پنټاګون هغه ویډیو له محرمیت څخه ایستلې او خپره کړې چې د کابل هوایي ډګر ته څېرمه پر یوه کور د امریکا د بې پیلوټه الوتکې د برید څرنګوالي ښکاره کوي.

په دې برید کې چې له افغانستانه د امریکایي ځواکونو د وتلو په وروستیو ساعتونو کې وشو، لس ملکي وګړي ووژل شول.

نیویارک ټایمز ورځپاڼې د دغې ویډیو یوه کاپي د امریکا د مرکزي قواوو د قوماندانۍ پر وړاندې د حقوقي دعوا د معلوماتو د ازادي د یوه قانون له مخې ترلاسه کړې او هغه یې په خپله وېب پاڼه کې ایښي.

دا لومړی ځل دی چې د دغه برید په اړه چې د اګسټ په ۲۹ وشو، ویډیویي تصاویر خپریږي. پنټاګون چې په لومړي سر کې یې د دغه برید دفاع کوله وروسته یې هغه یوه تراژیکه تېروتنه وبلله.

د اسوشیټېډ پرېس اژانس د راپور له مخې دغه ۲۵ دقیقه یي ویډیو کې دوه MQ-9 ریپر ډرون الوتکې، له برید مخکې، د برید په حال کې او له هغه وروسته د برید د ځای صحنې ښکاري. په دې کې ښکاري چې توغندي د یوه کور په حویلي کې پر یوه موټر لګیږي. په تصاویرو کې د حملې ځای ته نژدې یو شمېر کسان هم ښکاري چې ګرځي راګرځي.

د امریکا پوځ ویلي و چې حمله یې په هغه سخت دریځي کړې وه چې دوی ګومان کاوه په افغانستان کې به د اسلامي دولت ډلې یا داعش پورې تړلی وي او ممکن د کابل هوایي ډګر ته نژدې چې ورڅخه د خلکو د ایستلو بهیر لا روان و، بم چاودنه وکړي.

تر دغه برید درې ورځې مخکې په دې هوایي دګر کې په یوه انتحاري حمله کې چې مسولیت یې د اسلامي دولت ډلې یا داعش اخیستی و، ۱۳ امریکایي سرتیري او له ۱۶۰ زیات افغانان ووژل شول.

د امریکا د مرکزي قواوو قوماندانۍ وروسته ومنله چې پر هغه ډریور یې چې د بې پیلوټه الوتکې برید کړی هغه د اسلامي دولت ډلې یا داعش سره اړیکه نه ده درلوده بلکې د زمري احمدي په نوم له یوې امریکایي موسسې سره یې کار کاوه.

د خبریالانو د ملاتړ کمیټې په کابل کې له قید او شرط پرته د دوو نیول شویو خبریالانو د سمدستي خوشي کیدو غوښتنه کړې ده.

دې کمېټې د سې شنبې په ورځ وویل چې رسنۍ باید له مداخلو پرته فعالیت وکړي.

د طالبانو د اطلاعات او کلتور وزارت د سې شنبې په ورځ په خپله ایکسپاڼه کې د عمران دانش او منصور نیازي د نیولو خبر تایید کړ. د طلوع نیوز دا دوه خبریالان څو ورځې مخکې په کابل کې د طالبانو د امنیتي ادارو له خوا نیول شوي وو.

د طالبانو د اطلاعات او کلتور وزارت ویاند خبیب غفران په یوه اعلامیه کې ویلي چې د دې خبریالانو قضیه تر څېړنې لاندې ده او محکمې تر اوسه په دې اړه پریکړه نه ده کړې. خبیب غفران د دې خبریالانو د نیولو دلیل نه دی روښانه کړی.

د افغانستان د رسنیو د ملاتړ سازمان هم د دې خبریالانو د نیولو په تړاو اندیښنه څرګنده کړې ده او ویلي یې دي چې د دوی ترڅنګ شپږ نور خبریالان هم د طالبانو په بند کې دي.

افغانستان د بې پولي خبریالانو د نړیوالو رسنیو د ازادۍ په شاخص کې د یو سل او اتیا هیوادونو په ډله کې دا اخر له خوا پنځم ځای لري.

ټاکل شوې ده چې چهارشنبه( د مې ۱۳ مه) د افغانستان د فوټبال له شل کلونو کم عمره ملي لوبډله د ازبکستان له سیالې لوبډلې سره مسابقه وکړي.

دا لوبه د دوه زره شپږ ویشتم کال د مرکزي اسیا( کافا) سیالیو په لړ کې د افغانستان دوهمه لوبه ده. افغان لوبډلې لومړۍ یوه د سې شنبې په ورځ له ترکمنستان څخه درې د یوه په وړاندې ماتې وخوړه.

د کافا سیالۍ د تاجیکستان په کوربتوب ‌ د مې له ۱۲مې تر ۱۷مې ترسره کېږي چې د افغانستان، ترکمنستان، تاجیکستان، اوزبېکستان او قرغزستان لوبډلو پکې ګډون کړی دی.

ذکیې خدادادي د اروپا د پارا تکواندو په سیالیو کې د اتلولۍ مقام خپل کړ.

خدادادي چې له اصله د افغانستان ده په دې سیالیو کې د فرانسې په استازیتوب لوبه وکړه. دې د دوشنبې په ورځ په اروپایي سیالیو کې د ایتالیا، جورجیا او ترکیې لوبغاړي مات کړل او د سرو زرو میډال یې د اووه څلویښت کیلوګرامه وزن په کټګوري کې ترلاسه کړ.

د ۲۰۲۶ کال د پارا تکواندو سیالۍ د دوشنبې په ورځ د جرمني په مونیخ کې پيل شوې دي چې د پنجشنبې په ورځ پای ته رسي.

ذکیې خدادادي تر دې مخکې په ۲۰۲۳ کال کې هم د سرو زرو میډال ګټلی و.

د طالبانو حکومت د پاکستان هغه ادعا رد کړه چې ګواکې د خیبرپښتونخوا د بنو وروستی خونړی برید افغانستان کې پلان شوی و.

د طالبانو د حکومت ویاند ذبیح الله مجاهد نن سه شنبه ( د ثور۲۲مه) پر خپله ایکس پاڼه د پاکستان دغه ادعا بې بنسټه بللې.

د بنو په موټربم او ډله‌ییز برید کې چې د تېرې شنبې په ماښام وشو، لږ تر لږه ۱۵ پولیس ووژل شول او مسولیت یې د اتحاد المجاهدین په نوم وسله والې ډلې ومانه.

پاکستان د دغه برید په غبرګون کې د دوشنبې په ورځ په اسلام اباد کې د طالبانو د حکومت چارسمبالی سفیر احضار او خپل اعتراض یې وروسپاره.

د طالبانو د حکومت له بیاواکمنۍ راهیسې پاکستان تل تورپورې کوي چې هلته ترهګریز بریدونه د افغانستان له خاورې پلانېږي، خو طالب چارواکي دا تورونه ردوي او د پاکستان ناامنۍ د هغه هېواد کورنۍ مسله بولي.

د طالبانو د حکومت د بهرنیو چارو وزیر امیر خان متقي په کابل کې د چین له ځانګړي استازي یو شیاویونګ سره په کتنه کې د دواړو هیوادونو ترمنځ د اړیکو د لا پراختیا پرموضوعاتو خبرې وکړې.

د بهرنیو چارو وزارت ویاند عبدالقهاربلخي د دوشنبې په ورځ پرخپله ایکسپاڼه په یوه بیان کې ویلي چې په دې کتنه کې د دوه‌ اړخیزو اړیکو د لا پیاوړتیا، سیمه‌ ییز امنیت، او د ارومچي خبرو اترو د بهیر د پرمختګ په اړه هر اړخیزې خبرې وشوې.

د بیان له مخې د چین ځانګړي استازي د ارومچي د خبرو اترو د بهیر پر دوام او اغېزمنتیا ټینګار وکړ او دا یې د سیمه ‌ییز ثبات او همغږۍ لپاره یو مهم چوکاټ وباله. ښاغلي متقي بیا ټینګاروکړچې سیمه ‌ییز ثبات، توازن، اقتصادي همکاري او د متقابل درناوي پر بنسټ اړیکې د افغانستان د بهرني سیاست اساسي ستنې جوړوي.

د چین په کوربه توب د ارومچي د خبرو د بهیر وروستۍ غونډه د تیرې اپریل میاشتې په لومړۍ اونۍ کې ترسره شوه چې د طالبانواو پاکستان چارواکو پکې ګډون کړی وو.

هغه مهال دواړو لورو د اورمچي خبرې چې د طالبانو او پاکستاني لوري د کړکیچ د هواري لپاره پلان شوې وې، ګټورې وبللې، خو کومه هوکړه په کې ونه شوه.

افغانستان ته د کډوالو د بېرته ستنولو پر موضوع د بحث لپاره، اروپايي کمېسیون پلان لري چې په نږدې راتلونکي کې د طالبانو چارواکي بروکسل ته د تخنیکي خبرو لپاره ور وبولي. د راپورونو له مخې، کابل ته به ډېر ژر یو رسمي لیک واستول شي څو د دې غونډې نېټه وټاکل شي.

دا ګام په داسې حال کې اخیستل کېږي چې شاوخوا ۲۰ اروپايي هېوادونه د افغان کډوالو، په ځانګړي ډول هغوی چې په اروپایي هیوادونو کې یې جرمونه ترسره کړي، د بېرته ستنولو لارې چارې ارزوي. بلخوا، د بشري حقونو سازمانونو خبرداری ورکړی چې افغانستان کې روان بشري بحران ته په کتو، د کډوالو جبري ستنول ښايي جدي بشري ستونزې رامنځته کړي.

د بښنې نړیوال سازمان د طالبانو له حکومت د دریو افغان خبریالانو د سملاسي خوشي کیدو غوښتنه کوي.

دیاد سازمان د جنوبي اسیا څانګه ددغو خبریالانو د نیول کیدو په اړه اندیښنه څرګندوي او وايي چې د طالبانو حکومت باید د منصور نیازي ، عمران دانش او جاوید نیازي د ساتنې ځای او برخلیک څرګند او هغوی خوشې کړي.

اعلامیه وايي دغه کسان د خبریالانو د ویرولو او غچ اخیستنې دلړۍ په دوام کې نیول شوي او زیاتوي چې اجباري لادرکه کول ددوی د امنیت او د شکنجې د خطر په هکله جدي اندیښنې را مینځ ته کوي.

د طلوع نیوز خصوصي شبکې دیکشنبې په ورځ تایید کړه خبریالان یې ،منصور نیازی او عمران دانش د طالبانو د حکومت لخوا کابل کې نیول شوي دي.

ښاغلی جاوید نیازی د پیګرد په نامه دیو محلي خبري اژانس مسئول مدیر دی.

د طالبانو حکومت تراوسه په دې هکله څه نه دي ویلي خو مخکې یې ویلي چې "د اسلامي شریعت او ملي ګټو په چوکاټ" کې د بیان ازادي ته ژمن دي.

د افغانستان د پاور لیفټنګ فدراسیون بلاروس کې د ۲۰۲۶ کال نړیوالو سیالیو کې شپږ مډالونه ګټلي دي.

په دغو سیالیو کې د لسو هیوادونو ورزشکارانو برخه واخیسته او د افغانستان د ملي ټیم غړو وکولای شول چې ۴ د سرو زرو ۱ د سپینو زو او۱ د برونزو مډال وګټي.

نوراحمد سخی زاده ، میرویس رفیع زاده ، فواد شیرین سخن او جابر شیرین سخن هریو د سرو زرو مډال وګاټه.

دو نورو لوبغاړو، روح الله خیراندیش د سپینو زرو او حمید الله کریمي د برونزو مډالونه وګټل.

دغه سیالي چې د مې میاشتې په ۶ مه پيل شوې وې د افغانستان لخوا ۶ لوبغاړو او یو روزونکي په کې برخه واخیستله.

پاور لیفټنګ د زور ازمیلو یوه سیالي ده چې ورزشکار هڅه کوي ترټولو دروند ممکن وزن په دریو حرکتونو کې له ناستې تر ولاړیدو او په سینه ایښودو اوچت او ځای پرځای کړي.

په کابل کې د جاپان سفارت د ۲۰۲۷ میلادي کال د تحصیلي بورسونو اعلان کړی دی.

د سفارت په اعلامیه کې چې دوشنبې د می په یولسمه پرخپله ایکسپاڼه کې یې خپره کړې ویل شوي چې د پوهنې، فرهنګ، ورزش او د تکنالوژۍ علومو وزارتونو له لوري په رسمي او غیررسمي توګه هغو افغان محصلانو ته بورسونه برابریږي چې غواړي د جاپان په پوهنتونونو کې د لوړو زده‌ کړو په پروګرامونو کې څیړنیزو زده کړو ته دوام ورکړي.

په اعلامیه کې راغلي چې د جاپان سفارت او د جاپان حکومت په خپلواکه توګه د غوښتنلیکونو د ارزونې او د نوماندانو د غوره کولو د ټولو پړاوونو مسؤلیت لري.

همداراز ویل شوي چې د افغانستان د آغا خان بنسټ به د غوښتنلیکونو په راټولولو او د لیکلي ازموینو د بهیر په اسانتیا کې له سفارت سره مرسته وکړي، خو د نوماندانو د غوره کولو په برخه کې به هېڅ مسؤلیت ونه لري.

اعلامیه زیاتوي چې دغه بورسونه وړیا دي او ټول لګښتونه یې د جاپان له خوا تمویلېږي.

جاپان افغان ښځینه او نارینه محصلینوته د بورسونو دا لړۍ داسې مهال اعلانوي چې پرافغانستان د طالبانو له واکمنیدو راهیسې په دې هیواد کې نجونې له شپږم ټولګي پورته ښوونځیو او پوهنتونونو ته له تلو راګرځول شوې دي.

په جلاوطنۍ کې د افغانستان د کرکټ ښځینه ټیم غړې د کرکټ له نړیوالې شورا ICC غواړي چې ورته اجازه ورکړي چې د افغانستان په استازیتوب نړیوالو لوبو کې ګډون وکړي.

د دې ټیم غړې شفیقه خان چې اوس د اسټرالیا په کانبیرا کې اوسي اې بي سي نیوز ته ویلي چې ICC دې د فوټبال د نړیوال فدراسیون، فیفا په څیرچې له هیواده بهر د افغانستان د فوټبال ښځینه ټیم ته یې اجازه ورکړې، د دوی د کرکټ ټیم ته هم اجازه ورکړي چې په نړیوالو لوبو کې د افغانستان په استازیتوب ولوبیږي. هغې ویلي، د فیفا پریکړې ډیرو افغان ښځو ته له دې پرته چې دوی چیرې ژوند کوي، ډیرې هیلې ورکړي چې کولای شي د خپل هیواد استازیتوب وکړي او هغه څه تعقیب کړي چې ورسره علاقه لري.

تېر کال د کرکټ نړیوالې شورا اعلان وکړ چې له افغانستانه بهرد افغان ښځینه کرکټ لوبډلې د ملاتړ لپاره به یو مالي صندوق او ځانګړې کاري ډله جوړه کړي. د راپور له مخې پرافغانستان د طالبانو له واکمنیدو راهیسې چې ښځې یې په ټولنه کې د ځینو نورو برخو ترڅنګ له ورزش څخه هم منع کړي، په نړیوالو لوبو کې د دې هیواد د کرکټ د ملي لوبډلې د دوامداره لوبیدا سره دا بحث راپورته شوی چې د دې شورا مقررات ایجابوی چې هرغړی هیواد باید د ښځو ملي لوبډله هم ولري.