کابل چاپ ورځپاڼو په خپلو نننيو ګنو کې د افغانستان په روان وضعیت او پر سقوط شویو بندرونو ګڼې مقالې او تبصرې خپرې کړي دي.
د ازادي راډیو خبریال د دغه ورځپاڼو غورچاڼ په یوه راپور کې رانغاړلی دی.
- ویسا
ویسا ورځپاڼې د افغانستان په بېلابېلو برخو کې وروستیو جګړو ته په اشارې لیکلي چې د روان وضعیت دوام د طالبانو په ګټه نه دی.
وړاندې راغلي چې د طالبانو د وروستیو پرمختګونو سره د عمومي مرګ ژوبلې سربېره لیدل کېږي چې په ځینو هغو سیمو کې چې د طالبانو لاسته ورغلي لکه د کندهار زیاتره ولسوالۍ، ځینې مخ پټي کسان د خلکو کورونو ته ورځي او مشخص کسان ترې راباسي او په قتل یې رسوي.
د لېکوال په وینا ان د کابل په شمالي څنډه کې هم په ځینو ولسوالیو کې ناپېژانده وسله وال چې مخونه یې پټ کړي وي په هدفي وژنو لاس پورې کوي.
ورځپاڼې لیکلي، په همدې ډول د طالبانو تر کنټرول لاندې سېمو کې د سړکونو د اړولو، پلونو ویجاړولو او د دولتي ودانیو د تخریبولو موارد په زیات شمېر ترسره شوي.
خو د لېکوال په خبره که څه هم طالبانو په وار- وار د داسې اعمالو له ترسره کولو انکار کړی، خو د دوی انکار په دې دلیل د چا قناعت نه شي ترلاسه کولای .
لېکوال پوښتنه کړې که طالبان نن په خپلو سیمو کې د عامو وګړو ژوند او عامه تاًسیسات نه شي ساتلی نو په څه دلیل به دوی خلک د واکمنۍ لپاره وړ خلک وبولي؟
لېکوال ټینګار کړی چې اوسنی وضعیت د طالبانو په ګټه نه دی باید ترې لاس واخلي.
- هېواد
هېواد ورځپاڼې ټینګار کړی چې د افغانستان سقوط شوي بندرونه بايد بېرته ونيول شي.
ورځپاڼې وړاندې لیکلي چې افغانستان کې د طالبانو په نوم جګړې د ګڼو انساني زيانونو ترڅنګ سخت مالي او پرمختيايي زيانونه هم اړولي او د افغانستان يو شمېر هغه مهم بندرونه هم سقوط شوي چې په رسمي توګه پرې د افغانستان بهرنۍ راکړه ورکړه کېده چې اوس هرڅه په ټپه دریدلي دي.
ورځپاڼې د پاکستانۍ ډان ورځپاڼې هغه راپور ته اشاره کړې چې ویلي، وسله والو طالبانو د سپين بولدک ولسوالۍ تر نيولو څه موده وروسته اوس د ماليې راټولولو لپاره نوې تعرفې ورکول پيل کړي دي.
لېکوال ټینګار کړی چې د بندرونو سقوط او اوسنی وضعيت د يوه افغان ضمير هم نه شي منلی، نو له همدې امله یې پر حکومتي چارواکو غږ کړی چې د افغانستان د سقوط شوېو بندرونو بېرته نيولو او بېرته احيا کولو لپاره بايد په ټول وس هلې ځلې وشي.
- اطلاعات روز ورځپاڼه
اطلاعات روز ورځپاڼې لیکلي چې طالب جنګیالي له بل هر وخت ډېر په ګذره ولسوالۍ کې د هرات ولایت صنعتي ښارګوټي ته نږدې شوي دي.
وړاندې راغلي، ګذره کې د طالبانو د فعالیت پراخېدو د هرات صنعتکارانو اندېښنې راپارولي دي.
د لېکوال په وینا د هرات امنیتي حالت په ځانګړي ډول د صنعتي ښارګوټي خراب دی او که حالت دوام پیدا کړي، صنعت کاران اړ دي چې د خپلو کارخونو دروازې وتړي.
ورځپاڼې اندېښنه ښودلې چې هرات کې یوې لسیزې ناامنۍ او سړي تښتونې د هرات ډېری سوداګر او صعتکاران اړ کړل چې یا ټوله پانګه او یې یوه برخه بهر ته ولېږدوي.
لېکوال له حکومت او طالبانو ډلې غوښتي چې د هرات صنعتي ښارګوټي نږدې سیمو کې له وسلهوالې نښتې لاس واخلي څو د صنعتکارانو پانګې خوندي پاتې شي.