د امریکا ولسمشر جوبایډن له خپل افغان سیال اشرف غني سره په کتنه کې له افغانستان سره د دوامدار مشارکت ژمنه وکړه او ویې ویل، امریکا به د خپلو سرتېرو له اېستلو سره-سره له افغانستان سره همکارۍ ته دوام ورکوي.
ښاغلی بایډن پرون د افغان ولسمشر او د ملي مصالحې د عالي شورا د رییس عبدالله عبدالله په ګډون د افغان حکومت د جګپوړو مشرانو کوربه و.
بایډن د خبرو له پیل مخکې له افغانستان سره د مرستو د دوام ډاډ ورکړ:"د افغانستان او د امریکا د متحدو ایالاتونو ترمنځ مشارکت پای ته نه رسېږي. بلکې دوام به وکړي. زموږ سرتېري له افغانستانه وځي خو زموږ ملاتړ پای ته نه رسېږي. موږ له افغان ځواکونو سره او همدا راز په اقتصادي او سیاسي برخو کې خپلو مرستو ته دوام ورکوو."
ښاغلي غني په خپلو خبرو کې یادونه وکړه چې افغان ملي دفاعي ځواکونو پرون جمعه، د هېواد په جنوب او شمال کې شپږ ولسوالۍ بېرته نیولې دي.
د امریکايي رسنیو د راپورونو له مخې د افغانستان او امریکا د ولسمشرانو له لیدنې څو ساعته مخکې د امریکا پوځ د افغانستان په شمال کې د طالبانو پر سنګرونو دوه هوايي حملې وکړې.
د پنټاګون یوه چارواکي فاکس نیوز چینل ته وویل چې دا حملې په بغلان ولایت کې د بې پیلوټه الوتکو په وسیله شوې دي.
د سپینې ماڼۍ ویاندې جېن ساکي هم پرون په خپله اوونیزه خبري غونډه کې له افغان ځواکونو سره د امریکا د پوځ د ملاتړ یادونه وکړه.
له مېرمن ساکي څخه پوښتنه وشوه چې که طالبان د زور له لارې د واک د نیولو هڅه وکړي، نو د متحدوایالاتونو اقدام به څه وي، دې په ځواب کې وویل، د امریکا پوځ د داسې یوه حالت د مخنیوي لپاره کافي امکانات لري: "زه نه غواړم له وخته مخکې څه ووایم یا وړاندوینه وکړم خو موږ له بهره د امکاناتو په ګډون د ظرفیتونو یوه مجموعه لرو چې په وخت سره به کار ترې واخېستل شي. ولسمشر بایډن دا یادونه د خپل اعلان په پیل کې کړې وه."
له افغان مشرانو سره د بایډن له غونډې وروسته ولسمشر اشرف غني په یوه خبري کنفرانس کې خبرې وکړې او د هغو مرستو یادونه یې وکړه چې ولسمشر بایډن او د دفاع وزیر لویډ اسټن یې ژمنه ورسره کړې ده.
ښاغلي غني وویل چې ولسمشر بایډن له افغانستان سره د ۳،۳ میلیارد ډالرو مرستې وړاندیز کانګرس ته استولی دی او زیاته یې کړه چې د کانګرس غړو هم ده ته د دې مرستو د تصویب ډاډ ورکړی.
ولسمشر غني د افغان ځواکونو د تجهیز او تمویل په برخه کې د پنټاګون د مشر ژمنې هم یادې کړې او واشنګټن ته یې خپل سفر بریالی وباله.
ښاغلي غني زیاته کړه: "اصلي خبره ساده ده. ایا امریکا افغانستان خوشې کوي او که د یو نوي فصل په برخه کې دوست، ملاتړ او هم پیمانه اوسي؟ د دې پوښتنې ځواب په قطعي ډول مثبت دی او زه باور لرم چې دا سفر یو بریالی سفر و."
له بایډن سره تر کتنې مخکې افغان مشرانو د دفاع له وزیر لوېډ اسټن او له هغه مخکې د استازو جرګې له مشرې نانسي پلوسي او همدا راز د جرګې له جمهوریپالو غړو سره وکتل.
ښاغلي غني د امریکا په سنا کې د اقلیت له مشر مېچ مککونل سره هم وکتل.
د افغانستان ولسمشر محمد اشرف غني او ځینو نورو لوړو پوړېو افغان چارواکو نن جمعه (د چنګاښ په ۴مه ) په پنټاګون کې د امریکا د دفاع له وزیر لوېډ استن سره ولیدل.
ښاغلي اسټن وویل چې هېواد یې له افغانستان سره پایداره مشارکت او په خاص ډول قوي دفاعي اړیکو ته ژمن دی.
نوموړي همدغه راز وویل، امریکا د افغان ځواکونو سره مهمو امنیتي او دفاعي مرستو ته ژمنه ده.
په دغه لیدنه کې ښاغلي غني په خپلو خبرو کې د دواړو هېوادونو اړیکو ته په کتو د انتقال نوی دور مهم وباله.
نوموړي وویل چې دواړو هېوادونو منلې چې اړیکې یې یو نوي فصل ته داخلېږي او هغه وړاندوینې چې ګنې امریکا به افغانستان یوازې پرېږدي، سمې نه دي.
ولسمشر غني وویل چې افغانستان به د اړیکو په نوي فصل کې د بهرنیو په همکارۍ او ملاتړ تکیه وي.
د افغانستان ملي مصالحې د عالي شورا مشر عبدالله عبدالله وویل، د انتقال بهیر باید په داسې شکل ترسره شي چې د دواړو هېوادونو ګډې ګټې خوندي وي.
هغه وویل، د سولې او ثبات دښمنان چې د هغه په خبره ترهګرې ډلې دي، د انتقال له دغه بهیر څخه ګټه وانه خلي: "هغوی چې زموږ په مقابل کې جنګېږي، فکر کوي چې یو فرصت ورته برابر شوی چې ګټه ترې واخلي. خو ډاډه یو چې د افغانستان د خلکو په ارادې، په جمهوریت کې په اتحاد او رهبریت، زموږ د اصلي شریک په توګه د امریکا او نورو ملګرو په دوامدارو ژمنو سره دا بهیر به په یو ګډ بري بدل شي."
له ښاغلي غني څخه وپوښتل شول چې د استخباراتي معلوماتو پر اساس ښايي شپږو میاشتو کې د افغانستان حکومت نسکور شي؟ هغه وویل، دا ډول ډېرې وړاندوینې شته چې غلطې ثابتې شوي دي.
ولسمشر محمد اشرف غني امریکا ته د خپل سفر په ترڅ کې د دغه هېواد د استازو د خونې له مشرې نانسي پلوسي او د ملي امنیت د شورا له مشاور سره ولیدل.
د کانګرس په ودانۍ کې ولسمشر غني او د استازو د خونې مشرې پلوسي د جمعې په ورځ (د چنګاښ څلورمه) تر ملاقات مخکې په لنډ ډول خبرې وکړې.
مېرمن پلوسي امریکا ته د ښاغلي غني سفر د کابل او واشنګټن لپاره مهم وباله او زیاته یې کړه چې د دواړو هېوادونو اړیکې ژورې دي.
نوموړې همدغه راز وویل چې په افغانستان کې د نورو پرمختګونو تر څنګ د ښځو او نجونو پرمختګ د پام وړ دی او په امریکا کې د افغان ښځو او نجونو پر راتلونکي باور موجود دی.
ښاغلي غني هم په لنډ ډول په خپلو خبرو کې د امریکا د دوامداره مرستو غوښتنه وکړه.
نوموړي د طالبانو بریدونه «ظالمانه» وبلل. هغه همدغه را ز د افغان ښځو او نجونو سره د مرستو په برخه کې د نانسي پلوسي څخه مننه وکړه.
ښاغلي غني وویل ، افغانستان کې د انتقال بهیر پیل شوی او هغه به پرې له امریکایي چارواکو سره په جزئیاتو وغږیږي.
د افغانستان د ملي مصالحې د عالي شورا مشر عبدالله عبدالله وايي ، افغان پلاوي په کانګرس کې د امریکا د دوو سیاسي ګوندونو له استازو سره وکتل.
ښاغلی عبدالله وايي، افغان پلاوي د افغانستان د سولې، امنیت، ثبات، بشري حقونو او پراختیا په برخو کې د امریکا هغو د دوامداره مرستو هرکلی وکړ.
نوموړي همدغه راز ویلي چې د امریکا د ملي امنیت د مشاور جېک سولیوان په ملاقات کې د امریکا په دوامداره مرستو، د ثبات لپاره د افغانانو پر یووالي او نورو کلیدي مسایلو خبرې شوې.
ښاغلي عبدالله وویل چې د سولې په خبرو او بشري مرستو په برخه کې ورته ډاډ ورکړل شو.
بلېنکن وايي: د طالبانو اقدامات د سولې د هڅو خلاف دي
د امریکا د بهرنیو چارو وزیر انتونتي بلېنکن وايي، واشنګټن په افغانستان کې روان وضعیت له نږدې څاري.
هغه نن جمعه په پاریس کې له خپل فرانسوي سیال سره یوه ګډ کنفرانس ته وویل، د ډیپلوماسۍ له لارې د افغانستان د روانې جګړې د ختمېدو لپاره د طالبانو هڅې د سولې د هڅو خلاف دي.
په وروستیو کې په افغانستان کې شخړې زیاتې شوي او ځینې ولسوالۍ لاس په لاس شوي دي:
