د لاسرسۍ وړ لېنکونه

تازه خبر
جمعه ۲ تله ۱۴۰۰ کابل ۰۳:۴۴

افغانستان

چارواکي: هرات ته مرستندویه ځواکونه راورسیدل

آرشیف، افغان ځواکونه

افغان حکومت د هرات د دفاع لپاره هلته مرستندوی ځواکونه استولي.

دا ځواکونه داسې مهال استول کېږي چې افغان ځواکونو او طالبانو پرون او نن هرات ښار ته نژدې جګړو ته دوام ورکړ.

د هرات د والي ویاند جېلاني فرهاد نن شنبه (د زمري ۱۰مه) ازادي راډیو ته وویل، د طالبانو د حملو د شنډولو لپاره پر عملیاتي پلان کار روان دی: "په هرات کې کافي ځواکونه شته. نن ځانګړي ځواکونه هم را ورسېدل. اوس مهال د هرات په ولسوالیو کې دښمن د ځپلو لپاره د عملیاتو د ترسره کولو په هدف د پلان جوړول پیل شوي دي."

د راپورونو له مخې د جمعې په ورځ طالبانو د هرات ښار تر لمنو پرمختګ وکړ، خو امنیتي ځواکونه وتوانېدل چې شاتګ ته یې اړ باسي.

د طالبانو ویاند ذبیح الله مجاهد ازادي راډیو ته وویل، طالبانو پرونۍ حملې د دولتي ځواکونو د هغو بریدونو په ځواب کې وکړې چې د طالبانو پر ساحو یې کړې وې.

له بلې خوا دفاع وزارت هلمند ولایت ته هم د ځانګړو ځواکونو د استولو خبر ورکوي.

طالبانو په تېرو څو ورځو کې د هلمند پر مرکز لښکرګاه هم حملو ته زور ورکړی چې په نتیجه کې یې لسګونه کورنۍ بې ځایه شوي دي.

په همدې حال کې د کورنیو چارو وزارت پر هرات، کندهار او لښکرګاه ښارونو د وسله والو طالبانو له درنو حملو وروسته، په کابل کې د پولیسو د درېیو احتیاطي عملیاتي کنډکونو د جوړېدو خبر ورکوي.

د ورځې تازه خبرونه دلته ولولئ

د تاجکستان ولسمشر: طالبان دې یو ټول‌شموله حکومت جوړ کړي

د تاجکستان ولسمشر امام علي رحمن

د تاجکستان ولسمشر امام علي رحمن پر طالبانو غږ وکړ چې یو ټول‌شموله حکومت جوړ کړي چې ټولې سیاسي ډلې او قومونه په‌کې ګډون ولري.

ښاغلي رحمن دغه څرګندونې پرون پنجشنبه د ملګرو ملتونو عمومي اسامبلۍ ته له مخکې په یوه ثبت شوې وینا کې کړي او ویلي یې دي چې دا ډول یو حکومت به په دغه جګړه‌ځپلي هېواد کې کړکېچونه کم کړي.

ښاغلي رحمن په افغانستان کې د وروستیو پېښو په اړه خپلې اندېښنې بیا مطرح کړې او هغه‌یې د سیمې سولې او ثبات ته یو جدي ګواښ بللی.

طالبانو د تېرې اګسټ میاشتې په ۱۵مه کابل ونیو چې ورسره د مرکزي اسیا یو شمېر هېوادونو اندېښنې څرګندې کړي چې ښایي د افغانستان له خاورې یې هېوادونو ته امنیتي ګواښونه متوجې نه‌شي.

دغو هېوادونو همداراز اندېښنه څرګنده کړې چې ښایي په لسګونه زره افغان کډوال پرې ورمات شي، خو طالبانو نړیوالې ټولنې ته ډاډ ورکړی چې له افغانستانه به نورو هېوادونو ته ګواښ متوجې نه‌شي.

پر طالبانو د یوه ټول‌شموله حکومت د جوړولو فشارونه وروسته تر دې زیات شوي چې د نوې اعلان شوې کابینې غړي یې ټول نارینه او اکثره‌یې هغه سخت‌دریځي دي چې ډېر وخت‌یې په جګړو کې تېر شوی.

کونړ کې د هاوان د یوې مرمۍ چاودنې درې ماشومان وژلي او درې نور ټپيان دي

د اسعداباد روغتون

د کونړ په شلتن ولسوالۍ کې د هاوان د یوې مرمۍ د چاودنې په پېښه کې د درې ماشومانو د وژل کېدو او درې نورو د ټپي کېدو خبر ورکړل شوی.

د کونړ سیمه‌ییزو چارواکو تر اوسه د دې پېښې په اړه څه نه‌دي ویلي، خو د اسعداباد روغتون مسؤلینو دې روغتون ته د درې ټپیانو د وروړلو خبره تأیید کړې او د یوه ټپي وضعیت‌یې خطرناک ښودلی.

د شلتن ولسوالۍ یوه اوسېدونکي شوکت‌الله ماموند ازادي رادیو ته د دې پېښې د څرنګوالي په اړه وویل: "نن سهار د کونړ سیند پر غاړه ماشومانو د هاوان یوه نا چاودې مرمۍ چې د مخالفینو له‌خوا که د پخواني حکومت له وخته پاتې وه، پیدا کړې او پرې لوبې یې کولې چې پرې چاودېدلې. درې ماشومان‌یې شهیدان کړي او درې نور یې ټپیان کړي دي."

د افغانستان په اکثرو سیمو کې خښ شوي ماینونه او نورې ناچاودې وسیلې تر اوسه د افغانانو ژوند اخلي چې ډېری قربانیان‌یې هم ماشومان دي.

راپورونه: مسکو د طالبانو له حکومت سره د یوه طالب پلاوي پر ورتګ خبرې کوي

د ۲۰۱۹ کال مې میاشت کې مسکو ته د طالبانو د یو لوړپوړي پلاوي سفر

د راپورونو له مخې مسکو په کابل کې د طالبانو له حکومت سره پر دې خبرې کوي چې که یو پلاوی یې له مسکو څخه کتنه ترسره کړي.

د روېټرز خبري اژانس د راپور له مخې دا خبره د روسیې ریا نیوز خبري اژانس د روسیې د بهرنیو چارو وزارت د سرچینو له قوله نن جمعه ورکړی دی.

ریا اژانس دغه‌راز د طالبانو د اطلاعاتو او فرهنګ د مرستیال وزیر او ویاند ذبیح‌الله مجاهد هغه خبره هم را اخیستې چې ویلي یې دي، د طالبانو حکومت د دغسې ارتباطاتو په لټه کې دی.

د تېرې اګسټ میاشتې له ۱۵مې راهیسې چې طالبانو کابل نیولی او وروسته‌یې نوی سرپرست حکومت اعلان کړی تر اوسه هېڅ یوه هېواد هغه په رسمیت نه‌دی پېژندلی.

که مسکو ته د طالبانو د حکومت د پلاوي د تګ موضوع رسماً تأیید شي، دا به له کله چې طالبان پر افغانستان واکمن شوي، یوه بهرني هېواد ته د طالبانو د حکومت د پلاوي لومړنی سفر وي.

تر دې مخکې د طالبانو د قطر دفتر پلاویو څو ځلې له مسکو څخه کتنه ترسره کړې وه.

هنګري وایي نور افغانان په خپله خاوره کې نه‌شي منلی

د هنګري د بهرنیو چارو وزیر پتر زایجرتو

د هنګري د بهرنیو چارو وزیر پتر زایجرتو «Peter Szijjarto» وایي، هېواد یې نور افغانان په خپله خاوره کې نه‌شي منلی.

نوموړي د روسیې له تاس خبري اژانس سره په مرکه کې وویل چې اروپایي ټولنه باید هغه د ۲۰۱۵ کال تجربه چې د ده په وینا د دې ټولنې له جنوبي پولو سره سوریایان راټول شوي و او اوس‌یې ځای افغانانو نیولی، تکرار نه‌شي.

د هنګري د بهرنیو چارو وزیر دغه‌راز وویل چې ټول هغه افغانان‌یې چې په افغانستان کې یې له هنګري ځواکونو سره همکاري کړې وه، له دې هېواده ایستلي او خپل مسؤلیت‌یې پر ځای کړی دی.

ښاغلي زایجرتو ونه‌ویل چې هنګري څومره افغانان تېره میاشت چې طالبانو کابل ونیو له افغانستانه ایستلي، خو امریکایي ځواکونو او متحدانو یې د اګسټ تر۳۱مې پورې په دوو اوونیو کې له ۱۲۷ زرو زیات کسان چې په‌کې د لوېدیځو هېوادونو اتباع او هغه افغانان چې د دغو هېوادونو له ځواکونو یا نورو ادارو سره همکاري کړې وه، د کابل له نړیوال هوایي ډګره په پوځي الوتنو کې وایستل.

د خوست سیمه‌ییز چارواکي: د غلام خان بندر له لارې سوداګري زیاته شوې

غلام خان بندر کې له توکو ډکې لارۍ

د خوست سیمه‌ییز چارواکي د غلام خان بندر له لارې د سوداګرۍ د زیاتوالي خبر ورکوي.

د غلام خان د ګمرک رئیس مولوي موسی کلیم مجاهد زاده ازادي راډیو ته وویل چې پر دې لارې سوداګري ځکه زیاته شوې چې په لارو کې د قاچاق او د سوداګرو د بې‌ځایه ځورولو مخه نیول شوې ده.

د نوموړي په وینا پر دې لاره واردات د پخواني نظام په پرتله درې چنده زیات شوي او هره ورځ له ۱۳۰ لاریو نیولې تر ۱۵۰ پورې په دې لاره تګ او راتګ کوي، خو د لاریو او لویو ګاډو افغان چلوونکي وايي، پاکستان باید د دوی موټرو ته هم اجازه ورکړي چې د دې هېواد د خاورې دننه تګ راتګ وکړي ځکه دغه اجازه د پاکستان موټرو ته ورکړل شوې چې تر کابل پورې توکي لېږدوي.

د لارۍ چلوونکی ګلام خان وايي: "د اسلامي امارت نه موږ دا غواړو چې پاکستانۍ لارۍ راځي او په کابل کې خالي کېږي، خو افغانۍ لارې په بانډرۍ اخوا نه‌ورپرېږدي، دوهمه غوښتنه مو دا ده چې هر هېواد سره تجارت خلاص کړي."

د خوست غلام خان بندر کراچۍ ته تر نورو لارو شااوخوا ۴۰۰ کیلومتره نږدې پروت دی او په تېرو ۲۰ کلونو کې يې د خوستوالو له‌خوا په پرله‌پسې توګه د ترانزیټ کېدو غوښتنه شوې، خو تر اوسه هم د دې بندر د ترانزیټ کېدو ټول قانوني پړاوونه نه‌دي بشپړ شوي.

پوهنې وزارت: د ښځینه ښوونځیو د تعلیمي لړۍ د پيل په اړه لا پرېکړه نه‌ده شوې

ارشیف، ارزګان کې د نجونو یو ښوونځی

د طالبانو حکومت د پوهنې وزارت وايي لا یې د ښځینه ښوونځیو د تعلیمي لړۍ د پيل په اړه پرېکړه نه‌ده کړې.

د دغه وزارت په فېس‌بوک پاڼه نن په یوه اعلامیه کې هغه کسان مخرب او متعصب بلل شوي چې ویلي یې دي د نجونو ښوونځي بېرته پیلېږي.

په اعلامیه کې راغلي چې د نجونو د ښوونځیو د بیا پرانیستې په اړه په یوه طرحه کار روان دی او پایلې یې وروسته له خلکو سره شریکېږي.

د طالبانو حکومت د همدې اوونۍ په سر کې د هلکانو ښوونځي پرانیستل، خو له شپږم ټولګي پورته د نجونو ښوونځي لا نه‌دي پيل شوي.

د دوی ویاندویانو له هغې ډلې ذبیح‌الله مجاهد ویلي و چې ژر به د نجونو ښوونځي پيل شي هغه خبره چې دا دی یوه اوونۍ پرې ووته او د شااوخوا څلورو ملیونو نجونو د زده‌کړو بهیر ورسره ځنډېدلی.

د امریکا پوځي چارواکي د افغان حکومت د پرځېدو په اړه د سنا جرګې پوښتنې ځوابوي

د امریکا دفاع وزیر لوېډ استېن او لوی درستیز مارک میلي

ټاکل شوې ده چې د امریکا دفاع وزیر او لوی درستیز راتلونکې اوونۍ د افغانستان د حکومت د پرځېدو په اړه د سنا جرګې استماعیه غونډې ته حاضر شي.

د فاکس نیوز د راپور له مخې، دفاع وزیر لوېډ استېن او لوی درستیز مارک میلي به د افغانستان د حکومت د پرځېدو او له افغانستانه د تخلیې په عملیاتو کې د ستونزو په اړه د سناتورانو پوښتنو ته په غیر علني غونډه کې ځواب ووايي.

تر دې وړاندې هم د امریکا پوځي چارواکي د سنا او استازو جرګو ته د افغانستان په اړه پوښتنو ته بلل شوي وو.

مسکو: د طالبانو حکومت په رسمیت پېژندنه د شانګهای سازمان اجنډا کې شامله نه‌ده

د شانګهای د همکارۍ سازمان غونډه کې د روسیې ولسمشر ولادیمیر پوتین په انلاین بڼه ګډون

د شانګهای د همکارۍ سازمان لپاره د روسیې استازی وايي، د طالبانو د حکومت په رسمیت پېژندنه د دې سازمان په اجنډا کې شامله نه‌ده، خو له دغه ځواک سره چې اوس په افغانستان کې واک په لاس کې لري، تماسونه نیسي.

د تاس خبري اژانس د راپور له مخې، د شانګهای همکارۍ سازمان لپاره د روسیې استازي بختیار حکیموف پرون (پنجشنبه) په یوه انلاین کنفرانس کې وویل: "طالبان په روسیه کې د یوه ترورېستي تحریک په توګه غیر قانوني دي، خو اوس دا یو حقیقت دی چې د طالبانو تحریک واک په لاس کې لري. نوی موقت حکومت‌یې جوړ کړی. په اوس وخت کې په اجنډا کې د دوی د رسمیت پېژندلو مسئله نه‌ده مطرح، خو له هغو کسانو سره چې واک ته رسېدلي دي، د دې لپاره چې هغوی په رغنده دیالوګ کې شامل شي، تماسونه نیول کېږي."

ده دا هم وویل چې د شانګهای د همکارۍ سازمان له افغانستان سره د اقتصادي رغونې او په سیمه‌ییزې همکارۍ کې د ګډون لپاره ملګرتیا ته تیار دی.

لندن د نورو افغان ترجمانانو په اړه د معلوماتو له افشا کېدو بخښنه وغوښته

ارشیف، د افغانستان هلمند ولایت کې یو شمېر بریتانیايي ځواکونه

د بریتانیا دفاع وزارت یو وار بیا په دې بخښنه وغوښته چې د نورو افغان ترجمانانو په اړه معلومات ورڅخه افشا شوي دي.

د بریتانیايي رسنیو د راپور له مخې، وړمه شپه د ۵۵ نورو افغانانو چې ویل کېږي د هغو کسانو په لېست کې شامل دي چې باید بریتانیا ته ولېږدول شي، معلومات څرګند شوي دي.

تر دې وړاندې د ۲۵۰ افغان ترجمانانو معلومات په ورته ډول افشا شوي وو.

د دغو کسانو په اړه معلومات یوازې هغو کسانو ته سهواً استول شوي چې د بریتانیا له پوځ سره‌یې د ترجمانانو په توګه کار کړی دی.

هند کې د ۳،۰۰۰ کیلوګرامه هیروئینو د قاچاق په تړاو دوه افغانان هم ونیول شول 

ارشیف، هندي ځواکونه

وروسته له دې چې د هند د ګوجرات ایالت په بندر کې دغه هېواد ته د هیروئینو تر ټولو د سترې جوپې قاچاق کشف شو، هندي چارواکي وايي چې دوه تنه افغانان‌یې هم په دې تړاو نیولي دي.

د هند د ګوجرات ایالت د عوایدو او ګمرکونو د ادارې رئيس د سې شنبې په ورځ (سنبله ۳۰) وویل چې ۳ زره کیلو هیروئین‌یې چې ارزښت‌یې ۲ میلیارده او ۷۰۰ ملیون ډالرو ته رسېږي او له افغانستان څخه د ایران د بندر عباس له لارې د ګوجرات موندرا بندر ته وروړل شوي وو، کشف کړي او په دې تړاو یې دوه هندیان نیولي دي.

هندي چارواکي اوس وايي چې دوه تنه افغانان‌یې هم د قضیې په تور نیولي او یو بل افغانستان ته تښتېدلی دی.

د هندي چارواکو په وینا، دا تر ټولو ډېر هیروئین دي چې په یو وار دغه هېواد ته قاچاق کېدل.

د طالبانو یو مؤسس: بیا به د لاس پرې کولو او اعدامونو په شان جزاوې عملي کړو

ارشیف، د طالبانو په تېره دوره کې په غازي ستدیوم کې د غلا په تور د یوه نیول شوي کس د لاس پرې کولو ته راټول شوي کسان

د طالبانو د تحریک د تېر حکومت د عدلیې وزیر او د دې ډلې یو مؤسس وايي چې بیا به د لاس پرې کولو او اعدامونو په شان سختې جزاوې عملي کړي.

ملا نورالدین ترابي له اسوشیټډ پرس خبري اژانس سره په مرکه کې د طالبانو له لوري په تېره دوره کې پر اعدامونو انتقادونه رد کړل.

طالبانو د خپل حکومت په تېره دوره یعنې له ۱۹۹۶ څخه تر ۲۰۰۱ پورې عموماً په لوبغالي کې د زرګونه خلکو په مخکې اعدامونه کول، خو ترابي وايي چې ښايي دا ځل مجرمانو ته د خلکو په مخکې سزا ورنه‌کړل شي.

ده په عین حال کې وویل، هر چا په لوبغالي کې زموږ له لوري په سزا ورکولو اعتراض کاوه، خو موږ هېڅکله د نورو د قوانینو او سزاوو په اړه څه ونه‌ویل، نور هم باید زموږ د قوانینو په اړه څه ونه‌وايي.

د قرغزستان د ولسمشر امنیتي مرستیال او څو نور چارواکي کابل ته تللي

د قرغزستان د ولسمشر امنیتي مرستیال طلعت بېګ او د بهرنۍ پالېسۍ مشر ژین بېګ د طالبانو د بهرنیو چارو له سرپرست وزیر امیر خان متقي سره د لیدو پر مهال.

د قرغزستان د ولسمشر امنیتي مرستیال طلعت بېګ او څو نور چارواکي نن کابل ته تللي دي.

د طالبانو د حکومت ویاند ذبیح‌الله مجاهد په خپل ټویټر باندې دا خبره کړې ده.

د مجاهد د ټویټر له مخې د قرغزستان د ولسمشر امنیتي مرستیال طلعت بېګ او د بهرنۍ پالېسۍ مشر ژین بېګ نن د طالبانو د بهرنیو چارو له سرپرست وزیر امیر خان متقي سره خبرې کړې دي.

متقي د قرغزستان له مرستو مننه کړې ده او په دوام‌يې ټینګار کړی دی.

د طالبانو ویاند زیاته کړې چې په دې لیدنه کې د هر اړخیزه اړیکو او دوامداره همکاریو ژمنې وشوې.

د منځنۍ اسیا هېوادونه په تېره بیا هغه چې له افغانستان سره ګډې پولې لري د طالبانو د واکمنېدو په اړه اندېښمن وو او ان‌یې د پولې په اوږدو کې د امنیتي ګواښونو د له‌منځه وړلو لپاره لسګونه زره اضافي عسکر ځای پر ځای کړل.

طالبانو بیا ویلي چې د دوی جنګیالي د منځنۍ اسیا هېوادونو ته ګواښ نه‌پېښوي، بلکې د دوی حکومت ښې اړیکې ورسره غواړي.

جرمني له افغانستان او ګاوڼدیو هېوادونو سره‌یې ۵۰۰ ملیونه یورو مرسته کوي

د جرمني د بهرنیو چارو وزیر هایکو ماس

د جرمني د بهرنیو چارو وزیر هایکو ماس ویلي چې په راتلونکو میاشتو کې افغانستان او د دغه هېواد ګاوڼدیانو سره ۵۰۰ ملیونه یورو مرسته کوي.

د جرمني د بهرنیو چارو وزارت د اعلامیې له مخې هایکو ماس دا خبره پرون د جي شل هېوادونو د بهرنیو چارو وزیرانو په غونډه کې وکړه.

تر اوسه پورې د هغو هېوادونو نومونه نه‌دي یاد شوي چې جرمني غواړي د افغانستان ترڅنګ له هغوی سره هم مرسته وکړي.

هایکو ماس ویلي اصلي لومړیتوب‌یې دا دی چې په افغانستان کې نوي راپیدا شوي بشري ناورین ته رسیدګي وشي.

د هغه په خبره دا ناورین د سیمې ټیکاو ته یو ګواښ دی.

د طالبانو لاس ته د کابل د لوېدو په تعقیب د افغانستان نږدې ۱۰ میلیارده ډالره پیسې په امریکا کې کنګل شوې چې ورسره د خلکو بې‌وزلي لا زیاته شوه.

اېف بي ای: ممکن افغانستان بیا د ترهګرو په امن ځاله بدل شي

د امریکا د فدرالي تحقیقاتو د ادارې مشر کریستوفر رې

د امریکا د فدرالي تحقیقاتو د ادارې اېف بي ای مشر کریستوفر رې ویلي، چارواکي اندېښمن دي چې له افغانستانه د امریکايي ځواکونو له راوتلو وروسته ممکن دا هېواد بیا د ترهګرو په امن ځاله بدل شي.

د اېف بي ای رییس دا خبره پرون د امریکا د استازیو جرګې د کورني امنیت د کمېټې په استماعیه غونډه کې وکړه.

هاخوا د جرمني د بهرنیو چارو وزیر هایکو ماس ویلي چې هېڅکله به افغانستان د ترهګرو په امن ځاله بدل نه شي.

د جرمني د بهرنیو چارو وزارت د اعلامیې له مخې هایکو ماس پرون د جي شل هېوادونو د بهرنیو چارو وزیرانو په غونډه کې دا څرګندونې کړي.

خو طالبانو ویلي چې هېڅ ډلې ته اجازه نه ورکوي څو د افغانستان له خاورې بل هېواد ته ګواښ پېښ کړي.

د امریکا فورټ مک کای ۹۷ سلنه افغان کډوالو ته واکسینونه لګول شوي

امریکا کې د کډوالو یو کمپ

د امریکا یوې لویې پوځي اډې فورټ مک کای خبر ورکړی چې هلته مېشتو شوېو ۹۷ فیصده افغان کډوالو ته واکسینونه لګول شوي دي.

فورټ مک کای کې چې په ویسکانسن کې موقعیت لري امریکا ته د تازه لېږدول شوېو افغان کډوالو له ډلې ۱۲۷۰۰ کسان په کې مېشت شوي دي.

د دې پوځي اډې چارواکو ویلي چې په ډله ییزه توګه یې افغان کډوال د کووېډ نولس، سرخکان/شري، چیچک او نورو څو ویروسو په وړاندې واکسین کړي دي.

په دومره لوی شمېر د افغان کډوالو د بشپړ واکسینولو خبر داسې وخت ورکول کېږي چې تازه امریکا ته د ستنو شوېو افغان کډوالو سره دغه هېواد ته د توبرکلوز/نري رنځ او ځینو نورو خطرناکه ناروغیو د انتقال اندېښنې هم زیاتې شوي دي.

متحده ایالاتونو له افغانستانه شااوخوا ۱۲۴ زره کسان واایستل او په کې اکثر هغه افغانان و چې پخوا یې له دوی سره کار کړی و.

دا کډوال په دننه امریکا او له دغه هېواد بهر په پوځي اډو کې مېشت شوي او دمګړۍ یې د ویزو او دایمي مېشتېدو پروسه روانه ده.

نور راوښيه

XS
SM
MD
LG