د لاسرسۍ وړ لېنکونه

تازه خبر
سه شنبه ۲۷ تله ۱۴۰۰ کابل ۰۳:۵۰

افغانستان

سیګار: هغه ادعاوې څیړو چې ویل کیږي اشرف غني پیسې وړي

محمد اشرف غني

د افغانستان د بیارغونې لپاره د متحد ایالاتونو پلټونکې اداره یا سیګار غواړي چې هغه ادعاوې وڅیړي چې ویل کېږي له افغانستانه تللي ولسمشر محمد اشرف غني لسګونه میلیونه ډالر له ځان سره وړي دي.

د سیګار مشر جان سوپکو پرون په واشنګټن کې د استازیو جرګې د یوې کمېټې غونډې ته وویل چې د حکومت د اصلاحاتو یوې کمېټې له سیګار څخه په دې برخه کې د پلټنو هیله کړې ده.

اشرف غني د اګسټ په پنځلسمه په هغه ورځ چې طالبان کابل ته داخل شول له افغانستانه ووت.

ده بیا وروسته په یوه ویډیویي پیغام کې له متحد عربي اماراتو څخه وویل چې د لسګونو میلیونونه ډالرو د ایستلو تور د ده د شخصیت د وژنې لپاره لګول شوی دی او دی دې ته چمتو دی چې د ملګرو ملتونو له لوري یو پلاوی د دې تورونو سپیناوی وکړي.

د ورځې تازه خبرونه دلته ولولئ

افغانستان خپله لومړۍ تمریني لوبه جنوبي افریقا ته بایلوده

د افغانستان کرکټ ملي لوبډله

افغانستان د کرکټ د ۲۰ اووریزو لوبو د نړیوال جام په تمریني لوبو کې خپله لومړۍ لوبه جنوبي افریقا ته بایلوده.

لوبه لومړی جنوبي افریقا پیل کړه او په ۲۰ اوورونو کې یې د پنځو لوبغاړو په سوځېدو سره افغانستان ته د ۱۴۶ منډو هدف وټاکه، خو افغان لوبډلې په ۲۰ اوورونو کې یوازې ۱۰۴ منډې وکړې او ټول لوبغاړي یې وسوځېدل.

د افغان لوبډلې بله تمریني لوبه د چهارشنبې په ورځ له وېسټ انډیز سره ده.

په نړیوال جام کې به د افغانستان لومړۍ اصلي لوبه د اکټوبر په ۲۵مه نېټه وي چې سیاله لوبډله‌یې تر اوسه نه‌ده معلومه، خو دوهمه لوبه به‌یې د اکټوبر په ۲۹مه له پاکستان سره وي.

همداراز افغان لوبډله به د نومبر په درېیمه له هند سره، د نومبر په اوومه له نیوزیلنډ او د نومبر په ۲۷مه له استرالیا سره مخامخ شي.

تمریني لوبه؛ د جنوبي افریقا کرکټ لوبډلې افغانستان ته د ۱۴۶ منډو هدف وټاکه

د کرکټ د شل اووریزو لوبو د نړیوال جام یو شمېر ګډون کوونکو هېوادونو بیرغونه

د کرکټ د شل اووریزو لوبو د نړیوال جام په تمریني لوبو کې د افغانستان او د جنوبي افریقا د ټیمونو لوبه روانه ده.

لوبه لومړی جنوبي افریقا پیل کړه او په ۲۰ اوورونو کې یې د پنځو لوبغاړو په سوځېدو سره افغانستان ته د ۱۴۶ منډو هدف وټاکه.

د افغان لوبډلې بله تمریني لوبه د چهارشنبې په ورځ له وېسټ انډیز سره ده.

په نړیوال جام کې به د افغانستان لومړۍ اصلي لوبه د اکټوبر په ۲۵مه نېټه وي چې سیاله لوبډله‌یې تر اوسه نه‌ده معلومه، خو دوهمه لوبه به‌یې د اکټوبر په ۲۹مه له پاکستان سره وي.

همداراز افغان لوبډله به د نومبر په درېیمه له هند سره، د نومبر په اوومه له نیوزیلنډ او د نومبر په ۲۷مه له استرالیا سره مخامخ شي.

ایران د افغانستان د سیاسي راتلونکې په اړه د یوه کنفرانس کوربه‌توب کوي

تهران کې د ازادۍ میدان

د جرمني خبري اژانس خبر ورکړی چې ایران غواړي راتلونکې اوونۍ د افغانستان د سیاسي راتلونکې په اړه د یوه کنفرانس کوربه‌توب وکړي.

ډي‌پي‌اې د ایران د بهرنیو چارو وزارت د ویاند سعید خطیب‌زاده له قوله خبر ورکوي چې نوموړي نن د تلې په ۲۶مه ویلي، دا کنفرانس به د چهارشنبې په ورځ د افغانستان د ګاونډیو هېوادونو د بهرنیو چارو د وزیرانو او د روسیې د استازي په ګډون جوړ شي.

خطیب‌زاده ویلي چې ایران به په دې غونډه کې په افغانستان کې د طالبانو او ټولو سیاسي ډلو په ګډون د یوه حکومت د جوړېدو غوښتنه وکړي. نوموړی زیاتوي چې ایران په افغانستان کې دایمي سوله او ثبات غواړي.

د خطیب‌زاده په وینا د سیمې هېوادونو په افغانستان کې د سولې د ټینګښت په هڅو کې باید د افغانستان د خلکو ترڅنګ ودرېږي.

طالبان د اګسټ په ۱۵مه نېټه د دوهم ځل لپاره پر افغانستان واکمن شول او خپله سرپرست کابینه‌یې اعلان کړه چې غړي يې تر ډېره یا طالبان دي او یا د هغوی پلویان.

طالبانو د ایران د راروانې غونډې په اړه تر اوسه څه نه‌دي ویلي.

ټاکل شوې چې د راروانې چهارشنبې په ورځ به مسکو کې د طالبانو، متحده ایالاتو، پاکستان او چین د استازو په ګډون د یوې غونډې کوربه وي.

تاجکستان د افغانستان سرحد ته نږدې پوځي تطبیقات پیل کړل

ارشیف، د تاجکستان، ازبکستان او روسیې ګډ پوځي تطبیقات

تاجکستان نن د افغانستان سرحد ته نږدې د شااوخوا ۴ زره سرتېرو په ګډون پوځي تطبیقات پیل کړل.

د جرمني خبري اژانس د روسیې په مشرۍ د ډله‌ییز امنیت د تړون د سرچینو په حواله خبر ورکوي چې دا تمرینات به د شنبې تر ورځې پورې دوام وکړي.

ویل شوي چې په دې تطبیقاتو کې د وسله‌والو نښتو او له سرحدونو د خلکو د غیر قانوني اوښتو په برخه کې سرتېرو ته زده‌کړې ورکول کېږي.

تاجکستان له افغانستان سره شااوخوا ۴۰۰ کیلومتره ګډ سرحد لري.

د منځنۍ اسیا هېوادونو او له هغې ډلې تاجکستان په افغانستان کې د طالبانو له واکمنېدو وروسته په ګډ سرحد کې د ترورېستي ډلو د احتمالي ګواښونو په اړه اندېښنه څرګنده کړې ده.

د روسیې ولسمشر ولادیمیر پوتین د چهارشنبې په ورځ وویل چې داعش ډله له عراق او سوریې څخه افغانستان ته د خپلو با تجربې جنګیالیو د لېږد په حال کې ده، خو طالبانو دا خبره رد کړې ده.

قزاقستان له افغانستان سره د ۵ زره ټنه اوړو مرسته کوي

ارشیف؛ اوړه

قزاقستان له افغانستان سره د پنځه زره ټنه اوړو د مرستې ژمنه کړې ده.

د طالبانو حکومت د چارو ادارې په خپله ټویټرپاڼه لیکلي، د قزاقستان د ولسمشر ځانګړي استازي کابل ته د خپل سفر په ترڅ کې د رئیس‌الوزرا مرستیال ملا عبدالغني برادر سره د لیدو پر مهال د ګڼو سیاسي او دوه اړخیزو همکاریو ترڅنګ، ژمنه کړې چې له افغانستان سره به د پنځه زره ټنه اوړو مرسته وکړي.

بل لور ته د طالبانو حکومت د بهرنیو چارو وزارت هم ویلي چې قزاقستاني چارواکي د بهرنیو چارو وزارت له سرپرست امیر خان متقي سره په لیدنه کې هم په راتلونکي کې له افغانستان سره د اقتصادی همکاریو او اقتصادي مرستو ژمنې کړي.

د قزاقستان د ولسمشر یوه استازي له طالب چارواکو سره په بېلابېلو موضوعاتو خبرې کړې 

راپورونه وايي چې د قزاقستان د ولسمشر یوه استازي کابل ته د سفر پر مهال د طالبانو له چارواکو سره د تجارتي او اقتصادي اړیکو پر پراختیا خبرې کړي.

د تاس خبري اژانس د راپور له مخې د قزاقستان د جمهوري ریاست د رسنیو څانګې دا خبر پرون- د اکتوبر په ۱۷مه وروسته له هغه ورکړ چې د نړیوالې همکارۍ په چارو کې د ولسمشر ځانګړي استازي ایرژان کازي خان کابل ته سفر وکړ.

تاس د ولسمشر د قاسم ژورمات تاقایف د مطبوعاتي څانګې له قوله زیاتوي چې دواړو لورو د تجارتي او اقتصادي راکړې ورکړې او په قزاقستان کې افغان محصلینو ته د بورسیو بیا پیل ته لېوالتیا ښودلې.

د خبر له مخې د قزاقستان پلاوي د دې سفر په ترڅ کې د طالبانو د حکومت د رییس الوزرا له مرستیال ملا عبدالغني برادر او د بهرنیو چارو له وزیر امیرخان متقي سره وکتل.

پر کابل د طالبانو له واکمنېدو وروسته دا لومړی ځل دی چې د قزاقستان د حکومت یو پلاوی افغانستان ته سفر کوي.

د سوداګرۍ خونه: افغانستان کې ۶۰ سلنه صنایع د سقوط له ګواښ سره مخ دي

ارشیف، خوست کې یوه فابریکه

د افغانستان د سوداګرۍ او پانګونې خونه وایي، په افغانستان کې څه باندې ۶۰ سلنه صنایع د سقوط له ګواښ سره مخ دي.

د افغانستان د سوداګری او پانګونې خونې رئیس توکل احمدیار ازادي راډیو ته وویل، په افغانستان کې د صنعت بازار د سقوط په حال کې دی او ډېری هغه فابریکې چې په دې برخه کې فعاله وې، د تړل کېدو په حال کې دي.

نوموړی زیاتوي، که څه هم په تېرو ۲۰ کلونو کې د پانګې د جذب، د سوداګریزو فعالیتونو لپاره د اسانتیا برابرولو او خدمتونو د وړاندې کولو په برخه کې پرمختګ وشو، خو د نوي نظام په راتلو سره سوداګر او صنعت‌کاران له جدي ستونزو سره مخ دي.

د ښاعلي احمدیار په خبره، په بانکونو کې د سوداګرو د پیسو بندېدل، د سوداګریزو توکو د رانیولو لپاره صادروونکو هېوادونو ته د پیسو د حوالو بندېدل او د اقتصادي ستونزو له امله د افغانستان په بازارونو کې د توکو د پلور راکمېدل هغه درې عوامل دي چې د افغانستان صنعت‌یې د سقوط له ګواښ سره مخ کړی دی.

د طالبانو حکومت د مطبوعاتو د ټیم غړی بلال کریمي که څه هم چې د صنعتي شرکتونو د ستونزه ډېره برخه د کرونا ویروس د خپرېدو له امله بولي، خو له ازادي راډیو سره په خبرو کې وایي، حکومت هڅه کوي په دې برخه کې ستونزې حل کړي.

طالبان د پلچرخي زندان بیا پرانیستلو ته تیاری نیسي 

د پلچرخي زندان

د طالبانو حکومت یو چارواکی وايي د پلچرخي زندان بیا پرانیستلو ته تیاری نیسي.

فرانس پرس خبري اژانس د زندانونو د ساتنې د چارو د یوه مسؤل مولوي عبدالله حقیق له قوله خبر ورکوي چې ویلي یې دي د پلچرخي زندان لپاره یو شمېر ساتونکو ته روزنه ورکړل شوې چې ډېر ژر به د دغه زندان چارې سمبالې کړي.

د طالبانو د زندانونو د ساتنې د چارو دغه مسؤل ونه‌ویل چې کله به د پلچرخي زندان بېرته پرانیستل کېږي، خو زیاته‌یې کړه چې دوی به وکولای شي په دې زندان او د کابل ولایت په نورو محبسونو کې له ۶ زرو تر ۷ زرو پورې بندیان وساتلی شي.

د کابل په پلچرخي زندان کې د پخواني حکومت په دوره کې د طالبانو په ګډون په زرګونو بندیان ساتل کېدل چې کابل ته د طالبانو له ننوتو سره ټول بندیان ترې ووتل.

بلېنکن له خپل قطري سیال سره د افغانستان په اړه خبرې وکړې

د امریکا او د قطر د بهرنیو چارو وزیران

د امریکا د بهرنیو چارو وزیر انتوني بلېنکن د قطر د بهرنیو چارو له وزیر محمد بن عبدالرحمن الثاني سره د افغانستان په اړه خبرې وکړې.

د امریکا د بهرنیو چارو وزارت د دغو خبرو په اړه نور جزئیات نه‌دي ورکړي، خو ویلي یې دي چې بلېنکن دا ومنله چې قطر له افغانستانه د امریکایي وګړو او له خطر سره مخامخ افغانانو لپاره د ترانزیټ په برابرولو کې مرسته کړې ده.

د اګسټ د میاشتې په دوهمه نیمایي کې وروسته له هغې چې طالبانو کابل ونیو، د کابل د نړیوال هوایي ډګر له لارې قطر ته په لسګونو زره کسان ولېږدول شول.

هغه هېواد ته چې د افغانستان په مسئله کې د یوه مهم لوبغاړي په توګه کتل کېږي.

ننګرهار کې د یوه کور د چت پرېوتو پېښه کې ۵ تنه وژل شوي

ارشیف؛ د جلال‌اباد ښار یوه څنډه

د ننګرهار په سپین غر ولسوالۍ کې د یوه کور د چت پرېوتو په پېښه کې ۵ تنه وژل شوي دي.

د سیمې یوه قومي مشر سیال خان نن دوشنبې ازادي ته وویل چې پېښه تېره شپه د سپین غر ولسوالۍ په ګردي سیمه کې د یوې کوټې د چت د راپرېوتو له امله رامنځته شوې چې په‌کې د یوې کورنۍ پنځه غړي چې ۲ مېرمنې او درې ماشومان په‌کې شامل دي، وژل شوي دي.

نوموړی وایي، دغه پېښه د کوټې د چت د زوړوالي له امله رامنځته شوې ده.

دیبورا لاینز د قزاقستان له استازي سره د افغانستان د وضعیت په اړه خبرې کړي

د ملګرو ملتونو د سرمنشي ځانګړې استازې

په افغانستان کې د ملګرو ملتونو د سرمنشي ځانګړې استازې دیبورا لاینز ویلي چې د قزاقستان د ولسمشر له خاص استازي ارژان کزایخانوف سره‌یې په کابل کې خبرې کړې دي.

مېرمن لاینز تېره شپه په خپل ټوېټر د دې لیدنې خبر ورکړی.

لاینز ویلي چې په دې لیدنه کې یې د افغانستان د روان اقتصادي او بشري ناورین په اړه خبرې کړې دي.

د طالبانو په بیا واکمنېدو سره افغانستان له اقتصادي ناورین کړېږي چې د ملګرو ملتونو په وینا که بشري مرستې ونه‌رسېږي، نو یو انساني ناورین به رامنځته شي.

د ملګرو ملتونو د سرمنشي ځانګړې استازې دیبورا لاینز د قزاقستان له ولسمشر مننه کړې چې په خپل هېواد کې یې ملګرو ملتونو ته یو موقتي دفتر هم ورکړی دی.

پاکستان د ۱،۰۰۰ تنو افغان محصلینو پر مخ د تورخم دروازه پرانیزي

د تورخم دروازه

په کابل کې د پاکستان سفارت د شااوخوا زر تنو افغان محصلینو په مخ د تورخم دروازې د پرانیستلو خبر ورکړی دی.

دې سفارت بېګا یوه اعلامیه خپره کړې چې په دوو لېستونو کې د شااوخوا زرو تنو افغان محصلینو نومونه یاد شوي.

د سفارت د اعلامیې له مخې دغو افغان محصلینو وار دمخه له سفارت سره ځانونه ثبت کړي و او دوی اجازه ورکوي چې د خپلو درسونو د دوام لپاره پاکستان ته ننوځي.

د راپورونو له مخې د هغو زرګونه کسانو منځ کې چې غواړي پاکستان ته ولاړ شي ګڼ شمېر محصلین هم شامل دي چې وايي له درسونو شاته پاتې دي، خو د پاکستان حکومت د ننوتلو اجازه نه‌ورکوي.

د طالبانو په بیا واکمنېدو د تورخم او سپين بولدک لارې څو واره تړل شوي چې ورسره دواړو خواوو ته کسان ایسار پاتې دي.

په دې سربېره افغان سوداګر شکایت لري چې دا لارې د تجارتي مالونو د انتقال په مخه هم بندې دي او له امله‌یې سلګونه لارۍ چې په‌کې تازه مېوې بار دي د سپين بولدک له دروازې سره نږدې درول شوې دي.

دغو سوداګرو شکایت کړی چې که پاکستان ته د ورتلو اجازه ورنه‌کړل شي تازه مېوې به ټولې له‌منځه لاړې شي او له امله به‌یې ملیونونه ډالره تاوان وویني.

د افغانستان وروستی یهود زبولان سمنتوف ترکیې ته ورسېد

زبولان سمنتوف

زبولان سمنتوف د یکشنبې په ورځ د ترکیې استانبول ښار ته ورسېد.

سمنتوف د افغانستان وروستی یهود وګړی و چې د طالبانو په واکمنېدو سره له هېواده د وتلو په لټه کې و.

۶۲ کلن زبولان سمنتوف له کابله پاکستان ته تللی و او له هغه ځایه ترکیې ته رسېدلی.

زبولان په هرات کې زېږېدلی او په کابل کې یې د یهودانو له یوازنۍ کنیسې/عبادت‌ځای ساتنه کوله.

سمنتوف تکل لري چې اسرائیلو ته ولاړ شي، خو د اسرائیلو د قانون له مخې اړ دی چې خپله مېرمن چې کلونه ترې لیرې وه طلاق کړي هغه مسئله چې ده کلونه کلونه ونه‌منله.

پاپ فرانسس په افغانستان، ناروې او بریتانیا کې وروستیو قربانیانو ته دعا وکړه

پاپ فرانسس

د نړۍ د کاتولیک عیسویانو مشر پاپ فرانسس په افغانستان، ناروې او بریتانیا کې د وروستیو بریدونو قربانیانو لپاره دعا وکړه او دتاوتریخوالي د ژر تر ژره پای ته رسېدو غوښتنه یې وکړه.

پاپ پرون د روم په سینټ پیټرز میدان کې وویل، تېره اوونۍ څو بریدونه شوي چې لسګونه کسان پکې وژل شوي دي.

پاپ زیاته کړه:"تېره اوونۍ بېلابېل بریدونه وشول، د بیلګې په توګه په ناروې، افغانستان او بریتانیا کې. یو شمېر خلک مړه او ټپیان شول. زه د قربانیانو خپلوانو ته تسلیت وړاندې کوم او له تاسو څخه غواړم چې د تاوتریخوالي څخه چې تل ناکامۍ له ځانه سره لري لېرې اوسئ هېره مو نه وي چې تاوتریخوالی تاوتریخوالی زیږوي"

د جمعې په ورځ په کندهار کې د شیعه ګانو پر یوه جومات په برید کې لسګونه کسان مړه او ټپیان شول.

ناروې د پنجشنبې په شپه د یوه برید شاهد و چې برید کونکي لږترلږه پنځه کسان په غشي ویشتلي او وژلي.

اخوا د بریتانیا د پارلمان یوغړی هم یوه بریدګر په چاقوګانو وهلی او مړ کړی یې دی.

پاپ فرانسس په خپله وینا کې د وسلو په تولیدونکو او پلورونکو هم غږ وکړ چې خپل فعالیتونه ودروي.

افغانستان کې د سرې میاشتې ځانګړې اوونۍ پیل شوه

ارشیف، افغانستان کې د افغاني سرې میاشتې ټولنې مرستې

د سرې میاشتې ځانګړې اوونۍ نن پیل شوه.

د دغه ټولنې ویاند نوراغا صاحب‌زاده ازادي راډیو ته وویل چې په دې مناسبت په جوړې شوې غونډه کې د سرې میاشتې نړیوالې کمېتې، نړیوال فدراسیون، د ترکیې، ناروې او قطر هېوادونو استازو او د دوی رضاکارانو ګډون کړی و.

د ښاغلي صاحب‌زاده په خبره، د دغې اوونۍ د نماځلو هدف یادې ټولنې ته د مرستو راټولول دي: ​"د ځانګړې اوونۍ له نماځلو څخه موخه په تول هېواد کې د افغاني سرې میاشتې ټولنې انعکاس دی او د افغاني سرې میاشتې ټولنې لپاره د مرستو راټولول دي څو وکولای شو د بې‌وزله هېوادوالو لاسنیوی مو کړی وي."

د افغاني سرې میاشتې ټولنه چې یوه خپلواکه ټولنه ده، دنده‌یې د جګړو او طبیعي پېښو څخه اغېزمنو ته د خوراکي توکو، جامو، سرپناه، درملو، ترانسپورټي خدمتونو او د نورو په شمول د بشري مرستو رسول دي.

نور راوښيه

XS
SM
MD
LG