د لاسرسۍ وړ لېنکونه

تازه خبر
شنبه ۵ کب ۱۴۰۲ کابل ۰۶:۲۷

افغانستان

یوناما ویلي په افغانستان کې ترهګري دوام لري

کندهار کې د شیعه ګانو جومات
کندهار کې د شیعه ګانو جومات

د ملګرو ملتونو مرستندویه ماموریت یوناما ویلي په افغانستان کې ترهګري دوام لري.

یوناما دا خبره د کندهار د نننۍ لویې چاودنې په غبرګون په خپل ټوېټر کړې ده.

یوناما لیکلي چې په مذهبي او عبادت ځایونو دا ډول بریدونه په کلکه غندي او عاملین یې باید محاکمه او مجازات شي.

د کندهار د برید په تړاو یو شمېر نورو کسانو هم غبرګون ښودلی.

له دې ډلې په دوحه کې د افغانستان لپاره د جرمني سفیر مارکوس پوتزل هم په یوه لنډ بیان کې د کندهار چاودنه غندلې ده.

پوتزل لیکلي، اوس چې افغانستان کې د سولې لپاره چانس شته دا ډول ناوړه بریدونه باید سمدستي ودریږي.

د افغانستان پخواني ولسمشر حامد کرزي د کندهار په امام بارګاه فاطمي جامع جومات کې برید بشري ضد جنایت بللی او غندلی یې دی.

کرزي په خپل ټوېټر لیکلي چې دا عمل د افغانستان د سولې، ثبات او یووالي پر وړاندې د پردیو یوه ښکاره دسیسه ده.

د ورځې تازه خبرونه دلته ولولئ

د افغانستان په اکثر ولایتونو کې د واورو، بارانونو او سېلابونو د بهېدو اټکل شوی

ارشیف
ارشیف

سبا او بل سبا د افغانستان په اکثر ولایتونو کې د درنو واورو، بارانونو او سېلابو د بهېدلو اټکل کېږي.

د طالبانو د ټرانسپورټ او هوایي چلند د وزارت د هوا پېژندنې د ریاست په وینا، په کابل، سمنګان، غور، دایکندي، رزګان، زابل، کندهار، هلمند، نیمروز، فراه، هرات، بامیان، میدان وردګ، بادغیس، جوزجان، سرپل، غزني، پکتیکا، خوست، پکتیا، لوګر، پروان او بغلان کې یکشنبه او دوشنبه د ورښتونو امکانات شته.

په افغانستان کې که یوه لور ته اورښتونو ته بې کوره خلک اندېښمن دي، بل لور ته بزګران خوښ دي چې د وچکالۍ مخه به تر یوه بریده ورسره ونیول شي.

د میدان وردګ په جلریز کې د سېلاب ځپلیو لپاره ۷۵ کورونه جوړ شول

د افغانستان په عمومي نقشه کې د میدان وردګ ولایت موقعیت
د افغانستان په عمومي نقشه کې د میدان وردګ ولایت موقعیت

د میدان وردګ ولایت په جلریز ولسوالي کې د سېلاب ځپلیو لپاره ۷۵ کورونه جوړ شول.

دا کورونه د جلریز ولسوالي په تکاني سیمه کې 'ډي آر سي' موسسې ودان کړي چې په هر کور کې درې پخې کوټې، یو پخلنځی او یو تشناب شته.

د سیمې خلکو ازادي راډیو ته وویل چې د دې کورونو شاوخوا دېوالونه نه شته، سړکونه یې نه دي تېر شوي، ښوونځی او کلینیک هم نه دی ورته جوړ شوی.

د جلریز ولسوالي په تکاني سیمه کې اووه میاشتې مخکې سېلابونه راغلي وو چې د سر او مال زیان یې اړولی و.

د هلمند په دیشو کې یو موسسې یو روغتون، جومات او مدرسه جوړ کړي

د افغانستان په عمومي نقشه کې د هلمند ولایت موقعیت
د افغانستان په عمومي نقشه کې د هلمند ولایت موقعیت

د هلمند په دیشو ولسوالي کې د قطر د شیخ حمد ال‌ثاني شاهي خیریه موسسې له لورې یو روغتون، جومات او مدرسه ودان شول.

د دې درې وړو پروژو د بنسټ ډبره نژدې کال مخکې ایښودل شوې وه چې پرون د دیشو په ولسوالي کې پرانیستل شوې.

دا درې ودانۍ په پاخه ډول جوړې شوي، خو د لګښت په اړه یې څه نه دي ویل شوي.

د قطر د شاهي کورنۍ دې موسسې تر دې مخکې هم یو شمېر پروژې په هلمند کې پلې کړې دي.

امیري: نړیواله ټولنه د افغانانو د اقتصادي ثبات، امنیت او حقونو ته درناوی لري

د افغان نجونو، ښځو او بشري حقونو لپاره د امریکا ځانګړې استازې رینا امیري
د افغان نجونو، ښځو او بشري حقونو لپاره د امریکا ځانګړې استازې رینا امیري

د افغان نجونو، ښځو او بشري حقونو لپاره د امریکا ځانګړې استازې وايي، د دوحې غونډې دا بیا روښانه کړه چې نړیواله ټولنه د افغانانو د اقتصادي ثبات، امنیت او حقونو ته د درناوي، په ځانګړي ډول د نجونو او ښځو د کړاوونو د هواري لپاره یو موټی او ژمنه ده.

رینا امیري نن سهار په خپله ایکس‌پاڼه په دوحه کې شویو بحثونو ته په اشارې لیکلي، په دې غونډه کې د افغانستان د مدني ټولنې استازو په یوه خوله وویل چې نړیواله ټولنه دې د افغانستان د امنیتې حالاتو په ارزونه کې د افغان ښځو ناوړه حال او د افغانستان په بحثونو کې د ښځو او مدني ټولنې د ګډون ارزښت ته پام وکړي.

له دې وړاندې پرون د افغانستان لپاره د امریکا ځانګړي استازي ټوماس وېسټ ویلي وو، ټول په افغانستان کې د ګډو ګټو په اړه قوي اجماع لري.

بخښنې نړیوال سازمان: طالبان باید سمدستي اعدام او نورې ظالمانه سزاګانې ودروي

د بخښنې نړیوال سازمان نښان
د بخښنې نړیوال سازمان نښان

د بخښنې نړیوال سازمان د طالبانو له‌خوا په غزني کې د دوو کسانو د اعدام په غبرګون کې دا کړنه د نه زغم، انساني کرامت ته سپکاوی او د نړیوالو قوانینو او معیارونو سرغړونه بللې.

په بریتانیا کې د بښنې نړیوال سازمان تېره شپه ناوخته یوه خپره کړې اعلامیه کې د طالبانو تر واک لاندې د عادلانه محاکمو نه‌شتون د جدي اندېښنې وړ بللی او زیاتوي، طالب چارواکي باید سمدستي اعدام او نورې ظالمانه سزاګانې ودروي.

په دې اعلامیه کې د دې سازمان د جنوبي اسیا د سیمه‌ییزې مرستیالې لیویا ساکاردي له قوله لیکل شوي: "اوس د دې وخت دی چې نړیواله ټولنه او ملګري ملتونه په طالبانو د بشري حقونو د ښکاره سرغړونو له امله فشار راوړي څو دا ډاډ تر لاسه شي چې په افغانستان کې د نړیوالو حقونو خوندیتوب ته درناوی کېږي."

د طالبانو حکومت د پنجشنبې په ورځ یوه اعلامیه کې خبر ورکړی چې په غزني کې دوه تنه د قتل په جرم اعدام کړي دي.

د افغانستان د کرکټ الف لوبډله د سیالیو لپاره سریلانکا ته ځي

د افغانستان د کرکټ الف لوبډلې ځینې لوبغاړي
د افغانستان د کرکټ الف لوبډلې ځینې لوبغاړي

ټاکل شوې چې د افغانستان د کرکټ الف لوبډله یا ابدالیان د روان کال په اپرېل میاشت کې د سریلانکا له الف لوبډلې سره د څو سیالیو لپاره دې هېواد ته ولاړه شي.

د افغانستان کرکټ بورډ وايي چې د سریلانکا په کوربه‌توب په دې لړۍ کې به د افغانستان الف لوبډله له سیالې سریلانکایۍ لوبډلې سره پنځه یوورځنۍ او یوه څلورورځنۍ سیالي وکړي.

افغان کرکټ بورډ په یوه بیان کې چې بېګا خپور شو، ویلي چې دا لوبې د اپریل په ۲۸مه پیلېږي او د مې د تر ۱۴مې پورې دوام کوي.

له دې مخکې د هېواد ملي لوبډله د سریلانکا مېلمنه وه چې په ترڅ کې یې دواړو لوبډلو یوه ټېسټ، درې یوورځنۍ او درې شل اووریزې لوبې وکړې.

په دې لوبلړۍ کې افغان لوبډله ښه ونه ځلېده.

طالبان: په افغانستان کې د اساسي قانون نشتوالی کومه ستونزه نه ده

د طالبانو ویاند ذبیح الله مجاهد
د طالبانو ویاند ذبیح الله مجاهد

د طالبانو د حکومت ویاند وایي چې په افغانستان کې د اساسي قانون نشتوالی کومه ستونزه نه ده.

د افغانستان د کورنیو رسنیو د راپورونو له مخې ذبیح الله مجاهد نن یوې خبري غونډې ته د خبرو پرمهال وویل، اسلامي شریعت یو جامع قانون دی او د ده په وینا، فقه په حکومت او نظام کې د هرسړي دنده ټاکي.

مجاهد زیاتوي چې په هېواد کې اوسمهال د قانون تشه نه شته ځکه شریعت حاکم دی.

هغه دا څرګندونې داسې مهال کوي چې د پنجشنبې په ورځ د طالبانو د حکومت سترې محکمې په غزني ولایت کې د دوو کسانو د قصاص خبر ورکړ.

طالبانو پر افغانستان له واکمنېدو وروسته لږترلږه دوه ځلې مخکې هم پر هغو کسانو چې په جنایي جرمونو مجرم پېژندل شوي قصاص تطبیق کړی دی.

ملګرو ملتونو او د بشري حقونو ډلو د طالبانو له حکومته غوښتي جې د اعدام سزاګانې نور نو بندې کړي.

د بشري حقونو ډلې د طالبانو د حکومت پر عدلي او قضایي ادارو بې باوره دي او همداراز وايي چې تورن کسان د مدافع وکیل د لرلو په ګډون له خپلو ټولو حقوقو څخه برخمن نه دي.

ډبلیو‌ایچ‌او: روان ژمي کې د تنفسي ناروغیو له کبله لسګونه افغانان مړه شوي

ارشیف: د کابل ښار یوه څنډه
ارشیف: د کابل ښار یوه څنډه

د روغتیا نړیوال سازمان یا 'ډبلیو ایچ او' په افغانستان کې د روان ژمي پر مهال د تنفسي ناروغیو له کبله د لسګونه کسانو د مړینې او د زرګونه نورو د بستر کېدو خبر ورکړ.

په یوه راپور کې چې پرون جمعه خپور شو وايي چې په افغانستان کې د مني له پیله په تنفسي ساري ناروغیو د اخته کسانو شمېر زیات شوی چې د راپور له مخې علت یې د هوا سړېدل دي.

په راپور کې راغلي چې په د روان میلادي کال په اوومه اونۍ کې له ۴۰ زرو زیات کسان په تنفسي ناروغیو اخته شوي او د دې ناروغیو په تړاو ۹۲ کسان مړه شوي، خو د کال په شپږمه اوونۍ کې چې د روانې فبروري میاشتې له پیل سره برابره وه، د ناروغانو شمېر له ۴۳ زیات و، او د دې ناروغیو په تړاو ۹۵ کسان مړه شوي دي.

په بیان کې راغلي چې د ۲۰۲۴ کال د جنوري له لومړۍ نېټې څخه د هېواد په ټولو ۳۴ ولایتونو کې له ۲۸۶ زرو زیات افغانان په تنفسي ناروغیو اخته شوي او ۶۶۸ کسان له دې کبله مړه شوي دي.

د بیان له مخې د دې ناروغانو په سلو کې له ۶۳ زیات له پنځو کلونو کم عمره ماشومان او په سلو کې نژدې پنځوس یې مېرمنې وې.

د دې ناروغیو له کبله په مړو خلکو کې هم په سلو کې له ۸۷ ډېر له پنځو کلونو کم عمره ماشومان او په سلو کې نژدې ۴۵ یې مېرمنې وې.

د هند پېژندل شوي سندرغاړي 'انوپ جلوټا' په لومړي ځل یوه افغاني سندره ویلې

 جلوټا په جرمني کې د افغان سندرغاړې فرشتې سما په همکارۍ په دري ژبه د 'در دامان صحرا' په نوم دغه سندره ثبت کړې ده.
جلوټا په جرمني کې د افغان سندرغاړې فرشتې سما په همکارۍ په دري ژبه د 'در دامان صحرا' په نوم دغه سندره ثبت کړې ده.

د هند پېژندل شوي سندرغاړي انوپ جلوټا په لومړي وار یوه افغاني سندره ویلې ده.

د هندي رسنیو د راپورونو له مخې، جلوټا په جرمني کې د افغان سندرغاړې فرشتې سما په همکارۍ په دري ژبه د 'در دامان صحرا' په نوم دغه سندره ثبت کړې ده.

انوپ جلوټا چې په ګڼو ژبو غزلونه او نورې سندرې ویلي، دا لومړی وار دی چې په دري ژبه یوه سندره ثبتوي.

دغه پخوانۍ سندره د افغان کمپوزیټور نینواز له خوا کمپوز شوې چې تر دې مخکې د احمد ظاهر په ګډون نورو سندرغاړو هم ویلې ده.

جلوټا ویلي، له افغانستان سره خاصه مینه لري، ځکه یې پرېکړه وکړه چې د دغه هېواد په یوه رسمي ژبه سندره ووايي.

هغه ویلي چې د هند کلاسیکه موسیقي په افغانستان کې خورا زیات محبوبیت لري او ځینې افغان سندرغاړي هندي راګونه وايي.

ملګرو ملتونو په غزني کې د دوو کسانو له اعدام سره مخالفت وښود

د ملګرو ملتونو د سرمنشي ویاند سټیفن دوجاریک
د ملګرو ملتونو د سرمنشي ویاند سټیفن دوجاریک

په افغانستان کې د دوو کسانو تر قصاص وروسته ملګرو ملتونو پرون پنجشنبه وویل چې دغه بنسټ د مرګ د سزا مخالفت دی.

د ملګرو ملتونو د سرمنشي ویاند سټیفن دوجاریک پرون په نیویارک کې خبریالانو ته وویل: "موږ په قاطعیت د مرګ د سزا د کارونې مخالفت ته دوام ورکوو او فکر کوم چې په مشخص د دغو اعدامونو عامه بڼه زړه بوږنوونکې وه."

دوجاریک دا څرګندونې داسې وخت کړي چې د طالبانو د سترې محکمې پرون خبر ورکړ چې په قتل دوه تورن کسان پرون په غزني کې په عام محضر کې قصاص شول.

په همدې حال کې د بخښنې نړیوال سازمان هم نن په یوه اعلامیه کې له طالبانو د هر ډول اعدامونو او د مرګ سزا د ختمېدو غوښتنه کړې ده.

تر دې مخکې پرون په افغانستان کې د ملګرو ملتونو مرستندوی ماموریت یا یوناما، په غزني کې د دوو کسانو د پروني قصاص په باب خپل سخت مخالفت وښود.

یوناما پرون په خپله ایکس شبکه یا پخواني ټویټر کې لیکلي چې ملګري ملتونه د مرګ د سزا سخت مخالفت کوي او دا سزا د ژوند له اساسي حق څخه سرغړونه ده.

نور راوښيه

XS
SM
MD
LG