د لاسرسۍ وړ لېنکونه

تازه خبر
پنجشنبه ۱۸ لیندۍ ۱۴۰۰ کابل ۰۲:۲۳

افغانستان

اشرف غني ته نږدې سرچینې: غني تېر ۲۰ کلن دور ته په ځانګړې کتنه بوخت دی

محمد اشرف غني

د افغانستان مخکېني ولسمشر محمد اشرف غني ته نږدې سرچینې وایي، نوموړی دا مهال تېر ۲۰ کلن دور ته په ځانګړې کتنه بوخت دی.

د محمد اشرف غني د ولسمشرۍ دورې د چارو ادارې مطبوعاتي مسؤل محبوب شاه محبوب ویلي، غني "د وطن حالات له نږدې څاري او ټول ملاقاتونه او اړیکې یې د کوربه هېواد د ډيپلوماتیک عرف او اصولو له مخې تنظیمېږي".

ښاغلي محبوب تېره شپه پر خپله ټویټرپاڼه هغه اوازې بې‌اساسه بللي چې ګواکې محمد اشرف غني نظربند دی.

خپله ښاغلي غني پخوا ویلي چې په متحده عربي اماراتو کې دی او د افغانستان او له کابله د وتلو په اړه جزئیات به له ولس سره شریکوي.

نوموړي له وتلو وروسته تر اوسه څو ځله یوازې پر ټویټر پيغامونه ورکړي دي.

د ورځې تازه خبرونه دلته ولولئ

چین افغانستان ته ۸۰۰ زره ډوزه واکسین واستول

ارشیف، د کرونا ویروس واکسین چې د چین له لوري له افغانستانه سره مرسته شوي.

چین افغانستان ته ۸۰۰ زره ډوزه واکسین واستوه او ټاکل شوې تر سبا ۲۰۰ زره نور ډوزه واکسین هم دغه هېواد ته واستوي.

د طالبانو حکومت د عامې روغتیا وزارت وایي چین له افغانستان سره په نږدې ورځو کې د دوه ملیونه نورو ډوزونو واکسین د مرستو ژمنه هم کړې ده.

د طالبانو عامې روغتیا وزارت وایي هغه روغتونونه چې د دغې ویروس د ناروغانو د پالنې لپاره ځانګړې شوې دي چې مخکې نړیوال بانک‌یې مالي ملاتړ کاوه، اوس د دغو مرستو له بندېدو وروسته د تشخصیه وسایلو او درملو له کمبود سره مخ شوي دي.

د دغه وزارت د عامه خدماتو د برخې معین عبدالباري عمر د دغې محمولې د تسلیمۍ پر مهال ازادي راډیو ته وویل: "د دغه ویروس شمېرې کېدای شي زیاتې شي، ځکه د ژمي په موسم کې دغه ویروس زیاتېږي، موږ هڅه کوو له انساني ناورین نه مخنیوی وکړو، خو هغه روغتونونه چې د دغه ویروس لپاره ځانګړي شوي او مخکې به د نړیوال بانک له لوري ورسره مالي مرستې کېدې یاد بانک اوس خپل مرستې بندې کړي هیله مو دا ده چې دا مرستې بېرته پیل شي."

دا وزارت په داسې وخت کې د مالي ستونزو یادونه کوي چې د کرونا ویروس نوې جوپې په نړیواله کچه زیاتې اندېښنې راپارولې دي.

جرمني: لا هم زرګونه افغانان راتلو ته انتظار دي

د جرمني ملي بیرغ

د جرمني د کورنیو چارو وزارت ویلي دي څو میاشتې کېږي چې طالبانو افغانستان نیولی دی او لاهم په زرګونه کسان چې له جرمنیانو سره‌یې په افغانستان کې کار کړی و، انتظار دي چې جرمني ته به ځي.

د جرمني د ډي‌پي‌اې اژانس د راپور له مخې دغو افغانانو د جرمني له پوځ، په کابل کې د دوی له سفارت او د جرمني له یو شمېر نورو ادارو سره کار کړی دی.

جرمني د نږدې ۲۵ زره افغانانو د کډوالۍ درخواستونه منلي دي او له دې ډلې تر دې دمه اووه زره توانېدلي دي چې جرمني ته ولاړ شي.

سربېره پر دې چې طالبانو له خلکو غوښتي چې له افغانستانه ولاړ نه‌شي، خو ګڼ افغانان له دې وېرې چې طالبان انتقام ترې وانه‌خلي همداراز له لوږې او بې‌کارۍ غواړي چې له افغانستانه ووځي.

ملا هیبت الله والیانو ته: د هغو خلکو ستونزې واورئ چې له هېواده وځي

سپین بولدک- چمن 

د طالبانو د لوی مشر له ادرسه په یوه خپاره شوي بیان کې والیانو ته د هغو خلکو د ستونزو د حل سپارښتنه شوې چې غواړي له هېواده ووځي.

د طالبانو لوی مشر ملا هیبت الله اخُندزاده ته په دې منسوب بیان کې چې د طالبانو ویاندویانو پر ټولنیزو رسنیو خپور کړی راغلي دي چې والیان دې د دیني عالمانو او چارواکو په همکارۍ د خلکو ستونزې واوري او د هغو د حل په برخه کې دې اقدام وکړي.

د طالبانو مشرانو دا هڅې داسې مهال پیل کړي چې په ځینو سیمو کې د طالب وسله والو له خوا د خلکو د ځورونو د ادعاوو په اړه راپورونه ورکړل شوي.

د طالبانو د لوی مشر په بیان کې چارواکو ته سپارښتنه شوې ده چې د امنیت د ټېنګښت لپاره هڅو ته دوام ورکړي، څو چا ته د خلکو په تېره د سوداګرو او متخصصانو د وېرولو فرصت په لاس ورنه شي.

اوکراین کې ترافیکې پېښې ۱۳ تنه وژلي او ۷ نور ژوبل دي

د پېښې ځای

چارواکي وایي چې د اوکراین په شمال کې د یوه ملي بس او یوې لارۍ د ټکر له امله ۱۳ تنه مړه شوي او ۷ نور ټپیان شوي دي.

د بیړنیو چارو د ادارې په وینا دا پېښه پرون د چیرنییف په سیمه کې وشوه.

پولیسو د دې پېښې تحقیقات پیل کړي دي.

کندز کې پر ۶ سوه کروندګرو اصلاح شوي تخمونه ووېشل شول 

په کندز کې کروندګر

د کندز د کرنې اوبو لګونې او مالدارۍ د ریاست چارواکي وايي، سږ کال دوی د مني په کمپاین کې د دې ولایت په مرکز او ولسوالیو کې پر ۶ زره کروندګرو ۳۰۰ ټنه د غنمو اصلاح شوي تخمونه او ۶۰۰ ټنه کیمیاوي سره وېشلي.

د دې ادارې رئیس مولوی امان الله حسن ازادي راډيو ته وویل: "تېر کال هم اصلاح شوي تخمونه په کروندګرو وېشلي وو چې د غنمو د حاصلاتو په زیاتېدو کې یې مرسته کړې وه."

یو شمېر کروندګرو چې تېر کال یې په خپلو کروندو کې اصلاح شوي تخمونه کرلي وو وايي، د پخواني تخمونو پرتله اصلاح شوي تخمونه ډېر حاصل ورکوي.

د کروندګرو په وینا،که حکومت له دوی سره د حبوباتو، نورو غلو او دانو او سبزیجاتو د تخمونو په رواجولو کې مرسته وکړي، دا ولایت به یو ځل بیا خپل پخوانی هغه نوم ترلاسه کړي چې یو مهال د ټول افغانستان د غلو کندو بلل کېده.

د کرنیزو چارو د یو شمېر کارپوهان په باور، که د بزګرانو لپاره مسلکي معلومات، د اړتیا وړ مالي ملاتړ، د اوبو لګونې او بازار موندنې برخه کې د هغوی لپاره اسانتیاوې برابرې شي، نو له امله به یې د بزګرانو شته اقتصادي ستونزې هوارې شي.

هند له پوځي زده کړو فارغ د افغان زده کوونکو د اعتراض مخه نیولې

هند کې د افغانستان تېر نظام د ځواکونو د روزنې کمپ

د هند پولیسو د هغو افغانانو د اعتراضیه غونډې مخه نیولې ده چې په هند کې له نظامي پوهنتونونو او کورسونو فارغ شوي دي.

دا نظامیان خپل راتلونکې ته اندېښمن دي.

د دوی له ډلې د فانوس په نوم یوه تن ازادي راډیو ته پرون وویل: "موږ نیت درلود چې اعتراضیه غونډه وکړو خو له بده مرغه د هند پولیسو موږ ته اجازه را نه کړه، راته ویې ویل چې ستاسو د ستونزو د حل لپاره هڅې روانې دي او د بهرنیو چارو وزارت به په نوي ډهلي کې د افغانستان د سفارت له لارې نتیجه له تاسو سره شریکه کړي."

دا افغانان چې شمېر یې دوه سوه تنو ته رسیږي وایي، که افغانستان ته ځي ژوند یې په خطر کې دی، که په هند کې پاتې کېږي اقتصادي ستونزې لري.

دوی څرګندوي چې خپله ستونزه یې د هند سربېره، په نوي ډیلي کې د افغانستان او د امریکا د متحد ایالاتونو له سفارتونو سره شریکه کړې ده، خو تراوسه یې ځواب نه دی ترلاسه کړی.

افغانستان کې د اقتصادي سقوط په اړه د فلیپو ګراندي خبرداری

د کډوالو لپاره د ملګرو ملتونو لوی کمېشنر فلیپو ګراندې

د کډوالو لپاره د ملګرو ملتونو لوی کمېشنر په افغانستان کې د اقتصادي سقوط له وېرې د کډوالو د څپې د راوتلو په اړه خبرداری ورکړی.

فلیپو ګراندې پرون په جنیوا کې د ویډیو کنفرانس له لارې خبریالانو ته وویل، یقیناً په افغانستان کې روان خطرناک حالت نه یوازې په هېواد کې دننه، بلکې د ژوند د ښو شرایطو په لټه بهر ته هم د خلکو د بې ځایه کېدو وېره رامنځته کړې.

ښاغلي ګراندې د داسې یوه حالت د مخنیوي لپاره له افغانستان سره د سمدستي اقتصادي مرستو غوښتنه وکړه.

ملګروملتونو له دې مخکې هم خبرداری ورکړی و چې افغانستان د نړۍ په کچه د ترټولو ناوړه بشري بحران پر مورګه ولاړه دی.

طالبانو د سیخ ګول پر صادراتو ۱۰ سلنه محصول لیرې کړ

ارشیف، ننګرهار کې د وسپنې ویلې کولو یوه فابریکه

د طالبانو په مشرۍ د افغانستان مالیې وزارت د سیخ ګول پر صادراتو ۱۰ سلنه محصول لیرې کړی دی.

د مالیې وزارت مسؤلینو ویلي د دې لپاره چې بهر ته په افغانستان کې د تولید شوي سیخ صادراتو ته لاره اواره او د اوسپنې ویلې کولو شرکتونه له مالي پلوه په ځان بسیا شي، مالیي وزارت پرېکړه کړې چې د سیخ ګول پر صادراتو ۱۰ سلنه محصول لیرې کړي.

مالیې وزارت دغه‌شان له پاکستان سره هوکړه کړې چې دغه هېواد به هره میاشت په افغانستان کې تولید شوی زر ټنه ګول سیخ واردوي او هر ټن به له ۱۰ سلنه محصول پرته د ۹۰۰ امریکایي ډالرو په بدل کې پېري.

دا په داسې حال کې ده چې وړاندې تر دې یو ټن ګول سیخ په ۳۰۰ امریکایي ډالرو ګاوڼډیو هېوادونو ته صادرېده او وروسته بیا دا صادرات د صنعتکارانو د غوښتنې پر بنسټ بند شول.

د افغانستان د ښځو د روزنې مرکز رئیسې د هیلري رودهام کلنتن جایزه وګټله

د هیلري رودهام کلنتن سږنۍ جایزې نوماندان

د افغانستان د ښځو د روزنې د مرکز رئیسې پلوشه حسن د هیلري رودهام کلنتن سږنۍ جایزه وګټله.

د راپورونو له مخې مېرمن حسن ته د ښځو د حقونو او سولې او امنیت د ټینګښت لپاره د خپلو هڅو په خاطر دغه جایزه ورکړل شوې ده.

د ښځو، سولې او امنیت لپاره د جورج ټاون انستیتیوت د خبرپاڼې له مخې دغه کلنۍ جایزه هغو مخکښو ښځو ته ورکول کېږي چې د یوې سوله‌ییزې نړۍ لپارهیې د ښځو د رول د اهمیت لپاره استثنایي کار کړی وي.

له روسیې، مکسیکو، چین او زېمبابوې څخه څلور نورې ښځې هم د دغې جایزې ګټونکې پېژندل شوې دي.

ناروې: ۳میاشتو کې ۳ لکه افغانان په غیر قانوني توګه ایران ته تللي

ایران کې افغان کډوال

د ناروې د کډوالو شورا وایي، په تېرو درې میاشتو کې له درې لکه زیات افغانان په غیرقانوني توګه ایران ته تللي.

د کډوالۍ په اړه د اروپایي ټولنې په وروستي اونیز راپور کې ویل شوي چې که څه هم په افغانستان کې واک ته د طالبانو له رسېدو وروسته اروپا ته په زیاته پیمانه د افغان کډوالو بهیر عملي بڼه نه ده غوره کړې، خو دا اتحادیه پر خپلو سواحلو د افغان کډوالو ورماتېدو ته تیاری نیسي.

د اسوشیټېډ پرېس اژانس د راپور له مخې په اوس وخت کې ډېر افغانان له غیر قانوني لارو ایران ته ځي، هغه هېواد ته چې په خپله خاوره کې د له درې میلیونه زیاتو افغانانو کوربه دی.

ایران دغه راز له خپلې خاورې د افغانانو د ایستل بهیر ګړندی کړی او په اوونۍ کې د شل زرو نه تر دېرش زره افغانان بېرته خپل هېواد ته استوي.

د مهاجرت د نړیوال سازمان په وینا ایران روان کال د نوومبر تر۲۱مې نېټې پورې له یو میلیون یو لک زیات افغانان بېرته خپل هېواد ته استولي دي.

ناروې بسپنه کوونکي وهڅول چې د افغانستان ۲۸۰ میلیونه ډالره خوشې کړي

د ناروې ملي بیرغ

ناروې د نړیوال بانک تر مشرۍ لاندې د افغانستان د بیارغونې د صندوق بسپنه ور کوونکي وهڅول چې په افغانستان کې د بشري مرستو لپاره د دې صندوق ۲۸۰ میلیونه ډالره ازاد کړي.

د نړیوال بانک بورډ تېره اوونۍ له دې سره موافقه کړې وه چې د دې صندوق له کنګل شوېو یو نیم میلیارډ ډالرو څخه ۲۸۰ میلیونه ډالره دې، د خوړو د نړیوال پروګرام او د ماشومانو د ساتنې ادارې یونیسف له لارې په افغانستان کې له اړو کسانو سره د مرستې لپاره ازاد شي.

د افغانستان د بیارغونې لپاره د دغه وجهي صندوق پانګه په اګسټ میاشت کې د طالبانو له خوا د کابل له نیول کېدو وروسته کنګل شوې ده.

د دغه صندوق ۳۱ بسپنه ورکوونکي باید د دغو پیسې ازادېدل تصویب کړي.

د رویټرز د راپور له مخې د نړیوال بانک یوه ویاند وویل، بسپنه ورکوونکو د تېرې جمعې په ورځ غونډه کې موافقه وکړه چې په دې اړه به په یوه اوونۍ کې پرېکړې وکړي.

د ملګرو ملتونو پراختیایي ادارې 'یو. اېن.ډي. پي' اټکل کړی چې افغانستان به د ۲۰۲۲ میلادي کال تر نیمایي پورې نړیواله بې وزلي تجربه کړي او د دې هېواد د ۳۹ میلیونه وګړو څه باندې نوي سلنه به بې وزلي وشمېرل شي.

د ملګرو ملتونو د عمومي اسامبلۍ پرېکړې ته د طالبانو غبرګون

د طالبانو د حکومت د ویاند مرستیال احمدالله وثیق

طالبانو د ملګرو ملتونو د عمومي اسامبلۍ پر هغې پرېکړې غبرګون ښودلی چې د دوی استازی یې دې سازمان ته نه دی منلی.

د طالبانو د حکومت د ویاند مرستیال احمدالله وثیق ویلي: "په ملګرو ملتونو کې د افغانستان څوکۍ داسې چاته ورکول چې هغه د افغانستان د خلکو او حکومت نماینده نه وي، بې انصافي ده."

وثیق پر خپله ټویټرپاڼه لیکلي، ملګري ملتونه باید له معقولیت نه کار واخلي او په دې اړه له سره غور وکړي.

د ملګرو ملتونو عمومي اسامبلۍ پرون دوشنبه د یوه پرېکړه لیک له مخې په دغه سازمان کې د افغانستان د استازي منل شاته وغورځول.

د اسوشیټېډ پرېس اژانس د راپور له مخې د عمومي اسامبلۍ رییس عبدالله شهید اعلان وکړ چې دغه پرېکړه لیک له رای ګېرۍ پرته د عمومي اجماع پراساس تصویب شو.

د ملګرو ملتونو د ۱۹۳ کسیزې عمومي اسامبلۍ دا پرېکړه دا معنا لري چې د افغانستان د پخواني حکومت استازی غلام محمد اسحاق زی به خپلې دندې ته دوام ورکوي.

افغانستان کې د افغانیو پر وړاندې د ډالرو بیه په بې ساري کچه لوړه شوې

کابل کې د سرای شهزاده مارکیټ

په افغانستان کې د افغانیو پر وړاندې د ډالرو بیه بې سارې کچې ته لوړه شوې ده.

د کابل د صرافانو شهزاده سرای پر خپله فیسبوک پاڼه لیکلي، نن سې شنبه یو ډالر له ۹۹ افغانیو سره بدلېږي.

افغانستان کې چې تر ډېره په کې مصرفي توکي وارداتي دي د ډالرو د لوړېدو بیه عام ولس پرې کوي، ځکه چې سوداګر او دوکانداران د ډالرو له لوړېدو سره توکي هم لوړ پلوري.

د ډالرو بیه وروستیو څو ورځو کې له ۹۶ نه ۹۹ افغانیو ته پورته شوه.

په افغانستان کې د نغدو پیسو کموالی، پر بانکونو بندیزونه او د افغانستان د شتمنۍ کنګل کې کېدل هغه لاملونه یاد شوي چې پر اساس یې د ډالرو بیه وخته.

اندونیزیا خپل سفارت په کابل کې بېرته پرانیزي

آرشیف- په کابل کې د اندونیزیا سفارت

اندونیزیا په پام لري چې خپل سفارت په کابل کې بېرته پرانیزي.

د اندونیزیا رسنیو د اسیاـ فسفیک او افریقایي چارو لپاره د دې هېواد د بهرنیو چارو د وزارت د عمومي مدیر عبدالقدیر جیلاني له قوله دا خبر ورکړی.

نوموړي پرون دوشنبې په جاکارتا کې یوې خبري غونډې ته وویل چې په کابل کې خپل سفارت بېرته د دې لپاره پرانیزي چې له افغانستان سره د بشري چارو او له ښځو سره د مرستو او د نورو مسولو ترڅنګ د سکالرشیفونو د ورکړې د پروګرام لپاره رغنده همکاري مخ ته یوسي.

اندونیزیا د اګسټ د میاشتې په پای کې چې طالبانو کابل نیولی و، خپل سفارت د پاکستان پلازمېنې اسلام اباد ته په موقت ډول لېږدولی دی.

ښاغلي جیلاني ټینګار وکړ چې په کابل کې یې د خپل سفارت بیا فعالول دا معنی نه لري چې دا هېواد د طالبانو حکومت په رسمیت پیژني.

ملالې یوسفزۍ د افغان نجونو د تعلیم لپاره له امریکا څه غوښتي؟

د نوبل د سولې د جایزې ګټونکې ملاله یوسفزۍ

د نوبل د سولې د جایزې ګټونکې ملالې یوسفزۍ پرون دوشنبه په واشنګټن کې د امریکا له بهرنیو چارو وزیر انتوني بلېنکن سره د افغان نجونو پر تعلیم خبرې وکړې.

دې د متحدو ایالتونو د بهرنیو چارو وزیر ته وویل: "افغانستان اوس په نړۍ کې یوازینی هېواد دی چې نجونې په کې د ثانوي او لوړو زده کړو حق نه لري. دوی له زده کړو بې برخې کړای شوي دي."

اغلې یوسفزۍ همدا راز وویل، هیله لري چې د یوې پنځلس کلنې افغان نجلۍ لیک، چې ولسمشر جوبایډن ته په خطاب کې لیکل شوی دی، ور وسپاري.

ملاله یوسفزۍ وايي، دا لیک د طالبانو له لوري په افغانستان کې د نجونو د ښوونځیو د بندېدو له کبله پر افغان نجونو د اغېز په اړه دی.

ملاله یوسفزۍ چې د خېبر پښتونخوا د سوات سیمې اوسېدونکې ده، په ۲۰۱۲ میلادي کال د پاکستاني طالبانو په حمله کې سخته ټپي شوه.

دې په ۲۰۱۴ میلادي کال د ښځو او نجونو د تعلیم لپاره د هلو ځلو په خاطر د نوبل د سولې جایزه وګټله.

نور راوښيه

XS
SM
MD
LG