د لاسرسۍ وړ لېنکونه

تازه خبر
دوشنبه ۲۹ وږی ۱۴۰۰ کابل ۰۷:۳۱

نړۍ

روسیې په مسکو کې د امریکا سفیر جان سولیوان احضار کړی

په مسکو کې د امریکا سفیر جان سولیوان

د راپورونو له مخې په مسکو کې د امریکا سفیر جان سولیوان د هغه څه په خاطر چې روسي چارواکو د روسیې په انتخاباتو کې د متحدو ایالاتو لاس وهنه بللې، د روسیې د بهرنیو چارو وزارت ته احضار شوی دی.

د روسیې تاس او ریا نووستي خبري اژانسونو راپور ورکړی چې ښاغلي سولیوان د بهرنیو چارو په وزارت کې د ۲۰ دقیقو لپاره تم شو او بیا ووت.

ښاغلي سولیوان په دې اړه چې ولې احضار شوی دی څه نه دي ویلي، خو روسي رسنیو هم په دې اړه نور جزییات نه دي ورکړي.

د روسیې پارلماني انتخابات د نوومبر له ۱۷ مې تر ۱۹ مې نېټې ترسره کېږي.

ځینو رسنیو د نامعلومو سرچینو له قوله راپور ورکړی چې وايي، په مسکو کې د امریکا سفیر هغو روسي خبریالانو ته چې په امریکا کې کار کوي د کار د جواز د چمتو کولو لپاره د بهرنیوچارو وزارت ته بلل شوی و.

د ورځې تازه خبرونه دلته ولولئ

د اسپانیې کنري ټاپو کې اورشیندنې ګڼ اوسېدونکي بې‌ځایه کړل

د اسپانیې د کنري ټاپو لاپالما سیمه کې اورشیندنه

د اسپانیې د کنري ټاپو په لا پالما سیمه کې لږ تر لږه څلور کلي وروسته له هغې له خلکو تخلیه شول چې پرون هلته اورشیندنه یا اتشفشان پیل شو.

تر اورشیندنې وروسته هوا ته لاوا وشیندل شوه او خوټېدونکې څپې پر کورونو وربرابرې شوې.

تر اورشیندنې څو ساعته وروسته چارواکو اول د دې ټاپو د جنوب له ګڼ­‌مېشتو سیمو زیانګالي یعنې اسیب‌پذیره اوسېدونکي او څاروي وایستل.

په اورشیندنه کې چې پرون ماسپښین پیل شوه، تر اوسه د مرګ‌ژوبلې راپور نه‌دی ورکړل شوی.

یوه وسله‌وال د روسیې پرم ښار په یوه پوهنتون کې په ډزو ګڼ کسان ووژل

د پرم ښار پوهنتون کې له حملې وروسته د دغه پوهنتون مخ ته راټول شوي خلک

د روسیې د پرم ښار په یوه پوهنتون کې یوه وسله‌وال کس په ډزو سره ګڼ کسان ووژل.

د روسیې تحقیقاتي کمېټې په یوه اعلامیه کې ویلي په دې حمله کې چې نن شوې ۸ کسان وژل شوي دي.

دغه کمېټه وايي ګڼ نور کسان ټپیان شوي او وسله‌وال تن هم په ټپي حالت کې نیول شوی دی.

ځینو نورو رسنیو راپور ورکړی چې حمله کوونکي وروسته ساه ورکړې ده.

روسي رسنیو ویلي، نن یوه ناپېژانده کس د پوهنتون ودانۍ ته له ننوتلو وروسته ډزې پیل کړې.

بل‌خوا رین (REN) ټلوېزیون د پېښې د صحنې وېډیویي تصاویر خپاره کړي چې ښيي خلک د ډزو پر مهال د دوهم پوړ له کړکیو ځانونه لاندې اچوي.

د کرملېن ملاتړې د متحدې روسیې ګوند په پارلماني انتخاباتو کې د بري ادعا وکړه

د روسیې د انتخاباتو مرکزي کمېسیون کې د رای اچونې مرکزونو څار

د کرملېن له ملاتړه برخه‌من د متحدې روسیې ګوند ادعا وکړه چې د روسیې د ولسي جرګې درې ورځنۍ ټاکنې یې ګټلې دي.

اپوزېسیون وايي، د دغو درې ورځنیو ټاکنو پر مهال انتخاباتي سرغړونې او په رایو کې لاسوهنه شوې ده.

دغه ټاکنې چې پرون پای ته ورسېدې او مهمې ځکه ګڼل شوي چې ګومان کېږي په مرسته‌یې ولسمشر ولادیمیر پوتین هڅه کوي پر قدرت خپلې منګولې لا خښې کړي، هغه هم داسې وخت چې د ۲۰۲۴م کال د ولسمشرۍ ټاکنو ته ښايي بیا ځان کاندید کړي.

په روسیه کې د ګولوس په نوم پر ټاکنو د څار خپلواک بنسټ د بورډ غړي ویتالي اوریرین پرون یکشنبه د ازادي راډیو کرنټ ټایم برخې ته وویل: "دا ګرانه ده که دغو ټاکنو ته شفافې ټاکنې ووایو. شفافې نه‌وې. ځکه موږ د ولسمشرۍ او تر هغه مخکې د فدرال ټاکنو په څېر د وېډیو له لارې د مستقیمې څارنې امکان نه‌درلود."

په دغو ټاکنو کې د اپوزېسیون حضور وروسته له هغې لا کم شو چې چارواکو د زنداني شوي سیاسي مشر الکسي ناوالنۍ د شبکې غړي له کاندیداتورۍ منع کړل.

روسیه کې په بې‌ساري کچه ځنګلونه د طبیعي اور له امله سوځېدلي

روسیه کې په ځنګلونو کې لګېدلی اور

روسیه کې له تېرو دوو لسیزو راهیسې سږ کال په بې‌سارې کچه ځنګلونه د طبیعي اور له کبله سوځېدلي دي.

د چاپېریال ساتنې سازمان د مسکو څانګې ویلي، د سږ کال له پيله تر اوسه اورونو ۱۸،۱۳ ملیونه هکټاره ځنګل له‌منځه وړی دی.

له دې وړاندې ۲۰۱۲م کال کې اورونو ۱۸،۱۸ ملیونه هکټاره ځنګل روسیه کې سوځولی و.

د چاپېریال ساتنې سازمان د مسکو څانګې ویلي، د اور لګېدنې د زیانونو معلومات‌یې د سټلایټ سیستم په مټ ترلاسه کړي دي.

د اور لګېدنې لامل د حرارت د درجې لوړوالی ښودل شوی دی.

د پاکستان پولیسو د مولانا عبدالعزیز پر وړاندې قضایي دوسیه پرانیسته

مولانا عبدالعزیز

د پاکستان پولیسو د یوه با نفوذه روحاني په وړاندې قضایي دوسیه پرانیسته.

مولانا عبدالعزیز تورن دی چې اسلام‌اباد کې یې پر خپله دیني مدرسه د پاکستاني طالبانو بیرغ درولی دی.

هغه چې د طالبانو پلوی هم دی، د ادعا له مخې غواړي پاکستان کې شرعي نظام حاکم شي.

د راپورنو له مخې، کله چې تېره میاشت طالبان کابل ته ننوتل، مولانا عبدالعزیز د جامعه حفصه پر مدرسې د پاکستاني طالبانو سپین او تور بیرغ ودراوه.

دا دیني عالم ۵۸کلن دی او دوه کاله‌یې زندان کې هم تېر کړي دي.

پولیسو ویلي، د ده په وړاندې اوسنۍ دوسیه وروسته تر دې پرانیستل شوه چې نه‌یې غوښتل له مدرسې دا بیرغ لیرې کړي.

پاکستان کې د پوليو ډلې یو ساتونکی پولیس ووژل شو

پاکستان کې د پولیو واکسین ټیم سره یو ساتونکی پولیس

پاکستاني پولیس وايي د خېبر پښتونخوا په کوهاټ کې يو پوليس چې د پوليو ډلې ساتنه‌يې کوله، وژل شوی دی.

د پوليسو وياند فضل نعيم په يو بیان کې ویلي چې ساجد نومي پولیس چارواکی نن سهار په بهزادي سيمه کې د پوليو له ډلې سره ملګری و چې وسله‌والو ورباندې ډزې وکړې او ويې‌واژه.

بیان زیاتوي چې د بریدګر د پلټون عملیات پيل شوي.

په کوهاټ کې د سپټمبر له ۱۷مې نېټې راهیسې د پوليو ويروس مخنيوي په لړ کې د ماشومانو د واکسينولو کمپاين پیل شوی دی.

پخوا هم د پاکستان په مختلفو سيمو کې د پوليو ډلو ساتونکي پوليس وژل شوي دي.

فضا ته په سفر تللي ۴ سیلانیان بېرته ځمکې ته راوګرځېدل

څلور تنه چې فضا ته په سفر تللي وو

څلور تنه چې فضا ته په سفر تللي وو، پرون (شنبه) د ځمکې په مدار کې له درېیو ورځو تېرولو وروسته بېرته ځمکې ته راوګرځېدل.

سپېس اېکس ستوربېړۍ چې دا څلور تنه په‌کې سپاره وو، د فلوریدا په ساحل کې کېناسته.

دا لومړی ځل و چې څلور تنه سیلانیان په خپل شخصي لګښت د ځمکې مدار ته لاړل.

دا ډول سفرونه د نړۍ د دوو سترو ملیاردرانو ریچارد برانسن او جیف بیزوس له لوري پیل شول.

نن د روسیې د پارلماني انتخاباتو وروستۍ ورځ ده

د روسیې پارلماني انتخابات

په روسیه کې نن د پارلماني انتخاباتو وروستۍ یا درېیمه ورځ ده.

دا انتخابات په داسې حال کې کېږي چې په هغو کې د پراخو بې‌نظمیو د تورونو ترڅنګ د اپوزېسیون د بندي سیاستوال الکسي ناوالنۍ غورځنګ ځیني همکاران ځپل شوي دي.

اټکل کېږي چې پارلماني انتخابات به د کرملېن له ملاتړه برخه‌من واکمن ګوند (متحده روسیه) وګټي، خو دا ګوند چې د ولسمشر ولادیمیر پوتین ملاتړ کوي، له دې خطر سره مخامخ دی چې ممکن په پارلمان کې لوړ اکثریت له لاسه ورکړي.

تر انتخاباتو مخکې نظرپوښتنو ښوولې چې د دغه ګوند شهرت په ۱۰۰ کې ۳۰ لږ شوی دی.

دا ګوند اوس د روسیې د دوما جرګې چې ۴۵۰ څوکۍ لري، په څلورو کې درې برخې په کنټرول کې لري.

د سعودي عربستان د بهرنیو چارو وزیر په درې ورځني سفر نوې ډېلي ته ورسېد

د سعودي عربستان د بهرنیو چارو وزیر فیصل بن فرحان السعود

د سعودي عربستان د بهرنیو چارو وزیر فیصل بن فرحان السعود تېره شپه په درې ورځني سفر نوې ډېلي ته ورسېد.

د سعودي د بهرنیو چارو وزیر به نن له خپل هندي ساري سره د افغانستان په اړه خبرې وکړي.

شهزاده سعود به سبا (دوشنبه) مخکې تر دې چې نیویارک ته روان شي، له صدراعظم نرېندرا مودي سره وویني.

هند او سعودي عربستان د افغانستان د وروستیو پرمختیاوو په اړه ګډې اندېښنې لري.

له اسرائیلي لوبغاړو سره د ایراني لوبغاړو په نه‌لوبېدو د خامنه‌اي ټینګار

د ایران رهبر ایت‌الله علي خامنه‌اي

د ایران رهبر ایت‌الله علي خامنه‌اي یو وار بیا له اسرائیلي لوبغاړو سره د ایراني لوبغاړو په نه‌لوبېدو ټینګار وکړ.

خامنه‌اي پرون د ایران د المپيک او پارالمپیک ټيمونو له غړو سره ولیدل.

هغه ویلي: "د ایران د ورزش چارواکي باید په دې برخه کې په هېڅ صورت غلي ونه‌اوسي او ایراني لوبغاړي له اسرائیلي سیالانو سره باید لاس ورنه‌کړي."

د ایران رهبر چې له سیاست نیولې تر ورزشه په ټولو چارو باندې وروستۍ خبره کوي داسې وخت له اسرائیل سره د لوبو په نه‌کولو ټینګار کړی چې له اسرائیل سره د نه‌لوبېدو په خاطر د ایران د ځینو ورزشي فدراسیونونو او لوبغاړو فعالیت په نړیواله کچه ځنډول شوی.

تر ټولو وروستی مورد د ایران جودو فدراسیون دی چې تر دوو نورو کلونو ۱۴۰۲ پورې هم له نړیوالو فعالیتونو محروم شوی ځکه ګڼ ایراني جودوکاران‌یې په المپیک او نړیوالو لوبو کې له اسرائیل سره له مخ کېدو منع کړي وو.

د ایران د سوک وهنې، پهلوانۍ او جودو یو شمېر لوبغاړو د ایراني چارواکو د دې ټینګار او فشار په خاطر له ایران وتلي او اوس د نورو هېوادونو په نوم لوبېږي.

سعید مولایي یو له دې لوبغاړو دی. مولايي د توکیو په المپیکي لوبو کې د مغولستان لپاره ولوبېد او د جودو د سپینو زرو مډال‌یې وګاټه.

سلګونه امریکایانو پر کانګرس په بلوا د تورنو کسانو په ملاتړ لاریون وکړ

د امریکا پر کانګرس یو شمېر بلوا کوونکي

سلګونه کسانو پرون د امریکا کانګرس پر ودانۍ په بلوا باندې د تورنو کسانو په ملاتړ لاریون وکړ.

د تېرې جنورۍ په شپږمه د امریکا د کانګرس پر ودانۍ باندې سلګونه کسان ورننوتل او له پولیسو سره په اخ‌وډب کې د پولیسو په شمول ګڼو کسانو ته مرګ‌ژوبله واوښته.

د دې عمل په تړاو ګڼ کسان تورن او بند ته اچول شوي دي.

پرون وروسته له هغه چې د کانګرس د ودانۍ د پولیسو مشر ټام منګیر وویل د بیا ځلي بلوا فرصت به برابر نه‌شي، د مظاهره‌چیانو په وړاندې د امنیتي ځواکونو شمېر څو برابره زیات شو.

منګیر وویل له ملي ګارډ به هم مرسته وغواړي.

هغه امر کړی چې د کانګرس د ودانۍ شااوخوا دوه متري کټارې ودرول شي.

د سږ کال په پیل کې په یوه مشهوره پېښه کې، پخواني ولسمشر ډونالد ټرمپ ته وفادار لاریون کوونکي د جنوري په ۶مه په دې هدف د کانګرس ودانۍ ته ننوتل چې د ټاکنو د پایلو تأیید له ګډوډۍ سره مخ کړي.

امریکا د هایتي د زرګونه تازه وارد شویو کډوالو د ایستلو لپاره هڅې کوي

ارشیف، یو شمېر امریکايي سرتېري او د هائیتي وګړي

امریکا له خپلې خاورې د هائیتي د زرګونه تازه وارد شویو کډوالو د ایستلو لپاره هڅې کوي.

د امریکا د کورني امنیت وزارت ویلي د دغو کډوالو د ایستلو لپاره به د پروازونو شمېر زیات کړي.

دا کډوال له مکسیکو څخه متحده ایالاتو ته له تېرېدو وروسته په تکزاس ښار کې تر یوه پله لاندې راټول شوي.

د متحده ایالاتو د کورني امنیت وزارت د شنبې په ورځ وویل چې شااوخوا دوه زره کډوال د پروسس او ایستلو لپاره له امریکا بهر یوه ښارګوټي ته وړل شوي.

دغه وزارت زیاته کړه چې غواړي په راتلونکو درېیو ورځو کې لږترلږه ۴۰۰ نور پولیس د ډېل ریو سرحدي ښارګوټي ته واستوي.

دې ښارګوټي کې د هائیتي کډوال راټول شوي.

د جمعې تر ورځې پورې له ۱۰ زرو څخه ډېر ناقانونه کډوال له هائیتي نه ډېل ریو ښار ته رسېدلي.

چارواکو ویلي په زرګونو نور ممکن په راتلونکو ورځو او اوونیو کې راشي.

د قزاقستان پولیسو لږ تر لږه ۶ فعالان د اعتراض پرمهال نیولي

د قزاقستان پولیس

د قزاقستان پولیسو لږ تر لږه شپږ فعالان د هغه اعتراض پرمهال ونیول چې د قزاقستان د ډموکراتیک ګوند په نوم د ناراجسټر شوي سازمان له خوا تنظیم شوی و.

په لسګونو کسانو په جنوب ختیځ ښار الماتې کې په لاریون کې برخه واخیسته او د پخواني مستبد ولسمشر نورسلطان نظربایف پرضد یې شعارونه ورکړل.

ګومان کېږي چې نظربایف اوس هم د پردې تر شا دغه هېواد کنټرولوي.

اعتراض کوونکو د سیاسي بندیانو د خوشې کېدو غوښتنه وکړه او د حکومت هغه پلان یې وغانده چې غواړي د ځینو حکومتي سیسټمونو د ډجیټل کولو لپاره له یوې روسۍ کمپنۍ کار واخلي.

دوی د چین په شمال لویدیځ شینجیان کې له مسلمان اقلیت سره هم چې تر فشار لاندې دي، خپل پیوستون وښود.

د هایتي زرګونه پناه غوښتونکي د امریکا تکزاس ایالت کې راغونډ شوي

د هایتي زرګونه پناه غوښتونکي

د هایتي په زرګونو پناه غوښتونکي د امریکا د متحدو ایالاتونو د تکزاس ایالت په یوه کوچني سرحدي ښارګوټي کې تر یوه پله لاندې راغونډ شوي دي.

دا موضوع د ولسمشر جو بایډن د د مهاجرت پالیسیو لپاره یو ازمېښت ګڼل کېږي.

تر پرون پورې د هغو پناه غوښتونکو شمېر تر لسو زرو واوښت چې په ديل ریو ښارګوټي کې تر یوه پله لاندې راغونډ شوي دي.

د امریکا د ګمرکونو او سرحدي خوندیتوب ادارې او محلي چارواکو ویلي چې اټکل کېږي په را روانو ورځو کې به په زرګونو نور کسان همدغه ځای ته ورسېږي.

هغه مقررات چې د ۲۰۲۰میلادي کال په مارچ میاشت کې د کرونا وبا په تړاو نافذ شوي، پرځای دي چې له مخې به یې پناه غوښتونکي پرته له دې چې د پناه غوښتنې هڅه وکړي رد کړای شي، خو هغه کسان چې ماشومان ورسره دي او ګڼې کورنۍ ورڅخه مستثنی ګڼل شوي دي.

په روسیه کې نن هم پارلماني ټاکنې روانې دي

د روسیې پارلماني ټاکنې

په روسیه کې نن هم خلک په پارلماني ټاکنو کې د ګډون لپاره د رایې ورکولو مرکزونو ته روان دي.

د دغو درې ورځنیو ټاکنو پرمهال د ټلګرام په څېر مشهور اپلېکېشن، د چټ کولو ټولې برخې ځنډولي، چې په روسیه کې د انتخاباتي کمپاین لپاره کار ورڅخه اخیستل کېده.

دا د سیاسي اپوزیسیون د زنداني شوي مشر الکسي ناوالنۍ لپاره یو ګوزار ګڼل کېږي چې د رایې ورکولو ځیرک اپلکېشنونه یې مخکې د اپل او ګوګل له سټورونو لېرې کړای شول.

له دغو اپلکېشنونو د ټاکنو د لارښوونې لپاره کار اخیستل کېده.

د متحدې روسیې ګوند چې کرملین یې ملاتړ کوي، تمه لري چې دغه پارلماني ټاکنې وګټي.

نور راوښيه

XS
SM
MD
LG