د لاسرسۍ وړ لېنکونه

تازه خبر
جمعه ۱۱ کب ۱۴۰۲ کابل ۰۳:۵۳

افغانستان

سيګار: افغانستان له کمسارې وچکالۍ سره مخ دی

غور ولايت کې د وچکالۍ يو انځور
غور ولايت کې د وچکالۍ يو انځور

د افغانستان د بیا رغونې پر چارو د امریکا د سرمفتش ادارې یا سیګار ویلي چې افغانستان له داسې سختې وچکالۍ سره مخامخ دی چې دې هېواد په وروستیو دریو لسیزو کې نده لیدلې.

سیګار پرون په یوه ټویټ کې دا خبره کړې او د سره صلیب او د سرې میاشتې د کمېټو په حواله یې ویلي چې په افغانستان کې په متوسط ډول هغه ساحه ډیره کمه شوې چې تر ژمي مخکې پرې غنم کرل شوي دي.

تر دې مخکې د ملګرو ملتونو د خوړو او کرڼې ادارې FAO ویلي و چې افغانستان د ۳۴ ولایتونو له جملې ۲۵ یې سختې وچکالۍ ځپلي چې دې چارې د شاوخوا ۱۴ ميلیون وګړو ژوند اغېزمن کړی دی.

د ورځې تازه خبرونه دلته ولولئ

ټېسټ لوبه؛ افغانستان ایرلینډ ته د ۱۱۱ منډو هدف ورکړ

د افغانستان او ایرلینډ د روانې لوبې یو انځور
د افغانستان او ایرلینډ د روانې لوبې یو انځور

د افغانستان د کرکټ ملي لوبډلې د ایرلینډ پر وړاندې د یوازېنۍ ټېسټ لوبې د توپوهنې په دوهمې پاڼۍ کې ۲۱۸ منډې وکړې.

افغان لوبډله په لومړۍ پاڼۍ کې له ایرلینډ لوبډلې ۱۰۸ منډې پوروړې وه چې له امله یې یادې لوبډلې ته هدف ۱۱۱ منډې وټاکل شو.

په دوهمې پاڼۍ کې لوبډلمشر حشمت الله شهيدي نیمه سلیزه ووهله او رحمن الله ګربز په ۴۶ منډو وسوځېد.

ایرلینډ ته یو وار بیا چټکو توپ اچونکو مارک اډیر، باري مک کارټي او ګرېګ ینګ درې درې لوبغاړي وسوځول.

ایرلینډ د هدف پوره کولو په موخه د خپلې توپوهنې دوهمه پاڼۍ پیل کړې او دوه لوبغاړي یې نوید ځدراڼ سوځولي دي.

یونان کې په بند محکوم شوي څلور افغانان بیا استېناف محکمې ته حاضرېږي

د یونان بیرغ
د یونان بیرغ

یوناني رسنیو راپور ورکړی، هغه څلور افغانان به چې د موریا په نوم د کډوالو په کمپ کې د اورلګېدنې په تړاو په بند محکوم شوي وو، بیا استنېاف محکمې ته حاضر کړای شي.

دغو رسنیو لیکلي چې دغه افغانان په ۲۰۲۰م کال کې د لیسوس په موریا کمپ کې د اورلګېدنې په پېښه کې د دخالت له کبله په لس- لس کاله بند محکوم شوي دي.

د یونان رسنیو لیکلي چې دغه کسان به راروانه دوشنبه بیا د استنېاف محکمې خونې ته حاضر کړای شي.

په موریا کمپ کې چې تر ټاکلي حد خورا زیات کسان په کې مېشت وو، هغه اور تر بلوا وروسته د ۲۰۲۰م کال د سپټمبر پر اتمه د کرونا وبا پر مهال لګېدلی و او له کبله یې شا و خوا ۱۳زره کسان بې سرپناه شوي وو.

تر هغې غمیزې پنځه ورځې وروسته یوه ۴۲ کلن افغان په هغه پېښه کې پر خپل دخالت اعتراف وکړ او د خپلو ملګرو نومونه یې په ډاګه کړل.

افغان بوکسر محمد ذکریا زماني خپل فرانسوی سیال ته ماتې ورکړه

ارشیف
ارشیف

افغان بوکسر محمد ذکریا زماني خپل فرانسوی سیال په درېیم رونډ کې مات کړ.

د دوی لوبه پرون د تایلند په پلازمېنه بنکاک کې وشوه.

زماني چې د افغانستان استازیتوب کاوه خپل فرانسوی سیال ابراهیم شبان چې دری بریاوې یې درلودې او تر دې لوبې پورې یې ماته نه وه خوړلې په دریم رونډ کې په تخنیکي بڼه ناک اوټ کړ.

دا په حرفوي سوک وهنه کې د ذکریا زماني اتمه بریا وه.

ټېسټ کرکټ؛ افغانستان له ایرلینډ څخه ۲۶ منډې مخکې‌والی لري

د افغانستان او ایرلینډ کرکټ لوبډلو ترمنځ د روانې لوبې یو انځور
د افغانستان او ایرلینډ کرکټ لوبډلو ترمنځ د روانې لوبې یو انځور

د افغانستان او ایرلینډ ترمنځ د ټېست سیالۍ درېیمه ورځ نن په داسې حال کې پیلېږي چې د افغانستان لوبډلې په دوهمه پاڼۍ کې درې لوبغاړي بایللي او اوس د سیالې لوبډلې تر لومړۍ پاڼۍ یوازې ۲۶ ډېرې منډې لري.

د ایرلینډ‌ لومړۍ پاڼۍ پرون په داسي حال کې پای ته ورسېده چې د افغانستان د لومړۍ پاڼۍ د ۱۵۵ منډو په نسبت یې ۱۰۸ ډېرې منډې وکړې.

نن به رحمن الله ګربز او کیپتان حشمت الله شهیدي توپ وهنې ته دوام ورکړي.

شهیدي پرون ۵۳ او ګربز ۲۳ منډې وکړې.

تر دې مخکې سریلانکا په ۱۰ ویکټونو افغانستان ته په ټېسټ لوبه کې ماته ورکړې وه.

په هلمند کې د یوې خونې د چت پرېوتو له کبله څلور کسان مړه شوي

د افغانستان په عمومي نقشه کې د هلمند ولایت موقعیت
د افغانستان په عمومي نقشه کې د هلمند ولایت موقعیت

د هلمند ولایت په ناوې ولسوالۍ په خرابې سیمه کې د شدیدو اورښتونو له امله څلور کسان هغه مهال مړه شول چې د خونې چت پرې راپوېوته.

په هلمند کې د طالبانو د حکومت د اطلاعاتو او کلتور رییس حافظ عبدالباري راشد پرون پنجشنبې رسنیو ته وویل چې په دې پېښه کې چې وړمه شپه وشوه، د یوې کورنۍ دوه ماشومان، مور او پلار مړه شوي دي.

ده همداراز وویل چې د هلمند د کجکي ولسوالۍ په ابدار کلي کې هم د شدیدو اورښتونو له امله په ورته پېښه کې یوه میرمن مړه شوې او یو نارینه ټپي شوی دی.

له افغانانو سره د اروپايي ټولنې د څه باندې ۲۰ میلیون ډالري مرستې هرکلی وشو

په پروکسل کې د اروپايي ټولنې پر مرکزي دفتر د دې ټولنې بیرغ
په پروکسل کې د اروپايي ټولنې پر مرکزي دفتر د دې ټولنې بیرغ

په افغانستان کې د خوړو نړیوال پروګرام له افغانانو سره د اروپايي ټولنې د څه باندې ۲۰ میلیون ډالري مرستې هرکلی وکړ.

د خوړو نړیوال پروګرام پرون پنجشنبې اعلان وکړ چې د اروپايي ټولنې دا یو ویشت میلیونه او ۴۰۰ زره دالره مرسته به د افغانستان په ۲۶ ولایتونو کې د ۳ لکه کسانو، چې خوراکي مصئونیت نه لري او یا بې ځایه شوي دي، د خوراکي امنیت له ښه کولو سره مرسته وکړي.

دا پروګرام وايي چې د استنادي دېوالونو، ویالو اونورو کوچنیو پراختیايي پروژو په بدل کې به مرستې وویشي څو په دې توګه د اقلیمي بدلون او طبیعي پېښو اغېزې کمې شي.

طالبانو له دوو شرکتونو سره د غور د سرب او جستو د استخراج قرارداد لاسلیک کړ

د افغانستان په عمومي نقشه کې د غور ولایت موقعیت
د افغانستان په عمومي نقشه کې د غور ولایت موقعیت

د طالبانو د حکومت د کانونو او پټرولیم وزارت وايي چې له دوو خصوصي شرکتونو سره یې د غور ولایت د سرب او جستو کان د استخراج قرارداد په ۹۰ میلیون ډالره لاسلیک کړ.

د طالبانو دغه وزارت پرون پنجشنبې په یوه خبرپاڼه کې د غور د سربو او جستو د کان په اړه ویلي چې د دغه کان لومړی بلاک څه باندې ۱۷۵ کیلومتر مربع مساحت لري او قراردادي شرکتونه به په لومړي پړاو کې د جستو او سربو پر اکتشاف ۱۰ میلیون ډالره او په دوهم پړاو کې په استخراج څه باندې ۳۷ میلیون ډالره پانګونه وکړي.

د خبرپاڼې پر اساس د غور د سربو او جستو کان د درېیم نیم بلاک څه باندې ۱۰۴ کیلومتر مربع مساحت لري او قراردادي شرکتونه به پر اکتشاف څه باندې شپږ نیم میلیون ډالره او استخراج باندې څه باندې ۴۱ نیم میلیون ډالره پانګونه وکړي.

د طالبانو د کانونو او پټرولیم وزارت پر اساس، قراردادي شرکتونه دواړه افغاني دي.

د کانونو متخصصان وايي چې د طالبانو له لوري د کانونو په قراردادونو کې شفافیت نه شته او دا هم نه معلومېږي چې د قراردادونو موده څومره وي.

امیرخان متقي د ترکمنستان له ولسمشر سره پر یو شمېر موضوعاتو خبرې کړي

د ترکمنستان د ولسمشر او د طالبانو د بهرنیو چارو د وزیر یو ځای کړل شوی تصویر
د ترکمنستان د ولسمشر او د طالبانو د بهرنیو چارو د وزیر یو ځای کړل شوی تصویر

د طالبانو د حکومت د بهرنیو چارو سرپرست وزیر امیرخان متقي ترکمنستان ته د خپل سفر په وروستۍ ورځ نن د هغه هېواد له ولسمشر قربانقلي بردي محمدوف پر یو لړ موضوعاتو خبرې کړي.

د دې وزارت مرستیال ویاند حافظ ضیااحمد نن پنجشنبې په خپله ایکس پاڼه یا پخواني ټویټر کې لیکلي چې ښاغلي متقي په دې کتنه کې د ترکمنستان ولسمشر ته په افغانستان کې د امنیت، ثبات او د پانګونې او ټرانزیت لپاره د نویو فرصتونو په اړه معلومات ورکړل.

ښاغلي متقي چې د یوه پلاوي په مشرۍ د تېرې یکشنبې په ورځ د کب د میاشتې په ۶ ترکمنستان ته تللی، تراوسه یې د هغه هېواد له بېلابېلو چارواکو او د سوداګرۍ د چارو له یو شمېرمسوولینو سره لیدنې کتنې کړې دي.

د ښاغلي ضیا احمد په وینا، نوموړي د ترکمنستان له ولسمشر سره له کتنې مخکې د نفتو اوګازو په چارو کې د دې هېواد د وزیرانو شورا له مرستیال باتر آمانوف سره په کتنه کې د ګازو د نل لیکې، ټاپي پروژې او افغانستان ته د مایع ګازو د لیږد په اړه خبرې وکړې.

داچې ایا په دې سفرکې د دواړو لوړو ترمنځ د پام وړ کومې موافقې هم لاسلیک شوې کنه، تراوسه رسماً څه نه دي ویل شوي.

ترکمنستان د منځنۍ آسیا د یوشمیرنورو هغو هیوادونو په کتار کې دی چې د طالبانو له سرپرست حکومت سره یې ښې اړیکې ټینګې کړي، خو هغه یې لکه د نورو هېوادونو په څېر تراوسه په رسمیت نه دی پېژندلی.

امریکا:د طالبانو له خوا د امریکایي اتباعو نیول د مثبت تعامل پر وړاندې یو مهم خنډ دی

د امریکا د بهرنیو چارو وزارت ویاند متیو میلر
د امریکا د بهرنیو چارو وزارت ویاند متیو میلر

د امریکا د بهرنیو چارو وزارت وایي، د طالبانو له خوا د امریکایي اتباعو نیول د مثبت تعامل پر وړاندې یو مهم خنډ دی.

د امریکا د بهرنیو چارو وزارت ویاند متیو میلر پرون چهارشنبې په واشنګټن کې له طالبانو سره د زنداني امریکایي وګړو په اړه د یوې پوښتنې په ځواب کې وویل چې امریکایي چارواکو د طالبانو له استازیو سره د کتنو په ګډون په دوامداره توګه فشار را وستی چې په دې هېواد کې دې امریکایي بندیان له قید و شرط پرته سمدستي خوشې شي.

هغه زیاته کړه چې دغه کړکېچ د مثبتې ښکېلتیا پر وړاندې یو مهم خنډ دی.

ښاغلي مېلر په خپلو خبرو کې په ډاګه نه کړه چې څومره امریکايي وګړي دا مهال په افغانستان کې زنداني دي، خو امریکایي سي بي اېس تلویزیون څه موده مخکې د یوه امریکايي چارواکي له قوله چې نوم یې نه و اخیستی، راپور ورکړ چې د راین کاربېټ په ګډون دا مهال ۶ امریکایان په افغانستان کې له طالبانو سره زنداني دي.

د طالبانو چارواکو په دې اړه چې څومره امریکايي وګړي یې زنداني کړي او د زنداني کېدو لاملونه یې څه دي، تراوسه رسماً څه نه دي ویلي.

د سپینې ماڼۍ ویانده: دوحې تړون افغان حکومت کمزوری او طالبان پیاوړی کړل

د دوحې تړون د لاسلیک د مراسمو تصویر - ارشیف
د دوحې تړون د لاسلیک د مراسمو تصویر - ارشیف

د سپینې ماڼۍ ویانده وایي، د دوحې تړون په افغان حکومت کې د دوی شریکان کمزوري او طالبان پیاوړي کړل.

کارن ژان پییر دا خبره پرون په واشنګتن ډي سي کې خبرې غونډې ته وکړه او زیاته یې کړه چې د ولسمشر ډانالډ ټرمپ د حکومت په وخت په دوه زره شلم کال کې دا تړون لاسلیک شوی و چې د جمهور رییس جو بایډن حکومت له یوه ترسره شوي عمل سره مخامخ و.

د نوموړې په وینا، دوی ته د تړون له عملي کولو پرته بله لاره پاتې نه وه.

له ننه څلور کاله مخکې د قطر په پلازمېنه کې د امریکا د هغه وخت د جګپوړي دیپلومات زلمي خلیلزاد او د طالبانو د سیاسي دفتر د مشر ملا عبدالغني برادر ترمنځ دا تړون لاسلیک شو.

د سپینې ماڼۍ ویاندې اغلې پییر پرون دا خبره هم وکړه چې طالبانو د دې تړون ژمنې بشپړې نه دې عملي کړي او د دې ژمنو د عملي کیدو لپاره متحد ایالتونه هڅې کوي.

نور راوښيه

XS
SM
MD
LG