د لاسرسۍ وړ لېنکونه

تازه خبر
شنبه ۳۱ غویی ۱۴۰۱ کابل ۰۱:۳۴

نړۍ

ملګري ملتونه: ایران فوردو تأسیساتو کې د یورانیمو غني کول پیل کړي

ایران کې سنترفیوژونه

د ملګرو ملتونو د اټمي څارنې اداره وایي، ایران تر ځمکې لاندې فوردو تأسیساتو کې په نویو سنترفیوژونو کې د یورانیمو غني کول پیل کړي دي.

دغه پرمختګ به د ایران او د نړۍ له قدرتونو سره د ۲۰۱۵ کال د اټمي تړون د احیا لپاره پیل شویو خبرو کې نوې اندېښنې راپورته کړي.

د نړیوالې اټمي انرژۍ ادارې پرون په یوه راپور کې وویل چې ایران په فوردو تأسیساتو کې په نویو پرمختللو سنترفیژونو کې تر ۲۰ سلنه پورې د خالصو یورانیمو غني کول پیل کړي دي.

دې ادارې ویلي چې څارونکو یې د نومبر په ۳۰مه له دغو تأسیساتو کتنه وکړه او راپور یې ورکړ چې په دې پیمانه د یورانیمو غني کول په‌کې پیل شوي دي.

ایران تأيید کړه چې په دې تأسیساتو کې تر ۲۰ فیصدو پورې د یورانیمو غني کېدل پیل شوي، خو په ویانا مېشته اداره کې د دې هېواد استازي د ملګرو ملتونو دغه راپور کم اهمیته وښود او ویې‌ویل، دا په ایران کې په منظم ډول د تأيید د مقرراتو یوه عادي چاره ده.

د ورځې تازه خبرونه دلته ولولئ

روسیې په ماریپول کې تر بریا وروسته د دنباس د نیولو هڅې زیاتې کړې

روسي ځواکونه د ماریپول د فولادو په فابریکه کې

روسیې له نږدې یوې میاشتې جګړې وروسته د ماریپول د فولادو په فابریکه کې د بریا تر ادعا وروسته د دنباس سیمې د نیولو هڅې زیاتې کړې دي.

د روسیې دفاع وزارت پرون وویل، چې د ازوفستال د فولادو په فابریکه کې وروستی اوکراینی سرتېری هم تسلیم شو.

روسیه وایي، د تېرو څو ورځو په ترڅ کې په دې سیمه کې د ټولو تسلیم شویو اوکرایني سرتېرو شمېر دوه زره څلور سوه نهه دېرشو ته رسېږي

روسیې اوس په لوهانسک سیمه کې علمیات سخت کړي دي او پر ټول اوکراین د روسیې الوتکو بمبارۍ زیاتې شوي دي.

نن سهار د پلازمېنې کییف په ګډون د اوکراین په ډېرو سیمو کې د بمباریو په خاطر د خطر زنګونه ووهل شول.

روسیه سر له ننه فنلنډ ته د ګازو صادرات بندوي

ارشیف

د روسیې ګازپروم شرکت اعلان کړی، چې له نن د مې له ۲۱مې نېټې څخه به فنلنډ ته د ګاز صدور بند کړي.

د فنلنډ د ګازوم شرکت اجراییه رییس مایکا ویلیانین پرون وویل، چې د روسیې د دې اقدام علت دا دی چې هلسینکي د ګاز پیسې په روسي روبل نه ورکوي.

فنلنډ د روسیې پر ګازو ډېره لږه یعنې په سلو کې شاوخوا پنځه تکیه لري.

روسیې له دې مخکې په ناټو کې د فنلنډ د غړیتوب د پلان په اړه هم خبرداری ورکړی و، او ویلي یې و، چې دا کار به ناوړه پایلې ولري.

جنوبي وزيرستان کې پر پاکستاني پوځيانو چاودنه شوې

ارشيف

په سیمه کې د پاکستان د استخباراتو یوې سرچینې د ازادي راډیو مشال څانګې ته وویل چې دا چاودنه د پنجشنبې په ورځ د مکین په سیمه کې وشوه چې یو پوځي پکې ووژل شو او پنځه پوځیان ټپيان شول.

د پاکستان د پوځ د رسنیو برخې د یوه عسکر وژل تایید کړې دي خو د ټپیانو په اړه یې څه نه دې ویلي.

د دې پيښې مسوولیت تر اوسه چا نه دی منلی.

ګوتيرش د تاجکستان په "ګورنو بدخشان" سيمه کې د شخړو په اړه اندېښنه وښوده

Moldova UN Guterres

د ملګرو ملتو سرمنشي انتونیو ګوتیرش د تاجکستان په ګورنو بدخشان سیمه کې وروستیو راپورونه ته اندېښنه ښکاره کړه.

له دې سیمې د مرګ ژوبلې او شخړو د زیاتیدو راپورونه خپاره شوې دي.

په وروستیو څو ورځو کې د راپورونو له مخې د مظاهره چیانو او امنیتي ځواکونو ترمنځ د اخ وډب پرمهال تر وویشت کسانو پورې وژل شوې دي چې پکې یو پولیس هم شامل دی.

مظاهرې وروسته تر دې پيل شوې چې د راپورونو له مخې د پولیسو د توقیف پر مهال یو مدني فعال ووژل شو.

زيلينسکي: روسيې د دونباس سيمه يو مخ ويجاړه کړې

د اوکراین ولسمشر ولودیمیر زیلینسکي

د اوکراین ولسمشر ولودیمیر زیلینسکي وايي، روسي ځواکونو د اوکراین په ختیځ کې حملو ته زور ورکړی او د ده په وینا د دونباس سیمه یې یو مخ ویجاړه کړې ده.

زیلینسکي پرون ناوخته په یوه ویډیويي وینا کې روسي ځواکونه د اوکراینیانو د وژلو لپاره په هڅه، تر ممکنه حده په تاوان اړولو او نسل وژنې تورن کړل.

زیلینسکي همدا راز وویل چې پرون یې د بریتانیا له صدراعظم بوریس جانسن او د اروپايي کمېسیون له مشرې اورسلا وان دیرلن سره د مالي مرستو، د کرنیزو محصولاتو د صادراتو او په ازوفستال فابریکې کې د اوکرایني ځواکونو په اړه خبرې وکړې.

امريکا او اروپا کې د بيزو چيچک په نوم د وايرس پېښې تايد شوي

لابراتوار

روغتيايي ادارو ويلي دي، په شمالي امریکا او اروپا کې د بیزو چیچک په نوم يې د یوه نادر وایرس پېښې تایید کړي دي.

دا وایرس، چې د افریقا په ځینو سیمو کې یې اندېښنې پیدا کړې وې، په وروستیو ورځو کې په بریتانیا، هسپانیا او پرتګال کې هم تشخیص شوی دی.

د چهارشنبې په ورځ کاناډا هم ویلي و چې په دغه هېواد کې د ۱۳ مشکوکو قضیو په اړه څېړنې روانې دي.

خو د بریتانیا د روغتیا ادارې پرون (پنجشنبې) وویل چې هلته په دې وایرس ۹ کسانو اخته شوي.

د امریکا په ماساچوسیت ایالت کې هم یو تن چې کاناډا ته یې سفر کړی و، په دې وایرس اخته شوی دی.

د بیزو چیچک ناروغي د زوکام په شان نښې لري او په تبې، د عضلو درد او همدا راز د لاس و پښو په پړسوب پیلېږي، وروسته پر بدن تڼاکې راڅرګندېږي.

د امريکا سنا جرګې اوکراين سره د ۴۰ ميليارده ډالرو پوځي مرستې تايد کړې

د کانګرس ودانۍ

د امریکا سنا جرګې اوکراین ته د ۴۰ میلیارده ډالرو پوځي او اقتصادي مرستو بسته په غوڅ اکثریت تایید کړه.

دغې بستې ته شپږاتیا سناتورانو مثبتې رایې ورکړې، خو د مخالفو رایو شمېر یوازې ۱۱ و.

ټاکل شوې د دغو مرستو سند ژر تر ژره د امریکا د ولسمشر جوبایډن له خوا لاسلیک شي.

تېره اوونۍ د کانګرس استازو جرګې دغه سند تصویب کړی و.

بلينکن: روسيه له غلو دانو د جګړې د وسلې په توګه کار اخلي

د امریکا د بهرنیو چارو وزیر انتوني بلینکن

د امریکا د بهرنیو چارو وزیر انتوني بلینکن روسیه تورنه کړې چې د بندرونو په بندولو له غلې دانې او نورو موادو د جګړې د وسلې په توګه کار اخلي.

بلینکن پرون د ملګرو ملتونو امنیت شورا کې د وینا پر مهال وویل، د روسیې د اقداماتو له کبله د اوکراین په سیلوګانو کې ۲۰ میلیونه ټنه غله له استفادې پرته پاتې ده.

د بلینکن په وینا په نړۍ کې د خوړو زېرمو کې د کموالي له کبله بیې ډېرې لوړې شوي او په خبره یې دا د دې لامل کېږي چې ډېر خلک د خوړو له نه مصونیت سره مخامخ شي.

په ملګرو ملتونو کې د روسیې استازي بیا ویلي، دا غلطه ده چې د دوی هېواد دې د هغه بحران لامل وبلل شي چې له کلونو راهیسې دوام لري.

د اوکراین ولسمشر د ډرون الوتکو په اړه د روسیې وروستۍ ادعا تبلیغات بولي

د اوکراین ولسمشر ولادمیر زیلینسکي

د اوکراین ولسمشر ولادمیر زیلینسکي وایي، د روسې دا ادعا چې وایي، په اوکراین کې د ډرون الوتکو د ویشتلو لپاره د لوړ قدرت لرونکې لایزري وسلې د سیستم تولید ته نږدې شوی، د جګړې د وخت د هغو مشرانو تبلیغات دي چې وېرېږي خپلې وحشتانکې تېروتنې ومني.

د روسیې د ټاس خبري آژانس د راپور له مخې د روسیې د صدراعظم مرستیال یوري بوریسوف پرون چهارشنبې مسکو ته نږدې په یوه کنفرانس کې وویل، چې روسیې د لایزري وسلو داسې سیسټم ته وده ورکړې چې څو چنده ځواکمن دی او د دې توان لري چې مختلف هدفونه وسوځوي.

د راپور له مخې دغه نوی سیسټم پرون چهارشنبې آزمویل شوی او یو ډرون یې په پنځو سانیو کې له منځ وړی دی.

بوریسوف د دې پوښتنې په ځواب کې ایا له دغه سیسټم څخه په اوکراین کې کاراخیستل شوي وویل، هو او زیاته یې کړه چې لومړنۍ نمونې هلته کارول شوي دي.

امریکا په ناټو تړون کې د فنلنډ او سویډن د غړیتوب غوښتنې کلک ملاتړ وکړ

د امریکا ولسمشرجوبایډن

د امریکا ولسمشرجوبایډن په ناټو تړون کې د فنلنډ او سویډن د غړیتوب د غوښتنې کلک ملاتړ کړی او ویلي یې دي، چې متحده ایالات به د دوی امنیت ته د هر ډول ګواښ پر وړاندې بیدار پاتې شي.

هغه په یوه بیان کې د فنلنډ او سویډن دا پرېکړه تاریخي بللې او ویلي یې دي، چې دی به د امریکا له کانګرس او د ټاتو له متحدانو سره کار وکړي څو هرڅومره ژر چې کېدای شي دغه دواړه هېوادونه د ناټو غړیتوب ترلاسه کړي.

د ناټو عمومي منشي ینس ستولتنبرګ پرون وویل، چې په ناټو تړون کې د غړیتوب لپاره یې د دواړو هېوادونه رسمي غوښنلیکونه ترلاسه کړي دي.

سویډن او فنلنډ چې د اروپایي ټولنې غړې دي او تراوسه یې ناپیلی موقف درلود، په ناټو تړون کې د غړیتوب غوښتنه هغو مخ په زیاتېدونکو اندېښنو ته په پام کړې چې پر اوکراین د روسیې د یرغل له امله راپورته شوي دي.

لومړني روسي پوځي په اوکراین کې پر خپل جرم اعتراف وکړ

روسي پوځي وادیم شیشي

لومړني روسي پوځي، چې د جنګي جنایت په تور د اوکراین په پلازمېنه کییف کې یوې محکمې ته حاضر کړای شو، پر خپل جرم اعتراف وکړ.

دا ټیټ رتبه روسي افسر، چې وادیم شیشي مارین نومېږي، د اوکراین د شمال ختیځ په چوپا خیف کا کلي کې د یوه بایسکل چلوونکي د وژلو په باب د محکمې د قاضیانو د پوښتنې په ځواب کې وویل چې دا کار یې کړی دی.

د اوکراین دولتي څارنوال په محکمې کې وویل، چې شیشي مارین ته ویل شوي و چې دا ملکي وګړی ووژني چې په سیمه کې د روسي ځواکونو د حضور په اړه چا ته معلومات ورنه کړي.

روسيې په ماريوپول ښار کې د کلابندو اوکرايني سرتېرو د ورتسليمېدو خبر ورکړی

ارشيف

د روسیې د دفاع وزارت ویاند جنرال ایګور کونا شینکوف نن وویل چې ۶۹۴ اوکرایني جنګیالي په تېرو ۲۴ ساعتونو کې تسلیم شوي چې ۲۹ یې ټپي سرتېري دي.

هغه زیاته کړه چې په دې موده کې ۲۶۵ اوکرایني سرتېرو خپله وسله پر ځمکه ایښې ده چې ۵۱ یې ټپیان دي.

د راپورونو له مخې دغه ټول سرتېري او جنګیالي د اوکراین ختیځ هغو سیمو ته لیږدول شوي چې روس پلوه بېلتون غوښتونکي پرې کنټرول لري.

د اوکراین چارواکو تر اوسه د دغې ادعا په اړه څه نه‌دي ویلي خو له دې مخکې یې ویلي و چې د ازوف د فولادو له فابریکې څخه په سلګونو سرتېري او جنګیالي د سره صلیب او ملګرو ملتونو په همکارۍ تخلیه شوي او د روس پلوه وسله والو تر ولکې لاندې ښارونو ته انتقال شوي دي.

ايران په تاجکستان کې د بې پيلوټه جنګي الوتکو فابريکه فعاله کړې

ارشيف

ایران د بې پیلوټه جنګي الوتکو د تولید لومړۍ فابریکه په تاجکستان کې فعاله کړې ده، چې په دې سره تاجکستان د نړۍ لومړی هېواد دی چې ایران پکې د ډرون د تولید فابریکه فعالوي.

د ایرنا دولتي خبري آژانس راپور ورکوي چې د دې فابریکې د پرانیستو مراسم پرون د غويي په ۲۷مه، تاجکستان ته د ایران د وسله والو ځواکونو د لوی درستیز جنرال محمد حسین باقري د سفر پر مهال جوړ شوي وو.

د ایرنا د راپور له مخې د دې ډرون نوم ابابیل ۲ دی، د ۲۰۰ کیلو مترو په ساحه کې د برید او کشفي فعالیتونو وړتیا لري او د یو نیم ساعت لپاره الوتنه کولای شي.

په راپور کې د دې فابریکې د تولیدي ظرفیت او نورو وړتیاوو په اړه جزییات نه دي ورکړل شوي.

په داسې حال کې چې په افغانستان کې د طالبانو سني مذهبي ډله واکمنه شوې او شیعه ایران او سیکولر تاجکستان یې د ځان لپاره ګواښ بولي، دې اقدام ته په سیمه کې د ځواک د انډول کولو لپاره د تهران د هڅو په سترګه کتل کېږي.

له ايرانه د ملګرو ملتونو غوښتنه: د احمد رضا جلالي له اعدامه لاس واخلئ

ایراني الاصله سویډني ډاکټر او اکاډیمیک احمد رضا جلالي

ملګرو ملتو له ایرانه وغوښتل چې د ایراني الاصله سویډني ډاکټر او اکاډیمیک احمد رضا جلالي له اعدامه لاس واخلي.

د ملګرو ملتو د بشري حقونو د عالي کمشنرۍ ویاندې لی تروسیل په یوه بیان کې چې پرون یې خپور کړ وویل، چارواکي دې په تهران کې د اعدام دا سزا سمدستي لغوه کړي.

جلالي د طب ډاکټر او د ستاکوهلم په کارولینکا انستیتیوت کې استاد و چې په ۲۰۱۶ کال کې په علمي سفر ایران تللی و چې ونیول شو.

دی تورن شوی دی چې اسراییل ته یې څو مهم ایراني ساینسپوهان ورپه نښه کړې دي چې ویې وژني.

د ایران حکومت ویلي دي چې جلالي به د راتلونکې شنبې په ورځ اعدام کړي.

اروپایي ټولنې ته د ورغلو ناقانونه کډوالو شمېر کې زیاتوالی راغلی

یونان کې د کډوالو انځور

د اروپایي ټولنې د پولې ساتنې اداره د روان کال په لومړیو څلورو میاشتو کې دې ټولنې ته د ورغلو ناقانونه کډوالو په شمېر کې د پام وړ زیاتوالي خبر ورکوي.

وارسا میشتې د پولې ساتنې ادارې، فرونتیکس پرون دوشنبې وویل، چې د روان کال په لومړیو څلورو میاشتو کې یې د ۵۷ زره او اته سوه ناقانونه کډوالو دوسیې ثبت کړي چې دا د تېرکال د همدۍ مودې په پرتله په سلو کې ۶۹ زیاتوالی ښیي.

دغې ادارې ویلي، چې په اوکراین کې د جګړې له امله کډوال شوي خلک په دغو شمېرو کې نه دي شامل.

فرونتیکس ویلي، له ۲۷ زره زیات کسان د لویدیځ بالکان له لارې اروپایي ټولنې ته داخل شوي چې دا د تېر کال په همدې موده کې له دې لارې د اروپایي ټولنې غړیو هېوادونو ته د اوښتو ناقانونه کډوالو ۱۳۰ سلنه زیاتوالی ښیي.

د دغې ادارې په وینا اکثره ناقانونه کډوال د افغانستان او سوریې دي.

ناقانونه کډوال له لویدیځ بالکان پرته د ختیځې مدیترانې، د ترکیې له لارې هم یونان او قبرس ته ځانونه رسوي.

نور راوښيه

XS
SM
MD
LG