امریکا د متحدو ایالاتونو د بهرنیو چارو وزیر وايي، واشنګټن دا ارزوي چې ایا طالبان په افغانستان کې د شخړې ختمولو ته جدي دي؟
انتوني بلېنکن وویل، د طالبانو ډله د سولې د ثابتو هڅو پرځای هڅه کوي چې په افغانستان زیاتې سیمې ونیسي.
دا څرګندونې داسې وخت کېږي چې ټاکل شوې د افغانستان او امریکا ولسمشران په څو ساعتونو کې سره وګوري او د افغانستان د روان وضعیت په باب بحث وکړي.
انتوني بلېنکن چې د پاریس په سفر بوخت دی، د جمعې په ورځ (د چنګاښ په ۴مه) وویل، په واشنګټن کې د افغانستان او امریکا د ولسمشرانو محمد اشرف غني او جو بایډن د کتنې په درشل کې پر افغان امنیتي ځواکونو حملې زیاتې شوي دي.
له ولسمشر غني سره په دې سفر کې پخوانی سیاسي مخالف عبدالله عبدالله هم ملګری دی او ټاکل شوې دوی په څو ساعتونو کې له ولسمشر بایډن سره د افغانستان پر وضعیت خبرې وکړي.
د افغانستان د سولې پروسه په داسې حال کې ټکنۍ شوې چې افغان امنیتي ځواکونه د وسله والو طالبانو د پسرلنیو عملیاتو پر وړاندې په مقابله بوخت دي.
د طالبانو دغو جګړو د ګڼو ولایتونو مرکزونو ته خطر پېښ کړی، له بلې خوا د دولتي ځواکونو د همکارۍ لپاره په څو ولایتونو کې په سلګونو ملېشه وو وسلې اخیستي دي.
د امریکا د بهرنیو چارو وزیر انتوني بلېنکن له خپل فرانسوي سیال سره په یوه خبري کنفرانس کې وویل: "موږ په افغانستان کې روان امنیتي وضعیت په دقت څارو، دا هم په غور ارزوو چې ایا طالبان په ټوله کې د افغانستان د روانې شخړې سوله ییز حل ته جدي دي؟"
د امریکا د متحدو ایالاتونو ولسمشر په اپرېل میاشت کې له افغانستانه د امریکايي ځواکونو د وتلو اعلان وکړ چې د مې میاشتې له لومړیو به د سېپټمبر تر ۱۱مې دا پروسه بشپړېږي.
له دې سره جوخت د افغانستان په بېلابېلو برخو کې د ناامنیو پېښې او د ولسوالیو لاس په لاس کېدل زیات شوي دي.
د امریکا دفاع وزارت اټکل کوي چې د افغانستان د ټولو ولسوالیو له ډلې د ۸۱ ولسوالیو پر مرکزونو کنټرول لري.
خو د افغانستان دفاع وزارت وخت ناوخت د ځینو ولسوالیو د بېرته نیولو او په ځینو نورو ولسوالیو کې د پوځي عملیاتو د پیل خبر ورکړی دی.
رویټرز اژانس لیکلي، له افغانستانه د امریکايي پوځیانو د نیمايي برخې وتل بشپړ شوي دي چې دا لړۍ به به په راروانو څو اوونیو کې بشپړه شي.
بل خوا چارواکي وايي چې د ۶۰۰ او ۷۰۰ ترمنځ نور امریکايي پوځیان به د ډیپلوماتانو د خوندیتوب د همکارۍ لپاره په افغانستان کې پاتې شي.
بلېنکن وايي: د طالبانو اقدامات د سولې د هڅو خلاف دي
د امریکا د بهرنیو چارو وزیر انتونتي بلېنکن وايي، واشنګټن په افغانستان کې روان وضعیت له نږدې څاري.
هغه نن جمعه په پاریس کې له خپل فرانسوي سیال سره یوه ګډ کنفرانس ته وویل، د ډیپلوماسۍ له لارې د افغانستان د روانې جګړې د ختمېدو لپاره د طالبانو هڅې د سولې د هڅو خلاف دي.
په وروستیو کې په افغانستان کې شخړې زیاتې شوي او ځینې ولسوالۍ لاس په لاس شوي دي:
ولسمشر محمد اشرف غني امریکا ته د خپل سفر په ترڅ کې د دغه هېواد د استازو د خونې له مشرې نانسي پلوسي او د ملي امنیت د شورا له مشاور سره ولیدل.
د کانګرس په ودانۍ کې ولسمشر غني او د استازو د خونې مشرې پلوسي د جمعې په ورځ (د چنګاښ څلورمه) تر ملاقات مخکې په لنډ ډول خبرې وکړې.
مېرمن پلوسي امریکا ته د ښاغلي غني سفر د کابل او واشنګټن لپاره مهم وباله او زیاته یې کړه چې د دواړو هېوادونو اړیکې ژورې دي.
نوموړې همدغه راز وویل چې په افغانستان کې د نورو پرمختګونو تر څنګ د ښځو او نجونو پرمختګ د پام وړ دی او په امریکا کې د افغان ښځو او نجونو پر راتلونکي باور موجود دی.
ښاغلي غني هم په لنډ ډول په خپلو خبرو کې د امریکا د دوامداره مرستو غوښتنه وکړه.
نوموړي د طالبانو بریدونه «ظالمانه» وبلل. هغه همدغه را ز د افغان ښځو او نجونو سره د مرستو په برخه کې د نانسي پلوسي څخه مننه وکړه.
ښاغلي غني وویل ، افغانستان کې د انتقال بهیر پیل شوی او هغه به پرې له امریکایي چارواکو سره په جزئیاتو وغږیږي.
د افغانستان د ملي مصالحې د عالي شورا مشر عبدالله عبدالله وايي ، افغان پلاوي په کانګرس کې د امریکا د دوو سیاسي ګوندونو له استازو سره وکتل.
ښاغلی عبدالله وايي، افغان پلاوي د افغانستان د سولې، امنیت، ثبات، بشري حقونو او پراختیا په برخو کې د امریکا هغو د دوامداره مرستو هرکلی وکړ.
نوموړي همدغه راز ویلي چې د امریکا د ملي امنیت د مشاور جېک سولیوان په ملاقات کې د امریکا په دوامداره مرستو، د ثبات لپاره د افغانانو پر یووالي او نورو کلیدي مسایلو خبرې شوې.
ښاغلي عبدالله وویل چې د سولې په خبرو او بشري مرستو په برخه کې ورته ډاډ ورکړل شو.
د افغانستان ولسمشر محمد اشرف غني او ځینو نورو لوړو پوړېو افغان چارواکو نن جمعه (د چنګاښ په ۴مه ) په پنټاګون کې د امریکا د دفاع له وزیر لوېډ استن سره ولیدل.
ښاغلي اسټن وویل چې هېواد یې له افغانستان سره پایداره مشارکت او په خاص ډول قوي دفاعي اړیکو ته ژمن دی.
نوموړي همدغه راز وویل، امریکا د افغان ځواکونو سره مهمو امنیتي او دفاعي مرستو ته ژمنه ده.
په دغه لیدنه کې ښاغلي غني په خپلو خبرو کې د دواړو هېوادونو اړیکو ته په کتو د انتقال نوی دور مهم وباله.
نوموړي وویل چې دواړو هېوادونو منلې چې اړیکې یې یو نوي فصل ته داخلېږي او هغه وړاندوینې چې ګنې امریکا به افغانستان یوازې پرېږدي، سمې نه دي.
ولسمشر غني وویل چې افغانستان به د اړیکو په نوي فصل کې د بهرنیو په همکارۍ او ملاتړ تکیه وي.
د افغانستان ملي مصالحې د عالي شورا مشر عبدالله عبدالله وویل، د انتقال بهیر باید په داسې شکل ترسره شي چې د دواړو هېوادونو ګډې ګټې خوندي وي.
هغه وویل، د سولې او ثبات دښمنان چې د هغه په خبره ترهګرې ډلې دي، د انتقال له دغه بهیر څخه ګټه وانه خلي: "هغوی چې زموږ په مقابل کې جنګېږي، فکر کوي چې یو فرصت ورته برابر شوی چې ګټه ترې واخلي. خو ډاډه یو چې د افغانستان د خلکو په ارادې، په جمهوریت کې په اتحاد او رهبریت، زموږ د اصلي شریک په توګه د امریکا او نورو ملګرو په دوامدارو ژمنو سره دا بهیر به په یو ګډ بري بدل شي."
له ښاغلي غني څخه وپوښتل شول چې د استخباراتي معلوماتو پر اساس ښايي شپږو میاشتو کې د افغانستان حکومت نسکور شي؟ هغه وویل، دا ډول ډېرې وړاندوینې شته چې غلطې ثابتې شوي دي.