د لاسرسۍ وړ لېنکونه

تازه خبر
چهارشنبه ۴ غبرګولی ۱۴۰۱ کابل ۰۳:۰۷

نړۍ

ملګري ملتونه: نږدې ۳،۶ ملیونه اوکراینیان نورو هېوادونو ته کډوال شوي

شماری از پناهجویان اوکراین

د کډوالو په چارو کې د ملګرو ملتونو عالي کمېشنري وایي چې پر اوکراین د روسیې د برید له پیله تر اوسه نږدې درې ملیونه او شپږ لکه اوکراینیان نورو هېوادونو ته کډوال شوي دي.

د دې ادارې د اړیکو د برخې مسؤل انډریس کرچ هاف پرون وویل چې یوازې دوه ملیونه او یو لک اوکراینیان پولنډ ته تللي دي.

نوموړي زیاته کړه چې له نړیوالې دوهمې جګړې راوروسته دا په اروپا کې د کډوالۍ تر ټولو ستر بحران دی.

پر اوکراین د روسیې د برید روانه اوونۍ میاشت پوره کېږي.

د ملګرو ملتو په وینا تر اوسه په دې جګړه کې ۹۵۳ ملکیان وژل شوي، خو داسې ښکاري چې د دې تلفاتو اصلي شمېرې به تر دې ډېرې لوړې وي.

د ورځې تازه خبرونه دلته ولولئ

له افغانستانه د بریتانیا د وتلو بهير سيستماتيکه ناکامي وبلل شوه

آرشیف: په 2021 کال کې د کابل هوايي ډګر يوه څنډه

د بریتانیا د عوامو جرګې د بهرنیو اړیکو کمېټې ویلي، چې د دوی څېړنو ښودلې چې په ګډوډۍ کې له افغانستانه د بریتانیا د تېر کال وتل، په رهبري، پلان او تیاریو کې سيستماتيکه ناکامي په ډاګه کوي.

د فرانسپرس خبري آژانس د راپور له مخې د دغې څېړنې نتیجه پرون خپره شوه او له افغانستانه د بریتانیا د وتلو بهير یوه تراژیدي او له متحدینو سره یې خیانت بلل شوی.

د دغې کمېټې په وینا د بریتانیا دغه چلند به په راتلونکو کلونو کې د دې هېواد ګټو ته زیان ورسوي.

وروسته له هغې چې د امریکا متحدو ایالتونو اعلان وکړ، چې په افغانستان کې نږدې شل کلن حضور پای ته رسوي، بریتانیا هم له افغانستانه د وتلو پرېکړه وکړه.

د فرانسپرس د راپور له مخې هغه مهال په سلګونو افغانان چې ژوند یې له جدي خطر سره مخامخ و او له دې هېواده د ایستلو پر شرایطو برابر و، په دې هېواد کې پاتې شول.

د نړۍ شلو هېوادونو له اوکراین سره د نویو پوځي مرستو ژمنه کړې

اوکرایني سرتېري

د نړۍ شلو هېوادونو د روسیې د یرغل پر وړاندې د مقابلې لپاره له اوکراین سره د نویو پوځي مرستو ژمنه کړې.

د متحدوایالتونو د دفاع وزیر لویډ اسټین پرون د مې په ۲۳مه د اوکراین د تماس ډلې له دوهمې غونډې وروسته دا خبر ورکړ. ښاغلي اسټین ډنمارک او چک جمهوریت د مثال په توګه یاد کړل.

ډنمارک موافقه کړې، چې اوکراین ته د خپلو سواحلو د دفاع لپاره هارپون ډوله توغندي ورکړي او چک جمهوریت منلې ده چې د یرغلیزو هیلیکوپټرو، ټانکونو او راکټي سیسټم په ګډون اساسي تجهیزات د اوکراین پوځ ته برابر کړي.

د سریلانکا او بنګله دېش کرکټ لوبډلو ترمنځ دویمه ټېست لوبه پیل شوه

د سریلانکا د کرکټ ملي لوبډله

د سریلانکا او بنګله دېش کرکټ لوبډلو ترمنځ دویمه ټېست لوبه نن پیل شوه.

دا لوبه چې نن سهار د بنګله دېش په پلازمېنې ډهاکې کې پیل شوه، بنګله دېش په ۲۴ منډو کې خپل ۵ لوبغاړي له لاسه ورکړل خو د مشفق الرحیم او لېتون داس د غوره ملګرتیا په پایله کې د کوربه لوبډلې منډې له ۲۰۰ واوښتې او لا هم یاده لوبډله خپلې توپوهنې ته دوام ورکوي.

کاسن راجیثا د بنګله دېش درې او اسیتا فرنانډو دوه لوبغاړي له میدانه بهر کړل.

په دې لوبه کې د سریلانکا لوبغاړی کوشال منډيس په پښتیو که درد له امله له میدانه بهر شو او اوس په روغتون کې بستر دی. د منډیس د اوسني وضېعت او لوبې ته د بېرته را ستنېدو په اړه څه نه دي ویل شوي.

د یادونې ده، چې د سریلانکا او بنګله دېش ترمنځ لومړۍ ټېست لوبه په مساوي توګه پای ته رسېدلې وه.

امریکا کې روغتیاپالانو د لسګونه افغانانو د غاښونو وړیا درملنه کړې

آرشیف

د امریکا د ویرجینیا په فال چرچ ښار کې یوه ډله روغتیاپالانو د لسګونه افغانانو د غاښونو وړیا درملنه او معاینه کړې.

روغتیاپالان چې د مذاهبو د یووالي د یوې ډلې له خوا ګمارل شوي وو پرون یې د هغو ۷۰ افغانانو معاینه وکړه چې تازه امریکا ته تللي دي.

دغو افغان کډوالو ته د غاښونو د پاکوالي په خاطر ځینې مواد هم مرسته شول.

د ارزونو په اساس د غاښونو معاینه او پاککاري په لویدیځو هېوادونو کې ډېر لګښت لري او په اوسط ډول د یوه غاښ په عادي پاک کولو باندې پنځوس ډالره لګېږي.

امریکا څه باندې ۱۲۴ زره کسان تېر اګست له افغانستانه وایستل چې ترمنځ یې تر دې دمه نږدې اتیا زره افغانان دغه هېواد ته انتقال کړي.

د اذربايجان او ارمنستان مشرانو د "نګورنو – قره باغ" سيمه کې د سولې په اړه خبرې کړي

د اذربایجان ولسمشر ویلي، له ارمنستان سره یې د اړیکو عادي کېدو ته پنځه اصله ټاکلي دي

د اذربایجان او ارمنستان مشرانو د لانجمنې سیمې نګورنو-قره باغ د سولې د طرحې په تړاو په بروکسل کې خبرې وکړې.

د اروپا د شورا مشر چارلز میشل له پرونیو درې اړخیزو خبرو مخکې د اذربایجان له ولسمشر الهام علییف او د ارمنستان له صدر اعظم نیکول پاشینیان سره جلا - جلا دوه اړخیزې کتنې درلودې.

د اذربایجان ولسمشر ویلي، له ارمنستان سره یې د اړیکو عادي کېدو ته پنځه اصله ټاکلي دي، دا هغه اصول دي چې د ارمنستان صدر اعظم هم د منلو وړ بللي دي.

د پاشنیان دغو څرګندونو د ده د مخالفانو هغه ادعا پیاوړې کړې چې وایي، ارمنستان چمتو دی چې پر نګورنو قره باغ د اذربایجان حاکمیت په رسمیت وپېژني.

د اوکراين ولسمشر نن په داووس کې د نړۍ اقتصادي غونډې ته وينا کوي

د اوکراین ولسمشر ولودمیر زلنسکي

ټاکل شوې د اوکراین ولسمشر ولودمیر زلنسکي نن دوشنبه په داووس کې د نړۍ اقتصادي غونډې ته وینا وکړي.

د راپورونو له مخې زلنسکي به ماذیګر مهال د ویډیو کانفرانس له لارې له دې غونډې سره یو ځای شي.

ټاکل شوې د نړۍ اقتصادي غونډه کې له اوکراینه ملاتړ اعلان شي.

د سویس د داووس ښار په دې غونډه کې به د نړۍ څه باندې دوه نیم زره سیاستوال او اقتصادي مشران ګډون وکړي.

عمران خان د نوي حکومت پر ضد اسلام اباد کې د پلتۍ وهلو خبر ورکړ

د پاکستان پخوانی صدر اعظم عمران خان

د پاکستان پخواني صدراعظم عمران خان له خپلو پلویانو غوښتي چې د می په ۲۵ د نوي حکومت پرضد د اعتراض لپاره تر اسلام آباد پورې مارش وکړي.

عمران خان چې تېره میاشت له قدرته لیرې کړی شو، پرون یکشنبې په پېښور کې په یوه خبري کنفرانس کې وویل چې، دوی دغه حکومت نه مني.

هغه زیاته کړه چې دوی به تر هغو پورې چې جرګې منحلې شوې نه وي او د انتخاباتو لپاره نېټه اعلان شوې نه وي، په اسلام آباد کې پلتۍ ووهي.

عمران خان چې درې کاله یې قدرت په لاس کې و، د اپریل په لسمه د پارلمان له خوا د نه باور رایې په نتیجه کې له قدرته لیرې شو.

جو بایډن: نړۍ باید د بیزو چیچک د خپرېدو په اړه اندېښمن وي

د امریکا د متحدو ایالتونو ولسمشر جو بایډن

د امریکا د متحدو ایالتونو ولسمشر جو بایډن وايي، ټول باید په نړۍ کې د بیزو د چیچک د خپرېدو په اړه اندېښمن وي.

بایډن نن له جنوبي کوریا څخه جاپان ته د روانېدو پر مهال خبریالانو ته وویل، دوی هڅه کوي پوه شي چې په دې اړه څه کارونه کولی شي.

دا څرګندونې داسې مهال کېږي، چې په نړۍ کې د بیزو د چیچک وایروس په خپرېدو دی، اسرایل او یونان هم د لومړنیو مثبتو پېښو خبر ورکړی دی.

د روغتیا نړیوال سازمان وايي، تر اوسه په نړۍ کې د دغه نوي وایروس ۹۲ موارد او ۲۸ مشکوکې پېښې ثبت شوې دي.

د پولنډ ولسمشر اوکراینیانو ته: د پوتین غوښتنو ته تسلیم نه شئ

د پولنډ ولسمشر اندري دودا د اوکراین پارلمان ته د وینا پرمهال

د پولنډ ولسمشر اندري دودا نن د اوکراین پلازمېنې کییف ته د ناڅاپي سفر پر مهال د هغه هېواد پارلمان ته وینا وکړه.

د فبروري میاشتې پر ۲۴ مه پر اوکراین د روسیې تر یرغل وروسته دا لومړی وار و، چې د یوه دولت مشر د اوکراین پارلمان ته وینا وکړه.

دودا په خپله وینا کې له اوکراین غوښتنه وکړه، چې د روسیې د ولسمشر ولادمیر پوتین غوښتنو ته تسلیم نه شي.

د پولنډ ولسمشر زیاته کړه، دا د اوکراین حق دی، چې د خپل راتلونکي په اړه خپله پرېکړه وکړي.

هغه یو وار بیا په اروپايي ټولنه کې د اوکراین د غړیتوب په اړه پر خپل ملاتړ ټینګار وکړ.

ای پل ایل؛ د نیمه پایلوبو څلور لوبډلې معلومې شوې

د رویال چلېنجرز بنګلور لوبډلې لوبغاړی ویرات کوهلي

د هند غوره لیګ د نیمه پایلوبو څلور لوبډلې معلومې شوې.

د هند د کرکټ په غوره لیګ کې له اوونیو وروسته څلور لوبډلې ګجرات تيتانز، راجستان رویالز، لکنو سوپر جاینټ او رویال چلېنجرز بنګلور لوبډلې بریالۍ شوې چې نیمه پایلوبو ته لار وکړي.

د مهالوېش پر بنسټ به د راتلونکې سې شنبې په ورځ ګجرات تیتانز او راجستان رویالز لوبډلې لوبه وکړي، چې د لوبې ګټونکې لوبډله به په مستقیم ډول پایلوبې ته ووځي.

د چهارشنبې په ورځ رویال چلېنجرز بنګلور او لکنو سوپر جاینټ لوبډلې لوبه کوي او هرې لوبډلې چې لوبه وګټله، د لومړۍ نیمه پایلوبې له بایلونکې لوبډلې سره به د جمعې په ورځ لوبه کوي چې د جمعې ورځې د لوبې ګټونکې لوبډله به هم په پایلوبه کې ګډون وکړي.

ټاکل شوې، چې د هند غوره لیګ پایلوبه د مې میاشتې په ۲۹مه نېټه د هند په احمداباد ښار کې وشي.

د پولنډ ولسمشر په ناڅاپي سفر کییف ته رسېدلی

د پولنډ ولسمشر اندري دودا

د پولنډ ولسمشر اندري دودا نن یکشنبه په ناڅاپي سفر د اوکراین پلازمېنې کییف ته ورسېد او تمه کېږي د هغه هېواد پارلمان ته وینا وکړي.

وروسته له هغې چې روسیې د فبروري میاشتې پر ۲۴مه پر اوکراین یرغل پیل کړی، دا به د یوه دولت لومړی مشر وي، چې د اوکراین پارلمان ته وینا کوي.

تمه کېږي د پولنډ ولسمشر به په خپله وینا کې یو وار بیا په اروپايي ټولنه کې د اوکراین د غړیتوب په اړه خپله غوښتنه تکرا رکړي.

اندري دودا په اپرېل میاشت کې هم د ځینو نورو هېوادونو له ولسمشرانو سره یوځای کییف ته سفر کړی و او د اوکراین له ولسمشر ولادمیر زلینسکي سره یې خبرې کړې وې.

په سعودي کې د لومړي ځل لپاره د ښځینه عملې په مرسته الوتنه شوې

د دې اووه کسیزې عملې ډېری برخه د سعودي عربستان مېرمنې وې.

په سعودي عربستان کې د لومړي وار لپاره د ښځینه عملې په مرسته په بریا یوه الوتنه وشوه.

د دغه شاهي هېواد چارواکو پرون دا د ښځو د پیاوړتیا پر لوري یو مهم ګام بللی دی.

د سعودي عربستان د فلای ادیل- یا طيران أديل په نوم د هوایي شرکت دغه الوتنه د ریاض او سرحدي ښار جدې ترمنځ شوې ده.

د فلای ادیل شرکت ویاند عماد اسکندر ثاني ویلي، دا د A320 ډوله الوتکې الوتنه وه.

د دې اووه کسیزې عملې ډېری برخه د سعودي عربستان مېرمنې وې.

د ملګرو ملتونو سرمنشي: د نړۍ جګړه ځپلو سیمو کې ۶۰ فیصده لوږه ثبت شوې

د ملګرو ملتونو سرمنشي انتونیو ګوتیریش

د ملګرو ملتونو سرمنشي وايي، د نړۍ په سطحه ۶۰ فیصده لوږه په جګړه ځپلو سیمو کې ثبت شوې ده.

انتونیو ګوتیریش پرون په یوه ټویټ کې ویلي، کله چې جګړه وشي، خلک له لوږې سره مخامخېږي.

د ملګرو ملتونو د خوړو نړیوال پروګرام په وروستیو کې ویلي، چې په افغانستان کې بشري وضعیت او د خوړو کموالی د ډېرې اندېښنې وړ دی.

د دې ادارې د اټکل له مخې نږدې ۱۹ میلیونه افغانان به د روان میلادي کال تر نومبر میاشتې پورې له سختې لوږې سره مخامخ شي.

عراق په کردستان کې د تېلو نوې کمپنۍ پرانېزي

عکس: آرشیف

د عراق مرکزي حکومت په پام کې لري، چې په کورواکې سیمه کردستان کې د تېلو نوې کمپنۍ پرانېزي.

د دې نوې کمپنۍ د پرانیستلو هدف دا دی چې د تېلو دغه نوې کمپنۍ هلته د تېلو له نورو شرکتونو سره د کردستان حکومت تر مقرراتو لاندې فعالیت وکړي.

دا لومړی وار دی، چې په کردستان کې دغسې یوه کمپنۍ خپل فعالیت پیلوي.

اسراییلي پوځیانو یو ۱۷ کلن فلسطینی وسله وال ووژاه

عکس آرشیف: اسراییلي سرتېري

اسراییلي پوځیانو یو ۱۷ کلن فلسطینی وسله وال هغه وخت ووژاه، چې د اشغال شوې لویدیځې غاړې یوه ناامن ښارګوټي ته اسرایلي سرتېري ننوتل او ورپسې شخړه وشوه.

د فلسطین روغتیا وزارت او نورو محلي رسنیو دا خبر تایید کړی دی.

دا ډزې چې اسراییل وايي، له محلي افراطي وسله والو سره په جګړه کې پېښې شوي، داسې وخت پېښېږي، چې د لویدیځې غاړې په شمالي ښارګوټي جنین کې په وروستیو میاشتو کې د اسراییل د پوځ تحرکات زیات شوي دي.

نور راوښيه

XS
SM
MD
LG