په افغانستان کې د کم عمره ماشومانو لپاره د پولیو یا ګوزڼ ناروغۍ ضد د واکسین کمپاین پرون دوشنبه په پنځلسو ولایتونو کې پیل شو.

د روغتیا وزارت چارواکو ویلي و چې په ټولو ولایتونو کې به دغه کمپاین پرون پیل شي، خو د دې وزارت د پولیو د کمپاین یو همغږه کوونکي، نیک ولي شاه مومن پرون ناوخته ازادي راډیو ته وویل چې د واکسیناتورانو لپاره د روزنې پروګرام په پاتې ۱۹ ولایتونو کې نه و بشپړ شوی.

ښاغلي مومن زیاته کړه: "نورو پاتې ولایتونو کې چې تقریباً نولس ولایتونه کېږي، ټرینینګ مکمل شوی نه و، نو نن ورځ د هغو ټرینینګ مکمل شو او یوه اوونۍ وروسته د نوومبر په پنځلسمه د راتلونکې دوشنبې په ورځ په پاتې ولایتونو کې دغه کمپاین پیلیږي."

د روغتیا وزارت چارواکو ویلي چې د دغه کمپاین په ترڅ کې به چې په جوماتونو کې مخ ته وړل کېږي، له پنځو کلونو کم عمره نژدې لس میلیونه ماشومانو ته د پولیو واکسین او او هم به د شپږو میاشتو او پنځو کلونو ترمنځ نژدې نهه میلیونه ماشومانو ته د ویټامین اې تابلیت ورکړل شي.

د چارواکو په وینا په افغانستان کې سږکال د پولیو یوه مثبته پېښه ثبت شوې ده.

دافغانستان د تنکیو ځوانانو دتکواندو د ټیم دوه لوبغاړي نن سه شنبه په تاشکند کې نړیوالو سیالیو کې خپلو ساریو سره د لوبې میدان ته ځي.

دفدراسیون ویاند ذبیح الله شهزاد ازادي راډیو ته وویل چې مهدي یعقوبي د ارمنستان لوبغاړي دیوید دانیلیان سره لوبه کوي او د بریا په صورت کې به د پیرو لوبغاړي سره لوبه وکړي.

دغه راز سدیس سکندر د قرغیزستان لوبغاړي ارتور اسماعیلوف سره لوبه کوي او که بریالی شي نو اوکرایني لوبغاړي سره به لوبه وکړي.

د افغانستان د تنکیو ځوانانو د تکواندو ټیم ۴ لوبغاړي د تاشکند په نړیوالو سیالیو کې برخه لري.

دغه سیالۍ چې د یکشنبې په ورځ د وري په ۲۳ پیل شوې ددغې میاشتې تر ۲۸ مې دوام کوي.

د چارواکو په وینا ۱۱۶ هیوادونه او شاوخوا زر ورزشکاران په دې سیالیو کې برخه لري.

افغانستان کې د طالبانو د حکومت ستره محکمه په میدان وردګ او زابل ولایتونو کې د تعزیري سزاګانو د تطبیق خبر ورکوي.

د میدان وردګ په سیداباد ولسوالۍ کې د يوې ښځې په ګډون څلورو کسانو ته د زنا او لواطت په تور په عام محضر کې تعزیري سزا ورکړل شوې.

یاد کسان د ابتدائیه محکمې لخوا هریو په دوه کاله تنفيذي بند او ۳۹ دُرو تعزیري سزا محکوم شوي وو او دغه سزا د سترې محکمې له تائيد وروسته تطبيق شوې.

په زابل ولایت کې هم د سترې محکمې د خبرپاڼې په اساس، د شاه جوی ولسوالۍ د ابتدائیه محکمې د پریکړې له مخې یو کس ته چې په غلا متهم وو په عام محضر کې تعزیري سزا ورکړل شوه.

یاد کس په درې کاله تنفیذی حبس او ۳۹ درو محکوم شوی وو.

د بشري حقونو مدافع ډلې د طالبانو د حکومت لخوا په عام محضر کې د بدني سزاګانو تطبیق د انساني کرامت خلاف او له بشري حقونو څخه سرغړونه بولي خو طالبان وايی دا کار د شریعت له احکامو سره سم کوي.

افغانستان کې دطالبانو د حکومت د صنعت او تجارت وزارت وايي دافغانستان او ازبکستان د خصوصي سکتورونو ترمینځ د ۵۲۰ ملیون ډالرو په ارزښت د همکاري تفاهم لیکونه کابل کې لاسلیک شول.

د افغانستان دصنعت او تجارت وزارت خبرپاڼه وايي د دغو قراردادونو په اساس به افغانستان کې د وسپنې د ویلې کولو، د مالوچو د پروسس او دغه راز د سمنټو او د چرګانو د ساتنې او تولید د فابریکو په تاسیس کې همکاري کیږي.

د هوکړو په اساس به دافغانستان د ډبرو سکاره ازبکستان ته صادریږي او د دغه هیواد څخه به د موټرو پرزې واردیږي.

تیره اونۍ هم د ازبکستان په فرغانه کې د افغانستان د خصوصي سکتور او ازبکستان ترمنځ د څه باندې ۴۰۰ میلیونو ډالرو په ارزښت هوکړه لیکونه لاسلیک شول.

د افغانستان د سوداګرۍ او پانګونې خونې تیره سه شنبې پر خپلې ایکس پاڼې ولیکل چې دغه توافقات "د خامو موادو ، دواجوړونې او نساجۍ په برخو کې د دواړو هېوادونو د سوداګرو له خوا لاسلیک شول".

که څه هم د ازبکستان په ګډون د منځنۍ اسیا هېوادونه د طالبانو حکومت په رسمیت نه پیژني، خو د سوداګرۍ په برخه کې ورسره پراخې اړیکې پالي.

د ماشومانو د ګوزڼ ضد ناروغۍ (پولیو) د واکسین کمپاین، نن دوشنبه د حمل میاشتې په ۲۴مه پیل شو.

په دې کمپاین کې شاوخوا دولس میلیونه او شپږ سوه زره له پنځو کلونو کم عمره ماشومان په افغانستان او پاکستان کې واکسینېږي.

« له پولیو څخه پاک افغانستان» ادارې او د طالبانو د حکومت د عامې روغتیا وزارت ویلي چې دا کمپاین به د بامیان، دایکندي او غور ولایتونو پرته د افغانستان په نورو ټولو ولایتونو کې ترسره شي.

ویل شوي چې دا کمپاین به یوه اوونۍ وروسته په غور کې پیل شي، او په بامیان او دایکندي کې به د سړې هوا له امله په ځنډ سره پیل شي.

ټاکل شوې ده چې دا کمپاین به د حمل تر ۲۶مې پورې په افغانستان او پاکستان کې دوام وکړي.

دا دواړه هغه یوازیني هېوادونه دي چې لا هم پکې پولیو په بشپړه توګه له منځه نه ده تللې

د طالبانو حکومت تایید کړه چې وروستیو سیلابونو لږ تر لږه ۱۰ نور کسان هم مړه کړي دي.

له پېښو سره د مبارزې ادارې د یکشنبې په ورځ په یوه بیان کې ویلي چې په ځینو ولایتونو کې د بارانونو، سېلابونو، د دیوالونو د نړېدو او غره ښوویېدنې په پېښو کې لس کسان مړه او ۱۵ نور ټپیان شوي.

همدارنګه څه باندې ۱۰۰ هستوګن کورونه هم ړنګ شوي.

په دې سره په افغانستان کې تېر څه باندې دوه اوونۍ سیلابونو او د کورونو د ړنګېدو په پېښو کې ۱۸۹ مړه او ۲۵۲ نور کسان ټپیان شوي.

د دوشنبې لپاره د افغانستان اکثرو سیمو کې هوا نسبتاً ښه بلل شوې خو په سالنګونو کې د سړې هوا او شدید بادونو او په نورستان کې د هوا د سړېدو اټکل شوی.

د افغانستان د کرکټ د ملي ټیم لوبغاړي په کابل او ننګرهار کې تمریني کمپونه او سیالۍ کوي.

د کرکټ د ملي ټيم مشر روزونکي ریچارډ پایبس په کابل کې یوې خبري ناستې ته وویل چې دا تمرینونه نږدې راتلونکي کې له هند سره د یوې ټیسټ او دریو یو ورځنیو لوبو د ښه چمتووالي لپاره کېږي.

ښاغلي پایبس وویل په اوسنیو تمرینو او سیالیو کې به د ټیم ټاکونکې ډله او لوبډلمشران لوبغاړي وڅاري او تر ټولو تکړه لوبغاړي به د هند لپاره انتخاب کړي.

د افغانستان د ټیسټ او یو ورځنیو لوبو کپټان حشمت الله شهیدي وویل لومړۍ اوونۍ په کابل او بیا وروسته ننګرهار کې لوبې او تمرینونه کېږي.

هغه زیاته کړه چې په دغو تمرینونو کې به په نیمګړتیاوو باندې ډېر کار وشي.

تمه ده د افغانستان د کرکټ ملي ټيم د جون په شپږمه له هند سره ټیسټ لوبه پیل کړي. د جون په ۱۴مه، ۱۷مه او ۲۰مه به درې یو ورځنۍ لوبې وکړي.

په افغانستان کې د ملګروملتونو مرستنیدونه ماموریت یوناما تایید کړه چې تېره جمعه په په هرات کې یوولس تنه ملکیان په ډزو سره وژل شوي.

یوناما یکشنبې په یوه اعلامیه کې ویلي "د جمعې په ورځ د هرات په انجیل ولسوالۍ کې پر ملکي شعیه ګانو د وسله والو په ډزو کې یوولس کسان وژل شوي او ۱۱ نور ټپیان شوي دي".

په اعلامیه کې راغلي،"په وژل شویو او ټپیانو کې ښځې او ماشومان هم شامل دي".

په افغانستان کې د ملګرو ملتونو د سرمنشي ځانګړې استازې جورجیټ ګاګنون ویلي،"موږ د دغې وحشتناکې غمیزې د قربانیانو کورنیو ته تسلیت وایو او ټپیانو ته روغتیا هیله کوو".

ګاګنون د طالبانو له حکومته د دې پېښې په اړه د څیړنو غوښتنه وکړه.

د طالبانو حکومت مخکې ویلي و چې په دې پېښه کې ۱۱ کسان وژل شوي او ۷ نور ټپیان دي.

تراوسه د دغه برید مسولیت چا یا کومې ډلې منلی نه دی.

په جرمني کې شمیر افغانان "پریږدئ افغانې نجونې زده کړې وکړي" په نوم یو ملي کمپاین پیلوي.

پرون شنبې د (حمل۲۲مه) په پلازمینه برلین کې د ملي مرکې په نوم د یو بنسټ له خوا یوه غونډه رابلل شوې وه چې په کې د برلین میشتو علمي، سیاسي او ټولنیزو فعالانو ګډون کړی وو.

د غونډې د کډونوالو په ټکو، د ناستې اجندا ملي ډیالوګ، ټولنیز عدالت او د افغانانو ترمنځ د زغم فرهنګ رامنځته کول وو.

کډونوالو یو ځل په افغانستان کې د طالبانو له خوا پر افغان نجونو د زده کړو بندیز ته غبرګون ښودلی او ویلي دي چې دغه بندیز د افغان نجونو پر وړاندې "ظلم" او د افغانستان د ملي ګټو خلاف بللی دی.

په پرونۍ ناسته کې برلین میشتو افغانانو پریکړه چې د افغان نجونو د غږ پورته کولو په موخه "پریږدئ افغانې نجونې زده کړې وکړي" ملي کمپاین پیل کړي.

د ملي مرکې په نوم په برلین کې د میشتو افغانانو بنسټ له دې مخکې هم د طالبانو له خوا پر افغانو نجونو د زده کړو د بندیز په اړه ورته ناسته جوړه کړې وه.

هالنډ میشتو افغانانو پر افغانستان د پاکستان وروستي بریدونه او په کې د ملکیانو مرګژوبله غندلی ده.

په لسهاوو کسان پرون شنبې د (حمل۲۲مه) د هالنډ په امسټردام ښار کې راټول شوي وو او له نړیوالې ټولنې يې وغوښتل چې په افغانستان کې د پاکستان د بریدونو او د دوی په ټکو "د بشري جنایت" پر وړاندې اقدام وکړي.

د لاریون کوونکو په خبره،"د عام افغانانو په نښه کول له بشري نړیوالو حقونو ښکاره سرغړونه ده".

لاریون کوونکو د جرمونو له نړیوالې محکمې هم غوښتنه کړې چې د پاکستان پوځ او پر عام افغانانو په بریدونو کې ښکیل پاکستاني چارواکي د عدالت محکمې ته راکش کړي.

د افغانستان او پاکستان ترمنځ د فبرورۍ میاشتې راهیسې جګړه او تاواتریخوالی روان دی.

د طالبانو حکومت به رسمي ډول ادعا کړې چې د تېرې فبرورۍ له ۲۲ مې د پاکستان په هوايي او ځمکنیو حملو کې ۷۶۱ ملکي افغانان وژل شوي، ۶۲۲ ټپیان شوي دي او له ۲۷ زره زیاتې کورنۍ له خپلو اصلي مېنو بې ځایه شوي دي.

پاکستان بیا ادعا لري چې په افغانستان کې د ترهګرو پټنځایونه په نښه کوي.

پرون شنبې نژدې څلور زره افغان کډوال له ایران او پاکستانه بیرته افغانستان ته راستانه شوي دي.

د کډوالو په چارو کې د طالبانو د حکومت عالي کمیسیون د شنبې په ورځ د (حمل۲۲مه) وویل،"۶۹۶ کورنۍ چې ۳۸۵۹ کسان کیږي د تورخم او سپین بولدک له لارې راغلي دي".

د دغه کمیسیون په ټکو، ۴۳ نور افغان کډوال له ایرانه راستانه شوي.

له ایران او پاکستانه په وروستیو کې د افغان کډوال اخراج د پخوا پرتله زیات شوی دی.