د لاسرسۍ وړ لېنکونه

تازه خبر
سه شنبه ۲۸ غویی ۱۴۰۰ کابل ۰۳:۳۹

خبرونه

د افغانستان دفاع وزارت: تېر یوه شپه او ورځ کې ۱۸۱ وسله‌وال طالبان ووژل شول

ارشیف، هلمند کې د افغان ځواکونو عملیات

د افغانستان دفاع وزارت وایي، تېر یوه شپه او ورځ ۱۸۱ وسله‌وال طالبان د افغان ځواکونو په عملیاتو کې وژل شوي او ۸۷ نور یې ټپيان دي.

د دغه وزارت‌ مرستیال ویاند فواد امان ازادي راډیو ته په یوه لېږلي پیغام کې وویل طالبانو ته زیاته مرګ‌ژوبله په هلمند کې اوښتې، خو په لغمان، غزني،کندهار، زابل، هرات او بغلان کې هم دا ډله د ده په خبره له ماتو سره مخ شوې.

ښاغلی امان زیاتوي: "بریدونه‌یې په ډېرو ځایونو په تېره بیا هلمند، لغمان، غزني او بغلان کې ځواب شول. په هلمند کې له ډېرې مرګ‌ژوبلې سره مخ شول. برید یې له ماتې سره مخ شو. په ټوله کې تېر ۲۴ ساعته ۱۸۱ وسله‌وال طالبان وژل شوي او لسګونه نور ټپیان دي."

امان زیاته کړې چې په هلمند کې د وژل شویو طالبانو ترمنځ د القاعده ډلې ۲۲ پاکستاني غړي هم شامل دي.

د وسله‌والو طالبانو ویاند قاري یوسف احمدي بیا د افغانستان دفاع وزارت له‌خوا د طالبانو د دومره شمېر د مرګ‌ژوبلې ادعا رد کړې او ویلي یې دي د دوی یوازې یو کس په هلمند کې وژل شوی.

احمدي ادعا کړې افغان پوځیانو ته‌یې درنه مرګ‌ژوبله اړولې.

د ورځې تازه خبرونه دلته ولولئ

افغانستان: تیرکال سعودي ته صادرات دوه برابره زیات شوي

ریاض کې د افغانستان سفارت: د کرونا وبا محدودیتونو سربېره، د ۲۰۱۹ کال په پرتله په ۲۰۲۰ کال کې سعودي عربستان ته د افغانستان صادراتو له ۱۰۰ سلنې ډېره وده وکړه.

په ریاض کې د افغانستان سفارت وایي، سعودي عربستان ته تېر ۲۰۲۰ میلادي کال کې د افغان سوداګرو صادرات دوه برابره زیات شوي دي.

د سفارت د خبرپاڼې له مخې د سعودي رسمي شمېرې ښيي چې ۲۰۱۹ میلادي کال کې سعودي ته د افغانستان د صادراتو ارزښت څه باندې ۱۳ میلیونه ډالره وو.

د خبرپاڼې له مخې ۲۰۲۰ میلادي کال کې له کرونا وبا سره-سره د صادراتو ارزښت څه باندې ۲۸ نیم میلیونه ډالرو ته لوړ شو.

سعودي عربستان ته د افغانستان صادرات تر ډېره زعفران، وچه مېوه او قالینې دي چې د دواړو هېوادونو ترمنځ د هوایي دهلیز له لارې لېږدول شوي دي.

په ریاض کې د افغانستان سفارت اټکل کوي چې روان ۲۰۲۱ میلادي کال کې به دغه هېواد ته د صادراتو ارزښت څه باندې ۴۲ میلیونه ډالره وي.

ولسمشر غني په هلمند کې د داعي په نوم د څلور لاري نومول منظور کړل

لښکرګاه کې د داعي په نوم څلور لاری

د افغانستان ولسمشر په هلمند کې د ازادي راډیو د وژل شوي خبریال الیاس داعي په نوم د یوې څلور لارې نومول منظور کړل.

د ولسمشرۍ ماڼۍ د چارو ادارې مطبوعاتي دفتر ویلي، دغه وړاندیز د هلمند د خبریالانو له خوا د اطلاعاتو او فرهنګ وزارت په وسیله تر محمد اشرف غني رسیدلی و.

دغه دفتر وایي، ښاغلي غني پرون دوشنبه (د غويي ۲۷مه) دغه وړاندیز ومانه چې له مخې به یې لښکرګاه کې یوه څلور لارې د داعې په نوم شي.

هلمند کې د ازادي راډيو خبریال الیاس داعي شااوخوا ۷ میاشتې مخکې د ماین په چاودنه کې ووژل شو.

سپینې ماڼۍ: امریکا غزه کې د جګړې د پای ته رسېدو هڅو ته ژمن دی

غزه کې اوسنی جګړه ییز حالت

سپینې ماڼۍ په غزه کې د جګړې پایته رسېدو ته د پيل شوېو هڅو د دوام غوښتنه وکړه.

د سپینې ماڼۍ ویاندې جین ساکي پرون دوشنبه (د غويي ۲۷مه) خبریالانو ته وویل، هېواد یې د اسراییل او فلسطینیانو د جګړې د پای ته رسېدو هڅو ته ژمن دی، خو ويې نه ویل چې هېواد یې د سملاسي اوربند غوښتونکی دی.

نوموړې وویل: "زموږ هدف، زموږ تمرکز او زموږ هر اقدام او هره اعلامیه د تاوتریخوالي د کمولو او ناورین ته د پای ورکولو لپاره ده."

ساکي زیاته کړه، نه شي کولی ټولې پیل شوې هڅې په علني ډول بیان کړي.

اوس په غزه کې د اسراییل او فلسطینیانو جګړه دویمې اوونۍ ته غځیدلې ده او له دوه سوو ډېر کسان په کې وژل شوي دي.

بلېنکن خپل ډنمارکي سیال سره د شمال قطب په اړه خبرې پیل کړې

د امریکا د بهرنیو چارو وزیر انتوني بلېنکن د ډنمارک د بهرنیو چارو له وزیر میت فیریدرایکسین سره

د امریکا د بهرنیو چارو وزیر انتوني بلېنکن د شمال قطب د راتلونکي په اړه خبرې د ډنمارک د بهرنیو چارو له وزیر میت فیریدرایکسین له کتنې پيل کړې.

د امریکا د بهرنیو چارو وزارت د خبرپاڼې له مخې، بلېنکن په دغه ملاقات کې د اقلیم له بدلون سره د مبارزې د ګډو اهدافو پر اهمیت او د شنې ټکنالوژۍ پر پراختیا خبرې کړي دي.

اعلامیه کې راغلي چې د شمال قطب په اړه له ډنمارک سره همکارۍ هم د دغو لیدو کتو یوه برخه وه.

ټاکل شوې بلېنکن له ډنمارک وروسته ایسلنډ ته ولاړ شي او سبا 'د مې په نولسمه' د شمال قطب د شورا په غونډه کې ګډون وکړي.

بلېنکن به وروسته له خپل روسي سیال سرګي لاوروف سره هم وګوري.

لاوروف پرون وویل، شمال قطب د روسیې د خاورې یوه برخه ده او دا یوازې د دوی د هېواد مسوولیت دی چې له ساتنې یې ځان ډاډه کړي.

د شمال قطب شورا دا مهال اته غړي لري چې ډنمارک، فنلنډ، ناروې، سوېډن، کاناډا، ایسلنډ، روسیه او امریکا دي.

روتردام ښار د یورو ویژن سندرو د سیالۍ کوربه توب کوي

ارشیف، د یورو ویژن د سندرو سیالۍ

د هالند روتردام ښار د یورو ویژن سندرو د سیالۍ کوربه توب ته چمتو کېږي.

له کرونا وبا سره- سره چې تېرکال یې دغه سیالۍ ځنډولې وې، د یورو ويژن وروستۍ برنامه د مې په ۲۲مه ترسره کېږي.

ټاکل شوې له نن شپې د مې تر شلمې پورې د سیالۍ د نیمه پای ګټونکي اعلان شي.

د هالنډ حکومت دغې سیالۍ ته ډېر چمتوالی نیولی او ګډونوالو ته یې ویلي، هرو ۴۸ ساعتونو کې یو ځل باید د کرونا معاینه وکړي.

۲۰۱۹ میلادي کال کې هالنډي سندرغاړی دونکان لاورینس د یوروویژن سیالیو اتل شو او خپل هېواد یې د ۲۰۲۰ کال لپاره د سیالۍ کوربه کړ.

تېر کال بیا دا سیالۍ ترسره نه شوې.

اسرائیل وايي د حماس ډلې د نهو قوماندانانو کورونه‌یې ویجاړ کړي

نن سهار وختي پر غزې تړانګې د اسرائیل هوايي بریدونه

اسرائیل وايي چې جنګي الوتکو یې نن سهار د غزې پر تړانګه د بمبارۍ لړۍ بیا پیل کړې او په دې ترڅ کې یې د فلسطیني وسله‌والو ۱۵ کیلو متره سمڅې او د حماس ډلې د نهو قوماندانانو کورونه ویجاړ کړي دي.

په یوه هوايي حمله کې په غزې ښار کې یوه درې پوړیزه ودانۍ سخته زیانمنه شوه، خو اوسېدونکو یې ویلي دي چې اسرائیلي پوځ له حملې ۱۰ دقیقې مخکې دوی ته خبرداری ورکړی او ټول ترې ووتل.

د اسرائیلو د نننیو هوايي حملو د تلفاتو په اړه سمدستي جزئیات نه‌شته، خو د فلسطین د روغتیا وزارت وايي په غزه کې په پرونیو بمباریو کې د اتو ماشومانو او دوو ډاکترانو په ګډون لږترلږه ۴۲ فلسطینیان وژل شوي دي.

د اسرائیل پوځ ویلي دي چې د ترورېستانو ۳۵ اهداف‌یې په نښه کړي دي. اسرائیل همداراز وايي، فلسطیني وسله‌والو تېره شپه د اسرائیلو پر ښارونو ۶۰ توغندي وویشتل په داسې حال کې چې د دې توغندیو شمېر پرون ۱۲۰ او وړمه ورځ ۲۰۰ و.

په غزه کې د اسرائیل په بمباریو کې د وژل شویو فلسطینیانو ټول شمېر ۱۹۷ ته لوړ شوی، خو ژغورونکي په ویجاړو ودانیو کې په نورو کسانو پسې ګرځي.

د اسرائیلو د هوايي حملو له کبله په ډېرو سیمو کې برېښنا پرچاو شوې ده او سلګونه ودانۍ ویجاړې شوي.

د فاریاب والي له اوږدو لانجو وروسته بالاخره په کار پیل وکړ

د فاریاب نوی ټاکل شوی والي محمد داوود د ځینو سیمه‌ییزو چارواکو په حضور کې معرفي شو

د افغانستان د سیمه‌ییزو ارګانونو خپلواکه اداره وايي، د فاریاب نوي والي له اوږدو لانجو وروسته بالاخره په کار پیل وکړ.

د سیمه‌ییزو ارګانونو د خپلواکې ادارې ویاندې نرګس مومند نن په یو وېډیويي پیغام کې ویلي چې د فاریاب نوي والي محمد داوود له یو څه ستونزو سره سره نن په کار پیل وکړ.

اغلې مومند زیاتوي: "که څه هم موږ په فاریاب ولایت کې مخکې ځینې ستونزې درلودې، خو له نېکه مرغه دا ستونزې حل شوي او د فاریاب نوی والي رسماً معرفي شوی او کار یې پیل کړی دی."

د فاریاب ولایت رسمي سرچینو ویلي چې ښاغلی داوود د فاریاب د ولایتي شورا د رئیس او نورو چارواکو په حضور کې معرفي شو.

د ښاغلي داوود له معرفي کېدو سره هم‌مهاله د عبدالرشید دوستم په مشرۍ د ملي اسلامي جنبش سلګونه پلویان چې د نوموړي له ټاکنې سره‌یې مخالفت کاوه د اعتراض لپاره د مرکز میمنې لارو کوڅو ته راووتل.

یوې سیمه‌ییزې سرچینې چې د موضوع د حساسیت له کبله نه‌غواړي هویت‌یې افشا شي ازادي راډیو ته وویل چې محمد داوود د پراخو اعتراضونو له کبله د ولایت د مقام پر ځای د ۲۰۹ شاهین قول اردو په یوه قرارګاه کې معرفي شو.

د امریکا د بهرنیو چارو وزیر ډنمارک، ایسلنډ او ګرینلنډ ته روان شو

د امریکا د بهرنیو چارو وزیر انتوني بلېنکن

د امریکا متحده ایالاتو د بهرنیو چارو وزیر پرون له واشنګټن څخه ډنمارک، ایسلنډ او ګرینلنډ ته په پنځه ورځني سفر روان شو.

انتوني بلېنکن به په دې ډیپلوماتیک سفر کې په ایسلنډ کې د شمالي قطب د شورا په یوه غونډه کې هم برخه واخلي.

وروسته له هغې چې جو بایډن د امریکا د ولسمشر په توګه خپله دنده پیل کړې، بلېنکن به د لومړي وار لپاره له خپل روسي سیال سرګي لاوروف سره په دې غونډه کې مخامخ شي.

انتوني بلېنکن به نن په کوپنهاګن کې د ډنمارک له چارواکو سره هم وګوري.

د امریکا د بهرنیو چارو وزارت وايي، ښاغلی بلېنکن به د اقلیمي بدلون په وړاندې پر مبارزه او د اتلانتیک سمندرګي په شااوخوا کې د ګډو ګټو پر پیاوړتیا بحث وکړي.

ښاغلی بلېنکن به نن وروسته ایسلنډ ته ځي چې د دغه هېواد له چارواکو سره هم پر ځینو مسایلو خبرې وکړي.

اسرائیل نن هم د غزې ښار پر ګڼو ساحو درنې بمبارۍ وکړې

پر فلسطین د اسرائیل هوايي حمله

د اسرائیل جنګي الوتکو نن دوشنبه هم د غزې ښار پر ګڼو ساحو درنې بمبارۍ وکړې.

دا هوايي حملې په داسې حال کې وشوې چې له تېرې اوونۍ د دې پیل شوي خونړي تاوتریخوالي د بندېدو لپاره غوښتنې مطرح شوې دي. پرون د دې تاوتریخوالي خونړۍ ورځ وه.

راپورونه وايي، نن سهار لسګونه هوايي حملو غزې ښار ولړزاوه.

د اسرائیل دفاعي ځواکونو په یوه لنډه اعلامیه کې ویلي چې دوی په غزې تړانګه کې ترورېستي اهداف ویشتلي دي.

دغه حملې د برېښنا د پرچاوۍ او د سلګونو ودانیو د تخریب سبب شوي.

د فلسطین روغتیا وزارت وايي، په یوه حمله کې په غزه کې ۴۲ فلسطینیان وژل شوي چې لږ تر لږه ۸ تنه په‌کې ماشومان او دوه تنه ډاکتران دي.

په ټوله کې په غزه کې د وژل شویو فلسطینیانو شمېر ۱۹۷ ته زیات شوی او ژغورونکي په نورو کسانو پسې په نړېدلو ودانیو کې ګرځي.

د نننیو حملو د مرګ‌ژوبلې په اړه لا راپور نه‌دی ورکړل شوی.

د امریکا او پاکستان د بهرنیو چارو وزیرانو پر افغان سولې خبرې وکړې

د امریکا د بهرنیو چارو وزیر انتوني بلېنکن

د امریکا او پاکستان د بهرنیو چارو وزیرانو د افغانستان د سولې په پروسه باندې خبرې کړې دي.

د پاکستان د بهرنیو چارو وزارت یکشنبه ماښام په دې اړه اعلامیه ورکړې ده.

د اعلامیې له مخې د پاکستان د بهرنیو چارو وزیر شاه محمود قریشي خپل امریکايي سیال انتوني بلېنکن ته ډاډ ورکړی چې هېواد یې د افغانستان د سولې له پروسې کلک ملاتړ کوي.

هغه دا ټینګار هم کړی چې له سیاسي حل لارې سولې ته رسېدل د ټولو ښکېلو افغان خواوو، سیمې او نړیوالې ټولنې ګډ مسؤلیت دی.

په اعلامیه کې د قریشي په حواله زیاته شوې چې د پوځیانو مسؤلانه ایستل، د تاوتریخوالي کمښت، دایمي اوربند او د ټول‌شموله سیاسي جوړجاړي د ترلاسه کولو لپاره د شته موقع کارول خورا ارزښت لري.

لغمان ولایت کې تندر دوه تنه وژلي

د افغانستان عمومي نقشه کې لغمان ولایت

د لغمان ولایت په قرغیو ولسوالۍ کې تندر دوه تنه وژلي دي.

دا خبره د لغمان ولایت مطبوعاتي دفتر په یوه اعلامیه کې کړې ده.

د اعلامیې له مخې، دا پېښه یکشنبه مازیګر مهال د قرغیو ولسوالۍ د چهارباغ په مفتي کلا سیمه کې شوې ده.

د تندر پرېوتو په دې پېښه کې د وژل شویو نومونه حسیب‌الله او نصیر یاد شوي.

بل چا ته په دې پېښه کې زیان نه‌دی اوښتی.

د ملا عبدالمنان نیازي زوی د هغه ځای ناستی وټاکل شو

د وسله‌والو طالبانو د انشعابي ډلې مخکېنی مرستیال ملا عبدالمنان نیازی

د وسله‌والو طالبانو د انشعابي ډلې د مرستیال ملا عبدالمنان نیازي مړی پرون په هرات کې خاورو ته وسپارل شو او زوی یې د هغه ځای ناستی وټاکل شو.

د راپورونو له مخې د ملا عبدالمنان نیازي د جنازې په مراسمو کې د طالبانو د انشعابي ډلې سلګونه پلویانو او غړو محمد خالد نیازی خپل مشر وټاکه.

خالد نیازي ازادي راډیو ته وویل چې د خپل پلار لار به تعقیبوي: "زه هم د حاجي صاحب هیلې پوره کوم. د هغه هیلې او اهداف یو امن افغانستان او ارامه او خوشحاله خلک و."

ملا عبدالمنان نیازی د طالبانو په دوره کې د بلخ او هرات والي پاتې شوی و. هغه د طالبانو د پخواني مشر ملا اختر منصور تر وژل کېدو وروسته د ملا محمد رسول په مشرۍ د انشعابي ډلې مرستیال وټاکل شو.

د هرات والي عبدالوحید قتالي ازادي راډیو ته وویل ملا نیازی تېره چهارشنبه د ادرسکن او ګذرې ولسوالیو ترمنځ په یوه برید کې سخت ټپي شوی و.

دی د درملنې لپاره کابل ته انتقال شوی و چې همالته‌یې ساه ورکړه او مړی یې یکشنبه هرات ته یوړل شو.

د فلسطیني ادارې د بهرنیو چارو وزیر اسرائیل په جنګي جنایتونو تورن کړ

د فلسطیني ادارې د بهرنیو چارو وزیر ریاض‌المالکي

د فلسطیني ادارې د بهرنیو چارو وزیر ریاض‌المالکي اسرائیل په غزه تړانګه کې په جنګي جنایتونو تورن کړ.

المالکي د ملګرو ملتونو امنیت شورا په پرونۍ بېړنۍ غونډه کې وویل د هغه وحشت بیانولو ته الفاظ نه‌لري چې د فلسطین په خلکو تپل شوی.

د هغه په خبره اسرائیل په دې هڅه کې دی چې فلسطینیان له بیت‌المقدسه ختم کړي.

اخوا د ملګرو ملتونو عمومي منشي انتونیو ګوترش خبرداری ورکړ چې د اسرائیل او حماس جګړه به منځنی ختیځ یوه تازه ناورین ته یوسي چې د ده په خبره د کنټرول وړ به نه‌وي.

هغه د فلسطین او اسرائیلو ترمنځ د راپورته شوي کړکېچ د سمدستي بندېدو غوښتنه وکړه.

اخوا د اسرائیل پوځ وايي چې په غزه تړانګه کې د حماس ډلې د سیاسي څانګې د مشر یحیی سینوار په کور باندې یې هوایي برید کړی.

په دې برید کې لږ تر لږه ۴۰ کسان وژل شوي، خو نه‌ده معلومه چې سینوار هم مړ دی که څنګه.

د فلسطین روغتیايي چارواکو ویلي تېر یوه اوونۍ د اسرائیلو په بریدونو کې نږدې ۲۰۰ فلسطینیان وژل شوي چې په‌کې ۵۵ ماشومان او ۳۳ ښځې شامل دي.

اسرائیل بیا ویلي چې د دوی لور ته ۱۰ کسان وژل شوي، یو پنځه کلن ماشوم او یو سرتېری هم په‌کې شته.

د چک جمهوریت ولسمشر د روسیې وروستی اقدام احمقانه یاد کړ

(ښی-کین) د روسیې ولسمشر ولادیمیر پوتین او د چک جمهوریت ولسمشر میلوش زیمان

د چک جمهوریت ولسمشر میلوش زیمان د روسیې هغه اقدام چې چک‌یې د غیر دوستو هېوادونو په ډله کې شامل کړی، احمقانه یاد کړی.

روسیې چک جمهوریت او امریکا د "غیر دوست" هېوادونو لېست کې شامل کړي او ګواښ‌یې کړی چې که نور هېوادونه هم د مسکو په وړاندې غیر دوستانه اقدامات وکړي په دې لېست کې به‌یې واچوي.

د چک جمهوریت ولسمشر د روسیې د دې کار په غبرګون پرون وویل پخوانیو دوستانو ته د دښمن خطاب کول یو احمقانه کار دی چې روسیې کړی.

د چک جمهوریت او روسیې ترمنځ اړیکې له یو څه وخت راهیسې ځکه کړکېچنې شوي چې چک جمهوریت ځیني روسي ډیپلوماتان د جاسوسۍ په تور له خپلې خاورې وایستل.

چک جمهوریت د اپرېل په لومړیو کې روسیه د هغې چاودنې تر شا ښکېله وبلله چې ۲۰۱۴ کال په چک کې وشوه او دوه کسان په‌کې ووژل شول.

روسیې دا تور رد کړ او په ځواب کې یې د چک جمهوریت څو ډیپلوماتان له مسکو وایستل.

د نړۍ د سوک‌وهنې دوه اتلان تایسن فیوري او انتوني جوشوا لوبه کوي

د نړۍ د سوک‌وهنې د درانه وزن اتل تایسن فیوري

تمه ده د نړۍ د سوک‌وهنې د درانه وزن دوه اتلان تایسن فیوري او انتوني جوشوا سږ اګسټ لوبه وکړي.

د نړۍ د سوک‌وهنې د درانه وزن اتل تایسن فیوري پرون اعلان وکړ چې د انتوني جوشوا په وړاندې به په سعودي عربستان کې د اګسټ په ۱۴مه مخ شي.

فیوري په خپل ټویټر په دې اړه پیغام ورکړی: "د اګسټ په ۱۴مه ۲۰۲۱ کال کې به د ټولې نړۍ سترګې سعودي عربستان ته وي. زه بې‌صبرانه انتظار باسم څو د نړۍ په تر ټولو لوی سټېج باندې انتوني جوشوا مات کړم. دا به د ځمکې په سر تر ټولو لوی سپورټي پروګرام وي."

۳۲ کلن تایسن فیوري په ۳۱ لوبو کې ۳۰ ګټلي یوه‌یې مساوي کړې.

په وړاندې یې ۳۱ کلن انتوني جوشوا هم د نړۍ د لږترلږه درېیو سازمانونو د اتلولۍ کمربندونه لري. ۲۵ لوبې یې کړي یوازې یوه‌یې بایللې.

دوی دواړه بریتانویان دي.

نور راوښيه

XS
SM
MD
LG