د لاسرسۍ وړ لېنکونه

تازه خبر
چهارشنبه ۷ تله ۱۴۰۰ کابل ۰۶:۱۷

افغانستان

روسیې له تاجکستان او ازبکستان سره پوځي تطبیقات پای ته ورسول

ارشیف

روسیې د افغانستان په سرحد کې د تاجکستان او ازبیکستان له پوځي ځواکونو سره ګډ پوځي تطبیقات پای ته ورسول.

دا مانورې وروسته له هغه وشوې چې د افغانستان په شمال کې طالبانو یو شمېر سیمې ونیولې.

د افغانستان او تاجکستان د سرحد په شل کیلومترۍ کې په دې تمریناتو کې چې تېره اوونۍ پیل شول او پرون سې شنبه (د زمري په ۱۹مه) پای ته ورسېدل، د روسیې، تاجکستان او ازبیکستان دوه نیم زره سرتېرو ګډون کړی وو.

د روسیې دفاع وزارت ویلي چې په دې پوځي تطبیقاتو کې ټانکونه، زغرګاډي، سوُ ۲۵ ډوله جټ الوتکې، هلیکوپټرې او نورې وسلې وکارول شوې، څو سرتېري د افغانستان له خاورې د وسله والو د احتمالي حملو پر وړاندې چمتو شي.

د ورځې تازه خبرونه دلته ولولئ

افغانستان کې له پنځه ملیونو ډېر بې‌ځایه شوي 'عاجلې مرستې' ته اړتیا لري

ارشیف، کندهار کې یو شمېر بې‌ځایه شوې کورنۍ

د بخښنې نړیوال سازمان وايي په افغانستان کې له پنځه ملیونو څخه ډېر کورني بې‌ځایه شوي خلک په سختو حالاتو کې دي او مرستې ته عاجله اړتیا لري.

دې سازمان نن په ټویټر کې لیکلي چې نړیواله ټولنه باید ډاډ ترلاسه کړي چې له افغانستان سره بشري مرستې پرته له ځنډه دوام پيدا کوي.

ملګرو ملتونو مخکې ویلي و چې په افغانستان کې لږ تر لږه ۱۱ ملیونه کسان به په راتلونکو میاشتو کې عاجلو بشري مرستو ته اړتیا ولري.

د راپورونو له مخې، افغانستان دا مهال له مخ په ډېرېدونکي اقتصادي بحران سره مخ دی، د خوراکي او سونګ توکو بیې په چټکۍ سره لوړې شوي او نغدې پيسې کمې شوي.

د طالبانو لاس ته د کابل تر لوېدو وروسته، د پیسو نړیوال وجهي صندوق او نړیوال بانک په افغانستان کې خپل فعالیتونه وځنډول او واشنګټن د افغانستان شااوخوا نهه‌نیم میلیارده ډالره شتمني کنګل کړه.

د امریکايي ځواکونو ایستل؛ د امریکا سنا جرګې د پوځي خدماتو کمېټې غونډه پيل شوه

د متحده ایالاتو د دفاع وزیر لوېډ استېن او د لوی درستیزانو د کمېټې مشر مارک میلي

د امریکا د سنا جرګې د پوځي خدماتو په کمېټه کې له افغانستانه د امریکايي ځواکونو د وتلو د څرنګوالي په اړه غونډه پيل شوې ده.

دې جلسې ته د امریکا د سناتورانو د پوښتنو د ځوابولو لپاره د متحده ایالاتو د دفاع وزیر لوېډ استېن، د لوی درستیزانو د کمېټې مشر مارک میلي او د متحده ایالاتو د پوځ د مرکزي قوماندانۍ مشر جنرال فرانک مک‌کنزي ورغوښتل شوي.

له دوی به په افغانستان کې د پوځي مأموریت د پای ته رسولو او د ترهګرۍ په وړاندې د مبارزې په راتلونکو لارو چارو پوښتنې کېږي.

د طالبانو لاس ته د افغانستان تر لوېدو او د امریکا له راوتلو وروسته دا لومړی وار دی چې د امریکا د پوځ مشر او دفاع وزیر سنا جرګې ته د مأموریت د پای ته رسولو او راتلونکو پلانونو په اړه ځواب وايي.

دوه اوونۍ مخکې د امریکا د بهرنیو چارو وزیر انتوني بلېنکن له افغانستان څخه د امریکایي ځواکونو د وتلو لپاره د سنا جرګې له سختو نیوکو سره مخ شو او ځینو ان د هغه د استعفا غوښتنه وکړه.

امریکا د اګسټ له ۳۰مې مخکې خپل ټول عسکر او لسګونه زره افغان همکاران او د هغوی کورنۍ له افغانستانه وایستل.

خو لوړپوړو ډیموکراتانو له هغې ډلې ولسمشر جو بایډن له افغانستانه د امریکايي ځواکونو د ایستلو له بهیره دفاع کړې ده.

قریشي: د بشري ناورین مخنیوي لپاره باید نړۍ له افغانستان سره اړیکې وپالي

د پاکستان د بهرنیو چارو وزیر شاه محمود قریشي

د پاکستان د بهرنیو چارو وزیر شاه محمود قریشي وايي په افغانستان کې د بشري ناورین او د اقتصادي چارو د سقوط د مخنیوي لپاره باید نړۍ له دغه هېواد سره اړیکې وپالي.

هغه دا خبره نن د بریتانیا د پارلمان له یو شمېر غړو سره په لیدنه کې کړې ده. قریشي د دې لیدنې جزئیات او عکسونه په خپل ټویټر خپاره کړي.

قریشي ویلي د افغانستان په تړاو یې د پاکستان لیدلوری د بریتانیا د پارلمان د بهرنیو او دفاعي چارو د کمېټو له مشرانو سره شریک کړ.

هغه زیاته کړې چې په دې لیدنو کې یې ټینګار کړی چې نړۍ باید د یوه بشري کړکېچ او د اقتصاد د سقوط د مخنیوي لپاره له افغانستان سره اړیکې وپالي.

قریشي ګڼو نورو سفرونو کې هم د افغانستان په تړاو خبرې کړي.

د طالبانو حکومت که څه هم د قریشي د لیدنو او د بحثونو په تړاو څه غبرګون نه‌دی ښوولی، خو په لندن کې لسګونه افغانانو د دې لیدنو پر ضد اعتراض کړی.

د مظاهرو یوه تنظیموونکي ډاکتر ذاکر سادات ازادي راډیو ته وویل چې قریشي د افغانستان په چارو کې لاسوهنه کوي او د طالبانو په استازولۍ تبلیغ کوي.

ناټو: طالبان دې ترهګرۍ سره د مبارزې په اړه وپوښتل شي

د ناټو عمومي منشي ینس سټولټنبرګ

د ناټو عمومي منشي ینس سټولټنبرګ وویل چې طالبان باید له ترهګرۍ سره د مبارزې او په افغانستان کې بشري حقونو ته د درناوي په برخه کې د خپلو ژمنو په اړه وپوښتل شي.

د ناټو د یوه بیان له مخې، سټولټنبرګ دا څرګندونې پرون د چین د بهرنیو چارو له وزیر وانګ یي سره په انلاین خبرو کې کړي دي.

د فرانس پرېس د راپور له مخې، د چین د بهرنیو چارو وزارت نن وویل چې پرونۍ خبرې مثبتې او رغنده وې.

د بیجینګ په وینا ، وانګ یی او سټولټنبرګ موافقه وکړه چې د ترهګرۍ پر وړاندې د مبارزې په ګډون د بېلابېلو مسالو په اړه د چین او ناټو ترمنځ ډیالوګ ډېر شي.

بیجینګ په افغانستان کې د ناټو او امریکایي ځواکونو له حضور سره مخالفت درلود.

طالبان: د پاچا ظاهرشاه د دورې اساسي قانون د لنډ مهال لپاره کاروو

ظاهرشاه

طالبانو ویلي، د پخواني پاچا محمد ظاهرشاه د دورې اساسي قانون له هغو موادو پرته چې د دوی په خبره له اسلام سره په ټکر وي د موقتې دورې لپاره اجرا کوي.

دا خبره د طالبانو د حکومت د عدلیې سرپرست وزیر مولوي عبدالحکیم شرعي په حواله نن خپره شوې ده.

شرعي نن د چین له سفیر سره په کابل کې کتلي او دا خبرې یې له هغه سره په لیدنه کې یادې کړي.

د طالبانو د عدلیې وزارت د اعلامیې پر اساس چې د دې وزارت په فیسبوک خپره شوې د دوی حکومت هغو نړیوالو قوانینو او سندونو ته هم درناوی کوي چې د دوی په خبره د شریعت او اسلامي امارت له اصولو سره په ټکر کې نه وي.

طالبانو دا جزییات نه دي ورکړي چې د پخواني پاچا محمد ظاهر شاه د دورې اساسي قانون چې دوی یې د عملي کولو تابیا لري په کومو مواردو کې له اسلام سره ټکر لري.

د افغان جګړې په اړه به امریکايي چارواکي د کانګرس له پوښتنو سره مخ شي

د امریکا کانګرس

تمه ده چې د متحده ایالاتو د ولسمشر جو بایډن په اداره کې لوړ پوړي پوځي چارواکي په افغانستان کې د جګړې د پای ته رسولو په اړه د کانګرس له سختو پوښتنو سره مخ شي.

د متحده ایالاتو د دفاع وزیر لوېډ اسټن، د لوی درستیزانو د کمېټې مشر مارک میلي او د متحده ایالاتو د پوځ د مرکزي قوماندانۍ مشر جنرال فرانک مککنزي نن او سبا د جرګې او مشرانو جرګې نظامي خدماتو کمېټو کې خدمت وکړي.

د رویټرز په وینا د مشرانو جرګې نظامي خدماتو کمېټې کې لوړپوړي جمهوري غوښتونکي سناتور جم انحاف د نن ورځې د غونډې له پيل مخکې د پوښتنو یو اوږد لېست دفاع وزیر لوېډ اسټن ته ورکړی چې په کې د کابل هوایي ډګر ته نږدې د اګسټ په ۲۶مه برید، په افغانستان کې د امریکايي ځواکونو د پاتې شوېو تجهیزاتو او د ترهګرۍ پر وړاندې د مبارزې په اړه مسایل پوښتل شوي.

دوه اونۍ دمخه، د متحده ایالاتو د بهرنیو چارو وزیر انتوني بلېنکن له افغانستانه د امریکایي ځواکونو د وتلو لپاره د سنا جرګې له سختو نیوکو سره مخ شو او ځینو ان د هغه د استعفا غوښتنه وکړه.

امریکا د اګسټ له دېرشمې مخکې خپل ټول عسکر او لسګونه زره افغان همکاران او د هغوی کورنۍ له افغانستانه وایستل.

خو لوړپوړو ډموکراټانو له هغې ډلې ولسمشر جوبایډن له افغانستانه د امریکايي ځواکونو د ایستلو له بهیره دفاع کړې ده.

ملګرو ملتونو کې د افغانستان استازولۍ: د ملي ګټو په خاطر مو وینا ونه کړه

د ملګرو ملتونو عمومي غونډه

په ملګرو ملتونو کې د افغانستان دایمي استازولۍ ویلي، د ملي ګټو او په سازمان کې د افغانستان د څوکۍ د ساتلو لپاره یې عمومي غونډې ته وینا ونه کړه.

د استازولۍ په ټوېټرپاڼه باندې ساعت مخکې دا خبر راغلی دی.

په ملګرو ملتونو کې د افغانستان دایمي استازولۍ زیاته کړې دا پرېکړه یې د سازمان له یو لړ مطرح غړیو سره په مشوره کړې چې په عمومي غونډه کې خبرې ونه کړي.

خو استازولۍ ډاډ ورکړی چې په ملګرو ملتونو کې د افغانستان دایمي نماینده ګي د پخوا په شان خپل فعالیتونو ته دوام ورکوي.

تمه وه د ګوښه شوي افغان ولسمشر محمد اشرف غني په مشرۍ د حکومت دایمي استازی غلام محمد اسحاقزی د دوشنبې په ورځ د ملګرو ملتونو د ٧٦ مې عمومي غونډې په وروستۍ ورځ وینا وکړي.

د لویدیځو رسنیو د راپورونو له مخې، د ملګرو ملتونو د عمومي منشي انتونیو ګوټیرش ویاند سټیفن دوجاریک همدا اوونۍ خبر ورکړی و چې اسحاقزی د افغانستان په استازیتوب وینا کوي.

طالبانو د ملګرو ملتونو سرمنشي ښاغلي ګوتیریش ته یو لیک هم استولی وو او ترې غوښتي یې وو چې په قطر کې د دې ډلې د سیاسي دفتر ویاند سهیل شاهین په ملګرو ملتونو کې د افغانستان د دایمي استازي په توګه ومني او طالبانو ته اجازه ورکړي چې د ملګرو ملتونو په عمومي غونډه کې وینا وکړي.

شاهین تازه له دې مسلې هرکلی کړی چې اسحاقزی بېګا له وینا تېر شوی.

ترکیې افغانستان سره د سل مټریک ټنه اصلاح شوېو تخمونو مرسته وکړه

افغانستان سره مرسته شوي غنم

د ترکیې د 'اي، اېچ، اېچ' موسسې له افغانستان سره د سل مټریک ټنه اصلاح شوېو تخمونو مرسته وکړه.

د افغانستان د کرنې، اوبو لګولو او مالدارۍ وزارت وایي، دغه مرسته د ترکیې د (اي، اېچ، اېچ) موسسې له لوري د یاد وزارت په چوکاټ کې د دې هېواد له بزګرانو سره کېږي، څو د دوی په حاصلاتو کې د پام وړ ښه والی راشي.

د کرنې، اوبو لګولو او مالدارۍ وزارت سرپرست مولوي صدراعظم د یادې موسسې له مسولینو سره د لیدنې پرمهال دواړو خواوو په دوه اړخیزو همکاریو ژمنه وکړه.

د (اي، اېچ، اېچ) موسسې مسولینو ژمنه وکړه چې د اصلاح شوېو توکو د مرستې سربېره به له دې هېواد سره یو شمېر نورې مرستې هم وکړي او په وینا یې یو شمېر بزګرانو ته د ژورو څاګانو د ایستلو پروګرامونه هم په پام کې نیول شوي دي.

د سوداګرۍ او صنعت وزارت: هڅه کوو د سوداګرو ټولې ستونزې هوارې کړو

د سوداګرو ستونزې

د افغانستان د سوداګرۍ او صنعت وزارت وایي، هڅه کوي چې د سوداګرو ټولې ستونزې هوارې کړي.

دا خبرې د طالبانو له لوري د افغانستان د سوداګرۍ او صنعت وزارت ته ټاکل شوي سرپرست وزیر نور الدین عزیزي د نړیوالې سوداګریزې خونې، نفت او د ګازو د اتحادیو له مسولینو سره په یوه ناسته کې کړې ویلي چې سوداګر د هېواد د ملا د تیر حیثیت لري.

د دې وزارت سرپرست دغه شان د سوداګرۍ د غوړېدو لپاره د قانون په چوکاټ کې په سوداګریزو چارو کې د یو شمېر اسانتیاوو برابرولو ډاډ هم ورکړ.

امریکا کې د قتلونو شمېر ۳۰ سلنه لوړ شوی دی

ارشیف

د امریکا په متحده ایالاتونو کې تېر ۲۰۲۰ میلادي کال کې د قتلونو شمېر د وړم کال پرتله دیرش فیصده لوړ شوی دی.

دا له ۱۹۶۰ میلادي کال راهیسې چې په کلني ډول د جنایي وژنو شمېر ثبتیږي، د قتل تر ټولو لوړې شمېرې ګڼل کېږي.

د امریکا د څېړنو فدرال ادارې ( ایف.بي.آی) پرون دا شمېرې خپرې کړې او وېې ویل، ۲۰۲۰ کال کې ټولټال د وژنې ( ۲۱۵۷۰) پیښې ثبت شوي دي.

د وژنو دا شمېرې د ۲۰۱۹ کال د شمېرو پرتله ۴۹۰۱ زیاتوالی ښيي.

د راپور له مخې ۷۳ فیصده دغه وژنې د وسلې په وسیله شوي دي.

غلام محمد اسحاقزی د ملګرو ملتونو اسامبلۍ ته له وینا تېر شو

په ملګرو ملتونو کې د افغانستان د پخواني حکومت استازی غلام محمد اسحاقزی

په ملګرو ملتونو کې د افغانستان د پخواني حکومت استازی غلام محمد اسحاقزی عمومي اسامبلۍ ته له پلان شوې وینا تېر شو.

ټاکل شوې وه نوموړی پرون دوشنبه دغې غونډې ته وینا وکړي، خو په وروستۍ شېبه کې یې نوم د ویناوالو له لېسته لېرې شو.

امریکا غږ د ملګرو ملتونو د یوې ویاندې مونیکا ګرایلي په حواله ویلي چې افغانستان په عمومي بحث کې له ګډونه ځان و ایست او د علت په اړه یې هم دوی نه دي خبر.

د طالبانو له خوا ملګرو ملتونو ته ور پېژندل شوي استازي سهیل شاهین له ازادي راډیو سره خبرو کې د دې اقدام هرکلی کړی دی: "دا یوه ښه اقدام دی، موږ یې هرکلی کوو، هغه په هېڅ صورت سره نه شوای کولای چې د افغانستان د ولس نمایندګي وکړي. د هغه پرځای باید د اسلامي امارت استازي ته بلنه ورکړل شوې وای چې د ملګرو ملتونو عمومي غونډې ته وینا وکړي، موږ ټول هغه شرایط پوره کړي چې ملګرو ملتونو د یوه هېواد د حکومت د رسمي پیژندلو لپاره ټاکلي دي."

طالبانو تر دې وړاندې د ملګرو ملتونو پر دې پریکړې اعتراض کړی و چې د دوی استازی یې نه و منلی او د پخواني حکومت د استازي نوم یې د ویناوالو په لست کې شامل کړی و.

نړیواله جنایي محکمه افغانستان کې خپلې څېړنې بیا پيلوي

نړیواله جنايي محکمه

نړیوالې جنایي محکمې اعلان کړی چې په افغانستان کې خپلې څېړنې بیا پيلوي او لومړیتوب هغو جرمونو ته ورکوي چې ادعا کېږي داعش – خراسان څانګې او طالبانو ترسره کړي دي.

دا خبره د یادې محکمې د څارنوال کریم خان په حواله په یوه مفصله بیانیه کې پرون یاده شوې ده.

په اعلامیه کې د څارنوال خان په حواله راغلي: "د طالبانو او داعش له خوا د ادعا شوېو جرمونو شدت، اندازه او دوامداره ډول چې په کې په ملکي وګړو د بې توپیره بریدونو تورونه، غیرقانوني اعدامونه، د ښځو او نجونو ځورول، د ماشومانو پر وړاندې جرمونه او نور جرمونه چې په پراخه کچه ملکي وګړو باندې اغیزه کوي شامل دي."

د بشري حقونو ځینو فعالانو او مدافع سازمانونو که څه هم له دې اقدامه هرکلی کړی، خو د نړیوالې جنایي محکمې د اعلامیې ځینو برخو یې انتقادونه کړي.

د بشري حقونو د څار سازمان د اسیا مرستیالې پټریشیا ګاسمن ویلي، د عدالت د ټینګښت لپاره د داعش او طالبانو د سرغړونو څېړل مهم اقدام دی.

اغلې ګاسمن زیاتوي، له لومړیتوبونو د امریکايي او پخوانیو افغان ځواکونو د څېړنو لرې کول په دې معنی دی چې هغوی ته "له زندانه د وتلو وړیا چانس په لاس ورکول کېږي."

امریکا وايي، سل تنه اتباع او اقامت لرونکي کسان افغانستان کې پاتي

د کابل هوايي ډګر

امریکا وايي، سل تنه اتباع او هغه کسان چې د دغه هېواد دایمي اقامت لري په افغانستان کې پاتې دي.

د امریکا د بهرنیو چارو وزارت یوه لوړپوړي چارواکی چې د موضوع د حساسیت په خاطر خپل نوم نه دی اخیستی په واشنګټن کې خبریالانو ته ویلي چې د بهرنیو چارو وزارت په کار لګیا دی چې د دغو سلو تنو د راتلو زمینه مساعده شي.

د هغه په خبره په افغانستان کې د امریکا د حکومت لومړیتوب، د هغو امریکایانو د را ایستلو په برخه کې مرسته ده چې غواړي له افغانستان راووځي.

د اګسټ له ۱۵مې نېټې تر ۳۱ مې پورې امریکا او متحدینو یې نږدې ۱۲۴ زره تنه له افغانستانه را ویستل.

د رویټرز خبري اژانس راپور ورکړی د امریکا اتباع په دې خاطر په افغانستان کې پاتې دي چې د کورنۍ غړي یې د اسنادو د نه درلودو په خاطر امریکا ته سفر نه شي کولای.

لسګونه افغانانو لندن کې د پاکستان پر ضد لاریون وکړ

ارشیف، عکس تزئیني بڼه لري

لسګونه افغانانو په لندن کې د پاکستان پر ضد لاریون وکړ. دوی پرون د بریتانیا له صدراعظم او بهرنیو چارو وزیر سره د پاکستان د بهرنیو چارو د وزیر د لیدنو په درشل کې د بریتانیا د صدارت ماڼۍ مخ ته وتلي وو.

د مظاهرې یوه تنظیموونکي ذاکر سادات ازادي راډیو ته وویل: "په مجموع کې دریځ دا و چې د پاکستان لاسوهنې او په ځانګړي توګه دا قریشي چې دی په اصطلاح د طالبانو د بهرنیو چارو د وزیر په توګه کله دلته او کله تاشکند او کله په تاجکستان کې ناست وي او د دوی لپاره لابي کوي، د دې په خلاف موږ راوتلي وو."

ښاغلي سادات وویل چې نن سې شنبه هم دا افغانان مظاهرې ته راوځي.

تردې مخکې هم په ځینو نورو اروپايي هېوادونو له هغې ډلې بلجیم، جرمني او فرانسې کې یو شمېر افغانانو د پاکستان پرضد لاریونونه کړي.

پاکستاني چارواکو د دغو لاریونو په اړه څه غبرګون نه دی ښودلی.

یو شمېر افغان مېرمنې د 'سخروف' جایزې لپاره کاندیدې شوې

د اروپا پارلمان

یو شمېر افغان مېرمنې پرون رسماً د اروپا د پارلمان له خوا د سخروف جایزې لپاره کاندیدې شوې.

د راپورونو له مخې شهرزاد اکبر، ظریفه غفاري، ماري اکرمي، پلوشه حسن، فرشته کریم، صحرا کریمي، میترا مهران، حوریه مصدق، سیما سمر، حبیبه سرابي او انیسه شهید په دې سیالي کې د افغان مېرمنو استازیتوب کوي.

د اروپا د پارلمان مرستیالې هایدي هاوتالا پرون وویل چې دا افغان مېرمنې په خپل هېواد کې د مبارزې، بشري حقونو او ډموکراسۍ د دفاع لپاره د سخروف جایزې لپاره کاندیدې شوي: "د دغو ښځو مېړانه عالي ده. هغوی ځان له خطر سره مخ کړی، څو د هغه څه لپاره چې موږ ته ډالۍ شوې، مبارزه وکړي."

د سخروف جایزې ګټونکي به د اکتوبر په ۲۱مه یعنې په څه کم یوه میاشت کې اعلان شي.

د افغان مېرمنو تر څنګ د روسیې د حکومت سرسخته منتقد الکسي ناوالني هم د دې جایزې رسمي نوماند اعلان شوی.

نور راوښيه

XS
SM
MD
LG