د لاسرسۍ وړ لېنکونه

تازه خبر
شنبه ۳ تله ۱۴۰۰ کابل ۰۷:۲۴

خبرونه

امریکا او ځیني هېوادونه د افغانستان په اړه پر خپلې پالېسۍ همغږي کولو غږېږي

ارشیف، د امریکا، ناټو او یو شمېر نورو هېوادونو بیرغونه

د امریکا د بهرنیو چارو وزارت وایي، د یو شمېر هېوادونو د بهرنیو چارو وزیران به نن دوشنبه (د وږې په ۸مه) په یوه مجازي غونډه کې د افغانستان په اړه د خپلې پالېسۍ د همغږي کولو په اړه خبرې وکړي.

دې وزارت پرون یکشنبه په یوه بیان کې وویل چې په دې غونډه کې به د متحده ایالاتو مهم شریکان ګډون وکړي.

په پام کې ده چې د کاناډا، فرانسې، جرمني، ایټالیا، جاپان، بریتانیا، ترکیې او قطر د بهرنیو چارو وزیران او دغه‌راز د اروپایي ټولنې او ناتو استازي ګډون وکړي.

د بیان له مخې د بهرنیو چارو وزیر انتوني بلېنکن به له افغانستانه د خلکو د لېږدولو لپاره د دوو اوونیو د مأموریت او وړاندې د نورو اقداماتو په اړه خبرې وکړې.

دا په داسې حال کې ده چې له افغانستانه د ټولو امریکایي ځواکونو د ایستلو بهیر ته یوه ورځ پاتې ده.

سبا سې شنبه د اګسټ ۳۱مه د دغو ځواکونو د وتلو وروستۍ نېټه ده.

د ورځې تازه خبرونه دلته ولولئ

لندن د بریتانوي سرتیرو له لوري د ۲۸۹ افغان ملکيانو د وژلو تاوان ورکړی

بریتانوي سرتیري

د بریتانیا د رسمي ارقامو پر اساس، د دغه هېواد حکومت په افغانستان کې د بریتانیايي پوځیانو له لوري د ۲۸۹ ملکي وګړو د وژلو تاوان ورکړی دی.

د بریتانیا د دفاع وزارت اسناد ښيي چې په وژل شوېو کسانو کې ۱۶ ماشومان هم شامل دي.

په سند کې دا هم راغلي چې د بریتانیا پوځ ټولټال ۶ لکه ۸۸ زره پونډه تاوان ورکړی چې په متوسط ډ‌ول د هر قرباني په سر ۲ زره ۳۸۰ پونډه کېږي.

ویل شوي چې دا کسان د ۲۰۰۶ او ۲۰۱۳ کلونو ترمنځ وژل شوي دي.

په یاده موده کې اکثره بریتانیايي پوځیان په هلمند ولایت کې مېشت وو او د دوی له لوري اکثره ملکي وګړي هم په هلمند کې وژل شوي یا ټپیان شوي دي.

همدا راز د بریتانیا پوځ ۲۴۰ تنو ټپیانو ته ۳ لکه ۹۷ زره پونډه تاوان ورکړی چې په متوسط ډول هر ټپي ته یو زرو ۶۵۴ پونډه رسېدلي دي.

روسیه: غوره بولم چې افغانستان کې د طالبانو اقدامات په ځیر وڅارم

د کریملین ویاند دمیتري پیسکوف

روسیه وايي چې د نړۍ د نورو هېوادونو په شان غوره بولي چې په افغانستان کې د طالبانو اقدامات په ځیر وڅاري.

د کریملین ویاند دمیتري پیسکوف دا خبره د رسنیو د دې پوښتنې په ځواب کې وکړه چې ایا روسیه غواړي چې په افغانستان کې د نویو چارواکو کوم استازي ته د مسکو بلنه ورکړي؟

پیسکوف وویل، د نړۍ د اکثرو نورو هېوادونو په څېر ښه دا ګڼي چې وګوري طالبان په افغانستان کې څه کوي؟ د حکومت جوړښت یې څه بڼه خپلوي او څرنګه خپلې ژمنې عملي کوي.

د طالبانو حکومت تراوسه د نړۍ هېڅ هېواد په رسمیت نه دی پېژندلی.

د چهارشنبې په ورځ د امنیت شورا پنځو دایمي غړیو امریکا، روسیې، چین، بریتانیا او فرانسې په ګډه له طالبانو وغوښتل چې د نجونو او ښځو حقونه رعایت کړي او ټول شموله حکومت جوړ کړي.

هند کې د افغان ښځینه خبریالانو لپاره بسپنه ټولېږي

ارشیف، کابل کې یوه ښځینه خبریاله

د هند د ښځینه ژورنالیستانو شبکې (ښځې په رسنیو کې) په افغانستان کې له ژورنالیستانو او نورو ګیر پاتې ملکیانو په تېره بیا ښځو سره د پیوستون لپاره د افغان ښځینه خبریالانو لپاره د بسپنې ټولول پیل کړي دي.

د دې شبکې په وینا، د سېپټمبر په نهمه یې دا نوښت پیل کړ او په دوو اوونیو کې یې ۳۷ لکه هندي روپۍ چې ۵۰ زره امریکايي ډالره کېږي، ټولې کړي دي.

'ښځې په رسنیو کې' شبکه هیله لري چې نورې پیسې به هم ټولې کړي او په دې توګه به د افغان ښځینه خبریالانو ملاتړ وکړي.

دوی دا پیسې د افغان ښځینه خبریالانو د الوتکو د ټکټونو، وېزو او نورو لګښتونو لپاره ټولوي.

'Airbnb'کمپنۍ امریکا کې شل زره افغان پناه غوښتونکو ته کورونه ورکوي

د کرایي کورونو او اپارتمانونو انلاین کمپنۍ'Airbnb'

د کرایي کورونو او اپارتمانونو انلاین کمپنۍ'Airbnb' غواړي چې د امریکا په متحدو ایالاتونو کې شل زره نورو افغان پناه غوښتونکو ته وړیا موقتي کورونه ورکړي.

دې کمپنۍ چې مرکز یې د امریکا په سانفرانسسکو کې دی، تر دې وړاندې هم ۲۰ زره افغانانو ته وړیا موقت هستوګنځي برابر کړي وو.

'ایر بي اېن بي' د امریکا د خلکو له سخاوت او مېلمه پالنې مننه کړې چې د لسګونو زره افغانانو لپاره یې وړیا کورونه ورسپارلي دي.

د اګسټ په پنځلسمه نېټه د طالبانو له لوري د کابل له نیولو وروسته لسګونه زره افغانانو چې ژوند یې په خطر کې وو، له افغانستانه امریکا او نورو هېوادونو ته پناه یووړه.

ګومان کېږي چې په امریکا کې به نورو موقتي کورونو ته اړتیا زیاته شي ځکه چې لا هم ډېر شمېر افغانان امریکا ته روان دي.

افغان ژباړونکي: ترکیې په میدان پرېښودو، پناه نه راکوي

ترکي سرتیري

هغه افغان ترجمانان چې په تېرو دوو لسیزو کې یې د ناټو د غوڅ ملاتړ ماموریت په چوکاټ کې له ترک پوځیانو سره کار کړی، شکایت کوي چې د نورو هېوادونو په شان ترکیه دوی ته پناه نه ورکوي.

دوی وايي چې شمېر یې له یو سلو لسو تر یو سلو شلو کسانو ته رسېږي خو په میدان پرېښودل شوي دي.

دوی وايي، له ناټو هم غواړي چې مرسته ورسره وکړي ځکه چې په افغانستان کې یوازې د طالبانو له ګواښ سره نه دي مخامخ بلکې د داعش او نورو سختدریځو ډلو له لوري هم ګواښل کېږي.

عمران خان: طالبان کېدای شي د امریکا او پاکستان بالقوه شریکان واوسي 

د پاکستان صدراعظم عمران خان

د پاکستان صدراعظم عمران خان وايي، طالبان کېدای شي د سولې په برخه کې د امریکا او پاکستان بالقوه شریکان واوسي.

عمران خان له نیوز ویک مجلې سره په مرکه کې د طالبانو پر وړاندې د امریکا د ولسمشر جو بایډن سخت دریځ غیر ضروري وباله، ویې ویل پاکستان لېواله دی چې د ترورېزم پر ضد د امریکا همکار واوسي.

ده د سیمې د قدرتونو او امریکا ترمنځ همکاري د ناورین د مخنیوي لپاره چې پر افغانستان د طالبانو د ولکې له ټینګېدو وروسته یې احتمال زیات شوی دی، مهم وباله.

د پاکستان صدراعظم د طالبانو له لوري په څلوېښتو کلونو کې د لومړي ځل لپاره د ټول افغانستان نیولو ته په اشارې وویل چې له دې کبله ممکن د افغانستان امنیتي وضعیت ثبات ومومي.

عمران خان د طالبانو د حکومت د رسمیت پېژندلو په اړه وویل چې په دې اړه به له ګاونډیو هېوادونو سره له مشورو وروسته پرېکړه وکړي.

راپورونه: جلال اباد کې د ۶ تنو وژل شوېو کسانو جسدونه موندل شوي

ارشیف، عکس تزئیني بڼه لري

له جلال اباد څخه د ترلاسه شوېو راپورونو له مخې، په دې ښار کې په تېرو دوو ورځو کې په مرموز ‌ډول د ۶ تنو وژل شوېو کسانو جسدونه موندل شوي دي.

یوې ځايي سرچینې د نوم د نه ښوولو په شرط ازادي راډیو ته وویل چې د جمعې په ورځ د درې تنو مړي په داسې حال کې وموندل شول چې لاسونه یې تړل شوي وو. د دغو کسانو مړي د جلال اباد ښار جنوب ته د هډې فارم په سیمه کې موندل شوي دي.

د سرچینې د معلوماتو له مخې، تر دې یوه ورځ وړاندې هم په همدې سیمه کې په ډزو د درې تنو نورو وژل شوېو کسانو جسدونه موندل شوي وو.

په ننګرهار ولایت کې د طالبانو چارواکو تر اوسه پورې په دې اړه د خبریالانو پوښتنو ته ځواب نه دی ویلی.

طالبانو په ارزګان کې د انسان تښتوونکو یوه اته کسیزه ډله ونیوله

ارزګان کې د انسان تښتوونکو نیول شوې اته کسیزه ډله

په ارزګان کې طالب چارواکي د انسان تښتوونکو د یوې اته کسیزې ډلې د نیولو خبر ورکوي.

د ارزګان د امنیه قوماندانۍ د امنیت امر کامران اخندزاده نن ازادي راډيو ته وویل چې دغه ډله‌یې په دهراوود ولسوالۍ کې نیولې ده.

ښاغلی اخندزاده زیاتوي: "کومو کسانو چې دوه ورځې وړاندې یې په دهراوود ولسوالۍ کې یو کس تښتولی او د دغه کس له کورنۍ څخه‌یې پیسې غوښتې، د خوشحالۍ ځای دی چې د اسلامي امارت د مجاهدینو د ډېرو کوښښونو وروسته هغه راخوشې شو او په تړاو یې ټول کسان ونیول شول."

اخندزاده زیاته کړه چې له تحقیقاتو ورورسته به د سړي تښتوونکو دغه ډله رسنیو ته هم ښکاره کړي.

هغه همدارنګه وویل چې دوه ورځې وړاندې یې یو ماشوم هم د انسان تښتوونکو له منګولو ژغورلی و.

ایراني چارواکو په زندان کې د شاهین ناصري مړینه تأیید کړه

شاهین ناصري

ایراني چارواکو په زندان کې د شاهین ناصري مړینه تأیید کړې ده.

نوموړي ادعا کړې وه چې د غېږې نیولو اتل نوید افکاري مخکې له دې چې اعدام شي، شکنجه‌یې په خپلو سترګو لیدلې وه. افکاري چې د یوه قتل په تور په اعدام محکوم شوی و، تېر کال پرې دغه سزا تطبیق شوه.

د زندان چارواکو پرون پنجشنبې وویل چې د نوید د مړینې په اړه څېړنه کوي.

دوه ورځې مخکې په اوسلو کې مېشت د ایران د بشري حقونو ډلې د باوري سرچینو له قوله ویلي و چې ناصري وروسته له هغې چې د تهران په یوه لوی زندان کې کوټه قلفۍ ته ولېږدول شو، په مرموز ډول مړ شوی دی.

د ایران د غېږې نیولو اتل نوید افکاري په ۲۰۱۸ کال د حکومت ضد مظاهرو په ترڅ کې د یوه امنیتي ساتونکي په وژلو تورن شوی او د ۲۰۲۰ کال د سپټمبر په ۱۲مه په دار ځړول شوی و.

د ایران قضایي ادارې د نوید د شکنجې تورونه رد کړي دي. په یوه غږیز پیغام کې چې د ازادي راډیو د ایران فردا څانګې ته رسېدلی ناصري ویلي و چې چارواکو ورته ګواښ کړی چې د افکاري په دوسیه کې دې شاهدي نه‌ورکوي.

روسیه کې د کرونا ویروس نوی ریکارډ؛ تېرو ۲۴ ساعتونو کې ۸۲۸ کسان مړه شوي

روسیه کې روغتیايي کارکوونکي په کرونا ویروس د یوه مړه شوي کس د مړي د لېږدولو پر مهال

د روسیې روغتیایي چارواکي وایي، د کرونا له امله په تېرو ۲۴ ساعتونو کې ۸۲۸ کسان مړه شوي چې دا د دغې وبا له خپرېدو راهیسې په روسیه کې په یوه ورځ کې د مړو شویو کسانو نوی ریکارډ دی.

د روسیې د کرونا په وړاندې د مبارزې مرکز نن وویل چې په دې موده کې له ۲۱ زرو ۳۷۹ زیات کسان په کرونا اخته شوي چې یوه ورځ مخکې تر دې د کرونا د مثبتو پېښو شمېر لږ زیات و، یعنې ۲۱ زره او ۴۳۸ کسان پرې اخته شوي وو.

دا پرله‌پسې څلورمه ورځ ده چې په روسیه کې له ۸۰۰ زیات کسان د کرونا له امله مري. دا په اروپا کې د دغې وبا له امله د مړینو تر ټولو لوړه شمېره ده.

د روسیې روغتیایي چارواکو ویلي چې د کرونا نوې پېښې د روسیې د ۸۵ سیمو له ډلې په ۳۶ کې زیاتې شوې او خبرداری یې ورکړی چې د هوا له سړېدو سره چې تنفسي ناروغۍ زیاتېږي، ښایي وضعیت له دې هم خراب شي.

تېره اوونۍ د روسیې ولسمشر ولادیمیر پوتین وروسته له هغې ځان قرنطین کړ چې د هغه د نږدې کړۍ په لسګونه غړي په کرونا اخته شول.

د تاجکستان ولسمشر: طالبان دې یو ټول‌شموله حکومت جوړ کړي

د تاجکستان ولسمشر امام علي رحمن

د تاجکستان ولسمشر امام علي رحمن پر طالبانو غږ وکړ چې یو ټول‌شموله حکومت جوړ کړي چې ټولې سیاسي ډلې او قومونه په‌کې ګډون ولري.

ښاغلي رحمن دغه څرګندونې پرون پنجشنبه د ملګرو ملتونو عمومي اسامبلۍ ته له مخکې په یوه ثبت شوې وینا کې کړي او ویلي یې دي چې دا ډول یو حکومت به په دغه جګړه‌ځپلي هېواد کې کړکېچونه کم کړي.

ښاغلي رحمن په افغانستان کې د وروستیو پېښو په اړه خپلې اندېښنې بیا مطرح کړې او هغه‌یې د سیمې سولې او ثبات ته یو جدي ګواښ بللی.

طالبانو د تېرې اګسټ میاشتې په ۱۵مه کابل ونیو چې ورسره د مرکزي اسیا یو شمېر هېوادونو اندېښنې څرګندې کړي چې ښایي د افغانستان له خاورې یې هېوادونو ته امنیتي ګواښونه متوجې نه‌شي.

دغو هېوادونو همداراز اندېښنه څرګنده کړې چې ښایي په لسګونه زره افغان کډوال پرې ورمات شي، خو طالبانو نړیوالې ټولنې ته ډاډ ورکړی چې له افغانستانه به نورو هېوادونو ته ګواښ متوجې نه‌شي.

پر طالبانو د یوه ټول‌شموله حکومت د جوړولو فشارونه وروسته تر دې زیات شوي چې د نوې اعلان شوې کابینې غړي یې ټول نارینه او اکثره‌یې هغه سخت‌دریځي دي چې ډېر وخت‌یې په جګړو کې تېر شوی.

کونړ کې د هاوان د یوې مرمۍ چاودنې درې ماشومان وژلي او درې نور ټپيان دي

د اسعداباد روغتون

د کونړ په شلتن ولسوالۍ کې د هاوان د یوې مرمۍ د چاودنې په پېښه کې د درې ماشومانو د وژل کېدو او درې نورو د ټپي کېدو خبر ورکړل شوی.

د کونړ سیمه‌ییزو چارواکو تر اوسه د دې پېښې په اړه څه نه‌دي ویلي، خو د اسعداباد روغتون مسؤلینو دې روغتون ته د درې ټپیانو د وروړلو خبره تأیید کړې او د یوه ټپي وضعیت‌یې خطرناک ښودلی.

د شلتن ولسوالۍ یوه اوسېدونکي شوکت‌الله ماموند ازادي رادیو ته د دې پېښې د څرنګوالي په اړه وویل: "نن سهار د کونړ سیند پر غاړه ماشومانو د هاوان یوه نا چاودې مرمۍ چې د مخالفینو له‌خوا که د پخواني حکومت له وخته پاتې وه، پیدا کړې او پرې لوبې یې کولې چې پرې چاودېدلې. درې ماشومان‌یې شهیدان کړي او درې نور یې ټپیان کړي دي."

د افغانستان په اکثرو سیمو کې خښ شوي ماینونه او نورې ناچاودې وسیلې تر اوسه د افغانانو ژوند اخلي چې ډېری قربانیان‌یې هم ماشومان دي.

جو بایډن نن د هند پاسیفیک تړون د غړو هېوادونو د مشرانو کوربه‌توب کوي

د امریکا متحده ایالاتو ولسمشر جو بایډن

د امریکا متحده ایالاتو ولسمشر جو بایډن به نن په حضوري بڼه د هند پاسیفیک د تړون د غړو هېوادونو د مشرانو کوربه وي.

دغه کتنه چې نن به په سپینه ماڼۍ کې ترسره شي، په‌کې د هند صدراعظم نرېندرا مودي، د جاپان صدراعظم یوشیدا سوګا او د استرالیا صدراعظم سکاټ مورېسن ګډون وکړي.

د ازادي راډیو د خبر د مرکزي څانګې د راپور له مخې دغه کتنه به ولسمشر بایډن ته یو فرصت وي چې له فرانسې سره راپورته شوي وروستي اختلافات یوې خواته کړي.

فرانسه د امریکا، بریتانیا او استرالیا پر هغه امنیتي تړون چې څو ورځې مخکې اعلان شو، سخته په قهر شوې، د هغه تړون چې پر اساس‌یې استرالیا پر اټمي وسلو سمبال د اوبتلونو تکنالوژي له امریکا ترلاسه کوي او له استرالیا سره د فرانسې د په لسګونه میلیارد ډالرو د اوبتلونو معامله باطله کېږي.

تر دې کتنې مخکې د جاپان او هند حکومتونو له استرالیا سره د متحده ایالاتو او بریتانیا د دغه نوي امنیتي تړون هرکلی کړی و.

دغو درې واړو هېوادونو ویلي چې پر اټمي وسلو د اوبتلونو سمبالېدل د هند-پاسیفیک د سیمې په اړه د دوی ژمنه په ډاګه کوي او ټینګار یې کړی چې دغه ډیپلوماتیک کړکېچ به له فرانسې سره اوږدمهاله اړیکې اغېزمنې نه‌کړي.

راپورونه: مسکو د طالبانو له حکومت سره د یوه طالب پلاوي پر ورتګ خبرې کوي

د ۲۰۱۹ کال مې میاشت کې مسکو ته د طالبانو د یو لوړپوړي پلاوي سفر

د راپورونو له مخې مسکو په کابل کې د طالبانو له حکومت سره پر دې خبرې کوي چې که یو پلاوی یې له مسکو څخه کتنه ترسره کړي.

د روېټرز خبري اژانس د راپور له مخې دا خبره د روسیې ریا نیوز خبري اژانس د روسیې د بهرنیو چارو وزارت د سرچینو له قوله نن جمعه ورکړی دی.

ریا اژانس دغه‌راز د طالبانو د اطلاعاتو او فرهنګ د مرستیال وزیر او ویاند ذبیح‌الله مجاهد هغه خبره هم را اخیستې چې ویلي یې دي، د طالبانو حکومت د دغسې ارتباطاتو په لټه کې دی.

د تېرې اګسټ میاشتې له ۱۵مې راهیسې چې طالبانو کابل نیولی او وروسته‌یې نوی سرپرست حکومت اعلان کړی تر اوسه هېڅ یوه هېواد هغه په رسمیت نه‌دی پېژندلی.

که مسکو ته د طالبانو د حکومت د پلاوي د تګ موضوع رسماً تأیید شي، دا به له کله چې طالبان پر افغانستان واکمن شوي، یوه بهرني هېواد ته د طالبانو د حکومت د پلاوي لومړنی سفر وي.

تر دې مخکې د طالبانو د قطر دفتر پلاویو څو ځلې له مسکو څخه کتنه ترسره کړې وه.

هنګري وایي نور افغانان په خپله خاوره کې نه‌شي منلی

د هنګري د بهرنیو چارو وزیر پتر زایجرتو

د هنګري د بهرنیو چارو وزیر پتر زایجرتو «Peter Szijjarto» وایي، هېواد یې نور افغانان په خپله خاوره کې نه‌شي منلی.

نوموړي د روسیې له تاس خبري اژانس سره په مرکه کې وویل چې اروپایي ټولنه باید هغه د ۲۰۱۵ کال تجربه چې د ده په وینا د دې ټولنې له جنوبي پولو سره سوریایان راټول شوي و او اوس‌یې ځای افغانانو نیولی، تکرار نه‌شي.

د هنګري د بهرنیو چارو وزیر د ملګرو ملتونو عمومي اسامبلۍ ته په وینا کې هم ورته خبرداری ورکړ او ویې‌ویل: "موږ باید د دې مخه ونیسو چې افغانستان د ترهګرو ډلو په پټن‌ځای بدل نه‌شي. موږ باید له افغانستانه د نورې کډوالۍ مخه ونیسو ځکه چې د کډوالو دغسې یوه لړۍ به د افغانستان ګاونډیانو او هم د اروپا د ټولې وچې د امنیت لپاره د مستقیم ګواښ په معنی وي."

د هنګري د بهرنیو چارو وزیر دغه‌راز وویل چې ټول هغه افغانان‌یې چې په افغانستان کې یې له هنګري ځواکونو سره همکاري کړې وه، له دې هېواده ایستلي او خپل مسؤلیت‌یې پر ځای کړی دی.

ښاغلي زایجرتو ونه‌ویل چې هنګري څومره افغانان تېره میاشت چې طالبانو کابل ونیو له افغانستانه ایستلي، خو امریکایي ځواکونو او متحدانو یې د اګسټ تر۳۱مې پورې په دوو اوونیو کې له ۱۲۷ زرو زیات کسان چې په‌کې د لوېدیځو هېوادونو اتباع او هغه افغانان چې د دغو هېوادونو له ځواکونو یا نورو ادارو سره همکاري کړې وه، د کابل له نړیوال هوایي ډګره په پوځي الوتنو کې وایستل.

نور راوښيه

XS
SM
MD
LG