تر یوې اونۍ واوښته چې طالبان د افغانستان په بیلابیلو ولایتونو کې تر چټکو پرمختګونو وروسته پر کابل واکمن شوي دي، خو دې ډلې تر اوسه یو حکومت نه دی اعلان کړی.
د طالبانو د فرهنګي کمیسون غړي دالحنان همت ازادي راډیو ته وویل، د مشرانو له خوا یې د یو ټولشموله حکومت د جوړیدو لپاره سلا مشورې په چټکۍ روانې دي.
هغه د کابل په هوايي ډګر کې د وروستۍ ګډوډۍ پړه پر امریکا واچوله او ویې ویل چې که په هر هېواد کې امریکا خلکو ته دا ډول اعلان وکړي پر هوايي ډګرونو به د خلکو همدا حال جوړ وي.
ښاغلي همت ټینګار وکړ چې طالبان د رسنیو ازادۍ ته ژمن او له ژورنالیستانو سره همکار دي.
عبدالحنان همت چې د طالبانو په پخوانۍ واکمنۍ کې د باختر خبري اژانس ریس، د هېواد ورځپاڼې مسول مدیر و په دې باور دی چې طالبان به وتوانیږي له هغو افغانانو سره شریک کار وکړي چې کلونه یې د طالبانو په مخالف صف کې تېر کړي.
نوموړی د بې وزلۍ او غربت په وړاندې مبارزه او د نړیوالې ټولنې سره خوا په خوا تګ د طالبانو لپاره راتلونکې ننګونې بولي چې په وینا یې وبه کولی شي پرې برلاسي شي.
د طالبانو د فرهنګي کمیسون له غړي عبدالحنان همت سره اجمل اند مرکه کړې او په سر کې یې ترې پوښتلي دي چې د حکومت جوړونې لپاره روانې سلا مشورې به څومره وخت ونیسي چې افغانستان بالاخره د یو دولت څښتن شي؟
دا مرکه دلته اوریدلی شئ.
