د لاسرسۍ وړ لېنکونه

تازه خبر
پنجشنبه ۱ تله ۱۴۰۰ کابل ۱۰:۵۳

افغانستان

یوناما په هرات ښار کې پر خپل دفتر برید غندلی

ارشیف

په افغانستان کې د ملګرو ملتونو مرستندوی ماموریت په هرات ښار کې پر خپل دفتر برید غندلی دی.

د هرات ښار په شااوخوا سیمو کې پرون جمعه(د زمري ۸مه) د طالبانو او دولتي ځواکونو ترمنځ درنې نښتې وشوې.

یوناما په یوه بیان کې چې تېر ماښام خپور شو ویلي چې په دې برید کې یو پولیس وژل شوی او یو شمېر نور پولیس افسران ټپیان شوي دي، خو د ملګرو ملتونو کار کوونکو ته زیان نه دی اوښتی.

یوناما وايي، د دولت ضد وسله والو مخالفینو د ملګرو ملتونو د دفتر دروازه په داسې حال کې په توغندي او مرمیو په نښه کړې ده چې د ملګروملتونو نښې او علامې په روښانه ډول پرې ښکاري.

د یوناما په بیان کې یادونه شوې چې د ملګرو ملتونو پر دفتر او ملکي کار کوونکو برید د نړیوال قانون پر اساس منع دی او کېدای شي چې جنګي جرم وبلل شي.

یوناما غوښتنه کړې چې د دې برید ترسره کوونکي باید وپېژندل شي او حساب کتاب ته راکاږل شي.

د ورځې تازه خبرونه دلته ولولئ

د قرغزستان د ولسمشر امنیتي مرستیال او څو نور چارواکي کابل ته تللي

د قرغزستان د ولسمشر امنیتي مرستیال طلعت بېګ او د بهرنۍ پالېسۍ مشر ژین بېګ د طالبانو د بهرنیو چارو له سرپرست وزیر امیر خان متقي سره د لیدو پر مهال.

د قرغزستان د ولسمشر امنیتي مرستیال طلعت بېګ او څو نور چارواکي نن کابل ته تللي دي.

د طالبانو د حکومت ویاند ذبیح‌الله مجاهد په خپل ټویټر باندې دا خبره کړې ده.

د مجاهد د ټویټر له مخې د قرغزستان د ولسمشر امنیتي مرستیال طلعت بېګ او د بهرنۍ پالېسۍ مشر ژین بېګ نن د طالبانو د بهرنیو چارو له سرپرست وزیر امیر خان متقي سره خبرې کړې دي.

متقي د قرغزستان له مرستو مننه کړې ده او په دوام‌يې ټینګار کړی دی.

د طالبانو ویاند زیاته کړې چې په دې لیدنه کې د هر اړخیزه اړیکو او دوامداره همکاریو ژمنې وشوې.

د منځنۍ اسیا هېوادونه په تېره بیا هغه چې له افغانستان سره ګډې پولې لري د طالبانو د واکمنېدو په اړه اندېښمن وو او ان‌یې د پولې په اوږدو کې د امنیتي ګواښونو د له‌منځه وړلو لپاره لسګونه زره اضافي عسکر ځای پر ځای کړل.

طالبانو بیا ویلي چې د دوی جنګیالي د منځنۍ اسیا هېوادونو ته ګواښ نه‌پېښوي، بلکې د دوی حکومت ښې اړیکې ورسره غواړي.

جرمني له افغانستان او ګاوڼدیو هېوادونو سره‌یې ۵۰۰ ملیونه یورو مرسته کوي

د جرمني د بهرنیو چارو وزیر هایکو ماس

د جرمني د بهرنیو چارو وزیر هایکو ماس ویلي چې په راتلونکو میاشتو کې افغانستان او د دغه هېواد ګاوڼدیانو سره ۵۰۰ ملیونه یورو مرسته کوي.

د جرمني د بهرنیو چارو وزارت د اعلامیې له مخې هایکو ماس دا خبره پرون د جي شل هېوادونو د بهرنیو چارو وزیرانو په غونډه کې وکړه.

تر اوسه پورې د هغو هېوادونو نومونه نه‌دي یاد شوي چې جرمني غواړي د افغانستان ترڅنګ له هغوی سره هم مرسته وکړي.

هایکو ماس ویلي اصلي لومړیتوب‌یې دا دی چې په افغانستان کې نوي راپیدا شوي بشري ناورین ته رسیدګي وشي.

د هغه په خبره دا ناورین د سیمې ټیکاو ته یو ګواښ دی.

د طالبانو لاس ته د کابل د لوېدو په تعقیب د افغانستان نږدې ۱۰ میلیارده ډالره پیسې په امریکا کې کنګل شوې چې ورسره د خلکو بې‌وزلي لا زیاته شوه.

اېف بي ای: ممکن افغانستان بیا د ترهګرو په امن ځاله بدل شي

د امریکا د فدرالي تحقیقاتو د ادارې مشر کریستوفر رې

د امریکا د فدرالي تحقیقاتو د ادارې اېف بي ای مشر کریستوفر رې ویلي، چارواکي اندېښمن دي چې له افغانستانه د امریکايي ځواکونو له راوتلو وروسته ممکن دا هېواد بیا د ترهګرو په امن ځاله بدل شي.

د اېف بي ای رییس دا خبره پرون د امریکا د استازیو جرګې د کورني امنیت د کمېټې په استماعیه غونډه کې وکړه.

هاخوا د جرمني د بهرنیو چارو وزیر هایکو ماس ویلي چې هېڅکله به افغانستان د ترهګرو په امن ځاله بدل نه شي.

د جرمني د بهرنیو چارو وزارت د اعلامیې له مخې هایکو ماس پرون د جي شل هېوادونو د بهرنیو چارو وزیرانو په غونډه کې دا څرګندونې کړي.

خو طالبانو ویلي چې هېڅ ډلې ته اجازه نه ورکوي څو د افغانستان له خاورې بل هېواد ته ګواښ پېښ کړي.

د امریکا فورټ مک کای ۹۷ سلنه افغان کډوالو ته واکسینونه لګول شوي

امریکا کې د کډوالو یو کمپ

د امریکا یوې لویې پوځي اډې فورټ مک کای خبر ورکړی چې هلته مېشتو شوېو ۹۷ فیصده افغان کډوالو ته واکسینونه لګول شوي دي.

فورټ مک کای کې چې په ویسکانسن کې موقعیت لري امریکا ته د تازه لېږدول شوېو افغان کډوالو له ډلې ۱۲۷۰۰ کسان په کې مېشت شوي دي.

د دې پوځي اډې چارواکو ویلي چې په ډله ییزه توګه یې افغان کډوال د کووېډ نولس، سرخکان/شري، چیچک او نورو څو ویروسو په وړاندې واکسین کړي دي.

په دومره لوی شمېر د افغان کډوالو د بشپړ واکسینولو خبر داسې وخت ورکول کېږي چې تازه امریکا ته د ستنو شوېو افغان کډوالو سره دغه هېواد ته د توبرکلوز/نري رنځ او ځینو نورو خطرناکه ناروغیو د انتقال اندېښنې هم زیاتې شوي دي.

متحده ایالاتونو له افغانستانه شااوخوا ۱۲۴ زره کسان واایستل او په کې اکثر هغه افغانان و چې پخوا یې له دوی سره کار کړی و.

دا کډوال په دننه امریکا او له دغه هېواد بهر په پوځي اډو کې مېشت شوي او دمګړۍ یې د ویزو او دایمي مېشتېدو پروسه روانه ده.

د خوړو سازمان افغانستان لپاره د ۲ سوه میلیونه ډالرو غوښتنه کړې

د خوړو نړیوال سازمان

د خوړو نړیوال سازمان د افغانستان لپاره د دوه سوه میلیونه ډالرو بیړنۍ مرستې غوښتنه کړې.

د دې سازمان د اقتصادي برخې مسوول عارف حسین پرون خبرداری ورکړ چې د ژمي په درشل کې په افغانستان کې خوراکي موادو ته اړتیا خورا زیاته شوې ده.

نوموړي وویل، په تېرو دوو اونیو کې شااوخوا پنځوس په سلو کې افغانان د خوراکي موادو له کمښت سره مخامخ شوي دي.

د ده په خبره، اوس یې وخت دی چې د دغه ناورین مخنیوی وشي او د دې لپاره دوه سوه میلیونه ډالرو ته اړتیا ده.

د خوړو د نړیوال سازمان د موندونو پر بنسټ یوازې پنځه په سلو کې افغانان درې وخته سمه ډوډۍ ترلاسه کولی شي.

د دې سازمان په وینا که بیړنۍ مرستې ونه شي په افغانستان کې به تر یوې میاشتې پورې د خوراکي موادو شته زېرمې تشې شي.

د مالیې وزارت: برېښنایي مالیاتي سیسټم بېرته فعال شو

 د افغانستان مالیې وزارت

د افغانستان ماليې وزارت د عوايدو لوی رياست د پرېکړې پر بنسټ د برېښنايي مالياتي اظهار ليکونو وړاندې کوونکی سيسټم «e-Filing» نن بېرته فعال شو.

د مالیې وزارت په یو بیان کې ویلي، له دې وروسته ټول ماليه ورکوونکي کولی شي چې خپل مالياتي مکلفيتونه لکه د پخوا په څېر وړاندې او تاديه کړي.

د دغه سیستم فعالیت پر کابل د طالبانو له واکمنۍ وروسته ځنډیدلی و چې نن بېرته فعاله شو.

مالیې وزارت ټېنګار کړی چې ټول ماليه ورکوونکي باید تر دې وروسته خپل مالياتي مکلفيتونه ژر تر ژره وړاندې او تاديه کړي.

وزارت وایي، دغه سیستم د ماليه ورکوونکو وخت د ضايع کېدو، د رخصتيو په ورځو کې د ماليه ورکوونکو له کېدونکې جريمې، د مالياتي ادارو د ځينو مامورينو د ناسم چلند، د ماليه ورکوونکي د مالياتي پاڼو د ورکېدو او د مالي فساد د مخنيوي په موخه د (E-Filling) د برېښنايي خدماتو په نوم انلاین سيسټم جوړ کړی دی.

د دې په وينا، د دې برېښنايي خدماتو انلاین سيسټم له لارې ماليه ورکوونکي خپله "اظهار لېک" ډکوي، په برېښنايي ډول يې دوی ته رااستوي او دغه کار د دې لامل کېږي چې ماليات په خپل وخت او منظم ډول راټول شي.

ملګري ملتونه: ۵ قدرتونه یو باثباته افغانستان غواړي

د ملګرو ملتونو عمومي منشي انتونیو ګوتیریش

د ملګرو ملتونو د امنیت شورا پنځه دایمي غړي د یوه باثباته افغانستان لپاره سره یوه خوله شوي دي.

دا خبره د ملګرو ملتونو عمومي منشي انتونیو ګوتیریش د امریکا، بریتانیا، چین، فرانسې او روسیې د بهرنیو چارو له وزیرانو سره تر کتنې وروسته خبریالانو ته کړې ده.

دا کتنه د افغانستان په وخت تېره شپه د ملګرو ملتونو د عمومي غونډې په څنډه کې شوې ده.

ګوتیریش زیاته کړې: "ټول پنځه قدرتونه داسې سوله ییز او باثباته افغانستان غواړي چې بشري مرستې په کې له ستونزې او تبعیض پرته وویشل شي."

نوموړي ویلي، نړیوال قدرتونه داسې افغانستان غواړي چې د نجونو او ښځو حقونو ته په کې درناوی وشي، ټول شموله حکومت ولري او بیا د ترهګرو پټنځای ونه اوسي.

د خبریالانو پر وړاندې د طالبانو نوي لارښود اندېښنې پیدا کړي

ارشیف

د بې پولي خبریالانو ټولنې د طالبانو له لوري د افغان خبریالانو لپاره نوي لارښود ته ژوره اندېښنه څرګنده کړه.

د بې سرحده خبریالانو د ټولنې مشر کریستوف ډیلوار پرون په یوه بیان کې وویل، طالبانو یو تنظیمي چوکاټ رامنځته کړی دی چې له ژورنالېزم سره په ټکر کې دی او ظالمانه تفسیر ته لار پرانیزي.

طالبانو د روانې اوونۍ په پیل کې د خبریالانو لپاره یوولس اصوله وضع کړل.

لومړۍ درې مادې یې دا دي چې هغه راپور به څوک نه خپروي چې له اسلام سره په ټکر کې وي، ملي شخصیتونو ته په کې توهین شوي وي يا د خلکو شخصي حریم په کې نقض شوی وي.

په دغو اصولو کې یو دا هم دی چې خبریالان به هغه موضوعات چې د چارواکو له لوري نه دي تائید شوي په احتیاط کاروي، همدا راز له هغه راپور سره باید احتیاط وشي چې پر ټولنه منفي اغېز کوي.

د بې پولي خبریالانو ټولنه وایي، د دې پر ځای چې طالبان داسې چوکاټونه جوړوي چې سانسور ته په کې لارې پرانیزي، د مېرمنو په ګډون دې افغان خبریالان پریږدي چې خپل کار وکړي.

کرکټ؛ د افغانستان او بنګله دیش ترمنځ د لوبې دوهم پړاو پیلیدونکی دی

ارشیف

د افغانستان تر ۱۹ کلونو لږ عمره کرکټ لوبغاړو د بنګله دېش تر نولس کلنو لږ عمره لوبغاړو د څلور ورځنۍ لوبې په لومړي پړاو کې په۱۶۲ منډو وسوځول.

د افغانستان د کرکټ بورډ د رسنیو د برخې مسوول فرید هوتک ازادي راډیو ته وویل: "یوه څلور ورځنۍ لوبه پیل شوې ده چې پرون یې لومړۍ او نن یې دوهمه ده. انشاء الله لوبغاړي دې لوبې ته ښه چمتوالی لري او تمه ده چې افغان لوبغاړي ښه نتیجه له دې لوبې ترلاسه کړي."

د بنګله دېش د ۱۶۲ منډو په ځواب کې افغان لوبغاړو پرون څلویښت منډې وکړې او دوه لوبغاړي یې له لاسه ورکړل.

د خوړو نړیوال سازمان د افغانستان لپاره د بېړنۍ مرستې غوښتنه وکړه

ارشیف

د خوړو نړیوال سازمان د افغانستان لپاره د دوه سوه میلیونه ډالرو بېړنۍ مرستې غوښتنه وکړه.

د دې نړیوال سازمان د اقتصادي برخې مسوول عارف حسین پرون خبرداری ورکړ چې د ژمي په درشل کې په افغانستان کې خوراکي موادو ته اړتیا خورا زیاته شوې ده: "په تېرو دوو اوونیو کې شااوخوا پنځوس په سلو کې افغانان د خوراکي موادو له کمښت سره مخامخ شوي دي. اوس یې وخت دی چې د دغه ناورین مخه ونیسو. موږ دوه سوه میلیونه ډالرو ته سخته اړتیا لرو چې د ژمي په درشل کې خلکو ته خواړه ورسوو."

د خوړو د نړیوال سازمان د سروې له مخې یوازې پنځه په سلو کې افغانان درې وخته سمه ډوډۍ ترلاسه کولی شي.

د دې سازمان په وینا که بېړنۍ مرستې ونه شي په افغانستان کې به تر یوې میاشتې پورې د خوراکي موادو شته زېرمې تشې شي.

جلال‌اباد کې یوې وسله‌والې حملې او چاودنو کې ۴ تنه وژل شوي

ارشیف، د جلال‌اباد ښار

په جلال‌اباد ښار کې نن یوه وسله‌واله حمله او لږترلږه درې چاودنې وشوې.

د ننګرهار د اطلاعاتو او فرهنګ ریاست وايي چې د جلال‌اباد ښار سرحدي لوا ته څېرمه د نامعلومو وسله‌والو په ډزو درې تنه ملکیان وژل شوي دي.

خو یوې ځايي سرچینې ازادي راډیو ته وویل چې په دې پېښه کې دوه طالبان او یو عام وګړی وژل شوي دي.

حمله کوونکي په تېښته بریالي شوي دي.

له دې بریده یو ساعته وروسته د ښار په دوهمه ناحیه کې درې چاودنې وشوې.

د شاهدانو په وینا په دې چاودنو کې لږترلږه یو طالب او یو لاروی ژوبل شوي دي.

تر اوسه پورې کومې ډلې د دې برید مسؤلیت په غاړه نه‌دی اخیستی.

جو بایډن په افغانستان کې د نجونو او ښځو د حقونو پر رعایت کېدو ټینګار وکړ

ښاغلي بایډن تېره شپه په نیویارک کې د ملګرو ملتونو عمومي اسامبلۍ ته وینا وکړه.

د امریکا متحده ایالاتو ولسمشر جو بایډن په افغانستان کې د نجونو او ښځو د حقونو پر رعایت کېدو ټینګار وکړ.

ښاغلي بایډن تېره شپه په نیویارک کې د ملګرو ملتونو عمومي اسامبلۍ ته په دې اړه وویل: "امنیت شورا یو پرېکړه‌لیک تصویب کړ چې د افغانانو د پرمختګ لپاره څه ډول ملاتړ وشي. له طالبانو د بشري حقونو په برخه کې څرنګه تمه کېدای شي. موږ ټول باید د ښځو او نجونو د حقونو ملاتړ وکړو څو دوی له اقتصادي سیاسي او اجتماعي پلوه له خپل ټول ځواکه کار واخلي او د خپلو هیلو لار پرته له تعصب او خشونته تعقیب کړي."

افغان ښځې شکایت لري چې طالبانو د افغانستان له نیولو وروسته د دوی پر کار او زده‌کړو بندیزونه لګولي دي.

طالبانو د ښځو چارو وزارت لغوه کړی، په اکثرو دولتي ادارو کې یې له ښځو غوښتي چې تر یوې مودې پورې کار ته حاضرې نه‌شي او تر اوسه پورې یې له شپږم د پورته ټولګیو زده‌کوونکو ته اجازه نه‌ده ورکړې چې ښوونځیو ته لاړې شي.

ملګرو ملتونو له افغانستان سره ۴۵ ملیونه ډالره بېړنۍ مرسته تصویب کړه

د ملګرو ملتونو د سرمنشي مرستیال  او د بېړنیو مرستو همغږوونکي مارتین ګریفتس

ملګرو ملتونو په دې خاطر چې په افغانستان کې روغتیايي خدمات په ټپه ونه‌درېږي، له دې هېواد سره د ۴۵ ملیونه ډالرو بېړنۍ مرسته تصویب کړه.

په بشري چارو کې د ملګرو ملتونو د سرمنشي مرستیال او د بېړنیو مرستو همغږوونکي مارتین ګریفتس په یوه بیان کې خبرداری ورکړ چې په افغانستان کې درمل، طبي مرستې او سونګ مواد په ختمېدو دي.

ملګري ملتونه وايي چې ۴۵ ملیونه فوري مرسته به د افغانستان روغتیايي سیستم له سقوطه راوګرځوي.

د کارګرانو ټولنه د بې کارۍ له امله د بشري ناورین خبرداری ورکوي

ارشیف

امکا یا د افغانستان د کارګرانو ملي ټولنه په افغانستان کې د بې کارۍ له امله د یو بشري ناورین خبرداری ورکوي.

د دغې ټولنې رئيس معروف قادري نن چهارشنبه (د وږي په ۳۱مه) ازادي راډیو ته وویل، دا مهال میلیونونه وګړي بې روزګاره دي چې دې وضعیت ګڼ افغانان اندېښمن کړي دي.

قادري زیاتوي: "د کارګرو قانون نور نشته، میلیونونه وګړي بې کاره دي، څوک د چا غږ نه اوري، اندېښمن یو، شدیده اندېښنه لرو، یو بشري ناروین سره به مخ شو."

نوموړی اندېښنه لري که حکومت د بې روزګارۍ د مخنیوي لپاره لازم اقدامات ترسره نه کړي، وېره شته د افغانستان خلک له سختې بې وزلۍ سره مخ شي.

دا اندېښنه په داسې حال کې ده چې پر افغانستان د طالبانو په واکمنېدو سره ګڼ شمېر خلک بې روزګاره شوي او د څو اونیو په تېرېدو لاهم د دغه هېواد بانکونه خپل عادي حالت ته نه دي ګرځیدلي.

تردې وړاندې ملګرو ملتونو سازمان هم په افغانستان کې د لوږې او بې وزلۍ امله د بشري ناورین خبرداری ورکړی دی.

ننګرهار چارواکي: سږ به په ۱۳۰۰ جریبه ځمکه نوي بڼونه جوړ شي

ارشیف

د ننګرهار ولایت د کرنې، اوبو لګونې او مالدارۍ ریاست وایي، سږ کال به په دغه ولایت کې ۱۳۰۰ جريبه ځمکه نوي بڼونه جوړ شي.

د کرنې رئیس مولوي عبدالستار محمد دا خبرې نن چهارشنبه (د وږې په ۳۱مه) د همکارو پروژو له چارواکو سره په یوه ناسته کې وکړې و یې ویل، دا شمېر بڼونه به په را روانو درې میاشتو کې جوړ شي.

ریاست په دې اړه په یوه خبرپاڼه کې ویلي چې د بڼوالۍ ارزښت ته به ځانګړې پاملرنه وشي.

په خبرپاڼه کې راغلي، سږ کال د نیالګیو روزونکو ټولنې د ننګرهار په بېلابېلو قوریو ۳۷۵ زره اصله د مالټو، لیمو، شفتالو، املوک، الوچو او چار مغزو بوټي روزلې او د کښت لپاره تیار دي.

بڼوال او کروندګر بیا د امکاناتو غوښتونکي دي، څو وکولی شي د وچکالۍ له امله له رامنځته شوېو ستونزو سره مبارزه وکړي.

نور راوښيه

XS
SM
MD
LG