- ایپاک ټایمز
ایپاک ټایمز Epoch Times ورځپاڼې په وروستۍ ګڼه کې لیکلي چې له افغانستانه د ټولو بهرنیو ځواکونو د وتلو په حال کې د بې ثباتۍ یو حالت حاکم شوی او د نړۍ قدرتونه دغلته د خپل نفوذ پیدا کولو په هڅه کې دي.
ایپاک ټایمز چې په نیویارک کې د یوې لویې نشراتي شبکې ایپاک میډیا ګروپ یوه څانګه ده، د کارپوهانو په حواله وايي، د افغانستان د سولې بهیر په دې پورې تړلی چې د نړۍ قدرتونه یې په اړه همکارۍ کوي که سیالۍ.
له افغانستانه د ټولو بهرنیو ځواکونو د وتلو نېټې ته نژدې څلور میاشتې پاتې دي، همدې څلورو میاشتو کې د نړۍ او سیمې قدرتونه په دې بحثونه کوي چې له افغانستان سره یې راتلونکې سیاسي اړیکې څه ډول وي؟
ورځپاڼې د منځني ختیځ د خپلواک تحلیلګر حمید ابراهیم په حواله لیکلي، د افغانستان ناورین سیمه ییزې ریښې لري او حل لاره یې هم باید سیمه کې ولټول شي.
دغه تحلیلګر ورځپاڼې ته ویلي، که پاکستان، ایران او قطر د طالبانو مالي او پوځي ملاتړ بند او یوه سیاسي جوړ جاړي ته هڅې وکړي، هغه صورت کې کولای شي پر طالبانو او افغان حکومت د سولې په هدف فشار راوړي.
مطلب کې وړاندې راغلي، کله چې ټول بهرني ځواکونه له افغانستانه ووځي، نارامۍ به نورې هم ډېرې شي.
د ایپاک ټایمز سپارښتنه دا ده چې که طالبان له یوه پوځي قدرته په سیاسي قدرت بدل شي، دا به یو مثبت ګام وي.
- میلیټري ټایمز
له امریکا خپرېدونکې میلیټري ټایمز ورځپاڼې بیا پر دې اندېښنې یوه لیکنه خپره کړې چې افغانستان کې د امریکایي ځواکونو تجهیزات ممکن د طالبانو لاس ته ورشي.
ورځپاڼې په عراق کې ورته تجربې ته اشاره کړې او لیکلي یې دي، کله چې امریکایي ځواکونه له دغه هېواده ووتل، د دوی یو شمېر موټر او تجهیزات د اسلامي دولت ډلې یا داعش ته په لاس ورغلل.
میلېټري ټایمز د امریکایي چارواکو په حواله لیکلي، دوی یو شمېر پوځي وسایل افغان ځواکونو ته سپاري، خو دې چارواکو دا ډاډ نه دی ورکړی دا به د طالبانو لاس ته نه ورځي.
ورځپاڼې د ځینو امریکایي قانون جوړونکو اندېښنې هم را اخیستي چې ویلې یې دي، له افغانستانه د دوی د ځواکونو له وتلو وروسته ځینې مهمې مسالې ګونګې پاتې دي.
افغانستان کې د بهرنیو ځواکونو د ژباړونکو بې برخلیکه پاتې کېدل او راتلونکې کې د ترهګرۍ پر وړاندې د امریکایي ځواکونو مبارزه هغه څه دي چې د امریکا قانون جوړونکو ګونګ موضوعات بللي.
