د ایران د بهرنیو چار وزارت وايي، په دې هېواد کې د افغان بندیانو شمېر ډېر زیات دی.

د بهرنیو چارو وزارت ویاند اسماعیل بقایي نن په خپله اونیزه خبري غونډه کې د ایران په زندانونو کې د بندي افغانانو دقیق شمېر ونه ښوده، خو ویې ویل، دوی د طالبانو له حکومت سره خپل هېواد ته د افغان بندیانو د لېږدولو په اړه د خبرو په حال کې دي.

بقايي همداراز زیاته کړه چې ډېری افغانان د مخدره‌ موادو په اړوندو جرمونو په خاطر د ایران په زندانونو کې وخت تېروي.

د ایران دولتي اژانسونو تېره اوونۍ خبر ورکړ چې د دې هېواد حکومت به شاوخوا زر تنه افغان زندانیان د دوو میاشتو په ترڅ کې افغانستان ته واستوي او په بدل کې به یې طالبان ورسره د افغانستان په زندانونو کې ایراني بندیان تبادله کړي.

د افغانستان په زندانونو کې د ایراني بندیانو د کره شمېر په اړه دقیق معلومات نه شته.

د ۱۹ کلنو ځوانانو ترمنځ د درې اړخیزو سیالیو په ترڅ کې د افغانستان لوبډلې دا ځل د عربي متحده اماراتو لوبډلې ته په لوی توپیر ماتې ورکړه.

دغه سیالي نن دوشنبه د نومبر په ۱۸مه نېټه د کابل پر وخت سهار ۱۰:۰۰ بجې پیل شوې وه چې افغان لوبډلې د پچې تر ګټلو وروسته توپوهنه غوره کړه.

افغان لوبډلې په ټاکلو ۵۰ اورونو کې ۵ لوبغاړي له لاسه ورکړل او ۳۵۹ منډې یې وکړې.

د افغان توپوهونکو له ډلې یو وار بیا فیصل خان ښه وځلېد او د دوهم ځل لپاره یې په روانه لوبلړۍ کې سلیزه ووهله.

هغه په ۱۰۴ توپونو ۱۵۶ منډې وکړې چې په پاڼۍ کې یې ۱۲ شپږیزې او ۶ څلوریزې شاملې وې.

دغه راز لوبډلمشر محبوب تسکین بیا په ۱۴۱ منډو ناسوځېدلی پاتې شو چې په پاڼۍ کې یې ۱۳ څلوریزې او یوه شپږیزه شامله وه.

د عربي متحده اماراتو لوبډلې د ټولو لوبغاړو تر سوځېدو وروسته ۴۵.۴ اورونه ولوبول او ۱۹۰ منډې یې وکړې.

په افغان توپ اچونکو کې نصرت نورستاني، نظیف‌الله امیري او خاطر ستانکزي دوه دوه او نصیرخان او حفیظ الله یوه یوه وېکټ ترلاسه کړه.

دا په روانه لوبلړۍ کې د افغانستان دویمه پرله‌پسې بریا ده.

ټاکل شوې ده چې د دې سیالیو په لړ کې افغانستان خپله درېیمه سیالي د نومبر په ۲۰مه نېټه د پاکستان پر وړاندې ترسره کړي دي.

د نولس‌‌‌کلنو ځوانانو د درې اړخیزو سیالیو په لړ کې د افغانستان او متحده عرب اماراتو ترمنځ د روانې لوبې لومړۍ پاڼۍ پای ته ورسېده.

دغه سیالي چې نن د کابل پر وخت سهار ۱۰ بجې پیل شوې وه، افغان لوبډلې په ټاکل شویو ۵۰ اورونو کې د ۵ وېکټو په تاوان سره سیالې لوبډلې ته د ۳۶۰ منډو هدف وټاکه.

د افغان توپ وهونکو له ډلې فیصل خان ۱۵۶، محبوب تسکین ۱۴۱ ناسوځېدلي او عزیز‌الله ۳۷ منډې جوړې کړې.

دا په روانه لوبلړۍ کې د فیصل خان دویمه سلیزه ده.

عربي متحده امارات به په څو شېبو کې خپله توپوهنه پیل کړي.

په لومړۍ لوبه کې امید افغان لوبډله د ولیعصر لوبډلې په وړاندې مسابقه کوي او په دویمه لوبه کې افغان کلب د داوودزي ځوانانو له لوبډلې سره مخامخېږي.

پرون داوودزي لوبډلې د داوودزي ځوانانو لوبډلې ته ۳-۱۱ او رامکي ټیم جوانان همدرد ټیم ته ۳-۵ ماتې ورکړه.

د افغانستان د ساحلي فوټبال غوره لیګ سیالۍ په کابل کې د ساحلي فوټبال په سټډیوم کی د شنبې په ورځ د اتو ټیمونو په ګډون سره پیل شوې، چې دوې اوونۍ به دوام وکړي.

په بادغیس ولایت کې د یوه موټرسایکل د نسکورېدو په پېښه کې یو تن مړ او ۳ تنه نور ژوبل شوي دي.

په دغه ولایت کې د طالبانو امنیې قوماندانۍ ویلي، پر موټرسایکل څلور کسان سپاره وو، چې نسکور شو.

دغه پېښه پرون د بادغیس په مرکز قلعه‌نو کې شوې، خو د علت په باب یې څه نه‌دي ویل شوي.

د وسایطو تېز چلول، د ټرافیکي اصولو نه رعایت او د سړکونو خرابوالی په افغانستان کې د زیاتو ټرافیکي پېښو اصلي علت ګڼل کېږي.

د طالبانو د ټولګټو وزارت د رېل پټلۍ مرستیال مولوي محمد اسحاق صاحبزاده ایران ته د خپل سفر پر مهال د دغه هېواد د رېل پټلۍ د ادارې له اجرایه ريیس جبار علي ذاکري سره وکتل.

د دغه وزارت ویاند محمد اشرف حق‌شناس د یک‌شنبې ناوخته پر خپله ایکس‌‌پاڼه لیکلي، په‌‌‌دې کتنه کې د خواف-هرات د رېل پټلۍ د درېیمې برخې له لارې د لېږد رالېږد د زیاتولو او د افغانستان د رېل‌ګاډي د کارکوونکو د تخنیکي او تخصصي ظرفیتونو د لوړولو په اړه خبرې وشوې.

وړاندې ویل شوي، چې دوی همدا راز د رېل‌ګاډي د زېربناوو د پراختیا په برخه کې د ګډې پانګونې پر فرصتونو هم خبرې وکړې.

د ایران د ځینو رسنیو د راپورونو له‌‌‌‌مخې د کابل لپاره د ایران سفیر او د افغانستان لپاره د دغه هېواد ځانګړي استازي حسن کاظمي قُمي د یک‌شنبې په ورځ د طالبانو له هیئت سره د کتنې پر مهال ویلي، چې د دواړو هېوادونو د رېل پټلۍ پراختیا په لومړیتوبونو کې ده.

د طالبانو د ټولګټو وزارت وزارت د ریل پټلۍ د مرستیال په مشرۍ د طالبانو یو پلاوی د شنبې په ورځ ایران ته ورسېد.

د ماشومانو د ساتنې موسسه یا سیف د چلډرن وايي، د ۲۰۲۴م کال په لومړیو کې په افغانستان کې د سختو اقلیمي شرایطو له کبله تر ۳۸۰۰۰ ډېر کسان، چې نیمايي یې ماشومان وو، بې‌ځایه شوي دي، چې دا د ۲۰۲۳ کال پر تله زیاتوالی ښيي.

دې ادارې د یک‌شنبې په ورځ په خپله ایکس‌‌‌‌پاڼه (پخواني ټویټر) کې لیکلي، سره له‌‌دې چې افغانستان لږ کاربن تولیدوي خو بیا هم د اقلیم له سختو اغېزو لکه وچکالۍ، سېلابونو او توفانونو سره مخامخ دی.

په افغانستان کې د ماشومانو د ساتنې مؤسسې مشر ارشاد ملک ویلي، د اقلیم بحران په افغانستان کې بشري ناورین لا پسې خرابوي، چې د کورنیو د بې‌ځایه کېدلو، د اوبو د سرچینو ختمېدو او د ماشومانو د زده‌‌‌کړو د مخنیوي سبب کېږي.

د ملګروملتونو د بشري چارو د همغږۍ دفتر یا اوچا (OCHA) د تېرې اوونۍ د دوشنبې په ورځ ویلي وو، سره له‌‌‌دې چې افغانستان د مضره ګازونو په تولید کې خورا کمه ونډه لري، خو بیا هم د اقلیمي بدلون په وړاندې د لسو خورا زیانګالو هېوادونو په ډله کې دی.

د طالبانو د بهرنیو چارو وزارت سیاسي مرستیال شیر محمد عباس ستانکزي له نړیوالې ټولنې وغوښتل چې د تېرو څو لسیزو جګړو له کبله د رامنځته شویو ویجاړیو په رغولو کې مرسته وکړي.

د جرمني خبري اژانس د راپور له‌مخې، ستانکزي پرون یک‌شنبه په یوه غونډه کې له ملګروملتونو او نړیوالو مؤسسو غوښتي چې له افغانانو سره په اقتصادي وده، تخنیکي برخه او کرنې سکټور کې مرستې وکړي.

هغه په ځانګړې توګه هغه هېوادونه مخاطب کړل چې په وینا یې تېرو کلونو کې د افغانستان په جګړو کې ښکېل وو او په وینا یې د افغانستان بیارغونه د همدغو هېوادونو اخلاقي مسوولیت دی.

د هغه اشاره په غیر مستقیم ډول د ناټو غړو هېوادونو ته وه، چې افغانستان کې يې شل کاله پوځي حضور درلود او هلته یې د جګړې پر مهال خلکو ته ځاني او مالي زیانونه اړولي دي.

د طالبانو حکومت واک ته له رسېدو وروسته له نړۍ د مرستو او دغه راز رسمیت پېژندنې ورته ډېرې غوښتنې کړي، خو په ظاهره د حکومتولۍ د بڼې او یوشمېر سختو تګ‌لارو له کبله تر اوسه هیڅ یوه هېواد په رسمیت نه‌دی پېژندلی.

د نولس‌کلنو ځوانانو د درې اړخیزو سیالیو په لړ کې د افغانستان د نولس‌کلنو ځوانانو لوبډله نن دوشنبه د نومبر په ۱۸مه نېټه د کوربه عربي متحده امارتو پر وړاندې سیالي کوي.

د دې سیالیو په لومړۍ لوبه کې افغانستان د ۱۰۰ منډو په توپیر پاکستان ته ماتې ورکړې ده.

دغه پنځوس اوریزه سیالي به د کابل پر وخت سهار ۱۰ بجې د دوبۍ په ښار کې پیل شي.

افغان کرکټ بورډ ویلي دي، دغه درې اړخیزې سیالۍ د نولس‌‌‌کلنو ځوانانو د اسیا جام سیالیو د چمتووالي په موخه ترسره کېږي.

د درې اړخیزو سیالیو په ترڅ کې چې درې لوبډلې په‌‌‌‌کې برخه لري، هره لوبډله یو له بل سره دوه‌دوه سیالۍ ترسره کوي.

د دې سیالیو دوه مخکښې لوبډلې به د نومبر په ۲۶مه نېټه پایلوبه ترسره کړي.

د ویلو ده چې د اسیا جام سیالۍ د نومبر په ۲۹مه نېټه پیليږي.

سعودي عربستان په ۲۰۲۴ کال کې د درېیو افغانانو په شمول څه باندې سل بهرني بندیان اعدام کړي دي.

دا خبره د فرانسې خبري اژانس او ځینو نورو د سعودي عربستان د بشري حقونو مدافع سازمانونو راپور کړې ده.

د سعودي دولتي اژانس معمولاً د دغو اعدامونو په اړه اعلامیې خپرې کړي، چې وروستۍ یوه یې د شنبې په ورځ په نجران سیمه کې د یوه یمني تبع د اعدام وه، چې عربستان ته د مخدره موادو د قاچاق په جرم په اعدام محکوم و.

د فرانسې خبري اژانس په راپور کې راغلي چې، په اعدام شویو بهرنيو بندیانو کې ډېر کسان د پاکستان دي چې شمېر یې ۲۱ ته رسیږي، ورپسې د اعدام شویو بندیانو کې په ترتیب د یمن، سوریې، نایجیریا، مصر، اردن، ایتوپیا، سوډان، هند، افغانستان، سریلانکا، ایریتریا او فیلپین اتباع شامل دي.

د سعودي عربستان له‌خوا د درېیو افغانانو د اعدام په اړه جزیات نه‌‌‌‌دي ورکړل شوي او نه په ریاض کې د افغانستان سفارت په‌‌‌‌دې رابطه څه تبصره کړې ده.

په برلین کې د بشري حقونو مېشت سازمان سعودي-اروپايي بنسټ د اعدامونو دا شمېر د اندېښنې وړ او ریکارډ بللی.

د دغه سازمان د حقوقي برخې مشر طاها الحاجي ویلي چې، سعودی هيڅکله په یوه کال کې سل بهرنیان نه وو اعدام کړي.