د لاسرسۍ وړ لېنکونه

تازه خبر
یکشنبه ۲۸ وږی ۱۴۰۰ کابل ۰۸:۴۳

افغانستان

د امریکا سفارت: طالبان دې د سولې لاره خپله کړي

په کابل کې د امریکا د سفارت سرپرست او شارزدافیر راس وېلسن

په کابل کې د امریکا د سفارت سرپرست او شارزدافیر راس وېلسن یو ځل بیا پر طالبانوغږ وکړ چې د سولې لاره خپله کړي.

ښاغلي وېلسن دغه غوښتنه نن جمعه (د زمري ۱۵مه) په یوه ټویټ کې کړې او ویلي یې دي چې د طالبانو تاوتریخوالی او کرکه هېڅکله هم د حکومتوالۍ د دوام یوه بڼه نه وه.

وېلسن زیاته کړې چې د دې ډلې له خوا مخکیني سرپرې کول او اوسني بریدونه او هدفي وژنې د دې ښکارندویي کوي چې طالبان یوازې تاوتریخوالي پېژني او له سولې وېره لري.

ښاغلي وېلسن وایي، موږ له طالبانو غواړو چې سوله غوره کړي.

د ورځې تازه خبرونه دلته ولولئ

عمران خان طالبانو سره د یوه ټول­ شموله حکومت په اړه خبرې پیل کړي

د پاکستان صدراعظم عمران خان 

د پاکستان صدراعظم وايي، له طالبانو سره یې د یوه ټول­ شموله حکومت په اړه چې تاجکان، هزاره او ازبکان په کې حضور ولري، خبرې پیل کړي دي.

عمران خان نن په خپل ټویټر کې لیکلي، دغه خبرې یې به دوشنبې کې د افغانستان د ګاونډیو هېوادونو له مشرانو سره تر کتنې او د تاجکستان له ولسمشر امام علي رحمان سره تر تفصیلي بحث وروسته پیل کړي دي.

ده زیاته کړې د څلورو لسیزو تر جګړو وروسته د حکومت ټول شموله اوسېدل په افغانستان کې له سولې او ثبات سره چې د عمران خان په خبره د سیمې په ګټه دی، مرسته کوي.

د پاکستان صدراعظم پرون د شانګهای د همکارۍ سازمان د غړو هېوادونو د مشرانو د غونډې په څنډه کې د تاجکستان له ولسمشر سره وکتل.

طالبانو د سېپټمبر پر اوومه د سرپرستې کابینې تر اعلان مخکې د ټول­ شموله حکومت د جوړولو ژمنه کړې وه.

جلال اباد کې ۳ او کابل کې یوې چاودنې لږ تر لږه ۳ کسان وژلي

ارشیف

راپورونه وايي، په جلال اباد کې درېیو او په کابل کې یوې چاودنې لږ تر لږه ۳ کسان وژلي او شا و خوا ۲۰ کسان ټپیان کړي دي.

په ننګرهار کې یوې سرچینې د نوم نه ښوولو په شرط ازادي راډیو ته وویل، د جلال اباد په بېلابېلو برخو کې دغه چاودنې، د طالبانو پر رنجر موټرو د سړک غاړې ماینونو له کبله شوي دي.

سرچینه وايي، په چاودنو کې درې ملکیان وژل شوي او په ټپیانو کې طالبان هم شامل دي.

په ننګرهار کې د طالبانو ادارې په دې اړه رسنیو ته څه نه دي ویلي او د دغو پېښو مسوولیت هم چا نه دی منلی.

بل خوا نن د کابل په دیارلسمه حوزه کې د یوه مقناطیسي ماین په چاودنه کې لږ تر لږه دوه کسان ټپیان شول. د حملې هدف نه دی روښانه.

طالبانو چې څه باندې میاشت مخکې پر افغانستان ولکه ټینګه کړه، د دغو چاودنو په اړه چې چا یې لا مسوولیت نه دی منلی رسماً څه نه دي ویلي.

د داعش ډلې خراسان څانګه چې د طالبانو دښمنه ډله ګڼل کېږي، د افغانستان په ځینو برخو کې فعاله ده.

د بښنې نړیوال سازمان د امریکا یو بیان 'لومړی مثبت ګام" وباله

د کابل هوايي ډګر کې شوې چاودنه

وروسته له هغې چې د امریکا متحدو ایالاتونو ومنله چې تېره میاشت په کابل کې د دوی د پوځ په یوه هوايي حمله کې لس ملکیان وژل شوي، د بښنې نړیوال سازمان د امریکا دغه بیان 'لومړی مثبت ګام" وباله.

په دغه سازمان کې د کړکېچ د چارو مخکښ سلاکار، براین کسټ­نر وویل، هغه کسان باید په یوه عادلانه محاکمه کې مجازات شي چې د دې پېښې مسوول دي.

د امریکا د پوځ د مرکزي قوماندانۍ قوماندان، جنرال کېنټ مککنزي د جمعې په ورځ وویل، د اګسټ پر ۲۹مه د کابل هوايي ډګر ته نږدې د امریکا د پوځ د بې پېلوټه الوتکې حمله یوه تېروتنه وه: "تر لسو پورې ملکیان چې په کې اووه تنه ماشومان هم شامل وو، په هغه تراژیک برید کې ووژل شول. سربېره پردې موږ ته اوس جوته شوه چې دا لېرې خبره ده چې موټر او هغه کسان چې وژل شوي له داعش خراسان څانګې سره کومه تړاو لرلی وي یا یې امریکا ته مستقیم ګواښ پېښ کړی وي. زه د وژل شوېو کسانو کورنۍ او دوستانو ته د خپلې ژورې خواخوږۍ مراتب وړاندې کوم."

راپورونه وايي وژل شوي کسان، د یوې کورنۍ غړي وو.

تر دې هوايي حملې مخکې د اګسټ پر ۲۶ مه، د کابل له هوايي ډګره دباندې په یوه ځانمرګي برید کې تر ۱۷۰ زیات ملکي افغانان او ۱۳ امريکايي پوځیان ووژل شول چې د هغې حملې مسوولیت د داعش ډلې خراسان څانګې منلی و.

ایران: افغانستان سره پر پوله د داعش ظهور ته اجازه نه ورکوو

د ایران ولسمشر ابراهیم رییسي

د ایران ولسمشر وايي، هېواد یې له افغانستان سره پر پوله د داعش ډلې ظهور ته اجازه نه ورکوي.

ابراهیم رئیسي دا خبرداری نن شنبه تاجکستان ته د خپل سفر په پای کې د خبرو پر مهال ورکړ: "په افغانستان کې د داعش حضور نه یوازې افغانستان، بلکې سیمې ته هم خطرناک دی. موږ په هېڅ ډول نه شو منلی چې تروریستي جریان او داعش زموږ د پولې په اوږدو کې ځای پرځای شي، نورو هېوادونو، سیمې یا هم افغانستان ته ضربه ورکړي."

له افغانستانه د امریکايي ځواکونو تر وتلو وروسته، طالبانو څه باندې میاشت مخکې پر کابل هم ولکه ټینګه کړه.

ایران چې له افغانستان سره شااو خوا ۹۰۰ کیلومتره اوږده پوله لري، لا د طالبانو حکومت په رسمیت نه دی پېژندلی.

د مالیې وزارت: ټولو دولتي کارکوونکو ته معاشونه ورکول کېږي

د افغانستان مالیې وزارت

د افغانستان د ماليې وزارت په يوې اعلاميه کې ټولو دولتي کار کوونکو ته ډاډ ورکړی چې مياشتنی معاش به يې په منظم ډول ورکول کېږي.

د دې وزارت له لوري په خپره شوې خبرپاڼه کې ويل شوي چې د دولتي کارکوونکو د معاشاتو د اجراء په پروسه کې چې ځينې تخنيکې ستونزې رامنځته شوې وې، د دې وزارت په پوره هڅو سره د له منځه تلو په حال کې دي.

د ياد وزارت په خبرپاڼه کې راغلي چې په دې برخه کې د اړوند ادارو سره په جدي ډول د دې مسالې د ژر حل کېدو په تړاو هڅې روانې دي.

نوموړي وزارت ټول دولتي کار کوونکو ته ډاډ ورکړی چې خپلو دندو ته دې په ورځني ډول حاضره اوسي.

د کرنې وزارت او خوړو نړیوال پروګرام له ۲۵۰ کورنیو سره مرسته کوي

ارشیف

د کرنې، اوبو لګونې او مالدارۍ وزارت د خوړو نړيوال پروګرام «WFP» سره په همغږۍ له ۲۵۰ بې وزله کورنيو سره مرسته کوي.

د افغانستان د کرنې، اوبو لګونې او مالدارۍ وزارت په خپل فيسبوک پاڼه کې ليکلي چې د پروان او کاپيسا ولايتونو په يو شمېر ولسواليو کې به پر ۲۵۰ بې وزله کورنيو چې بزګران او اړمنې کورنۍ دي اصلاح شوي تخمونه، د شېدو اوزې او د هګيو چرګان ووېشي.

د دې وزارت له قوله ويل شوي چې دغه مرستې به د روانې میاشتې په لړ کې اړمنو کورنيو ته ورسېږي.

د ياد وزارت د معلوماتو له مخې، دا د بزګرانو له اړمنو کورنيو سره د دې مرستو د بهېر پيل دی او دغه چاره به په راتلونکي کې هم دوام ولري.

قطر ته له کابله ۱۷۰ کسان په چارتر الوتکه کې ورسېدل

د قطر الوتکه

د قطري چارواکو په وینا له کابله ۱۷۰کسان پرون په چارتر الوتکه کې قطر ته ورسېدل.

د رویټرز اژانس د راپور له مخې په دوی کې د یو شمېر افغانانو ترڅنګ د متحد ایالاتونو، بلجیم، بریتانیا، کروایشیا، جرمني، هالنډ او ایټالیا اتباع شامل دي.

د امریکا حکومت د اګسټ په وروستیو دوو اونیو کې شااوخوا یو سل او څلوېښت زره کسان له افغانستانه وایستل او بیا یې دا ماموریت داګسټ په ۳۱مه پای ته ورساوه.

له دې نېټې را وروسته دا درېیمه چارتر الوتکه ده چې له افغانستانه خلک بهر ته وړي.

قطر له طالبانو سره دا موافقه کړې ده چې د هغو کسانو د تګ مخه به نه نیسي چې قانوني اسناد لري او غواړي چې له افغانستانه ووځي.

طالبانو د ښځو وزارت پر 'امربالمعروف او نهی عن المنکر' بدل کړ

د ښځو چارو پخوانی وزارت

د طالبانو حکومت د ښځو چارو وزارت د دعوت، ارشاد او امر بالمعروف او نهی عن المنکر په وزارت بدل کړ.

رویټرز اژانس خبر ورکړ چې په کابل کې د ښځو چارو د وزارت پر ودانۍ د دعوت، ارشاد او امر بالمعروف او نهي عن المنکر وزارت لوحه نصب شوې ده.

بل لورته د طالبانو د پوهنې وزارت په یوه خبرپاڼه کې له هلکانو غوښتي دي چې سر له نننه ښوونځيو ته ولاړ شي.

په دې خبرپاڼه کې ښوونځيو ته د نجونو د تګ خبره نه ده یاده شوې او دا نه ده څرګنده چې نجونې به کله ښوونځيو ته ځي؟

د نوېیمې میلادي لسیزې په دوهمه نیمایي کې د طالبانو د تیرې واکمنۍ پر مهال نجونو د زده کړو اجازه نه لرله.

طالبانو څه باندې یوه میاشت مخکې کابل ونیو، دوی ویلي دي چې د اسلامي شریعت په چوکاټ کې د ښځو او نجونو حقونو ته درناوی کوي.

ملګري ملتونه: طالبان دې پراخ بنسټه حکومت جوړ کړي

طالبان

د ملګرو ملتونو امنیت شورا په خپل پرېکړه لېک کې له طالبانو وغوښتل چې پراخ بنسټه حکومت جوړ کړي.

داسې حکومت چې په کې د ښځو بشپړ، مساوي او معنی داره ګډون خوندي شوی وي او بشري حقونه تر پښو لاندې شوې نه وي.

امنیت شورا دا پرېکړه لېک پرون په غوڅ اکثریت تصویب کړ او په کې یې په افغانستان کې د ملګرو ملتونو سیاسي ماموریت، یوناما د شپږو نورو میاشتو په مخه تمدید کړ.

د امنیت شورا پنځلس غړیو په دې ډول طالبانو ته دا ښکاره پیغام ورکړ چې د دوی کارونه به له نژدې څاري.

جنرال مککنزي کابل کې د لسو ملکیانو د وژنې په خاطر بښنه وغوښته

د امریکا د پوځ د مرکزي قوماندانۍ مشر جنرال کېنېټ مککنزي

د امریکا د پوځ د مرکزي قوماندانۍ مشر جنرال کېنېټ مککنزي په کابل کې د لسو ملکیانو د وژنې په خاطر بښنه وغوښته.

جنرال مککنزي بېګا په یوه ټلوېزیوني پيغام کې تایید کړه چې د امریکا له خوا د اګسټ په ۲۹مه نېټه په کابل کې په یوه برید سره لس ملکیان وژل شوي: "تر لسو پورې ملکیان چې په کې اوه تنه ماشومان هم شامل وو، په هغه تراژیک برید کې ووژل شول. سربېره پردې موږ ته اوس جوته شوه چې دا لرې خبره ده چې موټر او هغه کسان چې وژل شوي له داعش خراسان څانګې سره کومه تړاو لرلی وي یا یې امریکا ته مستقیم ګواښ پېښ کړی وي. زه د وژل شوېو کسانو کورنۍ او دوستانو ته د خپلې ژورې خواخوږۍ مراتب وړاندې کوم."

د امریکا له خوا د ډرون یا بې پيلوټه الوتکې په برید سره د یوې کورنۍ دا لس غړي د کابل هوايي ډګر ته نږدې وژل شوي وو.

دا هغه ورځې وې چې امریکا له افغانستانه د خلکو په ایستلو بوخته وه او تر څنګ یې دا ګواښ هم کړی و چې د داعش له خوا د ترهګریزو بریدونو سخت ګواښ موجود دی او د دغو ګواښونو د ځوابولو لپاره په سیمه کې د امریکا پوځيان پوره چمتووالی لري.

د هند صدراعظم: د افغانستان تحولاتو د سیمې ننګونې لا را برسېرې کړې

د هند صدراعظم نارېندر مودي د شانګهای سازمان په سرمشریزه کې

د هند صدراعظم نارېندر مودي وايي، د افغانستان وروستیو تحولاتو د امنیت او سولې په څېر د سیمې لویې ننګونې لا را برسېرې کړې.

مودي دا خبرې پرون جمعه (د وږي ۲۶مه) د شانګهای سازمان په سرمشریزه کې چې د تاجکستان پلازمېنه دوشنبه کې جوړه شوې وه وکړې.

مودي زیاته کړه: "زه باور لرم چي د دې سیمې لویې ننګونې له سولې، امنیت او د باور په کموالي تړلي دي. لوی علت یې هم د تُندلارۍ زیاتېدل دي. د افغانستان وروستیو تحولاتو دا ننګونې لا را واضحې کړې. شانګهای سازمان باید په دې موضوع د یوه لومړیتوب په څېر کار وکړي."

د هند د ګاونډ پاکستان صدراعظم عمران خان بیا د شانګهای په غونډه کې له ټولو ګډونوالو وغوښتل چې په دې حساسو شرایطو کې له افغانستان سره ودریږي.

د شانګهای سازمان سرمشریزه د دوشنبې د اعلامیې په تصویب پای ته ورسېده چې په کې ګډونوالو هېوادونو له ترهګرۍ، تُندلارۍ، او مخدره موادو سره په مبارزې او د امنیتي همکاریو په دوام ټینګار وشو.

د راپورونو له مخې د شانګهای سازمان دې دور سرمشریزه کې د افغانستان په اړه واحد نظر نه دی ورکړل شوی.

شېرمحمد: ارزګان کې یو پخوانی امنیتي منسوب وژل شوی

د ارزګان ولایت

په ارزګان ولایت کې یو پخوانی امنیتي منسوب وژل شوی او یو بل پخوانی قوماندان ټپي دی.

د وژل شوي او ټپي د کورنۍ غړو ازادي راډیو ته وویل چې طالبانو تېره شپه دا کسان هدف ګرځولي.

د ټپي شاولي قوماندان د کورنۍ نږدې غړي شېرمحمد ازادي راډیو ته وویل: "دواړه د پوستي قوماندانان وو، طالبان وايي، موږ عمومي عفوه کړې دا څنګه عفوه ده؟ دوی تېره شپه د کوره راوتل طالبانو برید پرې کړی او یو چې شاولي نومېږي، زما ماما دی ټپي دی او بل نعمت الله نومېږي وژل شوی دی."

پر ارزګان ولایت واکمن طالب مشران په دې اړه نا خبري ښيي.

خو په دې ولایت کې یوې باوري سرچینې ازادي راډیو ته تایید کړې چې نامعلومو وسله والو تېره شپه د نعمت الله او شاولي په نوم په دوو پخوانیو قوماندانانو برید کړی.

د سرچینې په خبره شاولي وژل شوی او نعمت الله چې ټپی دی دمګړی کندهار ته د درملنې لپاره انتقال شوی.

د هالنډ دفاع وزیرې د ځینو افغانانو په تړاو استعفی ورکړه

د هالنډ دفاع وزیره انک بیجلولد

د هالنډ دفاع وزیرې هم له افغانستانه د خلکو د را ایستلو په تړاو د پڅ کار په خاطر استعفی ورکړه.

انک بیجلولد پرون د جمعې (د وږي ۲۶مه) په ورځ وویل چې د بهرنیو چارو د وزیرې سیګرید کاګ په څېر د افغان پناه غوښتونکو د تخلیې د چلند په تړاو له خپلې دندې استعفی ورکوي.

د هالنډ د پارلمان اکثره غړي د دغه هېواد د بهرنیو چارو او دفاع وزیران د زرګونو هغو افغانانو په را ایستلو کې په پڅ عمل تورنوي چې د هالنډ د پناه په شرایطو برابر ګڼل کېدل.

د هالنډ دفاع وزیرې انک بیجلولد غوښتل خپل ماموریت پای ته ورسوي او هغه افغانان خوندي کړي چې په هالنډ حساب کوي خو دا چې اوس د ده موقعیت تر بحث لاندې راغلی نه غواړي د نورو خلکو د کار مخه ونیسي.

تر دې یوه ورځ مخکې د هالنډ د بهرنیو چارو وزیرې سیګرید کاګ استعفی کړې وه.

په بریټانیا کې هم د بهرنیو چارو وزیر ډومنیک راب په دې خاطر عدلیې وزارت ته تبدیله شو چې له افغانستانه د خلکو د رایستلو د مودې پرمهال په رخصتیو یونان ته تللی و او د خلکو د را ایستلو په تړاو هڅو یې چندان نتیجه نه وه ورکړې.

ملګري ملتونه: غلام اسحق زی دې خپلې دندې ته دوام ورکړي

د افغانستان د پخواني حکومت استازی غلام اسحق زی

ملګري ملتونه وایي چې په دې سازمان کې د افغانستان د پخواني حکومت استازي غلام اسحق زي غوښتنه کړې چې خپلې دندې ته دوام ورکړي.

د ملګرو ملتونو ویاند فرهان حق وویل چې اسحق زي د ملګرو ملتونو عمومي منشي انتونیو ګوتیرېش ته یو لیک لاسلیک کړی چې په هغه کې د ملګرو ملتونو په عمومي اسامبلۍ کې د افغانستان د پلاوي نومونه شامل دي.

د رویټرز خبري اژانس د راپور له مخې دا نه ده څرګنده چې ایا طالبان به چې د اګسټ په ۱۵مه نېټه په کابل کې واک ته رسیدلي، له خپله اړخه ملګرو ملتونو ته خپل پلاوی واستوي او که نه؟

ټاکل شوې چې د ملګرو ملتونو د عمومي اسامبلۍ غونډې راتلونکې اوونۍ د سېپټمبر په ۲۱مه نېټه پیل شي او د نړۍ په لسګونو مشران به په حضوري ډول په کې ګډون وکړي.

ټاکل شوې چې ښاغلی اسحق زی د سېپټمبر په ۲۷مه نېټه دې اسامبلۍ ته وینا وکړي.

پوهنې وزارت: ټول منځي ښوونځي، لېسې او رسمي مدرسې سبا پیلېږي

کابل کې یو ښوونځی

د افغانستان د پوهنې وزارت وایي، د نارینه وو ټول منځي ښوونځي، لېسې او رسمي مدرسې به سبا شنبې بېرته پیل شي.

د طالبانو د حکومت د پوهنې وزارت نن په دې اړه په یوه خبرتیا کې ویلي چې تر دې مخکې تر شپږم ټولګي پورې د زده کړې د بهیر پیل ته اجازه ورکړل شوې وه، خو اوس له ټولو زده کوونکو او ښوونکو غواړي چې سبا شنبې بېرته تعلیمو موسسو ته حاضر شي.

د پوهنې وزارت نه دي ویلي چې د نجونو زده کوونکو زده کړې به کله پیلېږي.

طالب چارواکو ژمنه کړې چې نجونو او ښځو ته به اجازه ورکړي چې د اسلامي اصولو په رڼا کې زده کړې وکړي او کارونه مخ ته یوسي.

د افغانستان د ښوونځیو نژدې نیمایي زده کوونکي یې نجونې دي چې په تېرو شلو کلونو کې له امنیتي او یو لړ ټولنیزو ستونزو پرته پر ښاري سیمو سربېره په ډېرو لېرې پرتو سیمو کې هم ورته د زده کړې امکانات برابر شوي او په میلیونونو یې له دولسمو ټولګیو فارغې شوي دي.

نور راوښيه

XS
SM
MD
LG