د لاسرسۍ وړ لېنکونه

تازه خبر
شنبه ۵ کب ۱۴۰۲ کابل ۰۵:۲۳

نړۍ

په یمن کې د ۷۰ تنو وژنه؛ امریکا دلته د شخړو د کمېدو غوښتنه وکړه

د یمن هغه سیمه چې حوثیانو پرې برید کړی
د یمن هغه سیمه چې حوثیانو پرې برید کړی

د امریکا د متحد ایالاتونو د بهرنیو چارو وزیر د جمعې په ورځ د یمن د شخړو د کمېدو غوښتنه وکړه.

انتوني بلېنکن وروسته تردې دا خبره وکړه چې د سعودي په مشرۍ ایتلافي ځواکونو په یمن کې د حوثي یاغیانو د توقیف یو مرکز په نښه کړ.

د دې برید په ترڅ کې لږ تر لږه اویا تنه وژل شوي او په لسګونو نور ټپیان شوي دي.

انتوني بلېنکن په یوه بیان کې وویل، په جګړه کې زیاتوالی یوازې بشري بحران ژوروي او د یمن د خلکو کړاو پسې زیاتوي.

د سعودي په مشرۍ ایتلافي ځواکونه وایي، حوثیانو ملګروملتونو او د سره صلیب نړیوالې کمېټې ته مخکې راپور نه و ورکړی چې دا ځای دې له هوایي بریدونو خوندي وي.

په یمن کې د سره صلیب د نړیوالې کمېټې ویاند بشیر عمر وایي، ژغورونکي د یمن په شمال کې د صعده په ښار کې د توقیف په دې مرکز کې لا هم د ژوندي پاتې شوېو لټه کوي.

د ماشومانو د ژغورلو نړیوال سازمان ویلي دي چې په صعده کې د توقیف په دې مرکز کې کډوال ساتل کېدل.

تر دې هوایي برید څو ساعته مخکې د الحدیدة په ښار کې د مخابراتو یو مرکز په نښه شو چې یمن کې له دې حملې سره انټرنیټي خدمات ودرېدل او پلازمېنې صنعا ته څېرمه هم هوایي بریدونه وشول.

دا هوایي بریدونه درې ورځې وروسته تردې وشول چې ایراني پلوه حوثي یاغیانو د متحد عربي اماراتو په پلازمېنه ابوظبۍ کې د بې پيلوټه الوتکو او توغندیو برید وکړ چې یو شمېر کسانو ته یې مرګ ژوبله واړوله.

د ورځې تازه خبرونه دلته ولولئ

د لوېدیځ یو شمېر مشران کییف ته رسېدلي

د ایټالیا د حکومت د بیان له مخې د اروپایي کمېسیون مشره اورزلا ون دیر لین له پولنډ څخه په رېلګاډي کې کییف ته ولاړه.
د ایټالیا د حکومت د بیان له مخې د اروپایي کمېسیون مشره اورزلا ون دیر لین له پولنډ څخه په رېلګاډي کې کییف ته ولاړه.

د لوېدیځ یو شمېر مشران تېره شپه کییف ته ورسېدل.

د ایټالیا د حکومت د بیان له مخې د اروپایي کمېسیون مشره اورزلا ون دیر لین له پولنډ څخه په رېلګاډي کې کییف ته ولاړه چې له دې سره د ایټالیا صدراعظمه جورجیا ملوني، د کاناډا صدراعظم جستن ترودو او د بلجیم صدراعظم الکساندر دي کرو هم مله وو.

دا مشران غواړي چې پر اوکراین د روسیې د یرغل د دوهم کال د پوره کېدو په مناسبت خپله خواخوږي له اوکراین سره شریکه کړي.

په دې ترڅ کې د دې جګړې د دوهم کاله له پوره کېدو سره سم مسکو خپل پيغام په دې ډول استولی چې دفاع وزیر یې د اوکراین هغو سیمو ته تللی چې روسیي پوځیانو نیولي دي.

ټاکل شوې چې صدراعظمه ملوني به د ویډیو کنفرانس له لارې د نړۍ د اوو سترو صنعتي هېوادونو د ډیموکراسۍ مشرانو ته هم د ګډون بلنه ورکړي، دې غونډې ته به د اوکراین ولسمشر ولودمیر زیلینسکي وینا وکړي.

پر غزې د اسراییلو د بریدونو له کبله تر ۱۰۰ ډېر کسان وژل شوي

پر غزې د اسراییلو د بریدونو یو انځور
پر غزې د اسراییلو د بریدونو یو انځور

د راپور له مخې پر غزې د اسراییل د تېرې شپې د بریدونو په ترڅ کې تر سلو ډېر کسان وژل شوي دي.

فرانس پرېس اژانس د دې کسانو د مړینې خبر ورکړی، خو نور جزییات یې نه دي ورکړي.

دا تلفات په داسې وخت کې اوښتي چې د اسراییلو د استخباراتو رییس د اوربند او د اسراییلي برمته‌وو د خوشې کولو د مذاکراتو لپاره پاریس ته تللی دی.

د پاریس خبرې وروسته تر دې کېږي چې د اسراییل صدراعظم تر جګړې وروسته پلان په ډاګه کړ، پر دې پلان د امریکا متحد ایالتونو سخت انتقاد کړی دی.

حماس ډلې هم، چې د امریکا متحد ایالتونه او اروپایي ټولنه یې د ترهګرې ډلې په توګه پېژني، د نتنیاهو نوی پلان رد کړی دی.

په فلسطیني قلمرو او اسراییلو کې د سرغړونو په اړه د پراخو څېړنو غوښتنه شوې

په غزه کې د جګړې له کبله د ویجاړیو یو انځور
په غزه کې د جګړې له کبله د ویجاړیو یو انځور

د ملګروملتونو د بشری حقونو ادارې په فلسطیني قلمرو او اسراییلو کې له بشری حقونو د سرغړونو په اړه د پراخو څېړنو غوښتنه کړې.

د ملګرو ملتونو د بشري حقونو کمېشنر وولکر تورک پرون د فبروري ۲۳مه په یو بیان کې وویل، له سزا څخه خوندیتوب باید دوام ونه کړي او حساب کتاب باید وي.

هغه همداراز د اسراییل او حماس ترمنځ د جګړې د سمدستي پای ته رسېدو غوښتنه وکړه.

د غزې جګړه د تېرکال په اکټوبر میاشت کې وروسته له هغه پیل شوه چې د حماس سختدریځې ډلې پر اسراییلو برید وکړ، له ۱۲۰۰ زیات کسان یې ووژل او څه باندې ۲۴۰ نور یې برمته کړل.

حماس د امریکا او اروپايي ټولنې له خوا د یوې تروریستي ډلې په توګه پېژندل کېږي.

د غزې د روغتیا وزارت چې حماس یې اداره کوي ویلي چې په غزه کې د اسراییلي ځواکونو په حملو کې تراوسه نژدې ۳۰ زره فلسطینیان وژل شوي دي.

د ناوالني خښولو لپاره د هغه مور ته درې ساعته مهلت ورکړل شوی

الکسي ناوالني د فبروري په ۱۶مه د قدم وهلو په حال کې و چې ناڅاپه بېسده شو او له دې وروسته د هغه د مړینې خبر خپور شو.
الکسي ناوالني د فبروري په ۱۶مه د قدم وهلو په حال کې و چې ناڅاپه بېسده شو او له دې وروسته د هغه د مړینې خبر خپور شو.

د کریملین د سیاسي مخالفانو د مشر الکسي ناوالني ویانده کیرا یارمیش وايي، د دې هېواد د تحقیقاتو کمیټې د ناوالني مور ته مهلت ټاکلی و، چې د خپل زوی مړی په پټه خاورو ته وسپاري.

د ازادي راډیو روسي څانګه د مېرمن یارمیش له قوله خبر ورکوي چې دا وايي، د ناوالني مور ته پرون د فبروري ۲۳مه درې ساعته مهلت ورکړل شو چې دا شرط ومني که نه زوی به یې د شمالي قطب په نامعلوم ځای کې خښ شي.

مېرمن یارمیش زیاتوي چې د ناوالني مور لودمیلا ناوالنایا استدلال کاوه چې د زوی مړی یې باید له قانون سره سم دې ته ورکړل شي چې خاور ته یې وسپاري.

د دې اقدام نتیجه تراوسه نه ده معلومه شوې او خپلواکو سرچینو هم تراوسه په دې اړه څه نه دي ویلي.

د روسیې د محبسونو د ادارې چارواکو تېره اونۍ وویل، الکسي ناوالني د فبروري په ۱۶مه د قدم وهلو په حال کې و چې ناڅاپه بېسده شو او له دې وروسته د هغه د مړینې خبر خپور شو.

د نړۍ بېلابېلو هېوادونو او نړیوالو بنسټونو دا پېښه غندلې ده او د ناوالني په مرینه یې ولسمشر پوتین ګرم بللی دی.

اروپايي ټولنې د روسیې په وړاندې د بندیزونو درېیمه بسته اعلان کړه

د اروپايي ټولنې د مرکزي دفتر پر ودانۍ د دې ټولنې بیرغ
د اروپايي ټولنې د مرکزي دفتر پر ودانۍ د دې ټولنې بیرغ

اروپايي ټولنې پر اوکراین د روسیې د غیرموجه یرغل د دوو کلونو پوره کېدو په مناسبت د روسیې په وړاندې د بندیزونو درېیمه بسته اعلان کړه.

د اروپايي ټولنې د بهرني سیاست مشر جوزیپ بوریل، نن جمعه په یوه اعلامیه کې وویل چې دوی د روسیې د پوځي او دفاعي سکټور په وړاندې د مجازاتوونکو اقداماتو د سختولو په حال کې دي.

هغه زیاته کړې چې د روسیې جنګي ماشین ته د ګوزار ورکولو او له ځانه د اوکراین د مشروع دفاع لپاره په مبارزه کې یوموټي پاتې کېږي.

دغه تازه بندیزونه د روسیې دفاعي صنعت په نښه کوي او د ۱۰۶ کسانو او ۸۸ بنسټونو شتمني کنګل کوي او پر سفرونو یې بندیز لګېږي.

له دې سره د هغو اشخاصو او بنسټونو شمېر ۲۰۰۰ ته ورسېد چې د اروپايي ټولنې د ۲۷ غړو هېوادونو له خوا د اوکراین ځمکنۍ بشپړتیا، ملي حاکمیت او خپلواکۍ ته د زیان اړولو له کبله بندیزونه ورباندې لګول شوي دي.

د امریکا ولسمشر پر روسیې د څه باندې ۵۰۰ نورو بندیزونو بسته اعلان کړه

د امریکا د متحدو ایالتونو ولسمشر جو بایډن
د امریکا د متحدو ایالتونو ولسمشر جو بایډن

د امریکا د متحدو ایالتونو ولسمشر پر روسیې د څه باندې ۵۰۰ نورو بندیزونو بسته اعلان کړه چې علت یې په اوکراین کې د مسکو روانه جګړه او د کرملین د منتقد الکسي ناوالني مړینه وه.

جو بایډن په عین حال کې د امریکا په کانګرس کې له استازو جرګې غوښتنه وکړه چې د کییف لپاره د مالي مرستې غوښتل شوې بسته تصویب کړي.

د سپینې ماڼۍ په هغه اعلامیه کې چې نن خپره شوې جو بایډن ویلي، دغه بندیزونه به هغه اشخاص په نښه کړي چې د الکسي ناوالني له زنداني کولو سره ارتباط لري، دغه راز به د روسیې مالي سکټور، د دفاعي صنعتي بنسټ، د تدارکاتو شبکې او په څو لویو وچو کې له بندیزونو پت شوي کسان په نښه کوي.

دغه اعلامیه داسې وخت خپره شوې چې پر اوکراین د روسیې د غیرموجه یرغل سبا دوه کاله پوره کېږي.

بایډن په اعلامیه کې ویلي، دغه بندیزونه به دا تضمین کړي چې د روسیې ولسمشر ولادمیر پوتین د خپل بهرني تهاجم او په روسیه کې دننه د فشارونو له کبله نوره هم درنه بیه پرې کوي.

د اوکراین لپاره ۶۱ میلیارد ډالرو په ارزښت د مالي مرستې بسته د امریکا د مشرانو جرګې له خوا تصویب شوې، خو د جمهوریپالو تر ولکې لاندې استازو جرګه کې لا تصویب نه ده.

د یوه خصوصي شرکت فضايي وسیله د سپوږمۍ پر سطحه راښکته شوې

د انټیوټیف ماشینز په نامه خصوصي شرکت چې دغه فضايي وسیله یې جوړه او تنظیم کړې، وايي چې د دوی دا وسیله د سپوږمۍ پر سطحه په ناستې بریالۍ شوه.
د انټیوټیف ماشینز په نامه خصوصي شرکت چې دغه فضايي وسیله یې جوړه او تنظیم کړې، وايي چې د دوی دا وسیله د سپوږمۍ پر سطحه په ناستې بریالۍ شوه.

د یوه خصوصي شرکت فضايي وسیله پرون پنجشنبه د سپوږمۍ پر سطحه راښکته شوه چې دا په تېرو ۵۰ کلونو کې د امریکا د متحدو ایالتونو د یوه خصوصي شرکت بله مهمه تجربه ګڼل کېږي.

له دې وسیلې سره تماس ډېر کمزوری و، خو بلاخره د الوتنې کنټرولوونکي وتوانېدل چې بېرته سم تماس ورسره ټینګ کړي.

د انټیوټیف ماشینز په نامه خصوصي شرکت چې دغه فضايي وسیله یې جوړه او تنظیم کړې، وايي چې د دوی دا وسیله د سپوږمۍ پر سطحه په ناستې بریالۍ شوه.

دغه شرکت نور تفصیلات نه دي ورکړي چې دغه وسیله د سپوږمۍ پر کومه برخه کېناسته او ایا د سپوږمۍ لوېدیځ قطب ته څېرمه پر ټاکل شوي هدف کېناسته که‌نه.

دغې وسیلې خپل دغه سفر چې درې لکه او ۸۴زره کیلومتره و، د فبروري پر ۱۵مه پیل کړی و.

د امریکا د فضايي تحقیقاتو اداره توانېدلې وه، په ۱۹۷۲م کال کې د اپولو ۱۷ ماموریت په مرسته د سپوږمۍ پر فضا خپله وسیله کېنوي چې ستورمزلي هم په کې وو.

سټولټنبرګ: د ناټو متحدانو کییف ته د پرمختللو وسلو د ورکولو لپاره دریځونه د پام وړ بدل کړي

د ناټو سرمنشي ینس سټولټنبرګ
د ناټو سرمنشي ینس سټولټنبرګ

د ناټو سرمنشي ینس سټولټنبرګ وايي چې د ناټو متحدان ژمن دي څو ډاډ ترلاسه کړي چې اوکراین د روسي ځوکونو د تهاجم پر وړاندې بریا ترلاسه کوي.

سټولټنبرګ له ازادي راډیو سره په مرکه کې وویل، د ناټو متحدانو کییف ته د پرمختللو وسلو د ورکولو لپاره خپل دریځونه د پام وړ بدل کړي دي.

د ناټو سرمنشي پر اوکراین د روسیې د غیرموجه یرغل د دوو کلونو د پوره کېدو په مناسبت ویلي: "له اوکراین سره پیوستون نه یوازې سم کار دی، بلکې زموږ د امنیت په ګټه هم دی."

هغه ویلي چې تمه لري چې د ناټو متحدان د اوکراین د امن د تضمین لپاره لا نور اقدامات وکړي.

روسیې پر اوکراین خپل غیرموجه یرغل د ۲۰۲۲م کال د فبروري میاشتې پر ۲۴مه پیل کړ چې سبا یې دوه کاله پوره کېږي.

مکرون د اوکراین په اړه د ځینو اروپايي مشرانو د غونډې کوربه‌توب کوي

د فرانسې ولسمشر امانویل مکرون
د فرانسې ولسمشر امانویل مکرون

د فرانسې ولسمشر امانویل مکرون به راروانه دوشنبه د اوکراین په باب، د ځینو اروپايي مشرانو او حکومتي استازو د یوې غونډې کوربه وي.

الیزه ماڼۍ پرون پنجشنبه ناوخته ویلي چې پر اوکراین د روسیې د غیرموجه یرغل د دوو کلونو پوره کېدو په مناسبت به دغه کاري غونډه یو فرصت وي چې د اوکراین د ملاتړ لپاره د شریکانو ترمنځ همکاري پیاوړې شي.

روسیې د ۲۰۲۲م کال د فبروري میاشتې پر ۲۴مه پر اوکراین خپل غیرموجه یرغل پیل کړ چې لا هم دوام لري او سبا شنبه یې دوه کاله پوره کېږي.

زیلینسکي ​​​​​​​د امریکا له کانګرسه د ۶۰ میلیارد ډالرو د مرستې بسته غوښتې

د اوکراین ولسمشر ولودمیر زیلینسکي
د اوکراین ولسمشر ولودمیر زیلینسکي

د اوکراین ولسمشر ولودمیر زیلینسکي د امریکا د متحدو ایالتونو له کانګرس غوښتنه وکړه چې د کییف لپاره د ۶۰ میلیارد ډالرو په ارزښت د مرستو بسته تصویب کړي.

زلینسکي ویلي، دا مالي مرسته به له اوکراین سره د روسي ځواکونو د یرغل په وړاندې په دفاع کې مرسته وکړي.

ده په وینا، دا به د روسیې د بریا د عواقبو په نسبت یو کم بیه بدیل وي.

د اوکراین ولسمشر د امریکا له فاکس نیوز تلوېزیون سره په هغه مرکه کې چې پرون خپره شوه خبرداری ورکړ، که د روسیې ولسمشر ولادمیر پوتین اوکراین تسخیر کړي، د ختیځې اروپا پر لوري به نور هم مخکې لاړ شي.

هغه ویلي، که کانګرس غواړي چې ډېر عملي سوچ وکړي، هغه بیه چې اوس ترې غوښتل کېږي تر دې کمه ده چې روسیه د ناټو د غړو هېوادونو پر لوري مخکې لاړه شي.

ولودمیر زیلینسکي پر اوکراین د روسیې د غیرموجه یرغل د دوو کلونو پوره کېدو په مناسبت دغه څرګندونې کړې دي.

پر اوکراین د دې یرغل سبا د فبروري میاشتې پر ۲۴مه دوه کاله پوره کېږي.

نور راوښيه

XS
SM
MD
LG