افغانستان
په افغانستان کې یوازینی پاتې یهود بالاخره له هېواده ووت
په افغانستان کې یوازینی پاتې یهود چې د طالبانو تر واک ته رسېدو مخکې یې ویلي و، له خپل هېواده نه وځي، بالاخره پرون ووت.
د اسراییلي رسنیو د راپور له مخې، زابلون سیمینتوف چې له کلونو راهیسې په کابل کې یوازې اوسېده، په یوه الوتکه کې د امریکا په لور روان شو.
تراوسه څرګنده نه ده چې ۶۲ کلن سیمینتوف به چېرې لاړ شي، خو مېرمن او نور خپلوان یې اسراییل ته تللي دي.
ده د سږ کال په پسرلي کې ازادي راډیو ته ویلي و: "که طالبان واک ته ورسېدل، په لتو به یې وباسي."
خو له دې سره-سره ده درې اوونۍ پخوا او مخکې تر دې چې طالبان کابل ته ننوځي، وویل چې له خپل زېږن ځایه د وتلو نیت نه لري.
د ورځې تازه خبرونه دلته ولولئ
سېف د چلډرن: افغانستان لا هم د ماشومانو لپاره د نړۍ له پنځو مرګونو سیمو دی
د ماشومانو د ژغورنې نړیوال سازمان (سېف د چلډرن) وايي، افغانستان لا هم د ماشومانو لپاره د نړۍ له پنځو تر ټولو مرګونو سیمو څخه شمېرل کېږي.
د ملګرو ملتونو د معلوماتو له مخې، په افغانستان کې هره میاشت په اوسط ډول شاوخوا ۴۰ ملکي وګړي د ماینونو او ناچاودو توکو د چاودنو له امله وژل کېږي یا ټپیانېږي.
په ۲۰۲۵ کال کې د دغو چاودنو نږدې ۷۰ سلنه قربانیان ماشومان و.
د ماشومانو د ژغورنې سازمان په خپل تازه راپور کې چې د پنجشنبې په ورځ «د لړم په ۲۸مه» خپور شوی، ویلي چې په تېرو ۲۰ کلونو کې د نړۍ په جګړو کې تر ۱۷۱ زرو ډېر ماشومان مړه یا ټپیان شوي دي.
د راپور له مخې، د ماشومانو له هرو ۱۰ قربانیانو څخه اووهیې یوازې په پنځو هېوادونو او سیمو، یعنې افغانستان، سوریه، فلسطیني سیمو، سومالیا او یمن کې و.
اېماېساېف: په سختې خوارځواکۍ د اخته افغان ماشومانو بسترېدل زیات شوي
د بېپولې ډاکترانو سازمان (اېماېساېف) وايي، په افغانستان کې د هغو ماشومانو شمېر چې د سختې خوارځواکۍ له امله په روغتونونو کې بستر کېږي، شاوخوا ۲۸ سلنه زیات شوی دی.
دغه سازمان د پنجشنبې په ورځ په یوه راپور کې ویلي چې د روان کال له جنورۍ څخه تر اګسټ پورې، په هرات، هلمند او کندهار ولایتونو کې د خوارځواکۍ د درملنې په ځانګړو مرکزونو کې نږدې ۸،۵۰۰ ماشومان بستر شوي دي.
د راپور له مخې، د شپږو میاشتو څخه د کم عمره ماشومانو په بستر کېدو کې هم تر ۳۱ سلنې ډېر زیاتوالی راغلی دی.
د بېپولې ډاکترانو سازمان خبرداری ورکړی چې بېوزلي او د خوړو کمښت د خوارځواکۍ ستونزه لا پسې سختوي.
له بلې خوا، د بودجې د کمښت له امله د شاوخوا ۳۰۰ روغتیايي مرکزونو تړل کېدو، تر دوو میلیونو ډېر کسان له روغتیايي خدمتونو بېبرخې کړي دي.
دغه سازمان اټکل کړی چې په راتلونکي میلادي کال کې به په افغانستان کې تر څلورو میلیونو ډېر له پنځو کلونو کم عمره ماشومان د خوارځواکۍ درملنې ته اړتیا ولري.
د ماشوم نړیواله ورځ؛ یونیسف وايي میلیونونه افغان ماشومان له زدهکړو محروم دي
د ملګرو ملتونو د ماشومانو د ملاتړ صندوق (یونیسف) د ماشوم د نړیوالې ورځې په مناسبت، په افغانستان کې د ماشومانو د زدهکړو د حق پر خوندیتوب ټینګار کړی دی.
یونیسف د پنجشنبې په ورځ «د لړم په ۲۸مه» د ماشومانو د نړیوالې ورځې په درشل کې پر خپله اېکسپاڼه لیکلي چې زدهکړه د هر ماشوم حق دی او په دې برخه کې پانګونه د راتلونکي لپاره پانګونه ده.
د یونیسف او یونسکو د ګډ راپور له مخې، په افغانستان کې د ابتدايي زدهکړو لپاره د عمر په شرایطو برابر څه د پاسه ۵۰ سلنه ماشومان له ښوونځي بېبرخې دي.
همدارنګه، په تېرو پنځو کلونو کې د طالبانو لهخوا له شپږم ټولګي پورته د نجونو پر زدهکړو بندیز، تر دوهنیم میلیونو ډېرې نجونې له زدهکړو بېبرخې کړې دي.
د ملګروملتونو درې ادارې او بریټانیا د افغان ماشومانو د خوارځواکۍ په برخه کې په ګډه کار کوي
د ملګروملتونو درې ادارې او د بریټانیا حکومت په افغانستان کې د ماشومانو د خوارځواکۍ په برخه کې په ګډه کار کوي.
د افغانستان لپاره د بریټانیا ځانګړي استازي ریچارډ لیندسي نن پنجشنبې پر خپلې ایکس پاڼې لیکلي چې د ماشومانو د ملاتړ لپاره د ملګروملتونو صندوق (یونیسف) د خوړو نړیوال پروګرام او د خوړو او کرنې اداره به په ګډه په افغانستان کې د خوارځواکو ماشومانو د ملاتړ په برخه کې کار وکړي.
لیندسي د دغه ګډه کار موخه سالمو خواړو ته د خوارځواکو ماشومانو لاسرسی یاد کړی دی.
یونیسف ویلي چې څه باندې درې میلیونه افغان ماشومان په خوارځواکۍ اخته دي.
ګجراټ ټایټنز لوبډلې راشدخان په کابو دوه میلیونو ډالرو له ځان سره ساتلی دی
د سږکال د هند غوره لیګ یا ای پي ایل سیالیو لپاره څلور افغان لوبغاړي خپلو لوبډلو ساتلي دي.
ګجراټ ټایټنز په ۱۸ کروړه هندي روپیو، چې کابو دوه میلیونه ډالره کېږي، نامتو افغان سپېنر یا ورو توپ اچوونکی راشد خان له ځان سره ساتلی دی.
همدارنګه عظمت الله عمرزی به له پنجاب کېنګر لوبډلې سره پاتي شي او نور احمد لکڼوال او محمد غضنفر به هم د خپلو لوبډلو لپاره لوبې وکړي.
تمه ده د سږکال د ای پي ایل بولۍ د را روانې ډسمبر میاشتې په ۱۶مه په ابوظبۍ کې ترسره شي.
تراوسه د هند غوره لیګ د پیل نېټه اعلان شوي نه ده.
د تیر کال د ای پي ایل اتلولي رایل چلنجرز بنګلورو ګټلې وه.
تاجکستان له افغانستان سره د ګډ بازار د جوړولو وړاندیز کړی
تاجکستان غواړي له افغانستان سره پر پوله ګډ بازار جوړ کړي، څو د دواړو هېوادونو ترمنځ سوداګري او اقتصادي همکاري پراخه شي.
دا وړاندیز په کابل کې د تاجکستان سفیر سعدي شریفي د چهارشنبې په ورځ د طالبانو د سوداګرۍ او پانګونې خونې له مشر سید کریم هاشمي سره په کتنه کې مطرح کړی دی.
شریفي ویلي، د دغه بازار جوړېدل به د دواړو هېوادونو سوداګرو او وګړو ته د سوداګرۍ او اقتصادي راکړې ورکړې نوي فرصتونه برابر کړي.
طالبان وايي په شپږو میاشتو کې یې تر ۸۲۷ زره ډېرې الکترونیکي تذکرې وېشلي
د طالبانو تر کنټرول لاندې د افغانستان د احصائیې او معلوماتو ملي ادارې ویلي چې د روان لمریز کال په لومړیو شپږو میاشتو کې یې په ټول هېواد کې ۸۲۷ زره او ۶۰ الکترونیکي تذکرې وېشلې دي.
دې ادارې د سېشنبې په ورځ په یوه خبرپاڼه کې ویلي چې په دې موده کې ۶۰۰ زره او ۵۴۶ نارینهوو او ۲۲۶ زره او ۵۱۴ ښځو الکترونکي تذکرې ترلاسه کړې دي.
د ادارې د شمېرو له مخې، په ټول هېواد کې د الکترونیکي تذکرو د وېش د بهیر له پیل راهیسې نږدې ۱۸.۳ میلیونه الکترونکي تذکرې وېشل شوې دي.
په خبرپاڼه کې راغلي چې اوسمهال خلک په افغانستان کې د اسان خدمت له ۸۷ مرکزونو او د متحده عربي اماراتو په ابوظبي کې له یوه بل مرکز څخه د الکترونکي تذکرو اړوند خدمتونه ترلاسه کولای شي.
تر نیمایي ډېر بېځایه شوي او بېرته ستانه شوي افغان ماشومان کافي خواړه نهلري
د ماشومانو د خوندیتوب سازمان (سېف د چلډرن) مؤسسې په یوه تازه راپور کې ویلي، په افغانستان کې کابو ۵۵ سلنه هغه ماشومان چې بېځایه شوي یا بېرته هېواد ته ستانه شوي، د کورونو پرېښودو او نورو کړکېچونو له امله د کافي خوړو د نهوررسېدو ستونزه لري.
د دې مؤسسې د موندنو له مخې چې پرون چهارشنبې یې خپرې کړي، ۴۱ سلنه ماشومانو ویلي چې روغتیايي وضعیتیې خراب شوی او ۳۸.۳ سلنه د پنځو او ۱۷ کلونو ترمنځ ماشومان په کارونو بوخت شوي دي.
دا څېړنه په اوو ولایتونو کې له ۸۲۴ ماشومانو او د کورنیو له ۸۳۸ سرپرستانو سره د مرکو پر بنسټ شوې ده.
راپور ښيي چې ۳۷.۲ سلنه ماشومانو د زدهکړو د سویې د خرابېدو او ۳۸.۳ سلنه کورنیو د ماشومانو د رواني او عاطفي وضعیت د خرابېدو خبر ورکړی دی.
د راپور له مخې، له هرو 10 ماشومانو نږدې نهو یې خوراکي مرستې ته اړتیا لرله، خو یوازې ۷.۵ سلنه ماشومانو په خپل اوسني استوګنځي کې بشري مرستې ترلاسه کړې دي.
دا راپور په داسې حال کې خپرېږي چې د ملګرو ملتونو د شمېرو له مخې، د ۲۰۲۳ کال له سپټمبر څخه د ۲۰۲۶ کال تر اکټوبر پورې له ایران او پاکستان څخه څه باندې ۶.۶۷ میلیونه افغانان بېرته هېواد ته ستانه شوي دي.
په مادرید کې د افغان ښځو څلورمه غونډه جوړېږي
د افغان ښځو لپاره د ښځو بنسټ وايي، «زموږ غږ واورئ» څلورمه غونډه به د نومبر په ۲۲ او ۲۳مه د هسپانیا د بهرنیو چارو وزارت په همکارۍ د دغه هېواد په پلازمېنه مادرید کې جوړه شي.
د ښځو بنسټ د چهارشنبې په ورځ وویل، د غونډې اصلي موضوع به د عدالت او سولې په ټینګښت کې د افغان ښځو مشري او حساب ورکونه وي.
په دې غونډه کې به افغان ښځې، ډیپلوماتان، د ملګرو ملتونو استازي، د بشري حقونو کارپوهان او مدني فعالان ګډون وکړي.
د هسپانیا د بهرنیو چارو وزیر، خوسې مانوېل البارس، به هم غونډې ته وینا وکړي.
هسپانیا په تېرو کلونو کې هم د افغان ښځو په ملاتړ د غونډو کوربهتوب کړی دی.
د غونډې ګډونوال به د نجونو پر زدهکړو، د ښځو پر اقتصادي پیاوړتیا، عدالت، د ښځو پر حقونو او د افغانستان د سولې په بهیر کې د هغوی پر ونډې خبرې وکړي.
نړیوال بانک: د افغانستان اقتصاد به روان کال ۳ سلنه وده ولري خو د هر وګړي اقتصادي تولید به بیاهم کم وي
د نړیوال بانک تازه راپور له مخې، تمه کېږي چې د افغانستان اقتصاد به په ۲۰۲۶ کال کې د ښو کرنیزو حاصلاتو له امله ۳ سلنه وده وکړي.
خو راپور دا اټکل هم کوي چې د هر وګړي اقتصادي تولید به د نفوسو د ۶،۶ سلنې احتمالي زیاتوالي له امله ۳،۳ سلنه راکم شي چې دا به په تېرو درېیو پرله پسې کلونو کې د هر وګړي د اقتصادي تولید درېیم کلنی کموالی وي.
راپور زیاتوي چې سره لدې چې سږني حاصلات ښه و خو بیاهم د روان ۲۰۲۶ کال په سپټمبر او اکتوبر میاشتو کې تخمینا ۱۵.۹ میلیونه کسان د خوړو له سختې ناامنۍ سره مخ وو.
راپور وړاندې وايي په داسې حال کې چې پاکستان سره سوداګریزې لارې تړل شوي دي د افغانستان شاوخوا ۹۷ سلنه واردات دمنځنۍ اسیا او ایران له لارو ترسره کیږي او صادرات دروان ۲۰۲۶ کال د اپریل او سپتمبر میاشتو ترمینځ موده کې نسبت تیرکال ته څه دپاسه ۱۵ سلنه راکم شوي دي.
راپور د ژوندانه د کچې د ښه والي لپاره څو لومړیتوبونه په ګوته کوي، چې پکې د سوداګرۍ لپاره د ډاډمنو لارو تامین، هغو ولایتونو کې د کاري فرصتونو پراخول چې ګڼ شمیر ستانه شوي کډوال په کې میشت شوي ، او د ښځو او نجونو په زده کړو او کار محدودیتونه لیرې کول ، شامل دي .