د لاسرسۍ وړ لېنکونه

تازه خبر
یکشنبه ۲۸ وږی ۱۴۰۰ کابل ۰۹:۵۱

افغانستان

ملګرو ملتونو له افغانستان سره د همکاریو او مرستو د دوام ډاډ ورکړ

د بشر حقونو په برخه کې د ملګرو ملتونو ځانګړي استازي له طالب چارواکو سره لیدلي

د بشري حقونو په برخه کې د ملګرو ملتونو ځانګړي استازي افغانستان ته د همکاریو او مرستو د دوام ډاډ ورکړی دی.

مارتڼ ګرفتس او ورسره مل پلاوي یې دا ډاډ پرون کابل کې د طالبانو د سیاسي دفتر مشر ملا عبدالغني برادر ته د لیدو کتو پر مهال ورکړی دی.

د طالبانو د سیاسي دفتر ویاند محمد نعیم پر ټویټر لیکلي، دواړو لورو پرون د افغانستان د بهرنیو چارو وزارت کې سره کتلي دي.

د نعیم په وینا، د ملګرو ملتونو دغه استازي ویلي، د مرستندویه هېوادونو په راتلونکې ناسته کې به افغانستان ته د لازیاتو مرستو د جلبولو هڅه وکړي.

د ورځې تازه خبرونه دلته ولولئ

کابل ښاروالۍ ځینې ښځینه کارکوونکې په کور کېنولې

ارشیف

د کابل ښاروالي وايي له ځینو برخو پرته‌یې ښځینه کارکوونکو ته ویلي چې په کور کېني.

د کابل سرپرست ښاروال حمدالله نعماني په خپل لومړني خبري کنفرانس کې دا خبره وکړه.

نعماني بیا وویل چې ځینو برخو کې ښځینه کارکوونکې پاتې دي.

دی زیاتوي: "بازار کې زنانه تشنابونه دي. هغه کار خو نر نه‌شي کولای. ښځې د اجیرانو په صفت راځي دا کار کوي. په ناحیو کې یا په مرکز کې ځینې داسې ښځې شته چې هغه د مسلک په لحاظ باندې موږ د دوی په تناسب بل کدر نه‌لرو هغه هم راځي. د ډيزاین په برخه کې شته، د ساختمان په برخه کې شته. د الکترونیک په برخه کې شته هغه هم راځي هغه کار کوي."

نعماني وویل د ښاروالۍ له نږدې درې زره کارکوونکو په تشکیل کې ۲۷ فیصده ښځې شاملې دي، خو اوس چې اکثر په کور کېنول شوي معاشونه‌یې حواله دي.

یوازې په ښاروالۍ نه، بلکې د راپورونو له مخې له روغتیا، لوړو زده‌کړو او پوهنې پرته په ګڼو نورو دولتي ادارو کې د ښځینه کارکوونکو برخلیک نه‌دی معلوم او اکثر یې له دندو کورونو ته ستنې کړای شوې دي.

جلال‌اباد ښار کې د طالبانو په یوه موټر چاودنې لږ تر لږه پنځه کسان وژلي

جلال‌اباد کې د تېرې ورځې د چاودنې سیمه

په جلال‌اباد ښار کې نن د طالبانو په یوه موټر باندې بمي چاودنې لږ تر لږه پنځه کسان وژلي او یو شمېر نور یې ټپیان کړي دي.

پېښه د جلال‌اباد ښار د پنځمې ناحیې اړوند کابل هډې ته څېرمه شوې.

بم د سړک په غاړه خښ شوی و چې د طالبانو د موټرو په تېرېدو چاودل شوی دی.

د لومړنیو راپورونو له مخې د یوه ماشوم په شمول پنځه کسان وژل شوي دي.

رسنیو راپور ورکړی چې له دې چاودنې ګڼ ټپي طالبان روغتونونو ته وړل شوي دي.

د راپورونو له مخې په ټپیانو کې یوه مېرمنه هم شامله ده.

چا لا د دې برید مسؤلیت نه‌دی منلی، خو پرون هم په جلال‌اباد کې یوې چاودنې لږ تر لږه درې کسان ووژل.

اسلامي دولت ډله یا داعش وسله‌وال په ننګرهار او ځینو نورو سیمو کې فعاله دي او اکثر د دغسې بریدونو مسؤل بلل کېږي.

لسګونه ښځو په کابل ښار کې مظاهره وکړه

ارشیف، کابل ښار کې یو شمېر اعتراض کوونکې مېرمنې

یکشنبه په کابل ښار کې لسګونه ښځو مظاهره وکړه.

په خواله رسنیو په خپرو شویو وېډیوګانو کې ښکاري چې دا ښځې له طالبانو د تعلیم او نورو اساسي بشري حقونو درناوی غواړي.

طالبانو په وروستیو کې د ښځو چارو وزارت پر ودانۍ د امر باالمعروف وزارت لوحه ځړولې او د خپلې سرپرستې کابینې د وزارتونو له ډلې یې د ښځو چارو وزارت لیرې کړی دی.

د طالبانو له‌خوا بل اقدام چې د ګڼو تُند غبرګونونه‌یې پارولي له شپږم ټولګي پورته د نجونو د ښوونځیو نه‌پرانیستل دي.

په کابل کې د یکشنبې ورځې مظاهره‌چیانو له طالبانو وغوښتل چې د تعلیم له حقه دې نجونې نه‌محروموي.

د راپورونو له مخې د طالبانو له راتګ وړاندې شااوخوا څلور ملیونه نجونې ښوونځیو ته تلې.

طالبانو د شنبې په ورځ د هلکانو ښوونځي پرانیستل، خو له شپږم ټولګي پورته د نجونو د ښوونځیو په تړاو یې یادونه نه‌ده کړې.

اخوا د طالبانو ویاند ذبیح‌الله مجاهد باختر اژانس ته ویلي د نجونو د ښوونځیو د بیا پرانیستلو لپاره په طرزالعمل کار روان دی او دا ښوونځي به ژر پرانیستل شي.

یونېسف: افغانستان کې د ماشومانو د سرخکان ناروغۍ شمېرې د اندېښنې وړ لوړې شوي

د یونېسف ادارې مشرانو په کابل کې د اتاتورک له روغتونه کتنه کړې

په افغانستان کې د یونېسف استازولي وايي چې د ماشومانو ترمنځ د سرخکان ناروغۍ شمېرې د اندېښنې وړ لوړې شوي.

د دې ادارې مشرانو نن په کابل کې د اتاتورک له روغتونه کتنه کړې چېرته چې په سرخکان د اخته ماشومانو درملنه په‌کې روانه ده.

د افغانستان لپاره د یونېسف یا د ماشومانو د وجهي صندوق په ټویتر باندې په دې تړاو په لیکلي بیان کې زیاته شوې چې د سرخکان د اندېښنې وړ شمېر قضیو زیاتېدل زیانمنونکي افغان ماشومان لا له خطر سره مخ کوي.

یونېسف ویلي دغو ماشومانو ته د روغتیايي خدماتو د رسولو ډاډمنول حیاتي ارزښت لري.

د افغانستان د کرکټ د ۱۹ کلنو ټیم بنګله‌دېش ته ماته ورکړه

ارشیف، د افغانستان د کرکټ د ۱۹ کلنو ټیم دوه لوبغاړي

د افغانستان د کرکټ د ۱۹ کلنو ټیم نن له بنګله‌دېش یو ورځنۍ لوبه وګټله.

افغان ټیم د بنګله‌دېش له‌خوا ټاکل شوی ۱۵۶ هدف د ۷ لوبغاړو په سوځېدو پوره کړ.

د افغانستان لپاره په نننۍ لوبه کې د بالنګ یا توپ اچونې په برخه کې بلال سمېع او ننګیالي خروټي درې-درې وېکټې واخیستې او اظهارالحق نوید او شاهدالله حسني دوه-دوه بنګله‌دېشي لوبغاړي وسوځول.

په توپ وهنه کې هم اسحق ځاځي ۵۲، کپټان اعجاز احمد ۳۲ او اظهارالحق نوید ۲۹ ناسوځېدلې منډې وکړې.

که څه هم افغانستان له بنګله‌دېش دا لوبه وګټله، خو د پنځو یو ورځنیو سیریز یې درې پر ۲ بنګله‌دېش ته وبایلود.

د دوی پنځه لوبې د سپټمبر له ۱۰مې پيل شوې وې چې د سر درې بنګله‌دېش وګټلې او وروستۍ دوه افغان ټیم په خپله ګټه پای ته ورسولې.

د هند او سعودي د بهرنیو چارو وزیرانو د افغانستان پر وضعیت هم خبرې وکړې

د هند او سعودي د بهرنیو چارو وزیرانو لیدنه

د هند او سعودي د بهرنیو چارو وزیرانو نن په نوې ډېلي کې وکتل.

دوی د ګڼو نورو سیمه‌ییزو او دوه اړخیزو مسئلو ترڅنګ د افغانستان پر وضعیت هم خبرې کړې دي.

د هند د بهرنیو چارو وزیر اېس. جې شنکر په خپل ټویټر لیکلي چې له خپل سعودي سیال فیصل بن فرهان سره‌یې د افغانستان په تړاو ډېر اغېزمن بحث کړی دی.

د سعودي عربستان د بهرنیو چارو وزیر فیصل بن فرحان السعود تېره شپه په درې ورځني سفر نوې ډېلي ته رسېدلی.

شهزاده سعود به سبا (دوشنبه) مخکې تر دې چې نیویارک ته روان شي، له صدراعظم نرېندرا مودي سره وویني.

هند او سعودي عربستان د افغانستان د وروستیو پرمختیاوو په اړه ګډې اندېښنې لري.

نن هم په افغانستان کې ملیونونه نجونې ښوونځیو ته نه‌دي تللي

ارشیف، یو شمېر افغان زده‌کوونکې نجونې

نن دوهمه ورځ ده چې په افغانستان کې ملیونونه نجونې ښوونځیو ته نه‌دي تللي.

د یونېسف او نورو ادارو د شمېرو له مخې د طالبانو تر راتګ مخکې شااوخوا څلور ملیونه نجونې ښوونځيو ته تللې.

طالبانو د شنبې په ورځ د هلکانو ښوونځي پرانیستل، خو لا یې د نجونو د ښوونځیو د بیا پرانیستلو لپاره ګام نه‌دی پورته کړی.

د نجونو د ښوونځیو د بیا پرانیستې لپاره ګڼو فعالانو په خواله رسنیو کمپاینونه هم پیل کړي دي.

د یو شمېر ماشومانو عکسونه هم په ټویټر او فېس‌بوک خپاره شوي چې په لاسونو کې یې یو لیکلی شعار نیولی چې وايي: "له خور پرته ښوونځي ته نه‌ځو."

د ماشومانو لپاره د ملګرو ملتونو وجهي صندوق یونېسف په افغانستان کې د نجونو په ګډون د ټولو ښوونځیو د پرانیستل کېدو غوښتنه کړې ده.

د سازمان د افغانستان څانګې مشرې سم مورټ دا خبره پرون په خپله ټويټرپاڼه ليکلې ده.

هغې ويلي چې د نجونو په شمول دې د ټولو ماشومانو لپاره ښوونځي بېرته پرانیستل شي.

د باختر خبري اژانس د طالبانو د حکومت د ویاند ذبیح‌الله مجاهد په حواله لیکلي چې د نجونو ښوونځي به هم ژر پرانیستل شي.

د اګسټ پر ۱۵مه نېټه د طالبانو له‌خوا پر افغانستان تر قبضې وروسته ټولې تعلیمي ادارې تړل شوې وې.

د افغانستان او بنګله‌دېش کرکټ لوبه؛ بنګله‌دېشي لوبغاړي په ۱۵۵ منډو اوټ شول

ارشیف، د افغانستان د کرکټ ۱۹ کلنه لوبډله

د افغانستان او بنګله‌دېش د ۱۹ کلنو کرکټ لوبډلو ترمنځ په وروستۍ یو ورځنۍ لوبه کې بنګله‌دېشي لوبغاړي په ۱۵۵ منډو اوټ شول.

لوبه نن په سېلهټ لوبغالي کې د بنګله‌دېش له‌خوا په توپ وهنې پيل شوه.

په پایله کې افغان لوبغاړو په ۴۸م اور کې د بنګله‌دېش ټول لوبغاړي په ۱۵۵ منډو اوټ کړل.

د افغانستان لپاره بلال سمېع او ننګیالي خروټي درې درې وېکټې اخیستي. اظهارالحق نوید او شاهدالله حسني دوه دوه بنګله‌دېشي لوبغاړي سوځولي.

افغانستان د ۱۵۶ منډو د پوره کولو لپاره اوس توپ وهنه روانه کړې ده.

تر دې دمه افغانستان ۴ لوبغاړي له لاسه ورکړي او ۷۸ منډې یې جوړې کړي.

د افغانستان او بنګله‌دېش د کرکټ ۱۹ کلنو ټیمونو ترمنځ د سپټمبر له ۱۰مې د پنځو یو ورځنيو لوبو لړۍ پيل شوې چې درې لومړۍ سر په سر بنګله‌دېش ګټلي.

څلورمه لوبه وړمه ورځ افغان ټیم وګټله او دا دی د وروستۍ یوې پایله د ورځې په اوږدو کې معلومېږي.

پکتیا کې د ځمکې په سر شخړه کې درې وروڼه وژل شوي او یو بل کس ټپي دی

ارشیف، د پکتیا مرکز ګردېز ښار یوه څنډه

په پکتیا کې د ځمکې په سر شخړه کې درې کسان وژل شوي او یو بل ټپي شوی دی.

په پکتیا کې د طالبانو له لوري د اطلاعاتو او فرهنګ ریاست ټاکل شوي رئیس خالق‌یار احمدزي د یکشنبې د ورځې په سهار ازادي راډیو ته وویل چې دا پېښه تېر مازدیګر ناوخته د پکتیا د مرکز ګردېز په شکرخېلو سیمه کې شوې ده.

د احمدزي په وینا نښته د دوو کورنیو ترمنځ د ځمکې په سر شوې چې له امله‌یې د یوې کورنۍ درې تنه وروڼه وژل شوي او یو بل کس‌یې ټپي شوی دی.

احمدزی وایي، د پېښې ځای ته د دوی ځواکونه رسېدلي او په تړاو یې د بریدګرې کورنۍ دوه تنه نیول شوي، خو ډزې کوونکی کس د پېښې له سیمې په تېښته بریالی شوی دی.

پکتیا د هېواد یو له هغو ولایتونو څخه شمېرل کېږي چې د ځمکې او غرونو په سر شخړې په‌کې اوږده مخینه لري.

د امریکا ولسمشر او د بریتانیا صدراعظم د افغانستان په اړه خبرې کوي

(ښی-کین) د بریتانیا صدراعظم بورېس جانسون او د امریکا ولسمشر جو بایډن

ټاکل شوې ده چې افغانستان د امریکا د ولسمشر جو بایډن او د بریتانیا د صدراعظم بورېس جانسون د روانې اوونۍ د خبرو د اجنډا په سر کې وي.

د نړیوالو خبري اژانسونو پر اساس، جانسون به په دې کتنه کې د افغانستان د بشري بحران په خاطر پر بایډن فشار راوړي.

د راپورونو له مخې، جو بایډن د بریتانیا او د ناټو د نورو متحدانو دا غوښتنه نه‌وه منلې چې له افغانستانه د امریکايي او ناټو ځواکونو ایستل وځنډوي.

دوی دا غوښتنه د دې لپاره کړې وه چې له افغانستانه هغه بهرنیان او افغانان وایستل شي چې خپل ژوند په دغه هېواد کې له خطر سره مخامخ احساسوي.

د افغانستان بشري حقونو کمېسیون: طالبانو زموږ دفتر نیولی او وسایل‌یې کاروي

د افغانستان د بشر حقونو خپلواک کمېسیون دفتر

د افغانستان د بشري حقونو خپلواک کمېسیون شکایت کړی چې طالبانو د یاد کمېسیون دفتر نیولی او له وسایلو یې استفاده کوي.

دا خبره د یاد کمیسیون په وېب‌پاڼه باندې په یوه اعلامیه کې چې پرون خپره شوې راغلې.

د طالبانو له واکمنېدو راهیسې د بشري حقونو خپلواک کمېسیون په څېر د اکثرو ادارو برخلیک نه‌دی معلوم او کارونه‌یې په ټپه درېدلي.

د کمېسیون په پرونۍ اعلامیه کې راغلي که څه هم د افغانستان د بشري حقونو خپلواک کمېسیون منحل شوی نه‌دی، خو د زمري له ۲۴مې راهیسې د افغانستان د خلکو په وړاندې د خپل مسؤلیت په ادا کولو کې پاتې راغلی دی.

شهرزاد اکبر چې د طالبانو تر راتګ پورې د کمېسیون مشره وه څو ورځې مخکې وویل چې بهر وتلې ده، خو لا هم د دوی ګڼ همکاران په افغانستان کې پاتې دي او له ګواښ سره مخ دي.

د بشري حقونو خپلواک کمېسیون په خپله مفصله اعلامیه کې له طالبانو غوښتي چې د بشر حقونو فعالانو ته د څارنې اجازه ورکړي او د یاد کمېسیون د کارکوونکو او نورو ټولو بشرپالانو درناوی وکړي.

د طالبانو ادارې لا تر اوسه د بشري حقونو کمېسیون د یادې اعلامیې او د کمېسیون د برخلیک په اړه څه تبصره نه‌ده کړې.

یونېسف: افغانستان کې دې د نجونو په شمول د ټولو ښوونځي پرانیستل شي

ارشیف

یونېسف په افغانستان کې د نجونو په شمول د ټولو ښوونځیو د پرانیستل کېدو غوښتنه کړې ده.

د یونېسف افغانستان څانګې مشرې سم مورټ پرون په دې اړه په خپل ټویټر یو لنډ بیان ورکړی.

هغې ویلي د افغان نجونو په شمول دې د ټولو ماشومانو لپاره ښوونځي بېرته پرانیستل شي.

اغلې مورټ داسې وخت د ښوونځیو په پرانیستې ټینګار کړی چې د شنبې په ورځ په افغانستان کې یوازې د هلکانو ښوونځي بېرته پرانیستل شول.

د طالبانو له‌خوا یوازې د هلکانو د ښوونځیو د پرانیستلو په تړاو اعلامیې ګڼ غبرګونونه وپارول ځکه د نجونو د برخلیک په اړه‌یې په‌کې یادونه نه‌وه کړې.

د شنبې په ورځ بیا د باختر خبري اژانس چې دمګړۍ د طالبانو د ادارې له‌خوا مخته وړل کېږي د طالبانو د حکومت د ویاند ذبیح‌الله مجاهد په حواله لیکلي و چې د نجونو ښوونځي به هم ژر پرانیستل شي.

مجاهد زیاته کړې وه چې د دوی حکومت په دې برخه کې پر یو طرزالعمل باندې کار کوي چې په‌کې د ټولګیو جلا کول او د استادانو د وېش څرنګوالی شامل دي.

د افغانستان د کرکټ ۱۹ کلنو ټیم له بنګله‌دېش سره وروستۍ یو ورځنۍ لوبه کوي

ارشیف، د افغانستان د کرکټ ۱۹ کلنو ټیم

د افغانستان د کرکټ ۱۹ کلنو ټیم نن یکشنبه له بنګله‌دېش سره وروستۍ یو ورځنۍ لوبه کوي.

د کرکټ بورډ ویاند فرید هوتک ازادي راډیو ته وویل چې افغان ټیم له څلورو مخکېنیو لوبو یوه ګټلې ده او د وروستۍ لوبې د ګټلو لپاره‌یې پوره چمتووالی نیولی دی.

د افغانستان او بنګله‌دېش د کرکټ د ۱۹ کلنو ټیمونو ترمنځ پنځه یو ورځنۍ لوبې د سپټمبر له ۱۰مې راپیل شوې وې چې لومړۍ درې سر په سر بنګله‌دېش وګټلې او څلورمه د جمعې په ورځ افغان ټيم وګټله.

تمه ده له دې لوبې وروسته د افغانستان د ۱۹ کلنو ټیم د بنګله‌دیش په وړاندې یوه څلور ورځنۍ لوبه هم وکړي.

عمران خان طالبانو سره د یوه ټول­ شموله حکومت په اړه خبرې پیل کړي

د پاکستان صدراعظم عمران خان 

د پاکستان صدراعظم وايي، له طالبانو سره یې د یوه ټول­ شموله حکومت په اړه چې تاجکان، هزاره او ازبکان په کې حضور ولري، خبرې پیل کړي دي.

عمران خان نن په خپل ټویټر کې لیکلي، دغه خبرې یې به دوشنبې کې د افغانستان د ګاونډیو هېوادونو له مشرانو سره تر کتنې او د تاجکستان له ولسمشر امام علي رحمان سره تر تفصیلي بحث وروسته پیل کړي دي.

ده زیاته کړې د څلورو لسیزو تر جګړو وروسته د حکومت ټول شموله اوسېدل په افغانستان کې له سولې او ثبات سره چې د عمران خان په خبره د سیمې په ګټه دی، مرسته کوي.

د پاکستان صدراعظم پرون د شانګهای د همکارۍ سازمان د غړو هېوادونو د مشرانو د غونډې په څنډه کې د تاجکستان له ولسمشر سره وکتل.

طالبانو د سېپټمبر پر اوومه د سرپرستې کابینې تر اعلان مخکې د ټول­ شموله حکومت د جوړولو ژمنه کړې وه.

جلال اباد کې ۳ او کابل کې یوې چاودنې لږ تر لږه ۳ کسان وژلي

ارشیف

راپورونه وايي، په جلال اباد کې درېیو او په کابل کې یوې چاودنې لږ تر لږه ۳ کسان وژلي او شا و خوا ۲۰ کسان ټپیان کړي دي.

په ننګرهار کې یوې سرچینې د نوم نه ښوولو په شرط ازادي راډیو ته وویل، د جلال اباد په بېلابېلو برخو کې دغه چاودنې، د طالبانو پر رنجر موټرو د سړک غاړې ماینونو له کبله شوي دي.

سرچینه وايي، په چاودنو کې درې ملکیان وژل شوي او په ټپیانو کې طالبان هم شامل دي.

په ننګرهار کې د طالبانو ادارې په دې اړه رسنیو ته څه نه دي ویلي او د دغو پېښو مسوولیت هم چا نه دی منلی.

بل خوا نن د کابل په دیارلسمه حوزه کې د یوه مقناطیسي ماین په چاودنه کې لږ تر لږه دوه کسان ټپیان شول. د حملې هدف نه دی روښانه.

طالبانو چې څه باندې میاشت مخکې پر افغانستان ولکه ټینګه کړه، د دغو چاودنو په اړه چې چا یې لا مسوولیت نه دی منلی رسماً څه نه دي ویلي.

د داعش ډلې خراسان څانګه چې د طالبانو دښمنه ډله ګڼل کېږي، د افغانستان په ځینو برخو کې فعاله ده.

نور راوښيه

XS
SM
MD
LG