نړۍ
د ګرجستان د پخواني ولسمشر میخاییل ساکاشویلي پلویانو مظاهره کړې
د ګرجستان د پخواني ولسمشر میخاییل ساکاشویلي په زرګونو پلویانو پرون په پلازمېنه تبلیسي کې مظاهره وکړه.
دوی وروسته تردې راغونډ شول چې یوه خپلواک روغتیایي کمېسیون خبر ورکړ چې ساکاشویلي په بند کې شکنجه شوی دی.
مظاهره چیانو د پارلمان د ودانۍ مخې ته د ساکاشویلي د سمدستي خوشې کېدو شعارونه ورکړل.
د ساکاشویلي د ملي غورځنګ مشر نیکا میلیا اعلان وکړ چې په ګډه به تر هغو د نه خوړو اعتصاب کوو چې ساکاشویلي نه وي خوشې شوی.
پرون د ساکاشویلي د څلورپنځوس کلنۍ کالیزه هم وه.
دی له دوه زره څلورمه تر دوه زره دیارلسم پورې د ګرجستان ولسمشر و او سږکال د اکتوبر په لومړۍ نېټه له اوکراینه له اوږدې جلا وطنۍ وروسته خپل هېواد ته له ستنېدو سره سم زنداني شو.
د ورځې تازه خبرونه دلته ولولئ
روسيې د کريميا په ټاپووزمه کې د اوکراين د ۱۴ بې پيلوټه الوتکو د رانسکورولو ادعا کړې
د روسيې د دفاع وزارت ادعا کړې چې د دغه هېواد هوايي دفاعي سيستم د چهارشنبې په سهار د کريميا په ټاپووزمه کې د اوکراين ۱۴ بې پيلوټه الوتکې رانسکورې کړي دي.
دې وزارت په خپل ټیلیګرام ادعا کړې چې د کریمیا په تاپووزمه کې یې د اوکرایین څلور له لرې کنټرولیدونکې کښتۍ هم له منځه وړي دي.
په یوه جلا خبر کې د روسیې د روستوف سیمې والي ویلي چې د دغه هېواد هوايي دفاعي سیستم په سیمه کې د اوکراین څلور بې پیلوټه الوتکې ویشتلې دي.
ورته وخت کې د اوکراین ځواکونو ویلي، په د بې پیلوتو الوتکو په برید کې یې د روسې د الکولو د پروسس درې فابریکې په نښه کړي دي.
پر اوکراین د روسیې څرګند پوځي تېری د ۲۰۲۲م کال په فبرورۍ کې پیل شو او لا هم دوام لري.
ملګري ملتونه: په ۲۰۲۳م کال کې د جګړو له امله له وژل شویو لسو کسانو څخه څلور یې ښځې وې
د ښځو لپاره د ملګرو ملتونو اداره وايي، په ۲۰۲۳م کال کې د جګړو له امله له وژل شویو لسو کسانو څخه څلور یې ښځې وې.
دې ادارې پرون د عقرب لومړۍ نېټه یو راپور خپور کړ او ویې ویل چې پر ښځو او نجونو د جګړې او جګړو اغېزې ډېرې شوې او په ۲۰۲۳م کال کې د جګړو د قربانیانو شمېر د ۲۰۲۲م کال پرتله دوه برابره شوی دی.
په دغه راپور کې په شخړو کې د ښځو او نجونو د وژل کېدو د ډېرېدو لامل د جګړې پر مهال د ښځو او ماشومانو د خوندیتوب لپاره د نړیوالو قوانینو ښکاره بې غوري بلل شوې ده.
د ښځو د چارو لپاره د ملګرو ملتونو اداره دا هم وايي، چې په ۲۰۲۳م کال کې د سولې په بهیر کې یوازې ۹،۶ سلنه مرکچیانې ښځې وې، په داسې حال کې چې د دې ادارې په وینا، د سولې په بهیر کې د ښځو د ګډون په صورت کې د سولې هوکړهلیکونه باثباته او ښه عملي کېږي.
د بېلاروس پارلمان د ولسمشرۍ ټاکنو نېټه اعلان کړه
ټاکل شوې د بېلاروس راتلونکې ولسمشریزې ټاکنې د ۲۰۲۵م کال د جنورۍ په ۲۶مه ترسره شي.
دا نېټه نن چهارشنبه د اکټوبر ۲۳مه د دې هېواد د پارلمان لهخوا اعلان شوه.
تر دې مخکې د ۲۰۲۰م کال د بېلاروس د ولسمشرۍ په ټاکنو کې سره له دې چې د اپوزیسون او ډېرو لوېدیځو هېوادونو لهخوا په کې د پراخو درغلیو ادعاوې شوې وې، د بېلاروس د اوږدي مودې واکمن الکساندر لوکاشینکو د بلې دورې لپاره بریالی بلل شوی و.
د ۲۰۲۰م کال ټاکنو وروسته، په بېلاروس کې پراخ لاریونونه وشول چې په پایله کې زرګونه کسان بندیان شول او د اپوزیسیون یو شمېر غړي اړ شول چې له هېواد څخه وتښتي.
د معترضانو پر ضد هغه مهال د حکومت د ځپونکیو اقداماتو په ترڅ کې د یو شمېر اعتراض کوونکو د وژل کېدو راپورونه هم ورکړل شوي او د بشري حقونو سازمانونه وايي چې د ځینو نیول شوو کسانو د شکنجې مستند شواهد هم موجود دي.
د لوکاشینکو حکومت پر اوکراین د روسیې د څرګند تېري ملاتړ کړی دی.
د امريکا استخبارات: روسيه، چين او ايران غواړي د امريکا د ولسمشرۍ ټاکنو بهير ګډوډ کړي
د امریکا استخباراتو خبرداری ورکړی چې، د روسیې، چین او ایران اجنټان غواړي د ولسمشرۍ د انتخاباتو په درشل کې د امریکایانو ترمنځ نقاق ته لمن ووهي.
دې چارواکو پرون په یوه ټليفوني خبري کنفرانس کې د خپلو نومونو د پټ ساتلو په شرط خبریالانو ته وویل، د دې دریو هېوادونو اجنټانو د امریکا له تېرو انتخاباتو څخه زدهکړه کړې ده او ښه چمتووالی لري چې په راروانو انتخاباتو کې له هغو څخه ګټه پورته کړي.
د دوی په وینا ښايي دا اجنټان د فزیکي ګواښونو او تشدد هڅه وکړي او ډېر امکان شته چې د انتخاباتو په بهیر کې د ګډ وډۍ او ابهام د رامنځته کولو لپاره د ناسمو معلوماتو د خپرولو عملیات ترسره کړي.
روسیې، ایران او چین درې واړو د امریکا په انتخاباتو کې د لاسوهنو تورونه رد کړي دي.
د اسراييل پوځ د حزبالله د احتمالي مشر هاشم صفيالدين د وژنې خبر ورکړی
د اسراییل پوځ د حزبالله د هغه جګپوړي چارواکي د وژلو خبر ورکوی چې، تمه کېده د دې ډلې راتلونکی مشر به وي.
د اسراییلو پوځ وايي، هاشم صفيالدین چې د حزبالله له مخکښو دیني عالمانو څخه و، د حس نصرالله پرځای چې په تېره سپټمبر میاشت کې ووژل شو، د روانې اکتوبر میاشتې په لومړیو کې په یوه هوايي برید کې وژل شوی دی.
حزبالله تر اوسه د صفيالدین وژل کېدل نهدي تایید کړي.
د اسراییل پوځ نن سهار د لبنان پلازمېنې بیروت ته نژدې یوه ودانۍ چې په وینا یې د حزبالله تاسیسات پهکې وو په بشپړ ډول ویجاړه کړه.
دا هوايي برید وروسته له هغه وشو چې د اسراییل پوځ په سیمه کې د دوو ودانیو د تخلیې خبرداری ورکړ.
تر اوسه د دې برید د مرګژوبلې راپور نهدی ورکړل شوی.
حزبالله د لبنان یوه سیاسي او پوځي ډله ده چې متحدهایالتونه یې د ترهګرو په توګه پېژني، خو اروپایي ټولنې یې یوازې پوځي څانګه په تور لېست کې شامله کړې ده.
دا ډله د لبنان د جنوب پر ډېره برخه واکمنه ده او په پارلمان کې غړي هم لري.
انتوني بلېنکن له اسراييل په غزه کې د اوربند غوښتنه کړې
د امریکا د بهرنیوچارو وزیر انتوني بلېنکن پرون تلابیب او بیتالمقدس ته د سفر پر مهال پر اسراییل غږ وکړ چې، په غزه کې د اوربند لپاره کار وکړي.
بلېنکن له ولسمشر اسحق هیرزوګ سره په کتنه کې ټینګار وکړ چې، د اسراییلي پوځ لهخوا د حماس ډلې د مشر یحیی سنوار وژنې په غزه کې اوربند او د هغو برمتهو د خوشې کېدو لپاره یو نوی فرصت رامنځته کړی چې حماس ډلې د ۲۰۲۳ کال د اکتوبر په ۷مه پر اسراییلو د برید پرمهال نیولي وو.
امریکا او اروپايي ټولنه حماس یوه تروریستي ډله بولي.
له صدراعظم بنیامین نتنیاهو سره په کتنه کې بلېنکن ټینګار وکړ چې، د غزې تړانګې ته باید نورې بشري مرستې پرېښودل شي.
واشنګټن تېره اوونۍ خبرداری ورکړی و، که غزې ته سمدستي د نورو بشري مرستو اجازه ورنهکړل شي، نو اسراییلو ته به ځینې پوځي مرستې وځنډوي.
ټاکل شوې امريکا روسيې سره پر مرسته کوونکو يوشمېر شرکتونو بنديزونه ولګوي
د امریکا د خزانې وزیر جنېت یلېن(Janet Yellen) ویلي، ټاکل شوې متحدهایالتونه راتلونکې اوونۍ په اوکراین کې د روسیې د جنګي هڅو د مهارولو په هدف یو لړ بندیزونه اعلان کړي.
ښاغلي یلېن د نړۍ مالي مشرانو ته چې د پیسو نړیوال صندوق (ایایمایف) او نړیوال بانک کلنیو غونډو ته په واشنګټن کې راټول شوي وویل، دا بندیزونه به پر هغو شرکتونو ولګول شي چې مسکو سره د اوکراین په جګړه کې پوځي مرسته کوي.
د امریکا د خزانې وزیر دغه راز ویلي، واشنګټن به په درېیمو هېوادونو کې هم پر هغو کسانو او بنسټونو بندیزونه ولګوي چې د کرمیلین له جګړهییزو فعالیتونو سره مرسته کوي.
روسیې د ۲۰۲۲ کال په فبرورۍ کې پر اوکراین یرغل پيل کړی، چې له کبله یې دغه هېواد د لوېدیځ له پراخو بندیزونو سره مخامخ شوی دی.
د اسراييل پوځ پر بيروت د يو هوايي بريد په ترڅ کې يوه ودانۍ لهمنځه وړې
د اسراییل پوځ پرون سهشنبه (د اکتوبر ۲۲مه) د لبنان د پلازمېنې بیروت په څنډه کې یوه ودانۍ له خاورو سره خاورې کړه او په وینا یې دننه یې د حزبالله تاسیسات وو.
د لبنان حزبالله یوه سیاسي او پوځي ډله ده چې متحدهایالتونه یې د ترهګرو په توګه پېژني، خو اروپایي ټولنې یې یوازې پوځي برخه تور لېست کې شامله کړې ده.
دغه ډله تر ډېره د لبنان پر جنوبي برخې واکمنه ده او د لبنان په پارلمان کې غړي هم لري.
دغه هوایي برید لږ وروسته تر هغه وشو چې د اسراییل پوځ په سیمه کې د دوو ودانیو د تخلیې خبرداری ورکړ.
تر اوسه د دغه برید د مرګژوبلې راپور نهدی ورکړل شوی.
په همدې حال کې د امریکا د بهرنیو چارو وزیر انتوني بلېنکن د منځني ختیځ شخړو ته د حللارو د موندلو د هڅو په ترڅ کې پرون تلابیب ته ورسېد او د اسراییل له صدر اعظم بنیامین نتنیاهو سره یې وکتل.
حزبالله ډلې د اسراييلو پر يوشمېر پوځي اډو د بريد خبر ورکړی
د لبنان حزبالله ډلې نن سهار اعلان وکړ چې، تلابیب ښار ته نږدې دوه مهمې اډې او د حیفا په لوېدیځ کې د سمندري ځواکونو یوه اډه يې په نښه او ویجاړې کړې دي.
د لبنان حزبالله ډله یو سیاسي او پوځي ډله ده، چې د لبنان ډېرې جنوبي سیمې کنټرولوي.
امریکا، حزبالله ډله د یوې ترهګرې ډلې په توګه پېژني، خو اروپايي ټولنې بیا د دې ډلې یوازې پوځي څانګه د ترهګریزو سازمانونو په لېست کې شامله کړې ده.
دا پهداسې حال کې ده چې د امریکا د بهرنیو چارو وزیر انتوني بلېنکن به نن د خپل سفر پر اوږدو کې اسراییل ته ځي او هلته به پر اسراییلو د اوربند موافقې ته د رسېدو لپاره لا زیات فشار راوړي.
د لبنان په جنوب او د پلازمېنې بیروت په جنوبي سیمو باندې د اسرايیلو لهخوا د تېرې شپې له سختو بریدونو وروسته، حزبالله اعلان وکړ چې د تلابیب په څنډه کې یې د ګلیلوت او نیرت په سیمه کې د پوځي استخباراتو مرکزونه په نښه کړي دي.
حزبالله همدا راز اعلان وکړ چې د اسرايیلو په شمال کې د حیفا څخه بهر یوه سمندري اډه یې هم په راکټونو ویشتې ده.
د تلفاتو په اړه سمدستي راپور نهشته.
اسرايیلي چارواکو ویلي، د تلابیب په جنوب ختیځو سیمو کې د هوايي بریدونو لپاره د خطر زنګ هغه مهال وغږول شو، چې یوه توغندي له لبنان څخه تېر شو او په یوه ازاده سیمه کې ولګېده .
بريتانيا اوکراين ته ۲.۴ ميليارده ډالره پور ورکوي
بريتانيا اوکراين ته د نورو وسلو د پېرلو لپاره ۲.۴ ميليارده ډالره پور ورکوي.
د بریتانیا د دفاع وزیر جان هیلي نن دا خبر په داسې حال کې اعلان کړ چې اوکرایني ځواکونه په ختیځ کې د روسي ځواکونو د سختو بریدونو پر وړاندې په جګړه بوخت دي او هره ورځ د اوکراین پر ښارونو او تاسیساتو د روسیې لهخوا هوايي بریدونه دوام لري.
چارواکو ویلي، په دې وروستیو بریدونو کې د روسیې پولې ته څېرمه په سویل ختیځ ښار سومي کې د یوه ماشوم په ګډون درې کسان وژل شوي دي.
هغه پیسي چې بریتانیا یې اوکراین ته ورکوي د هغو ۵۰ میلیاردو ډالرو پور یوه برخه ده چې تېر جون د جي۷ G7 یا د نړۍ د اوو پرمختللو صنعتي هېوادونو لهخوا اعلان شوی و.
دا پور باید په لوېدیځ کې د روسیې د کنګل شویو شتمنیو د عایداتو له لارې تمویل شي.
د ۲۰۲۲م کال د فبرورۍ له میاشتې راهیسې چې روسیې پر اوکراین پراخ برید کړی، د روسیې شاوخوا ۳۰۰ میلیارده ډالره بهرنۍ سرمایه په لوېدیځ کې کنګل شوې ده.