د لاسرسۍ وړ لېنکونه

تازه خبر
سه شنبه ۸ کب ۱۴۰۲ کابل ۰۶:۴۶

ښځې

بلخ کې دیني علماوو له طالبانو د نجونو د ښوونځيو پرانیستو غوښتنه وکړه

ارشیف، د افغان زده‌کوونکو نجونو یو ټولګی
ارشیف، د افغان زده‌کوونکو نجونو یو ټولګی

په بلخ کې دیني علماوو له طالبانو غوښتنه وکړه چې نجونو ته په ټول هېواد کې د منځنۍ او لېسې دورې ښوونځي پرانیزي.

په دې اړه پرون د مزار شریف ابوذر غفاري دارالعلوم کې لویه غونډه جوړه شوې وه.

د دارالعلوم مشر محبوب‌الحق مخدوم‌زاده ازادي راډیو ته وویل، دوی ځکه له ممبره د نجونو د تعلیم غږ اوچتوي چې په خبره‌یې اسلام دا حق نجونو ته ورکړی دی.

ده وویل، غونډه کې له طالبانو غوښتل شوي چې ژر تر ژره د نجونو د جامو طرحه نهایي او د ښوونځیو د بیا پرانیستې اعلان دې وکړي.

د ورځې تازه خبرونه دلته ولولئ

د ملګرو ملتونو یوې مسوولې د افغان ښځو پر وړاندې د طالبانو تبعیضي کړنې وغندلې

ارشیف: په کابل کې د معترضو مېرمنو د یوې اعتراضیه غونډې انځور
ارشیف: په کابل کې د معترضو مېرمنو د یوې اعتراضیه غونډې انځور

د ملګرو ملتونو یوه جګپوړې مسووله وايي، دوی په افغانستان کې د نجونو او ښځو پر وړاندې د طالبانو تبعیضي کړنې غندي.

په ملګرو ملتونو کې د ګیانا سفیرې کارولین رودریګوزبرکیټ چې د امنیت شورا دوره یي مشره ده، د ښځو، سولې او امنیت لپاره د ګډو ژمنو د ډلې په استازیتوب اعلامیه ولوستله او د طالبانو تر حاکمیت لاندې په افغانستان کې یې د بشري حقونو په رعایت ټینګار وکړ.

دغه څرګندونې د افغانستان په اړه د ملګرو ملتونو د امنیت شورا د نننۍ غونډې تر پیل مخکې شوې دي.

په خبرپاڼه کې راغلي چې د دې ډلې غړي د طالبانو له حکومته غواړي چې ژر تر ژره د ښځو پر وړاندې خپلې تګلارې لغوه کړي چې په کې له شپږم ټولګي څخه پورته د نجونو پر زده کړو بندیز، د ښځو پر کار بندیز، د هغوی پر تګ راتګ بندیز او د بیان پر ازادۍ بندیزونه شامل دي.

د افغانستان لپاره د ملګرو ملتونو د ځانګړي استازي د ټاکلو په اړه د يوې پوښتنې په ځواب کې مېرمن رودريګوز برکيټ وويل چې تر اوسه دې څوکۍ ته څوک نه دي نومول شوي.

د افغانستان لپاره د ملګرو ملتونو د ځانګړي استازي ټاکنه د امنیت شورا د نننۍ غونډې له مهمو موضوعاتو څخه ده چې طالبانو یې له وړاندې خپل مخالفت ښودلی دی.

د امریکا په بهرنیو چارو وزارت کې د افغان ښځو پر اړوندو مسایلو غونډه جوړېږي

د امریکا د بهرنیو چارو وزارت
د امریکا د بهرنیو چارو وزارت

د امریکا د متحدو ایالتونو په بهرنیو چارو وزارت کې د افغان ښځو پر اړوندو مسایلو غونډه جوړېږي چې د دغه هېواد د بهرنیو چارو وزیر انتوني بلېنکن هم ورته وینا کوي.

د ګڼو رسنیو د راپورونو له مخې، د امریکا باسټن پوهنتون پرون پنجشنبه په یوه خبرپاڼه کې ویلي چې دغه غونډه د فبروري میاشتې پر ۲۷مه جوړېږي.

د باسټن پوهنتون د خبرپاڼې له مخې، په پام کې ده په دې غونډه کې په افغانستان کې د حیاتي پانګونې پر پروګرامونو، د اقتصادي ودې پر موضوع، د ښځو او نجونو لپاره د کارموندنې په باب تمرکز وشي.

ویل شوي، د افغانستان لپاره د امریکا ځانګړی استازی ټوماس وېسټ او د افغان ښځو، نجونو او بشري حقونو لپاره د واشنګټن ځانګړې استازې رینا امیري هم په کې برخه اخلي.

طالبانو شاوخوا دوه نیم کاله مخکې پر افغانستان د ولکې له بیا ټینګولو وروسته پر ښځو او نجونو ډول ډول محدودیتونه لګولي چې په نړیواله سطحه ورباندې انتقادونه شوي دي.

افغان نجونو ته په طبي انسټېټیوټونو کې د نوملیکنې اجازه؛ یوناما یې هرکلی وکړ

د ملګرو ملتونو بیرغ
د ملګرو ملتونو بیرغ

د افغانستان لپاره د ملګرو ملتونو مرستندویه ماموریت یوناما د طالبانو له هغې پرېکړې هرکلی کړی چې د دولسمو ټولګیو فارغو نجونو ته يې په طبي انسټېټیوټونو کې د نوملیکنې اجازه ورکړې ده.

یوناما نن پر خپلې ایکس شبکې یا پخواني ټویټر د طالبانو دا اقدام په افغانستان کې د روغتیايي خدمتونو په برخه کې د اندېښنو د له منځه وړلو لپاره یو ګام بللی او ویلي یې دي، افغان ښځې او نجونې ثانوي او لوړو زده کړو ته اړتیا لري.

طالبانو وړمه ورځ د لومړی ځل لپاره د افغانستان په شمال او جنوب کې د ۱۱ ولایتونو په طبي انسټېټیوټونو کې نجونو ته د نوملیکنې اجازه ورکړه.

له دې وړاندې دا اندېښنې زیاتې وې چې د طالبانو تر واک لاندې افغانستان د ښځینه ډاکترانو، نرسانو او قابلو له کمښت سره مخامخ دی.

نیکلاسن: د دوحې د غونډې اکثره ګډونوالو د افغان ښځو د حقونو پر ټینګښت ټینګار وکړ

د افغانستان لپاره د اروپایي ټولنې استازی ټوماس نیکلاسن
د افغانستان لپاره د اروپایي ټولنې استازی ټوماس نیکلاسن

د افغانستان لپاره د اروپایي ټولنې استازی وایي، د دوحې په وروستۍ غونډه کې د اسلامي هېوادونو په ګډون اکثرو هېوادونو په افغانستان کې د ښځو او نجونو د حقونو پر ټینګښت ټینګار وکړ.

ټوماس نیکلاسن نن د فبرورۍ په ۲۱مه پر خپله ایکس شبکه یا پخواني ټویټر لیکلي چې د دوحې په غونډه کې د نجونو او ښځو د کار او تعلیم په اړه د افغانانو غوښتنې راپورته شوې.

د افغانستان په اړه د دوحې غونډه د تېرې یکشنبې او دوشنبې په ورځو د ملګرو ملتونو د سرمنشي انتونیو ګوتیریش په کوربه توب ترسره شوه، خو طالبانو په کې ګډون ونه کړ.

د نیکلاسن په خبره، لا هم د افغانستان او خلکو په وړاندې د دوی پیاوړی تعهد پر خپل ځای دی.

هغه ټینګار وکړ چې د تعهد یوه برخه د افغانستان د راتلونکې ملاتړ دی، داسې چې د ده په ټکو دغه هېواد له ځان، ګاونډیو او نړۍ سره په سوله کې ووسي.

امیري له امینې سره د افغان ښځو د حقونو د ملاتړ په اړه بحث کړی

د عکس ښي لور ته د ملګرو ملتونو د سرمنشي مرستیاله امینه محمد او چپ لور ته د افغان نجونو، ښځو او بشري حقونو لپاره د امریکا ځانګړې استازې رینا امیري
د عکس ښي لور ته د ملګرو ملتونو د سرمنشي مرستیاله امینه محمد او چپ لور ته د افغان نجونو، ښځو او بشري حقونو لپاره د امریکا ځانګړې استازې رینا امیري

د افغان نجونو، ښځو او بشري حقونو لپاره د امریکا ځانګړې استازې وايي‌، د ملګرو ملتونو د سرمنشي مرستیالې امینې محمد سره یې کتلي او د افغان نجونو او ښځو د حقونو د ملاتړ په اړه یې ورسره ګټور بحث کړی دی.

اغلې امیري په خپله ایکس‌پاڼه لیکلي، دوی دواړو موافقه کړې چې د افغان ښځو پر وړاندې سخت دریځه پالیسۍ په سیمه او بهر کې هم د ښځو حقونو ته ګواښ دی.

دا لیدنه داسې مهال کېږي چې تمه ده رینا امیري د دوحې په غونډه کې هم ګډون وکړي، چېرې چې ویل کېږي یو مهم بحث به د افغان نجونو او ښځو د حقونو او د دوی د برخلیک څرنګوالی وي.

ملګري ملتونه: د دوحې غونډه کې د افغان ښځو د غږ اورېدل مهم دي

 د ملګرو ملتونو د سرمنشي ویاند سټیفن دوجاریک
د ملګرو ملتونو د سرمنشي ویاند سټیفن دوجاریک

د دوحې غونډې په درشل کې د ملګرو ملتونو د سرمنشي ویاند وايي، دا ډېره مهمه ده چې د دوحې په راروانه غونډه کې چې پر افغانستان رابلل شوې، د افغان ښځو غږ واورېدل شي.

سټیفن دوجاریک پرون پنجشنبه په نیویارک کې یوه خبري کنفرانس ته وویل، د قطر د پلازمېنې دوحې غونډه، د ښځو په ګډون د مدني ټولنې او هېوادونو د استازو ترمنځ کېږي.

په پام کې ده د ملګرو ملتونو په کوربه توب پر افغانستان دغه غونډه راروانه یکشنبه او دوشنبه جوړه شي.

دوجاریک ویلي چې د ملګرو ملتونو سرمنشي انټونیو ګوټېرېش به د یکشنبې په ورځ د مونشن له امنیتي کنفرانس وروسته دوحې ته لاړ شي.

دوجاریک ویلي چې په دې دوه ورځنۍ غونډه کې به په منسجم ډول د نړیوال مشارکت پر زیاتېدو هم بحث وشي.

د ښځو ځینو بنسټونو ویلي، چې په دې غونډه کې باید د ښځو واقعي استازو ته هم د ګډون زمینه برابره شي.

په دې غونډه کې طالبانو ته هم د ګډون بلنه ورکړل شوې، خو دا لا معلومه نه ده چې د دوی کوم استازی په کې ګډون کوي که نه.

په افغانستان کې د ښځو لپاره روان بحران ډېر پراخ او د اندېښنې وړ وبلل شو

ارشیف: په کابل کې له معترضو مېرمنو سره د طالب وسله والو د چلند یو انځور
ارشیف: په کابل کې له معترضو مېرمنو سره د طالب وسله والو د چلند یو انځور

د بشري حقونو د څار سازمان یوه څېړونکې وايي، په افغانستان کې د ښځو لپاره روان بحران ډېر پراخ او د اندېښنې وړ دی.

فرشتې عباسي تېره شپه د ایکس شبکې یا پخواني ټویټر په یوه بحث کې چې په افغانستان کې د بشري حقونو په باب رابلل شوی و، دا خبره وکړه.

هغې زیاته کړه: "هغه بحران چې نن سبا په افغانستان کې دی په ځانګړي ډول د ښځو لپاره، ډېر متفاوت دی، داسې وضعیت دی چې د نړۍ په هېڅ ځای کې نه تجربه شوی او نه تجربه کېږي. مهمه ده چې په دې باب موږ خبرې وکړو. خپل شخصي مسوولیت ادا کړو چې معلومات وشي څه روان دي."

مېرمن عباسي وویل چې د بشري حقونو د څار سازمان د افغانستان څانګه په پام کې لري چې راروانه دوشنبه د افغانستان بشري او ښځو پر وضعیت بل راپور خپور کړي.

عباسي تر دې مخکې له ازادي راډیو سره په خبرو کې د بدحجابۍ په تور د ښځو او نجونو د خپلسرو نیونو د زیاتېدو په اړه اندېښنه ښودلې وه.

د امریکا ځانګړې استازې د افغانستان په تړاو په واشنګټن کې د ازبکستان سفیر سره لیدلي

د افغانستان د ښځو، نجونو او بشري حفونو په چارو کې د امریکا د متحدو ایالتونو ځانګړې استازې
د افغانستان د ښځو، نجونو او بشري حفونو په چارو کې د امریکا د متحدو ایالتونو ځانګړې استازې

د افغانستان د ښځو، نجونو او بشري حفونو په چارو کې د امریکا د متحدو ایالتونو ځانګړې استازې رینا امیري وايي، د افغانستان په اړه د اصولي دریځ په باب یې په واشنګټن کې د ازبکستان له سفیر فرقت صدیقوف سره رغنده خبرې کړي دي.

اغلې امیري پرون پنجشنبې پر خپله ایکسپاڼه لیکلي چې په دې کتنه کې په افغانستان کې د ازبکستان د سیمه ییز رول په اړه غږېدلې ده.

سره له دې چې ازبکستان تراوسه پورې د طالبانو حکومت په رسمیت نه دی پېژندلی، خو په وروستیو کې یې په تاشکند کې د افغانستان سفارت د طالبانو د حکومت استازي ته وسپاره.

د دوحې په ناسته کې د افغان ښځو حقونو ته پر لومړیتوب ورکولو ټینګار وشو

ارشیف: په کابل کې د معترضو مېرمنو د یوې اعتراضیه غونډې انځور
ارشیف: په کابل کې د معترضو مېرمنو د یوې اعتراضیه غونډې انځور

د بخښنې نړیوال سازمان په ګډون د بشري حقونو یوې ډلې او بنسټونو د ملګرو ملتونو سرمنشي ته په یوه پرانیستي لیک کې د دوحې په ناسته کې د افغان ښځو حقونو ته پر لومړیتوب ورکولو ټینګار کړی او ویلي یې دي چې د دې غونډې په بحثونو کې باید د ښځو استازي حضور ولري.

په دې لیک کې ویل شوي چې افغان ښځې او د دوحې د کنفرانس غوندي نړیوالو غونډو کې د دوی د پام وړ حضور له پامه غورځول شوی دی.

د دې لیک لیکوالانو د دوحې په غونډه کې د افغان ښځو، اعتراض کوونکو، قومي استازو، جنسیتي اقلیتونو او له طالبانو سره د مخالفو نورو ډلو د ګډون غوښتنه هم کړې ده.

ټاکل شوې ده د افغانستان په اړه د ملګرو ملتونو په مشرۍ غونډه د فبرورۍ په ۱۸ او ۱۹مه د قطر په پلازمېنه دوحه کې جوړه شي.

امریکا د افغان ښځو او نجونو د تلپاتې ځواک ستاینه کړې

ارشیف: په افغانستان کې د نجونو یو ښوونځي چې دا مهال له شپږم ټولګي پورته نجونې په کې له زده کړو منع شوې دي.
ارشیف: په افغانستان کې د نجونو یو ښوونځي چې دا مهال له شپږم ټولګي پورته نجونې په کې له زده کړو منع شوې دي.

د زده کړې د نړیوالې ورځې په مناسبت د افغانستان لپاره د امریکا سفارت د افغان ښځو او نجونو د تلپاتې ځواک ستاینه کړې.

دې سفارت پرون چهارشنبې ناوخته په خپله ایکس پاڼه یا پخواني ټویټرکې کښلي چې د امریکا نړیوالې پراختیایي ادارې په ۲۰۲۳ کال کې له افغانستان سره د تعلیم په برخه کې د پنځو کلونو لپاره د ۷۹ ملیون ډالرو مرستې ژمنه وکړه.

سفارت که څه هم په افغانستان کې د طالبانو له خوا د نجونو پرزده کړې د لګول شویو محدودیتونو یادونه نده کړې، خو ویلي یې دي چې متحده ایالات غواړي دا ډاډ ترلاسه شي چې په افغانستان کې ټولې نجونې او هلکان د باکیفیته زده کړو له حق څخه برخمن کېږي.

د ملګروملتونو د ماشومانو د مرستندویه صندوق یونېسف په وینا، په اوس وخت کې په افغانستان کې ۳،۷ ملیونه ماشومان ښوونځیو ته له تلو بې برخې دي چې څه باندې ۶۰ سلنه یې نجونې دي.

نور راوښيه

XS
SM
MD
LG