افغانستان
د قطر او ترکیې ګډ پلاوی د ۵ هوایي ډګرونو په اړه طالبانو سره غږیږي
د قطر او ترکیې یو ګډ پلاوی په کابل کې دی او د افغانستان د پنځو هوایي ډګرونو د تخنیکي کنټرول او مدیریت په اړه له طالبانو سره خبرې کوي.
د طالبانو د ټرانسپورټ او هوایي چلند وزارت وایي چې دا پلاوی پرون پنجشنبه کابل ته را رسېدلی دی.
د دغه وزارت ویاند امام الدین احمدي ازادي راډیو ته وویل، هیلې شته چې دا خبرې پایله ورکړي او دواړه لوري هوکړو ته سره ورسېږي: "زموږ د ټرانسپورټ او هوایي چلند وزارت له تخنیکي ټیم سره به خبرې کوي. خبرې به د میدانونو، هوایي حریم، ګرونډ هنډلینګ او یو شمېر نورو تخنیکي مسایلو د قراردادونو په اړه وي، امید شته چې مثبتې نتیجې ته به سره ورسیږو."
له دې وړاندې د ترکیې دولتي اژانس انادولو راپور ورکړی و چې د دوی او قطر ګډ پلاوی د هوایي ډګرونو په اړه له یوې وړاندیز شوې طرحې سره کابل ته ځي.
په افغانستان کې د طالبانو له واکمنۍ وروسته د کابل، هرات، کندهار او مزار شریف د هوایي ډګرونو فعالیتونه ټکني شوي او له افغانستان سره نړیوالې سوداګریزې الوتنې هم پخواني حالت ته نه دي راغلي.
د ورځې تازه خبرونه دلته ولولئ
د طالبانو حکومت د يوشمېر داعش وسلهوالو د نيول کېدو خبر ورکړی
د طالبانو حکومت وايي، د یوه تاجکستاني تبعه په شمول یې د داعش ډلې یوشمېر وسلهوال بریدګر نیولي دي.
د طالبانو ویاند ذبیحالله مجاهد نن دوشنبه په یوه بیان کې چې پر خپله ایکسپاڼه یې خپور کړی ویلي، دغو کسانو د فرامینو د تعقیب او نظارت د ریاست یا پخوانۍ لویې څارنوالۍ پر کارکوونکو په برید کې لاس درلود.
په هغه برید کې چې د سنبلې په ۱۲مه شوی وو د طالبانو په خبره ۶ کسان وژل شوي وو او ۱۳ نور ټپیان وو.
خو د افغانستان د څارنوالانو فدراسیون ویلي وو، په هغه برید کې لږ تر لږه ۱۶ افغان څارنوالان وژل شوي وو.
مجاهد زیاته کړې چې نیول شویو کسانو په کابل او یوشمېر نورو سیمو له هغې ډلې په بامیانو کې پر بهرنیو سېلانیانو په برید کې هم لاس درلود.
د طالبانو د حکومت ویاند ذبیحالله مجاهد همداراز ادعا کړې چې د داعش خراسان ولایت وسلهوال د ځینو استخباراتي سازمانونو په مرسته بلوچستان او خیبرپښتونخوا ته انتقال شوي.
هغه دا ادعا کړې چې داعش اوس هلته روزنیز کمپونه لري او له هغه ځایه پر افغانستان او ځینو نورو هېوادونو بریدونه کوي.
د طالبانو له لوري د لسو کلونو په بند د دوه خبريالانو محکومېدو اندېښنې پارولي
د افغانستان د خبریالانو ملاتړ ادارې د طالبانو لهخوا په لسو کلونو بند د دوو خبریالانو د محکومولو په پرېکړې اندېښنه ښوولې.
دغه سازمان پرون په خپله وېبپاڼه په یوه اعلامیه کې ویلي چې، محمد عارف هجران او احمد کامران په نوم دوه خبریالان د چنګاښ په ۲۶مه د کابل په خیرخانه سیمه کې تر نېول کېدو وروسته سملاسي د طالبانو په پوځي محکمه کې محاکمه شول.
د افغانستان د خبریالانو د ملاتړ مرکز ادعا کوي چې هجران او همکار یې لومړی د عاشورا د مراسمو د راپور ورکولو او عکسونو اخیستو او بیا په کابل او ګاونډیو ولایتونو کې د ټولنیزو او امنیتي وضعیت په اړه د راپور ورکولو په تور په اوږد بند محکوم شوي.
طالب چارواکو د دغو ادعاوو په اړه څه نهدي ویلي.
د افغانستان د خبریالانو د ملاتړ مرکز د دغو دوو خبریالانو اوږدمهاله بند محکوم کړی او پر نړیوالو سازمانونو یې غږ وکړ، چې د هغوی د خوشې کولو لپاره پر طالبانو فشار راوړي.
هند کې دوه افغانان د نشهيي توکو د قاچاق په تور نيول شوي دي
هندي پولیسو دوه افغانان د نشهيي توکو د قاچاق په تور په نوې ډیلي کې نیولي دي.
د ډیلي پولیسو په خپله ایکسپاڼه لیکلي چې، له دغو دوو افغانانو څخه ۴۰۰ ګرامه هیروین او ۱۶۰ ګرامه کوکاین ترلاسه شوي دي.
د ډهلي پولیسو د دغو دوو افغانانو د هویت په اړه نور جزیات نهدي ورکړي، خو د NDTV په ګډون ځینو هندي رسنیو د هندي پولیسو له خولې ویلي چې، دا دوه نیول شوي کسان محمد وارث هاشمي او عبدالنایب نومیږي.
هندي رسنیو راپور ورکړی چې دغه دوه افغانان په ۲۰۲۰ کال کې هند ته تللي وو او هلته یې د کډوالو په توګه ژوند کاوه.
د ايران پولهساتو د ورېښمو پله سره نژدې يو افغان په ډزو وژلی
د افغانستان یو اوسېدونکی ایراني پولهساتو په ډزو سره وژل شوی دی.
پېښه په نیمروز کې د ورېښمو پله سره نژدې شوې.
د نیمروز د امنیه قومندانۍ ویاند ګل محمد قدرت د یکشنبې په شپه ازادي راډیو ته وویل، دغه افغان غوښتل په ناقانونه توګه ایران ته واوړي چې ایراني پولهساتونکو ویشتی دی.
پرون ځینو کورنیو رسنیو راپور ورکړ چې، لهدې پېښې وروسته د افغانستان-ایران لار په ورېښمو پله کې تړل شوې ده.
د نیمروز د ورېښمو سرحدي سیمه کې د طالبانو کمیسار مولوي حنظله ازادي راډیو ته وویل، پوله د څو محدودو ساعتونو لپاره د تخنیکي ستونزې په خاطر تړلې وه او وروسته بېرته د ترانزیت پر مخ خلاصه شوه.
ډبليوايفپي: افغانستان کې د بېوزلۍ له امله هره درېيمه نجلۍ له لومړنيو زدهکړو بېبرخې ده
د خوړو نړیوال پروګرام وايي، په افغانستان کې د بېوزلۍ د زیاتېدو له کبله په هرو درو نجونو کې یوې لومړنۍ زدهکړې نهدي بشپړې کړي.
د خوړو نړیوال پروګرام یا ډبلیوایفپي دا خبره نن (یکشنبې) پر خپله ایکسپاڼه یا پخواني ټویټر لیکلې ده.
د دغه پروګرام د معلوماتو پر اساس، له یوې خوا طالبانو له شپږم ټولګي پورته د نجونو پر زدهکړو بندیز لګولی او له بلې خوا د بېوزلۍ له کبله ډېرې نجونې لومړنۍ زدهکړې نه بشپړوي.
د خوړو نړیوال پروګرام زیاتوي، د دوی له لوري په ښوونځیو کې ماشومانو ته د ناشتې برابرول مرسته کوي چې زدهکوونکې ښوونځیو ته لاړې شي.
دې پروګرام په عین حال کې د بوديجې له کموالي شکایت کړی او ویلي یې دي چې، لهدې کبله ۱۱ میلیونو اړو کسانو ته بېړنۍ مرستې نهشي برابرولی.
تېره ورځ افغانستان ته ۱۹۵ کورنۍ له ايران او پاکستان بېرته ستنې شو
د طالبانو د کډوالو او بېرته راستنېدونکو چارو وزارت وايي، د شنبې په ورځ له ایران او پاکستانه ۱۹۵ کورنۍ هېواد ته ورستنې شوې دي.
د طالبانو تر کنټرول لاندې باختر اژانس نن د طالبانو د کډوالو او بېرته راستنېدونکو چارو وزارت د خبرپاڼې پر اساس ویلي چې، ۲۴ کورنۍ د تورخم، ۱۷ کورنۍ د سپین بولدک، ۴۶ کورنۍ د نیمروز ولایت د ورېښمو پله او ۱۰۸ کورنۍ د اسلام کلا له لارو هېواد ته بېرته رارغلي دي.
ایران او پاکستان د هغو افغانانو ایستلو ته زور ورکړی چې، دوی یې غیرقانوني یا بېاسناده کډوال بولي.
د ترکيې پوليسو د لس افغان کډوالو د نيولو خبر ورکړی
د ترکیې پولیس وايي، د خپل هیواد په ساکریا ښار کې یې پرون شنبې په یوه لارۍ کې ۱۰ تنه غیرقانوني افغان کډوال نیولي دي.
د ترکیې رسنیو نن یکشنبې د پولیسو په قول وویل، دا کډوال په "غیرقانونه ډول" ترکیې ته داخل شوي او غوښتل یې چې له وان ښار څخه استانبول ته لاړ شي.
د ساکریا پولیسو اعلان وکړ چې دوی د معلوماتو له ترلاسه کولو وروسته د ښار په هندک سیمه کې عملیات وکړل او لږترلږه ۱۰ افغان کډوال یې پېژندلي، چې په غیرقانوني توګه په لارۍ کې ترکیې ته ورغلي وو.
د پولیسو د راپور لهمخې، پهدې عملیاتو کې درې کسان د انساني قاچاق په تور نیول شوي، چې یو یې خوشي شوی او دوه نور یې محکمې ته سپارل کېږي.
ګوتېرش: هغه څه چې افغانستان کې روان دي د بې رحمه رژيمونو له اقداماتو سره پرتله کېدای شي
د ملګروملتونو سرمنشي انتونیو ګوتېرش وايي، هغه څه چې په افغانستان کې روان دي، کېدای شي په وروستي تاریخ کې د ځینو خورا بې رحمو ځپونکو رژیمونو له اقداماتو سره پرتله شي.
ده د یکشنبې په ورځ، د میزان ۸مه په ایکسپاڼه یا پخواني ټویټر کې لیکلي، له ټولو هغو هېوادونو او سازمانونو سره یوځای کېږي چې غواړي، د طالبانو حکومت د ښځو او نجونو په وړاندې ټول تبعیضي محدودیتونه فوراً پای ته ورسوي.
په ورته وخت کې د اسټرالیا د بهرنیو چارو وزیرې پیني وانګ د جمعې په ورځ وویل، د طالبانو حکومت د افغانستان د نیمایي نفوس په بندي کولو سره د هېواد ظرفیت سخت محدودوي.
هغې زیاته کړه؛ هر هغه هېواد چې غواړي بشپړه پرمختګ وکړي باید د خپلو ټولو خلکو بشپړ ګډون یقیني کړي.
په وروستیو کې د جرمني، اسټرالیا، کاناډا او هالنډ د بهرنیو چارو وزیرانو خبرداری ورکړی، چې که د افغان ښځو او نجونو وضعیت ښه نهشي، د طالبانو د اقداماتو خلاف به د عدالت نړیوالې محکمې ته شکایت وکړي.
څلور واړو هېوادونو ټینګار کړی چې په افغانستان کې د ښځو او نجونو د حقونو سرغړونه باید ودرول شي.
که څه هم طالبانو تر اوسه د ملګروملتونو د سرمنشي انتونیو ګوتېرش د څرګندونو په اړه څه نهدي ویلي، خو د پنجشنبې په ورځ د طالبانو د حکومت مرستیال ویاند حمدالله فطرت پر خپله ایکسپاڼه یا پخواني ټویټر لیکلي و چې، په افغانستان کې بشري حقونه رعایت کېږي او هیڅ تبعیضي چلند له چا سره نه کېږي.
د افغانستان يوشمېر ولايتونو کې زلزله شوې
یوه زلزله چې شدت یې د ریښتر په حساب ۴ اعشاریه ۵ درجې و، د افغانستان یوشمېر سیمې ولړزولې.
د جرمني د زلزله پېژندنې ادارې د راپور لهمخې، د دې زلزلې، چې د افغانستان د سهار په اته بجې او ۵۵ دقیقې وشوه، مرکز يې د جلالاباد له ښاره ۵۹ کیلومتره جنوب ختیځ خوا ته و.
تر اوسه پورې د دې زلزلې له کبله د احتمالي تاوانونو په اړه کوم راپور نهدی ورکړل شوی.
د افغانستان کرکټ بورډ له بنګلهدېش سره د لوبو نېټې په ډاګه کړې
د افغانستان کرکټ بورډ د بنګلهدېش پر وړاندې د درې یو ورځنیو سیالیو د لوبلړۍ نېټې په ډاګه کړې.
د یکشنبې په ورځ د سپټمبر په ۲۹مه نېټه د کرکټ بورډ په خبر پاڼه کې ویل شوي چې افغانستان او بنګلهدېش به د نومبر میاشتې په ۶مه، ۹مه او ۱۱مه نېټه درې یو ورځنۍ سیالۍ ترسره کړي.
خبرپاڼه زیاتوي، د دې سیاليو کوربتوب هم د افغانستان په غاړه دی او لوبې به د عربي متحده اماراتو په شارجه لوبغالي کې ترسره کېږي.
دغه راز په خبرپاڼه کې ویل شوي چې د روان کال په ډسمبر میاشت کې به افغانستان له زېمبابوې سره د ټېسټ، یو ورځنیو او شل اوریزو سیالیو لوبلړۍ هم ترسره کړي او بیا به د نوي عیسوي کال په پیل کې له وېسټ اینډیز سره هم د یو ورځنیو سیالیو لوبلړۍ ولوبوي.
د ویلو ده چې افغانستان په خپلۍ وروستۍ لوبلړۍ کې ۲ـ۱ سویلي افریقا ته ماتې ورکړه.