د لاسرسۍ وړ لېنکونه

تازه خبر
سه شنبه ۹ لیندۍ ۱۴۰۰ کابل ۱۱:۳۳

افغانستان

امریکا جانس له افغانستانه د ایستونکو وګړو همغږې کوونکې ګمارلې

الزابیت جانس

د امریکا متحده ایالاتو له افغانستانه د امریکايي اتباعو او د هغو افغانانو چې له دوی سره یې کار کړی، د ایستلو د پروګرام لپاره نوې استازې ټاکلې ده.

د امریکا د بهرنیو چارو وزارت په یوه اعلامیه کې ویلي چې الزابیت جانس د سفیر جان بس پرځای له افغانستانه د وګړو د ایستلو د همغږې کوونکې په توګه ګمارل شوې ده.

اغلې جانس تر دې مخکې د افغانستان او پاکستان لپاره د امریکا د خاص استازي د مرستیالې او په قزاقستان کې د امریکا د متحده ایالاتو د سفیرې په توګه دنده ترسره کړې ده.

الزابیت جانس به له افغانستانه د هغو وګړو پر ایستلو چې امریکا ته د انتقال په شرایطو برابر دي، همدارنګه په امریکا کې د هغوی پر مېشتولو او په ټولنه کې به د دوی د ادغام پر مسائلو کار وکړي.

د ورځې تازه خبرونه دلته ولولئ

چارواکی: د زړو اوسپنو د څېړلو لپاره یو پلاوی کندهار ته تللی

د افغانستان د سوداګرۍ او پانګونې خونې مرستیال یونس مهمند

د افغانستان د سوداګرۍ او پانګونې خونه وایي، د کندهار ولایت په سپین بولدک کې د زړو اوسپنو د څېړلو لپاره یو پلاوی دغه ولایت ته تللی دی.

د یادی خونې مرستیال یونس مهمند ازادي راډیو ته وویل، په هغه ناسته کې چې د اوسپنې ویلي کولو کارخونو له مالکانو سره د کورنیو تولیداتو پر ستونزو، د توکو کموالي او د خرڅلاو بازار پر نشتوالي د خبرو لپاره جوړه شوې وه، پرېکړه وشوه چې یادې کارخونې دې په سپین بولدک کې شته زړې اوسپنې په مناسب قیمت وپیري.

د ښاغلي مهمند په خبره دا کار به کورنيو تولیداتو ته لار هواره کړي او د اومه موادو د نشتوالي په برخه کې به د کارخونو ستونزه هم تر یوه حده حل شي.

دا په داسې حال کې دی چې مخکې له دې هم د اوسپنې ویلي کولو د کارخونو مالکانو په څو ځلي د اومه موادو له نشتوالی شکایت کړی او غوښتنه یې کړې چې زړې اوسپنې باید بهر ته صادرې نه شي.

طالبان: غزني کې د اوبو د څو کانالو د جوړېدو چارې بشپړې شوي

ارشیف، عکس تزئیني بڼه لري

د طالبانو د کرنې، اوبو لګولو او مالدارۍ وزارت وايي، په غزني ولایت کې د ۳۲ میلیونه افغانیو په ارزښت د اوبو د څو کانالو د جوړېدو چارې بشپړې شوي دي.

د یاد وزارت ویاند مستعین عمري د سې شنبې په ورځ ازادي راډیو ته وویل چې د اوبو د دې کانالونو د جوړولو مالي لګښت د ډنمارک هېواد د پناه غوښتونکو شورا د موسسې یا DRC له خوا ورکړل شوی دی.

د ښاغلي عمري په خبره، یادې موسسې اته کاناله د غزني په مرکز، دوه د اوبو دوه حوضونه او دوه کانالونه په خواجه عمري ولسوالۍ او درې نور حوضونه د غزني ولایت په مالستان ولسوالۍ کې جوړ کړي دي.

د غزني ولایت دوه زره او ۵۶ اوسیدونکو ته په همدې پروژو کې د کار زمینه برابره شوې وه.

طالبان: د کابل پر دارالامان سړک چاودنه شوې، مرګ ژوبله نه لري

ارشیف، عکس تزئیني بڼه لري

د کابل د دارالامان پر سړک نن سهار چاودنه وشوه چې د لومړنیو معلوماتو له مخې چاته یې مرګ ژوبله نه ده اړولې.

د طالبانو د کورنیو چارو وزارت ویاند سعید خوستی وایي، دا ماین په یوه ګلدانۍ کې ځای پر ځای شوی و چې مرګ ژوبله نه لري.

تراوسه د چاودنې هدف معلوم نه دی، خو ځایي خبریالانو ویلي، پر یوه هایلکس ډوله موټر شوې چې تر ډېره یې دولتي کارکوونکي کاروي.

سملاسي چا د دې چاودنې مسولیت نه دی منلی، خو له دې وړاندې طالبانو د داسې بریدونو مسولیت داعش ته منسوب کړی دی.

د جلال اباد ښار په لومړۍ حوزه کې د چاودنو غږونه اورېدل شوي

جلال اباد ښار

د جلال اباد ښار په لومړۍ حوزه کې څو ساعته د ډزو او چاودنو غږونه اورېدل شوي دي.

په سیمه کې د ازادي راډیو خبریال وایي چې له نیمې شپې راهیسې د سهار تر ۷ بجو د سپکو او درنو وسلو ډزې کېدې او څو چاودنې هم شوي دي.

ننګرهار کې د طالبانو اطلاعاتي سرچینو د ازادي راډیو خبریال ته ویلي چې د ډزو او چاودنو د لامل په اړه معلومات نه لري.

ځینو ځایي خبریالانو بیا لیکلي چې دغلته داعش وسله وال په یوه کور کې تر محاصرې لاندې دي.

تر دې دمه په دې اړه رسمي څه نه دي ویل شوي، خو طالبانو له دې وړاندې په هرات او کندهار کې د داعش پر پټن ځایونو ورته عملیات کړي دي.

غزني کې له ۵۰۰ کورنیو سره مرسته وشوه

د مرستو وېش

د 'یو.اېن.اېچ.سي.ار' په مالي مرسته په غزني کې د یوې خیریه موسسې 'وېسټا' له لوري له پنځه سوه بې وزله کورنیو سره نغدي او د ځینو توکو مرسته شوې ده.

په غزني کې د یادې موسسې مسوول مطیع الله کمالپوري ازادي راډیو ته وویل، دغه مرستو کې د هرې کورنۍ لپاره ۲۶۵ امـریکایـي ډالـر او د ۱۰۵ امـریـکایـي ډالـرو پــه بـیـه غـیـر خـوراکـي تـوکي شامل دي.

دی وايي: "په دې مرسته کې د ۲۶۵ امریکايي ډالرو ترڅنګ کمپلې، ترپالونه، ګاز ډبه، ستل او ځینې نور شیان شامل دي، څو ورځې وړاندې مو هم له ۵۱۱ کورنیو سره نغدي مرستې کړې وې، هغوی کې د ۲۵۱ کسانو لپاره څلور سوه امریکايي ډالره نغدي مرستې وې او ۲۶۰ کسانو لپاره یې ۲۲۵ امریکايي ډالر وو."

ښاغلی کمالپوري وايي، په غزني کې په زرګونه کورنۍ دي چې په سخته بې وزلي کې ژوند کوي چې په وینا یې دوی په پام کې لري له نورو دغه ډول کورنیو سره مرستو ته دوام ورکړي.

دغه ځای کې هغه کسان چې دغه مرسته یې ترلاسه کړي زیات خوشحاله دي او د نورو مرستو غوښتنه کوي.

د یــادو مـرسـتـو د ویـشـلو پـه غونډه کـې د طالبانو د حکومت د غـزنـي والـي مـولـوي مـحـمـداسـحـاق (اخـنـدزاده) په خپلو خبرو کې له نړیوالو موسسو څخه له خلکو سره د مرستو غوښتنه وکړه.

د غزني ولایت ډېری اسېدونکي د سختو جګړو او ناامنیو له امله په بې وزلۍ او غریبۍ کې ژوند کوي.

پولنډ: که بېلاروس کړکېچ جوړوي د هوا له لارې به نور افغانان را وغواړو

د پولنډ-بېلاروس ترمنځ ایسار کډوال

د پولنډ ولسمشر خبرداری ورکړ چې ښايي د بېلاروس چارواکي د پولنډ په پوله کې د یوه بل بحران د رامنځته کولو لپاره نور افغان کډوال پولي ته راولي.

پولنډ تور لګوي چې بېلاروس سلګونه کډوال په لاریو کې د پولنډ تر سرحده راولي او بیا یې هڅوي چې په غیر قانوني ډول د پولنډ قلمرو ته ننوځي.

د پولنډ ولسمشر اندرژي دودا (Andrzej Duda) پرون دوشنبه (د لېندۍ ۸مه) د ګاونډي هېواد هنګري په پلازمېنه بوداپست کې خبریالانو ته وویل، د بېلاروس په پوله کې د پناه غوښتونکو بحران د دغه هېواد د چارواکو له لوري په لوی لاس جوړ کړل شوی دی.

ده زیاته کړه: "که د بېلاروس چارواکي وغواړي چې دې ته ورته بل کړکېچ جوړ کړي، دوی به د هوا له لارې له افغانستانه نور کسان را وغواړي."

دودا په عین حال کې وویل چې که بېلاروس داسې وکړي نو د نړیوالې ټولنې په تېره بیا د اروپايي اتحادیې له سخت غبرګون سره به مخامخ شي.

تر دې مخکې هم د پولنډ ولسمشر او نورو چارواکو څو ځلي ویلي و چې بېلاروس پناه غوښتونکي هڅوي چې له پولي یې پولنډ ته واوړي.

یونېسف: په افغانستان کې بشري وضعیت د اندېښنې وړ دی

ارشیف، کابل کې یوه افغان کډواله

د ملګرو ملتونو د ماشومانو د ساتنې اداره یونېسف وایي، په افغانستان کې بشري وضعیت د اندېښنې وړ دی.

دغه ادارې د جنوبي اسیا په اړه په هغه راپور کې چې پرون یې خپور کړی ویلي دي چې په افغانستان کې بشري وضعیت بحراني ځکه دی چې د ضروري روغتیایي، تغذیې او د روزنې د خدمتونو وړاندې کول له جدي ننګونو سره مخ دي. دا چاره د وچکالۍ له امله د خوړو د شدید نه مصونیت له امله نوره هم پیچلې شوې ده.

د ملګرو ملتونو مرستندویه ادارو خبرداری ورکړی چې د افغانستان ۹۵ سلنه وګړي کافي خواړه نه لري، شااوخوا ۲۲ میلیونه وګړي یې د خوړو له کمښت او شااوخوا نهه میلیونه یې هم له قحطۍ سره مخامخ دي.

ناټو غونډه کې د نورو مسایلو ترڅنګ د افغانستان په اړه هم خبرې وشي

ریګا کې به د ناټو غونډه پیلیږي.

د ناټو د بهرنیو چارو وزیران به نن په غونډه کې د نورو مسایلو ترڅنګ د افغانستان په اړه هم خبرې وکړي.

په دغه دوه ورځنۍ غونډه کې چې د لتویا په پلازمېنه ریګا کې جوړیږي، د امریکا د بهرنیو چارو وزیر انتوني بلېنکن هم ګډون کوي.

د امریکا د بهرنیو چارو وزارت ویلي چې بلېنکن تېره شپه ریګا ته روان شو.

د ناټو سرمنشي ینس سټولټنبرګ ویلي چې په افغانستان کې د پخواني حکومت او د دې هېواد د وسله والو ځواکونو د دړې وړې کېدو په اړه یې یوه هر اړخیزه څېړنه پیل کړې ترڅو له درسونو یې دا تړون په راتلونکې کې کار واخلي.

د ناټو ماموریت په افغانستان کې له ۲۰۱۴ میلادي کال وروسته د افغان ځواکونو پر رزونې، ملاتړ او هغوی ته په سلا او مشوره ورکولو څرخېده چې د روان کال د اګسټ په ۳۱مه نېټه پای ته ورسېد.

ځينو اسيايي هېوادونو افغانستان سره د اقتصادي اړيکو د پراختيا غوښتنه وکړه

د اقتصادي همکاریو سازمان (ایکو) سرمشريزه

د یو شمېر اسیايي هېوادونو مشرانو له افغانستان سره د اقتصادي اړیکو د پراختیا غوښتنه کړې.

له ۱۰ هېوادونو جوړ د اقتصادي همکاریو سازمان (ایکو) چې پر افغانستان سربېره ترکیه، اذربایجان، ایران، پاکستان او د منځنۍ اسیا پنځه هېوادونه غړیتوب په‌کې لري د یکشنبې په ورځ په ترکمنستان کې په خپله سرمشریزه کې همداراز ژمنه کړې چې له افغانستان سره به مرسته کوي.

د اسوشیټډ پرس خبري اژانس د راپور له مخې دې ټولنې د تجارتي موانعو د لیرې کولو او په سیمه کې د نویو ترانسپورټي دهلېزونو د رامنځته کولو لپاره غږ کړی.

دوی د افغانستان پر روان وضعیت هم اندېښنه وښوده، خو په عین حال کې یې ژمنه وکړه چې د افغانستان له ثبات سره به مرسته وکړي.

د راپور له مخې د پاکستان ولسمشر عارف علوي سرمشریزې ته د وینا پر مهال د افغانستان د اقتصادي او مالي سقوط په اړه خبرداری ورکړ او ویې‌ویل چې اسلامي نړۍ باید د داسې یوې فاجعې د مخنیوي لپاره امکانات ځانګړي کړي.

جنوبي کوریا له افغانستان سره د ۳۲ ملیون ډالرو بشري مرستې اعلان کړی

ارشيف، د جنوبي کوریا بيرغ

جنوبي کوریا له افغانستان سره د ۳۲ ملیون ډالرو بشري مرستې اعلان کړی او وايي، دا مرسته به د ملګرو ملتونو د ادارو له لارې اړو افغانانو ته ورسوي.

د کوریا د بهرنیو چارو وزارت په یوه بیان کې چې نن خپور شو ویلي دي چې د دې مرستې یوه برخه به په ایران او پاکستان کې دېره افغان کډوالو ته د غذايي موادو او روغتیايي خدماتو پر چمتو کولو ولګول شي.

په بیان کې یادونه شوې چې جنوبي کوریا به له بې‌وزلو افغانانو سره مرستو ته دوام ورکړي.

اروپايي چارواکي: طالبانو د هوايي ډګرونو د فعالیت لپاره د همکارۍ غوښتنه کړې

د کابل هوایي ډګر

اروپايي چارواکي وايي، طالبانو په قطر کې د خبرو پر مهال د افغانستان د هوايي ډګرونو د فعالیت د دوام لپاره د همکارۍ غوښتنه وکړه.

اروپايي ټولنې پرون په یوه اعلامیه کې وویل، پرون او وړمه ورځ په دوحه کې د اروپايي ټولنې چارواکو په افغانستان کې د بشري وضعیت په اړه خپله ژوره اندېښنه وښوده.

د اروپايي ټولنې د بهرني اقدام د خدماتو ادارې (EEAS) په یوه اعلامیه کې وویل، له طالبانو سره خبرې د طالبانو د موقت حکومت په رسمیت پېژندلو معنی نه‌لري، بلکې دا خبرې د اروپايي ټولنې او افغانانو د ګټو په خاطر د اروپايي ټولنې د عملیاتي تعامل یوه برخه ده.

طالبانو او اروپايي ټولنې د خبرو لپاره خپل لوړ رتبه چارواکي دوحې ته لېږلي او دا خبرې داسې مهال وشوې چې ټاکل شوې د امریکایي لوري او طالبانو ترمنځ خبرې په همدې دوحه ښار کې نن دوشنبه پیل شي.

د طالبانو د هیئت مشري د دوی د بهرنیو چارو سرپرست وزیر امیر خان متقي کوي.

د بخښنې سازمان: نړۍ باید د افغان مېرمنو د لاسته راوړنو خوندیتوب ته ودانګي

په کابل کې د افغانو مېرمنو لاریون

د بخښنې نړیوال سازمان ویلي د نړۍ مشران باید د افغان مېرمنو د ۲۰ کلنو لاسته راوړنو د خوندیتوب لپاره ودانګي.

دغه سازمان پرون په دې تړاو یوه مفصله اعلامیه خپره کړې او د طالبانو تر واکمنۍ لاندې یې د افغان مېرمنو د لاسته راوړنو د له‌منځه تلو ګواښ کړی.

د بخښنې نړیوال سازمان ویلي د اګسټ له ۱۵مې د طالبانو په بیا واکمنېدو سره د ټولو افغانانو په تېره بیا د ښځو او نجونو ورځنی ژوند خورا محدود او ستونزمن شوی دی.

په اعلامیه کې راغلي چې له شپږم ټولګي پورته نجونې له ښوونځیو محرومې شوي، د ګڼو برخو ښځینه کارکوونکې په کور کېنول شوي او له دوی ګڼې ازادۍ سلبې شوي.

د بخښنې نړیوال سازمان ویلي که څه هم افغانستان تېر ۲۰ کاله له جګړو سره مخ و، خو د ښځو په برخه کې یې د پام وړ لاسته راوړنې هم درلودې.

سازمان یوه انلاین عریضه هم جوړه کړې او له خلکو یې غوښتي چې امضا یې کړي او د نړۍ مشران د افغان ښځو د حقونو او لاسته راوړنو د خوندیتوب لپاره په طالبانو د فشار راوړلو لپاره اړ کړي.

د طالبانو رئیس‌الوزا محمد حسن اخوند بیا وړمه شپه په خپله وینا کې ویلي چې د دوی حکومت د اسلام په چوکاټ کې د ښځو د حقونو تأمین ته ژمن دی او د تعلیم په برخه کې یې هم لازمې هڅې کوي.

اریانا افغان هوایي شرکت سعودي عربستان ته ځانګړې الوتنې پيلوي

د اریانا افغان هوایي شرکت الوتکه

اریانا افغان هوایي شرکت وايي سعودي عربستان ته د ډسمبر له ۴مې ځانګړې الوتنې پيلوي.

دغه شرکت بېګا په دې تړاو په خپله فېس‌بوک پاڼه یوه اعلامیه خپره کړې.

د اعلامیې له مخې د سعودي عربستان چارواکو په ریاض کې له افغان سفارت سره هوکړه کړې چې په دغو پروازونو کې هغه افغانان سعودي ته یوسي چې مخکې یې هلته د کرونا یو ډوز واکسین لګولی وي او په توکلنا اپلکېشن کې یې نومونه ثبت وي.

د طالبانو په بیا واکمنېدو سره نږدې ټولو هېوادونو ته پروازونه وځنډېدل او تر اوسه عادي حالت ته نه‌دي ګرځېدلي.

په سعودي او نورو عرب هېوادونو کې په کاراوبار او سوداګریو بوخت هغه افغانان چې په رخصتیو باندې افغانستان ته راغلي وو لا هم د پروازونو د نشتوالي یا محدودیت په خاطر ایسار پاتې دي.

د لوګر پاسپورټ ریاست کې د 'طالبانو د دوو ډلو' نښتې مرګ‌ژوبله اړولې

ارشیف، یو شمېر وسله‌وال طالبان

په لوګر کې د طالبانو دوو ډلو نښته کړې چې په نتیجه کې یې ځینو خلکو ته مرګ‌ژوبله اوښتې ده.

یو شمېر سیمه‌ییزو رسنیو او اژانسونو راپور ورکړی چې یکشنبه په دې نښته کې دوه طالبان وژل شوي او پنځه ملکیان ټپيان دي.

راپورونه زیاتوي چې نښته په پاسپورټ ریاست کې د پاسپورټ د وېش په سر شوې ده.

په لوګر کې د طالبانو چارواکو رسماً په دې تړاو څه نه‌دي ویلي، خو د لوګر د پاسپورټ ریاست یوې باوري سرچینې ازادي راډیو ته وویل چې نښته د دوی له ساحې دباندې په قراول کې شوې او یوازې یو طالب وژل شوی.

سرچینې د ملکیانو د ژوبلېدو په تړاو څه ونه‌ویل.

په لوګر او شااوخوا اتو نورو ولایتونو کې د پاسپورټ د وېش بهیر له شنبې پيل شوی، خو د راپورونو له مخې د خلکو ګڼې ګوڼې ځينې لانجې جوړې کړې دي.

د مهاجرت سازمان: روغتیايي خدماتو ته د افغان ښځو او نجونو لاسرسی لومړیتوب دی

ارشیف، یو شمېر مېرمنو د روغتیايي خدمتونو ترلاسه کولو لپاره یوه ګرځنده کلینیک ته مراجعه کړې.

د مهاجرت نړیوال سازمان وايي، روغتیايي خدماتو ته د افغان ښځو او نجونو لاسرسی یو لومړیتوب دی.

دغه سازمان نن په یوه ټویټ کې ویلي، د دوی په همکارۍ په اتو ولایتونو کې د متخصصو ډاکترانو، قابله‌ګانو او نرسانو له‌خوا خلکو ته په بېلابېلو برخو کې روغتیايي خدمات وړاندې کېږي.

د طالبانو په مشرۍ د عامې روغتیا وزارت ویلي چې له افغانستان سره د نړیوال بانک د مالي مرستې له بندېدو سره له ۲،۰۰۰ ډېر روغتونونه د تړل کېدو له ګواښ سره مخ دي.

پر افغانستان د طالبانو له واکمنۍ سره سم نړیوال بانک د افغانستان له روغتيايي برخې سره مرستې وځنډولې چې له امله‌يې د «صحتمندۍ» پروژه له جدي ګواښ سره مخ شوه.

نور راوښيه

XS
SM
MD
LG