د لاسرسۍ وړ لېنکونه

تازه خبر
شنبه ۱ تله ۱۴۰۲ کابل ۰۶:۵۴

افغانستان

د افغانستان دفاع وزارت: امریکايي الوتکو شبرغان کې پر طالبانو بمبار کړی

د امریکا یوه «بي-۵۲» الوتکه

د افغانستان دفاع وزارت وايي، د امریکا «بي-۵۲» الوتکو د جوزجان ولایت په مرکز شبرغان کې پر طالبانو بمباري کړې ده.

د دفاع وزارت مرستیال ویاند فواد امان پر خپله ټویټرپاڼه کښلي چې دا برید پرون ماښام شپږ نیمې بجې وشو او طالبانو ته‌یې درنه مرګ‌ژوبله اړولې ده.

د فواد امان په وینا د امریکايي الوتکې په بمبارۍ کې د طالبانو د ډېر شمېر وسلو او مهماتو ترڅنګ د هغو تر سلو ډېرې نقلیه وسیلې هم ویجاړې شوې دي.

پرون ټایمز او مېل ورځپاڼو د امریکا د دفاع وزارت د سرچینو په حواله راپور ورکړی و چې ولسمشر بایډن «بي-۵۲» او د سپکټر په نوم په وسلو سمبالو الوتکو ته امر کړی چې په افغانستان کې طالبان په نښه کړي.

د راپور پر اساس د لښکرګاه، کندهار او هرات په شااوخوا کې د طالبانو مورچې بمبار شوې دي.

د ورځې تازه خبرونه دلته ولولئ

د چين اسيايي سيالۍ؛ افغان کرکټ لوبډله سرېلانکا سره لوبيږي

د افغانستان - سریلانکا يوه مخکينۍ کرکټ لوبه

د چین په اسیایي سیالیو کې د افغانستان کرکټ الف لوبډله په منځلوبو یا کوارټرفاینل کې لوبیږي چې سیال یې د سریلانکا لوبډله ده.

د دې دوو ټیمونو ترڅنګ د هند، پاکستان او بنګله دیش الف ټیمونه هم په کوارټرز فاینل کې ځای شوې دي.

د افغانستان الف لوبډله به په اسیایي المپیک کې د اکتوبر په څلورمه له سریلانکا سره مسابقه وکړي.

د دې سیالیو پایلوبه د اکتوبر په اوومه ده.

د افغانستان کرکټ ټیم په دوه زره لسم کال کې د اسیایي لوبو په ترڅ کې د سپینو زرو میډال ګټلی و.

کابل کې د تیلو او ګازو بيې لوړې شوې دي

کابل کې د ګازو پېرلو په تمه يو شمېر ولاړ خلک

په کابل کې د تیلو او ګازو بیې زیاتې شوې دي.

د راپورونو له مخې، اوس مهال په کابل کې یو لیټر تیل په اتیا او يو کیلو ګاز په شپیته افغانۍ پلورل کېږي.

تر دې مخکې یو لیتر تیل شاوخوا شپیته افغانۍ پلورل کیده.

د پلازمېنې ګڼو اوسیدونکو د تیلو او ګازو د بییو لوړیدو ته اندیښنه ښکاره کړې ده.

په کابل کې له تیرې یوې میاشتې راهیسې د اکثرو خوراکي موادو بیې هم وروسته تر دې لوړې شوې، چې د سالنګ لویه لاره د رغاونې لپاره بنده شوه.

په کابل کې چارواکي وایي چې په نړیوالو بازارونو کې د سون د موادو بیې زیاتې شوې دي.

د اروپايي ټولنې د بهرني سیاست مسوول پاکستاني مقام سره د افغانستان په اړه خبرې وکړې

د اروپايي ټولنې د بهرني سیاست مسوول

د اروپایي ټولنې د بهرنۍ تګلارې مشر په نیویارک کې د پاکستان د بهرنیو چارو له سرپرست وزیر عباس جیلاني سره د یوشمیر نورو موضوعاتو ترڅنګ د افغانستان په اړه خبرې وکړې.

جوزیپ بوریل په خپله ایکسپاڼه کې پرون ولیکل چې په دې خبرو کې د افغانستان او په دغه هیواد کې د ښځو او نجونو پر وضعیت خبرې وشوې.

تر دې مخکې پرون د پاکستان د بهرنیو چارو سرپرست وزیر په نیویارک کې د ملګرو ملتو د اته اویایمې عمومي غونډې په څنډه کې د افغانستان لپاره د امریکا د متحد ایالتونو له ځانګړي استازي توماس ویسټ سره د افغانستان په اړه خبرې کړې وې.

دا لیدنې کتنې په داسې وخت کې کیږي چې د پاکستان یو پلاوی په کابل کې د طالبانو له مشرانو سره په خبرو بوخت دی.

فایق: په افغانستان کې بشري سرغړونې دې په دقت وڅارل شي

نصیر احمد فایق، په ملګرو ملتونو کې د افغانستان دايمي استازی

په ملګرو ملتو کې د افغانستان دایمي استازي د طالبانو له لورې د بشري حقونو د سرغړونو د څارنې د ادامې غوښتنه وکړه.

په نیویارک کې پرون له جنسیتي اپارتاید سره د مبارزې په نوم غونډه کې نصیر احمد فایق دا هم وویل چې د افغانستان له ښځو او ماشومانو سره دې بشري مرستې نه دریږي.

په دې غونډه کې د افغانستان د بشري حقونو په برخه کې د ملګرو ملتو ځانګړي استازي ریچارډ بنټ، د یوشمیر هیوادو سفیرانو او د بشري حقونو یو شمیر فعالانو برخه اخیستې وه.

'سي پي جی' چک جمهوریت ته: د ای‌سټوریز خبریالانو امنیت تضمین کړئ

د چک جمهوریت بیرغ

د ژورنالیستانو د خوندیتوب کمېټې په چک جمهوریت غږ کړی چې د خپلواکې تحقیقاتي خبري ویبپاڼې، 'ای‌سټوریز' خبریالانو ته د ورپېښو خطرونو په اړه تحقیقات وکړي او د خبریالانو امنیت يې تضمین کړي.

د روان کال د مارچ او سپټمبر میاشتو ترمنځ 'ای‌سټوریز' د خطر څلور پیغامونه ترلاسه کړي وو.

په پیغامونو کې د 'ای‌سټوریز' د دوو خبریالانو، چې په پراګ کې ژوند کوي نومونه، ادرس او د سفر ټول جزییات ورکړل شوی وو.

پر اوکراین د روسیې له یرغل وروسته د 'ای‌سټوریز' د دې دوو خبریالانو په ګډون زیاتره کارکوونکی په چک هېواد کې ځای پر ځای شوي دي.

وېسټ له جیلاني سره د افغان ښځو، بشري وضعیت او امنیتي مسایلو په اړه خبرې کړي

د افغانستان لپاره د امریکا ځانګړی استازی ټام وېست

د افغانستان لپاره د امریکا ځانګړی استازی ټام وېست وايي، د پاکستان د بهرنیو چارو له موقت وزیر جلیل عباس جیلاني سره يې د ښځو او نجونو د ملاتړ او د بشري وضعیت په اړه خبرې کړي دي.

وېست نن پر خپلې ایکسپاڼه لیکلي، په نیویارک کې د ملګرو ملتونو د ۷۸ ناستې په څنډه کې يې له جیلاني سره کتلي دي.

وېسټ زیاته کړې، په دې کتنه کې يې د ګډو امنیتي ګټو په اړه هم خبرې کړي دي.

طالبانو واک ته له رسېدو وروسته، نجونې له شپږم ټولګیو پورته له زده کړو راګرځولي او د تېر کال په وروستیو کې يې نجونې له پوهنتوني زده کړو هم منع کړې.

طالبانو په ټولو نادولتي کورنیو او بهرنیو موسسو کې د ښځو پر کار بندیز لګولی او پارکونو او نورو تفریحي ځایونو ته یې ښځې له تګه راګرځولي دي.

د امریکا حکومت تازه تللیو افغانانو ته د استوګنې لنډمهاله اسناد ورکوي

ارشیف: د کابل له هوايي ډګره د امریکا د تخلیې پروګرام څخه یو انځور

د امریکا حکومت هغو افغانانو ته چې تازه دې هېواد ته رسېدلي د قانوني استوګنې لنډمهالي اسناد ورکوي.

کوم افغانان چې له څه باندې یو کاله هلته اوسېږي له دې اسانتیا برخمنېږي.

د امریکا د کورني امنیت وزارت پرون اعلان وکړ هغه افغانان چې د ۲۰۲۲ کال د مارچ له ۱۵مې وروسته او د ۲۰۲۳ کال د سپټمبر له شلمې مخکې امریکا ته ننوتي لنډمهالي اسناد ترلاسه کوي.

د اعلان له مخې په دې پروسه کې ټولټال ۱۴۶۰۰ افغانان شاملېږي.

د امریکا اوسنۍ پرېکړه هلته د یادو افغانانو د دایمي استوګنې یا د تابعیت کومه اسانتیا نه برابروي.

یواځې تر ۲۰۲۵ کاله به هلته دوی اوسېدلی شي او تر هغه وروسته به بیا اسناد له سره نوي کوي.

'ډبلیو ایف پي' بیا اړو افغانانو ته د مرستو لپاره د یو میلیارد ډالرو غوښتنه وکړه

ارشیف: په ارزګان کې د ډبلیو ایف پي له لوري د مرستو رسونې له بهیره یو انځور

د خوړو نړیوال پروګرام یا 'ډبلیو ایف پي' په افغانستان کې میلیونونو اړو کسانو ته د مرستو د دوام لپاره یو وار بیا د مالي مرستې غوښتنه وکړه.

د اسیا پسفیک لپاره د دې ادارې سیمه ییز مدیر جان ایلیف، په یوه ویډیو کې، چې پرون د خوړو د نړیوال پروګرام د افغانستان څانګې پر خپله ایکسپاڼه خپره کړه، وویل: "په افغانستان کې ژمی په رانږدې کېدو دی او ډبلیو ایف پي له بې ساري مالي بحران سره مخامخ دی. یو میلیارد ډالرو ته اړتیا لرو چې د ژمې په ترڅ کې له ۱۵ میلیون تنو سره مرسته وکړو."

د ملګرو ملتونو له شمېرو سره سم، په افغانستان کې ټولټال ۲۹ میلیونه خلک بشري مرستې ته اړتیا لري.

د طالبانو له لوري په کورنیو او بهرنیو موسسو کې د ښځو پر کار بندیزونو له افغانستان سره د نړیوالو پر مرستو منفي اغېز شیندلی دی.

د یوناما مرستیال سره د کرزي او عبدالله لیدنه؛ په مرستو او د نجونو پر زده کړو غږېدلي

د عکس ښي لور عبدالله عبدالله او کرزی او چپ لور ته د یوناما مرستیال مارکس پوټزل او هغه سره مل پلاوی

د افغانستان پخواني ولسمشر حامد کرزي او د سولې د عالي شورا پخواني مشر عبدالله عبدالله پرون پنجشنبې د ملګرو ملتونو د سرمنشي د ځانګړي استازي له سیاسي مرستیال مارکس پوټزل سره وکتل.

حامد کرزي پرون ناوخته په خپله ایکسپاڼه کې ولیکل چې په دې کتنه کې له افغانانو سره د ملګرو ملتونو د مرستو په اړه خبرې وشوې او افغان نجونو او هلکانو ته د زده کړو د اسانتیا پر برابرولو ټینګار وشو.

طالبانو له شپږم ټولګي پورته د نجونو د زده کړو مخه نیولې او له دې کبله له پرله‌پسې انتقادونو سره مخامخ دي.

په کندز کې د کرنیزو محصولاتو نندارتون جوړ شو

ارشیف: په افغانستان کې د کرنیزو توکو د یوه نندارتون انځور

په کندز کې پرون پنجشنبې د کرنیزو محصولاتو یو نندارتون جوړ شو.

د طالبانو د کندز د والي دفتر په یوه خبرپاڼه کې ویلي چې دا یو ورځنی نندارتون د کرنې، اوبه لګونې او مالدارۍ ریاست په همکارۍ د نوې لار انکشافي او ټولنیزې موسسې له لوري د کورنیو د اقتصاد او کرنیزو محصولاتو د پراختیا لپاره جوړ شو.

نور راوښيه

XS
SM
MD
LG