د لاسرسۍ وړ لېنکونه

تازه خبر
پنجشنبه ۵ غبرګولی ۱۴۰۱ کابل ۱۰:۵۰

افغانستان

یونېسف له افغانو ماشومانو سره نوې مرستې اعلان کړې

افغان ماشومان

د ملګرو ملتونو د ماشومانو وجهي صندوق یونېسف له یو شمېر افغان ماشومانو سره نوې مرستې اعلان کړې.

د دې سازمان افغانستان څانګې پرون په ټویټر کې لیکلي چې د ګېټس بنسټ په همکارۍ یې په افغانستان کې پر اړمنو ماشومانو ۱۵ زره کمکي بستې وېشلې دي.

د سازمان په وینا، په دې مرستو کې د ماشومانو لپاره کمپلې او حیاتي واکسینونه شامل دي.

په افغانستان کې د طالبانو له بیا واکمنېدو را وروسته د ملګرو ملتونو وجهي صندوق د ماشومانو وضعیت د اندېښنې وړ بللی دی.

یونېسف د کب په ۱۳ مه اعلان وکړ چې په افغانستان کې له ماشومانو سره د مرستې لپاره یې د دوه میلیارده ډالرو له ژمنې یوازې ۱۵ سلنه ترلاسه کړې ده.

د ورځې تازه خبرونه دلته ولولئ

عمرګل: د افغان کرېکټ ملي لوبغاړو روزنه به په لېوالتيا وکړم

د افغان کرېکټ ملي لوبډلې لوبغاړي

د افغانستان کرېکټ ملي لوبډلې د توپ اچوونې تازه ټاکل شوی روزونکی عمر ګل وايي، د خوارېکښو افغان لوبغاړو د روزنې دنده به په لیوالتیا مخکې یوسي.

د افغانستان کرېکټ بورډ پرون ناوخته پر خپله وېبپاڼه کې ولیکل، چې د پاکستان تېز توپ اچوونکی عمرګل یې د افغانستان د کرېکټ ملي لوبډلې د توپ اچونې روزونکی ټاکلی دی.

عمر ګل تر دې مخکې د لنډ وخت لپاره د افغان لوبډلې د روزنې دنده منلې وه خو اوس د اوږد مهال لپاره ورسره تړون شوی دی.

عمر ګل پر خپله ټوېټر پاڼه لیکلي دي چې له افغان لوبډلې سره له لنډ‌مهالې دندې وروسته په لیوالتیا د اوږد مهالې دندې مسولیت مني.

۳۹ کلن عمر ګل د پاکستان لپاره د ټېسټ کرېکټ په ۴۷ لوبو کې ۱۶۳ وېکېټې په ۱۳۰ یو ورځنیو لوبو کې ۱۷۹ او په ۶۰ شل اوریزو لوبو کې یې ۸۵ وېکټې اخیستي دي.

د حاجيانو د لېږد رالېږد په موخه طالبانو له کام اير هوايي شرکت سره تړون وکړ

د کام اير هوايي شرکت الوتکه

د طالبانو حکومت د ارشاد، حج او اوقافو وزارت سعودي عربستان ته د حاجیانو د لېږد او بېرته راستنولو په اړه له کام ایر هوايي شرکت سره نن، یوه هوکړه لاسلیک کړه.

د طالبانو حکومت د ارشاد، حج او اوقافو وزارت، په دې اړه رسنیو ته په استول شوې خبرپاڼه کې ویلي، په هوکړه کې راغلي، چې ‎‏یاد هوايي شرکت به د ټاکل شوې سهمیه څخه نیمایي حاجیان د وړاندې شوو شرایطو مطابق او د هوایي چلند د موجوده معیارونو په پام کې نیولو سره سعودي عربستان ته د حج مراسمو ادا کولو لپاره انتقال او له مراسمو وروسته بېرته هېواد ته راستانه کړي.

‎د یادونې، ده چې سږ کال د افغانستان حاجیانو لپاره سهمیه (۱۳۵۸۲) تنه ټاکل شوې ده.

خو د کرونا ویروس له خپرېدو مخکې به هر کال له افغانستان ۳۰۰۰۰ حاجیان د حج د مراسمو د ادا کولو لپاره سعودي عربستان ته تلل.

تر اوسه ویل شوي نه دي، چې سږ کال به د حج مراسمو د ادا کولو لپاره په هر حاجي څومره لګښت راځي، خو د حج وزارت مخکې ویلي، چې لګښتونه به د پخوا کلونو په پرتله زیات وي.

د طالبانو د سوداګرۍ وزارت د ګمرکي معافيت په تړاو خبرې کړي

ارشيف

د طالبانو د سوداګرۍ او صنعت وزارت وايي، د خامو موادو په اړه په ناسته کې یې د ګمرکي معافیت یا تعرفو په اړه خبرې کړې دي.

یاد وزارت په یوه خبرپاڼه کې ویلي دي، چې په دې ناسته کې پرېکړه وشوه چې ۱۵ هغه شرکتونه چې خام مواد او ماشینري واردوي، اسناد به یې وڅېړل شي.

په خبرپاڼه کې ویل شوي دي چې دې ۱۵ شرکتونو د جوس، خوراکي او د وینځلو توکو او د غیرالکولي مشروباتو په برخو کې د تعرفو لپاره خپل اسناد دې وزارت ته وسپارل چې یاد اسناد د څېړلو لپاره اړوندو ریاستونو ته راجع شول.

ملا برادر پنجشېر ته تللی

د طالبانو د رییس الوزرا لومړی مرستیال ملا عبدالغني برادر

د طالبانو د رییس الوزرا لومړی مرستیال ملا عبدالغني برادر پنجشیر ولایت ته سفر کړی دی.

د پنجشېر د اطلاعاتو او فرهنګ رييس مولوي نصرالله ملکزاده دغه خبر تاييد کړ او ويې ويل، چې د برادر د سفر هدف په دغه ولايت کې له سيمه ييزو او طالب پوځي چارواکو سره ليدنه وه.

خو هغه نور جزیات ورنه کړل.

دا په لسو ورځو کې دویم لوړپوړی طالب چارواکی دی چې پنجشیر ته سفر کوي، تر دې مخکې د طالبانو د دفاع وزارت سرپرست ملا یعقوب مجاهد هم تېره اوونۍ پنجشېر ته سفر کړی و.

دغه سفرونه وروسته له هغه کېږي چې د پنجشېر په ځینو ولسوالیو کې د طالبانو او احمد مسعود په مشرۍ د ملي مقاومت جبهې ترمنځ د نښتو راپورونه ورکړل شول.

کاپيسا: د کوهستان د لومړۍ حصې ولسوالۍ د زندان پر ودانۍ بريد شوی

د کاپيسا ولايت نقشه

د کاپيسا ولايت د کوهستان د لومړۍ حصې د زندان په ودانۍ نن سهار وختي وسله وال بريد شوی.

د کوهستان د لومړۍ حصې د ولسوالۍ امنيې قوماندان عبدالمتين سعيد دا وسله وال بريد تاييد کړ، خو ويې ويل چې چاته مرګ ژوبله نه ده اوښتې.

د ملي مقاومت جبهې په نامه ډلې د دغه وسله وال برید مسوولیت منلی دی.

د ملي مقاومت د جبهې یوه غړي د نوم د نه ښودلو په شرط په یوه ټیلیفوني اړیکه کې ادعا وکړه چې په دغه برید کې درې طالبان وژل شوي دي.

ځینو عیني شاهدانو ازادي راډیو ته وویل: " شاوخوا دوه بجې د کوهستان د حصې اول ولسوالۍ په مرکز کې د زندان پر ودانۍ وسله وال بریدونه وشول چې د سپکو او درنو وسلو ډزې اورېدل کېدې."

توماس ويسټ په کابل او مزار شريف کې وروستۍ چاودنې وغندلې

د افغانستان لپاره د امریکا ځانګړی استازی توماس ویسټ

د افغانستان لپاره د امریکا ځانګړي استازي توماس ویسټ په یوه ټویټ کې وویل چې متحده ایالات په کابل کې او مزارشریف کې ترهګريز بریدونه چې د ده په خبره بزدلانه بریدونه و او د بې ګناه افغانانو ژوند یې اخیستی، غندي.

توماس ویست د پېښو د قربانیانو له کورنیو سره د خواخوږې څرګندولو ترڅنګ ویلي چې دا ډول تاوتریخوالي هیڅ نه‌شي توجیه کیدای.

په کابل او مزار شریف کې تېر ماښام په څلورو چاودنو کې لسګونه کسانو ته مرګ ژوبله واوښته.

په مزارشریف کې د چادونو چې په مني بسونو کې شوي او مسولیت یې د اسلامي دولت ډلې یا داعش د خراسان څانګې اخیستی پکې لږ تر لږه د لسو کسانو د وژل کېدو او ۱۶ نورو د ټپي کېدو خبر ورکړل شوی.

د کابل په چاودنه کې چې په یوه جومات کې شوې، لږ تر لږه پنځه تنه وژل شوي او له لسو زیات کسان ټپیان شوي دي.

فنلنډ افغان کډوالو ته د پناه اخيستنې حق ورکړ

فنلنډ کې افغان پناه اخيستونکي

د فنلنډ د مهاجرت ادارې د افغانانو د پناه په اړه پخوانۍ پرېکړه واخیسته او ویې ویل چې افغانان د پناه مستحق دي.

د فنلنډ د مهاجرت ادارې په یوه نوي لارښود کې د افغانستان د کابل ولایت امنیتي وضعیت د اندېښنې بللی دی.

د ۲۰۲۱ د جولای په ۹ مه د فنلنډ د مهاجرت ادارې د افغانانو د پناه د غوښتنلیکونو د ردولو پرېکړه کړې وه او ویلي یې و چې هغوی باید له فنلنډه وایستل شي.

خو دې ادارې خپله پرېکړه په دې خاطر بېرته اخیستې چې د دوی په وینا د افغانستان په حالاتو کې خورا بدلون راغلی دی.

پاسپورټ رياست: بهر کې ۳ ميليونه چاپ شوي پارسپورټونه به ژر هېواد ته راوړل شي

ارشيف

د طالبانو د حکومت د پاسپورت ریاست وايي، ۳ ميلیونه پاسپورټونه په بهر کې چاپ شوي او ژر به هېواد ته راوړل شي.

دې ریاست پرون (چهارشنبې) وویل چې د دوی لپاره نوي پاسپورټونه په لیتوانیا کې د یوه خصوصي شرکت له لوري چاپ شوي او تمه لري چې په دوو اوونیو کې کابل ته ورسېږي.

د طالبانو د پاسپورت ریاست د پنځه کلن پاسپورت لپاره ۵۰۰ او د لس کلن لپاره ۱۰ زره افغانۍ فیس ټاکلی دی.

د طالبانو له واک ته رسېدو وروسته په لکونه خلک بهر ته لاړل او د پاسپورټ تقاضا په بې ساري ډول زیاته شوه چې لا هم ډېر خلک د پاسپورت د ترلاسه کولو لپاره میاشتې – میاشتې انتظار باسي.

د پاسپورت دفترونه په ځلونو د بیروبار د زیاتوالي له کبله تړل شوي دي.

ننګرهار: د کانونو د استخراج له پيل سره ۲۶۰۰ کسانو ته کاري فرصت برابر شوی

د ننګرهار ولايت نقشه

په ننګرهار کې طالب چارواکي وايي چې د ۴۳ کانونو د استخراج د چارو له پیلولو سره شاوخوا ۲۶۰۰ تنو ته د کار فرصت برابر شوی دی.

د ننګرهار د کانونو او پیترولیم ريیس مفتي عبدالحمید اخوندزاده وايي، د ننګرهار اکثره غرونه د قیمتي، نیمه قیمتي منرالونو، لکه مرمر، شوکاڼي او نفرایټ کانونه لري چې اوس اکثره په قانوني ډول استخراجیږي او دوی ورڅخه هره میاشت ميلیونونه افغانۍ عاید ترلاسه کوي.

د ده په وینا اوس شاوخوا ۲۵ زره تنه په دغو کانونو کې په مستقیم یا غیر مستقیم ډول په کار بوخت دي.

طالبانو له واک ته رسېدو وروسته د خپل عاید د زیاتولو لپاره د کانونو استخراج ته پام زیات کړی دی.

د افغانستان کرکټ ملي لوبډله زمبابوې ته روانه شوه

د افغانستان د کرکټ ملي لوبډله

د افغانستان کرکټ ملي لوبډله نن زمبابوې ته روانه شوه.

د افغانستان کرکټ بورډ پر خپله وېبپاڼه لیکلي دي، افغان لوبډله له زمبابوې سره د دریو یو ورځنیو او دریو شل اوریزو سیالیو لپاره نن له غرمې وروسته یاد هېواد ته روانه شوه.


افغان لوبډله به د مهالوېش له مخې د راتلونکې جون میاشتې په ۴مه نېټه د کوربه لوبډلې پر وړاندې د یو ورځنیو لوبو لړۍ پیل کړي او د شل اوریزو لوبو لړۍ هم د جون میاشتې په ۱۱مه نېټه پیلېږي.

افغان کرکټ بورډ ویلي، چې افغان لوبغاړو له زمبابوې سره سیالیو ته پوره تیاری نیولی او د لوبډلې غوره لوبو ته په تمه دي.

په هرات کې د لامبو سیالۍ وشوې

ارشیف

په هرات کې د لامبو سیالۍ وشوې.

د افغانستان د بدني روزنې او ورزش ادارې پر خپل فېسبوک پاڼه لیکلي دي، د لامبو منتخبې سیالۍ تېره ورځ د ۳۰ لوبغاړو په ګډون وشوې.

په دې سیالیو کې د تنکیو ځوانانو، ځوانانو او لویانو په سني کټګوریو کې لوبغاړو ګډون کړی وو.

د دې سیالیو په پای کې د لویانو په سني کټګورۍ کې نذیر احمد لومړی مقام او سید جعفر دویم مقام، په ځوانانو کې طاهر لومړی مقام او راشد دوهم مقام او په تنکیو ځوانانو کې ارمین محمدي لومړی مقام او الیاس مومند دویم مقام خپل کړل.

ای پي ایل؛ نن شپه بنګلور او لکنو سیالي لري

د رویال چېلینجرز بنګلور لوبډلې لوبغاړی ویرات کهولي

د هند کرکټ غوره لیګ د نن شپې لوبه کې رویال چېلینجرز بنګلور او لکنو سوپر جاینټس لوبډلې لوبېږي.

دا لوبه د هند په کلکتې ښار کې د افغانستان په وخت ماښام ۰۶:۳۰ بجې پيلېږي.

د هند غوره لیګ د جدول دوو مخکښو لوبډلو ګجرات تیتانز او راجستان رویالز تېره شپه لوبه وکړه، چې ګجرات د راجستان په ماتولو سره د ای پي ایل پایلوبې ته لار ومونده خو راجستان لوبډله بیا هم چانس لري او په تمه به وي چې د جمعې په ورځ د نن شپې له ګټونکې لوبډلې سره لوبه کړي.

د جمعې ورځې لوبه چې هرې لوبډلې وګټله، د هند د کرکټ غوره لیګ پایلوبې ته ځي او له ګجرات تیتانز لوبډلې به سره د هند غوره لیګ د اتلولي ګټلو په خاطر سیالي وکړي.

د یادونې ده، چې د هند کرکټ غوره لیګ پایلوبه د یکشنبې په ورځ د هند په احمداباد ښار کې کېږي.

ټام ويسټ د طالبانو په اړه د امنيت شورا پرېکړه مهمه بللې

د افغانستان لپاره د امریکا ځانګړی استازی ټام ویست

د افغانستان لپاره د امریکا ځانګړي استازي ټام ویست د ملګرو ملتونو د امنیت شورا د تېرې ورځې بیان مهم بللی او ویلي یې دي، چې نړۍ په یوه خوله له طالبانو غوښتي چې پر افغان ښځو او نجونو د محدودیت لګولو له پالیسیو دې لاس واخلي.

ښاغلي ویسټ په یوه ټویټ کې دا خبره کړې او دغه راز یې ویلي چې نړۍ دغه راز غوښتنه کړې چې بشرپاله لوبغاړي دې له خنډ پرته لاسرسۍ ولري او پراقتصادي ثبات یې د دوامداره هڅو خبره کړې ده.

د ملګروملتونو د امنیت شورا پنځلسو غړیو هېوادونو پرون په یوه بیان کې له طالبانو غوښتي چې د ښځو او نجونو د بشري حقونو د محدودولو له پالیسۍ لاس واخلي.

د کندهار کرنې رياست: ځمکني توت د کوکنار ښه بديل دی

سږ کال کندهار کې د ځمکني توتان د حاصلاتو کچه هم لوړه وه

د کندهار د کرنې ریاست د مېوو برخو مسول ایمل وفا نن ازادي راډيو ته وویل، چې په کندهار کې ځمکني توتان د کوکنارو د بدیل په توګه ګټور ثابت شوي او حاصلات یې هم سږ کال په دې ولایت کې ډېر شوي دي.

ښاغلی وفا وايي، همدا اوس په ۵۰ جریبه ځمکه کې ځمکني توتان کرل شوي دي چې بزګر ښه ګټه په‌کې کوي.

په کندهار کې د صبغت الله په نوم یوه بزګر ازادي راډيو ته وویل، له ۳ کلونو راهیسې یې ځمکني توتان کرلي دي چې په خبره یې د کال په ۴ فصلونو کې حاصل ورکوي او له دې درکه ښه عاید لري.

نوموړی وايي، په اوس وخت کې یو کیلو ځمکني توتان په ۲۰۰ افغانۍ خرڅېږي چې د کندهار ترڅنګ نورو ولایتونو ته هم د پلور لپاره وړل کېږي.

د یادونې ده چې ځمکني توتان په کندهار، ننګرهار، دایکندي، بلخ، هرات او پروان ولایتونو کې کرل کېږي.

ننګرهار: د نفرايټو د ۱۱ کانونو د استخراج چارې پيل شوي

د افغانستان په عمومي نقشه کې د ننګرهار ولايت موقعیت

د ننګرهار د کانونو ریاست وايي، په دې ولایت کې د نفرایټو د ۱۱ کانونو د استخراج چارې پیل شوې دي.

د ننګرهار د کانونو او صنایعو خونې رئیس تورملنګ شګیوال نن ازادي راډيو ته وویل، دا کانونه د کورنيو شرکتونو له لوري استخراجېږي.

ښاغلی شګیوال وايي، د کانونو د استخراج تړونونه له ۵۰۰ زره تر ۶ میلیونه افغانیو پورې شوې دي چې سلګونو کسانو ته په کې کاري فرصتونه هم پيدا شوي دي.

نوموړي زیاته کړه چې د ورځې له ۱ تر ۳ ټنو پورې د نفرایټو قیمتي کاڼي د ننګرهار له کانونو استخراجېږي.

ویل کېږي چې همدا اوس په پنځو ولایتونو ننګرهار، کونړ، پروان، میدان وردګو او کاپیسا کې د نفرایټو د قیمتي کاڼو د استخراج چارې روانې دي.

نور راوښيه

XS
SM
MD
LG