د لاسرسۍ وړ لېنکونه

تازه خبر
چهارشنبه ۱۵ چنګاښ ۱۴۰۱ کابل ۱۱:۴۹

افغانستان

طالبان په اماراتو کې سوداګرو ته: په افغانستان کې پانګونه وکړئ

آرشیف: هرات کې د يوې فابریکې انځور

د طالبانو د صنعت او سوداګرۍ وزارت وايي، عربي متحده اماراتو ته تللي افغان پلاوي هلته له مېشتو افغان سوداګرو سره تر ليدنې وروسته له هغوی غوښتي، چې په خپل هېواد کې پانګونه وکړي.

دغه وزارت تېره ورځ په خپل ټويټر پاڼه لیکلي، چې مسوولينو افغان سوداګرو ته په دننه افغانستان کې د هر ډول همکارۍ ډاډ ورکړی.

وزارت وړاندې لیکلي، چې تللي پلاوي افغان سوداګرو ته په خطاب کې ویلي، اوسمهال په افغانستان کې فساد ختم شوی او د هر ډول پانګونې لپاره زمینه برابره ده.

دا د طالبانو له واکمنېدو وروسته په عربي متحده اماراتو کې د طالب چارواکو او افغان سوداګرو لومړنۍ ناسته ده چې کېږي.

دا لیدنه داسې مهال ترسره شوه، چې د طالبانو له واکمنېدو سره ډېرى افغان سوداګرو خپلې پانګې له افغانستانه بهر ته وویستلې.

د ورځې تازه خبرونه دلته ولولئ

يوناما په کابل کې د بهرنیو هېوادونو د ډيپلوماتيکو استازوليو د فعالیت هرکلى وکړ

په افغانستان کې د ملګرو ملتونو د مرستندویه ماموریت مرستیال او سرپرست مارکوس پوټزل

د طالبانو د حکومت د بهرنیو چارو وزارت وایي، د ملګرو ملتونو د مرستندویه ماموریت یوناما نوي مرستیال او سرپرست مارکوس پوټزل د بهرنیو چارو له سرپرست وزیر امیرخان متقي سره په کتنه کې ویلي، چې په افغانستان کې د بهرنیو هېوادونو د ډیپلوماتیکو استازولیو د فعالیت هرکلی کوي او غواړي چې نور هېوادونه هم په دې هېواد کې سفارتونه پرانېزي.

د بهرنیو چارو وزارت مرستیال ویاند حافظ احمد ضیا په یوه ټویټ کې ویلي، چې ښاغلي پوټزل په دې کتنه کې چې نن یې ترسره کړه، متقي ته د خپل ماموریت په اړه معلومات ورکړل او د ښه ماموریت د ترسره کولو په برخه کې یې د اسلامي امارت همکاري او همغږي لازم وبلل.

د احمد ضیا په وینا متقي هیله څرګنده کړې، چې د یوناما استازولۍ د افغانستان او نړۍ ترمنځ د مثبتو اړیکو او ګټور تعامل په برخو کې خپل رول ولوبوي.

يوناما د دغې کتنې په اړه تراوسه څه نه دي ویلي، خو ښاغلي پوټزل له دې کتنې مخکې په یوه ټویټ کې چې یوناما پر خپلې پاڼې کې خپور کړی، ویلي چې د افغانستان خلکو ته چې هېواد یې په معاصر تاریخ کې په یوه حساسه مرحله کې دی، کارکولو ته ژمن دی.

پوټزل چې له ۲۰۱۷ نه تر۲۰۲۱ کال پورې یې د افغانستان او پاکستان لپاره د جرمني د ځانګړي استازي په توګه دنده ترسره کړې، د روان کال د جون په اولسمه د ملګرو ملتونو عمومي منشي انټونیو ګوټیرش د افغانستان د سیاسي ماموریت لپاره د خپل نوي مرستیال په توګه وټاکه.

نوموړي په یوه ټویټ کې چې د یوناما پر پاڼه خپور شوى، افغانستان ته د رسېدو او د دندې د پیلېدو خبر ورکړی دی.

د افغانستان د بدن ښکلا او فیټنس ملي لپاره لوبغاړي غوره شول

ارشیف

له سلو ډېرو لوبغاړو د بدن ښکلا او فیټنس ملي لوبډلې غړیتوب ترلاسه کړ.

د افغانستان د بدني روزنې او ورزش ادارې پر خپله فېسبوک پاڼه لیکلي دي، چې د بدن ښکلا او فیټنس د غوراوي سیالۍ چې د چنګاښ په ۱۱مه نېټه پیل شوې وې، نن پای ته ورسېدې.

په دې سیالیو کې د ولایتونو ۱۸۰ او د کابل ۱۹۳ لوبغاړو برخه اخیستې وه.

د دې ادارې د معلوماتو پر بنسټ د دې لوبغاړو له ډلې ۱۱۰ لوبغاړي د ښکلا او فیټنس ملي لوبډلې ته غوره شول.

د مهاجرت نړيوال سازمان: د افغانستان زلزله ځپلو ته مو ډېرې مرستې رسولي

زلزله ځپلو سره مرستې

د مهاجرت نړیوال سازمان، IOM وایي چې په پکتیکا او خوست ولایتونو کې یې زلزله ځپلو ته ډیرې مرستې رسولي دي.

IOM په یوه ټویټ کې ویلي چې د زلزلې له پیله دوی په سیمه کې حضور لري او د امریکا، جاپان او جرمني په مرسته یې پکتیکا او خوست ولایتونو ته تراوسه په نژدې ۱۴۰ لاریو کې مرستې رسولي دي.

د دې ادارې په خبره، پر اړو پنځه زره کورنیو یې دېرش زره عاجلې خیمې او د غیر خوراکي موادو بستې ویشلې دي.

د دې ادارې په وینا په پکتیا او خوست ولایتونو کې وروستۍ زلزلې نژدې لس زره کورونه ویجاړ کړي یا زیانمن کړي دي.

جرمني له افغانستان سره د ۵۵ ميليون يورو مرسته وکړه

يورو

جرمني د افغانستان د بشري مرستو له صندوق سره د روان ۲۰۲۲ او د ۲۰۲۳ کلونو لپاره د نورو ۵۵ ملیون یورو مرسته وکړه.

د ملګرو ملتونو د بشري مرستو همغږه کونکې ادارې، اوچا پر خپله ټویټرپاڼه د جرمني د دې مرستو هر کلی کړی او ویلي یې دي چې جرمني په روان کال کې په افغانستان کې له اړو کسانو سره د ژوند ژغورنې د بېړنو مرستو لپاره د پنځوس ملیونه یورو مرسته کړې او هم یې د راتلونکي کال لپاره له دې صندوق سره د پنځه ميلیون یورو مرستې ژمنه کړې ده.

جرمني د بسپنې د دې صندوق دوهم لوی مرسته کونکی بلل شوی چې د مرستو اندازه یې له ۲۰۱۶ کال راهیسې ۱۵۲ ميلیون او شپږ سوه زره یورو ته رسیږي.

د يوناما نوی مرستيال: افغانستان لپاره کار کولو ته ژمن يم

د يوناما نښان

د افغانستان لپاره د ملګروملتونو د مرستندویه ماموریت، یوناما نوی مرستیال مارکوس پوتزل وایي، د افغانستان خلکو ته چې هېواد یې په معاصر تاریخ کې په یوه حساسه مرحله کې دی، کارکولو ته ژمن دی.

ښاغلي پوتزل چې له ۲۰۱۷ نه تر۲۰۲۱ کال پورې یې د افغانستان او پاکستان لپاره د جرمني د ځانګړي استازي په توګه دنده ترسره کړې، د روان کال د جون په اولسمه د ملګرو ملتونو عمومي منشي انتونیو ګوتیرش د افغانستان د سیاسي ماموریت لپاره د خپل نوي مرستیال په توګه وټاکه.

نوموړي په یوه ټویټ کې چې د یوناما پرپاڼه خپورشوی، افغانستان ته د رسېدو او د دندې د پیلېدو خبر ورکړی دی.

امريکا: د افغانستان د کنګل شوې درې نيم ميليارده ډالره شتمنۍ پر ازادېدو کار کوو

د امريکا بيرغ

د امریکا د بهرنیو چارو وزارت وایي، متحده ایالات پر دې مسلې چې په څه ډول د افغانستان کنګل شوې درې نیم ملیارډ ډالره شتمني د افغانستان خلکو ته ورسیږي نه طالبانوته، په بېړه کار کوي.

د دې وزارت ویاند نیډ پرایس چې پرون ناوخته یې په یوه خبري کنفرانس کې څرګندونې کولې وویل، طالبانو د افغانستان له خلکو سره په هره برخه کې کړې ژمنې نه‌دي پر ځای کړي.

هغه زیاته کړه چې متحده ایالات له خپلو متحدانو او شریکانو سره کار کوي او تل یې دا موضوع واضح کړې چې غواړي د افغان ښځو، نجونو او لږکیو حقونه خوندي شي.

د نیډ پرایس په وینا متحده ایالات به دغه راز له خپلو متحدانو سره په ګډه پر طالبانو فشارونو ته دوام ورکړي.

له کله چې طالبان پرافغانستان بیا واکمن شوي دي، د افغانستان په اکثرو ولایتونو کې له شپږم ټولګي پورته نجونې له ثانوي زده کړو منع کړې شوي او د سفرپه ګډون پر ښځو یو لړ محدودیتونه لګول شوي دي.

د خوست او فراه په ګمرکونو کې انالوګ تلې فعالې شوې

د انالوګ تلې د پرانيستلو انځور

د طالبانو حکومت د مالیې وزارت پر خپله وېبپاڼه لیکلي دي، چې د یادو تلو په فعالېدو سره سوداګرو، موټر چلونکو او د ګمرک کارکونکو ته د دې ترڅنګ چې د وزن د تللو چاره اسانه کېږي، ورسره د وزن معلولو او د عوایدو په ټولولو کې د فساد مخنیوی هم کېږي.

د مالیې وزارت د معلوماتو پر بنسټ د فراه د ابونصر فراهي ګمرک نوې فعاله شوې تله ۲۲ متره اوږوالی او ۱۰ لوډسېلونه لري او د خوست ګمرک تله ۱۸ متره اوږدوالی او ۸ لوډسېلونه لري چي هره تله د ۱۵۰ ټنه وزن د پورته کولو وړتیا لري.

د مالیې وزارت ویلي چي ډېر ژر به د نیمروز ګمرک او حیرتانو بندر کي هم د صادراتي توکو لپاره ورته تلې فعالې کړي.

يوناما بېکاره افغانانو ته کاري فرصتونه برابروي

يو شمېر بېکاره افغانان چې د کار په تمه شېبې شماري

په داسې حال کې، چې په اقغانستان کې بېکاري ورځ تر بلې مخ په ډېرېدو ده، د یونما په همکارۍ وزګارو کسانو ته د کاري فرصتونو د برابرولو هڅې روانې دي.

د طالبانو حکومت د اقتصاد وزارت وايي، د ملګرو ملتونو د مرستندوی مامورېت (یوناما) مرستیال د دې وزارت له سرپرست سره په لیدنه کې ویلي، چې دا سازمان ۲ میلیونه کسانو ته د کاري فرصتونو د موندلو په هڅه کې دی.

دې وزارت پر خپله وېبپاڼه لیکلي دي، چې د طالبانو حکومت د اقتصاد وزارت سرپرست قارين دین محمد حنیف د سې شنبې په ورځ په افغانستان کې د یوناما له مرستیال ډاکتر رامز الاکبروف سره لیدلي او په دې لیدنه کې یې د افغاستان په وروستي اقتصادي وضېعت خبرې کړې دي.

دې وزارت د ډاکتر الاکبروف له قوله لیکلي دي چې دوی هڅه کوي د همکارو بنسټونو په مرسته ۲ میلیونه افغانانو ته کاري فرصتونه برابر کړي چې له دې سره به د بشري او عاجلو مرستو د پروژو مرحله د بنسټيزو پروژو مرحلې ته واوړي او د وړو او متوسطو سوداګریو په ملاتړ سره به بې کاري او غریبي را کمه کړي.

د طالبانو د اقتصاد وزارت سرپرست د یوناما له مخکنیو مرستو مننه کړې او له دې سازمان څخه یې غوښتي چې د بنسټیزو پروژو د عملي کولو له لارې دې په افغانستان کې د فقر او بې روزګارۍ په ختمولو کې مرسته وکړي.

د افغانستان بانک نن يولس ميليون ډالره ليلاموي

د افغانستان بانک ودانۍ

د افغانستان بانک په خپله ټویټرپاڼه کې له سوداګریزو بانکونو او د صرافۍ او د پولي خدمتونو له شرکتونو څخه چې په شرایطو برابر وي، غوښتنه کړې چې په دې داوطلبۍ کې ګډون وکړي.

د داوطلبۍ ګټوونکي اړ دي څو خپل حسابونه د لیلام د ورځې تر پایه پورې تصفیه کړي.

د افغانستان بانک له څو میاشتو راهیسې د افغانیو د ارزښت د ثابت ساتلو لپاره هره میاشت څو ځلې په لسګونو ميلیون ډالرو لیلاموي.

د افغانستان بانک داسې مهال د ډالرو د ليلام خبره کوي چې په دې وروستيو کې د نفتي او خوراکي توکو بيې تر بل هر وخت لوړې شوي دي.

د کډوالو عالي کمېشنرۍ کندهار کې يو روغتيايي مرکز پرانيستلی

د افغانستان په عمومي نقشه کې د کندهار ولايت موقعيت

د افغانستان لپاره د ملګرو ملتونو د کډوالو عالي کمېشنرۍ د کندهار ولایت په اعظم کلا کې د یوه روغتیایي مرکز د پرانستلو خبر ورکوي.

دغې کمېشنرۍ په یوه ټویټ کې ویلي چې دغه روغتیایي مرکز به په دې سیمه کې ۴۳۰۰ تنو کورنیو بې ځایه شویو ته روغتیايي خدمات سرته رسوي.

یو ان ایچ سي ار ویلي چې دا مرکز په سولري یا لمریزې برېښنا سمبال دی چې ناروغانو ته ښه امکانات برابروي.

ترکيه له ۳۸۰ زيات نور افغان کډوال له خپلې خاورې باسي

ترکيه کې يو شمېر افغان کډوال

د ترکیې د انادولیا رسمي خبري آژانس د راپورله مخې ۳۶۳ افغان کډوال د دې هېواد چارواکو استانبول ته لېږدولي چې له هغه ځایه یې افغانستان ته واستوي.

دغه افغان کډوال د ترکیې په ادیرنه ښار کې نیول شوي دي.

د راپور له مخې دغو افغانانو چې په غیر قانوني توګه یې په دې ښارکې ژوند کاوه، له همدې امله چې د استوګنې قانوني اجازه یې نه‌لرله، بېرته افغانستان ته لېږل کېږي.

خو دا نه‌دي ویل شوي چې دوی به کله افغانستان ته لېږل کېږي.

ترکیې په دې وروستیو کې د افغان کډوالو د ایستلو بهیر چټک کړی دی.

د ثور په میاشت کې یې ۲۲۷ افغانان ایستلي و او هغه مهال یې ویلي وچې له غیر قانوني کډوالو سره به جدي چلند کوي.

ايسلنډ افغانستان سره ۲۹۶ زره امريکايي ډالره مرسته وکړه

د اسيلينډ پلازمېنه ریکیاویک

ایسلنډ د افغانستان د بشري مرستو له صندوق سره د ۴۹ ميلیون کرونو چې ۲۹۶ زره امریکایي ډالر کېږي، مرسته وکړه.

د ملګرو ملتونو د بشري مرستو همغږې کونکې ادارې، اوچا د ایسلنډ د دې مرستو چې په افغانستان کې به د ژوند ژغورنې پر بېړنیو چارو لګیږي، مننه کړې او ویلي یې دي چې په دغې مرستې سره له ۲۰۲۰ کال راهیسې له دې صندوق سره د ایسلند د سخاوتمندانو مرستو اندازه ۹۵ ميلیون ایسلنډي کرونو ته رسیږي.

په دې وروستيو کې چې په پکتيکا او خوست ولايتونو کې زلزلې زرګونه خلک زيانمن کړل، افغانستان سره د بهرنيو هېوادونو مرستې ډېرې شوي دي.

ازبکستان: له افغانستان پرون پنځه توغندي را توغول شوي

هغه پُل چې افغانستان او ازبکستان سره نښلوي

ازبکستان ویلي چې د افغانستان له لوري پرون پنځه توغندي د دې هېواد په جنوب ختیځ کې پر یوه سرحدي ښار ګوټي ایشتل شوي خو چاته یې زیان نه‌دی رسولی.

د ازبکستان د بهرنیو چارو وزارت ویلي چې دغه توغندي پر ترمز ښار کې لګېدلي او یوازې څلورو کورونو ته یې یو څه زیان اړولی دی.

دې وزارت ویلي چې چارواکي له افغان لوري سره د دې پېښې په اړه څېړنه کوي چې علت یې معلوم کړي.

د هغو راپورونو په اړه چې ویل شوي له دغې پېښې وروسته د ازبکستان جنګي الوتکې پورته شوي، د ازبکستان چارواکو رسماً څه نه‌دي ویلي.

چارواکو دغه راز د هغې یوې ویډیو په اړه چې په‌کې زیانمن شوي کورونه ښکاري، هم څه نه‌دي ویلي.

د طالبانو حکومت هم تر اوسه په دې اړه کوم غبرګون نه‌دی ښودلی.

په تېره اپریل میاشت کې د اسلامي دولت ډلې یا داعش ادعا کړې وه چې پر ازبکستان یې څو توغندي ایشتلي دي خو هغه مهال د ازبکستان د بهرنیو چارو وزارت دغه ادعا ناسمه وبلله.

برېښنا شرکت: اختر کې به برېښنا عادي حالت ته راوګرځي

د برېښنا شرکت کارکوونکې د مزو د ترميم په حال کې

د افغانستان برېښنا شرکت، د برېښنا د پرچاویو د زیاتېدو ستونزو مني، خو وايي په اختر کې به برېښنا خپل نورمال حالت ته راوګرځي.

برېښنا شرکت په یو رسنیزه خبرتیا کې، چې رسنیو ته یې لېږلې لیکلي چې، د اوړي په موسم کې د هوا په تودېدو سره برېښنا ته د خلکو تقاضا کچه لوړيږي او په سیستم کې شته وارداتي برېښنا او کورنۍ تولیدي برېښنا په ۲۴ساعته ډول د برېښنا خدماتو بشپړتیا ته بسنه نه کوي.

برېښنا شرکت ،يلي، دوی اړ دي چې د پرچاويو په تطبیق سره په منظم ډول ټولو ساحو ته برېښنا وویشي.

خو برېښنا شرکت وايي، دوی خلکو ته ډاډ ورکوي، چې له تخنیکي مسؤلینو سره په وروستۍ ناسته کې د شوې پرېکړې له مخې به سر له سبا ورځې بیا د اختر تر وروستیو پورې برېښنا نورمال حالت ته را وګرځي او پرچاوۍ به تر ټولو کمې کچې ته راټېټې شي.

دغه راز برېښنا شرکت ویلي، چې په تېرو کلونو کې به د پسرلي او اوړي په موسمونو کې د کابل سیند مسیر کې د نغلو، سروبي او ماهیپر درې ګونو فابریکو له ۱۰۰مېګاواټو زیاته برېښنا تولیدوله، چې اوس د اوبو د کمښت له امله دا کچه ۲۰مېګاواټو ته راښکته شوې او د برېښنا سیستم کې یې پر عمومي ویشل کېدونکې برېښنا پراخ يې اغېز کړی دی.

په تخار کې د فوټبال غوره لیګ سیالۍ پیل شوې

ارشیف

په تخار ولایت کې د فوټبال غوره لیګ سیالۍ پیل شوې.

په دې لیګ کې به د ولایت په کچه لس لوبډلې په خپلو کې ۴۵ سیالۍ ترسره کړي.

د تخار ولایت د فوټبال فدراسیون له لوری په خپره شوی خبرپاڼه کې ویل شوي، چې یاد لیګ به دوه میاشتې او پنځه لس ورځې دوام وکړي.

د دې لیګ د ترسره کېدو هدف په شمال ختیځ کې د فوټبال سیالیو لپاره د غوره لوبډلې انتخاب بلل شوی.

د شمال ختیځو ولایتونو د فوټبال لوبډلو په ګډون د فوټبال اتلولې لوبی د روان لمریز کال د مني په لومړی میاشت کې پیلېږي.

نور راوښيه

XS
SM
MD
LG