د لاسرسۍ وړ لېنکونه

تازه خبر
دوشنبه ۳۱ غویی ۱۴۰۳ کابل ۰۸:۱۷

افغانستان

د 'یونېسکو' له لوري ۳ فرهنګي میراثونه د افغانستان په نوم ثبت شول

ارشیف
ارشیف

د افغانانو درې فرهنګي میراثونه د ملګروملتونو ښوونیزې، علمي او فرهنګي ادارې 'یونېسکو' له لوري د افغانستان په نوم ثبت شول.

دا درې میراثونه، د میناتورۍ هنر د بهزاد سبک یوازې د افغانستان په نوم، د وریښمو د تولید او روزنې صنعت د افغانستان، اذربایجان، ایران، ترکیې، ترکمنستان او ازبیکستان د ګډ میراث په نوم او یلدا شپه له ایران سره په ګډه د نړیوالو ناملوسو فرهنګي میراثونو په توګه د دوه زره دووه ویشتم کال د ثبت لپاره ومنل شول.

د ورځې تازه خبرونه دلته ولولئ

طالبانو له څه باندې یو کلن ځنډ وروسته کرزي ته د بهرني سفر اجازه ورکړې

پخوانی افغان ولسمشر حامد کرزی
پخوانی افغان ولسمشر حامد کرزی

طالبانو له څه باندې یو کلن ځنډ وروسته پخواني ولسمشر حامد کرزي ته د بهرني سفر اجازه ورکړې ده.

د حامد کرزي یوه نژدې کس شهزاده مسعود نن دوشنبه ازادي راډیو ته وویل چې کرزی نن سهار د درملنې لپاره جرمني ته روان شوی دی.

یوې سرچینې د نوم نه ښودو په شرط ازادي راډیو ته وویل چې د هغه یوه سترګه وړې جراحۍ ته اړتیا لري.

دغه سرچینه وایي، تېر یوه کال کې جرمني، چین، ایران او یو شمېر نورو هېوادونو حامد کرزي ته د رسمي سفر بلنې لېږلې وې، خو د طالبانو حکومت د رسمي سفر اجازه نه ورکوله.

د طالبانو له بیا واکمنۍ وروسته حامد کرزی په ۲۰۲۳ کال کې جرمني او بریتانیا ته تللی دی.

کندهار کې چاودنه شوې؛ طالبان: یو کس وژل شوی او درې ټپیان دي

د کندهار ښار یوه څنډه
د کندهار ښار یوه څنډه

په کندهار کې د طالبانو د حکومت امنیتي مسولان وایي چې نن سهار د سړک غاړې یوې چاودنې یو ملکي کس وژلی او درې نور یې ټپیان کړي دي.

د کندهار د امنیه قومندانۍ ویاند اسدالله جمشید رسنیو ته ویلي چې ماین په یوه کراچۍ کې ځای پر ځای شوی و.

جمشید وویل: "د کندهار ښار، کابل اډې پر سړک باندې سهار ۷ نیمې بجې یو لاسي بم چې په ریړۍ ( کراچۍ) کې ځای پر ځای شوی و، چاودېدلی دی. د چاودنې له کبله زمونږ یو تن هېوادوال شهید شوی او درې تنه سطحي ټپیان شوي دي. د ټپیانو روغتیایي حالت د ډاډ وړ ښودل شوی دی."

که څه هم د طالبانو د حکومت دغه مسوول د چاودنې هدف په ګوته نه کړ، خو سیمه کې یوې سرچینې ازادي راډیو ته ویلي چې د چاودنې هدف د ۲۰۵ البدر قول اردو تخنیکي ټیم و.

دغه سرچینه چې د امنیتي ملحوظاتو له کبله نوم نه اخلي زیاتوي چې چاودنه کې د قول اردو لس تخنیکي کارکوونکي چې دندې ته روان و، ټپيان شوي دي.

د چاودنې مسوولیت لا کومې ډلې پر غاړه نه دی اخیستی، خو کندهار کې دوه میاشتې وړاندې د نوي کابل بانک پر یوه څانګه چاودنه کې شاوخوا شل کسان ووژل شول چې مسوولیت یې د اسلامي دولت ډلې یا داعش ومانه.

داعش په بامیان کې پر بهرنیو سیلانیانو د حملې مسوولیت ومانه

د بامیان ښار یوه څنډه
د بامیان ښار یوه څنډه

د اسلامي دولت ډلې یا داعش د خراسان ولایت څانګې په بامیان کې پر بهرنیو سیلانیانو د حملې مسوولیت ومانه.

د رویټرز خبري اژانس د راپور له مخې، داعش په خپل ټلګرام کې د دې حملې مسوولیت منلی دی.

د طالبانو د کورنیو چارو وزارت ویاند عبدالمتین قانع تېره شنبه ویلي وو چې د بامیان په مرکز کې د نامعلومو وسله‌والو د درېیو بهرنیانو په ګډون شپږ کسان د جمعې مازیګر ووژل شول او د څلورو بهرنیانو په ګډون اووه تنه نور ټپیان شول.

هغه زیاته کړه چې د دې پېښې په تړاو اووه کسان نیول شوي دي.

د هسپانیا د بهرنیو چارو وزارت ویلي چې درې وژل شوي کسان د دغه هېواد وګړي دي.

د ملګرو ملتونو د سرمنشي مرستیالې له متقي سره د دوحې غونډې پر اجنډا او ترکیب بحث کړی

د عکس ښي لور ته د طالبانو د بهرنیو چارو سرپرست وزیر امیر خان او چپ لور ته په سولې او سیاسي چارو کې د ملګرو ملتونو ملتونو د سرمنشي مرستیاله روزمېري ډیکارلو. د ډیکارلو په خوا کې د یوناما مشره روزا اوتنبایووا ده.
د عکس ښي لور ته د طالبانو د بهرنیو چارو سرپرست وزیر امیر خان او چپ لور ته په سولې او سیاسي چارو کې د ملګرو ملتونو ملتونو د سرمنشي مرستیاله روزمېري ډیکارلو. د ډیکارلو په خوا کې د یوناما مشره روزا اوتنبایووا ده.

طالبان وايي، د دوی د بهرنیو چارو سرپرست وزیر امیر خان متقي په کابل کې په سولې او سیاسي چارو کې د ملګرو ملتونو ملتونو د سرمنشي انټونیو ګوټېرېش له مرستیالې روزمېري ډیکارلو سره د دوحې د درېیمې غونډې پر اجنډا او ترکیب بحث وکړ.

د طالبانو د بهرنیو چارو وزارت مرستیال ویاند حافظ ضیا احمد پر خپله ایکس‌پاڼه لیکلي، په دې کتنه کې د افغانستان او ملګرو ملتونو پر اړیکو هم بحث وشو.

د پخواني ولسمشر حامد کرزي دفتر هم په یوه خبرپاڼه کې خبر ورکړی چې کرزي او د ملي مصالحې عالي شورا پخواني مشر عبدالله عبدالله هم پرون کابل کې له روزمېري ډیکارلو سره د دوحې پر راروانه غونډه او نورو مسایلو بحث وکړ.

د افغانستان لپاره د ملګرو ملتونو د سرمنشي ځانګړې استازې روزا اوتنبایووا په مارچ میاشت کې ویلي وو چې د دوحې د درېیمې غونډې لپاره چمتووالی روان دی.

د افغانستان پر مسایلو د بحث لپاره د دوحې دویمه غونډه د فبروري پر ۱۸مه او ۱۹مه شوې وه چې د ۲۵ هېوادونو او نړیوالو سازمانونو استازو په کې برخه اخیستې وه.

د افغانستان په ۱۲ ولایتونو کې د اورښتونو او سېلابونو اټکل شوی

ارشیف: په پروان کې د باران ورېدو یو انځور
ارشیف: په پروان کې د باران ورېدو یو انځور

د طالبانو د ټرانسپورټ او هوايي چلند وزارت د هواپېژندنې ادارې نن دوشنبه هم د افغانستان په ۱۲ ولایتونو کې د اورښتونو او سېلابونو اټکل کړی دی.

دغې ادارې پرون یکشنبه په یوه اطلاعیه کې لیکلي، په بدخشان، تخار، بغلان، پنجشېر، نورستان، کونړ، کاپیسا، پروان، میدان‌وردګ، بامیان، سمنګان او غور کې نن د نسبتاً سختو اورښتونو، تالندې برښنا او ناڅاپي سېلابونو بهېدلو اټکل شوی دی.

ویل شوي په بېلابېلو ولایتونو کې د اورښتونو اندازه له ۱۵ تر ۲۵ ملي مترو پورې اټکل شوې ده.

په وروستیو څه کم دوو اوونیو کې د افغانستان په بېلابېلو برخو کې تر سختو اورښتونو وروسته بهېدلو سېلابونو سلګونو کسانو ته مرګ‌ژوبله اړولې ده.

یونېسف: له پاکستانه د افغانانو ستنېدلو هر ماشوم ته د پولیو ضد واکسین رسېدل پېچلي کړي

په تورخم کې واکسیناتوران یوه ماشوم ته د واکسین د تطبیق پر مهال
په تورخم کې واکسیناتوران یوه ماشوم ته د واکسین د تطبیق پر مهال

د ماشومانو د ملاتړ لپاره د ملګرو ملتونو مرستندوی صندوق یا یونېسف وايي، په ډله‌ییز ډول له پاکستانه د افغانانو ستنېدلو په افغانستان کې هر ماشوم ته د ګوزڼ یا پولیو ضد واکسین ورکولو لپاره رسېدل پېچلي کړي.

د یونېسف د افغانستان څانګې پرون پر خپله ایکس‌پاڼه تورخم دروازې ته د یونېسف د پولیو له منځه وړلو پروګرام د مشر سټیفن لاوریر (Steven Lauwerier) د سفر خبر ورکړی دی.

لاوریر په تورخم کې د یونېسف له کارکوونکو سره په کتنه کې د پولیو واروس له‌منځه وړلو لپاره پر نورو اقداماتو خبرې وکړې.

دا مهال افغانستان او پاکستان په نړۍ کې هغه دوه هېوادونه دي چې د ماشومانو د ګوزڼ یا پولیو ناروغي لا هم په کې ختمه شوې نه ده.

د طالبانو حکومت: تېرو ۳ ورځو کې ۱۵۰۰ افغان کډوال له پاکستانه هېواد ته ستانه شوي

له پاکستانه د افغان کډوالو د ستنېدو یوه څنډه
له پاکستانه د افغان کډوالو د ستنېدو یوه څنډه

د طالبانو د حکومت د کډوالو او بېرته راستنېدونکو چارو وزارت وايي، په تېرو درېیو ورځو کې له پاکستانه ۱۵۰۰ افغان کډوال هېواد ته راستانه شوي دي.

دغه وزارت پر خپله ایکسپاڼه نن لیکلي، ۹۸ کورنۍ، چې غړي یې ۵۲۰ تنو ته رسیږي، د سپین بولدک له لارې پرون (شنبې) هېواد ته راغلي.

همداراز ۹۵۴ تنه نور د پنجشنبې او جمعې په ورځو د تورخم او سپین بولدک له لارو راستانه شوي دي.

پاکستان د تېر کال د نوومبر له لومړۍ څخه د بې اسناده کډوالو د ایستلو لړۍ پیل کړه چې لا هم دوام لري.

طالبان: ملا هبت الله اخندزاده د سوالګرو راټولولو او سوال کولو د مخنیوي قانون تصویب کړی

د طالبانو مشر ملاهبت الله اخندزاده
د طالبانو مشر ملاهبت الله اخندزاده

د طالبانو د عدلیې وزارت وايي چې د دې ډلې مشر ملاهبت الله اخندزاده په افغانستان کې د سوالګرو د راټولولو او د سوال کولو د مخنیوي قانون تصویب کړی دی.
دغه وزارت د شنبې په ورځ د ثور په ۲۹مه په یوه اعلامیه کې وویل چې دا قانون په درېیو فصلونو او ۲۷ مادو کې ترتیب شوی او په رسمي جریده کې خپور شوی دی.
د اعلامیې له مخې، د دغه قانون له مخې هغه کسان چې روغ وي او یا د یوې ورځې لپاره کافي خواړه ولري، له سوال کولو منع دي.
همدارنګه ویل شوي چې د سوال کولو لپاره د ماشومانو او معلولانو کارول هم منع دي.
تر دې وړاندې هم د طالبانو د مشر په امر په کابل او یو شمېر نورو ښارونو کې د سوالګرو د راټولولو لړۍ پیل شوې وه.
د تېر کال په فبرورۍ میاشت کې د طالبانو د اقتصاد وزیر ملا عبدالغني برادر دفتر اعلان وکړ چې په کابل ښار کې د ښځو او ماشومانو په ګډون تر ۲۸زره ډېر سوالګر په نښه او راټول شوي دي.
دا په داسې حال کې ده چې په تېرو درېیو کلونو کې واک ته د طالبانو له راتګ وروسته په افغانستان کې د فقر کچه لوړه شوې ده.
د ملګرو ملتونو په وینا په دغه هېواد کې شاوخوا ۲۴ میلیونه وګړي بشري مرستو ته اړتیا لري.

د افغانستان ملي مقاومت جبهې په تخار کې د څلورو طالبانو د وژلو ادعا وکړه

د تالقان ښار يوه څنډه
د تالقان ښار يوه څنډه

د طالبانو یوه مخالفه وسله واله ډله ادعا کوي چې د تخار ولایت په مرکز تالقان ښار کې د طالبانو د ځواکونو پر یوه موټر په برید کې یې څلور طالبان وژلي او دوه نور ټپیان کړي دي.

د "افغانستان د ملي مقاومت" په نامه جبهې تېره شپه په ایکسپاڼه کې ليکلي چې دا بريد پرون شنبې ماسپښين د تالقان ښار د امنيه قوماندانۍ په ۲۰ مترۍ کې وشو.

تر دې مخکې ځینو سرچینو ازادي راډيو ته د تخار ولایت په مرکز کې د یوې چاودنې خبر ورکړی و.

طالبانو تر اوسه د ملي مقاومت جبهې د دې ادعا په اړه څه نه دي ویلي.

ازادي راډیو په خپلواکه توګه دا ادعا نه شي تاییدولی.

کرکټ؛ د افغانستان ملي لوبډله ویسټ اینډیز ته ورسېده

د افغانستان کرکټ ملي لوبډلې ځينې لوبغاړي
د افغانستان کرکټ ملي لوبډلې ځينې لوبغاړي

د افغانستان د کرکټ ملي لوبډلې یو شمېر لوبغاړي په شل اوریز نړیوال جام کې د ګډون په موخه ویسټ اینډیز ته ورسېدل.

د افغان کرکټ بورډ د خبر پر اساس، د لوبډلې اکثره لوبغاړي یې د کربین سېنټ کېټس او نېوېس ټاپو ته رسېدلې دي.

په خبر کې ویل شوي، لوبډله به په یاده ټاپو کې نړیوال جام ته د لا ښه چمتووالي په موخه لس ورځې تمریناتي کمپ ترسره کړي.

د لوبډلمشر راشدخان په ګډون لا هم شاوخوا ۷ افغان لوبغاړي په آی پي ایل سیالیو کې د ګډون له امله لا له لوبډلې سره نه دي یوځای شوي، خو کرکټ بورډ وايي چې ډېر ژر به ټول لوبغاړي یوځای شي.

بل لورته لوبډلمشر راشدخان بیا تر څلورو کلونو وروسته افغانستان ته په خپل سفر کې ویلي، په دې شل اوریز نړیوال جام کې به یې د لوبډلې له وړتیا ښودنې هېوادوال ډېر خوښ وي.

ټاکل شوې چې د شل اوریزو سیالیو نړیوال جام د راتلونکي جون میاشتې په ۲یمه نېټه د امریکا متحده ایالاتو او کاناډا ترمنځ پیل شي او افغانستان به خپله لومړۍ لوبه د همدې میاشتې په ۴مه نېټه له یوګاندا سره ترسره کوي.

د ویلو ده چې د دې نړیوال جام تر رسمي لوبو وړاندې به افغانستان له عمان او سکاټلنډ سره د لا ښه چمتووالي په موخه دوه تمریناتي سیالۍ هم ترسره کړي.

نور راوښيه

XS
SM
MD
LG