د وینزویلا د حکومت سیاسي‌ مخالف ګونزالیز اوروتیا (Gonzalez Urrutia) چې ځان د جولای د اته ویشتمې نېټې په ولسمشریزو ټاکنو کې بریالی بولي، اسپانیې ته تښتیدلی دی.

فرانس پریس اژانس لیکلي، چې نوموړی پرون یک‌شنبه مادرید ته رسېدلی او ژمنه یې کړې چې له همغه ځایه به د وینزویلا (د ازادۍ او ډیموکراسۍ) لپاره خپلې مبارزې ته دوام ورکړي.

په وینزویلا کې چې د جنوبي امریکا یو هېواد دی، تر وروستیو ولسمشریزو ټاکنو وروسته وضعیت کړکېچن شوی او دغه سیاسي مشر یې په پټه مبارزې پلانولې.

په هغو ټاکنو کې نیکولاس مادورو چې برحاله ولسمشر و، بریالی شوی دی، خو مخالفان یې د هغه بریا نه مني.

د وینزویلا د اپوزیسیون مشرې ماریا کورینا مچادو ویلي، اوروتیا ځکه له وینزویلا جلا وطنه شو چې هلته یې ژوند په خطر کې و.

اولاف شولڅ له زي دي اف رسنۍ سره په مرکه کې چې پرون خپره شوې ویلي، اوس یې وخت دی چې د اوسنيو جنګي حالاتو پر ځای سولې ته د رسېدو په اړه بحث وشي.

هغه ویلي دي، د اوکراین ولسمشر ولودومیر زیلينسکي په وروستۍ لیدنه کې په‌دې سلا وو چې د روسیې په ګډون د سولې یو کنفرانس باید جوړ شي.

اولاف شولڅ په کور دننه تر انتخاباتو د مخه له فشارونو سره مخ دی، ځکه د هغه ملاتړو ګوندونو د هغو ګوندونو په وړاندې سختې ماتې خوړلي چې له مسکو سره د ښو اړیکو په لټه کې دي.

د جرمني صدراعظم داسې وخت د اوکراین د سولې لپاره په نویو هڅو ټینګار کړی، چې په اوکراین د روسیې بې درېغه بریدونه لا هم دوام لري.

پاکستان د تحریک انصاف (پي‌ټي‌ای) ګوند پلویانو له اسلام‌اباد سره نژدې په غونډه کې د خپل زنداني رهبر عمران خان د خوشې کولو غوښتنه کړې ده.

دا اعتراضي ناسته په‌داسې وخت کې کېږي، چې مرکزي حکومت بې له اجازې په پلازمېنه کې د لویو غونډو جوړوونکو ته د سزا ورکولو مقرره تصویب کړې ده.

حکومت اسلام‌اباد ته تلونکې لویې لارې په کانټینرونو تړلې دي، خو پي‌ټي‌ای ته له پلازمېنې بهر د دې ناستې اجازه ورکړل شوې وه.

د تحریک انصاف یو سیاستوال حماد اظهر جلسې ته په وینا کې وویل، چې خلک په هېواد کې د "قانون واکمنۍ او د ایین سرلوړۍ" لپاره ورغونډ شوي دي.

عمران خان د دولتي رازونو افشا کولو او د بهرنیو هېوادونو د مشرانو ډالیو خرڅولو په ګډون په یوشمېر قضيو کې د راولپېنډۍ د اډیالې په زندان کې بندي دی.

خو د هغه ګوند وايي، چې د عمران خان پر ضد جوړې شوې قضیې سیاسي دي.

اسراييلي رسنيو د دغه هېواد په بېلابېلو ښارونو کې د حکومت پر ضد د لويو لاريونونو خبر ورکړی او ویلي چې لاريون کوونکو د غزې په تړانګه کې د پاتې يرغمل شويو کسانو د خوشې کېدو لپاره د سمدستي جوړجاړي غوښتنه کړې ده.

دا لاریونونه تېر ماښام وشول چې د اسراييل پر جنوبي سيمه د حماس د افراطي ډلې د بريد د ۱۱مې میاشتې له پوره کېدو سره برابره وه.

حماس، چې امریکا او اروپايي اتحادیه یې تروریستي ډله ګڼي، د تېر کال د اکټوبر په اتمه نېټه پر اسراییل برید وکړ.

د لاریون تنظیموونکو په تل‌ابیب کې د لاریونوالو شمېر شاوخوا ۵۰۰زره اټکل کړی، خو د ښار پولیسو د لاریون د برخوالو د شمېر په اړه څه نه دي ویلي.

د تل‌ابیب، بیت المقدس او کرمیګات په ګډون په ځینو ښارونو کې په مظاهرو کې د یرغمل شویو کسانو د کورنیو غړو ویناوې وکړې.

په همدې حال کې د تل‌ابیب پولیسو د یو شمېر لاریونوالو له لوري د یوې لویې لارې د بندولو هڅې ته په اشارې ویلي چې پنځه تنه یې په دې تړاو نیولي دي.

په لسګونو زره کسانو پرون په تل‌ابیب او د اسراییل په نورو ښارونو کې د لاریون پر مهال د داسې موافقې غوښتنه وکړه چې د حماس له بنده د پاتې سلو یرغمل شویو د خلاصون سبب شي.

د امریکا متحد ایالتونه او اروپايي ټولنه حماس ډله یو تروریستي سازمان ګڼي.

حماس او د فلسطینیانو نورو افراطي ډلو د اکټوبر میاشتې پر ۷مه پر اسرائیل په ناڅاپي حملې سره ۱۲۰۰ کسان ووژل او شاوخوا ۲۵۰ نور یرغمل کړل چې دا موضوع په غزه کې د جګړې د پیل سبب شوه.

اسراییل وايي، له حماس ډلې سره لا هم ۱۰۱ کسان یرغمل دي، خو دا معلومه نه ده چې د دوی له ډلې څو کسان لا ژوندي دي.

په همدې حال کې له څو میاشتو د پاتې یرغمل شویو د خلاصون لپاره د امریکا د متحدو ایالتونو، مصر او قطر په منځګړیتوب غیرمستقیمې مذاکرې روانې دي.

د بریتانیا او امریکا د بهرنیو استخباراتي ادارو مشرانو د روسیې په خاوره کې د اوکرایني ځواکونو پرمختګ ستایلی دی.

د بریتانیا د ایم آی سکس ادارې مشر ریچارډ مور پرون وویل چې په تېره اګست میاشت کې د روسیې په کورسک سیمه کې د اوکرایني ځواکونو ناڅاپي عملیاتو او د سیمو لاندې کول یو ډېر زړور اقدام و چې د جګړې لوری بدلولای شي.

هغه دا څرګندونې پرون د سي‌آی‌اې له مشر ویلیم برنز سره په لندن کې د لیدنې پر مهال وکړې.

برنز د اوکرایني ځواکونو عملیات لویه لاسته راوړنه وبلله چې د ده په وینا د روسیې د پوځ له کمزورتیاوو څخه یې پرده لیرې کړه.

برنز وویل چې لویدیځ باید د جګړې د پراختیا مخه ونیسي، خو ده زیاته کړه چې د اوکراین متحدان دې د روسیې له بېځایه ګواښونو څخه هم نه وېرېږي.

د لبنان د روغتیا وزارت وايي، د اسراییلو په هوايي برید کې درې تنه روغتیاپالان وژل شوي او دوه نور ټپیان دي.

د دې وزارت ویاند پرون ناوخته وویل چې اسراییلو دا برید په جنوبي ښار فارون کې هغه مهال وکړ چې د لبنان د ملکي دفاع کارکوونکو د اسراییلي پوځ د یوه مخکېني برید په پایله کې د لګېدلي اور د وژنې هڅه کوله.

لبنان دا پر خپلو رسمي کارکوونکو برید بللی او غندلی یې دی.

د لبناني چارواکو په وینا، اسراییلو له ۱۲ ساعتونو په لږه موده کې د دوهم ځل لپاره د لبنان د بېړنیو خدماتو پر یوه ډله برید وکړ.

د اسراییلو پوځ سمدستي د دې ادعا په اړه څه نه دي ویلي.

په عین حال کې د لبنان حزب‌الله ډلې بېګا ناوخته په یوه بیان کې وویل چې دوی د دې حملو په ځواب کې د اسراییلو پر یوه پوځي قطعه د توغندیو حمله وکړه.

د حزب‌الله او اسراییلو ترمنځ د حملو دا لړۍ د ۲۰۲۳ کال د اکټوبر په اوومه وروسته له هغه پیل شوه چې حماس ډلې پر اسراییلو برید وکړ، نژدې ۱۲ سوه کسان یې ووژل او ۲۵۰ نور یې برمته کړل او اسراییلو د حماس پر ضد چې امریکا او اروپایي ټولنه یې تروریستي ډله بولي په غزه کې عملیات پیل کړل.

چارواکو دا خبر وروسته تر دې ورکړ، چې له شپاړس کلونو وروسته په پلازمېنه اسلام‌اباد کې د پولیو د یوې مثبتې پېښې خبر خپور شو.

د ماشومانو د ګوزڼ د واکسین مسوولې عایشه رضا وویل، د پولیو د واکسین کمپاین به سر له دوشنبې شروع شي او تر درې دېرش میلیونه ډېرو هغو ماشومانو ته به دا واکسین ورکړل شي، چې عمرونه یې تر پنځو کلونو کم دي.

په پاکستان کې سږ کال د پولیو اوولس مثبتې پېښې ثبت شوې دي.

د روسیې د جنوب لوېدیځ د ورونژ په سیمه کې د وسلو په زېرمه کې پراخ اور لګېدلی چې له امله یې چارواکو شاوخوا شپږ سوه کسان له‌دې سیمې ایستلي دي.

والي الکساندر ګاسیف په ټلېګرام کې ویلي دي، چې دا اور نن سهار د اوستروګوژ په سیمه کې د ډرون الوتکې د ټوټو د رالوېدو له امله لګېدلی دی.

ګاسیف زیاته کړه، د شاوخوا سیمو یوشمېر خلک ایستل شوې دي او د مرګ‌ژوبلې راپورونه نه‌دي خپاره شوي.

یو پاکستانی تبعه چې په کاناډا کې اوسي، تورن شوی چې د اسلامي دولت ډلې یا داعش په ملاتړ یې د امریکا په نیویارک ښار کې یوه حمله پلان کړې وه.

د امریکا عدلیې وزارت پرون جمعه په یوه بیان کې تورن کس ۲۰ کلن محمد شاهذیب خان یاد کړی او هغه تورن شوی، چې د اکتوبر په اوومه یا وړاندې، وروسته یې د یهودانو پر یوه مرکز د ډله‌‌ییزې وژنې پلان جوړکړی و.

پر دې نېټې پر اسراییل د حماس د پراخ برید چې له زرو زیات اسراییلیان په‌کې ووژل شول، یو کال پوره کېږي.

د امریکا متحده‌ایالات او اروپایي ټولنه حماس د یوې ترهګرې ډلې په توګه پېژني.

د امریکا لوی څارنوال میریک ګارلینډ Merrick Garland وویل، شاهذیب خان نیت کړی و چې د اسلامي دولت ډلې لپاره هرڅومره زیات یهودان چې کېدای شي ووژني.

نوموړي چې هڅه کوله له کاناډا متحده‌ایالتونو ته لاړ شي، د سپټمبر په څلورمه د امریکا سرحد ته له رسېدو سره سم ونیول شو.

هغه د قانون د تنفیذ دوو پټو افسرانو ته ویلي و، چې پلان لري د یوه برید لپاره د اسلامي دولت د ملاتړو یوه ریښتینې څانګه ایجاد کړي.