د لاسرسۍ وړ لېنکونه

تازه خبر
شنبه ۱۳ لیندۍ ۱۴۰۰ کابل ۰۲:۵۴

افغانستان

طالبان: مزارشریف کې د ۴ ښځو د وژلو په تور۲ کسان نیول شوي

ارشیف

د طالبانو د حکومت د کورنیو چارو وزارت وايي چې په مزارشریف ښار کې د ۴ ښځو د وژل کېدو د قضیې په تړاو دوه کسان نیول شوي دي.

د کورنیو چارو وزارت ویاند سعید خوستي په یو بیان کې چې نن خپور شو ویلي چې د دې کسانو دوسیې محکمې ته راجع شوي دي.

د نوموړي په وینا د دې ښځو مړي د مزارشریف په پنځمه ناحیه کې په یو کور کې موندل شوي دي.

د راپورونو له مخې په دې قرباني مېرمنو کې یوه ۲۹ کلنه فروزان ساپۍ وه چې د پوهنتون استاده او د ښځو د حقونو فعاله وه.

په همدې حال کې په بلخ کې د ښځو د حقونو یوه فعاله چې نه غواړي نوم یې واخیستل شي ازادي راډیو ته وویل چې دې ولایت کې په څو جلا پېښو کې د یو شمېر ښځو وژنه دا او نورې مېرمنې ډېرې اندېښمنې کړي: "موږ اوس خوندي نه یو او تر ډېره له یوه ځایه بل ځای ته ځو چې ونه پېژندل شو. هغه ښځې چې زما په څېر یې کار کاوه اوس مجبوره دي چې پټې شي."

تېره اوونۍ رسنیو راپور ورکړ چې په مزارشریف کې په دوو جلا پېښو کې ۶ ښځې وژل شوي دي.

د راپورونو له مخې په لومړۍ پېښه کې څلور مدني فعالانې او په دوهمه پېښه کې دوه ښځې وژل شوي دي.

د ورځې تازه خبرونه دلته ولولئ

'UNHCR': په کور دننه درې نیم میلیونه افغانان روان کړکېچ بې ځایه کړي

ارشیف، هرات کې یوه بې ځایه شوې کورنۍ

د کډوالو لپاره د ملګرو ملتونو عالي کمېشنرۍ وايي، په افغانستان کې دننه درې نیم میلیونه کسان د روان کړکېچ له کبله بې ځایه شوي چې له دې ډلې ۷ لکه کسان یوازې په ۲۰۲۱ میلادي کال کې د خپلو مېنو پرېښودو ته اړ شوي دي.

د UNHCR ویاند بابر بلوچ پرون جمعه (د لېندۍ ۱۲مه) په جنیوا کې خبریالانو ته وویل چې د دې کسانو د لاسنیوي لپاره نورو بشري مرستو ته اړتیا ده.

ښاغلي بلوچ زیاته کړه چې دا خلک سرپناه، خوړو او نورو لومړنیو شیانو ته اړتیا لري: "ډېری کورنۍ له سختې یخنۍ دخلاصون لپاره مناسبې سرپناه او نورو ضروري شیانو ته اړتیا لري. لوږه په دې هېواد کې د اټکل له کچې لوړه شوې ده. نژدې ۲۳ میلیونه افغانان چې د هېواد د ټولو وګړو په سلو کې نژدې ۵۵ جوړوي، له سختې لوږې او شااوخوا نهه میلیونه کسان د قحطۍ له خطر سره مخ دي."

د 'UNHCR' ویاند زیاته کړه چې ملګري ملتونه هره ورځ شااوخوا ۶۰ زره افغان وګړو ته بشري مرستې رسوي، خو د بابر بلوچ په وینا د مرستو د رسولو پر مهال دوی له زرګونه نورو کسانو سره هم مخامخ کېږي چې مرستو ته اړ دي.

اروپايي ټولنه: د پناه غوښتونکو افغانانو شمېر د پام وړ زیات شوی

ارشیف، ځینې افغانان

په اروپايي ټولنه کې د پناه غوښتونکو افغانانو په شمېر کې د تېرو پنځو کلونو پرتله د پام وړ زیاتوالی راغلی.

د اروپا د پناه غوښتونکو د ملاتړ اداره چې د اروپايي ټولنې په ۲۷ غړو هېوادو، ناروې او سویس کې د کډوالو ارقام ثبتوي، پرون د لیندۍ په ۱۲مه نېټه وویل چې تردې دمه ۷۱۲۰۰ کسانو د سیاسي پناه غوښتنه کړې.

د دې ادارې په وینا له ۲۰۱۶ کال راهیسې دا تر ټولو لوړ رقم دی او په داسې حال کې ده چې یوازې په یوه وروستۍ میاشت کې اروپا ته د رسېدونکو افغانانو په شمېر کې په سلو کې ۷۲ زیاتوالی راغلی.

طالبانو د اګسټ په پنځلسمه پر ټول افغانستان ولکه ټینګه کړه.

د اروپايي ټولنې د ارقامو له مخې په اګسټ کې د افغان پناه غوښتونکو شمېر لس زرو ته رسېده په داسې حال کې چې دا رقم په سېپټمبر کې ۱۷۳۰۰ ته لوړ شو.

کریملین: پوتین به له بایډن سره پر افغانستان هم وغږیږي

ارشیف، د امریکا ولسمشر جوبایډن له ولسمشر ولادیمیر پوتین سره

کریملین وايي، ولسمشر ولادیمیر پوتین به د امریکا له ولسمشر جو بایډن سره په را روانه غونډه کې پر نورو مسایلو سربېره پر افغانستان هم خبرې وکړي.

د کریملین یوه سلاکار یوري اوشاکوف پرون د لیندۍ په ۱۲مه وویل چې د دې انلاین سرمشریزې لپاره په راتلونکو ورځو کې یوه احتمالي نېټه په پام کې نیول شوې، خو مسکو ګوري چې واشنګټن به یې کله تایید کړي.

اوشاکوف زیاته کړه چې په دې سرمشریزه کې به د افغانستان، لیبیا، سوریې، ایران او نورو هېوادونو پر اړوندو مسایلو خبرې وشي.

د اوشاکوف په وینا پوتین همدا راز غواړي، بایډن ته د امنیتي ضمانتونو د هغې طرحې خبره وریاده کړي چې له مخې یې باید د ختیځ پر لور د ناټو د پراختیا مخه ونیول شي او هغه څه ته چې مسکو یې د اوکراین په ګډون د روسیې ګاونډیانو ته د ګواښونکو وسلو استول بولي، د پای ټکی کېږدي.

د طالبانو رهبر د افغان ښځو د ځينو حقونو په اړه نوی فرمان ورکړ

د طالبانو رهبر ملا هبت‌الله انځور او د طالبانو د بيرغونو ترڅنګ ولاړ ځيني وسله‌وال طالبان

د طالبانو رهبر ملا هبت‌الله اخندزاده په یوه فرمان کې د اسلامي شریعت په چوکاټ کې د ښځو د حقونو د ځینو برخو پر عملي کېدو ټینګار وکړ.

د دغه فرمان چې شپږ مادې لري او نن خپور شوی، په لومړۍ ماده کې راغلي چې د نکاح په وخت کې د نجونو رضایت ضروري دی، خو چې د طالبانو د مشر په وینا د فتنې او فساد خطر په کې نه‌وي.

د فرمان په دوهمه ماده کې راغلي چې ښځه مال نه، بلکې اصیل او ازاد انسان دی او هېڅوک‌یې چا ته د روغې په بدل کې په بدو کې نه‌شي ورکولای.

په فرمان کې د نجونو او ښځو د تعلیم او کار د حق په باب څه نه‌دي ویل شوي، هغه څه چې په افغانستان کې دننه او نړۍ کې ورباندې اندېښنې ښوول شوې دي.

وروسته له هغې چې طالبانو د اګسټ میاشتې په نیمايي کې پر افغانستان ولکه ټینګه کړه، نجونې په اکثرو ولایتونو کې تر شپږم ټولګي پورته د تعلیم اجازه نه‌لري، د دولتي ادارو ډېری ښځینه کارکوونکې هم د کار له حقه بې‌برخې شوې دي.

له طالبانو د محمود خان اڅکزي غوښتنه: یو ټول‌ګډونه حکومت جوړ کړئ

د پښتونخوا ملي عوامي ګوند مشر محمود خان اڅکزی

د پښتونخوا ملي عوامي ګوند مشر محمود خان اڅکزي له طالبانو غوښتي چې له افغان سیاستوالو سره یو ټول‌ګډونه حکومت جوړ کړي.

نوموړي پرون په کوټه کې د ګوند د بنسټګر عبدالصمد خان اڅکزي د ۴۸م تلین په مناسبت غونډه کې دا خبره وکړه.

هغه زیاته کړه چې په تېرو څه د پاسه ۴ لسیزو کې په افغانستان کې تاوتریخوالی او بې‌ثباتي تر ټولو زیات افغانان ځپلي دي او اوس په‌کار ده چې دوی سره لاسونه ورکړي.

ده وویل: "وه ملا طالبه! وه ملا پلانی اخونده! وه کرزی صاحبه! لاس به ورکوو د افغانستان استقلال به خوندي ساتو. داسې یو حکومت، پراخ بنسټه حکومت چې په‌کې ټول افغانان ازبک او تاجک دا ټول جمع وي."

محمود خان اڅکزي داسې مهال دا څرګندونې کړي چې د اګسټ له نیمايي راهیسې له کله چې طالبان واک ته رسېدلي نړیواله ټولنه هم افغانستان کې د ټول‌شموله حکومت په جوړېدو ټینګار کوي.

طالبان سره له دې چې اوسنی حکومت لنډمهالی بولي، خو وايي چې حکومت‌یې ټول‌شموله دی.

د امریکا ځانګړي استازي له قطري چارواکو سره د افغانستان په اړه خبرې وکړې

د افغانستان لپاره د امریکا ځانګړي استازي سره د قطر بهرنیو چارو وزیر او د دغه هېواد د ملي امنیت سلاکار لیدنه

د افغانستان لپاره د امریکا ځانګړي استازي ټام وېسټ له لوړپوړو قطري چارواکو سره د افغانستان په مسئله خبرې کړي.

ټام وېسټ نن په خپل ټوېټر د دې لیدنې په اړه لنډ لیکلي.

هغه زیاته کړې چې د امریکا د یوه نږدې متحد قطر هېواد د بهرنیو چارو له وزیر محمد بن عبدالرحمن ال ثاني او د دغه هېواد د ملي امنیت له سلاکار محمد ال مسناد سره‌یې د افغانستان د راتلونکي په اړه بحث کړی. ټام وېسټ په دې ټویټ کې لیکلي چې د قطر ملاتړ او فعالیت د ستایلو دی.

قطر په دوحه کې د طالبانو د سیاسي دفتر کوربه دی او وخت ناوخته له امریکایانو او نورو چارواکو سره د افغانانو غونډې جوړوي.

د افغانستان لپاره د امریکا ځانګړي استازي ټام وېسټ د دې اوونۍ سر کې د طالبانو د بهرنیو چارو د سرپرست وزیر امیرخان متقي په مشرۍ له یوه لوړپوړي پلاوي سره هم دوه ورځې غونډې وکړې.

طالبان وایي د معتادینو د درملنې د تر ټولو ستر مرکز ظرفیت‌یې لوړ کړی

کابل کې د معتادینو د درملنې یو مرکز

د طالبانو حکومت کورنیو چارو وزارت وایي، پر نشو د روږدو کسانو د درملنې د تر ټولو ستر مرکز ظرفیت‌یې لوړ کړی دی.

د دغه وزارت ویاند سعید خوستي ویلي، پلازمېنه کابل کې دې مرکز پخوا د زرو روږدو د درملنې وړتیا درلوده، خو اوس په یوه وخت درې زره کسان په‌کې تداوي کېدای شي.

ښاغلي خوستي پرون د نشه‌یي توکو په وړاندې د مبارزې معینیت له مسؤلانو سره له دې مرکزه د لیدنې پر مهال وویل: "د اسلامي امارت پلان دا دی چې په کابل ښار کې او په ولایتونو کې چې څومره معتادین دي، راټول کړل شي او علاج‌یې وشي. دا خلک واقعاً د رحم وړ دي، دوی مریضان دي، مجرمین نه‌دي."

د طالبانو کورنیو چارو وزارت وایي، د سړې هوا په رارسېدو یې د کابل له بېلابېلو سیمو نږدې درې زره معتادین راټول کړي او د درملنې مرکزونو ته‌یې استولي دي.

په افغانستان کې د معتادینو د کره شمېر په اړه تازه څه نه‌دي خپاره شوي، خو پخوانیو سروې‌ګانو کې ویل شوي چې شااوخوا درې ملیونه کسان په‌کې په نشو روږدي دي.

د طالبانو لوی درستیز: د یوه پیاوړي پوځ د جوړولو لپاره هڅې روانې دي

ارشیف، د طالبانو د بدري ۳۱۳ قطعې یو شمېر سرتېري

د طالبانو حکومت پوځي چارواکي وایي، د یوه پیاوړي پوځ د جوړولو لپاره‌یې هڅې روانې دي.

د طالبانو د وسله‌والو ځواکونو لوی درستیز قاري فصیح‌الدین دا خبرې پرون په پکتیا کې ۲۰۳ تندر قول اردو کې چې اوس د منصوري قول اردو په نوم ده، وکړې.

هغه خبریالانو ته وویل، د اردو په لیکو کې د پخواني حکومت مسلکي کسانو ته هم ځای ورکوي.

دی زیاتوي: "هغه کسان هم جذبېږي چې پخوانۍ اردو کې یې روزنه ترلاسه کړې او مسلکي دي، دا به هغه کسان وي چې فساد کې ښکېل نه‌وو."

تر دې وړاندې د طالبانو د بهرنیو چارو سرپرست وزیر امیر خان متقي هم ویلي و چې د دوی په پوځ کې به د پخواني حکومت ټیټ پوړه سرتېرو ته ځای نه‌وي.

د محمد اشرف غني په مشرۍ د افغانستان پخواني حکومت شااوخوا درې نیم لکه پوځیان، پولیس او د ملي امنیت سرتېري درلودل، خو د طالبانو د بهرنیو چارو وزیر پاکستان ته د خپل وروستي سفر پر مهال وویل، په هغه کمیت کې اردو ته اړتیا نه‌لري.

طالبان: ویاندویان مکلف دي چې د اړتیا په صورت کې رسنیو ته معلومات ورکړي

د طالبانو ویاند او د اطلاعاتو او فرهنګ وزارت مرستیال ذبیح‌الله مجاهد

د طالبانو حکومت وایي، په کابل او ولایتونو کې یې ویاندویان مکلف دي چې د اړتیا په صورت کې رسنیو ته معلومات ورکړي.

دا خبره د طالبانو ویاند او د اطلاعاتو او فرهنګ وزارت مرستیال ذبیح‌الله مجاهد پرون خپلو ویاندویانو ته د یوه روزنیز پروګرام په پای کې وکړه.

دې غونډې ته د رسنیو ځیني مسؤلان هم ورغوښتل شوي وو چې هغوی له طالبانو نه اطلاعاتو ته د لاسرسي په برخه کې د همکاریو د زیاتوالي غوښتنه وکړه.

طالبانو پرون د ۲۵ وزارتونو او ادارو لپاره خپل ټاکل شوي ویاندویان هم رسنیو ته وروپېژندل.

د افغانستان د خبریالانو ملي ټولنې څه موده وړاندې په یوه نظر پوښتنه کې ویلي و چې د طالبانو په راتګ ۷۵ سلنه رسنۍ تړل شوي او اطلاعاتو ته لاسرسی هم ستونزمن شوی دی.

طالبانو په ارزګان کې ۱۴ تنه د جنایي جرمونو په تور نیولي

ارزګان کې یو شمېر نیول شوي کسان

په ارزګان کې د طالبانو ځایي چارواکي وایي چې له تېرې یوې میاشتې راهیسې یې ۱۴ تنه د جنایي جرمونو په تور نیولي دي.

د ارزګان ولایت لپاره د طالبانو د والي ویاند او د اطلاعاتو او فرهنګ رئیس محمد اصف ازادي راډيو ته وویل چې دغه کسان عدلي او قضايي ارګانونو ته سپارل شوي دي.

نوموړي وویل چې دغه ولایت کې امنیتي وضعیت په ښه کېدو دی.

دا په داسې حال کې ده چې په دې وروستیو کې په ارزګان ولایت کې د انسان تښتوونکو، غلاو او نورو جنايي جرمونو کچه لوړه شوې چې خلک‌یې لامل د خلکو او یا هم د ځوانانو بې‌کاري یادوي.

کابل کې لسګونه ښځو د عدالت غوښتنې په پار اعتراضي ناسته وکړه 

ارشیف، کابل کې د مېرمنو اعتراض

نن په کابل کې لسګونه ښځو له یوه سرپټي ځایه د عدالت غوښتنې په پار اعتراضي ناسته وکړه.

دغو ښځو په یوه ویډیو کې چې ازادي راډيو ته یې استولې ویلي چې بهر د لاریون لپاره وتلی نه شي او ادعا کوي چې د طالبانو له خوا په مرګ ګواښل شوې دي: "موږ په مرګ ګواښل شوي یو. موږ واټونو ته نه شو وتلی یعنې خپل غږ بهر نه شو پورته کولی. مجبوره یو چې د عدالت غوښتنې غږ له سرپټو ځایونو پورته کړو او له نړیوالې ټولنې وغواړو چې زموږ پیغامونه ولولي. موږ څه غواړو همدا چې ښوونځي باید پرانیستل شي او ښځې د زده کړو او کار حق لري."

دغو ښځو له دې مخکې د کابل ښار په بېلابېلو سیمو کې د مظاهرو هڅه کوله، خو اکثر د طالبانو له خوا نه پرېښودل کېدې او د راپورونو له مخې ان ځینې وخت د طالبانو وسله والو وهلې هم دي.

'IRC' موسسې لوګر کې له بزګرو سره نغدي مرستې کوي

ارشیف، عکس تزئیني بڼه لري

د 'IRC' موسسې په لوګر ولایت کې پر بزګرو څه باندې لس میلیونه افغانۍ د نغدي وېش لړۍ پیلوي.

د کرنې وزارت ویاند مستعین عمري ازادي راډیو ته وویل، دغه لړۍ د لوګر ولایت د کرنې ریاست په مرسته پیل شوی او په ترڅ کې به یې هر بزګر ته ۱۷ زره او ۵۸۰ افغانۍ ورکړل شي.

د دغو مرستو هدف په لوګر ولایت کې د کرنې وده بلل شوی.

د لوګر ولایت اکثریت اوسیدونکی په کرنه بوخت دي او هرکال مڼې، انګور، زردالو، شفتالو، غنم، جوار او لسګونه نور کرنیز توکي نورو ولایتونو ته لېږي.

طالبان: د ځنګلونو د پرې کولو مخنیوي لپاره خوست ته یو پلاوی تللی

ارشیف، عکس تزئیني بڼه لري

د کرنې اوبو لګولو او مالدارۍ وزارت وایي، د ځنګلونو د پرې کولو او بهر ته د هغو د قاچاق د څېړلو او مخنیوي لپاره یې یو پلاوی خوست ولایت ته لېږلی دی.

د کرنې وزارت ویاند مستعین عمري ازادي راډیو ته وویل، دغه پلاوی د یاد وزارت د اوبو لګولو او طبیعي زېرمو معین په مشرۍ خوست ته تللی.

ښاغلی عمری وایي: "ځنګلونه د افغانستان طبیعي شتمني ده او د طالبانو حکومت د دغې شتمني ساتلو ته ژمن دي، له همدې امله به ډېر ژر د ځنګلونو د غیرقانوني پرېکولو او بهرته د هغو د قاچاق مخنیوي طرحه جوړه او کابینې ته وړاندې شي."

د ښاغلي عمري په خبره دغه راز د طالبانو حکومت کابینې پرېکړه کړې چې یو کمېټه دې جوړه شي، څو د لرګیو د انتقال لپاره یو مشخص وخت وټاکل شي، څو یې د قاچاق مخنیوی وشي.

سور صلیب: وچکالۍ افغانستان له ناوړه اقتصادي وضعیت سره مخ کړی

افغانستان کې بې ځایه شوي کډوال

د سره صلیب او سرې میاشتې نړیوال فدراسیون خبرداری ورکوي چې سږکال افغانستان د وچکالۍ له امله له ناوړه اقتصادي وضعیت سره مخ دی.

د دغه فدراسیون په یوه اعلامیه کې راغلي، چې همدا اوس څه ناڅه ۲۲ میلیونه افغانان د خوراکي موادو له جدي کموالي سره مخ دي، ځکه وچکالي ۸۰ سلنه کرنېزې ځمکې اغېزمنې کړي، خلک یې د خپلو سیمو پریښودو ته اړ کړي.

د سره صلیب او سرې میاشتې نړیوال فدراسیون ویلي چې دوی هڅه کوي په روان ژمي کې درې زره ټنه خوراکي توکي په دوه لکه او لس زره اړمنو افغانانو وویشي.

په اعلامیه کې د دغه فدراسیون د اسیا د برخې اجرائیه رییس له خولې ویل شوي چې همدا اوس خلک له لوږې او سړو سره مخ دي او که مرستې په خپل وخت ونه رسېږي، نو یو انساني ناورین به رامنځته شي.

ملګرو ملتونو د نړۍ ډېرو زیانمنونکو لپاره مرستې غوښتې

افغانستان کې بې ځایه شوي کډوال

ملګرو ملتونو د نړۍ له ډېرو زیانمنونکو سره د مرستې لپاره د ۴۱ میلیارد ډالرو غوښتنه کړې ده.

د ملګرو ملتونو د بشري مرستو د همغږۍ ادارې اوچا د راتلونکو اړتیاوو په کلني سند کې چې نن یې خپور کړی ویلي، دا ۴۱ میلیارد ډالره د ۲۰۲۲ میلادي کال په مخه په شااوخوا ۶۳ هېوادونو کې ۱۸۳ میلیونو سختو اړمنو او زیانمنونکو کسانو ته د ژوند ژغورونکو لاسنیویو لپاره اړینې دي.

ملګري ملتونه معمولاً د خپلو مرستندویه پروګرامونو لپاره د نړۍ له بډایه هېوادونو او تمویلونکو خیریه بنسټونو د مرستو غوښتنه کوي.

د اوچا په خبره افغانستان د اړمنو او زیانمنونکو هېوادونو په سر کې دی ځکه د خلکو اړتیاوې یې په بې سارې کچه مخ په زیاتېدو دي.

د اوچا ادارې خبرداری ورکړی چې په افغانستان کې ۲۴ میلیونه کسان چې د دغه هېواد ۶۵ فیصده نفوس جوړوي ژوند ژغورونکو مرستو ته اړتیا لري او له دې ډلې یې نهه میلیونه له قحطۍ سره مخ دي.

د ملګرو ملتونو ادارې او همکارانو یې وړاندوینه کړې چې په افغانستان کې د ۲۰۲۲ میلادي کال په مخه له خلکو سره د مرستو لپاره څلور نیم میلیارد ډالرو ته اړتیا ده.

نور راوښيه

XS
SM
MD
LG