو دغه اقدام او د نجونو او ښځو اوسنیو ستونزو ته د دوی د مشر ملا هبت اله اخندزاده نه اشارې کولو د ښځو د حقونو د فعالانو انتقادونه پراولي دي.

ملګري ملتونه: طالبانو د ښځو ژوند په پراخه پیمانه محدود کړی

د افغانستان د بشري وضعیت په اړه د ملګرو ملتونو ځانګړی راپور ورکوونکی ریچارډ بنیټ

د افغانستان د بشري وضعیت په اړه د ملګرو ملتونو ځانګړی راپور ورکوونکی ریچارډ بنیټ وايي، په افغانستان کې د طالبانو چارواکو د ښځو ژوند په پراخه پیمانه محدود کړی دی.

بنیټ پرون په یوه ټویټ کې ویلي، طالبانو په لوی لاس د ښځو او نجونو پر خودمختارۍ، ازادۍ او حیثیت حمله کړې او د معافیت فرهنګ یې رامنځته کړی دی.

بنیټ د ملګرو ملتونو د بشري حقونو د شورا پرونۍ اعلامیه هم خپره کړې ده.

دغې شورا پرون په جنیوا کې په خپله غونډه کې له طالبانو وغوښتل په افغانستان کې د ښځو د حقونو د بهترۍ او د هغوی خلاف د منظم ظلم د پای ته رسولو لپاره د نورو اسلامي هېوادونو پر پل پل کېږدي.

امريکا: طالبان د بشري مرستو بهیر کې لاسوهنه کوي

آرشیف

د امریکا د بهرنیو چارو وزارت ویلي، طالبان د بشري مرستو په بهیر کې مداخله کوي او په دې اړه یې خپله اندېښنه د طالبانو له حکومت سره شریکه کړې ده.

د امریکا د بهرنیو چارو وزارت ویلي، طالبان د بشري مرستو په بهیر کې مداخله کوي او په دې اړه یې خپله اندېښنه د طالبانو له حکومت سره شریکه کړې ده.

د امریکا د بهرنیو چارو وزارت په یوه خبرپاڼه کې ويلي، چې د افغانستان لپاره د امریکا ځانګړي استازي ټام وېسټ او د طالبانو حکومت د بهرنیو چارو سرپرست وزیر امیر خان متقي په خپله وروستۍ کتنه کې د بشري مرستو په اړه خبرې کړې دي.

په خبرپاڼه کې ویل شوي، چې د امریکا حکومت به په افغانستان کې له زلزله ځپلو سره ۵۵ میلیونه ډالره مرسته وکړي چې ځان ته د ژوند لومړني توکي پرې برابر کړي.

د امریکا حکومت داسې مهال په بشري مرستو کې د طالبانو د مداخلې خبره کوي، چې تر دې مخکې هم د عامو خلکو لوري شکایتونه شوي وو چې بشري مرستې بې وزله کسانو ته نه رسېږي.

طالبانو د امریکا له لوري د کنګل شویو پيسو په اړه د پیل شویو خبرو هرکلی وکړ

د افغانستان بانک

د طالبانو حکومت په مشرۍ د افغانستان بانک د امریکا له لوري د کنګل شویو پيسو په تړاو د پیل شویو خبرو هرکلی وکړ.

دغه بانک په خپل ټویټر پاڼه کې د ویډیويي پیغام له لارې د دې خبرو د هرکلي ترڅنګ له امریکا غوښتي څو د افغانانو پېسې چې د دوی حق دی ازادې کړي.

یاد بانک هیله مندي ښودلې چې پیل شوې خبري په نږدې راتلونکې کې کولای شي د افغانستان بانکي اړیکې له نورو هېوادونو سره بېرته د پخوا په څېر ورغوي.

له بلې خوا د افغانستان د سولې لپاره د امریکا ځانګړي استازي ټوماست ویسټ په خپل تویتر پاڼه د یوې خبرپاڼې په خپرولو سره ویلي، چې نوموړي په دوحه کې د طالبانو له استازو سره په دې اړه پراخ بحثونه کړي.

په خبرپانه کې ویل شوي، چې امریکا غواړي د افغانستان خلکو سره د بشري مرستو ترڅنګ په نورو اقتصادي برخو کې هم مرستې وکړي.

دا څرګندونې داسې مهال دي، چې لاهم امریکا او د نړۍ یو شمېر بانکونو د افغانستان کنګل شوې پيسې نه دي ازاده کړي.

د ننګرهار په روداتو کې چاودنه شوې

د جلال اباد ښار يوه څنډه

د ننګرهار په روداتو ولسوالۍ کې یوې دیني مدرسې ته د لاسي بم غورځولو پېښه کې د دې مدرسې ۸ زده کوونکي ټپیان شوي دي.

د ننګرهار د امنیې قوماندانۍ ویاند عبدالبصیر زابلي ازادي راډیو ته په استول شويو معلوماتو کې ویلي چې نامعلومو کسانو بېګاه شپه شااوخوا یوه بجه د روداتو ولسوالۍ د زینو کلي حضرت عثمان ذوالنورین په نامه مدرسې ته لاسي بم غورځولی چې له امله یې په دغه مدرسه کې مېشت ۸ زده کوونکي یې ټپیان کړي دي.

د زابلي د معلوماتو له مخې، د پېښې ټپیان روغتون ته انتقال شوي او تر درملنې لاندې دي.

په ټپیانو کې د یوه کس وضعیت نازک ښودل شوی دی.

تراوسه معلومه نه ده چې پېښه د چا له خوا او ولې شوې خو د ځایي امنیتي مسؤلانو په خبره، په دې اړه څېړنې او د عاملانو د نیولو هڅې یې روانې دي.

د خوست یو شمېر اوسېدونکي: زلزله ځپلي لا هم د مرستو په تمه دي

د خوست په سپیرې کې د زلزلې له کبله د نړېدلي کور انځور

د خوست د سپېرې ولسوالۍ د امیرسپر د کلي اوسېدونکي، چې د اکثرو خلکو کورونه یې د تېرې اوونۍ په زلزله کې ویجاړ شوي دي، وايي چې لا هم د مرستو په تمه دي.

د دې کلي اوسېدونکي په خیمو کې اوسي.

په پکتیکا او خوست کې شاوخوا ۳ زره کورونه نړېدلي او د ملګروملتونو په وینا تر ۳ لکه ۶۲ زره زیات خلک زیانمن شوي دي.

د خوست د عامې روغتیا د ریاست د معلوماتو له مخې، یوازې په سپیرې ولسوالۍ کې ۳۶ تنه مړه شوي او ۱۳۰۰ نور ژوبل شوي دي.

په همدې حال په دې ولسوالۍ کې د نړېدلیو کورونو شمېر ۱۵۰۰ ته رسېږي.

ایران سر له ننه د اقامې نه درلودونکي افغان کډوال له خپلې خاورې باسي

په ایران کې د افغان کډوالو انځور

د ایران د کورنیو چارو وزارت اعلان کړی چې سر له نن شنبې څخه هغه افغانان، چې په ایران کې د اقامت اسناد نه لري، له خپلې خاورې باسي.

دغه وزارت ایرانیانو ته هم خبرداری ورکړی، چې هغو افغانانو ته کار ورنه کړي چې د اقامت اسناد نه لري.

د ایران د کورنیو چارو وزارت په وینا، هغه ایرانیان به تر شپږ میاشتو په بند محکوم شي چې بې اسناده افغانان په کار وګوماري.

د ایران حکومت تر تېرې پنجشنبې په ورځ، چې د سرطان نهمه وه، افغان کډوالو ته وخت ورکړی و، چې په سرشمېرنې کې برخه واخلي.

خو له دې سره سره ایران تر یادې مودې وړاندې هره ورځ سلګونه افغانان له خپلې خاورې ایستلي دي.

د تېر کال په اګست کې د طالبانو له واک ته رسېدو وروسته شاوخوا یو میلیون افغانان ایران او دوه نیم لکه پاکستان ته کډوال شوي دي.

تایوان په افغانستان کې زلزله ځپلو سره مرسته کوي

په جنوب ختیځ کې زلزله ځپلو سره د مرستې رسونې بهیر

تایوان په افغانستان کې زلزله ځپلو ته د مرستې لپاره د ترکیې له سره میاشت ټولنې سره همکاري کوي.

د تایوان د بهرنیو چارو وزارت د جمعې په ورځ په یوه خبرپاڼه کې وویل، حکومت یې پرېکړه کړې چې د ترکیې له سره میاشت ټولنې سره همکاري وکړي څو د افغانستان د وروستۍ زلزلې زیانمن شویو ته ژر تر ژره مرسته ورسېږي.

د پکتیکا او خوست د تېرې میاشتې په زلزله کې رسماً د ۱۱۵۹ تنو مړینه او د شاوخوا ۲ زره ټپي کېدا تایید شوه او د ۳ زره کورونو د نړېدو له کبله تر درې نیم لکه زیات افغانان زیانمن شوي دي.

تایوان مخکې له افغان زلزله ځپلو سره یو میلیون ډالره مرسته اعلان کړې وه.

هوګو شارتر دوحه کې له طالب چارواکو سره پر افغانستان خبرې کړي

طالب چارواکو سره د برېتانيا د شارژدافير کتنه

د افغانستان لپاره د برېټانیا شارژدافیر هوګو شارتر په دوحه کې له طالب چارواکو سره په یو لړ مسایلو خبرې کړي.

شارتر د طالبانو د بهرنیو چارو له وزیر امیرخان متقي سره بېګا کتلي او په خپل ټوېټر باندې یې لیکلي چې له متقي سره په خبرو کې یې د هغو بشري همکاریو یادونه وکړه چې برېټانیا یې د وروستۍ زلزلې ځپلو سره کوي.

هغه همدا راز ویلي چې خلکو ته د اساسي خدماتو، د سیاسي ټولمشولیت پر اهمیت، بشري حقونو ته د درناوي او تعلیم ته د ټولو نجونو د پرېښودولو پر مساییلو مهم بحثونه وکړل.

له امیرخان متقي سره د هوګوشارتر د لیدنې په اړه د طالبانو د بهرنیو چارو وزارت ویاند قهار بلخي هم څو ټویټونه کړي او یادونه یې کړې چې د برېټانیا استازي له زلزه ځپلو سره د درې نیم میلیونو پونډو عاجله مرسته اعلان کړه.

مجاهد: د ديني عالمانو غونډه کې به نن کمېټې فعاليت پيل کړي

د طالبانو د حکومت وياند ذبيح الله مجاهد

نن په کابل کې د طالبانو د حکومت له خوا د دیني عالمانو او قومي مخورو د غونډې دویمه ورځ ده.

د طالبانو د حکومت ویاند ذبیح الله مجاهد وايي ګډونوالو په څو کمېټو کې خپل کار مخته وړي او سبا به بیا پرېکړه لیک هم ولري.

طالبانو شاوخوا درې نیم زره دیني عالمان او مخور د افغانستان له ولایتونو او ښارونو راغوښتي او وايي چې پر مهمو ملي او سیاسي مسایلو بحث کوي.

د طالبانو د حکومت ویاند پرون په خبري کنفرانس کې ژمنه وکړه چې د دوی مشرتابه د امکان تر حده د غونډې د ګډونوالو پرېکړې پلې کوي.

په دې ډله کې هېڅ ښځه نه ده رابلل شوې چې دې مسلې ګڼې نیوکې راپارولي.

هندي رسنۍ: ۱۵۰ سېکهان او هندوان به له کابل هند ته ولېږدول شي

ارشيف

هندي رسنۍ وايي چې ۱۵۰ تنه افغان سېکهان او هندوان لا هم په کابل کې انتظار دي چې هند ته ولېږدول شي.

په کابل کې د جون په ۲۳ نېټه د سېکهانو بر ګوردواره له بریده وروسته پرون (پنجشنبې) د افغان سېکهانو لومړۍ ډله هند ته لاړه.

دا ۱۱ تنه افغان سېکهان د هند د حکومت او د دغه هېواد د مدني ټولنو په مرسته په یوه ځانګړې الوتنه کې ډیلي ته لاړه.

د کابل په کارته پروان کې د سېکهانو پر ګوردواره له بریده وروسته د هند حکومت ومنله چې سل تنو افغان سېکهانو ته به پناه ورکړي.

هند افغانستان ته ۶ ټنه طبي مرسته استولې

ارشيف

هندي رسنیو د خپل هېواد د چارواکو په قول ویلي چې دا افغانستان ته د هند د طبي مرستو اووم پېټی دی.

په پرونۍ مرسته کې، چې په کابل کې اندراګاندي روغتون ته وسپارل شوه، ضروري درمل شامل دي.

وروسته له دې چې ملګرو ملتونو له افغانستان سره د بشري مرستو غوښتنه کړې، هند تر اوسه پورې په اوو پړاوونو کې ۲۰ ټنه طبي مرسته افغانستان ته لېږلې ده.

دې هېواد افغانستان ته د ۵۰ زره ټنه غنمو ژمنه هم کړې چې ډېره برخه یې د پاکستان له لارې افغانستان ته رسېدلې ده.

د ترکيې ولسمشر د کابل هوايي ډګر د مديريت په اړه د طالبانو ځواب ته منتظر دی

د ترکيې ولسمشر رجب طيب اردوغان

د ترکیې ولسمشر رجب طیب اردوغان وايي، ترکیې له قطر او متحده عربي اماراتو سره د افغانستان د کابل د نړیوال هوايي ډ‌ګر د عملیاتو وړاندیز کړی او لا هم د طالبانو ځواب ته انتظار ده.

اردوغان، دا خبره پرون (پنجشنبې) په مادرید کې د ناټو د سرمشریزې په پای کې یوې خبري غونډې ته وکړه.

نوموړی دا خبره داسې مهال کوي چې د طالبانو حکومت د درې هوايي ډګرونو د مديريت چارې يو عربي شرکت ته سپارلي دي.

حنا رباني کهر: لويديځ هېوادونه دې پر افغانستان بنديزونه نرم کړي

د پاکستان د بهرنیو چارو لپاره د دولت وزیره حنا رباني کهر

د پاکستان د بهرنیو چارو لپاره د دولت وزیرې حنا رباني کهر له لوېدیځو هېوادونو وغوښتل چې پر افغانستان بندیزونه نرم کړي.

اغلې کهر پرون (پنجشنبې) په یوه مرکه کې وویل، له اقتصادي نظره د افغانستان انزوا به د دغه هېواد اقتصاد د پاشل کېدو لور ته بوځي.

دې په ځانګړي ډول په افغانستان کې د نړیوالو بانکونو د فعالیت درېدا او د دغه هېواد د شتمنیو کنګل پاتې کېدا د افغانستان د اقتصاد لپاره خطرناکه وبلله.

د بهرنیو چارو لپاره د پاکستان د دولت وزیرې د طالبانو تر واک ته رسېدو مخکې له افغانستانه د لوېدیځو ځواکونو د وتلو پر څرنګوالي انتقاد وکړ.

چين: د افغانستان زلزله ځپلو ته مو مرستې رسولي دي

د افغانستان په جنوب ختيځ کې د زلزلې له امله رامنځته شوې ويجاړي

چین وايي، د یوې خیریه غیر حکومتي موسسې له لوري یې د افغانستان زلزله ځپلو ته بشري مرستې ورسېدې.

چین د افغانستان له زلزله ځپلو سره د اووه نیم میلیون ډالرو په ارزښت د بشري مرستو ژمنه کړې ده.

په همدې حال کې د ملګرو ملتونو د بشري مرستو د همږغۍ ادارې یا اوچا پرون یو وار بیا اعلان وکړ چې په افغانستان کې شاوخوا ۳ لکه ۶۲ زره زلزله ځپلو ته څه باندې ۱۱۰ میلیون ډالرو ته فوري اړتیا ده.

نور راوښيه

XS
SM
MD
LG