- مېل انلاین (Mail Online)
د بریتانیا انټرنټي خپرونې، مېل انلاین پرون د اندونیزیا او اسټرالیا د هغې غوښتنې په اړه لیکنه خپره کړې چې له طالبانو یې د ښځو حقونو ته د درناوي لپاره کړې ده.
په لیکنه کې د اسوشیټډ پرس خبري اژانس په حواله ویل شوي، د اندونیزیا د بهرنیو چارو وزیرې د پنجشنبې په ورځ له طالبانو وغوښتل چې د ښځو حقونو ته درناوی وکړي او پرې نهږدي چې افغانستان کې افراطي فعالیتونو ته زمینه برابره شي.
ریتنو مرسودي (Retno Marsudi) د اسټرالیا د بهرنیو چارو او دفاع وزیرانو سره تر کتنې وروسته دا غوښتنه مطرح کړه.
دغه دوه وزیران له اندونیزیا سره د امنیتي اړیکو د پراختیا لپاره جاکارتا ته په سفر تللي وو.
طالبانو تېره سې شنبه خپله ۳۳ کسیزه کابینه اعلان کړه چې پهکې یوه ښځه هم نهده شامله او همدارنګه د ښځو چارو وزارت برخلیک هم ناڅرګند دی.
د لیکنې په حواله، په کابینه کې د طالبانو ګڼ هغه تندلاري کسان هم شامل دي چې په ۹۰مه میلادي لسیزه او په تېرو ۲۰ کلونو کې یې د امریکا په مشرۍ د نړیوال ائتلاف په وړاندې په جګړه کې نقش درلود.
- ملېټري ټایمز (Military Times)
امریکایۍ ملېټري ټایمز ورځپاڼې په خپله پرونۍ ګڼه کې د امریکا متحده ایالاتو د دفاع وزیر لوېډ استېن (Lloyd Austin) پر اندېښنو لیکنه خپره کړې چې ویلي یې دي، القاعده شبکه ښايي بیا په افغانستان کې سره تنظیم شي.
دغې ورځپاڼې هم د اسوشیټډ پرس خبري اژانس په حواله لیکلي، استېن د پنجشنبې په ورځ وویل، القاعده شبکه چې ۲۰ کاله مخکې پر امریکا د حملې لپاره افغانستان د خپل مرکز په توګه کارولی و، له افغانستانه د امریکايي ځواکونو تر وتلو او پر قدرت د طالبانو د ولکې تر ټینګولو وروسته ښايي بیا احیا شي.
د ملېټري ټایمز په لیکنه کې راغلي، د امریکا دفاع وزیر د خلیج هېوادونو ته د خپل څلور ورځني سفر په وروستۍ ورځ په کوېټ کې د خبریالانو یوې وړې ډلې ته دا څرګندونې وکړې.
د امریکا متحده ایالاتو دفاع وزیر ډاډ ښوولی، که القاعده شبکه امریکا ته کوم ګواښ پېښوي، نو امریکا بهیې افغانستان ته د ستنېدو مخه ونیسي.
دا داسې مهال ده چې پاکستان پوځ په یو بیان کې ویلي، د امريکا د مرکزي استخباراتو ادارې (CIA) مشر ويليم جوزف برنز پرون پنجشنبه د پاکستان د پوځ او استخباراتي ادارې له مشرانو سره په راولپڼډۍ کې کتلي او دواړو لورو پر دوه اړخیزو ګټو، سيمهيیزو امنيتي حالاتو او د افغانستان پر راوانو تحولاتو بحث کړی دی.
د القاعده شبکې پخوانی مشر اسامه بن لادن له افغانستان څخه تر وتلو وروسته پاکستان کې پټ و او هلته ووژل شو.
پر امریکا د سپټمبر د ۱۱مې د ترورېستي حملو ۲۰ کاله په پوره کېدو دي چې هغه حملې د نړیوال ائتلاف په مشرۍ پر افغانستان د برید سبب شوې.
د افغانستان د تېر حکومت چارواکو په وار وار تور لګولی و چې طالبانو له القاعده شبکې او نورو ترورېستي ډلو سره خپل ارتباطات نهدي پرې کړي، خو طالبانو دا تورونه په وار وار رد کړي دي.