نړۍ
یوټیوب دوه چینلونه چې په جرمني ژبه یې مواد خپرول ډیلیټ کړل
د ویډیوګانو د شریکولو پلاټفورم، یوټیوب دوه چینلونه چې په جرمني ژبه یې مواد خپرول او د روسیې د دولتي رسنۍ رشیا ټوډې یا (RT) مربوط وو، ډیلیټ کړل.
مسکو د ځوابي اقدام خبرداری ورکړی دی.
د رشیا ټوډې د یوه دغه چنل مسوولې دینارا توکتو سونووا په دې اړه لومړی، پرون په ټلیګرام کې دا اعلان وکړ.
د ټکنالوژۍ لوی شرکت ګوګل چې یوټیوب یې خپل دی ویلي، دوی دغه دوه چنلونه ځکه ډیلیټ کړي چې د کووېډـ۱۹ ناروغۍ او واکسینونو په اړه یې ناسم اطلاعات خپاره کړي وو.
ګوګل ویلي، دوی دغو چینلونو ته خبرداری ورکړی و چې د دوی له اصولو سرغړونه کوي، ځکه یې د لنډ وخت لپاره د دوی نشرات بند کړي دي.
د ورځې تازه خبرونه دلته ولولئ
اسراييل د حزبالله له وسلهوالو سره د سختې جګړې خبر ورکړی
اسراییلو د لبنان پر جنوبي سیمو له ځمکنو بریدونو وروسته وویل چې، ځواکونه یې په سیمه کې د لبنان د حزبالله له وسلهوالو سره په "سختو جګړو" بوخت دي.
د امريکا له مخالفت او په منځني ختيځ کې د جګړې د پراخېدو له وېرې سره سره اسراييلو د دغه هېواد په جنوب کې د لبنان د حزبالله د ځواکونو پر ضد خپل ځمکني عمليات پيل کړل.
د لبنان حزبالله یوه پوځي-سیاسي ډله ده چې د امریکا لهخوا د ترهګرو په توګه پېژندل کېږي.
اروپایي ټولنې د دغې ډلې پوځي څانګه تور لېست کې شامله کړې ده.
حزبالله چې د لبنان په پارلمان کې غړي هم لري، د لبنان پر جنوبي برخې تر ډېره واک چلوي.
د اسرايیلو د پوځ د عربي ژبې ویاند افیحای ادرعي په خپل ټلېګرام پیغام کې لیکلي، د لبنان په جنوب کې سختې نښتې روانې دي.
نوموړي د سيمې له خلکو وغوښتل، د خپل ځاني خونديتوب په موخه دې د ليتاني سيند جنوبي سيمې ته په موټرو کې تګ راتګ نهکوي.
تر دې مخکې د اسرايیلو پوځ اعلان کړی و چې، د دغه هېواد په جنوب کې یې د لبنان د حزبالله پر ضد "دقیق او هدفي" عملیات پیل کړي دي.
د اوکراين پر يوشمېر سيمو د روسيې په بريدونو کې اته کسان وژل شوي
د اوکراین پر خرسون، زاپوریژیا او سومي سیمو د روسیې په نننیو بریدونو کې لږ تر لږه ۸ تنه وژل شوي دي.
تر ټولو زیاته مرګژوبله په خرسون کې د روسیې په یوه هوایي برید کې اوښتې او هلته د لږ تر لږه شپږو کسانو وژل کېدل تایید شوي دي.
د اوکراین ولسمشر ولودمیر زيلينسکي ویلي، خرسون کې د شوي برید له کبله شپږ نور کسان ټپيان شوي هم دي.
بل لور ته د ناټو نوي ټاکل شوي سرمنشي مارک روټې چې نن یې خپل کار پيل کړ، اوکراین ته د کلک پوځي ملاتړ ډاډ ورکړی دی.
روټې نن په بروکسل کې خپله دنده داسې مهال پيل کړه چې، پر اوکراین د روسیې د ناموجه یرغل زر ورځې پوره شوې.
کرکټ؛ هندوستان د ټېسټ اتلولیو په درجه بندۍ کې لومړي مقام ته ورسېد
د هندوستان د کرکټ ملي لوبډلې د ټېسټ اتلولیو په دوه سیالیو کې خپل مېلمه بنګلهدېش ته ماتې ورکړه او د نومرو په جدول کې اول مقام ته ورسېده.
د هندوستان او بنګلهدېش ترمنځ د دوه ټېسټ لوبو د لوبلړۍ وروستۍ لوبه نن سهشنبه د اکټوبر په لومړۍ نېټه کوربه لوبډلې د ۷ وېکټو په تفاوت وګټله.
که څه هم د یادې لوبې په لومړیو درې ورځو کې ورښت و، خو په وروستیو دوه ورځو کې یې پایله ورکړه.
د دې ټېسټ لوبې په دوه پاڼیو کې بنګلهدېش ۲۳۳ او ۱۴۶ منډې کړې وې او هندوستان بیا په لومړۍ پاڼۍ کې ۲۸۵ منډې وکړې او په دویمې پاڼۍ کې یې د بنګلهدېش له لوري ورکړل شوی ۹۵ منډې هدف د درې وېکټو تر سوځېدو وروسته پوره کړ.
د لوبې د غوره لوبغاړي په توګه جایسوال وپېژندل شو، خو اشوین د لوبلړۍ د غوره لوبغاړي جایزه وګټله.
اوسمهال د ټېسټ اتلولیو یا چمپین شيپ د نومرو په جدول کې هندوستان لومړی، اسټرالیا دویم او سریلانکا درېیم مقام لري.
د ښځو د کرکټ شل اوريز نړيوال جام پيليږي
د کرکټ نړیوالې شورا له لوري د ښځو ترمنځ د شل اوریز نړیوال جام د تیاریو لړۍ پای ته رسېدلې ده او ټاکل شوې چې دغه نړیوال جام د اکټوبر میاشتې په ۳مه نېټه پیل شي.
دغه سیالۍ چې د عربي متحدهاماراتو په ابوظبۍ، دوبۍ او شارجه ښارونو کې ترسره کېږي، ۱۰ لوبډلې پهکې ګډون لري، چې په دوه ګروپونو سره وېشل شوي دي.
د یاد نړیوال جام په A ګروپ کې اسټرالیا، هندوستان، نیوزیلنډ، پاکستان او سریلانکا یوځای دي، په B ګروپ کې بیا بنګلهدېش، انګلستان، سکاټلنډ، سویلي افریقا او ویسټ انډیز لوبډلې یوځای شوي دي.
لومړۍ لوبه به یې د اکټوبر په درېیمه نېټه د شارجه په لوبغالي کې د بنګلهدېش او سکاټلنډ د لوبډلو ترمنځ پیل شي او په همدې ورځ به دویمه سیالۍ د پاکستان او سریلانکا ترمنځ وي.
د ویلو ده چې د سپټمبر میاشتې په ۲۸مه نېټه د دې شل اوریز نړیوال جام د تیاریو لوبې پیل شوې وې چې هرې لوبډلې پهکې سیالۍ ترسره کړې.
د فوټسال نړیوال جام؛ د نیمه پایلوبې لوبډلې معلومې شوې
د فوټسال نړیوال جام د منځلوبو یا کوارټرفاینل پړاو سیالۍ هم بشپړې شوې او نیمه پایلوبې ته د اوکراین، برازیل، ارجنټاین او فرانسې لوبډلو لار پیدا کړه.
ټاکل شوې ده چې د نیمه پایلوبې پړاو د اکټوبر میاشتې په ۲مه نېټه ترسره شي.
لومړۍ نیمه پایلوبه به د اوکراین او برازیل او دویمه نیمه پایلوبه به د ارجنټاین او فرانسې ترمنځ وي.
د فوټسال په نړیوال جام کې د افغانستان ملي لوبډلې هم د لومړي ځل لپاره برخه اخستې وه چې د شپاړلس غوره لوبډلو په پړاو کې یې ماتې وخوړه.
دغه سیالۍ چې د ازبکستان هېواد په کوربهتوب روانې دي پایلوبه به یې د اکټوبر میاشتې په ۶مه نېټه ترسره شي.
مارک روټې د ناټو سازمان د نوي سرمنشي په توګه خپله دنده پيل کړه
مارک روټې چې د هالند پخوانی صدر اعظم و، نن د ناټو سازمان د نوي سرمنشي په توګه خپله دنده پيل کړه.
نوموړی نن په بروکسل کې د ناټو په مرکزي دفتر کې د یو لړ رسمي مراسمو په ترڅ کې د نارویژي سیاستوال ینس سټولټنبرګ ځای ناستی شو.
سټولټنبرګ له شاوخوا یوې لسیزې راهیسې د نړۍ د دغه یوه لوی پوځي – سیاسي سازمان، چې ۳۲ غړي لري، مشري وکړه.
مارک روټې داسې مهال د ناټو مشري اخلي چې د اوکراین جګړه چې د ۲۰۲۲م کال په فبروي کې پيل شوې لا هم دوام لري او په منځني ختیځ کې کړکېچ پراخ شوی دی.
په اماراتو کې د نجونو د کرکټ نړیوال شل اوریز جام ته چمتووالی روان دی
په متحده عربي اماراتو کې د نجونو د کرکټ نړیوال شل اوریز جام ته چمتووالی روان دی.
بېلابېلو سپورټي ویبپاڼو نن خبر ورکړی چې د نړۍ له ګوټ ګوټ څخه د کرکټ شاوخوا ۱۵۰ لوبغاړې اماراتو ته رسېدلې دي.
ټاکل شوې چې د نجونو د کرکټ دغه نهم نړیوال جام د پنجشنبې په ورځ، د اکټوبر په درېیمه د بنګلهدېش او سکاټلنډ ټیمونو په لوبې سره پيل شي.
په دغه جام کې لس لوبډلې ټولټال ۲۳ لوبې کوي چې د دوبۍ او شارجې په لوبغالو کې ترسره کېږي.
د کرکټ مبصرینو ویلي چې د اتلولۍ لپاره د استرالیا، هند او سریلانکا پر لوبډلو حساب کېږي.
میقاتي: لبنان د خپل تاریخ له تر ټولو خطرناک پړاو سره مخامخ دی
د لبنان صدراعظم نجیب میقاتي وایي، هېواد یې د خپل تاریخ له تر ټولو خطرناک پړاو سره مخامخ دی.
د فرانس پرېس خبري اژانس په وینا، میقاتي دغه څرګندونې نن سه شنبه د ملګرو ملتونو له استازو سره په یوه غونډه کې کړي دي.
د لبنان صدر اعظم ویلي، ملګري ملتونه باید سملاسي د اسراییلي پوځیانو د هوایي بریدونو له وېرې، د یو میلیون بېځایه شویو کسانو لاسنیوي ته ور ودانګي.
خبر کې که څه هم لبنان ته د ورپېښ خطر نور جزییات نهشته، خو دا په داسې حال کې ده چې اسراییلي پوځیان نن سهار وختي د لبنان جنوب ته ننوتل او هلته یې د حزبالله پر اهدافو ځمکني بریدونه پيل کړل.
اسراییل دغه ځمکني عملیات محدود بللي دي.
بل لورته حزبالله هم ویلي چې د اسراییلو په خاوره کې یې ځینې پوځي اهداف په توغندیو او توپونو ویشتلي دي.
اسراییلي پوځ د دوی پر خاوره د حزبالله تازه بریدونه تایید کړي، خو ویلې يې دي چې مرګژوبله نه لري.
حزبالله د اسراییلي پوځیانو پر اهدافو د بریدونو خبر ورکړ
د حزبالله وسلهوالې ډلي ویلي چې د اسراییل په شمال کې یې د اسراییلي پوځیانو پر اهدافو بریدونه کړي دي.
دا وروسته تر دې چې اسراییلو اعلان وکړ چې نن سهار وختي یې د دوی پولې ته نژدې په لبنان کې د دوی په ټکو محدود ځمکنې عملیات پيل کړي دي.
اسوشېټېډپرېس خبري اژانس د حزبالله په حواله چې امریکا یې ترهګره ډله بولي لیکلي، دوی د اسراییل په میتولا سیمه کې د اسراییلي پوځیانو یوه ډله او په همدې سیمه کې د هغوی یوه غونډه په توغندیو او توپونو ویشتلې ده.
د اسراییل پوځ بیا ویلي چې ځواکونو یې نن سهار د لبنان په جنوب کې په پرتو کلیو کې ځمکني بریدونه پيل کړي دي.
د اسراییل پوځ منلې چې د حزبالله توغندي په میتولا او افیفیم سیمو ورغلي، خو زیاته کړې ده چې یوشمېر یې شنډ او نور یې په شاړو ځمکو لګېدلي دي.
روټې د ناټو سازمان د نوي سرمنشي په توګه خپله دنده پيلوي
مارک روټې چې د هالند پخوانی صدر اعظم و، نن د ناټو سازمان د نوي سرمنشي په توګه خپله دنده پيلوي.
نوموړی به نن په بروکسل کې د ناټو په مرکزي دفتر کې د یو لړ رسمي مراسمو په ترڅ کې د نارویژي سیاستوال ینس سټولټنبرګ ځای ناستی شي.
سټولټنبرګ له شاوخوا یوې لسیزې راهیسې د نړۍ د دغه تر ټولو لوی پوځي او امنیتي سازمان، چې ۳۲ غړي لري، مشري وکړه.
مارک روټې داسې مهال د ناټو مشري اخلي چې د اوکراین جګړه چې د ۲۰۲۲م کال په فبروي کې پيل شوې لا هم دوام لري او په منځني ختیځ کې کړکېچ پراخ شوی دی.