د سوداګرۍ او پانګونې خونه وایي، په روان میلادي کال کې د افغانستان د صادراتو کچه ۹۰۰ میلیونه امریکایي ډالرو ته رسېږي.

د سوداګرۍ او پانګونې خونې مرستیال یونس مهمند نن ازادي راډیو ته وویل، تېرکال افغانستان ۷۲۲ میلیونه ډالرو په ارزښت صادرات درلودل، خو سږکال دا کچه ۹۰۰ میلیونه ډالرو ته لوړه شوې او تر ټولو ډېر صادرات په تېرو درېیو میاشتو کې شوي دي.

ښاغلي مهمند د سپین بولدک د لارې بندیدو خبره ردوي او وایي چې د سپین بولدک سربېره اوس د تورخم، ډڼډپټان، غلام خان او نورو بندرونو له لارې هم د صادراتو په وړاندې کوم خنډ نشته.

په ورته وخت کې د طالبانو د حکومت مرستیال ویاند انعام الله سمنګاني هم پر خپل ټویټر لیکلي چې په تېرو درېیو میاشتو کې افغانستان ۱۱،۵۸ میلیارده افغانیو په ارزښت صادرات درلودل.

جاپان اعلان وکړ چې له افغانستان سره نولس نیم ملیون ډالره نوې مرسته کوي.

دا خبره په کابل کې د جاپان سفیر کینیچي ماساموتو د طالبانو د حکومت د کډوالو او بیرته راستنېدونکو چارو له وزیر مولوي عبدالکبیر سره د کتنې په مهال کړې.

د طالبانو تر کنټرول لاندې باختر خبري اژانس د جاپان د سفیر له قوله راپور ورکړی چې ویلي یې دي، دا مرسته د افغانستان له خلکو سره د جاپان د مرستو د لړۍ یوه برخه ده۔

په همدې حال کې، ایټالیا هم له افغانستان سره د ۲،۵ میلیونه یورو چې څه کم درې ملیونه ډالر کیږي، د نوې مرستې اعلان کړی.

په افغانستان کې د ملګرو ملتونو د بشري چارو د همغږۍ دفتر (اوچا) د دوشنبې په ورځ په خپله ایکسپاڼه کې له ایټالیا څخه د افغانستان له بشري صندوق سره د دې مرستې له امله مننه کړې او ویلي یې دي چې د دې صندوق دوامداره ملاتړ د بیړنیو حالاتو پر وړاندې د غبرګون او د هغو کسانو د ساتنې توان پیاوړی کوي چې له تر ټولوزیات له خطر سره مخ دي۔

دا په داسې حال کې ده چې اوچا مخکې ویلي وو، روان میلادي کال کې به شاوخوا ۲۱،۹ میلیونه کسان په افغانستان کې بشري مرستو ته اړتیا ولري۔

اوچا د ۲۰۲۵ کال د دسمبر په وروستیو کې هم اعلان کړی و چې افغانستان به په ۲۰۲۶ کال کې د نړۍ له سترو بشري بحرانونو سره مخ شي، داسې بحراني وضعیت چې د دې هېواد خلک له ساړه ژمي، پراخې بې ‌وزلۍ او د اسانتیاوو له کمښت سره مخامخ کوي۔

د افغانستان د کرکټ ملي لوبډلې د ویسټ انډیز په وړاندې لومړۍ شل اووریزه لوبه وګټله.

دا لوبه بېګا په دوبۍ کې وشوه.

افغان لوبډلې د ویسټ انډیز لپاره د ۱۸۲ منډو هدف ورکړی وو. ویسټ انډیز په شلو اورونو کې ۱۴۳ منډې وکړای شوې. افغانستان لوبه د ۳۸ منډو په توپیر وګټله او د ویسټ انډیز په وړاندې د دریو لوبو دا سیریز یې په یوې بریا سره پيل کړ.

اخوا تمه ده سبا د افغانستان د نولس کلنو د کرکټ ملي لوبډله په نړیوال جام کې له تانزانیا سره مخامخ شي۔

د افغانستان د کرکټ تر ۱۹ کلنو کم عمره ملي لوبډلې تردې مخکې په خپل ګروپ کې ویسټ ‌انډیز او جنوبي افریقا ته ماتې ورکړې.

په دې توګه، دا مهال د افغانستان د کرکټ تر ۱۹ کلونو کم عمره ملي لوبډله د نړیوال جام د ډي ګروپ په جدول کې په لومړي مقام کې ده۔

دا نړیوال جام د زیمبابوې او نامیبیا په ګډ کوربتوب پیل شوی.

د افغانستان، ویسټ ‌انډیز، جنوبي افریقا او تانزانیا لوبډلې په ډي ګروپ کې سیالۍ کوي.

د جایزو د دغه سازمان په رسمي پاڼه کې د خپرې شوې اعلامیې له مخې، د ۲۰۲۶ کال د انساني ورورګلوۍ لپاره د زاید جایزې ګټونکې د دوشنبې په ورځ (د جنوري ۱۹مه) اعلان شوې.

په اعلامیه کې ویل شوي زرقا یفتلي چې یوه زړوره او ژمنه ښځه ده د ښځو او ماشومانو لپاره د زده کړې د حق غوښتنې، په افغانستان او له هغه ورهاخوا تر یو لکو زیاتو کسانو ته د تعلیمي زمینې او رواني ټولنیز ملاتړ د چمتو کولو له امله ستایل شوې ده.

زرقا یفتلي ویلي چې د ۲۰۲۶ کال د ګټونکې په توګه د هغې انتخاب د افغان میرمنو لپاره "قوي او معنی لرونکی پیغام" لري.

د انساني ورورګلوۍ/اخوت لپاره د زاید جایزه یوه نړیواله جایزه ده چې د شیخ زاید بن سلطان النہیان په نوم نومول شوې او هغو اشخاصو یا ادارو ته ورکول کیږي چې د سولې، ګډ ژوند، د انسانانو ترمنځ د ورورګلوۍ، د مذهبونو د خبرو اترو او د انساني وقار لپاره یې غوره ونډه اخیستې وي.

نن د کابل په شهرنو سیمه کې یوې چاودنې ځینو کسانو ته مرګژوبله اړولې ده.
په کابل کې د طالبانو امنیه قومندانۍ ویاند خالد ځدراڼ په خپله ایکس پاڼه لیکلي چې چاودنه د کابل ښار د څلورمې حوزې اړوند د شهرنو ګلفروشي کوڅې په یوه هوټل کې شوې او تلفات یې اړولي دي.
هغه لیکلي چې د چاودنې د نوعیت په اړه پلټنې روانې دي.

مخکې د طالبانو په حکومت کې یوې بلې معتبرې سرچینې، چې د موضوع د حساسیت له امله یې د نوم د نه خپرېدو غوښتنه وکړه، ازادي راډیو ته تایید کړه چې ښايي پېښه د ماین د چاودنې له کبله رامنځته شوې وي.

د سرچینې په وینا، چاودنه، چې د کابل په وخت شاوخوا ۳:۰۰ بجې شوې، یو شمیر خلک پکې مړه او ټپیان شوي دي.

دغه طالب چارواکي نور جزییات ورنه کړل.

تر اوسه پورې، هیڅ چا یا ډلې د پیښې مسؤولیت په غاړه نه دی اخیستی.

ګڼو کورنیو رسنیو کې د دې چاودنې اړوند ویډیوګانې او عکسونه هم خپاره شوي.

د کابل په شهرنو سیمه کې نن ماسپیښین یوه چاودنه شوې ده.

د راپورونو له مخې چاودنه د شهرنو په ګلفروشي کوڅه کې شوې.

د طالبانو امنیتي چارواکو لا رسماً د دغه خبر تر لیکلو پورې د یادې چاودنې په اړه معلومات نه دي ورکړي.

ګڼو کورنیو رسنیو کې د دې چاودنې اړوند ویډیوګانې او عکسونه خپاره شوي.

خلکو ته د مرګژوبلې د اوښتې راپورونه هم ورکړل شوي.

د طالبانو تر کنټرول لاندې ملي راډیو ټلویزیون مرستیال هدایت الله هدایت بیا په خپله ایکس پاڼه ادعا کړې چې : «د ګلفروشۍ په کوڅه کې په یوه محلي رسټورانټ کې د کارکوونکو د بې احتیاطۍ له امله د ګاز ډبې چاودنه را منځته شوې.»

د افغانستان او ویسټ اندیز د کرکټ ملي ټیمونه نن په یوه نړیواله شل اووریزه لوبه کې سره مخ کېږي.

دا لوبه په دوبۍ کې ده چې د افغانستان په وخت به ماښام اوه بجې پیل شي.

افغانستان او ویسټ اندیز تر راتلونکي نړیوال شل اووریز جام مخکې دری شل اووریزې نړیوالې لوبې لري.

د ملي ټيم روزونکي جاناټن ټراټ په خبري کنفرانس کې وویل چې لوبغاړي دغو لوبو ته چمتو دي او د راتلونکي نړیوال جام تر مخه د مورال له پلوه د دغو لوبو ګټل خورا مهمه دي.

اخوا د افغانستان د نولس کلنو کرکټ ملي ټیم پرون ویسټ اندیز ته په نړیوال جام کې لویه ماته ورکړه.

افغان ځوانانو ۲۶۳ هدف ورکړی وو خو ویسټ انډيز په ۱۲۴ اوټ شو.

په دې ترتیب د افغانستان د نولس کلنو ملي ټیم دمګړۍ د نړیوال جام د ډي ګروپ لومړی مقام لري.

دوی په خپله اولنۍ لوبه کې جنوبي افریقا ماته کړې وه.

د کرکټ د نولس کلنوکم عمره لوبډلو د نړیوال جام سیالیو په ترڅ کې نن دوشنبې درې لوبې ترسره کیږي.

پاکستان له اسکاټلنډ، سریلانکا له ایرلنډ او جنوبي افریقا له تانزانیا سره لوبې کوي. په دې نړیوال جام کې چې لوبې یې نامیبیا او زیمبابوې کې ترسره کیږي، د افغانستان لوبډلې پرون یکشنبې خپله دوهمه لوبه چې له ویسټ انډیزسره وه، د ۱۳۶ منډو په توپیروګټله.

له دې مخکې افغانستان خپله لومړۍ لوبه له جنوبي افریقا څخه هم ګټلې وه. په خپل ګروپ کې د افغانستان دریمه لوبه د راتلونکې چهارشنبې په ورځ له تانزانیا سره ده.

افغانستان چې په خپل ګروپ کې یې تراوسه دواړه لوبې ګټلي دي د ګروپ تر ټولو لوړ مقام کې دی .

د برلین د فلمونومشهور نړیوال فستیوال به سږکال د افغان فلم جوړونکې شهربانو سادات له خوا په جوړ شوي فلم پرانیستل شي.

د برلینالي فیستیوال اعلامیه وايي د «No Good Men» په نوم فلم به د فستیوال پرانیستونکی فلم وي.

په اعلامیه کې د دې فستیوال د مشرې، تریشیا توتیل، له قوله ویل شوي چې: "شهربانو سادات د نړۍ په سینما کې له تر ټولو هیجانوونکو غږونو څخه یوه ده."

شهربانو سادات له دې وړاندې هم د خپلو فلمونو « لیوه او پسه» او «روزنتون» له لارې د نړۍ په نورو معتبرو فلمي فستیوالونو کې ګډون کړی دی.

د برلین د فلمونو دغه ۷۶ کلن فستیوال به د راتلونکې فبرورۍ میاشتې په ۱۲مه پیل شي.

برلینالي د اوسکار او ګولډن ګلوب ترڅنګ د نړۍ تر ټولو معتبرو هنري فلمي فستیوالونو څخه ګڼل کېږي، چې هر کال د جرمني په پلازمېنه برلین ښار کې تر سره کېږي.

د طالبانو د حکومت د کاراو ټولنیزو چارو وزارت وایي، د افغانستان په ټولو ولایتونو کې یې د هلکانو او نجونو لپاره په لسګونو جلا روزنتونونه پرانیستي او له خصوصي روزنتونونو څخه ماشومان په دغو روزنتونونوکې د ښوونې او روزنې لپاره ځای پرځای کیږي.

د دې وزارت ویاند سمیع الله ابراهیمي د یکشنبې په ورځ د طالبانو ترکنټرول لاندې ملي راډیو ټلویزیون ته وویل چې تراوسه پورې دا ډول شپیته دولتي روزنتونونه په ټول افغانستان کې فعال شوي چې شاوخوا لس زره نجونو او هلکانو ته پکې په جلاتوګه ښوونه او روزنه ورکول کیږي.

هغه وویل، د دې کارهدف دادی چې د ماشومانو د ښوونې او روزنې ته ځانګړې پاملرنه وشي.

دا په داسې حال کې ده چې په کابل کې د یوشمیرخصوصي روزنتونونو مسولینو د یکشنبې په ورځ ازادي راډیو ته وویل چې طالب چارواکوپه شفاهي ډول ورته ویلي چې خپل روزنتونونه وتړي.

د افغانستان شاوخوا ۵۰ ملي سوداګر نن بنګله دیش ته تللي څو له هغه هېواد سره د سوداګریزو اړیکو او د سوداګرۍ د کچې په لوړولو خبرې وکړي.

د طالبانو د حکومت د سوداګرۍ او صنعت وزارت په یوه بیان کې ویلي د دغه پلاوي مشري د یاد وزارت مرستیال احمدالله زاهد کوي.

د بیان په اساس د دغه سفر هدف د سوداګرو لپاره د نویو بازارونو موندل، د کورنیو محصولاتو لپاره د صادراتي فرصتونو زیاتول او د سیمه ایزې اقتصادي همکارۍ پياوړتیا ده.

دا پلاوی همداراز هڅه کوي چې د سوداګرۍ لپاره نوې لارې ولټوي ځکه د افغانستان او پاکستان تر منځ د لارو د تړل کېدو په سبب سوداګرو ته په سلګونو میلیونه ډالره زیان اوښتی.