د لاسرسۍ وړ لېنکونه

تازه خبر
پنجشنبه ۱۶ چنګاښ ۱۴۰۱ کابل ۰۸:۵۰

افغانستان

سبا چهارشنبه د ملګرو ملتونو د امنیت شورا د افغانستان پر وضعیت غږیږي

د ملګرو ملتونو د امنیت شورا

ټاکل شوې چې د ملګرو ملتونو د امنیت شورا سبا چهارشنبې (د سلواغې ۶مه) د افغانستان د روان وضعیت په اړه غونډه وکړي.

د افغانستان لپاره د ملګرو ملتونو مرستندویه ماموریت یوناما نن په یوه خبرپاڼه کې ویلي چې دا غونډه به د افغانستان پر وخت د ماښام ۷نیمې بجې پیل شي. رسنۍ هم کولی شي چې دغه غونډه په ژوندۍ بڼه تعقیب کړي.

یوناما ویلي چې د ملګرو ملتونو سرمنشي انتونیو ګوترېش، د افغانستان لپاره د ملګرو ملتونو د سرمنشي ځانګړې استازې ډیبرا لاینز او د ناروې د بهرنیو چارو وزیره انیکین هویتفیلډ به هم د امنیت شورا دې غونډې ته معلومات وړاندې کړي.

ناروې چې د افغانستان په اړه د یکشنبې له ورځې راهیسې د درې ورځنۍ غونډې کوربه دی، په اوس وخت کې د ملګرو ملتونو د امنیت شورا دوره یي مشري په غاړه لري.

دې غونډې ته د طالبانو د حکومت یوپلاوی، د لویدیځو هېوادونو استازي او د ښځو په ګډون د افغاني ټولنې مختلف قشرونه وربلل شوي دي.

د ورځې تازه خبرونه دلته ولولئ

طالبان يوازې پارټېشن لرونکي پارکونه د خلکو پر مخ پرانيزي

کابل کې پارک شهر

د لوی اختر د رارسېدو په درشل کې، د طالبانو د امر بالمعرو وزارت وايي، په کومو پارکونو کې چې پارټيشن موجود وي، یعني د نارینه او ښځینه مراجعینو ځایونه سره بېل وي، دوی هر ورځ کولای شي د ښځینه او نارینوو پر مخ خپل پارکونه خلاص کړي.

د دغه وزارت ویاند محمد صادق عاکف مهاجر نن په کابل کې یوې خبري غونډې ته وویل، چې دوی په دې اړه تېره ورځ د تفریحي پارکونو له مسوولینو سره کتلي دي.

مخکې د دغه وزارت له خوا پارکونو ته د ښځو او نارینو ته تګ ورځې بیلې شوې وې.

دا په داسې حال کې ده، چې مخکې تر دې یو شمېر کورنیو ازادي راډیو ته ویلي وه، ښه به وي چې دغه وزارت په پارکونو کې د کورنۍ نارینه او ښځینه غړي سره ونه ویشي.

پر افغانستان د طالبانو تر واکمنېدو مخکې، په تفریحي پارکونو کې د کورنیو لپاره ورځې مشخصې وې، چې د کورنیو نارینه او ښځینه غړي یو ځای ورتللی شول.

روزګان: د دهراود ولسوالۍ پخوانی امنيه قوماندان وژل شوی

د ارزګان ولايت دهراود ولسوالۍ بازار

په روزګان کې د طالبانو د امنیه قوماندانۍ ویاند اغاولي قریشي نن ازادي راډيو ته تایید کړه چې د جمهوري نظام پر مهال د دهراوود امنیه قومندان شیراغا وژل شوی.

هغه ادعا وکړه چې دا قومندان بېګا ناوخته د خپلو شخصي دوښمنانو له خوا وژل شوی.

قریشي زیاتوي چې طالب ځواکونو د قومندان شيراغا د وژنې په تور دوه کسان نیولي هم دي.

شیر اغا د تېر نظام پر مهال د دهراوود ولسوالۍ د پخواني قوماندان شاه محمد شاه چې د طالبانو د تر ټولو سرسخته دوښمن ګڼل کېده کلونه مرستیال پاتې شوی و او د قوماندان شاه محمد شاه تر وژل کېدو وروسته امنیه قوماندان شو.

طالب ځواکونه له دې مخکې تورن شوي چې د غچ اخیستنې په پار یې سلګونه پخواني افغان ځواکونه وژلي او تري تم کړي.

سوداګريزو اسانتياو په موخه پاکستان سره انلاين غونډه وشوه

پاکستان سره د انلاين غونډې نځور

پاکستان سره د سوداګرۍ او ترانزیت په برخه کې د اسانتياو برابرولو انلاین غونډه وشوه.

د طالبانو د حکومت د سوداګرۍ او صنعت وزارت په خپل رسمي وېب پاڼه کې لیکلي، چې د دغه وزارت سرپرست وزېر نورالدین عزیزي او پاکستاني سیال یې سید نوید قمر په دې انلاین غونډه کې د سوداګرۍ او ترانزیت په برخه کې د اسانتیاوو رامنځته کولو او د راکړې، ورکړې د زیاتوالي خبرې کړې دي.

په خبر کې دا هم راغلي، چې د طالبانو د حکومت د سوداګرۍ او صنعت وزارت سرپرست وزیر او د پاکستان د سوداګرۍ وزیر په خپله دې انلاین غونډه کې د سوداګرۍ او ترانزیت په برخه کې په داسې سوداګریزو اړیکو ټېنګار وکړ، چې د دواړو هېوادونو ملي ګټې په‌کې خوندي وي.

د طالبانو د حکومت د سوداګرۍ او صنعت وزارت په وینا په دې انلاین غونډه کې د پاکستان حکومت ژمنه وکړه چې د کرنیزو محصولاتو د صادرولو په برخه کې خپل اقدامات ګړندي کوي، ترڅو کرنیز محصولات په خپل وخت سره مارکېټونو ته ولېږدول شي.

د يوناما مرستيال له ډاکټر عبدالله سره د افغانستان پر وضعيت خبرې کړي

د مصالحې عالي شورا پخوانی مشر ډاکټر عبدالله او د افغانستان لپاره د ملګرو ملتونو مرستيال مارکوس پوتزل

د افغانستان لپاره د ملګرو ملتونو د مرستندوی ماموریت، یوناما نوي مرستیال او سرپرست مارکوس پوتزل له یو شمېر طالب چارواکو سره پر لیدنو کتنو سربېره پرون د لومړي ځل لپاره د افغانستان د ملي مصالحې د عالي شورا له پخواني مشر عبدالله عبدالله سره هم وکتل.

یوناما په یوه ټویټ کې ویلي چې په دې کتنه کې دواړو لورو په دې اړه چې یوناما په څه ډول کولای شي د یوه ټولشموله ټولنې او حکومت لپاره د خبرو اترو اسانتیاوې رامنځ ته کړي خبرې کړي.

په دې کتنه کې دغه راز د ټولو افغانانو لپاره د د زده کړو د مساوي فرصتونو د یقیني کولو پر اهمیت هم خبرې وشوې.

یوناما په یوه بل ټویټ کې د طالبانو د ریس الوزرا له مرستیال مولوي عبدالکبیر سره د ښاغلي پوتزل د کتنې په اړه کښلي چې په دې کتنه کې له مدني ټولنې سره د ښکېلتیا او د ټولو خلکو د بشري حقونو د تامین پر اهیمت خبرې وشوې او دواړو لورو موافقه وکړه چې په راتلونکې کې به رغندو خبرو ته دوام ورکړي.

مارکوس پوتزل چې د یوناما د مرستیال په توګه یې دنده نوې پیل کړې، دغه راز له دې مخکې د طالبانو د حکومت د ریس الوزرا له مرستیال مولوي عبدالسلام حنفي او د بهرنیو چارو له سرپرست وزیر امیرخان متقي سره هم کتلي و.

د طالبانو حکومت له افغانستان څخه پر ازبکستان د توغندو بریدونه تایید کړل

ارشيف

د طالبانو د حکومت وياند ذبیح الله مجاهد تېره شپه پر خپله ټویټرپاڼه وکښل چې د افغانستان له خاورې «شریرو کړیو» د دوو هېوادونو ترمنځ د بې باورۍ د رامنځته کولو لپاره توغندي ویشتي دي.

تر دې مخکې د طالبانو د بلخ ولایت د امنیه قوماندانۍ وياند د افغانستان له خاورې پر ازبکستان توغندويي برید رد کړی و.

د ازبکستان د بهرنیو چارو وزارت ویلي و چې د افغانستان له لوري ویشتل شوي توغندي پر ترمذ سرحدي ښار لګېدلي خو مرګ ژوبله یې نه ده اړولې.

خو ذبیح الله مجاهد وايي چې د دوی حکومت به د دې برید عاملان ونیسي او سزا به ورکړي.

ده په دې اړه ازبکستان ته ډاډ ورکړی دی.

ازبکستان افغانستان سره د ترانزيتي همکارۍ د ډېرېدو ژمنه کړې

د ازبکستان بيرغ

ازبکستان ژمنه کړې چې له افغانستان سره ترانزیتي همکاري زیاته او د افغاني مالونو ګمرکي تعرفه کمه کړي.

د طالبانو تر کنټرول لاندې باختر خبري اژانس وايي، ازبکستاني چارواکو دا ژمنه د طالبانو د حکومت د سوداګرۍ او صنایعو وزارت پلاوي ته د تاشکند د سفر په لړ کې ورکړه.

دا په داسې حال کې ده چې ازبکستان د افغانستان له لوري پر ترمذ بندر د څو راکټونو پر لګېدو اندېښنه ښوولې ده.

د طالبانو د حکومت دفاع وزير دوحه کې د قطر له امير سره ليدلي

د طالبانو دفاع وزير ملا يعقوب مجاهد

د طالبانو د حکومت دفاع وزیر ملا یعقوب مجاهد پرون په دوحه کې د قطر له امیر تمیم بن حمد ال ثاني سره وکتل.

مجاهد د قطر د حکومت په بلنه دغه هېواد ته تللی دی.

د طالبانو د حکومت د وياند ذبیح الله مجاهد په وینا ملا یعقوب مجاهد د قطر له امیر سره د دوو هېوادونو پر دوستانه اړیکو او نورو مسلو خبرې وکړې.

قطر له ډېرو کلونو راهیسې د طالبانو د سیاسي دفتر کوربه دی.

د سېلابونو له امله پروان کې دوه تنه مړه شوي او لس تري تم شوي

ارشيف

په پروان کې د طالبانو د حکومت چارواکي وايي چې پرون ماسپښین د دغه ولایت د شیخ علي ولسوالۍ د جنګلک درې په (درواز دره) کې سېل جاري شو او له کبله یې دوه تنه مړه شول.

د شیخ علي ولسوال ذبیح الله ترابي ازادي رادیو ته ویلي چې سېل تر ۵۰۰ ډېر څاروي هم مړه کړي او کابو ۱۰۰ جریبه کرونده یې ویجاړه کړې ده.

د افغانستان د هوا پېژندنې ادارې د هېواد په یو شمېر ولایتونو کې د سخت ورښت او په نتیجه کې یې د سېلونو د راتلو وړاندوینه کړې وه.

يوناما په کابل کې د بهرنیو هېوادونو د ډيپلوماتيکو استازوليو د فعالیت هرکلى وکړ

په افغانستان کې د ملګرو ملتونو د مرستندویه ماموریت مرستیال او سرپرست مارکوس پوټزل

د طالبانو د حکومت د بهرنیو چارو وزارت وایي، د ملګرو ملتونو د مرستندویه ماموریت یوناما نوي مرستیال او سرپرست مارکوس پوټزل د بهرنیو چارو له سرپرست وزیر امیرخان متقي سره په کتنه کې ویلي، چې په افغانستان کې د بهرنیو هېوادونو د ډیپلوماتیکو استازولیو د فعالیت هرکلی کوي او غواړي چې نور هېوادونه هم په دې هېواد کې سفارتونه پرانېزي.

د بهرنیو چارو وزارت مرستیال ویاند حافظ احمد ضیا په یوه ټویټ کې ویلي، چې ښاغلي پوټزل په دې کتنه کې چې نن یې ترسره کړه، متقي ته د خپل ماموریت په اړه معلومات ورکړل او د ښه ماموریت د ترسره کولو په برخه کې یې د اسلامي امارت همکاري او همغږي لازم وبلل.

د احمد ضیا په وینا متقي هیله څرګنده کړې، چې د یوناما استازولۍ د افغانستان او نړۍ ترمنځ د مثبتو اړیکو او ګټور تعامل په برخو کې خپل رول ولوبوي.

يوناما د دغې کتنې په اړه تراوسه څه نه دي ویلي، خو ښاغلي پوټزل له دې کتنې مخکې په یوه ټویټ کې چې یوناما پر خپلې پاڼې کې خپور کړی، ویلي چې د افغانستان خلکو ته چې هېواد یې په معاصر تاریخ کې په یوه حساسه مرحله کې دی، کارکولو ته ژمن دی.

پوټزل چې له ۲۰۱۷ نه تر۲۰۲۱ کال پورې یې د افغانستان او پاکستان لپاره د جرمني د ځانګړي استازي په توګه دنده ترسره کړې، د روان کال د جون په اولسمه د ملګرو ملتونو عمومي منشي انټونیو ګوټیرش د افغانستان د سیاسي ماموریت لپاره د خپل نوي مرستیال په توګه وټاکه.

نوموړي په یوه ټویټ کې چې د یوناما پر پاڼه خپور شوى، افغانستان ته د رسېدو او د دندې د پیلېدو خبر ورکړی دی.

د افغانستان د بدن ښکلا او فیټنس ملي لپاره لوبغاړي غوره شول

ارشیف

له سلو ډېرو لوبغاړو د بدن ښکلا او فیټنس ملي لوبډلې غړیتوب ترلاسه کړ.

د افغانستان د بدني روزنې او ورزش ادارې پر خپله فېسبوک پاڼه لیکلي دي، چې د بدن ښکلا او فیټنس د غوراوي سیالۍ چې د چنګاښ په ۱۱مه نېټه پیل شوې وې، نن پای ته ورسېدې.

په دې سیالیو کې د ولایتونو ۱۸۰ او د کابل ۱۹۳ لوبغاړو برخه اخیستې وه.

د دې ادارې د معلوماتو پر بنسټ د دې لوبغاړو له ډلې ۱۱۰ لوبغاړي د ښکلا او فیټنس ملي لوبډلې ته غوره شول.

د مهاجرت نړيوال سازمان: د افغانستان زلزله ځپلو ته مو ډېرې مرستې رسولي

زلزله ځپلو سره مرستې

د مهاجرت نړیوال سازمان، IOM وایي چې په پکتیکا او خوست ولایتونو کې یې زلزله ځپلو ته ډیرې مرستې رسولي دي.

IOM په یوه ټویټ کې ویلي چې د زلزلې له پیله دوی په سیمه کې حضور لري او د امریکا، جاپان او جرمني په مرسته یې پکتیکا او خوست ولایتونو ته تراوسه په نژدې ۱۴۰ لاریو کې مرستې رسولي دي.

د دې ادارې په خبره، پر اړو پنځه زره کورنیو یې دېرش زره عاجلې خیمې او د غیر خوراکي موادو بستې ویشلې دي.

د دې ادارې په وینا په پکتیا او خوست ولایتونو کې وروستۍ زلزلې نژدې لس زره کورونه ویجاړ کړي یا زیانمن کړي دي.

جرمني له افغانستان سره د ۵۵ ميليون يورو مرسته وکړه

يورو

جرمني د افغانستان د بشري مرستو له صندوق سره د روان ۲۰۲۲ او د ۲۰۲۳ کلونو لپاره د نورو ۵۵ ملیون یورو مرسته وکړه.

د ملګرو ملتونو د بشري مرستو همغږه کونکې ادارې، اوچا پر خپله ټویټرپاڼه د جرمني د دې مرستو هر کلی کړی او ویلي یې دي چې جرمني په روان کال کې په افغانستان کې له اړو کسانو سره د ژوند ژغورنې د بېړنو مرستو لپاره د پنځوس ملیونه یورو مرسته کړې او هم یې د راتلونکي کال لپاره له دې صندوق سره د پنځه ميلیون یورو مرستې ژمنه کړې ده.

جرمني د بسپنې د دې صندوق دوهم لوی مرسته کونکی بلل شوی چې د مرستو اندازه یې له ۲۰۱۶ کال راهیسې ۱۵۲ ميلیون او شپږ سوه زره یورو ته رسیږي.

د يوناما نوی مرستيال: افغانستان لپاره کار کولو ته ژمن يم

د يوناما نښان

د افغانستان لپاره د ملګروملتونو د مرستندویه ماموریت، یوناما نوی مرستیال مارکوس پوتزل وایي، د افغانستان خلکو ته چې هېواد یې په معاصر تاریخ کې په یوه حساسه مرحله کې دی، کارکولو ته ژمن دی.

ښاغلي پوتزل چې له ۲۰۱۷ نه تر۲۰۲۱ کال پورې یې د افغانستان او پاکستان لپاره د جرمني د ځانګړي استازي په توګه دنده ترسره کړې، د روان کال د جون په اولسمه د ملګرو ملتونو عمومي منشي انتونیو ګوتیرش د افغانستان د سیاسي ماموریت لپاره د خپل نوي مرستیال په توګه وټاکه.

نوموړي په یوه ټویټ کې چې د یوناما پرپاڼه خپورشوی، افغانستان ته د رسېدو او د دندې د پیلېدو خبر ورکړی دی.

امريکا: د افغانستان د کنګل شوې درې نيم ميليارده ډالره شتمنۍ پر ازادېدو کار کوو

د امريکا بيرغ

د امریکا د بهرنیو چارو وزارت وایي، متحده ایالات پر دې مسلې چې په څه ډول د افغانستان کنګل شوې درې نیم ملیارډ ډالره شتمني د افغانستان خلکو ته ورسیږي نه طالبانوته، په بېړه کار کوي.

د دې وزارت ویاند نیډ پرایس چې پرون ناوخته یې په یوه خبري کنفرانس کې څرګندونې کولې وویل، طالبانو د افغانستان له خلکو سره په هره برخه کې کړې ژمنې نه‌دي پر ځای کړي.

هغه زیاته کړه چې متحده ایالات له خپلو متحدانو او شریکانو سره کار کوي او تل یې دا موضوع واضح کړې چې غواړي د افغان ښځو، نجونو او لږکیو حقونه خوندي شي.

د نیډ پرایس په وینا متحده ایالات به دغه راز له خپلو متحدانو سره په ګډه پر طالبانو فشارونو ته دوام ورکړي.

له کله چې طالبان پرافغانستان بیا واکمن شوي دي، د افغانستان په اکثرو ولایتونو کې له شپږم ټولګي پورته نجونې له ثانوي زده کړو منع کړې شوي او د سفرپه ګډون پر ښځو یو لړ محدودیتونه لګول شوي دي.

د خوست او فراه په ګمرکونو کې انالوګ تلې فعالې شوې

د انالوګ تلې د پرانيستلو انځور

د طالبانو حکومت د مالیې وزارت پر خپله وېبپاڼه لیکلي دي، چې د یادو تلو په فعالېدو سره سوداګرو، موټر چلونکو او د ګمرک کارکونکو ته د دې ترڅنګ چې د وزن د تللو چاره اسانه کېږي، ورسره د وزن معلولو او د عوایدو په ټولولو کې د فساد مخنیوی هم کېږي.

د مالیې وزارت د معلوماتو پر بنسټ د فراه د ابونصر فراهي ګمرک نوې فعاله شوې تله ۲۲ متره اوږوالی او ۱۰ لوډسېلونه لري او د خوست ګمرک تله ۱۸ متره اوږدوالی او ۸ لوډسېلونه لري چي هره تله د ۱۵۰ ټنه وزن د پورته کولو وړتیا لري.

د مالیې وزارت ویلي چي ډېر ژر به د نیمروز ګمرک او حیرتانو بندر کي هم د صادراتي توکو لپاره ورته تلې فعالې کړي.

نور راوښيه

XS
SM
MD
LG