د لاسرسۍ وړ لېنکونه

تازه خبر
دوشنبه ۵ تله ۱۴۰۰ کابل ۰۲:۵۵

افغانستان

دوحه کې د افغان سولې په پار غونډه؛ نن یې ګډه اعلامیه خپریږي

دوحه کې د سولې خبرې

تمه ده چې نن یکشنبه (د چنګاښ ۲۷مه) د افغانستان د دولت او طالبانو له لوري په قطر کې د دوه ورځنۍ غونډې په پای کې ګډه اعلامیه خپره شي.

په پلازمېنه دوحه کې د افغانستان د دولت د پلاوي مشري د ملي مصالحې د عالي شورا مشر عبدالله عبدالله کوي او د طالبانو د پلاوي مشر د دوی د قطر د سیاسي دفتر مشر ملا برادر دی.

د سولې په چارو کې د دولت د وزارت ویاندې ناجیې انوري ازادي راډیو ته د دې خبرو د اجنډا په اړه وویل: "د هغو موضوعاتو په اړه له مقابل لوري سره خبرې کېږي چې څرنګه کیدای شي په دې بهیر کې پرمختګ وشي، دا څرګنده شي چې ستونزې څه دي او څه مېکانېزم شته چې دا هڅې ګړندۍ شي."

اغلې انوري زیاته کړه چې د دې خبرو په پای کې به چې پرون پیل شوې دي نن یوه مشترکه اعلامیه خپره شي.

دا خبره په دوحه کې د طالبانو د سیاسي دفتر ویاند محمد نعیم هم ازادي راډیو ته تایید کړه، خو ویې ویل چې په دې اړه د اوس لپاره جزییات له رسنیو سره نه شي شریکولی.

د ورځې تازه خبرونه دلته ولولئ

د محمد اشرف غني رسمي فېس‌بوک پاڼه هک شوې

مخکېنی ولسمشر محمد اشرف غني

د مخکېني ولسمشر محمد اشرف غني په یوه ټویټ کې ویل شوي چې د ښاغلي غني د فېس‌بوک رسمي پاڼه له پرون راهیسې هک شوې ده.

دا خبره وروسته له هغې وشوه چې د محمد اشرف غني د فېس‌بوک پر پاڼه په یوه مطلب کې پر دې انتقاد شوی و چې د افغانستان په استازیتوب ولې نن دوشنبه د ملګرو ملتونو عمومي غونډې ته غلام محمد اسحاقزی وینا کوي.

د فېس‌بوک په دغه مطلب کې د ښاغلي غني له قوله ویلي شوي وو: "نړیوال د دې پر ځای چې د افغانستان له ملت څخه لیرې شي باید له اوسني حکومت سره تعامل او ورسره مرستې وکړي."

مخکېني ولسمشر محمد اشرف غني ته نږدې سرچینو هم ویلي چې د هغه د فېس‌بوک رسمي پاڼه د دوی له کنټروله وتلې او په‌کې خپاره شوي مطالب د اعتبار وړ نه‌دي.

طالبانو تېره اوونۍ غوښتنه وکړه چې په قطر کې د دوی د سیاسي دفتر پخوانی ویاند سهیل شاهین دې په ملګرو ملتونو کې د افغانستان د دایمي استازي په توګه ومنل شي او طالبانو ته دې هم په ملګرو ملتونو کې د وینا وخت ورکړل شي.

خو ملګرو ملتونو ته ویلي چې د افغانستان په استازیتوب د وینا لپاره د غلام محمد اسحاقزي نوم په لېست کې لیکل شوی دی.

ایټالیا: طالبان په رسمیت نه‌شو پېژندلی خو له افغانانو سره به مرسته وکړو

طالب

ایټالیا ویلي، د طالبانو حکومت په رسمیت نه‌شي پېژندلی، خو له افغانانو سره به مرسته کوي.

د روېټرز خبري اژانس په استناد دا خبره د ایټالیا د بهرنیو چارو وزیر لویجي دي مایو کړې.

نوموړي ویلي، نړۍ باید افغانستان له اقتصادي ناورینه وژغوري.

د ایټالیا د بهرنیو چارو وزیر ویلي، د طالبانو په رسمیت پېژندل ځکه ورته ستونزمن دي چې په خبره‌یې د طالبانو کابینه کې ۱۷ کسان داسې دي چې په ترهګریزو فعالیتونو تورن دي.

طالبان د اګسټ په ۱۵مه کابل ته ننوتل، خو تر اوسه هېڅ یوه هېواد هم د دوی حکومت په رسمیت نه‌دی پېژندلی.

په کابل کې د ځینو سفارتونو او سیاسي استازولیو مشرانو د طالبانو له چارواکو سره جلا جلا لیده کاته کړي دي.

اردوغان: د کابل هوایي ډګر په اړه له هوکړې مخکې باید ټول‌شموله حکومت اعلان شي

د ترکیې ولسمشر

د ترکیې ولسمشر رجب طیب اردوغان وایي، د کابل هوایي ډګر د مدیریت په اړه له هر ډول هوکړې مخکې غواړي چې طالبان ټول‌شموله حکومت اعلان کړي.

ترکیې کابل کې د طالبانو له واکمنۍ مخکې ویلي و چې د هوایي ډګر د مدیریت او امنیت په برخه کې همکارۍ ته چمتو ده.

اردوغان پرون سي بي اېس خبري شبکې ته ویلي چې افغانستان کې اوس حکومت ټول‌شموله نه‌دی او په خبره‌يې تر هغو چې ټول قشرونه په حکومت کې ونه‌ویني، افغانستان کې به حضور ونه‌لري.

طالبانو د هوایي ډګر په تخنیکي برخه کې له ترکیې او قطره د همکارۍ غوښتنه کړې، خو له دې سره‌یې مخالفت کړی چې ترکیه دې د هوایي ډګر د امنیت چارې هم پر غاړه واخلي.

 د جي شل ډله د افغانستان په اړه بحث کوي

د جي شل ډله

ټاکل شوې د جي شل ډله سبا سې شنبه ( د تلې په ۶مه) د افغانستان په اړه بحث وکړي.

روسي رسنیو پرون په دې اړه د روسیې د بهرنیو چارو وزارت د مرستیال سرګي ورشینین په حواله راپور ورکړ.

نوموړي ویلي، د جي شل ډلې استازي هوډ لري چې نیویارک کې د ملګرو ملتونو تر عمومي اسامبلې وروسته په متمرکزه ډول د افغانستان په اړه خبرې وکړي.

ایټالیا اوس د جي شل ډلې دوره‌یي مشري پر غاړه لري او د سبا ورځې غونډې مشري هم د ایټالیا صدر اعظم ماریو دراګي کوي.

جي شل ډله کې د نړۍ صنعتي او هغه هېوادونه راټول شوي چې اقتصاد یې د پراختیا په حال کې دی.

طالبانو د ملګرو ملتونو پر یوې پرېکړې اعتراض کړی

د ملګرو ملتونو عمومي اسامبلۍ

طالبانو د ملګرو ملتونو پر هغې پرېکړې اعتراض کړی چې د دوی استازی د ملګرو ملتونو په ۷۶مه عمومي اسامبلۍ کې ګډون او وینا نه شي کولای.

په قطر کې د طالبانو د سیاسي دفتر ویاند سهیل شاهین چې په ملګرو ملتونو کې د طالبانو د حکومت سفیر نومول شوی، نن ازادي راډیو ته وویل چې دوی حق لري د افغانستان استازیتوب وکړي او د ملګرو ملتونو په عمومي غونډه کې برخه واخلي.

شاهین زیاته کړه: "موږ د خلکو ملاتړ لرو او موږ د دې وړتیا لرو چې د خپلو خلکو او هېواد دفاع وکړو. نو دا زموږ حق دی چې د ملګرو ملتونو د اصولو پر بنسټ د ملګرو ملتونو له خوا په رسمیت وپيژندل شو."

تردې وړاندې د ملګرو ملتونو ویاند سټیفن دوجاریک ویلي و چې غلام محمد اسحاقزی به د دوشنبې په ورځ د ملګرو ملتونو په عمومي غونډه کې د افغانستان په استازیتوب وینا وکړي.

خو ښاغلي شاهین نن وویل یو کس چې د افغانستان په هېڅ برخه کنټرول نه لري په کومو اصولو د افغانستان په استازیتوب خبرې کولی شي.

په ملګرو ملتونو کې د افغان حکومت پخوانی استازی ښاغلی اسحاقزی اوس هم په خپله دنده کې پاتې دی ځکه لا د ملګرو ملتونو د اعتباربښنې کمېټې په دې اړه کومه پرېکړه نه ده کړې.

طالبان: نړیوال هوايي شرکتونه دې افغانستان ته الوتنې پیل کړي

د کابل هوايي ډګر

طالبانو له نړیوالو هوايي شرکتونو غوښتي چې افغانستان ته خپلې الوتنې بیا پیل کړي.

د طالبانو د بهرنیو چارو وزارت چارواکي وايي، د کابل په هوایي ډګر کې ستونزې حل شوي دي.

د کابل هوایي ډګر چې تېره میاشت د بهرنیانو او له خطر سره مخ افغانانو د ایستلو پر مهال لږ څه تخریب شوی وو، د قطر او ترکیې په مرسته بېرته جوړ شوی.

د امریکا په مشرۍ د خلکو د ایستلو د عملیاتو پر مهال له ۱۲۰ زرو زیات کسان چې په کې اکثر افغانان وو وایستل شول.

د پاکستان د نړیوال هوايي شرکت PIA په ګډون یو شمېر هوایي شرکتونه د کابل هوایي ډګر څخه محدود خدمات لري.

د بشري مرستو او مسافرینو د لېږد رالېږد ځینې پروازونه هم کېږي خو تجارتي الوتنې په بشپړه توګه لا نه دي پيل شوي.

نصرت حقپرست په یو اېف سي کې خپله لوبه پر ډن هوکر وبایلوده

د رزمي لوبو وتلی افغان لوبغاړی نصرت حقپرست

د رزمي لوبو وتلي افغان لوبغاړي نصرت حقپرست د رزمي لوبو د تر ټولو معتبره سازمان یو اېف سي په ۲۶۶ دور کې نن سهار وختي له اسټرالیايي لوبغاړي ډن هوکر سره چې د نړۍ اووم مقام لري ولوبېد.

د دوی لوبه د امریکا د لاس ویګاس په ټي ارینا کې وشوه چې زرګونه ننداره چیان هم ورته ناست وو.

حقپرست د درېیو راونډونو په پایله کې د ځینو نومرو په تفاوت لوبه وبایلوده خو له لوبې وروسته یې ټېنګار وکړ چې ژر به لاغښتلی راستنیږي.

حقپرست چې دوه اوونۍ مخکې یې مور وفات شوې وه ویلي چې په ډېرو سختو حالاتو کې یې لوبه وکړه.

نصرت حقپرست چې د یو اېف سي په سازمان کې لوبیږي د دیارلسو بریاوو او څلورو ماتو ریکارډ لري.

ملګري ملتونه: طالبان د ملګرو ملتونو اسامبلۍ کې ګډون نه شي کولای

طالبان

د ملګرو ملتونو ویاند ویلي، طالبان د ملګرو ملتونو په عمومي اسامبلۍ کې ګډون او وینا نه شي کولای.

سټيفن دوجاریک ویلي، د دوشنبې په ورځ به په عمومي اسامبلۍ کې په رسمي توګه غلام محمد اسحق زی د افغانستان په استازیتوب وینا وکړي.

اسحق زی د افغانستان د تېر حکومت سفیر و چې لا پر خپلې څوکۍ پاتې دی.

سره له دې چې د طالبانو د بهرنیو چارو وزیر امیر خان متقي د ملګرو ملتونو سرمنشي ته په لیک کې له هغه غوښتي چې د طالبانو استازي ته په عمومي اسامبلۍ کې د ګډون او وینا اجازه ورکړي خو ملګرو ملتونو لا په دې اړه پرېکړه نه ده کړې.

د ملګرو ملتونو د اعتبار بښنې کمېټې هم د افغانستان په تړاو کومه ناسته او پرېکړه نه ده کړې، په دې معنی چې د افغانستان د پخواني حکومت استازی محمد اسحق زی په خپل ځای دی.

د راپورونو له مخې طالبانو د خپل سیاسي دفتر غړی او ویاند سهیل شاهین په ملګرو ملتونو کې د خپل سفیر په توګه معرفي کړی چې لا ورسره ملګرو ملتونو موافقه نه ده کړې.

روسیه: د طالبانو حکومت پر رسمیت پېژندلو حاضر دمه غور نه کېږي

ارشیف، یو افغان د طالبانو د حکومت بیرغونه لېږدوي

د روسیې د بهرنیو چارو وزیر سرګی لاوروف په دې انتقاد کړی چې د نړیوالې ټولنې له لوري د طالبانو د حکومت د رسمیت پېژندلو پر موضوع حاضردمه غور نه کېږي.

لاوروف پرون ویلي چې روسیه له طالبانو سره اړیکې لري او د ملګرو ملتونو بندیزونه دا ډول اړیکې نه منع کوي.

لاوروف زیاته کړه: "د امنیت شورا په پرېکړه لیکونو کې اوسني بندیزونه داسې اړیکې نه منع کوي. برعکس اړتیا ده چې د ملګرو ملتونو پرېکړه لیکونه تجدید شي د دې لپاره چې سیاسي پروسه مخته ولاړه شي او دا چاره له طالبانو سره له کار او د موږ له اړیکو پرته ممکنه نه ده."

د طالبانو د بهرنیو چارو وزارت سرپرست امیر خان متقي نن خبرداری ورکړی چې نړیواله ټولنه دې پر دوی باندې د فشارونو اچولو ته د پای ټکی کېږدي.

هغه وویل، طالبانو له نړۍ سره ښې اړیکې غواړي خو که فشارونه دوام پیدا کړي له دې وضعیت به هغوی ګټه واخلي چې ټولې نړۍ ته ګواښ پېښولای شي.

د طالبانو د بهرنیو چارو وزارت د امریکا د وروستي اقدام هرکلی کړی

د افغانستان د بهرنیو چارو وزارت

د طالبانو د بهرنیو چارو وزارت د امریکا د وروستي اقدام چې له افغانستان سره د بشري مرستو لپاره یو شمېر ادارو ته د فعالیت او د پیسو د ځینو انتقالاتو ته اجازه ورکړې، هرکلی وکړ.

د بهرنیو چارو وزارت ویاند عبدالقهار بلخي پرون شنبې رسنیو ته په یوه استولي اعلامیه کې ویلي چې د اسلامي امارت د امریکا د خزانې وزارت وروستنی اقدام چې له مخې یې د امریکا دولتي ادارو، نړیوالو او غیر رسمي ټولنو او بانکونو ته اجازہ ورکړل شوې چي له افغانستان سرہ د خوراکي توکو او درملو مرستو رسولو ته اسانتیاوې برابرې کړي، هرکلی کوي.

په اعلامیه کې دغه راز هیله ښودل شوې چې د امریکا د متحدہ ایالاتو په شمول ټول ھېوادونه او نړیوال سازمانونه د افغانستان له حکومت سره اړیګې ټینګې او له افغان ولس سره بشري مرستو ته دوام ورکړي.

د متحد ایالاتونو د خزانې وزارت د تېرې جمعې په ورځ په یوه بیان کې وویل، د متحد ایالاتونو حکومت، مرستندویه ډلو او نړیوالو سازمانونو ته یې اجاره ورکړې چې له افغانستان سره بشري مرستې وکړي او بشري مرستندویه هلو ځلو کې ونډه واخلي.

د امریکا د خزانې وزارت دغه راز ویلي چې د زراعتي موادو، دارو درملو او طبي وسایلو ته یې هم اجازه ورکړې ده چې افغانستان ته صادر شي.

روسیه: لا هم غور نه دی شوی چې پر طالبانو بندیزونه لېري شي او که نه؟

د روسیې د بهرنیو چارو وزیر سرګي لاروف

د روسیې د بهرنیو چارو وزیر سرګي لاروف وایي، د ملګرو ملتونو امنیت شورا تراوسه په دې غور نه دی کړی چې ایا پر طالبانو لګول شوي بندیزونه لېرې کړي که نه؟

لاورف چې پرون شنبې یې په نیویارک کې د ملګرو ملتونو د عمومي اسامبلۍ ترڅنګ په یوه خبري کنفرانس کې څرګندونې کولې دغه راز وویل، ده تراوسه له هېڅ چا نه دي اوریدلي چې چا دې د ملګرو ملتونو له امنیت شوراغوښتي وي چې اوس یې اړتیا ده چې پر طالبانو دې لګول شوي بندیزونه کم یا بیخې لېرې شي.

روسیه د ملګرو ملتونو د امنیت شورا چې د بندیزونو په لېرې کولو یا لګولو کې مهم رول لري، د پنځو دایمي غړیو له ډلې یوه ده.

د روسیې د تاس خبري اژانس د راپور له مخې د روسیې د بهرنیو چارو وزیر دغه راز ویلي چې دغه بندیزونه له طالبانو سره د مسکو پر ارتباطاتو هېڅ اغېز نه لري.

ایټالیا کې زرګونو کسانو د افغان مېرمنو په ملاتړ لاریونونه وکړل

ارشیف، عکس تزئیني بڼه لري

په زرګونو کسانو د ایټالیا د پلازمېنې روم په ګډون په څو ښارونو کې د افغان ښځو په ملاتړ لاریونونه وکړل او غوښتنه یې وکړه چې نړیوال دې د طالبانو پر مشرانو فشارونو ته دوام ورکړي، څو ښځې پریږدي چې زده کړې وکړي او په ټولنه کې فعاله ونډه واخلي.

د اسوشیټېډ پرېس خبري اژانس د راپور له مخې په هغو ډلو کې چې دغه لاریونونه یې تنظیم کړي وو، د پنجیه بنسټ(فاونډېشن) هغه غړي هم و چې په تېرو شلو کلونو کې یې د افغان مېرمنو لپاره په اقتصادي پروژو کې ونډه اخیستې وه.

د دې بنسټ مرستیالې سیمونا لانځوني چې د روم په لاریون کې یې ګډون کړی و، وویل: "موږ باید فشارونو ته دوام ورکړو، څو ښځې وکولی شي نه یوازې زده کړې وکړي بلکې د خپل هېواد په سیاسي چارو کې هم ونډه واخلي."

د دغو لاریونونو چې شعار یې و، هغوی باید پرینه ږدو، ویناوالو د ایټالیا د بهرنیو چارو وزارت او د ملګروملتونو له خوا په افغانستان کې د ښځو د حقونو په اړه د یوې دایمي څارنې غوښتنه وکړه.

البانیا: د افغانستان خلک دې بیا یوه څلورلاره کې نه پرېښودل کېږي

د البانیا صدراعظم ایدي راما 

د البانیا صدراعظم ایدي راما وایي، د افغانستان خلک باید بیا په یوه څلورلاره کې پرینه ښودل شي.

ښاغلي راما دغه څرګندونې پرون د ملګرو ملتونو عمومي اسامبلۍ ته په وینا کې وکړې او په خپل هېواد کې یې د یو شمېر افغانانو منلو ته په اشاره وویل، هغه څه چې یې د سترګو پر وړاندې تیرېدل نه شوای کولای چې بې تفاوته پاتې شي.

ښاغلي راما زیاته کړه: "دا زموږ مسولیت دی چې له ټولو امکاناتو چې په وس کې مو دي کار واخلو ترڅوهغه افغانان یوازې پرینه ږدو چې یو ځل بیا ځان په یوه څلورلاره کې ویني. په دې هېواد کې د تېرو شلو کلونو هغه لاسته راوړنې چې ترې سترګې نه شي پټېدای خوندي کړو، بیا د یوې تورې دورې چې نړۍ یې مخکې شاهده وه، مخنیوي وکړو او پر وړاندې یې ودریږو."

د البانیا صدراعظم همدارنګه وویل، په خپله خاوره کې یې د افغان کډوالو هرکلی ځکه وکړچې دا له خطر سره د مخامخ شوېو پر وړاندې د دوی اخلاقي مسولیت و.

له کله چې طالبانو د اګسټ په ۱۵مه نېټه کابل ونیو، د کابل له نړیوال هوایي ډګره د بهرنیو وګړو ترڅنګ په لسګونو زره افغانان هم په پوځي الوتنو کې وایستل شول چې یو شمېر یې البانیا منلي دي.

طالبانو هرات کې د ۴ کسانو مړي په عام حضر کې راوځړول

د افغانستان په نقشه کې د هرات ولایت

طالبانو د هرات له ګڼه ګوڼې په ډکو ساحو کې د څلورو کسانو مړي په عام حضر کې راوځړول.

د طالبانو په حکومت کې د هرات د والي مرستیال شېر احمد عمار، ازادي راډیو ته وویل، دغو څلورو کسانو یو سوداګر او د هغه زوی نن سهار په هرات کې تښتولي وو.

د هغه په خبره د تښتول شوېو کسانو د خوشې کولو په عملیاتو کې څلور دخیل کسان وژل شوي او یو طالب ټپي شوی دی.

دا واک ته د طالبانو تر رسېدو وروستی لومړی وار دی دغه ډله هغه کسان چې ځینې کسان مجرم ګڼلي په عامه راځوړندوي.

د څو هېوادونو ښځینه مشرانو د افغان مېرمنو د ملاتړ همکاري وغوښته

آرشیف، ځینې افغان نجونې

د څو هېوادونو ښځینه مشرانو د افغان نجونو او ښځو د ملاتړ لپاره د نړیوالو د همکارۍ غوښتنه وکړه.

یوه یې د سلواکیا ولسمشره، زوزانا چپوتووا ده. هغې تېره شپه د ملګرو ملتونو عمومي غونډې ته له وړاندې په یوه ثبت شوي پیغام کې وویل: "په تېرو دوو لسیزو کې په افغانستان کې نجونو او ښځو خپل مشروع حقونه تجربه کول چې باید ونه تروړل شي. د ایسلنډ، نیوزیلنډ صدراعظمانو او نورو ښځینه سیاسي رهبرانو د افغان نجونو او ښځو د ملاتړ هڅه پیل کړې ده. له تاسو هیله کوم چې له دې حرکت سره ملګري شئ چې د کوټلو اقداماتو سبب شي. وروستی ټکی د حکومت د ټول­ګډونوالي په باب دی، که چېرې زیانګالي، ښځې، نجونې او اقلیتونه څنډې ته پرېږدو، دا نړۍ نه شو ژغورلی. د جنسیت پر اساس د زور زیاتي خاموشه وبا، زموږ د ټولنو پر سلامتۍ یو مرګونی ګوزار دی."

د طالبانو حکومت په خپله سرپرسته کابینه کې یوې ښځې ته هم ځای نه دی ورکړی او تر شپږم ټولګي پورته نجونو ته د ښوونځیو د تګ اجازه نه ده ورکړل شوې.

طالبانو ویلي چې د نجونو د ټولو ښوونځیو د بیا پرانیستنې په اړه کار روان دی او د شریعت په چوکاټ کې د ښځو حقونه رعایتوي.

نور راوښيه

XS
SM
MD
LG