د لاسرسۍ وړ لېنکونه

تازه خبر
چهارشنبه ۳۱ وږی ۱۴۰۰ کابل ۱۰:۲۸

افغانستان

سپینه ماڼۍ: ۳۲ کسان د امریکا په مرسته له افغانستانه ووتل

د کابل هوايي ډګر

سپینه ماڼۍ وايي، د امریکا د اتباعو او دایمي اوسېدونکو په ګډون ۳۲ کسان د متحدو ایالاتونو په مرسته پرون له افغانستانه ووتل.

د امریکا د ملي امنیت شورا ویاندې ایمیلي هورن پرون ماښام په یوه بیان کې وویل چې ۱۹ امریکايي وګړي د قطر ایر وېز په الوتکه کې له افغانستانه ووتل.

الجزیرې چینل هم پرون خبر ورکړ چې د قطر د هوايي شرکت یوه الوتکه چې ۱۵۶ مسافر په کې وو، پرون د کابل له نړیوال هوايي ډګره دوحې ته والوته.

پر کابل د طالبانو له واکمنېدو وروسته د قطر ایر وېز لومړۍ تجارتي الوتنه د پنجشنبې په ورځ له کابله دوحې ته والوته.

د امریکا د ملي امنیت د شورا ویاندې زیاته کړه چې د متحدو ایالاتونو د دایمي ویزې لرونکي ۱۱ نور کسان د ځمکې په لاره له افغانستانه ووتل.

مېرمن هورن وویل، دا ښيي چې د امریکا حکومت امریکایانو ته په بېلابېلو لارو له افغانستانه د وتلو خوندي لارې چارې مومي.

د ورځې تازه خبرونه دلته ولولئ

جلال‌اباد کې یوې وسله‌والې حملې او چاودنو کې ۴ تنه وژل شوي

ارشیف، د جلال‌اباد ښار

په جلال‌اباد ښار کې نن یوه وسله‌واله حمله او لږترلږه درې چاودنې وشوې.

د ننګرهار د اطلاعاتو او فرهنګ ریاست وايي چې د جلال‌اباد ښار سرحدي لوا ته څېرمه د نامعلومو وسله‌والو په ډزو درې تنه ملکیان وژل شوي دي.

خو یوې ځايي سرچینې ازادي راډیو ته وویل چې په دې پېښه کې دوه طالبان او یو عام وګړی وژل شوي دي.

حمله کوونکي په تېښته بریالي شوي دي.

له دې بریده یو ساعته وروسته د ښار په دوهمه ناحیه کې درې چاودنې وشوې.

د شاهدانو په وینا په دې چاودنو کې لږترلږه یو طالب او یو لاروی ژوبل شوي دي.

تر اوسه پورې کومې ډلې د دې برید مسؤلیت په غاړه نه‌دی اخیستی.

جو بایډن په افغانستان کې د نجونو او ښځو د حقونو پر رعایت کېدو ټینګار وکړ

ښاغلي بایډن تېره شپه په نیویارک کې د ملګرو ملتونو عمومي اسامبلۍ ته وینا وکړه.

د امریکا متحده ایالاتو ولسمشر جو بایډن په افغانستان کې د نجونو او ښځو د حقونو پر رعایت کېدو ټینګار وکړ.

ښاغلي بایډن تېره شپه په نیویارک کې د ملګرو ملتونو عمومي اسامبلۍ ته په دې اړه وویل: "امنیت شورا یو پرېکړه‌لیک تصویب کړ چې د افغانانو د پرمختګ لپاره څه ډول ملاتړ وشي. له طالبانو د بشري حقونو په برخه کې څرنګه تمه کېدای شي. موږ ټول باید د ښځو او نجونو د حقونو ملاتړ وکړو څو دوی له اقتصادي سیاسي او اجتماعي پلوه له خپل ټول ځواکه کار واخلي او د خپلو هیلو لار پرته له تعصب او خشونته تعقیب کړي."

افغان ښځې شکایت لري چې طالبانو د افغانستان له نیولو وروسته د دوی پر کار او زده‌کړو بندیزونه لګولي دي.

طالبانو د ښځو چارو وزارت لغوه کړی، په اکثرو دولتي ادارو کې یې له ښځو غوښتي چې تر یوې مودې پورې کار ته حاضرې نه‌شي او تر اوسه پورې یې له شپږم د پورته ټولګیو زده‌کوونکو ته اجازه نه‌ده ورکړې چې ښوونځیو ته لاړې شي.

ملګرو ملتونو له افغانستان سره ۴۵ ملیونه ډالره بېړنۍ مرسته تصویب کړه

د ملګرو ملتونو د سرمنشي مرستیال  او د بېړنیو مرستو همغږوونکي مارتین ګریفتس

ملګرو ملتونو په دې خاطر چې په افغانستان کې روغتیايي خدمات په ټپه ونه‌درېږي، له دې هېواد سره د ۴۵ ملیونه ډالرو بېړنۍ مرسته تصویب کړه.

په بشري چارو کې د ملګرو ملتونو د سرمنشي مرستیال او د بېړنیو مرستو همغږوونکي مارتین ګریفتس په یوه بیان کې خبرداری ورکړ چې په افغانستان کې درمل، طبي مرستې او سونګ مواد په ختمېدو دي.

ملګري ملتونه وايي چې ۴۵ ملیونه فوري مرسته به د افغانستان روغتیايي سیستم له سقوطه راوګرځوي.

د کارګرانو ټولنه د بې کارۍ له امله د بشري ناورین خبرداری ورکوي

ارشیف

امکا یا د افغانستان د کارګرانو ملي ټولنه په افغانستان کې د بې کارۍ له امله د یو بشري ناورین خبرداری ورکوي.

د دغې ټولنې رئيس معروف قادري نن چهارشنبه (د وږي په ۳۱مه) ازادي راډیو ته وویل، دا مهال میلیونونه وګړي بې روزګاره دي چې دې وضعیت ګڼ افغانان اندېښمن کړي دي.

قادري زیاتوي: "د کارګرو قانون نور نشته، میلیونونه وګړي بې کاره دي، څوک د چا غږ نه اوري، اندېښمن یو، شدیده اندېښنه لرو، یو بشري ناروین سره به مخ شو."

نوموړی اندېښنه لري که حکومت د بې روزګارۍ د مخنیوي لپاره لازم اقدامات ترسره نه کړي، وېره شته د افغانستان خلک له سختې بې وزلۍ سره مخ شي.

دا اندېښنه په داسې حال کې ده چې پر افغانستان د طالبانو په واکمنېدو سره ګڼ شمېر خلک بې روزګاره شوي او د څو اونیو په تېرېدو لاهم د دغه هېواد بانکونه خپل عادي حالت ته نه دي ګرځیدلي.

تردې وړاندې ملګرو ملتونو سازمان هم په افغانستان کې د لوږې او بې وزلۍ امله د بشري ناورین خبرداری ورکړی دی.

ننګرهار چارواکي: سږ به په ۱۳۰۰ جریبه ځمکه نوي بڼونه جوړ شي

ارشیف

د ننګرهار ولایت د کرنې، اوبو لګونې او مالدارۍ ریاست وایي، سږ کال به په دغه ولایت کې ۱۳۰۰ جريبه ځمکه نوي بڼونه جوړ شي.

د کرنې رئیس مولوي عبدالستار محمد دا خبرې نن چهارشنبه (د وږې په ۳۱مه) د همکارو پروژو له چارواکو سره په یوه ناسته کې وکړې و یې ویل، دا شمېر بڼونه به په را روانو درې میاشتو کې جوړ شي.

ریاست په دې اړه په یوه خبرپاڼه کې ویلي چې د بڼوالۍ ارزښت ته به ځانګړې پاملرنه وشي.

په خبرپاڼه کې راغلي، سږ کال د نیالګیو روزونکو ټولنې د ننګرهار په بېلابېلو قوریو ۳۷۵ زره اصله د مالټو، لیمو، شفتالو، املوک، الوچو او چار مغزو بوټي روزلې او د کښت لپاره تیار دي.

بڼوال او کروندګر بیا د امکاناتو غوښتونکي دي، څو وکولی شي د وچکالۍ له امله له رامنځته شوېو ستونزو سره مبارزه وکړي.

ناپیژنده وسله والو په جلال اباد ښار کې ۳ تنه ووژل

جلال اباد ښار

ناپیژنده وسله والو د ننګرهار ولایت په مرکز جلال اباد ښار کې درې تنه په ډزو ووژل.

د ننګرهار د اطلاعاتو او فرهنګ ریاست ازادي راډیو ته په را استول شوېو معلوماتو کې ویلي چې نامعلومو وسله والو نن چهارشنبه (د وږي په ۳۱مه) سهار شااوخوا نهه بجې د جلال اباد ښار د اوومې ناحیې اړوند سرحدي لېوا ته څېرمه پر ملکي وګړو ډزې وکړې چې په کې درې تنه ملکیان وژل شوي دي.

د دغو معلوماتو له مخې، بریدګر وسله وال د پېښې له ځایه تښتېدلي، خو د موندلو هڅې یې روانې دي.

هاخوا یوې ځایي سرچینې بیا د نوم نه ښودلو په شرط ازادي راډیو ته ویلي چې په وژل شوېو کسانو کې دوه طالبان او یو عام وګړی شامل دی.

د سرچینې د معلوماتو له مخې، وسله وال کسان په یوه رېکشا کې ناست وو چې دغلته یې پر ولاړو دوو تنو طالب وسله والو برید وکړ او له برید وروسته وتښتېدل.

خو رسمي سرچینو بیا په دغه برید کې د طالب وسله والو د وژل کېدو په تړاو څه نه دي ویلي.

دا په داسې حال کې ده چې په دې وروستیو کې یو ځل بیا په جلال اباد ښار کې چاودنو زور اخیستی چې د طالبانو ترڅنګ په کې ګڼو ملکي وګړو ته هم د سر او مال زیانونه اړولي دي.

که څه هم د نننۍ پېښې مسؤلیت تر دې دمه چا نه دی منلی، خو تر دې وړاندې د وروستیو ځینو چاودنو مسؤلیت چې د طالبانو پر رینجر موټرو شوې وو، داعش منلی و.

امریکا ته ورغلو افغانانو له ځانه سره خطرناکه ناروغي هم لېږدولې

امریکا ته ورغلي کډوال

د امریکا متحد ایالاتونه وایي، په لسګونو زره افغانان چې دې هېواد ته ورغلي دي خطرناکه ناروغۍ یې امریکا ته له ځانونو سره وړي دي.

یو شمېر امریکایي رسنیو د امریکا د ناروغیو د کنټرول د مرکز په وینا پرون سې شنبه (د وږي ۳۰مه) خبر ورکړچې دغو افغانانو د ملاریا، شري او توبرکلوز ناروغۍ امریکا ته له ځانونو سره لېږدولې دي.

دغو افغانانو ته ویل شوي دي چې د شري ضد واکسین وکړي.

د راپورونو له مخې تراوسه د شري شپاړس پېښې ثبت شوي دي.

کومو کسانو ته چې دا واکسین ورکړل شوی دی باید درې اوونۍ قرنطین شي.

دغو افغانانو ته اته روغتیایي مرکزونه ځانګړي شوي دي چې درې یې د ویرجینیا په ایالت کې او پنځه په انډیانا، نیوجرسي، نیو مکسیکو، تکزاس او ویسکانسن کې دي.

هند او فرانسه له افغانستانه د ترورېزم احتمالي خپریدو ته اندېښمن دي

د هند صدراعظم ناریندرا مودي او د فرانسې ولسمشر امانویل مکرون

د هند صدراعظم ناریندرا مودي او د فرانسې ولسمشر امانویل مکرون له افغانستانه د ترورېزم احتمالي خپریدو ته اندېښنه ښکاره کړه.

د هند د صدراعظم دفتر خبر ورکوي چې مودي له ښاغلي مکرون سره پرون د ټیلیفوني خبرو پر مهال همدا راز له افغانستانه د مخدر موادو، انسانانو او وسلو د قاچاق په اړه خبرې وکړې.

د هند او فرانسې مشرانو ټینګار وکړچې باید په افغانستان کې د ښځو او اقلیتونو د حقونو په برخو کې ډاډ ترلاسه شي.

تمه ده چې د هند صدراعظم ناریندرا مودي د جمعې په ورځ د افغانستان په اړه د امریکا د متحد ایالاتونو له ولسمشر جوبایډن سره هم خبرې وکړي.

د طالبانو سرپرست رییس الوزراء د روسیې، چین او پاکستان استازو سره وکتل

د طالبانو سرپرست رییس الوزراء ملا محمد حسن اخند

د طالبانو سرپرست رییس الوزراء ملا محمد حسن اخند پرون سې شنبه (د وږي ۳۰مه) په کابل کې د روسیې، چین او پاکستان له استازیو سره وکتل.

د افغانستان لپاره د روسیې له ځانګړي استازي ضمیرکابلوف، د افغانستان لپاره د پاکستان له ځانګړي استازي محمد صادق خان او د افغانستان لپاره د چین له ځانګړي استازي یو شیاو یونګ سره د غونډې پرمهال د طالبانو د بهرنیو چارو سرپرست وزیر امیرخان متقي او د دوی د مالیې سرپرست وزیر هدایت الله بدري هم وو.

ښاغلي متقي په خپل ټویټر کې د دې غونډې عکسونه خپاره کړي دي، خو نور جزییات یې نه دي ورکړي چې پر کومو موضوعاتو خبرې شوي دي؟

بل لورته له دغو درېیو بهرنیو استازیو سره پخواني ولسمشر حامد کرزي کتلي دي.

ښاغلي کرزي په فیسبوک کې لیکلي دي چې ده او ښاغلي عبدالله د روسیې، چین او پاکستان له استازیو سره د غونډې پر مهال پر یوه ټول شموله حکومت، سولې او ثبات، معتدل سیاست او د ښځو او نجونو لپاره د تحصیلي او تعلیمي فرصتونو پر چمتوالي ټینګار کړی دی.

یو افغان ډاکتر وحید ارین بریتانیا کې د کال د غوره ډاکتر اوارډ وګاټه

ډاکتر وحید ارین (کین) او مشهوره فوټبالر ډېوېډ بکهام

وحید ارین په بریتانیا کې د کال د غوره ډاکتر اوارډ وګاټه.

وحید ارین ته د بریتانیا په کچه د غوره ډاکتر اوارډ بېګا په یو لړ مراسمو کې چې د بریتانیا حکومتي چارواکو، شاهي کورنۍ غړو او روغتیاپالانو حضور درلود د مشهوره فوټبالر ډېوېډ بکهام په لاس ورکړل شو.

وحید ارین چې کلونه مخکې له افغانستانه بریتانیا ته تللی په ټویټر باندې ویلي چې د ده په څېر نور ګڼ کسان هم وړتیاوې لري او باید چانس ورکړل شي.

ښاغلی ارین زیاتوي: "دا اوارډ ما داسې حال کې وګټه چې کلونه مخکې د افغانستان له جګړو راووتم او دلته بریتانیا ته د یوه داسې ماشوم په توګه راغلم چې کورنۍ ورسره نه‌وه او رسمي تعلیم‌یې نه‌و کړی، خو نور ګڼ کسان هم لکه د ما په شان دي چې همداسې وړتیاوې لري او هیلې لري. هغوی هم لوی کارونه کولای شي که تاسو ترې ملاتړ وکړئ، نو هیله لرم چې کډوالو ته چانس ورکړئ."

ډاکتر ارین د ټيلي مېډیسن په نوم یو بنسټ جوړ کړی چې په‌کې د لوېدیځو هېوادونو ډاکتران د جنګ‌ځپلو سیمو له روغتیاپالانو سره په انلاین بڼه مشورې او لارښوونې شریکوي.

د بریتانیا په کچه روغتیاپالانو ته د غوره اوارډونو پروګرام د ملي روغتیا ادارې، سن خپرونې، څلورم چینل او ځینو نورو بنسټونو له‌خوا په لار اچول شوی و.

کاناډا کې ټاکنې؛ یوه افغان الاصله وزیره مریم منصف ماتې سره مخ شوې

د کاناډا د کابینې یوه افغان الاصله وزیره مریم منصف

د کاناډا د کابینې یوه افغان الاصله وزیره مریم منصف هم له ماتې سره مخ بلل شوې ده.

د کاناډايي رسنیو د راپورونو له مخې اغلې منصف چې د لیبرال ګوند څخه د پیتربورو د سیمې استازې وه او په کابینه کې یې د ښاري اقتصادي پراختیا وزارت مخته ووړ په روانو ټاکنو کې ښايي خپله څوکۍ په محافظه کارې سیالې میشل فیریري وبایلي.

د منصف تر څنګ د لیبرال ګوند یوه بله وزیره بېرنادېت جوردن هم خپله څوکۍ له لاسه ورکوي.

که څه هم د دغو دوو وزارتونو له لاسه ورکول د لیبرال ګوند لپاره ګران پریوزي، خو وړاندوینې ښيي چې د صدر اعظم جسټن ترودو دا ګوند به په نننیو ټاکنو کې ډېرې څوکۍ وګټي.

د وړاندوینو له مخې رایه ورکوونکو لیبرال ګوند بریالی کړی، خو لا هم معلومه نه ده چې دا ګوند به پارلمان کې دومره اکثریت وګټي چې د اپوزیسیون له ملاتړ پرته خپلو هېلو ته ورسېږي او که نه؟

ټرودو دا مهال د داسې حکومت مشري کوي چې پارلمان کې کمې څوکۍ لري، دوی د قوانینو د پاس کولو لپاره د نورو ګوندونو ملاتړ ته اړتیا لري.

جسټن ټروډو تېره میاشت ویلي و، د کرونا وبا پر مهال خلک محافظه کاره حکومت نه غواړي.

له ټاکنو مخکې نظرپوښتنو ښودلې وه چې ترودو به د محافظه کارانو له مشر ایرین و توولې ( Erin O toole) سره موازي مخته ولاړ شي.

طالبان: ډېر ژر به له ۶م ټولګي پورته د نجونو ښوونځي پرانېستل شي

د نجونو یو ښوونځی

د طالبانو حکومت اعلان کړی هر څومره ژر چې کېږي له شپږم ټولګي پورته د نجونو ښوونځي پرانېزي.

دا خبره د طالبانو د حکومت ویاند او د اطلاعاتو او فرهنګ وزارت مرستیال ذبیح الله مجاهد نن رسنیو ته وکړه.

هغه وویل، د لوړو ټولګیو د پرانېستې لپاره په یوه طرزالعمل کار روان دی، څو د ده په خبره نجونې په مصوونه توګه ښوونځي ته ولاړ شي.

طالبانو د روانې اوونۍ په پیل کې د هلکانو ښوونځي پرانیستل، خو له شپږم ټولګي پورته د نجونو د ښوونځیو د پرانیستې په تړاو یې ګام وانه خیست.

دې چارې ګڼ تُند غبرګونونه وپارول.

طالبانو خپله کابینه کې نوي سرپرستان او مرستیالان معرفي کړل 

د طالبانو د حکومت ویاند ذبیح الله مجاهد

طالبانو په خپله کابینه کې ځیني نوي سرپرستان او مرستیالان معرفي کړل.

نورالدین عزیزي د تجارت وزارت او ډاکټر قلندر عباد د روغتیا وزارت د سرپرست په توګه ګمارل شوي.

پاتې یو شمېر کسان د یادو وزارتونو د مرستیالانو او ځینو نورو ادارو د مشرانو په توګه ټاکل شوي.

د طالبانو د حکومت ویاند ذبیح الله مجاهد وویل چې مسلکي کسان معرفي شوي او لا په دې برخه کې کار روان دی: "دا اوس هم چې کوم لېسټ موږ اعلان کړ، تر ډېره حده پورې مسلکي کسان په نظر کې نیول شوي. پوهان او ډاکټر صاحب مسلکي ادارو ته معرفي شوي. له دې ایسته به هم کوښښ کوو خو دا چې بیا کله به اداره مسووله کېږي دا بعدي اقدامات دي چې زموږ د مشرانو له خوا به تصمیم ونیول شي."

تردې مخکې طالبانو د تقریباً ټولو وزارتونو لپاره سرپرستان معرفي کړي وو.

د طالبانو د کابینې ګڼو منتقدینو ویلي چې دوی د اقلیتونو، ښځو او مسلکي کسانو ګمارنه له پامه غورځولې ده.

صرافان وايي، که یې مالي ستونزې هوارې نه شي فعالیتونه دروي

شهزاده سرای

د افغانستان د صرافانو ټولنه وایي،که د صرافانو مالي ستونزې هوارې نه شي دوی د فعالیتونو درولو ته به اړ شي.

د افغانستان د صرافانو د سراسري ټولنې مرستیال حاجي داد ګل نن سې شنبې (د وږې په ۳۰مه) ازادي راډیو ته وویل، د افغانستان بانک له خوا لا هم د دوی ستونزه نه ده هواره شوې.

نوموړي وویل، بانکونه صرافانو ته په اوونۍ کې شل زره افغانۍ او یا دوه سوه ډالر ورکوي چې دې چارې د صرافانو کارونه له خنډ او ځنډ سره مخ کړي.

د افغانستان بانک دا پرېکړه په داسې حال کې کړې چې د افغانستان ډېره پانګه د نړیوال بانک له خوا ګنل ده.

په افعانستان د طالبانو په واکمنېدو سره «IMF» یا نړېوال بانک د افغانستان پیسې کنګل کړي چې له دې امله بانکونه له ګڼو ستونزو سره مخ دي

د افغانستان کرنې وزارت له ترکي استازو د هر اړخیزو مرستو غوښتنه کړې

د کرنې وزارت او ترکي استازو ناسته

د افغانستان د کرنې،اوبو لګونې او مالدارۍ وزارت له ترکیې غواړي چې له دغه هېواد سره هر اړخیزو مرستو ته دوام ورکړي.

د کرنې، اوبو لګونې او مالدارۍ وزارت سرپرست مولوی عبدالرحمن راشد نن سې شنبه (د وږي ۳۰مه) د افغانستان لپاره د ترکيې ۷۷ ودانيز شرکت مسؤل براق انسال سره د کتنې پر مهال له نوموړي وغوښتل چې هېواد دې خپلې پروژې په ځانګړي ډول د کرنې په برخه کې عملي کړي.

وزارت په يوه خبرپاڼه کې ویلي، په دغه ناسته کې ښاغلي انسال په خپلو خبرو کې له افغانستان سره د ترکي پانګوالو د هر ډول همکاریو ژمنه کړې او ډاډ یې ورکړی چې هېواد به یې له افغانستان سره په بېلابېلو برخو کې مرستې وکړې.

په خبرپاڼه کې راغلي، په دغه ناسته کې د کرنې وزارت مرستیال مولوي فضل ربي فضلي ويلي چې افغانستان د سوداګرۍ له نظره له ستونزو سره مخ دی او په وینا یې یوازینۍ لاره چې پرې اتکا کېږي هغه کرنه ده.

د افغانستان د کرنې وزارت وایي، افغانستان دا مهال د کمزوري اقتصادي وضعیت سره مخ او د بې وزلۍ په ټيټه کچه کې دی.

دا په داسې حال کې ده چې تر دې وړاندې ملګرو ملتونو په خپل راپور کې ویلي و چې د افغانستان د وګړو نیمایي برخه کافي اندازه خوړو ته لاسرسی نه لري او دا حالت یې خواشیونکی بللی.

نور راوښيه

XS
SM
MD
LG