د لاسرسۍ وړ لېنکونه

تازه خبر
یکشنبه ۱۳ کب ۱۴۰۲ کابل ۰۱:۳۸

افغانستان

د اسلامي همکاریو سازمان راتلونکې غونډه کې افغانستان د 'اجنډا مهم' ټکی دی

ارشيف، اسلام‌اباد کې د اسلامي همکاریو سازمان د بهرنیو چارو وزيرانو يوه غونډه
ارشيف، اسلام‌اباد کې د اسلامي همکاریو سازمان د بهرنیو چارو وزيرانو يوه غونډه

د وري په دوهمه د اسلامي همکاریو سازمان د ځانګړې غونډې د اجنډا مهم ټکی افغانستان دی.

د پاکستان د بهرنیو چارو وزیر شاه محمود قریشي پرون په اسلام‌اباد کې خبریالانو ته د دې غونډې په اړه معلومات ورکړل او ویې‌ویل چې پاکستان به د دې غونډې کوربه وي.

ښاغلی قريشي زياتوي: "دا غونډه د دې لپاره هم اهمیت لري چې د اوس لپاره زموږ په سلګونو زره افغان وروڼه او خویندې چې زموږ په ګاونډ کې ژوند کوي له ناروغیو او لوږې سره مخامخ دي."

پاکستان تر دې مخکې، پروسږکال د ډسمبر په میاشت کې د افغانستان لپاره د اسلامي همکاریو د سرمشریزې کوربه و.

د ورځې تازه خبرونه دلته ولولئ

د افغانستان د خبریالانو مرکز: په دایکندي کې د نسیم راډیو نشرات بېرته پیل شول

ارشیف
ارشیف

د افغانستان د خبریالانو مرکز وايي، طالبانو په دایکندي ولایت کې د نسیم خصوصي راډیو ته اجازه ورکړې چې خپل نشرات بېرته پیل کړي، خو د دې راډيو مدیر مسوول سلطان علي جوادي لا هم د طالبانو په بند کې دی.

دې مرکز نن شنبې د مارچ دویمه د یوې خبرپاڼې په خپرولو سره ویلي، د طالبانو د استخباراتو ادارې دا راډيو پنځه میاشتې وړاندې تړلې وه.

د افغانستان د خبریالانو مرکز د نسیم راډیو د خاوند د مدافع وکیلې نحیبې واحدي په حواله ویلي، نن دې راډیو بېرته خپل نشرات پیل کړل.

د دې مرکز په خبرپاڼه کې راغلي، جوادي د لیندۍ په شلمه د دایکندي په مرکز نیلي کې د طالبانو د ابتدائیه محکمې له لوري (د طالبانو د حکومت پر ضد د تبلغاتو او بهرنیو هېوادونو ته د جاسوسۍ) په تور په یو کال زندان محکوم شوی و.

واک ته د طالبانو له ستنېدو وروسته ډېر شمېر خبریالان او د رسنیو کارکوونکي د طالبانو له‌خوا نیول شوي او زنداني شوي دي.

په کونړ کې د چت غورځېدو پېښه؛ څلور کسان مړه او درې نور ټپیان شوي

د افغانستان په عمومي نقشه کې د کونړ ولایت موقعیت
د افغانستان په عمومي نقشه کې د کونړ ولایت موقعیت

په کونړ کې د یو د کور چت د غورځېدو په پېښه کې څلور کسان مړه او درې نور ټپیان شوي دي.

د کونړ ولایت د پېښو پر وړاندې د چمتووالي ادارې مرستیال احسان الله نن شنبه ازادي راډیو ته وویل: "د پرله‌پسې ورښتونو له کبله تر اوسه په کونړ کې ۳۲ کورونه تخریب شوي چې د اسعداباد اړوند د اندرسیر په کلي کې د یو کور د چت د راغورځېدو په پېښه کې څلور تنه مړه او درې نور ټپیان دي."

د هغه په خبره، په دې ورښتونو کې یو شمېر څاروي هم له منځه تللي دي.

د کونړ د ټولګټو چارو ریاست بیا د کونړ او نورستان ترمنځ د یو شمېر لارو د تړلو کېدو خبر هم ورکړی دی.

بل پلو، په غزني کې طالب سیمه ییز چارواکو وايي، د شدیدو ورښتونو له کبله د غزني له مرکز او شمېر ولسوالیو ترمنځ غځېدونکې لار تړل شوي دي.

د غزني اوسېدونکو له طالب چاوراکو د دې لارو د پرانیستلو غوښتنه کړې ده.

په وروستیو څو ورځو کې د افغانستان په بېلابېلو ولایتونو کې د واورې او بارانونو له امله د سالنګونو په ګډون په یو شمېر ولایتونو کې لارې تړل شوي دي.

د امریکا پولیسو د 'نصرت احمدیار' په وژنه کې د لاس لرلو په تور یو کس نیولی

 نصرت احمدیار کلونه په افغانستان کې له امریکايي ځواکونو سره د ژباړونکې په توګه کار کړی و او دی د ۲۰۲۳م کال د جولای په درېیمه په واشګټن کې هغه مهال ووژل شو چې له موټره يې سپرلۍ ښکته کوله.
نصرت احمدیار کلونه په افغانستان کې له امریکايي ځواکونو سره د ژباړونکې په توګه کار کړی و او دی د ۲۰۲۳م کال د جولای په درېیمه په واشګټن کې هغه مهال ووژل شو چې له موټره يې سپرلۍ ښکته کوله.

د امریکا پولیسو د هغه تنکي ځوان د نیولو خبر ورکړی چې په واشنګټن کې د یوه افغان په وژلو کې په لاس لرلو تورن دی.

دغه افغان چې نصرت احمدیار نومېږي کلونه يې په افغانستان کې له امریکايي ځواکونو سره د ژباړونکې په توګه کار کړی و.

هغه د ۲۰۲۳م کال د جولای په درېیمه په واشګټن کې هغه مهال ووژل شو چې له موټره يې سپرلۍ ښکته کوله.

د احمدیار ملګرو پولیسو ته ویلي، پر هغه د کرایه د غوښتلو پر مهال ډزې وشوې.

خو د واشنګټن پولیسو ویلي، هغه له سپرلۍ ښکته کولو وروسته په خپل موټر کې ناست و چې څو تنکي ځوانان ورغلل او هڅه يې وکړه چې د هغه موټر ترې واخلي.

۳۱ کلن احمدیار پر افغانستان د طالبانو له واکمنېدو وروسته امریکا ته تللی و او په شمالي ویرجینیا کې له خپلې مېرمنې او ماشومانو سره مېشت و.

د امریکا بهرنیو چارو وزارت 'بنفشه یعقوبي' د زړورې ښځې د جایزې ګټونکې اعلان کړه

د امریکا د بهرنیو چارو وزارت
د امریکا د بهرنیو چارو وزارت

د امریکا د بهرنیو چارو وزارت د افغانستان د تېر جمهوري نظام د بشري حقونو د خپلواک کمېسیون غړې بنفشه یعقوبي د ۲۰۲۴م کال د زړورې ښځې د جایزې له دولسو ګټونکو څخه یوه اعلان کړه.

د امریکا د بهرنیو چارو وزارت د بیان پر اساس، مېرمن یعقوبي او یولس نورې ښځې له ایران څخه د فریبا بلوچ په ګډون به د زړورو ښځو دا جایزه د مارچ میاشتې په څلورمه په یو لړ مراسمو کې ترلاسه کړي.

په بیان کې راغلي، په دې مراسمو کې به د امریکا د بهرنیو وزیر انټونې بلېنکن او د دې هېواد لومړی مېرمن جیل بایډن ګډون وکړي.

د امریکا د بهرنیو چارو وزارت په بیان کې ویلي، مېرمن یعقوبي کلونه د هغو ښځو له حقونو چې له تاوتریخوالي سره مخ شوي، دفاع کړې ده.

وړاندې راغلي، مېرمن یعقوبي او خاوند يې په ۲۰۰۸م کال کې د کم لیده کسانو د روزنې لپاره د رهیاب په نوم یو سازمان هم رامنځته کړ.

له افغانستان څخه له مېرمن یعقوبي او له ایرانه د مېرمن بلوچ سربېره لس نورې ښځې له بنګله‌دېش، بېلارس، بوسنیا هرزي ګوینا، برما، کیوبا، اکوادور، ګامبیا، جاپان، مراکش او یوګانادا څخه د ۲۰۲۴ کال د امریکا د بهرنیو چارو وزارت د زړورې ښځې جایزې ګټونکې اعلان شوي دي.

پاکستان د افغانستان له لارې د انرژۍ لېږد په تړاو د نړیوال بانک له پلانه هرکلی وکړ

د کاسا۱۰۰۰ پروژې د پرانیستې له مراسمو یو انځور. د ۲۰۱۶ کاف د مې۱۲مه
د کاسا۱۰۰۰ پروژې د پرانیستې له مراسمو یو انځور. د ۲۰۱۶ کاف د مې۱۲مه

د پاکستان حکومت د نړیوال بانک د هغه پلان هرکلی کړی چې غواړي د افغانستان له لارې جنوبي آسیا ته د انرژۍ د لېږد او سوداګرۍ پر پروژې بیا کار پیل کړي.

د پاکستان حکومت په یوه بیان کې چې پرون د مارچ په لومړۍ نېټه خپور شو، دا ژمنه ستایلې او ویلي یې دي چې د نړیوال بانک دا اعلان په سیمه کې د انرژۍ د انتقال لپاره د هېوادونو ترمنځ د همکارۍ نښه ده.

پر دې پروژې د کار د بیا پیل غوښتنه قرغزستان، تاجکستان او پاکستان چې د افغانستان ترڅنګ د دې پروژې ګډونوال دي، په تېره ډسمبر میاشت کې نړیوال بانک ته وړاندې کړې وه او نژدې دوه اوونۍ مخکې نړیوال بانک په یوه بیان کې اعلان وکړ چې د افغانانو د ملاتړ لپاره د یوې نوې تګلارې له مخې به د کاسا زر پروژې د بشپړولو عملي کار پیل شي.

خو نړیوال بانک ټینګار کړی چې د دې پروژې د رغونې د لګښتونو او په راتلونکي کې د هغې د عوایدو چارې به له افغانستانه بهر سمبالېږي او د طالبانو حکومت به په کې ښکېل نه وي.

د طالبانو حکومت د نړیوال بانک د دې اعلان په اړه څه نه دي ویلي، خو مخکې له دې یې له نړیوالو موسسو غوښتي وو چې په افغانستان کې خپلې ټولې نیمګړې پروژې بشپړې کړي.

کاسا زر پروژه د تاجکستان او قرغزستان د برښنا انرژي د افغانستان له لارې جنوبي آسیا ته لېږدوي.

'ډبلیوایف‌پي' شاوخوا ۱۶ میلیون اړو افغانانو ته د غذايي موادو مرستې رسوي

ارشیف: په ارزګان کې اړمنو سره د خوړو نړیوال پروګرام د مرستو له بهیره یو انځور
ارشیف: په ارزګان کې اړمنو سره د خوړو نړیوال پروګرام د مرستو له بهیره یو انځور

د خوړو نړیوال پروګرام یا 'ډبلیوایف‌پي' وايي، په پام کې لري تر راتلونکو دوو میاشتو پورې شاوخوا ۱۶ میلیون اړو افغانانو ته د غذايي موادو مرستې ورسوي.

په افغانستان کې د دې پروګرام د عامه اړیکو مسوول فلیپې کروپف پرون په دې اړه ازادۍ راډیو ته وویل: "په سږني ژمي کې موږ یوازې د اووه میلیون افغانانو ملاتړ کولای شو. ډبلیو‌ایف‌پي پلان لري چې تر راروانې مې میاشتې پورې ۱۶ میلیون خلکو ته خواړه، مقوي غذایی مواد او ژوند ژغورونکي توکي ورسوي. د دې کار لپاره ۷۶۰ میلیون امریکايي ډالرو ته اړتیا لرو."

کروپف زیاته کړه چې دوی تېره اوونۍ یوه نوې مالي مرسته ترلاسه کړه، خو د دې پیسو یوه برخه یې هغو پورونو ته ورکړه چې د تېر کال د فعالیتونو لپاره یې اخیستي وو.

هغه زیاته کړه چې ډبلیو‌ایف‌پي د بودیجې د کمښت له کبله تېرکال اړ شو چې لس میلیون اړو کسانو ته د مرستو د رسولو پروګرام وځنډوي.

ملګرو ملتونو مخکې ویلي و، چې په افغانستان کې له ۲۹ میلیون ډېر خلک بشري مرستو ته اړتیا لري.

د افغانانو لپاره د امریکا د نړیوالو زده‌کړو شورا پروګرام پرانیستل شو

د امریکا بیرغ
د امریکا بیرغ

د افغانستان لپاره د امریکا سفارت د افغانانو لپاره د امریکا د نړیوالو زده کړو د شورا د پروګرام د پرانیستو خبر ورکوي.

د امریکا د سفارت شارژدافېرې کرن دیکر پرون پر خپله ایکس‌پاڼه ولیکل چې د دې پروګرام په پرانیستونکې غونډه کې یې له سلو افغان فارغانو سره یوځای ګډون وکړ.

مېرمن دیکر لیکلي چې افغان فارغان د اړیکو، همکارۍ او مشارکت په لټه کې دي او غږ یې ډېر مهم دی.

مېرمن دیکر د افغانستان لپاره د امریکا د نړیوالو زده کړو د شورا د پروګرام د جزییاتو په اړه څه نه دي ویلي، خو ټینګار یې کړی چې متحدایالات د افغانستان د راتلونکې په جوړولو کې له دې ډلې فارغانو سره مرسته کوي.

د ایرلینډ پر وړاندې یو ورځنیو سیالیو ته افغان لوبډله اعلان شوه

د ایرلینډ پر وړاندې یو ورځنیو نړیوالو سیالیو ته د افغان لوبډلې نوملړ
د ایرلینډ پر وړاندې یو ورځنیو نړیوالو سیالیو ته د افغان لوبډلې نوملړ

وروسته له هغې چې د افغانستان د کرکټ ملي لوبډلې په یوازېنۍ ټېسټ سیالۍ کې د ایرلینډ پر وړاندې ماتې وخوړه، د کرکټ بورډ د غوراوي کمېټې د یاد هېواد پر وړاندې درې یو ورځنیو سیالیو ته لوبډله اعلان کړه.

په اعلان شوې لوبډله کې په لومړي ځل ځیني ځوانانو ته هم د لوبېدو چانس ورکړل شوی دی.

د یو ورځنیو سیالیو په نوملړ کې حشمت الله شهیدي، رحمن الله ګربز، ابراهیم ځدراڼ، ریاض حسن، رحمت شاه، عظمت الله عمرزی، اکرام علیخېل، محمدنبي، ګلبدین نایب، ننګیالی خروټی، الله محمدغضنفر، بلال سمیع، فضل حق فاروقي، نوراحمد، نوید ځدراڼ او فرید احمد شامل دي.

په احتیاطي لوبغاړو کې قیس احمد، ضیاالرحمن اکبر او شاهدالله کمال ته ځای ورکړل شوی دی.

د ویلو ده چې د یو ورځنیو سیالیو لوبلړۍ به د مارچ په ۷مه نېټه د عربي متحده اماراتو په شارجه لوبغالي کې پیل شي.

د افغانستان په شلو ولایتونو کې د واورې او بارانونه د ورېدو اټکل شوی

ارشیف: د بامیان ښار یوه څنډه چې واوره پرې ورېدلې ده.
ارشیف: د بامیان ښار یوه څنډه چې واوره پرې ورېدلې ده.

د طالبانو تر کنټرول لاندې د ملکي هوايي چلند وزارت د هوا پېژندنې ادارې له اټکل سره سم نن او سبا به د افغانستان په شلو ولایتونو کې واورې او بارانونه واوري.

د هواپېژندنې د ریاست له وړاندوینې سره سم، د سالنګونو په شمول په ځینو سیمو کې به تر ۸۰ سانتۍ پورې واوره واوري.

دې ادارې د باران اندازه له ۱۵ میلي تر ۵۰ میلي مترو پورې اټکل کړې ده.

په همدې حال کې د طالبانو د فواید عامې وزارت ویندوی محمداشرف حق شناس ویلي چې د درنې واورې د اورېدو له کبله د سالنګ لویه لار بیا بنده شوې ده.

د هرات هوايي ډګر بېرته پرانیستل شو

د افغانستان په نقشه کې د هرات ولایت موقعیت
د افغانستان په نقشه کې د هرات ولایت موقعیت

د هرات ولایت هوايي ډګر چې د واورو د اورېدو له کبله درې ورځې بند و، نن بېرته پرانیستل شو.

د طالبانو د ملکي هوايي چلن وزارت نن په یوه خبرپاڼه کې ویلي چې اوس دا هوايي ډګر الوتنو ته چمتو شوی دی.

د دغه وزارت د خبرپاڼې پر اساس، د هرات په هوايي ډګر کې د پېلوټ د لیدو ساحه د واورو د اورېدو له کبله محدوده شوې وه او له همدې کبله دغه هوايي ډګر ته الوتنې لغوه شوې وې.

نور راوښيه

XS
SM
MD
LG