د لاسرسۍ وړ لېنکونه

تازه خبر
چهارشنبه ۱۳ زمری ۱۴۰۰ کابل ۰۹:۱۴

افغانستان

افغانستان: د سلسلې عليخېل د تښتونې په اړه د پاکستان څرګندونې ناسمې دي

سلسله علیخېل

د افغانستان د بهرنیو چارو وزارت په اسلام اباد کې د افغان سفیر د لور سلسلې علیخېل د تښتونې په اړه د پاکستان د کورنیو چارو د وزیر څرګندونې ناسمې بللې دي.

د افغانستان د بهرنیو چارو وزارت په یوه بیان کې وویل چې تراوسه تحقیقات نه دي بشپړ شوي، تورن کسان نه دي نیول شوي، خو وار له مخه قضاوتونه کېږي.

په دې بیان کې چې پرون خپور شو دا هم ویل شوي دي چې د روغتون په راپور کې د اغلې سلسلې د روحي او جسمي شکنجې خبر ورکړل شوی دی.

د پاکستان د کورنیو چارو وزیر شیخ رشید احمد د سې شنبې په ورځ وویل چې سلسله عليخېل نه وه اختطاف شوې او دا کیسه د نوي ډیلي او کابل له لوري جوړه شوې ده.

د یو شمېر راپورونو له مخې په اسلام اباد کې د افغانستان د سفیر لور، سلسله علیخېل د جمعې په ورځ اختطاف شوه، شکنجه شوه، بېا د بې هوشي په حالت کې پيدا شوه.

د افغانستان د بهرنیو چارو وزارت وایي چې د دې پېښې نتیجه او علت باید د دواړو هېوادو د تحقیقاتو په ترڅ کې معلوم شي.

د ورځې تازه خبرونه دلته ولولئ

چارواکي: زابل او ننګرهار کې ۳۰ وسله‌والو مخالفانو ته مرګ‌ژوبله اوښتې

ارشیف، د افغان ځواکونو عملیات

افغان امنیتي چارواکي وايي، په زابل او ننګرهار کې یې ۳۰ وسله‌والو مخالفانو ته مرګ‌ژوبله اړولې ده.

دفاع وزارت وايي، امنیتي او دفاعي ځواکونو د هوايي ځواک په ملاتړ ۲۰ تنه مخالف وسله‌وال د زابل ولایت مرکز ته څېرمه په ترنَک او جلدک سیمو کې په نښه کړل چې ۸ یې ووژل شول او ۱۲ نور ژوبل شول.

له بلې‌خوا د ننګرهار د والي مطبوعاتي دفتر وايي چې امنیتي ځواکونو د دغه ولایت په چپرهار ولسوالۍ کې ۶ وسله‌وال طالبان وژلي او ۴ نور یې ټپیان کړي دي.

په خبرپاڼه کې ویل شوي چې په دې نښته کې دوه سرتېري هم وژل شوي او یو ټپي دی.

طالبانو د دواړو پېښو په اړه څه نه‌دي ویلي.

شېرپور کې د طالبانو د تېرې شپې حمله کې ۸ تنه وژل شوي

د کابل شېرپور سیمه کې د موټربم او وسله‌وال برید سیمه

د افغانستان کورنیو چارو وزارت وايي، په شېرپور کې د طالبانو د تېرې شپې په حمله کې ۸ تنه وژل شوي دي.

د دې وزارت ویاند میرویس ستانکزي نن/ چهارشنبه وویل چې اکثره وژل شوي ملکي وګړي دي.

ښاغلی ستانکزی زیاتوي: "د کابل په شېرپور سیمه کې د وحشي ترهګرو د حملې په نتیجه کې ۸ تنه شهیدان شوي او تر ۲۰ ډېر نور ژوبل شوي دي. اکثره شهیدان او ټپیان ملکي وګړي دي. د حمله کوونکو شمېر ۵ تنه و چې په ۵ ساعتونو کې د پولیسو د ځانګړې قطعې له لوري ووژل شول."

وسله‌والو طالبانو د دې موټربم او وسله‌وال برید مسؤلیت په غاړه اخیستی دی.

د طالبانو ویاند ذبیح‌الله مجاهد ویلي چې د دوی کسانو د تېرې شپې حمله کړې ځکه چې د برید په ځای کې مهمه غونډه روانه وه.

د ۲۰۹م شاهین قول اردو: د بامیانو لپاره د طالبانو والي وژل شوی

د افغانستان په نقشه کې د بامیانو ولایت

د افغانستان شمال کې د ملي اردو چارواکي وايي چې د بامیان ولایت لپاره یې د وسله والو طالبانو ځانبولی والي وژلی دی.

د ۲۰۹ شاهین قول اردو ویاند حنیف رضايي ازادي راډیو ته وویل چې مولوي انس د سمنګان ولایت په دره صوف ولسوالۍ کې په هوايي برید کې ووژل شو.

د ده په ادعا په دې برید کې ۴۰ طالبان وژل شوي او ۱۳ ټپیان شوي دي، خو د طالبانو ویاند ذبیح الله مجاهد د مولوي انس وژل کېدا رد کړې ده.

چارواکي: کابل کې نننۍ چاودنې ۳ تنه ژوبل کړل؛ پرونی برید طالبانو کړی

کابل کې نننۍ برید

کابل کې نن بله چاودنه وشوه او د لومړنیو راپورونو له مخې، درې تنه په کې ژوبل شوي دي.

د کابل د امنیه قوماندانۍ ویاند فردوس فرامز فرانس پریس اژانس ته ویلي، دا چاودنه د شهیدانو د ورثه وو او معلولانو وزارت ته نژدې شوې او په ترڅ کې یې درې تنه ژوبل شوي دي.

د برید پړه تر اوسه کومې ډلې نه ده منلې.

هاخوا د کورنیو چارو وزارت وايي، په شېرپور کې د طالبانو د تېرې شپې په حمله کې د ۵ بریدګرو په ګډون ۱۳ تنه وژل شوي دي.

د دې وزارت ویاند میرویس ستانکزي نن چهارشنبه (د زمري ۱۳مه) وویل چې اکثره وژل شوي ملکي وګړي دي: "د کابل په شېرپور سیمه کې د وحشي ترهګرو د حملې په نتیجه کې ۸ تنه شهیدان شوي او تر ۲۰ ډېر نور ژوبل شوي دي. اکثره شهیدان او ټپیان ملکي وګړي دي. د حمله کوونکو شمېر ۵ تنه و چې په ۵ ساعتونو کې د پولیسو د ځانګړې قطعې له لوري ووژل شول."

وسله والو طالبانو د دې موټربمي برید مسوولیت په غاړه اخیستی دی.

د طالبانو ویندوی ذبیح الله مجاهد ویلي چې د دوی کسانو د تېرې شپې حمله کړې ځکه چې د برید په ځای کې مهمه غونډه روانه وه.

د افغانستان د ملکي هوايي چلند اداره: ۳۰ سلنه عواید زیات شوي

ارشیف، د کابل هوايي ډګر

د افغانستان د ملکي هوايي چلند اداره وايي، په تېرو څلورو میاشتو کې د تېر لمریز کال د وروستو څلورو میاشتو پرتله یې عواید په سلو کې ۳۰ سلنه زیات شوي دي.

د دغې ادارې د اعلامیې له مخې، د ۱۴۰۰ کال له حمل تر سرطان میاشتې پورې یې ۲،۴ میلیاره افغانۍ عواید ترلاسه کړي چې دا په ټاکلي موده کې د تېرو ۲ کالو د عوايدو تر ټولو لوړه کچه ده.

د ملکي هوايي چلند اداره وايي، که څه هم د کرونا وبا له خپرېدو سره د پروازونو شمېر کم شوی او هم د مسافرو د تګ راتګ کچه ټيټه وه، خو بيا هم د هوايي چلند ادارې د نوي رهبرۍ او همکارانو د هلو ځلو په نتيجه کې د عوايدو کچه لوړه شوې.

د ملکي هوايي چلند اداره داسې مهال د خپلو عواید د زیاتوالي خبره کوي چې دم ګړۍ په افغانستان کې یوه خصوصي او دوه دولتي هوايي شرکتونه فعالیت لري چې دغه شرکتونه د افغانستان له سترو ښارونو سربېره سیمې او نړۍ ته پروازونه کوي او دغه شان د افغانستان له هوايي حریمه له تېریدونکو الوتکو هم عواید ترلاسه کوي.

الکوزی: د توکو د بیو لوړوالي سره-سره د لوږې او قحطۍ هېڅ وېره نشته

د افغانستان د سوداګرۍ خونو فدارسیون رستیال خان جان الکوزی

د افغانستان د سوداګرۍ خونو فدارسیون وايي، که څه هم په بازارونو کې د ځینو خوراکي توکو بیې لوړې شوي، خو په کافي اندازه خوراکي او نور توکي موجود دي.

د دغو خونو مرستیال خان جان الکوزي نن چهارشنبه (د زمري ۱۳مه) ازادي راډیو ته وویل چې په بازارونو کې د بیو له لوړوالي سره ــ سره بیا هم د لوږې او قحطۍ هېڅ وېره نشته: "د افغانستان روان وضعیت په بازار منفي اغېز کړی، لس تر پنځلس سلنه په بازار کې توکي ګران شوي، خو مواد او خوراکي توکي شته او رسېږي، د لوږې هېڅ وېره نشته."

نوموړی زیاتوي چې د بیو د لوړېدو لوی لامل وروستۍ ناامنۍ، په بندرونو کې دوه ځایه محصول اخیستل او د افغانیو په مقابل کې د ډالرو بیې لوړېدل دي.

د یادونې وړ ده چې د توکو د بیو د لوړوالي له امله مخکې له دې یو شمېر خلکو له ازادي راډیو سره خپلې اندېښنې شریکې کړې وې.

دا په داسې حال کې ده چې د راپورونو پر بنسټ په کندز کې شېرخان بندر، تخار کې ای خانم، په هرات کې تورغونډۍ او اسلام قلعه، په فراه کې ابو نصر فراهي او په پکتيا کې ډنډ پټان سوداګریز بندر د طالبانو لاسته لوېدلي او د افغانستان مالیې وزارت ویلي چې په دغو بندرونو کې فعالیت نه لري.

چارواکي: جلال اباد کې د ښځینه واکسیناتورانو مشکوک قاتل نیول شوی

ارشیف، عکس تزئیني بڼه لري

د ننګرهار ولایت چارواکي وايي، امنیتي ځواکونو په مرکز جلال اباد کې د ښځینه واکسیناتورانو مشکوک قاتل نیولی دی.

د ننګرهار ولایت مطبوعاتي دفتر په یوه بیان کې چې نن چهارشنبې خپور شو ویلي، تورن کس په بهسودو ولسوالۍ کې د افغان ځانګړو ځواکونو د شپنیو عملیاتو په ترڅ کې نیول شوی دی.

روان کال د وري یا حمل په ۱۰مه نېټه په جلال‌اباد ښار کې درې واکسیناتورانې د ناپېژانده وسله‌والو په ډزو ووژل شوې.

د ننګرهار ولایت د مطبوعاتي دفتر په بیان کې راغلي دي چې نیول شوی تورن، د اسلامي دولت ډلې یا داعش د هدفي وژنو غړی و او په لومړنیو تحقیقاتو کې هم په جلال اباد کې د ښځینه واکسیناتورانو په وژنه کې دخیل پېژندل شوی و.

د روان وضعیت په اړه له ملګرو ملتونو نه د افغانستان غوښتنه

د افغانستان د بهرنیو چارو وزیر محمدحنیف اتمر له خپل هندي سیال اېس جی شنکر سره ټیلیفوني خبرې کړي

د افغانستان د بهرنیو چارو وزارت د افغانستان د روان حالت په اړه د بحث لپاره د ملګرو ملتونو د امنیت شورا د ځانګړې غونډې د جوړېدو غوښتنه کړې.

د افغانستان د بهرنیو چارو وزیر محمدحنیف اتمر دا غوښتنه پرون سې شنبې له خپله هندي سیال اېس جی شنکر سره په ټیلیفوني خبرو کې وکړه.

هند اوس مهال د امنیت شورا دوره يي مشري کوي.

د بهرنیو چارو وزارت په یو بیان کې ویلي دي چې ښاغلي اتمر د هغو بریدونو په اړه چې د افغانستان د عام ولس د وژنې او بې ځایه کېدو لامل کېږي له خپل هندي سیال سره خبرې وکړې.

بیان زیاتوي چې ښاغلي اتمر په افغانستان کې له بهرنیو جنګیالیو او ترهګرو ډلو سره په همغږۍ کې د طالبانو حملې جنګي جنایت وباله او د دې ناورین د دوام په اړه یې خبرداری ورکړ.

په بیان کې راغلي دي چې د هند د بهرنیو چارو وزیر ښاغلي شنکر هم په افغانستان کې د طالبانو او تروریستي ډلو له خوا د تاوتریخوالي، ناامنیو او له بشري حقونو د سرغړونو په اړه اندېښنه څرګنده کړه او ډاډ یې ورکړ چې د افغانستان په اړه د امنیت شورا د ځانګړې غونډې د جوړېدو د وړاندیز په اړه به غور او سلامشورې وکړي.

چارواکي: کابل کې د تېرې شپې حمله د ۴ بریدګرو په وژلو پای ته ورسېده

کابل کې د تېرې شپې د برید سیمه

د کورنیو چارو وزارت وايي، د کابل په شیرپور کې د افغانستان د سرپرست دفاع وزیر د کور مخې ته د تېرې شپې برید د څلورو بریدګرو په مړینه پای ته ورسېد.

د کورنیو چارو وزارت ویلي چې په دې پېښه کې نورو خلکو ته زیان نه دی اوښتی. خو سرپرست دفاع وزیر بسم الله محمدي تېره شپه ناوخته رسنیو ته په یوه ویډیويي پیغام کې وویل چې په برید کې څو سرتېري ټپیان شوي دي.

محمدي زیاته کړه: "په دې پېښه کې د خدای په مرحمت زه او زما د کورنۍ غړي نه یو زیانمن شوي. خو له بده مرغه زما یو شمېر ساتونکي ټپیان شوي دي."

فرانس پرېس خبري اژانس د امنیتي او روغتیايي چارواکو له قوله راپور ورکړی چې په دې برید کې څلور کسان وژل شوي او نژدې شل نور کسان ټپیان دي.

د دې برید مسوولیت تراوسه کومې ډلې نه دی منلی.

د سید اباد ولسوال پر وژل کېدو د سیمه ییزو ارګانونو د ادارې خپګان

د سیمه ییزو ارګانونو خپلواکې ادارې مشر شمیم خان کټوازی

د افغانستان د سیمه ییزو ارګانونو خپلواکې ادارې د میدان وردګ ولایت د سید اباد ولسوال پر وژل کېدو خپګان څرګند کړ.

د سید اباد ولسوال، امیر محمد ملکزی پرون سې شنبه (د زمري ۱۲مه) مازېګر د کابل په خوشال خان مېنه کې د نامعلومو وسله والو په حمله کې ووژل شو.

د سیمه ییزو ارګانونو خپلواکې ادارې مشر شمیم خان کټوازي په یوه اعلامیه کې ویلي، د سید اباد ولسوالۍ لپاره د امیر محمد ملکزي خدمتونه نه هېرېدونکي دي.

د دې حملې مسوولیت چا نه دی منلی.

کندهار والي: طالبانو سلګونه کسان نیولي او د کرښې هاخوا یې زنداني کړي

د کندهار والي روح الله خانزاده

د کندهار والي وايي، وسله والو طالبانو د غچ­ اخیستنې د حملو په لړ کې په سپین بولدک ولسوالۍ کې په سلګونو کسان نیولي او د کرښې هاخوا یې په زندانونو کې ساتي.

روح اله خان زاده، پرون ناوخته ملي ټلوېزیون ته په خبرو کې وویل، تر اوسه د ۴۰ کسانو جسدونه تثبیت شوي دي: "په سلګونو کسان لادرکه دي، خو مړي د ټولو نه دي موندل شوي. یوازې د ۴۰ او ۴۵ ترمنځ مړي پیدا شوي دي. هغه معلومات چې زه لرم دغه نیول شوي کسان له پولې اړول شوي او هلته زندانیان دي. اکثریت یې د دولت سرتېري او کار کوونکي وو."

په همدې اړه په کابل کې د متحدو ایالاتونو او بریتانیا سفارتونو د دوشنبې په ورځ په یوه ګډ بیان کې وویل، وسله والو طالبانو د غچ اخيستنې د حملو په ترڅ کې لسګونه ملکي وګړي په ډله ییز ډول وژلي چې جنګي جرمونه ګڼل کېدای شي.

د بشري حقونو خپلواک کمېسیون ویلي، وسله والو طالبانو د چنګاښ/سرطان پر ۲۳مه د سپین بولدک تر نیولو وروسته شااوخوا ۴۰۰ تنه ملکي وګړي یا ونیول او یا یې ووژل.

طالبانو دا موضوع رد کړې ده.

شهرزاد اکبر او غلام محمد اسحاقزي د افغان جګړې پر شدت بحث وکړ

د افغانستان د بشري حقونو خپلواک کمېسیون مشره شهرزاد اکبر

د افغانستان د بشري حقونو خپلواک کمېسیون مشرې، په ملګرو ملتونو کې د افغانستان له دایمي استازي سره په افغانستان کې د بشري وضعیت په باب خبرې وکړې.

شهرزاد اکبر او غلام محمد اسحاقزي پرون د جګړې د شدت پر زیاتېدو، پر ملکیانو یې پر ناوړه اغېزو هم بحث وکړ.

د بشري حقونو خپلواک کمېسیون په یوه ټویټ کې ویلي چې دواړو مشرانو د ملګرو ملتونو په چوکاټ کې د حقیقت موندنې د یوه ماموریت د اړتیا پر موضوع هم په خپلو کې خبرې وکړې.

د بشري حقونو پر وضعیت په داسې حال کې خبرې کېږي چې د افغانستان په بېلابېلو برخو کې د جګړو له شدت سره ملکیانو ته هم مرګ ژوبله اوښتې او ملکیتونه یې زیانمن شوي دي.

ناټو سږ له افغان ځواکونو سره د ۷۲ میلیونه ډالرو په ارزښت مرسته کړې

افغان ځواکونه له تجهیزاتو سره

ناټو وايي، په ۲۰۲۱میلادي کال کې یې له افغان امنیتي ځواکونو سره د ۷۲ میلیونه ډالرو په ارزښت د تجهیزاتو مرسته کړې ده.

د ناټو په پرونۍ اعلامیه کې راغلي چې په دغو مرستو کې طبي وسایل، د بمونو د شنډولو وسایط او دستګاوې شاملې دي.

په اعلامیه کې راغلي چې د مرستو وروستۍ بسته تېره دوشنبه افغان ځواکونو ته سپارل شوې ده.

د ناټو یوه ویاند دایلَن وایټ د افغانستان اوسنی وضعیت له چلنجونو ډک وباله او ویې ویل چې له افغانستانه به د نړیوالو ځواکونو له وتلو سره- سره له افغانستان او د افغانستان له دفاعي او امنیتي ځواکونو د دوی ملاتړ دوام کوي.

د سږکال مرسته د ملي اردو د تمویل له صندوقه چې ناټو ایجاد کړی، ورکول شوې ده.

د ناټو په وینا په ۲۰۱۷میلادي کال کې د دغه مرستندوی صندوق له ایجاد سره شااوخوا درې نیم میلیارډه ډالره راټول شوي چې له دې ډلې ۴۴۰ میلیونه ډالره د افغان ځواکونو پر تجهیزاتو او وسایطو لګول شوي دي.

ولسمشر غني بلېنکن سره د سولې مذاکرو پر چټکتیا وغږېد

ولسمشر غني له انتوني بلېنکن سره په ټیلیفوني اړیکه کې د طالبانو روانې حملې وغندلې.

ولسمشر محمد اشرف غني د امریکا د متحدو ایالاتونو د بهرنیو چارو له وزیر انتوني بلېنکن سره د سولې مذاکرو پر چټکتیا خبرې وکړې.

ارګ او د امریکا د بهرنیو چارو وزارت دواړو مشرانو پرون په ټیلیفوني تماس کې د وسله والو طالبانو روانې حملې هم وغندلې.

د امریکا د بهرنیو چارو وزارت نېډ پرایس وویل چې د بهرنیو چارو وزیر له افغانستانه د امریکا د ملاتړ پر تعهد بیا ټینګار وکړ.

په همدې حال کې د ملګرو ملتونو امنیت شورا پرون په یوه اعلامیه کې په افغانستان کې د تاوتریخوالي پر زیاتېدو اندېښنه وښوده.

د امنیت شورا په اعلامیه کې د جګړې پر مهال له بشري حقونو د سرغړونو زیاتېدو ته هم اندېښنه ښوولې شوې ده.

هلمند والي: د امنیه قوماندانۍ، بولان سیمې او ښار ځینو برخو کې جګړې روانې دي

د هلمند مرکز لښکرګاه کې د افغان ځواکونو عملیات

د هلمند والي وايي چې د مرکز لښکرګاه د امنیه قومانداني شاوخوا جګړه روانه ده، همدراز د بولان په سیمه او د ښار په څلور پنځو نورو برخو کې جګړې روانې دي.

ازادي راډیو ته د والي محمد ولي علیزي په وینا د دې جګړې پر مهال طالبانو ته درانه تلفات اوښتي دي.

ښاغلی علیزی زیاتوي: "له پرون راهیسې د دوی تر ۲۲۰ کسان وژل شوي او د ټپيانو شمېر یې بېخي ډېر دی، خو هغه جسدونه چې زموږ تر سترګو شوي تقریباً ۸۰، ۹۰ کسان‌یې په کوڅو کې پراته دي."

په افغانستان کې د ملګرو ملتونو دفتر، یوناما نن په فېس‌بوک او ټویټر کې لیکلي دي چې په تېرو ۲۴ ساعتونو کې په لښکرګاه کې د جګړو پر مهال ۴۰ ملکیان وژل شوي او ۱۱۸ نور ټپیان شوي دي.

د طالبانو ویاند ذبیح‌الله مجاهد په ټویټر کې لیکلي چې د ده په وینا د دښمن الوتکو د لښکرګاه په کندهار اډه سیمه کې پر یوه جومات بمباري کړې ده چې له امله‌یې دا جومات او ګڼ شمېر دکانونه تخریب شوي دي.

نور راوښيه

XS
SM
MD
LG