د امریکا د بهرنیو چارو وزیر انتوني بلېنکن مسکو ته خبرداری ورکړی چې پر اوکراین بل هر یرغل به جدي عواقب ولري.

د اوکراین پولې ته نږدې د روسیې د پوځي حضور پیاوړتیا د لوېدیځ اندېښنې زیاتې کړې دي.

بلېنکن چې نن‌یې د لتویا په پلازمېنه ریګا کې د ناټو د بهرنیو چارو وزیرانو په غونډه کې د ګډون ترڅنګ په یوه خبري کنفرانس کې خبرې کولې د روسیې د ځواکونو ځای پر ځای کېدا غیر معمولي وبلل او زیاته‌یې کړه چې د روسیې له‌خوا د کړکېچ د پراختیا هره هڅه به د متحده ایالاتو لپاره د ژورې اندېښنې وړ وي.

د اوکراین د بهرنیو چارو وزیر چې هېواد یې د ناټو د غړیتوب د ترلاسه کولو هڅه کوي، ویلي چې روسیې یې د هېواد له پولې سره د درنو وسلو په ګډون ۱۱۵ زره ځواکونه ځای پر ځای کړي دي.

روسیې په ۲۰۱۴ کال د اوکراین د کریمیا ټاپو وزمه جلا او له خپلې خاورې سره یوځای کړه.

د سوډان پوځ د جمعې په ورځ اعلان وکړ چې له نږدې دوه کلنې جګړې وروسته یې په خرطوم کې د ولسمشرۍ ماڼۍ کنټرول بیرته ترلاسه کړی دی.

دا ماڼۍ د سودان په پلازمېنه کې د سیالو ملېشه ځواکونو وروستی کلک سنګرګڼل کېده.

په خرطوم کې د ولسمشرۍ ماڼۍ نیول د سودان د پوځ لپاره د چټک ملاتړ ځواکونو یا RSF ملیشو په وړاندې یوه لویه سمبولیکه بریا ګڼل کیږي.

د اسوشیټیډ پریس په وینا، دا پیښه ښایي د جګړې د پای ته رسیدو په معنی نه وي، ځکه د RSF ځواکونه لاهم د لویدیځ دارفور پرسیمې او د سوډان پر نورو برخو کنټرول لري.

د روسیې د امنیت شورا سلاکار سرګې شویګو د جمعې په ورځ د شمالي کوریا له مشر کیم جونګ اون سره ولیدل.

د دواړو هېوادونو د رسنیو د راپورونو له مخې، شویګو شمالي کوریا ته وروسته له هغه لاړ چې په دې وروستیو کې د د دې هیواد لخوا روسیې ته د اضافي سرتیرو د لیږلو په اړه راپورونه خپاره شول.

د راپورونو له مخې، دا ځواکونه د اوکراین پر وړاندې د روسیې د جګړې د ملاتړ لپاره روسیې ته لیږل شوي دي.

د روسیې دولتي خبري اژانس تاس راپور ورکړی چې سرګي شویګو د روسیې د ولسمشر ولادیمیر پوتین پیغام کیم جونګ اون ته ورساوه.

په پیغام کې، پوتین ژمنه وکړه چې د دوی د وروستیو غونډو په جریان کې د شویو موافقو پلي کولو ته به "ډیره پاملرنه" وکړي.

د انټرفاکس خبري اژانس راپور ورکړی چې د غونډې په جریان کې، شویګو یو ځل بیا د امنیتي شراکت تړون ته د ژمنتیا لپاره د مسکو پر "بې قیدو شرطه چمتووالي" ټینګار وکړ.

د دواړو خواوو ترمنځ دا تړون تېر کال په پیونګ یانګ کې په یوه سرمشریزه کې لاسلیک شو او په هغه کې د "بهرني یرغل" په صورت کې د متقابل ملاتړ ژمنه هم شامله ده.

د لندن په هیترو هوايي ډګر کې د اورلګېدنې له امله په سلګونه زره مسافر د الوتنو له لغوه کېدو سره مخ شول.

دا پېښه د اروپا په تر ټولو بوخت مسافرتي مرکز کې د برېښنا د قطع کېدو له امله رامینځته شوې چې چارواکي یې تړلو ته اړ کړل.

د الوتنو د څارنې د خدماتو، فلایټ رادار ۲۴ په وینا، د هیترو هوایی ډګر ته او له دې ډګر څخه لږ تر لږه ۱۳۵۰ الوتنې اغیزمنې شوې دي.

د امریکا له ښارونو څخه هم څو الوتنې لغوه شوې دي. پولیسو اعلان کړی چې تر اوسه پورې د ورانکارۍ کومه نښه نه ده لیدل شوې،

خو د ترهګرۍ ضد چارواکي د پېښې لاملونه څیړي.

د هند د کرکټ د غوره لیګ( اي پي ایل) سیالۍ سبا پيلیږي.

دا د دې لوبو اتلسم لیګ دی چې لس لوبډلې پکې سیالۍ سره کوي.

سبا به د تیر کال اتله لوبډله کلکته نایټ رایډرز له رایل چلینجرز بنګلور سره مسابقه وکړي.

د ( ای پي ایل) په دې ټورنمنټ کې د افغانستان په شمول د نړۍ د بیلابیلو هیوادونو لوبغاړي لوبیږي.

سږکال د افغانستان اووه لوبغاړي د ( ای پي ایل) لوبډلو اخیستې دي، راشد خان، کریم جنت، نور احمد لکڼوال، عظمت الله عمرزی، رحمت الله ګربز، فضل حق فاروقي او الله محمد غضنفر.

د ( ای پي ایل) د سږکال د برانډ ارزښت دولس میلیارډه ډالر اټکل شوی دی. تیرکال د دې ارزښت لس اعشاریه اووه میلیارډه ډالرو ته ورسید.

د ( ای پي ایل) دا ټورنمنټ به څه باندې دوې میاشتې، یعني د مې تر پنځه ویشتمې روان وي.

په یمن کې د حوثیانو په واک کې د المسیره تلویزیون تیره شپه خبر ورکړ چې امریکایي الوتکو پلازمینه صنعا په نښه کړې ده.

دا د امریکایي الوتکو تازه بریدونه دي، چې په سره سمندرګي کې د امریکا او نورې نړۍ پر کښتیو د حملو په ځواب کې ترسره کیږي.

د صنعا درې استوګنو رویټرز اژانس ته وویل چې امریکایي الوتکو د الجراف سیمه چې د ښار هوایي ډګر ته څیرمه پرته ده ویشتلې ده.

د حوثیانو د روغتیا وزارت ویاند انیس الاصبحي په ایکسپاڼه کې لیکلي دي چې د الثوره په سیمه کې الوتکو نهه ملکیان ټپيان کړي دي.

د المسیره تلویزیون د راپور له مخې په البیضا ولایت کې هم امریکایي الوتکو بمبارۍ کړې دي. د یمن په جنوب کې دا ولایت د حوثیانو نظامي مرکز دی.

امریکایي ځواکونو د شنبې په ورځ پر حوثیانو حملې پيل کړې چې لږ تر لږه یو دیرش کسان یې ووژل.

د جنوري له شلمې راوروسته چې ډانالډ ټرمپ د امریکا د ولسمشر په توګه لوړه کړې ده دا د امریکا تر ټولو ستر پوځي عملیات دي.

د اوکراین ولسمشر وایي، چې هغه د متحده ایالاتو له ولسمشر سره واضح او ګټورې خبرې کړې دي.

ولسمشرانو ډانالډ ټرمپ او ولودومیر زیلنسکي پرون په تیلفون خبرې وکړې. د زیلنسکي تر څرګندونو مخکې ولسمشر ټرمپ په خپله خواله رسنۍ« سوشل تروت» کې لیکلي و چې دې خبرو نژدې یو ساعت دوام وکړ او د خبرو لویه برخه تر دې راڅرخیده چې د سې شنبې په ورځ یې د روسیې له ولسمشر ولادیمیر پوتین سره د اوکراین د جګړې په تړاو کړې وې.

ټاکل شوې ده چې د اوکراین د جګړې په ارتباط د راروانې یکشنبې په ورځ د امریکا او روسیې د پلاوو ترمنځ د سعودي عربستان په جدې ښار کې بیا مذاکرات پيل شي.

دواړه لوري تیره اونۍ هم د جدې په ښار کې د اوکراین پر مسالې غږیدلي وو.

د امریکا پوځ د یمن په بېلابېلو سیمو او له هغې ډلې په صعده ولایت کې د لسو هوايي حملو په ترڅ کې یوځل بیا د حوثي یاغیانو مرکزونه په نښه کړي دي.

رویټرز خبري آژانس د حوثيانو د رسنیو په حواله خبر ورکوي چې د امریکا جنګي الوتکو د ایران پلوې حوثي ډلې مرکزونه په نښه کړل. حوثيانو تېره اونۍ اعلان وکړ چې له فلسطینیانو څخه د ملاتړ لپاره په سره سمندرګي کې پر سوداګریزو کشتیو بیا حملې پیلوي.

د حوثي ډلې پوځي ویاند یحیی سریه نن وویل چې دې ډلې په سره سمندرګي کې د دښمن حرکات تشخیص کړي دي چې غواړي پر یمن هوايي حملې وکړي.

سریه د شواهدو له وړاندې کولو پرته ادعا وکړه چې د امریکا د جنګي الوتکو وړونکې یو اس اس هري اس ټرومن او نورې پوځي کشتۍ د توغندیو او بې پیلوټه الوتکو په وسیله په نښه کړي او د متحدایالاتو هڅې یې شنډې کړې دي.

د پاکستان صدراعظم د هېواد له سیاسي مشرانو غوښتي دي چې د پوره ځواک په کارولو سره د وسله والو ډلو د ځپلو په چاره کې د حکومت ملاتړ وکړي.

بلوڅ بېلتونپالو تېره اونۍ د یو اورګاډي سلګونه سپرلۍ یرغمل کړې او د چارواکو په وینا ۲۶ یرغمل یې ووژل. وروسته دولتي ځواکونو په عملیاتو کې بیا ۳۳ تنه بریدکوونکي هم ووژل شول.

صدراعظم شهباز شریف پرون وویل چې ده له دې حملې وروسته د پاکستان د پارلمان د ملي امنیت د کمیټې غونډه راوبلله چې د پوځ لوی درستیز جنرال عاصم منیر هم ګډون پکې کړی و. د پاکستان حکومت په یوه بیان کې ویلي چې په دې غونډه کې له وسله والو سره د مقابلې لپاره د حکومت د پوره قوت د کارولو او د ستراتیژیک او متحد سیاسي اقدام پر اړتیا ټینګار وشو او په وینا یې ګډونوالو د تروریزم پرضد د مبارزې لپاره د ملي اجماع غوښتنه وکړه.

ښاغلي شریف وویل چې غونډې په یوه آواز د بلوچستان پېښه وغندله خو زیاته يې کړه چې دی له دې کبله خواشینی دی چې د پخواني صدراعظم عمران خان تحریک انصاف ګوند دا غونډه تحریم کړه.

ښاغلي شریف که څه هم د کومې ځانګړې ډلې نوم یاد نه کړ خو په پاکستان کې د ډېری وروستیو حملو پړه د بلوڅانو د آزادي بښونکي پوځ په نوم وسله والې ډلې او د پاکستاني طالبانو تحریک یا ټي ټي پي منلې ده.

د آزادې اروپا، آزادۍ راډیو، د امریکا د نړیوالو رسنیو د ادارې او د دې ادارې د دوو چارواکو کېري لېک او ویکتور مورالیز پرضد محکمې ته شکایت کړی څو د دې راډیو د فدرال تخصیص د بندولو د هڅې مخه ونیسي.

ښاغلی مورالیز د متحدوایالاتو د نړیوالو رسنیو د ادارې سرپرست اجراییه رییس او مېرمن لېک یې جګپوړې سلاکاره ده.

په دعوه کې استدلال شوی چې د آزادې اروپا، آزادي راډیو ته د هغه تخصیص مخنیوی چې د امریکا کانګرس تصویب کړی له فدرال قوانینو او اساسي قانون سره په ټکر کې دی ځکه چې دا قوانین د فدرالي ادارو د لګښتونو په مسئله کې کانګرس ته ځانګړی صلاحیت ورکوي.

آزادۍ راډیو چې مرکز یې د چک جمهوریت په پلازمېنه پراګ ښار کې دی، خپل دا شکایت د واشنګټن ډي سي محکمې ته وړاندې کړی دی. د آزادې اروپا، آزادۍ راډیو عمومي رییس سټیفن کاپوس په یوه بیان کې ویلي دی باور لري چې دا دعوه ګټي او زیاتوي چې د دې راډیو د بندېدو لپاره د نړۍ په بېلابېلو هېوادونو کې د مستبدانو خوشالي له وخته مخکې ده.

پرون له دې مخکې د اروپايي ټولنې سیاستوالو وویل چې دوی به د آزادۍ راديو د احتمالي مالي ملاتړ په اړه هڅو ته دوام ورکړي.

د امریکا د فضايي تحقیقاتو د ادارې- ناسا دوه ستورمزلي چې د ۹ میاشتو لپاره په نړیوال فضايي سټېشن کې بند پاتې وو، نن د ځمکې پر لور وخوځېدل.

د اسوشیتیدپریس خبري آژانس د راپور له مخې بوچ ویلمور او سني ویلیامز له دوو نورو ستورمزلو سره د سپېس ایکس په یوه کپسول کې له نړیوال فضايي سټېشن څخه جلا شول او تمه ده تر ځمکې پورې د دوی سفر به اولس ساعته وخت ونیسي. امریکایی نېک هېګ او روسی الکساندر ګوربونوف په تېر مني کې په خپل سپېس ایکس کپسول کې نړیوال هوايي سټېشن ته ورسېدل.

ټاکل شوې وه چې مېرمن ویلیامز او ښاغلی ویلمور د تېرکال په جون میاشت کې د بویینګ په سټارلاینر ازمایشي فضايي کپسول کې ځمکې ته ستانه شي خو هغه مهال دا فضایي بېړۍ له ګڼو ستونزو سره مخامخ شوه او په نتیجه کې د ناسا دا کپسول بېرته تش ځمکې ته ستون شو.

د پلان له مخې د امریکايي میلیارډر ایلان ماسک د سپېس ایکس شرکت فضايي کپسول باید په تېره فبروري میاشت کې دا ستورمزلي ځمکې ته راوستي وای خو په دې پلان کې هم یوه میاشت ځنډ راغی.

له دې مخکې نورو ستورمزلو هم په فضا کې تردې ډېره موده تېره کړې ده خو د ښاغلي ویلمور او مېرمن ویلیامز کیسې ته ځکه پاملرنه ډېره شوه مخکې نور ستورمزلي هېڅکله له داسې یوه مبهم حالت سره نه وو، مخامخ شوي.